Kapitulo 9

Ang Pulong ni Jehova Tulin nga Nagauswag (1976-1992)

“Sa kataposan, mga igsoon, manag-ampo kamo alang kanamo, aron ang pulong ni Jehova motulin unta [o, ‘magadalagan unta’] ug pagahimayaon maingon sa nahimo niini diha kaninyo.”​—2 Tes. 3:​1, “Kingdom Interlinear.”

PINAAGI nianang mga pulonga gihangyo ni apostol Pablo ang iyang isigkamagtutuo sa Tesalonica sa pag-ampo nga siya ug ang iyang mga kaubanan magmalamposon unta sa pagmantala sa pulong ni Jehova nga walay kababagan. Gitubag ni Jehova kanang pag-ampoa. Apan kini wala magkahulogan nga ang apostol dili na kinahanglang mosagubang sa mga suliran. Siya miatubang ug grabeng pagsupak gikan sa kalibotan ug kinahanglan pang mosagubang sa mini nga mga igsoon nga may malimbongong laraw. (2 Cor. 11:​23-27; Gal. 2:​4, 5) Apan, bisan pa niini, pagkatapos sa mga napulo ka tuig, si Pablo nakahimo sa pagsulat nga ingong sangpotanan sa panalangin sa Diyos, ang maayong balita “namunga ug milambo sa tibuok kalibotan.”​—Col. 1:6.

Sa kokaamgid nga paagi sa atong adlaw​—apan sa sukod nga wala pa sukad masinati​—ang maayong balita namunga. Daghan pang mga tawo ang ginaabot sa maayong balita ug nagadawat niana kay sa bisan unsang panahon sa miagi. Ang katumanan sa gitagna sa Pulong sa Diyos tulin nga nagauswag, susama sa usa ka dumadagan diha sa lumba.​—Isa. 60:22.

Organisasyonal nga mga Pagpasibo

Pagka 1976, si Brader Knorr makugihong nagbudlay ingong presidente sa Watch Tower Society sa kapin ug tulo ka dekada. Siya nakabiyahe na sa tibuok yuta sa makadaghan, nga mibisita ug nagdasig sa mga misyonaryo, nagpanudlo ug nagderiher sa mga kawani sa sangang buhatan. Siya nakapribilehiyo sa pagkakita sa pagdaghan sa aktibong mga Saksi gikan sa 117,209 niadtong 1942 ngadto sa 2,248,390 sa 1976.

Apan sa ting-init sa 1976, ang 71-anyos nga N. H. Knorr nakamatikod nga siya may kiling nga mabangga sa mga butang. Ang mga paghiling nga misunod nagpaila nga siya nag-antos sa usa ka dili-maoperahan nga tumor sa utok. Naningkamot siya sa padayong pag-abaga sa buluhaton sa pipila ka bulan, apan dili maayo ang kahimtang sa iyang panglawas. Ang iya bang nagakahugo nga panglawas makapugong sa pagpauswag sa buluhaton?

Ang pagpadako sa Nagamandong Lawas nasugdan na niadtong 1971. Niadtong 1975, dihay 17 ka membro. Sa kadaghanan nianang tuiga, ang Nagamandong Lawas  naghimog ugdang ug mainampoong pagpamalandong kon sa unsang paagi nila maatiman pag-ayo ang tanang nalangkit diha sa tibuok-yutang pagsangyaw ug pagpanudlo nga buluhaton nga gilaraw diha sa Pulong sa Diyos alang sa atong adlaw. (Mat. 28:​19, 20) Niadtong Disyembre 4, 1975, nagkahiusa ang Nagamandong Lawas sa pag-aprobar sa usa sa labing hinungdanong organisasyonal nga mga pagpasibo sa modernong-adlaw nga kasaysayan sa mga Saksi ni Jehova.

Sugod niadtong Enero 1, 1976, ang tanang kalihokan sa Watch Tower Society ug sa mga kongregasyon sa mga Saksi ni Jehova sa tibuok kalibotan gipailalom sa pagdumala sa unom ka administratibong mga komite sa Nagamandong Lawas. Kaharmoniya nianang kahikayana, niadtong Pebrero 1, 1976, gihimo ang mga kausaban diha sa tanan nga sangang buhatan sa Sosyedad sa tibuok yuta. Ang kada sanga dili na pagadumalahan sa usa ka magtatan-aw sa sanga, apan sa tulo o kapin pang hamtong nga lalaki nga nag-alagad ingong Komite sa Sanga, nga may usa ka membro nga mag-alagad ingong permanenteng koordinetor. a Tapos sa paglihok sa mga komite sulod sa pila ka bulan, ang Nagamandong Lawas nag-ingon: “Napamatud-ang makaayo ang pagbaton ug ubay-ubayng brader sa pagtinambagay sa pagtagad sa intereses sa buluhaton sa Gingharian.​—Prov. 11:14; 15:22; 24:6.”

Sa tingdagdag sa 1976, bisan pa sa kamatuoran nga ang kahimtang sa iyang panglawas nagpabiling dili maayo, si Brader Knorr nakig-ambit sa paghatag ug instruksiyon sa mga miting nga gihimo sa hedkuwarter uban sa mga membro sa Komite sa Sanga ug ubang mga kawani sa sanga gikan sa tibuok kalibotan. Ingong dugang sa pagpakig-ambit diha sa mga miting sa maadlaw, giimbitar ni Brader Knorr kining mga igsoona, sa ginagmayng mga grupo, ngadto sa iyang lawak sa magabii. Niining paagiha siya ug iyang asawa, si Audrey, nakig-ambit sa suod nga pagpakig-uban sa mga lalaki nga nakaila ug nahigugma kaniya ug kang kinsa siya may suod kaayong pakiglabot latas sa katuigan. Human niining mga mitinga, ang panglawas ni Brader Knorr padayong nagkadaot hangtod sa iyang kamatayon niadtong Hunyo 8, 1977.

Niadtong Hunyo 22, 1977, duha ka semana tapos sa kamatayon ni Brader Knorr, ang 83-anyos nga si Frederick W. Franz gipili nga presidente sa Watch Tower Society. Mahitungod kang Brader Franz, ang The Watchtower sa Agosto 1, 1977, nag-ingon: “Ang iyang nagalabaw nga reputasyon ingong usa ka inilang eskolar sa Bibliya ug ang iyang pagtrabaho nga walay kakapoy alang sa intereses sa Gingharian nakapadani sa pagsalig ug matinud-anong pagpaluyo sa mga Saksi ni Jehova sa tanang dapit.”

Sa yugto niining kausaban, ang bag-ong organisasyonal nga mga kahikayan naglihok na nga nagseguro sa pag-abante sa buluhaton.

 Pagtagana sa Panginahanglang Espirituwal Pinaagi sa Literatura sa Bibliya

Ang mga Saksi ni Jehova napakaon na ug maayo sa espirituwal una pa sa 1976. Apan ang pagrepaso kon unsay nahitabo sukad niadto ubos sa direksiyon sa Nagamandong Lawas ug sa Komite sa Pagsulat niana nagpadayag nga ang mga tubig sa kamatuoran nag-agos nga mas daghan ug diha sa nagkalainlain pa nga matang.

Daghan sa publikasyon nga napatungha ang nakatagana sa espisipikong panginahanglan sa mga Saksi mismo. Ang linaing pagtagad gipakita alang sa mga batan-on. Aron matabangan sila sa pagpadapat sa mga prinsipyo sa Bibliya diha sa mga kahimtang nga ilang giatubang sa kinabuhi, Ang Imong Pagkabatan-on​—Pagpahimulos sa Labing Maayo Niini gipatik niadtong 1976, ug ang Mga Pangutanang Gisukna sa mga Batan-on​—Mga Tubag nga Mosaler, niadtong 1989. Ang ilustradong publikasyon nga Akong Basahon sa mga Estorya sa Bibliya, nga giandam alang sa mga bata, giluwatan niadtong 1978. Nianang samang tuig ang praktikal nga tambag ug giya alang sa paglig-on sa mga pamilya gipresentar diha sa Paghimo sa Imong Pamilyahanong Kinabuhi nga Malipayon.

Usahay, espisipikong mga kinahanglanon sa katawhan ni Jehova ang gitagad pinaagi sa tukma-sa-panahon nga tambag diha sa mga panid sa Ang Bantayanang Torre. Pananglitan, ang tibuok kalibotan nga taho bahin sa kalihokan sa mga Saksi ni Jehova alang sa 1977/78 mipakita ug pag-us-os sa gidaghanon sa nakig-ambit diha sa buluhatong pagsangyaw. Ang pag-us-os ba sa bahin maoy tungod sa napalaw nga mga pagdahom labot sa 1975? Tingali. Apan diha pay laing mga hinungdan nga nakaimpluwensiya. Unsay mahimong buhaton?

Ang Nagamandong Lawas mihimog mga lakang aron sa pagpalig-on sa pagtuo taliwala sa mga Saksi ni Jehova nga dihay panginahanglan alang sa padayong masiboton nga pagmantala sa Gingharian sa balay ngadto sa balay. Ang Bantayanang Torre sa Enero 15, 1980, naundan sa mga artikulong “Kasibot Alang sa Balay ni Jehova,”  “Pagsangyaw sa Usa ka Malinapasong Kalibotan,” “Sila Nagsangyaw sa Balay ug Balay,” ug “Unsay Giingon sa Uban Bahin sa Balay ug Balay nga Pamatuod.” Kini ug ubang mga artikulo nagpalig-on pag-usab nga ang balay-sa-balay nga pagsangyaw may lig-on Kasulatanhong pasikaranan ug nagdasig sa masiboton ug tibuok-kalag nga pagpakig-ambit niining importanteng kalihokan. b​—Buh. 20:20; Col. 3:23.

Laing kahimtang ang nanginahanglan usab ug pagtagad. Pagka 1980, ubay-ubayng indibiduwal nga nakig-ambit sa mga kalihokan sa mga Saksi ni Jehova sulod sa pipila ka tuig, lakip sa pila nga nakaalagad nga inila diha sa organisasyon, sa nagkadaiyang mga paagi misulay sa pagpahinabog pagkabahinbahin ug misupak sa buluhaton nga gihimo sa mga Saksi ni Jehova. Sa pagpalig-on sa katawhan ni Jehova batok sa maong apostatang impluwensiya, Ang Bantayanang Torre nagdala sa mga artikulo nga sama sa “Magpabiling ‘Lig-on sa Pagtuo’” (Pebrero 1, 1981), “Tago nga Pagpasulod sa Makalaglag nga Sekta” (Marso 15, 1984), ug “Isalikway ang Apostasiya, Hawid sa Kamatuoran!” (Oktubre 1, 1983), samtang ang librong “Let Your Kingdom Come” (1981) nagpasiugda sa kamatuoran nga ang Gingharian haduol na, nga natukod na sa mga langit niadtong 1914. Ang Nagamandong Lawas wala motugot sa mga paningkamot sa mga magsusupak sa pagtugaw niini gikan sa pangunang katuyoan sa mga Saksi ni Jehova​—ang pagsangyaw sa Gingharian sa Diyos!

Ugaling, unsa na man ang mahitungod sa panginahanglan sa mga Saksi ni Jehova aron makapadayon sa pagpauswag sa ilang kahibalo sa kamatuoran sa Bibliya? Alang sa ugdang nga pagtuon sa Bibliya, niadtong 1984 usa ka rebisadong edisyon pangreperensiya sa New World Translation giluwatan, nga naundan sa mabug-osong mga reperensiya sa daplin, mga potnot, ug materyal sa apendise. Upat ka tuig sa ulahi, niadtong 1988, ang katawhan ni Jehova nalipay sa pagdawat sa usa ka nunot-sa-panahon nga komentaryo sa matag bersikulo sa Pinadayag, diha sa librong Pinadayag​—Hingpit nga Sangkoanan Niini Haduol Na! Usab ang duha-ka-tomo nga ensiklopedia sa Bibliya ang Insight on the Scriptures. Unya, niadtong 1991, dihay gipatik nga nindot-pagka-ilustrar nga librong Ang Labing Bantogang Tawo nga Nabuhi  Sukad, usa ka mabug-osong pagtuon sa kinabuhi ug mga pagtulon-an ni Jesu-Kristo.

Apan unsa na man ang mahitungod sa panginahanglan sa mga tawo nga dili mga Saksi ni Jehova? Ingong instrumento sa pagtudlo sa bag-ong mga interesado, ang publikasyon nga Ikaw Mabuhing Walay Kataposan sa Paraiso sa Yuta giluwatan (sa Ingles) niadtong 1982. Kana gidesinyo sa pagtabang sa mga estudyante sa Bibliya sa pagkab-ot sa mga kinahanglanon ni Jehova alang sa kinabuhi dinhi sa yutan-ong paraiso. Sa pagtabang sa mga tawo nga basin may pagduhaduha mahitungod sa sinugdanan ug katuyoan sa kinabuhi sa yuta, ang librong Life​—How Did It Get Here? By Evolution or by Creation? gitagana niadtong 1985. Kana gisundan, niadtong 1989, sa makapalig-on-sa-pagtuo nga librong Ang Bibliya​—Pulong sa Diyos o sa Tawo?

Ang pagtagad gihatag usab sa mapaubsanong mga tawo nga tingali nanginahanglan sa linaing tabang tungod sa ilang kultural o relihiyosong kasinatian. Aron sa pagtudlo sa kamatuoran mahitungod sa Gingharian ni Jehova niadtong mga walay edukasyon o maglisod sa pagbasa, ang 32-panid nga brosyur nga Tagamtama ang Kinabuhi sa Yuta sa Walay Kataposan! giluwatan niadtong 1982. Pagka 1992, kapin sa 76,000,000 ka kopya ang napatik, ug kana giapod-apod sa 200 ka pinulongan sa tibuok kalibotan, nga naghimo niana nga labing makaylapong nahubad sa bisan unsang publikasyon sa Watch Tower Society.

Niadtong 1983, tulo ka brosyur ang gigama alang sa linaing katuyoan sa pagtabang sa mga Muslim, Buddhista, ug Hindu. Aron sa pag-abot sa mga tawo nga may ingon niana ug ubang relihiyosong mga kagikan, makatabang kon dihay diyutayng pagsabot mahitungod sa ilang relihiyon​—mga pagtulon-an ug kasaysayan. Sa pagtagana niining panginahanglana, ang librong Pagpangita sa Katawhan sa Diyos giluwatan niadtong 1990.

Ang Nagamandong Lawas interesado kaayo nga maabot sa mensahe sa Gingharian kutob sa mahimo ang daghang tawo​—katawhan “sa tanang kanasoran ug mga banay ug . . . mga pinulongan.” (Pin. 7:9) Alang nianang maong katuyoan, gihimo ang mga kahikayan sa paghubad sa literatura ngadto sa daghan pang mga pinulongan. Pananglitan, gikan niadtong 1976 hangtod sa 1992, may dugang nga mga 42 porsiento diha sa gidaghanon sa mga pinulongan diin Ang Bantayanang Torre gipatik. Pagka Oktubre 1992 ang gidaghanon maoy 111. Aron mapadali ang paghubad kutob sa mahimo, nianang samang tuiga kapin sa 800 ka maghuhubad sa tibuok kalibotan ang nakig-ambit sa buluhaton.

Mga Programa sa Edukasyon Gitugob ug Gipalainlain

Ilalom sa pagdumala sa Nagamandong Lawas ug sa Komite niini sa  Pagpanudlo, ang mga programa sa pagtudlo alang sa mga kawani sa hedkuwarter ug sa mga pamilyang Bethel diha sa mga sanga sa tibuok kalibotan gitugob ug mas pang gipalainlain. Dugang pa sa pagbasa sa Bibliya ug sa Yearbook ingong bahin sa ilang pagsimba sa buntag dihay gipailaila nga halalom nga pagtuon sa bahin sa Bibliya nga gibasa sulod sa miagi nga semana, uban sa kapadapatan sa materyal niadtong nagaalagad sa Bethel. Regular nga mga taho gikan sa nagkadaiyang departamento sa Bethel ingon man sa mas nagkasubsob nga mga taho gikan sa mga magtatan-aw sa sona gipailaila usab.

Sa pagtagana sa mga panginahanglan nilang may dugang mga responsabilidad sulod sa organisasyon, dugang nga mga programa sa edukasyon ang gidesinyo ug gipadapat. Niadtong 1977, ang mga kahikayan gihimo alang sa tanang ansiano sa pagtambong sa usa ka 15-oras nga kurso sa Tunghaan sa Ministeryo sa Gingharian. (Buh. 20:28) Sukad niadto, ang susamang mga sesyon sa nagkadaiyang gitas-on gihikay sa matag pipila ka tuig; ug sugod niadtong 1984, ang ministeryal nga mga alagad nakabaton usab ug pagbansay diha sa Tunghaan sa Ministeryo sa Gingharian. Sa Brooklyn, sugod niadtong Disyembre 1977, usa ka linaing lima-ka-semana nga tunghaan alang sa mga membro sa Komite sa Sanga ang gisugdan.

Ang linaing pagtagad gipakita usab alang nilang nagakugi sa ilang kaugalingon diha sa bug-os-panahong ministeryo ingong mga payunir. Niadtong Disyembre 1977 ang Tunghaan sa Pag-alagad sa Payunir, usa ka duha-ka-semana nga kurso sa pagbansay alang sa mga payunir nga mga ministro, gisugdan sa Tinipong Bansa ug ngadtongadto gipaabot sa tanang bahin sa yuta. Sulod sa misunod nga 14 ka tuig, ang gidaghanon sa mga payunir miuswag ug kapin sa lima ka pilo​—gikan sa 115,389 ngadto sa 605,610!

Sa tingdagdag niadtong 1987, laing tunghaan ang giablihan​—ang Tunghaan sa Ministeryal nga Pagbansay. Kining tunghaana gitukod sa pagbansay sa kuwalipikado walay asawa nga igsoong mga lalaki nga may kasinatian ingong mga ansiano o ministeryal nga mga alagad ug nga andam sa pag-alagad bisag diin nga may panginahanglan sa tibuok-kalibotang natad. Pagka 1992, ang mga klase gihimo sa Australia, Austria, Britanya, El Salvador, Pransiya, Alemanya, Italya, Mexico, Nigeria, Espanya, Sweden, ug Tinipong Bansa. Ang resulta maoy, dili usa ka matang sa mga indibiduwal kinsa pagalantawon nga labaw sa uban diha sa kongregasyon, kondili usa ka pag-usbaw sa gidaghanon sa mga lalaki nga kuwalipikado kaayo sa pag-alagad sa ilang mga igsoon.

Sa pagpauswag sa tibuok-yutang buluhaton sa edukasyon sa Bibliya, ang mga internasyonal nga kombensiyon gieskedyul sa estratehikong mga siyudad​—ang pila diha sa mga kayutaan diin ang mga Saksi ni Jehova gidili. Kining mga kombensiyona nagsilbi sa pagpalig-on sa mga kaigsoonan nianang mga dapita ug sa paghatag ug  kusganong pagdasig sa pagwali sa maayong balita nianang mga yutaa. c

Mga Pasilidad sa Pag-atiman sa Pag-uswag

Samtang ang pulong ni Jehova nagpadayon sa tulin nga pag-uswag, pila ka makalilipayng mga kaugmaran nahimong kinahanglanon diha sa pagpanukod ug pag-imprinta​—mga natad ubos sa pagdumala sa Nagamandong Lawas ug sa Komite sa Pagpamatik niana.

Ang mga Saksi nga may kasinatian sa pagpanukod mibulontaryo sa ilang mga pag-alagad, ug ang ilang mga paningkamot gihiusa aron makatabang diha sa pagtukod ug bag-o ug mas dagkong mga pasilidad sa sanga sa tibuok kalibotan. Sukad niadtong 1976 hangtod sa 1992, ang pagtukod sa bug-os bag-o nga mga pasilidad sa sanga gihimo diha sa mga 60 ka kayutaan. Ingong dugang niana, mga proyekto sa pagpadako sa naglungtad nga mga pasilidad gihimo diha sa 30 ka kayutaan. Ang paagi sa paghimo sa buluhaton (pinaagi sa mga boluntaryo gikan sa daghang kongregasyon​—usahay gikan sa ubang kayutaan) nagsilbi sa paglig-on sa bugkos sa gugma ug panaghiusa taliwala sa katawhan ni Jehova. d

Aron matagan-an ang panginahanglan sa nagkadaghang pinulongan nga pag-imprinta sa Sosyedad, ang mga Saksi nga may kasinatian sa natad sa kompiyuter naggama ug usa ka una-printa nga sistema nga gigamit ang kompiyuter nga gitawag ug MEPS (Multilanguage Electronic Phototypesetting System). Ang proyekto nakompleto niadtong 1986. Ingong sangpotanan, sa pagka 1992, Ang Bantayanang Torre giimprinta ug dungan diha sa 66 ka pinulongan. Ang kadaghanan sa mga Saksi ni Jehova sa ingon nakadawat ug samang espirituwal nga pagkaon sa samang panahon. e

Samtang ang mga pasilidad sa Watch Tower Society nagpadayon sa pagdako, dugang mga boluntaryo ang gikinahanglan sa hedkuwarter sa Brooklyn ingon man diha sa sangang mga buhatan sa tibuok kalibotan. Sukad niadtong 1976 hangtod sa 1992, ang internasyonal nga pamilyang Bethel mitulo ka pilo sa gidaghanon, gikan sa mga 4,000 ngadto sa kapin ug 12,900 ka membro nga nag-alagad sa tibuok yuta. Ang Nagamandong Lawas ug ang Komite sa Kawanihan niana nagtagad sa personal ug espirituwal nga panginahanglan niining dakong panon sa bug-os-panahon nga mga boluntaryo.

Pag-atiman sa mga Kongregasyon ug sa Buluhaton sa Pag-ebanghelyo

Samtang ang pulong ni Jehova tulin nga nag-uswag, ang Nagamandong Lawas ug ang Komite sa Pag-alagad niini nagpunting sa ilang mga kusog sa pagpalig-on sa  mga kongregasyon sa tibuok kalibotan ug sa pagpalapad sa tibuok-yutang buluhaton sa pag-ebanghelyo.

May mahimo pa ba aron matabangan ang daghang bag-ohan nga nabawtismohan kada tuig? Sayo niadtong 1977, ang mga kahikayan gihimo alang sa pagpalig-on sa espirituwalidad sa bag-ong mga Saksi. Misaysay ang Atong Pag-alagad sa Gingharian: “Kami nagtuo nga sa labing menos duha ka libro ang kinahanglang tun-an uban sa tanang tawo nga modangop sa kamatuoran. . . . Busa ang pagtuon kinahanglan magpadayon pagkatapos sa bawtismo hangtod ang ikaduhang libro matapos.” Niining paagiha ang bag-ong bawtismado nga mga Saksi nahatagan ug bug-os nga kahigayonan nga makabaton ug kahibalo ug pagsabot ug nga makabaton ug nagatubo nga apresasyon sa kahulogan sa pagkahimong bawtismado. Ang bag-ong kahikayan nagdasig usab sa suod pang pagpakig-uban tali sa mga bag-ohan ug sa mga Saksi nga nagtabang kanila sa ilang pagtuon sa Bibliya sa balay.

Sa pag-atiman niadtong nagaganayan ngadto sa organisasyon ni Jehova, kapin sa 29,000 ka bag-ong kongregasyon ang giporma sa tibuok kalibotan tali sa 1976 ug 1992. (Miq. 4:1) Dugang mga magtatan-aw sa sirkito ug distrito ang gitudlo sa Nagamandong Lawas ug gipadala sa pagtabang. Ang gidaghanon niining nagapanawng mga magtatan-aw misulbong gikan sa 2,600 niadtong 1976 ngadto sa mga 3,900 niadtong 1992.

Samtang ang mga kongregasyon nagkadaghan, may nagtubo usab nga panginahanglan alang sa dugang mga tigomanan. Diha bay mas dali nga paagi sa pagtukod ug mga Kingdom Hall? Sa katuigang 1970, ang mga Saksi ni Jehova sa Tinipong Bansa nag-organisar ug usa ka programa sa pagpanukod diin ang haniteng mga trabahante sa pagpanukod gikan sa sikbit nga mga bahin sa nasod gidapit sa pagtabang sa lokal nga mga Saksi sa pagtukod ug Kingdom Hall. Tungod sa gatosan nga mitabang, ang usa ka tigomanan mahimong matapos sa madali​—kasagaran sa duha o tulo lamang ka adlaw. Pag-abot sa katuigang 1980, ang daling-matukod nga mga Kingdom Hall nangatukod sa ubang bahin sa yuta.

Ang politikal nga mga kausaban sa Sidlakang Uropa nakaapektar usab sa mga Saksi ni Jehova. Pagkadako sa kalipay sa atong mga kaigsoonan diha sa mga nasod sama sa Sidlakang Alemanya (ingon sa pagkaila niana kaniadto), Hungaria, Polandia, Romania, ug sa kanhi gitawag nga Unyon Sobyet sa pagkasayod nga sila gihatagan na ug legal nga pag-ila, sa pila ka kaso human sa 40 ka tuig nga pagdili! Ang nagkadakong kagawasan nianang mga nasora karon nakapasayon alang kanila sa pag-abot sa mga 380,000,000 ka tawo sa maayong balita! Ang mga Saksi ni Jehova wala maglangan sa pagpahimulos sa ilang kaugalingon sa ilang bag-ong-kaplag nga kagawasan sa pagpakig-ambit sa ilang kalihokan diha sa publikong pagsangyaw.

Ug ang mga gisangpotan? Ang pulong ni Jehova tulin nga nag-uswag!  Pananglitan, niadtong Abril 1992 ang gidaghanon sa mga magmamantala sa Gingharian nga nagtaho sa Polandia maoy 106,915. Ug ang mga kalaoman alang sa umaabot nga pagtubo maoy maayo kaayo. Nianang samang bulan ang mitambong sa Memoryal sa kamatayon ni Kristo maoy 214,218. Sa susama, diha sa kayutaang kanhi naglangkob sa Unyon Sobyet, ang gidaghanon nga 173,473 mitambong sa Memoryal sa 1992, dihay 60 porsiento nga uswag kay sa miaging tuig.

Hinuon, sa pila ka kayutaan ang padayong paglutos ug kinaiyanhong mga kalamidad nahimong mga babag. Sa 1992 ang mga kalihokan sa mga Saksi ni Jehova gidid-an gihapon sa kagamhanan sa 24 ka nasod. Ang Komite sa Tsirman sa Nagamandong Lawas nagbuhat kutob sa mahimo sa pagtaganag tabang ug sa pagpahibalo sa internasyonal nga panag-igsoonay sa mga paagi nga makatabang sila sa isigka-Saksi nga nag-alagad ilalom sa kalisdanan. (Itandi ang 1 Corinto 12:​12-26.) Wala makapugong ang mga kampanya sa paglutos ni ang mga kinaiyanhong kalamidad sa pagsangyaw sa pulong ni Jehova!

“Linaing Katawhan nga Iyang Gipanag-iya”

Mao nga, sa mga katuigang gikan sa 1976 hangtod sa 1992, ang pulong ni Jehova sa tinuod nag-uswag nga tulin. Ang organisasyon hapit midoble sa gidak-on, ngadto sa kapin ug 4,470,000 ka magmamantala sa Gingharian!

Ang katawhan ni Jehova nagpadayon sa masibotong pagmantala sa Gingharian sa Diyos, karon diha sa mas daghang pinulongan kay masukad. Nga migamit sa mga publikasyon nga gitagana, sila nakapalalom sa ilang kahibalo sa Bibliya ug nakatabang sa mga interesado sa pagkat-on sa mga kamatuoran sa Bibliya. Sila nakapahimulos gikan sa edukasyonal nga mga programa nga gihatag kanilang may dugang responsabilidad sulod sa organisasyon. Si Jehova sa walay duhaduha nagpanalangin sa ilang pagmantala sa iyang Gingharian.

Sukad sa katuigang 1870 hangtod sa presenteng panahon, may mga lalaki nga nakahimo ug labaw alang sa kauswagan sa buluhaton sa Gingharian, mga lalaki sama nila ni Charles T. Russell, Joseph F. Rutherford, Nathan H. Knorr, ug Frederick W. Franz, ingon man sa uban nga nakaalagad ingong mga membro sa Nagamandong Lawas. Apan ang mga Saksi ni Jehova wala gayod mahimong usa ka sekta nga natukod palibot sa mga personalidad sa bisan kinsa niining mga lalakiha. Inay, sila may usa lamang ka pangulo, “ang Kristo.” (Mat. 23:10) Siya ang Ulo niining organisadong mga Saksi ni Jehova, ang usa kang kinsa “ang tanang kagahom gikahatag” sa pagdireher niining buluhatona “sa tanang adlaw hangtod sa pagkatapos niining sistema sa mga butang.” (Mat. 28:​18-20) Sila determinado sa pagpasakop sa pagkaulo ni Kristo, sa pagpabiling suod sa Pulong sa Diyos, ug sa pagsunod sa pagtultol sa balaang espiritu, aron nga sila makapadayon sa pag-uswag diha sa pagsimba sa bugtong matuod nga Diyos ug diha sa pagpamatuod sa ilang mga kaugalingon nga mahimong “linaing katawhan nga iyang gipanag-iya, nga masiboton alang sa maayong mga buhat.”​—Tito 2:14.

Apan unsa ang pila ka paninugdang mga pagtulon-an ug mga sukdanan sa pamatasan nga nagpalahi sa mga Saksi ni Jehova gikan sa tanang ubang relihiyon? Sa unsang paagi sila nailhang mga Saksi ni Jehova? Sa unsang paagi gisuportahan ug panalapi ang ilang mga kalihokan? Nganong ilang gihuptan ang estriktong pagpalain gikan sa ubang mga simbahan ug gikan sa kalibotan sa katibuk-an? Nganong sila nahimong mga tumong sa hilabihang paglutos diha sa daghan kaayong mga dapit sa yuta? Kini ug daghang laing pangutana pagatubagon sa mga kapitulo nga mosunod.

[Mga footnote]

[Blurb sa panid 117]

Dili usa ka sekta nga natukod palibot sa mga personalidad sa bisan kinsang tawo

[Graph/Hulagway sa panid 110]

Sukad niadtong 1976 hangtod sa 1992, dihay 42 porsiento nga pagtubo diha sa gidaghanon sa mga pinulongan diin “Ang Bantayanang Torre” gigama

[Graph]

(Alang sa aktuwal nga pagkahan-ay, tan-awa ang publikasyon)

111

 

78

 

1976 1992

[Kahon sa panid 111]

Kaagi ni F. W. Franz

Si Frederick William Franz natawo sa Covington, Kentucky, T.B.A. niadtong Septiyembre 12, 1893. Pagka 1899 ang pamilya mibalhin sa Cincinnati, diin si Frederick migraduwar sa hayskul niadtong 1911. Unya nagpatala siya sa Unibersidad sa Cincinnati, nga mikuha ug kursong liberal arts. Siya nakahukom nga mahimong usa ka Presbiteryanong magwawali, busa naningkamot siya pag-ayo sa pagtuon sa Grego diha sa Bibliya. Sa unibersidad si Frederick napiling eskolar sa Rhodes, nga magkuwalipikar kaniya nga madawat sa Unibersidad sa Oxford sa Inglaterra. Ugaling, sa wala pa himoa ang pahibalo, si Frederick nawad-ag interes nga mahimong eskolar ug mihangyo nga ang iyang ngalan kuhaon sa listahan sa mga sumasalmot.

Una niana, ang iyang igsoong si Albert nagpadala kaniya ug usa ka pulyeto nga iyang nakuha gikan sa Internasyonal nga mga Estudyante sa Bibliya. Sa ulahi si Albert naghatag kaniya sa unang tulo ka tomo sa “Studies in the Scriptures.” Si Frederick nalipay sa mga butang nga iyang nakat-onan ug nakahukom sa pagputol sa iyang pakiglabot sa Simbahang Presbiteryano ug nakig-uban sa kongregasyon sa mga Estudyante sa Bibliya. Niadtong Nobyembre 30, 1913, siya gibawtismohan. Niadtong Mayo 1914, mihunong siya pagtungha sa unibersidad, ug dihadiha naghimo siyag mga kahikayan aron mahimong colporteur (payunir).

Pagka Hunyo 1920 siya nahimong sakop sa pamilyang Bethel sa Brooklyn. Dayon sa kamatayon ni N. H. Knorr, niadtong Hunyo 1977, si Brader Franz napili sa katungdanan sa presidente sa Sosyedad. Siya matinumanong nag-alagad ingong membro sa Nagamandong Lawas hangtod sa iyang kamatayon, niadtong Disyembre 22, 1992, sa pangedarong 99.

[Graph sa panid 112]

(Alang sa aktuwal nga pagkahan-ay, tan-awa ang publikasyon)

Nagakauswag nga Gidaghanon sa mga Payunir

1992

600,000

400,000

1986

200,000

1981

1976

[Graph sa panid 113]

(Alang sa aktuwal nga pagkahan-ay, tan-awa ang publikasyon)

Nagatubo nga Pamilyang Bethel sa Tibuok Kalibotan

1992

12,000

9,000

1986

6,000

1981

1976

3,000

[Graph sa panid 114]

(Alang sa aktuwal nga pagkahan-ay, tan-awa ang publikasyon)

Nagkadaghang mga Kongregasyon

80,000

1992

60,000

1986

1981

1976

40,000

20,000

[Graph sa panid 115]

(Alang sa aktuwal nga pagkahan-ay, tan-awa ang publikasyon)

Pagdaghan sa mga Magmamantala sa Gingharian

1992

4,000,000

1986

3,000,000

1981

1976

2,000,000

1,000,000

[Hulagway sa panid 109]

Ang kada sangang buhatan sa Sosyedad gidumala sa usa ka komite sa mga brader, sama niining usa nga nagatan-aw sa buluhaton sa Nigeria

 [Mga hulagway sa panid 116]

Ang Nagamandong Lawas sa mga Saksi ni Jehova Enero 1992

Carey W. Barber

John E. Barr

W. Lloyd Barry

John C. Booth

Frederick W. Franz

George D. Gangas

Milton G. Henschel

Theodore Jaracz

Karl F. Klein

Albert D. Schroeder

Lyman A. Swingle

Daniel Sydlik