Hinungdanong mga Panghitabo sa Modernong-Adlawng Kasaysayan sa mga Saksi ni Jehova

1870 Si Charles Taze Russell ug ang usa ka grupo gikan sa Pittsburgh ug Allegheny, Pennsylvania, T.B.A., nagsugod sa sistematikong pagtuon sa Bibliya

1870-75 Nakat-onan ni Russell ug sa iyang mga kauban sa pagtuon nga sa dihang si Kristo mobalik pag-usab siya dili makita sa tawhanong mga mata ug nga ang tumong sa iyang pagbalik naglakip sa pagpanalangin sa tanang kabanayan sa yuta

1872 Si Russell ug ang iyang grupo sa pagtuon nakaapresyar sa bili sa lukat nga gitagana ni Kristo alang sa katawhan

1876 Si C. T. Russell nakadawat ug kopya sa Herald of the Morning, niadtong Enero; nakigkita kang N. H. Barbour, ang editor, niadtong ting-init sa Philadelphia, Pennsylvania

Artikulo ni C. T. Russell, nga gipatik sa Oktubre nga isyu sa Bible Examiner, sa Brooklyn, New York, nagpunting sa 1914 ingong kataposan sa mga Panahon sa mga Hentil

1877 Ang librong Three Worlds gipatik, ingong bunga sa duyog nga paningkamot ni N. H. Barbour ug C. T. Russell

Si C. T. Russell nagpublikar sa pulyetong The Object and Manner of Our Lords’ Return, sa buhatan sa Herald of the Morning, sa Rochester, New York

1879 Gisibog ni Russell ang tanang suportar gikan sa Herald of the Morning, niadtong Mayo, tungod sa tinamdan ni Barbour sa lukat

Unang isyu sa Zion’s Watch Tower and Herald of Christ’s Presence, nga pinetsahag Hulyo 1879

1881 Unang mga tract nga gipatik sa mga Estudyante sa Bibliya; una pa sa 1914, ang tinuig nga giapod-apod nga mga tract mikabat ug tinagpulo ka milyong kopya diha sa 30 ka pinulongan

Giorganisar ang Zion’s Watch Tower Tract Society; nagpahibalo nga “Nanginahanglan ug 1,000 ka Magwawali,” ang pipila aron mahimong regular nga mga colporteur, ang uban aron sa paggugol sa ilang maarangan nga panahon sa pagpakaylap sa kamatuoran sa Bibliya

Pag-apod-apod sa 300,000 ka kopya sa Food for Thinking Christians ngadto sa mga magsisimba sa dagkong mga siyudad sa Britanya

1883 Ang Watch Tower nakaabot sa Tsina; ang kanhi Presbiteryanong misyonaryo didto sa wala madugay nagsangyaw ngadto sa uban

1884 Ang Food for Thinking Christians nakaabot sa Liberia, Aprika; usa ka mapasalamatong magbabasa misulat sa paghangyog mga kopya aron iapod-apod

Ang Zion’s Watch Tower Tract Society legal nga narehistro sa Pennsylvania; sa opisyal gitala niadtong Disyembre 15

1885 Ang mga publikasyon sa Watch Tower gibasa na sa pila ka gutom-sa-kamatuoran nga mga tawo sa Amerika del Norte ug del Sur, Uropa, Aprika, ug Asia

1886 Ang The Divine Plan of the Ages gipublikar, ang unang tomo sa serye nga gitawag Millennial Dawn (sa ulahi nailhang Studies in the Scriptures)

 1889 Gitukod ang Bible House sa Arch Street, sa Allegheny, Pennsylvania, ingong hedkuwarter alang sa Sosyedad

1891 Ang unang panagkatigom sa mga Estudyante sa Bibliya nga ilang gitawag ug kombensiyon, sa Allegheny, Pennsylvania (Abril 19-25)

1894 Ang nagapanawng mga magtatan-aw nga ngadtongadto nailhang mga pilgrim (karong adlawa, mga magtatan-aw sa sirkito ug distrito) gipadala may kalabotan sa programa sa Sosyedad sa pagduaw sa mga kongregasyon

1900 Ang unang sangang buhatan sa Watch Tower Society gibuksan, sa Londres, Inglaterra

Ang pagsangyaw sa mga Estudyante sa Bibliya gihimo sa 28 ka nasod, ang mensahe nga ilang gisangyaw nakaabot sa 13 ka ubang kayutaan

1903 Madasigong balay-sa-balay nga pag-apod-apod sa libreng mga tract sa matag Dominggo; una niana, ang kadaghanan sa pag-apod-apod sa tract gihimo sa kadalanan duol sa mga simbahan

1904 Ang mga sermon ni C. T. Russell migula sa regular sa mga mantalaan; sulod sa usa ka dekada kana gipatik sa mga 2,000 ka mantalaan

1909 Ang hedkuwarter sa Sosyedad gibalhin sa Brooklyn, New York, niadtong Abril

1914 Unang pagpasalida sa “Photo-Drama of Creation,” sa New York, sa Enero; sa wala pa matapos ang tuig, kana nakita sa kapin sa 9,000,000 nga tumatan-aw sa Amerika del Norte, Uropa, ug Australia

Sa Oktubre 2, sa lawak kan-anan sa Bethel sa Brooklyn, si C. T. Russell nagpamatuod, “Ang mga Panahon sa mga Hentil natapos na”

Ang mga Estudyante sa Bibliya aktibong nagwali sa 43 ka kayutaan; 5,155 ang nakig-ambit sa pagsangyaw ngadto sa uban; ang gikatahong mitambong sa Memoryal maoy 18,243

1916 Kamatayon ni C. T. Russell sa pangedarong 64, niadtong Oktubre 31, samtang nagbiyahe sa tren agi sa Texas

1917 Si J. F. Rutherford nahimong presidente sa Sosyedad niadtong Enero 6, tapos sa pagdumala sa ehekutibong komite nga may tulo ka membro sa mga kalihokan sa Sosyedad sulod sa mga duha ka bulan

Ang librong The Finished Mystery giluwatan sa pamilyang Bethel sa Brooklyn niadtong Hulyo 17; upat nga nag-alagad sa hunta direktiba sa Sosyedad kusganong misupak niana; human niadto daghang kongregasyon ang nabahin

1918 Ang diskursong “Ang Kalibotan Natapos Na​—Minilyon nga Buhi Karon Mahimong Dili na Mamatay” unang gipahayag, niadtong Pebrero 24, sa Los Angeles, California. Niadtong Marso 31, sa Boston, Massachusetts, ang pakigpulong nga nag-ulohang “Ang Kalibotan Natapos Na​—Minilyon nga Buhi Karon Dili na Gayod Mamatay”

Si J. F. Rutherford ug suod nga mga kauban ginganlan diha sa pederal nga mando nga pinetsahan ug Mayo 7 aron dakpon; ang bista nagsugod niadtong Hunyo 5; gisentensiyahan sila niadtong Hunyo 21 (ang usa sa Hulyo 10) ug taas nga mga termino sa pederal nga bilanggoan

Ang hedkuwarter sa Brooklyn gisirhan niadtong Agosto, ug ang palakaw niana gibalik sa Pittsburgh sulod sa kapin sa usa ka tuig

1919 Ang opisyales sa Sosyedad ug ang ilang mga kauban gipagawas nga piyansado, niadtong Marso 26; sa Mayo 14 ang korte sa apelasyon mibali sa desisyon sa ubos nga korte, ug usa ka bag-ong pagbista ang gimando; sa misunod nga tuig, sa Mayo 5, ang kagamhanan misibog gikan sa kaso, nga dili na magdemanda

 Sa pagsuta kon kaha ang buluhaton sa mga Estudyante sa Bibliya mahimong ibalik, si J. F. Rutherford mihikay nga mohatag sa publikong diskurso “Ang Paglaom sa Naalaot nga Katawhan,” sa Clune’s Auditorium, sa Los Angeles, California, niadtong Mayo 4; dili makasulod ang tanan, ug ang pakigpulong kinahanglang ipahayag sa ikaduhang higayon

Ang mga Estudyante sa Bibliya nagkombensiyon sa Cedar Point, Ohio, pagka Septiyembre 1-8; ang umaabot nga pagpublikar sa magasing The Golden Age (karon nailhang Pagmata!) gipahibalo

Ang Bulletin (karon nailhang Atong Ministeryo sa Gingharian) gipublikar ingong pagdasig sa pag-alagad sa kanataran

Ang taho alang sa tuig nagpakita nga 5,793 sa mga Estudyante sa Bibliya ang aktibong nagsangyaw sa 43 ka kayutaan; ang gitahong mitambong sa Memoryal, 21,411

1920 Ang Watch Tower Society nagtukod ug kaugalingong imprintahanan niini, sa Brooklyn

1922 Ang radyo unang gigamit ni J. F. Rutherford, niadtong Pebrero 26, sa California, aron sa pagsibya sa diskurso nga pinasikad sa Bibliya

Kombensiyon sa mga Estudyante sa Bibliya sa Cedar Point, Ohio, Septiyembre 5-13; mihangyo nga “Imantala, imantala, imantala, ang Hari ug ang iyang gingharian”

Ang klero sa Alemanya naghulhog sa polis aron dakpon ang mga Estudyante sa Bibliya sa dihang sila nag-apod-apod ug literatura sa Bibliya sa publiko

1924 Ang WBBR (unang estasyon sa radyo nga gipanag-iya sa Watch Tower Society) nagsugod sa pagsibya niadtong Pebrero 24

1925 Ang Watch Tower sa Marso 1, sa paghisgot sa pagkahimugso sa Gingharian sa Diyos niadtong 1914, nagpakita nga may duha ka magkalahi ug magkaatbang nga organisasyon​—kang Jehova ug kang Satanas

1926 Ang balay-sa-balay nga pagwali uban ang mga libro kon Dominggo gidasig

1928 Ang mga Estudyante sa Bibliya gidakop sa New Jersey (T.B.A.) tungod sa pag-apod-apod ug literatura ingong bahin sa ilang balay-sa-balay nga pagsangyaw; sulod sa usa ka dekada, dihay kapin sa 500 sa maong pagpangdakop kada tuig sa Tinipong Bansa

1931 Ang ngalang mga Saksi ni Jehova gisagop pinaagig resolusyon sa kombensiyon sa Columbus, Ohio, niadtong Hulyo 26, ug human niadto sa mga kombensiyon sa tibuok yuta

1932 Ang Vindication, Ikaduhang Libro, nagpatin-aw kon nganong ang Biblikanhong mga tagna sa kapasig-ulian dili mapadapat sa kinaiyanhong mga Hudiyo apan sa espirituwal nga Israel

Kahikayan alang sa “giboto nga mga ansiano” gitapos, uyon sa pagpatin-aw sa mga isyu sa Watchtower sa Agosto 15 ug Septiyembre 1

1933 Ang mga Saksi ni Jehova gidili sa Alemanya. Sulod sa hilabihang paglutos hangtod sa kataposan sa Gubat sa Kalibotan II, 6,262 ang gidakop, ug ang tingob nga panahon sa pagkabilanggo mokabat ug 14,332 ka tuig; 2,074 ang gidala sa mga kampo konsentrasyon, diin ang ilang pagkabilanggo mokabat ug 8, 332 ka tuig!

Mga tigkopyag-tingog nga makina (ang pipila gitaod sa mga kotse) gigamit sa mga Saksi aron isibya ang mga pakigpulong pinasikad sa Bibliya diha sa publikong mga dapit

1934 Ang mabitbit nga mga ponograpo gigamit sa mga Saksi aron patokaron ang narekord nga mga diskurso pinasikad sa Bibliya alang sa mga interesado

 1935 Sa diskurso sa usa ka kombensiyon sa Washington, D.C., niadtong Mayo 31, ang “dakong panon” nailhan ingong yutan-ong matang; 840 ka tawo ang nabawtismohan sa maong kombensiyon; mas dakong pasiugda ang inanay gihatag ngadto sa paglaom sa walay kataposang kinabuhi sa usa ka paraisong yuta alang sa matinumanong mga alagad sa Diyos nga karon nagkinabuhi

Ang dapit tigomanan, sa unang higayon, gitawag ug Kingdom Hall, sa Honolulu, Hawaii

1936 Ang mga karatula sa pag-anunsiyo unang gisul-ob sa mga magmamantala sa Gingharian aron ipahibalo sa publiko ang mga pakigpulong nga pinasikad sa Bibliya

Gidasig nga sugdan ang pagtuon uban sa interesadong mga tawo, nga gigamit ang libro sa Sosyedad nga Riches uban sa Bibliya; kini kasagaran nga grupong pagtuon

1937 Ang mabitbit nga ponograpo gigamit sa mga Saksi aron patokaron ang narekord nga mga pakigpulong pinasikad sa Bibliya diha mismo sa pultahan sa mga balay

1938 Ang teokratikanhong mga kahikayan sa pagpili ug mga magtatan-aw diha sa mga kongregasyon mipuli sa demokratikanhong pamaagi, uyon sa mga isyu sa Watchtower niadtong Hunyo 1 ug 15

Mga asembliya sa sona (karon nailhang sirkitong mga asembliya) gihikay alang sa mga grupo sa mga kongregasyon

1939-45 Sa tibuok Empiryo sa Britanya ug sa British Commonwealth, 23 ka nasod ang nagdili sa mga Saksi ni Jehova o nagdili sa ilang literatura sa Bibliya

1940 Ang pag-apod-apod sa kadalanan sa Watchtower ug Consolation nahimong regular nga bahin sa kalihokan sa mga Saksi ni Jehova

Ang desisyon sa Korte Suprema sa T. B., niadtong Hunyo 3, nga midapig sa pinugos nga pagsaludar sa bandera walay sapayan sa relihiyosong pagtuo nakapahinabog tibuok-nasod nga kapintasan sa magubtanong panon batok sa mga Saksi ni Jehova

1941 Ang aktibong mga Saksi mikapin sa 100,000, nga mikabat sa kinatas-ang ihap nga 109,371 sa 107 ka kayutaan, bisan pa sa kamatuoran nga ang Gubat sa Kalibotan II milukop sa Uropa ug mikuyanap sa Aprika ug Asia

1942 Namatay si J. F. Rutherford niadtong Enero 8, sa San Diego, California

Si N. H. Knorr ang nahimong ikatulong presidente sa Sosyedad niadtong Enero 13

Ang katibuk-ang gidaghanon sa naimprintang Watchtower alang sa tuig sa tanang pinulongan maoy 11,325,143

Ang Abanteng Kurso sa Teokratikanhong Ministeryo gisugdan alang sa kawanihan sa hedkuwarter sa Sosyedad, niadtong Pebrero 16

Ang Watch Tower Society nag-imprinta ug kompletong Bibliya, ang King James Version, sa kaugalingong imprintahanan niini (usa ka web rotary)

1943 Unang saring sa Watchtower Bible School of Gilead nagsugod sa pagtuon niini niadtong Pebrero 1

Kurso sa Teokratikanhong Ministeryo (karon gitawag ug Tunghaan sa Teokratikanhong Ministeryo) alang sa mga kongregasyon sa mga Saksi ni Jehova nga gipailaila sa mga asembliya niadtong Abril

Ang Korte Suprema sa T.B. naghatag ug desisyon nga dapig sa mga Saksi ni Jehova sa 20 gikan sa 24 ka kaso; ang Hataas nga Korte sa Australia nagkuha sa pagdili sa mga Saksi didto, niadtong Hunyo 14

 1945 Sa pagka Oktubre 1, ang hunta direktiba sa Sosyedad dili na pagapilion sa mga botante nga mikuwalipikar tungod sa pinansiyal nga donasyon

Ang aberids nga gidaghanon sa libreng mga pagtuon sa Bibliya sa balay nga gidumala kada bulan niadtong tungora maoy 104,814

1946 Sa gisundang pito ka tuig, kapin sa 4,000 ka Saksi ni Jehova sa Tinipong Bansa ug 1,593 sa Britanya ang gidakop ug gisentensiyahan ug pagkabilanggo gikan sa usa ka bulan ngadto sa lima ka tuig tungod sa ilang Kristohanong neyutralidad

Niining unang tuig human sa Gubat sa Kalibotan II, 6,504 ang nakig-ambit sa bug-os panahong pag-alagad ingong mga payunir

Ang magasing Pagmata! (misunod sa The Golden Age ug Consolation) gisugdan sa pagpublikar; ang naimprinta sa maong tuig maoy 13,934,429 ka kopya

Kapin sa 470 ka Saksi ang gidala sa mga korte sa Gresya tungod sa pagpaambit sa mga pagtulon-an sa Bibliya ngadto sa uban

1947 Sa Quebec, Canada, 1,700 ka kaso nga nalangkit sa buluhatong pag-ebanghelyo sa mga Saksi ni Jehova ang nagahulat sa mga korte

Ang gidaghanon sa mga kongregasyon niadtong tungora kapin na sa 10,000, nga mikabat ug 10,782 sa tibuok kalibotan

1950 Ang New World Translation of the Christian Greek Scriptures giluwatan sa Ingles, niadtong Agosto 2, sa kombensiyon sa New York

1953 Usa ka makaylapong programa sa pagbansay sa mga Saksi ni Jehova sa balay-sa-balay nga pagwali ang gisugdan, Septiyembre 1

1957 Sa 169 ka kayutaan, 100,135,016 ka oras ang gigugol sa mga Saksi ni Jehova sa pagmantala sa Gingharian sa Diyos ug sa pagdumalag mga pagtuon sa Bibliya uban sa bag-ong mga interesadong tawo

1958 Ang Balaang Kabubut-on Internasyonal nga Asembliya, sa New York, nakadanig tumatambong nga 253,922 gikan sa 123 ka kayutaan; 7,136 ang nabawtismohan

1959 Ang unang mga sesyon sa Tunghaan sa Ministeryo sa Gingharian, nagsugod sa Marso 9, sa South Lansing, New York, nga gidesinyo alang sa mga magtatan-aw sa kongregasyon ug nagapanawng mga magtatan-aw

1961 Ang unang grupo sa mga magtatan-aw sa sanga sa Sosyedad mitambong sa linaing napulo-ka-bulan nga pagbansay sa Brooklyn, New York, uban sa panglantaw nga hiusahon ang buluhaton sa mga Saksi ni Jehova sa tibuok kalibotan

Ang New World Translation of the Holy Scriptures, ang kompletong Bibliya sa usa ka tomo, giluwatan sa Ingles

1963 Ang New World Translation of the Christian Greek Scriptures giluwatan sa unom pa ka pinulongan (Olandes, Pranses, Aleman, Italyano, Portuges, ug Espanyol), nga daghan pa ang umaabot sa ulahing mga tuig

Kapin sa usa ka milyong Saksi ni Jehova niadtong tungora ang aktibo sa 198 ka kayutaan; ang kinatas-ang ihap sa mga magmamantala sa maong tuig maoy 1,040,836; 62,798 pa ang nabawtismohan

1965 Unang Assembly Hall, usa ka giayong sinehan, ang gigamit sa mga Saksi ni Jehova sa New York

1967 Mga hugna sa mapadayonon ug maluogong paglutos sa mga Saksi ni Jehova milukop sa Malawi ug nagpadayon sa mga tuig human niadto

1969 Ang mga pagtuon sa Bibliya sa balay mikapin sa usa ka milyon; ang taho nagpakita sa aberids nga 1,097,237

1971 Ang Nagamandong Lawas gipadak-an; sa Oktubre 1, ang pagkatsirman gisugdan sa pagbansili kada tuig taliwala sa mga sakop niana

 1972 Ang mga kongregasyon sa mga Saksi ni Jehova nailalom sa lokal nga pagdumala sa lawas sa mga ansiano, inay sa usa ka tawo, sa pagka Oktubre 1

1974 Ang kinatas-ang ihap sa mga magmamantala sa tibuok-kalibotan nakaabot ug 2,021,432; ang mga payunir miuswag gikan sa 94,604, niadtong 1973, ngadto sa 127,135

1975 Ang Nagamandong Lawas gireorganisar; sa Disyembre 4, ang kaakohan sa kadaghanan sa buluhaton gihatag sa unom ka komite, nga nagsugod sa paglihok niadtong Enero 1, 1976

1976 Ang mga buhatan sa sanga sa Watch Tower Society kada usa pagadumalahon sa usa ka komite nga may tulo ka membro o kapin pa nga hamtong sa espirituwal nga mga lalaki, inay sa usa ka magtatan-aw sugod sa Pebrero 1

1977 Ang Tunghaan sa Payunir nga Pag-alagad nagsugod sa paghatag ug linaing pagbansay alang sa tinagpulo ka libong payunir sa tibuok kalibotan

1984 Ang gidumala sa mga Saksi ni Jehova nga mga pagtuon sa Bibliya sa balay niining tungora miaberids nag 2,047,113

1985 Gisugdan ang kahikayan alang sa internasyonal nga mga boluntaryo, nga gihiusa gikan sa hedkuwarter ang tibuok-kalibotang buluhaton sa konstruksiyon sa Sosyedad

Ang taho nagpakita nga 3,024,131 ang nakig-ambit sa buluhaton sa Gingharian nga nagwali sa 222 ka kayutaan; ang mga payunir niining tungora nag-aberids sa 322,821; 189,800 ang nabawtismohan niining tuiga

1986 Ang mga Rehiyonal nga Komite sa Pagpanukod gitudlo aron motabang sa paghiusa sa pagpanukod sa mga Kingdom Hall

1987 Ang paghimog-tinun-an nga buluhaton padayon nga mikaylap, ingon nga ang mga pagtuon sa Bibliya niining tungora gidumala uban sa 3,005,048 ka indibiduwal ug mga grupo sa pamilya, kadaghanan sa kada semana; ang nabawtismohan sa maong tuig mikabat ug 230,843

Ang Tunghaan sa Ministeryal nga Pagbansay nagsugod sa Oktubre 1, uban sa unang saring sa Coraopolis, Pennsylvania

1989 Ang nagakausab nga mga kahimtang sa Sidlakang Uropa nakatabang sa pagpaposible sa tulo ka dagkong internasyonal nga mga kombensiyon sa Polandia, ug unya sa ubang kayutaan sa sunod nga mga tuig

1990 Ang pagkuha sa mga pagdili nga gipahamtang sa mga Saksi ni Jehova sa kayutaan sa Aprika ug Sidlakang Uropa nakapasayon sa pag-ebanghelyo taliwala sa dugang 100,000,000 ka tawo

Ang mga magmamantala sa Gingharian mikabat sa kinatas-ang ihap nga 4,017,213; ang mga payunir misulbong ngadto sa 536,508; ang gidaghanon nga 895,229,424 ka oras ang gigugol sa dinaliang buluhaton sa pagmantala sa Gingharian

1991 Ang gikuhang mga pagdili sa Sidlakang Uropa ug Aprika nakapasayon sa pag-abot sa 390,000,000 ka dugang mga tawo sa maayong balita sa Gingharian sa Diyos

1992 Ang Bantayanang Torre giimprinta sa aberids nga 15,570,000 diha sa 111 ka pinulongan; ang Pagmata!, nga mabatonan sa 67 ka pinulongan, may aberids nga 13,110,000 ang gipatik

Kinadak-ang pamatuod ang nahatag, ingon nga 4,472,787 ang nakigbahin sa pagmantala sa Gingharian sa 229 ka kayutaan; may binulang aberids nga 605,610 ka payunir; 1,024,910,434 ka oras ang nagugol sa publikong pagpanaksi; 4,278,127 ka pagtuon sa Bibliya ang nadumala; 301,002 ka bag-ong mga disipulo ang nabawtismohan