Mga Pangutana nga Kasagarang Gisukna sa Interesadong mga Tawo

Kon ang Dios Gugma, nganong gitugotan man niya ang pagkadaotan?

TINUOD nga gitugotan sa Diyos ang pagkadaotan, ug milyonmilyon sa yuta ang tinuyong naghimo niana. Pananglitan, nagdeklarar sila ug mga gubat, naghulog ug mga bomba diha sa mga bata, naglaglag sa yuta, ug nagpahinabog kanihit sa pagkaon. Milyonmilyon ang nanabako ug nakanser sa baga, nanapaw ug nataptan ug mga sakit nga mapasa pinaagi sa pakigsekso, naghinobra sa pag-inom ug alkoholikong ilimnon ug natakboyan ug cirrhosis sa atay, ug uban pa. Ang maong mga tawo wala gayod magtinguha nga matapos ang tanang pagkadaotan. Buot lamang nilang mawagtang ang mga pag-antos nga moresulta tungod sa pagbuhat niana. Sa dihang anihon na nila ang ilang gipugas, sila motuaw, “Nganong ako man?” Ug basolon nila ang Diyos, sumala sa giingon sa Proverbio 19:3: “Ang kabuangan sa usa ka tawo makapahugno sa iyang kinabuhi, ug dayon maghambin siyag kayugot batok sa GINOO.” (The New English Bible) Ug kon hunongon sa Diyos ang ilang buhat nga daotan, moreklamo sila kay nawad-an silag kagawasan sa pagbuhat niana!

Ang pangunang rason ni Jehova sa pagtugot sa pagkadaotan mao ang pagtubag sa hagit ni Satanas. Si Satanas nga Yawa miingon nga ang Diyos dili makaarang sa pagbutang ug mga tawo sa yuta nga magmaunongon Kaniya ilalom sa pagsulay. (Job 1:6-12; 2:1-10) Gitugotan ni Jehova si Satanas nga magpabilin aron makahigayon siya sa pagpamatuod sa iyang hagit. (Exodo 9:16) Si Satanas nagpadayon sa pagpahinabog kaalaotan karon, aron makigbatok sa Diyos ang mga tawo, samtang naningkamot siya sa pagpamatuod sa iyang hagit. (Pinadayag 12:12) Bisan pa niana, gihuptan ni Job ang iyang integridad. Mao man usab si Jesus. Gibuhat usab kana sa matuod nga mga Kristohanon karon.—Job 27:5; 31:6; Mateo 4:1-11; 1 Pedro 1:6, 7.

Gusto kong motuo sa usa ka yutan-ong paraiso diin ang mga tawo mabuhi sa walay kataposan, apan dili ba morag dili kana katuohan?

Dili, sumala sa Bibliya. Morag dili kini katuohan tungod lamang kay naandan na sa tawo ang pagkadaotan sulod sa daghang siglo. Gilalang ni Jehova ang yuta ug gisugo ang tawo nga pun-on kini ug matarong nga mga lalaki ug babaye nga mag-atiman sa mga tanom ug mga mananap niini ug mentinahon ang kanindot niini inay laglagon kini. (Tan-awa ang mga panid 12 ug 17.) Inay kay dili katuohan kanang gisaad nga Paraiso, ang presenteng makaguol nga  kahimtang daotan kaayo nga dili na angayng magpadayon. Pulihan kini sa Paraiso.

Unsaon nako pagtubag ang mga tawo nga nagbiaybiay ug nag-ingon nga ang Bibliya maoy sugilambong ug dili-siyentipikanhon?

Ang pagtuo niining maong mga saad wala magpasabot nga matuotuohon ka. “Ang pagtuo mosunod sa butang nga nadungog.” Pinaagi sa pagtuon sa Pulong sa Diyos, ang kaalam niini madayag ug modako ang pagtuo.—Roma 10:17; Hebreohanon 11:1.

Ang arkeolohiya sa Bibliya nagpamatuod sa dakong bahin sa makasaysayanhong pagkatukma sa Bibliya. Ang tinuod nga siyensiya kaharmonya sa Bibliya. Ang mosunod nga mga kamatuoran dugay nang anaa sa Bibliya sa wala pa kini madiskobrehi sa sekular nga mga eskolar: ang pagkasunodsunod sa ang-ang nga giagian sa yuta sa pagkaugmad niini, nga ang yuta lingin, nga kini nagbitay sa wala diha sa kawanangan, ug nga ang mga langgam molalin.—Genesis, kapitulo 1; Isaias 40:22; Job 26:7; Jeremias 8:7.

Ang pagkainspirado sa Bibliya gipakita pinaagi sa nangatuman nga mga tagna. Gitagnang daan ni Daniel ang pagtungha ug pagkapukan sa mga gahom sa kalibotan, maingon man ang panahon sa dihang ang Mesiyas moabot ug pagapatyon. (Daniel, mga kapitulo 2, 8; Dan 9:24-27) Karon, nagakatuman pa ang ubang mga tagna, nga nagpaila niini ingong “kataposang mga adlaw.” (2 Timoteo 3:1-5; Mateo, kapitulo 24) Ang maong pagkahibalong-daan dili mahimo sa tawo. (Isaias 41:23) Alang sa dugang pamatuod, tan-awa ang mga librong Ang Bibliya—Pulong sa Diyos o sa Tawo? ug Is There a Creator Who Cares About You?, nga gipatik sa Watchtower Bible and Tract Society.

Sa unsang paagi makat-onan nako ang pagtubag sa mga pangutana bahin sa Bibliya?

Kinahanglang tun-an nimo ang Bibliya ug mamalandong niini, sa samang higayon mangayo sa espiritu sa Diyos sa paggiya kanimo. (Proverbio 15:28; Lucas 11:9-13) “Kon aduna man kaninyoy nakulangan ug kaalam,” nag-ingon ang Bibliya “magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya.” (Santiago 1:5) Dugang pa, dunay mga giya sa pagtuon sa Bibliya nga angayng susihon. Kasagaran gikinahanglan ang tabang gikan sa uban, sama sa dihang gitun-an ni Felipe ang Etiopianhon. (Buhat 8:26-35) Ang mga Saksi ni Jehova nagdumalag mga pagtuon sa Bibliya nga walay bayad uban sa interesadong mga tawo diha sa ilang mga balay. Ayaw pagpanuko sa paghangyo niini nga serbisyo.

Nganong daghan ang misupak sa mga Saksi ni Jehova ug nagsulti kanako nga dili patun-on uban nila?

Gisupak ang pagsangyaw ni Jesus, ug siya miingon nga supakon usab ang iyang mga sumusunod. Sa dihang ang uban nadani sa pagpanudlo ni Jesus, ang relihiyosong mga magsusupak mitubag: “Nahisalaag ba usab kamo? Aduna bay usa sa mga magmamando o sa mga Pariseo nga nagbutang ug pagtuo kaniya?” (Juan 7:46-48;  15:20) Daghan sa nagtambag kanimo nga dili magtuon uban sa mga Saksi ang walay kahibalo o kaha mapihigon. Magtuon uban sa mga Saksi ug tan-awa mismo kon mouswag ba ang imong pagsabot sa Bibliya o dili.—Mateo 7:17-20.

Nganong ang mga Saksi moduaw sa mga tawo nga aduna nay relihiyon?

Sa pagbuhat niini gisundog nila ang ehemplo ni Jesus. Miadto siya sa mga Hudiyo. Ang mga Hudiyo may kaugalingong relihiyon, apan sa daghang paagi gitalikdan niini ang Pulong sa Diyos. (Mateo 15:1-9) Ang tanang nasod dunay lainlaing matang sa mga relihiyon, Kristohanon man kono o dili-Kristohanon. Hinungdanon kaayong mahuptan sa mga tawo ang mga pagtulon-an nga nahiuyon sa Pulong sa Diyos, ug ang mga paningkamot sa mga Saksi sa pagtabang kanila sa pagbuhat niana maoy pagpakitag gugma sa silingan.

Nagtuo ba ang mga Saksi nga ang ilang relihiyon mao lang ang husto?

Si bisan kinsa nga seryoso sa iyang relihiyon angayng maghunahuna nga kini mao ang husto. Kay kon dili, nganong mianib man siya niini? Ang mga Kristohanon gitambagan: “Tinoa ang tanang butang; pangupti pag-ayo ang maayo.” (1 Tesalonica 5:21) Kinahanglang tinoon sa usa ka tawo nga ang iyang mga pagtulon-an mapaluyohan sa Kasulatan, kay adunay usa lamang ka matuod nga pagtuo. Gipamatud-an kini sa Efeso 4:5, nga naghisgot ug “usa ka Ginoo, usa ka pagtuo, usa ka bawtismo.” Wala mouyon si Jesus sa moderno, luag nga panglantaw nga adunay daghang dalan, daghang relihiyon, nga tanan padulong sa kaluwasan. Hinunoa, siya miingon: “Sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.” Ang mga Saksi ni Jehova nagtuo nga nakaplagan na nila kini. Kay kon wala pa, mangita unta silag laing relihiyon.—Mateo 7:14.

Nagtuo ba sila nga sila lamang ang maluwas?

Wala. Milyonmilyong nabuhi sa nanglabayng mga siglo ug kinsa dili mga Saksi ni Jehova ang mabanhaw ug makabatog kahigayonan nga mabuhi. Daghang buhi karon ang mahimong mobarog pa dapig sa kamatuoran ug pagkamatarong una pa sa “dakong kasakitan,” ug sila mamaluwas. Dugang pa, miingon si Jesus nga dili nato angayng hukman ang usag usa. Kita nagtan-aw sa panggawas nga panagway; ang Diyos nagtan-aw sa kasingkasing. Siya makakita sa tukma ug maghukom nga maluluy-on. Gitugyan niya ang pagpanghukom ngadto kang Jesus, dili kanato.—Mateo 7:1-5; 24:21; 25:31.

Unsang pinansiyal nga mga kontribusyon ang gidahom niadtong nagatambong sa mga tigom sa mga Saksi ni Jehova?

Mahitungod sa mga amot nga salapi, si apostol Pablo miingon: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” (2 Corinto 9:7) Diha sa mga Kingdom Hall ug mga awditoryum alang sa kombensiyon sa mga Saksi ni Jehova, wala gayoy himoong pagpangolekta ug kuwarta. Dunay mga kahon nga gibutang aron kombenyente alang ni bisan kinsa nga gustong moamot sa paghulog sa ilang donasyon. Walay nahibalo kon unsay gihatag sa uban o kon duna bay gihatag ang uban. Ang pipila makaarang sa paghatag ug labaw kay sa uban; ang pipila tingali walay ikahatag. Gipakita ni Jesus ang hustong panglantaw sa dihang mikomento siya bahin sa panudlanan sa templo sa Jerusalem ug niadtong nanag-amot: Ang kapasidad sa usa sa paghatag ug ang espiritu sa paghatag maoy hinungdanon, dili ang gidak-on sa kuwarta.—Lucas 21:1-4.

Kon mahimo na akong usa sa mga Saksi ni Jehova, dahomon ba nga mosangyaw ako sama kanila?

 Sa dihang ang usa mapuno sa kahibalo bahin sa gisaad nga yutan-ong Paraiso ilalom sa Gingharian ni Kristo, gusto kining ipaambit sa usa ngadto sa uban. Gusto usab nimong buhaton kana. Maayong balita kana!—Buhat 5:41, 42.

Ang pagbuhat niini maoy hinungdanong paagi sa pagpakita nga ikaw maoy tinun-an ni Jesu-Kristo. Sa Bibliya, si Jesus gitawag ug “matinumanon ug matuod nga saksi.” Sa dinhi pa sa yuta siya nagwali, nga nag-ingon: “Ang gingharian sa mga langit haduol na,” ug iyang gipadala ang iyang mga tinun-an aron usab sa pagwali. (Pinadayag 3:14; Mateo 4:17; 10:7) Sa ulahi, gisugo ni Jesus ang iyang mga sumusunod: “Busa panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila.” Nagtagna usab siya nga una pa ang kataposan, “kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran.”—Mateo 24:14; 28:19, 20.

Adunay daghang paagi sa pagpahayag niining maayong balita. Ang pagpakigkabildo sa mga higala ug mga kaila kasagarang mag-abli sa dalan sa pagbuhat niini. Ang uban naghimo niana pinaagi sa pagsulat o pinaagi sa paggamit ug telepono. Ang uban magpadalag literatura nga naghisgot ug ulohan nga ilang gihunahuna nga ilabinang makapainteres sa usa ka kaila. Sa tinguha nga walay masayloan, ang mga Saksi mamalaybalay dala ang maong mensahe.

Anaa sa Bibliya kining mainitong pagdapit: “Ang espiritu ug ang pangasaw-onon nagpadayon sa pag-ingon: ‘Umari ka!’ Ug si bisan kinsa nga nagpatalinghog paingna: ‘Umari ka!’ Ug si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.” (Pinadayag 22:17) Ang  pagpahibalo sa uban mahitungod sa Paraisong yuta ug sa mga panalangin niini pagahimoon nga kinabubut-on, gikan sa kasingkasing nga natugob sa tinguha nga ipaambit kining maayong balita.

Segurado kami nga aduna ka pay laing mga pangutana bahin sa mga Saksi ni Jehova ug sa ilang mga pagtulon-an. Tingali ang ubang mga isyu maoy kontrobersiyal. Gusto namong tubagon ang imong mga pangutana. Gamay rag luna kining maong brosyur, busa gidapit ka namo sa pagpangutana sa mga Saksi sa imong dapit. Mahimo mo kini diha sa ilang mga tigom sa Kingdom Hall o sa dihang moduaw sila sa imong balay. O mahimong ipadala nimo ang imong mga pangutana sa mga Saksi ni Jehova, ginamit ang tukmang direksiyon nga nalista sa ubos.