Kapitulo 10

Nganong Gipasakitan man Ko sa Akong Higala?

“Suod kaayo nako nga higala si Kerry. Ako siyang hapiton kada adlaw human sa trabaho ug pasakyon sa akong awto kay wala man siyay sakyanan. Apan sa kadugayan akong namatikdan nga morag gipahimuslan lang ko niya.

“Inigsakay niya sa awto magsige siyag estorya diha sa cell phone o mag-text. Dili man lang siya magpasalamat nga gipasakay nako siya, ug wala na siya moamot para sa gasolina. Dili usab makapadasig ang iyang inestoryahan. Naglagot ko sa akong kaugalingon kay dugay na nako siyang giagwanta!

“Usa ka adlaw niana giayo nakog sulti kang Kerry nga dili na ako makahapit niya human sa trabaho. Sukad niadto wala na siya makig-uban nako, nga nakapasamot sa akong pagtuo nga nakig-amiga lang siya nako tungod sa akong mahatag kaniya. Nasakitan gyod ko niini!”​—Nicole.

MAHITABO kini bisan sa suod nga managhigala. Sa primero halos dili sila magbulag apan pagkasunod adlaw dili na sila magtingganay. Nganong ang matam-is nga panaghigalaay kalit man lang motab-ang?

 ● Sa tan-aw ni Jeremy, daw nausab ang situwasyon sa dihang ang iyang suod nga higala mibalhin ug puyo sa layo. “Sukad niadto wala na gyod siya motawag nako,” si Jeremy miingon, “ug nasakitan kaayo ko.”

● Namatikdan ni Kerrin nga nausab ang kinaiya sa iyang suod nga amiga. “Nabalaka kaayo ko sa iyang tinamdan ug sinultihan,” miingon si Kerrin. “Sige lang siyag panaway sa mga butang nga importante para nako. Sa dihang nag-estoryahanay mi bahin niini, iya kong giingnan nga nagpakamatarong kono ako sa akong kaugalingon ug nga dili ko maunongon niya ug miingon pa siya nga ang among pag-amigahay wala makahatag ug kaayohan kaniya!”

● Ang panaghigalaay ni Gloria ug sa iyang suod nga amiga kalit lang natapos. “Sa primero nagkasinabot kaayo mi,” miingon si Gloria, “ug iya kong giingnan nga mora kog iyang igsoon. Dayon kalit lang nga dili na siya gustong makig-uban nako, ug daghan na kaayo siyag pasangil.”

● Nadaot ang relasyon ni Laura ug Daria sa dihang giilog ni Daria ang trato ni Laura. “Dugay kaayong mag-ukang ug estorya sa telepono si Daria ug ang akong trato,” miingon si Laura. “Giluiban ko sa akong suod nga higala ug nawad-an pa gyod kog trato!”

 Unsa May Nahitabo Namo?

Ang tanan masayop. Busa dili katingad-an nga duna gayoy mahimo o masulti ang imong higala nga makapasakit kanimo. Apan mahinumdom ka tingali nga may mga higayon nga nakapasakit ka usab sa uban. (Ecclesiastes 7:22) “Kitang tanan dili hingpit, ug may mga panahon nga makapasilo ta sa uban,” miingon ang batan-ong si Lisa. Kasagaran, ang gamayng dili-pagsinabtanay mahusay pinaagi sa pag-estoryahanay.

Apan sa ubang mga kahimtang, magkalinay-anay ang managhigala dili tungod sa usa ka panghitabo kondili tungod kay anam-anam nilang namatikdan nga lahi na sila kon ikomparar kaniadto. Hinumdomi nga samtang nagkahingkod ka, mausab ang imong mga hilig​—ug ang mga hilig usab sa imong higala. Unsay imong himoon kon imong mamatikdan nga anam-anam na kamo nga nagkalinay-anay?

Kon Unsay Himoon Aron Magkauliay Kamo

Nakasulay ka na ba nga nagisi ang imong paboritong sinina? Unsay imong gihimo? Imo ba kining gilabay o gipaayo? Tingali ang imong desisyon nagdepende sa kadako sa gisi ug sa imong pagkagusto  sa sinina. Kon paborito gayod nimo kana, tingali nangita kag paagi sa pag-ayo niana. Kasagaran, susama usab niini ang pwedeng himoon sa nadaot nga panaghigalaay. Ang posibilidad nga magkauli kamo nagdependeg dako sa kon unsay nahitabo ug kon unsa ka importante kanimo ang inyong panaghigalaay. *

Pananglitan, kon gipasakitan kag sulti o gibuhatan kag dili maayo, palabya lang una ang problema pinaagi sa pagsunod sa tambag sa Salmo 4:4: “Makigsulti kamo sa inyong kasingkasing, diha sa inyong higdaanan, ug maghilom kamo.” Busa pamalandong unag maayo sa dili pa nimo taposon ang inyong panaghigalaay. Gituyo ba to niya? Kon dili ka segurado, ayaw siyag dudahi. Kon mahimo ipadapat ang tambag sa 1 Pedro 4:8, nga nag-ingon: ‘Taboni ug gugma ang mga kasal-anan.’

Pamalandong usab kay basig ikaw poy nakaingon sa problema. Pananglitan, kon gitabi sa imong higala ang usa ka sekreto, dili kaha ikaw poy sayop kay imong gitug-an kaniya ang  sekreto nga dili angayng mahibaloan sa uban? Hunahunaa usab kay basin ikaw poy hinungdan kon nganong gibiaybiay ka​—tingali tungod sa imong sobrang pagkatabian. (Proverbio 15:2) Kon mao, pangutan-a ang imong kaugalingon, ‘Kinahanglan ba akong magbag-o aron tahoron ako sa akong higala?’

“Pwede Bang Estoryahan Nato Ni?”

Apan komosta kon sa imong tan-aw morag dili pwedeng basta na lang nimo kalimtan ang nahitabo? Mas maayong moduol ka sa imong higala. Apan ayawg pakig-estorya kaniya kon nasuko ka. Ang Bibliya nag-ingon: “Ang usa ka masuk-anong tawo nagasugnib sa panaglalis, apan siya nga mahinay sa kasuko nagapalinaw sa panag-away.” (Proverbio 15:18) Busa ayaw siya komprontaha kon init ka pag ulo, paghulat hangtod nga mokalma ka.

Sa dihang moduol ka sa imong higala, hinumdomi nga wala kay tuyo sa ‘pagpanimalos ug daotan sa daotan.’ (Roma 12:17)  Hinunoa, miduol ka kay gusto nimo nga mahusay ang problema ug aron kamo magkauli. (Salmo 34:14) Busa isulti ang imong gibati. Mahimong moingon ka, “Dugay-dugay na tang managhigala. Pwede bang estoryahan nato ni?” Kon mahibalo ka na sa hinungdan, dili ka na maglisod sa pagpangitag paagi nga magkauli kamo. Bisag dili siya gustong makig-estorya nimo, wala ka nay angayng kabalak-an kay misulay ka nga mabalik ang inyong maayong relasyon.

Bisan tuod ‘dunay mga higala nga hilig mangdaot,’ makasalig ka nga duna usay ‘higala nga mounong labaw pa kay sa igsoon.’ (Proverbio 18:24) Tinuod, bisan ang kinasuorang managhigala may mga problema usahay. Kon mahitabo kana, pangita gayod ug paagi nga magkauli kamo. Sa pagkatinuod, ang imong pagkaandam sa pagsulbad sa problema maoy pamatuod nga nagkahamtong ka na.

BASAHA ANG DUGANG PA BAHIN NIINI NGA ULOHAN DIHA SA TOMO 1, KAPITULO 8

SA SUNOD NGA KAPITULO

Ang ubang mga batan-on dugay kaayong makig-estorya diha sa Internet. Ngano man?

[Footnote]

TEKSTO

“Kon mahimo, kutob sa inyong maarangan, makigdinaitay sa tanang tawo.”​—Roma 12:18.

SUGYOT

Ayawg hukmi ang imong higala kondili hatagi siyag higayon sa pagpatin-aw.​—Proverbio 18:13.

NAHIBALO KA BA . . . ?

Ang mga tawong maayog relasyon sa usag usa dili igihan. (Proverbio 25:17) Sa laing bahin, madaot ang relasyon kon ang usa igihan sa panahon ug atensiyon sa iyang higala.

ANG AKONG PLANONG HIMOON!

Kon kinahanglan kong makig-estorya sa akong higala tungod sa iyang nahimo o nasulti nga nakapasakit kanako, kini ang akong isulti ․․․․․

Bisag naguol o nasuko ko sa gihimo sa akong higala, kini ang akong himoon aron dili mi mag-away ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Nganong magkalinay-anay usahay ang managhigala?

● Unsang mga kasaypanan ang mapalabay lang nimo, ug unsang mga kasaypanan ang kinahanglang ipakig-estorya nimo sa imong higala nga nakapasakit kanimo?

● Kon nakasulay ka na nga gipasakitan sa imong higala, unsay imong nakat-onan gikan niini?

● Unsang panagana ang imong himoon aron dili ka kanunayng mapasakitan sa imong higala?

[Blurb sa panid 95]

“Nasayop ko kay abi nakog dili gyod mi mag-away sa akong higala. Angay unta nga gipamatian ug gisuportahan nako siya ug wala unta nako himoang dakong isyu ang iyang mga sayop. Nasabtan na nako karon nga molampos lang ang panaghigalaay kon atubangon ug sulbaron ninyong duha ang mga pagsulay ug mga problema.”​—Keenon

[Hulagway sa panid 94]

Ang dili-pagsinabtanay sa managhigala samag gisi sa sinina​—kini mahimong ayohon