Among Pagdapit Kanimo

Nalingaw kami sa pagpakig-estorya kanimo pinaagi sa mga panid niining brosyura. Nanghinaot kami nga nalingaw ka sa pagkahibalo ug dugang bahin sa mga Saksi ni Jehova. Palihog dawata ang among imbitasyon nga moduaw kanamo diha sa among lokal nga Kingdom Hall. Tan-awa kon sa unsang paagi gidumala ang among mga tigom. Tan-awa kon sa unsang paagi kami naningkamot sa pagpaambit sa uban sa maayong balita bahin sa usa ka paraisong yuta ilalom sa Gingharian ni Kristo.

Gisaad kini sa Diyos. “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” (2 Pedro 3:13) Daghang siglo ang nanglabay. Hapit nang matapos ang paghulat. Gipaila kini sa mga kahimtang sa kalibotan.

“Samtang makita ninyo nga ang adlaw nagkaduol na,” miingon si apostol Pablo, ‘magmahunahunaon sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom.’ (Hebreohanon 10:​24, 25) Giawhag ka namo sa pagsunod sa tambag ni Pablo pinaagi sa pagpakigtigom uban kanamo.