Kapitulo 38

Unsay Akong Himoon sa Akong Kinabuhi?

“Kaniadto wala ko mabalaka sa akong umaabot. Apan sa hapit na akong mograduwar, akong naamgohan nga moatubang na ako sa tinuod nga kalibotan ug kinahanglang motrabaho ko aron makasustento ko sa akong kaugalingon.”​—Alex.

HANDURAWA nga nagplano ka sa pag-adto sa usa ka lugar nga layo kaayo. Tingali motan-aw una kag mapa aron mahibalo ka kon asa ang mas maayong agianan. Kaamgid niana ang pagplano sa imong palaaboton. “Daghan kaayo kag kapilian,” matod ni Michael, usa ka batan-on nga nag-alagad sa usa sa mga sangang buhatan sa mga Saksi ni Jehova. Unsay imong pilion? “Depende kana sa imong mga tumong,” matod ni Michael.

Isipa ang imong tumong ingong imong destinasyon. Lagmit dili ka makaabot didto kon wala kay direksiyon. Mas maayong mokuha kag mapa ug planoha kon asa ka moagi. Niining paagiha imong gipadapat ang tambag sa Proverbio 4:26: “Pataga ang alagianan sa imong tiil.” Sumala pa sa paghubad niana sa Contemporary English Version: “Sayra kon asa ka padulong.”

Sa umaabot, daghan kag himoong importanteng mga desisyon maylabot sa pagsimba, panarbaho, kaminyoon, pamilya, ug uban pang hinungdanong mga butang. Makahimo kag hustong mga desisyon kon nahibalo ka kon asa ka paingon. Ug samtang magplano ka kon unsay imong himoon  sa imong kinabuhi, dunay usa ka butang nga kinahanglang imong hatagag pagtagad.

“Hinumdomi ang Imong Maglalalang”

Aron magmalipayon, kinahanglang imong ipadapat ang mga pulong sa maalamong Haring Solomon: “Hinumdomi ang imong Maglalalang samtang bata ka pa.” (Ecclesiastes 12:1, Today’s English Version) Sa ato pa, ang desisyon nga imong himoon sa kinabuhi kinahanglang magpabanaag sa imong tinguha sa pagpahimuot sa Diyos.

Nganong angay natong unahon ang pagpahimuot sa Diyos? Ang Bibliya nag-ingon diha sa Pinadayag 4:11: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” Ang tanang linalang sa langit ug sa yuta adunay katarongan nga magmapasalamaton sa Maglalalang. Ikaw ba mapasalamaton sa iyang paghatag kanimog “kinabuhi ug gininhawa ug tanang butang”?  (Buhat 17:25) Dili ba mapukaw ka sa pagbalos kang Jehova nga Diyos agig pasalamat sa tanan niyang gihatag kanimo?

Aron mahinumdoman kanunay ang ilang Maglalalang, daghang batan-ong mga Saksi ni Jehova misulod sa bug-os panahong pag-alagad. Tagda ang pipila ka talagsaong mga pribilehiyo sa pag-alagad nga bukas alang kanimo.

Pagpayunir. Ang mga regular payunir mogugol ug mas dakong panahon sa pag-alagad. Nahanas sila ingong mga magtutudlo sa Bibliya tungod sa pagbansay nga ilang nadawat ug tungod sa ilang mga eksperyensiya.

Pag-alagad sa dapit nga dakog panginahanglan. Ang uban namalhin sa mga dapit nga diyutay lang ang mga magmamantala sa Gingharian. Ang uban nagtuon ug laing pinulongan ug nag-alagad sa silingang mga kongregasyon nga nagsulti niana nga pinulongan o kaha namalhin sa laing nasod. *

Misyonaryong pag-alagad. Ang kuwalipikadong mga payunir nga maayog panglawas gibansay aron sa pag-alagad sa ubang nasod. Malipayon ug mabungahon ang kinabuhi sa mga misyonaryo.

 Pag-alagad sa Bethel. Ang mga membro sa pamilyang Bethel nag-alagad diha sa mga sangang buhatan sa mga Saksi ni Jehova. Ang ubang sangang buhatan nag-imprenta ug nagpadalag literatura sa Bibliya.

Pag-alagad diha sa ubang nasod. Dunay mga igsoon nga giasayn ngadto sa ubang nasod aron sa pagtabang sa pagpanukod ug mga Kingdom Hall, Assembly Hall, ug mga pasilidad sa sanga.

Ministerial Training School. Ang kuwalipikadong mga ulitawong ansiyano ug ministeryal nga mga alagad gibansay maylabot sa mga kalihokan sa organisasyon ug sa pagpakigpulong sa publiko. Ang ubang nakagraduwar niini gipadala ngadto sa ubang nasod.

Pagplano

Ang bug-os panahong pag-alagad maoy usa ka dalayegong tumong ug daghan kinig mga panalangin. Apan kinahanglang pamalandongon kinig maayo. Pananglitan, pangutan-a ang imong kaugalingon, ‘Unsa ang akong mga abilidad ug katakos nga akong magamit sa pagsustento sa akong kaugalingon?’

 Si Kelly determinado gayod nga magpayunir, busa siya nagplano maylabot sa iyang panarbaho. “Mipili kog trabaho nga makasuportar sa akong pagpayunir,” siya miingon.

Si Kelly nagkuhag bokasyonal nga kurso. Tungod niini nakab-ot niya ang iyang pangunang tumong. “Gusto gyod kong moalagad sa bug-os panahon ug para nako wala nay mas hinungdanon pa kay niini,” miingon si Kelly. Malipayon si Kelly sa iyang desisyon. “Mao kini ang labing maayong desisyon nga akong nahimo,” siya miingon.

Pangutan-a ang Uban

Kon nagbiyahe ka sa lugar nga dili ka pamilyar, usahay kinahanglang mangutana ka sa uban kon asa moagi. Ingon usab niini kon magplano ka sa imong umaabot. Pangayog tambag sa uban. Ang Proverbio 20:18 nag-ingon: “Pinaagi sa tambag ang mga plano lig-on nga matukod.”

 Ang imong ginikanan makagiya kanimo. Ug makapangayo ka usab ug tambag sa hamtong nga mga Kristohanon nga nagpadapat sa tambag sa Diyos. “Tan-awa ang maayong panig-ingnan sa mga hamtong diha sa imong kongregasyon o sa duol nga kongregasyon,” misugyot ang 20-anyos nga si Roberto, kinsa membro sa pamilyang Bethel.

Labaw sa tanan, si Jehova nga Diyos andam motabang kanimo sa paghimog desisyon sa kinabuhi nga makalipay kaayo nimo. Busa pangaliyupo kaniya sa pagtabang kanimo aron mahibalo ka kon unsa ang iyang kabubut-on bahin sa imong palaaboton. (Efeso 5:17) Sa tanang bahin sa imong kinabuhi, sunda ang tambag sa Proverbio 3:5, 6: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”

Alang sa dugang impormasyon, tan-awa ang DVD nga “Young People Ask​—What Will I Do With My Life?” Kini mabatonan sa kapin sa 30 ka pinulongan

[Footnote]

TEKSTO

“‘Sulayi ako . . . ,’ miingon si Jehova sa mga panon, ‘kon dili ko ba buksan nganha kaninyo ang mga ganghaan sa tubig sa kalangitan ug magbubo nganha kaninyo sa panalangin hangtod nga wala nay panginahanglan.’”​—Malaquias 3:10.

SUGYOT

Pakig-estorya sa mga igsoon nga dugay na sa bug-os panahong pag-alagad. Pangutan-a sila kon nganong mao kanay ilang gipiling karera ug kon unsay ilang mga panalangin.

NAHIBALO KA BA . . . ?

Ang koryente makapaandar sa usa ka kasangkapan. Sa samang paagi, ang balaang espiritu sa Diyos makapalihok kanimo aron daghan kag mahimo sa pag-alagad kaniya.​—Buhat 1:8.

ANG AKONG PLANONG HIMOON!

Aron mas magmalipayon ako sa akong pag-alagad, makig-estorya ako kang ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Unsay imong mga abilidad ug katakos?

● Sa unsang mga paagi imong magamit ang imong mga abilidad sa pagdayeg kang Jehova?

● Unsang matanga sa bug-os panahong pag-alagad nga gihisgotan niini nga kapitulo ang gusto nimong sudlan?

[Blurb sa panid 313]

“Nakadayeg kaayo ko sa akong ginikanan. Ang ilang kadasig sa pag-alagad, ang ilang pagsagubang sa kalisod sa panalapi, ug ang ilang pagdasig kanako sa pagsulod sa bug-os panahong pag-alagad maayog epekto kanako.”​—Jarrod

 [Kahon sa panid 314]

Akong mga Tumong

Markahi ug isulat ang mga tumong nga gusto nimong kab-oton.

Mga Tumong sa Pag-alagad

□ Akong dugangan ang akong oras sa pag-alagad ug himoon nako kining ․․․․․ ka oras kada bulan

□ Magpahimutang ko ug ․․․․․ ka literatura kada bulan

□ Mobasa kog teksto sa Bibliya ngadto sa tagbalay kon mosangyaw

□ Mohimo kog ․․․․․ ka pagbalikduaw kada bulan

□ Makasugod kog pagtuon sa Bibliya

□Ubang mga tumong: ․․․․․

Mga Tumong Bahin sa Pagtuon

□ Mobasag ․․․․․ ka panid sa Bibliya kada adlaw

□ Mangandam alang sa senemanang mga tigom

□ Manukiduki niini nga mga topiko sa Bibliya: ․․․․․

Mga Tumong Diha sa Kongregasyon

□ Mohatag ug labing menos usa ka komento matag tigom

□ Makig-estorya sa usa ka edaran nga gusto nakong masuod

□ Moduaw sa usa ka tigulang o masakiton nga membro sa kongregasyon

□Ubang mga tumong: ․․․․․

Petsa Karon ․․․․․

Susiha kini nga listahan paglabay sa unom ka bulan, ug tan-awa kon unsay imong nahimo sa pagkab-ot sa imong mga tumong. Ipasibo kini o dugangi kon duna ka pay gustong kab-oton.

[Hulagway sa panid 312]

Mag-usik-usik ka lang sa imong kusog kon wala kay tumong ug dili gyod ka makaabot sa imong dulnganan