Mga Paagi nga Gigamit Nila sa Pagpaambit sa Maayong Balita

ANG mga Kristohanon gisugo sa “paghimog mga tinun-an sa katawhan sa tanang kanasoran,” apan wala kini magpasabot nga gamiton nila ang pagpit-os o danihon ang uban pinaagi sa pagpamugos. Ang sugo ni Jesus mao ang “pagsulti sa maayong balita ngadto sa mga maaghop,” sa “pagbugkos sa mga may gun-ob nga kasingkasing,” sa “paghupay sa tanang nagbangotan.” (Mateo 28:19; Isaias 61:1, 2; Lucas 4:18, 19) Ang mga Saksi ni Jehova naningkamot sa pagbuhat niini pinaagi sa pagmantala sa maayong balita gikan sa Bibliya. Sama sa manalagnang si Ezequiel sa kakaraanan, ang mga Saksi ni Jehova karon naningkamot sa pagpangita niadtong kinsa “nagapanghupaw ug nagaagulo tungod sa tanang dulumtanang mga butang nga ginahimo.”—Ezequiel 9:4.

Ang labing iladong paagi nga gigamit nila sa pagpangita niadtong naguol tungod sa presenteng mga kahimtang mao ang pagpamalaybalay. Busa gihimo nila ang positibong paningkamot aron maabot ang mga tawo, sama sa gibuhat ni Jesus sa dihang “siya mipanaw gikan sa siyudad ug siyudad ug gikan sa balangay ug balangay, nga nagwali ug nagpahayag sa maayong balita sa gingharian sa Diyos.” Gibuhat usab kana sa iyang unang mga tinun-an. (Lucas 8:1; 9:1-6; 10:1-9) Karong adlawa, diin posible, ang mga Saksi ni Jehova naningkamot sa pagduaw sa matag balay pipila ka beses sa usa ka tuig, nga nagtinguha sa pagpakigsulti sa tagbalay sulod sa pipila ka minutos bahin sa usa ka makaiikag o gikabalak-an nga isyu sa maong dapit o sa kalibotan. Ang usa o duha ka teksto mahimong konsiderahon, ug kon magpakitag interes ang tagbalay, mahimong hikayon sa Saksi nga moduaw pag-usab sa usa ka kombenyenteng panahon alang sa dugang panaghisgot. Mahimong mabatonan ang mga Bibliya ug literatura nga nagsaysay sa Bibliya, ug kon gusto sa tagbalay, dumalahon ang usa ka pagtuon sa Bibliya sa balay nga walay bayad. Milyonmilyon niining makatabang nga mga panagtuon sa Bibliya ang ginahimo nga regular uban sa mga tawo ug mga pamilya sa tibuok kalibotan.

Ang laing paagi diin ang “maayong balita sa gingharian” gipahayag ngadto sa uban maoy pinaagi sa mga tigom nga ginahimo diha sa lokal nga mga Kingdom Hall. Ang mga Saksi nagdumala ug mga tigom diha kada semana. Ang usa ka tigom mao ang pakigpulong publiko bahin sa usa ka ulohan nga gikaikagan sa pagkakaron, nga sundan sa pagtuon sa usa ka tema o tagna sa Bibliya, ginamit ang magasing Bantayanang Torre ingong tinubdang materyal. Ang laing tigom mao ang usa ka tunghaan sa pagbansay sa mga Saksi aron  mahimong mas maayong mga magmamantala sa maayong balita, nga sundan sa usa ka bahin nga gigugol sa paghisgot sa buluhatong pagsangyaw diha sa lokal nga teritoryo. Dugang pa, kas-a sa usa ka semana ang mga Saksi magtigom diha sa pribadong mga balay, sa gagmayng mga grupo, aron magtuon sa Bibliya.

Kining tanang tigom bukas alang sa publiko. Wala gayoy mga pagpangolekta ug salapi. Ang maong mga tigom maghatag ug kaayohan sa tanan. Ang Bibliya nag-ingon: “Angay natong susihon kon sa unsang paagi ang matag usa kanato labing maayong makapukaw sa uban sa paghigugma ug sa aktibong pagkamaayo, nga dili mopalayo sa atong mga tigom, sama sa ginabuhat sa uban, kondili magdinasigay sa usag usa, ilabina kay nakita ninyo nga ang Adlaw nagsingabot na.” Ang pribadong pagtuon ug pagpanukiduki kinahanglanon, apan ang pagpakigtigom sa uban makapadasig: “Maingon nga ang puthaw makapahait sa puthaw, mao man usab ang usa ka tawo makapahait sa kinaadman sa laing tawo.”—Hebreohanon 10:24, 25; Proverbio 27:17, The New English Bible.

Gigamit usab pag-ayo sa mga Saksi ang mga kahigayonan sa pagpakigsulti bahin sa maayong balita sa dihang makahimamat sila ug ubang mga tawo diha sa ilang adlaw-adlawng kinabuhi. Tingali nakigbayloay lamang ug pipila ka pulong sa usa ka silingan o sa usa ka kaubang biyahedor diha sa bus o ayroplano, mas taas nga kabildohay uban sa usa ka higala o paryente, o pagpakighisgot uban sa kauban sa trabaho sa tingpaniudto. Ang dakong bahin sa pagsangyaw nga gibuhat ni Jesus sa dinhi pa siya sa yuta maoy sa ingon niining matanga—samtang naglakaw siya sa baybayon, naglingkod sa bakilid, nagkaon diha sa balay sa usa ka tawo, nagtambong ug kasal, o naglawig sakay sa usa ka sakayan sa pangisda diha sa Dagat sa Galilea. Nanudlo siya diha sa mga sinagoga ug sa templo sa Jerusalem. Bisan diin siya, nakakita siyag mga kahigayonan sa pagsulti bahin sa Gingharian sa Diyos. Ang mga Saksi ni Jehova naningkamot sa pagsunod sa iyang mga tunob niining bahina usab.—1 Pedro 2:21.

 PAGSANGYAW PINAAGIG EHEMPLO

Walay usa niining mga paagiha sa pagpahibalo kanimo sa maayong balita ang mahimong makahuloganon kanimo kon ang usa nga nagpahibalo kanimo wala magpadapat sa mga pagtulon-an sa iyang kaugalingon. Ang pagsultig usa ka butang ug paghimo ug lain maoy pagkasalingkapaw, ug tungod sa relihiyosong pagkasalingkapaw milyonmilyon ang mitalikod sa Bibliya. Dili angayng basolon ang Bibliya. Nabatonan sa mga eskriba ug Pariseo ang Hebreohanong Kasulatan, apan gihukman sila ni Jesus ingong mga salingkapaw. Gihisgotan niya ang ilang pagbasa sa Balaod ni Moises, dayon midugang niini ngadto sa iyang mga tinun-an: “Ang tanang butang nga ilang isulti kaninyo, buhata ug sunda, apan ayaw ninyo pagbuhata ang sumala sa ilang mga buhat, kay sila mosulti apan dili mobuhat.” (Mateo 23:3) Ang pagkahimong ehemplo sa usa ka Kristohanon sa matarong nga pagkinabuhi mas makapadani kay sa daghang oras nga pagwali. Gipunting kini ngadto sa Kristohanong mga asawa nga may dili-magtutuong mga bana: “Sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi.”—1 Pedro 3:1, 2.

Busa, ang mga Saksi ni Jehova naningkamot sa pagrekomendar sa maayong balita ngadto sa uban niining paagiha usab: pinaagi sa pagkahimong maayong ehemplo sa Kristohanong panggawi nga ilang girekomendar sa uban. Naningkamot sila sa ‘pagbuhat sa uban sa gusto nilang buhaton sa uban kanila.’ (Mateo 7:12) Naningkamot sila sa pagbuhat niini ngadto sa tanang tawo, dili lamang sa mga isigka-Saksi, higala, silingan, o mga paryente. Tungod kay dili hingpit, dili sila kanunayng molampos sa bug-os. Apan maoy tinguha sa ilang kasingkasing nga mohimog maayo ngadto sa tanang tawo dili lamang sa pagpahibalo kanila sa maayong balita sa Gingharian kondili sa pagtabang usab sa uban kon posible.—Santiago 2:14-17.

[Hulagway sa panid 19]

Hawaii

[Hulagway sa panid 19]

Venezuela

[Hulagway sa panid 19]

Yugoslavia

[Mga hulagway sa panid 20]

Ang mga Kingdom Hall, nga praktikal ug disenyo, maoy mga dapit alang sa panaghisgot sa Bibliya

[Mga hulagway sa panid 21]

Sa ilang pamilyahanong kinabuhi ug sa ilang pakigkontak sa uban, ang mga Saksi sinserong naningkamot sa pagbuhat sa mga butang nga ilang gipasiugda