Kapitulo 8

Pagpahayag sa Maayong Balita nga Walay Hunong (1942-1975)

“SA TANANG MAHIGUGMAON SA TEOKRASYA:

Niadtong Enero 8, 1942, ang atong minahal nga igsoon, si J. F. Rutherford, matinumanong nagtapos sa iyang yutan-ong kurso . . . Alang kaniya makalilipay ug makapahupay ang makakita ug masayod nga ang tanang saksi sa Ginoo nagasunod, dili kang bisan kinsang tawo, kondili sa Hari nga si Kristo Jesus ingong ilang Pangulo, ug nga sila mopadayon sa buluhaton diha sa hingpit nga panaghiusa sa kalihokan.” —Usa ka sulat nga nagpahibalo sa kamatayon ni Brader Rutherford. a

ANG balita mahitungod sa kamatayon ni Brader Rutherford nakapakurat sa makadiyot sa mga Saksi ni Jehova sa tibuok kalibotan. Daghan ang nahibalo nga siya nagkasakit, apan sila wala magdahom nga siya mamatay sa madali. Sila nasubo tungod sa pagkawala sa ilang minahal nga igsoon apan nakahukom nga “mopadayon sa buluhaton”​—ang buluhaton sa pagmantala sa Gingharian sa Diyos. Wala nila lantawa si J. F. Rutherford ingong ilang pangulo. Si Charles E. Wagner, kinsa nakatrabaho sa buhatan ni Brader Rutherford, nag-ingon: “Ang mga igsoon sa tanang dapit nakaugmad ug lig-ong pagtuo nga ang buluhaton ni Jehova wala magdepende kang bisan kinsang tawo.” Bisan pa niana, gikinahanglan ang usa sa pagpas-an sa mga responsabilidad nga gipas-an ni Brader Rutherford ingong presidente sa Watch Tower Society.

“Determinado nga Magpabiling Suod sa Ginoo”

Kinasingkasing nga pangandoy ni Brader Rutherford nga ang mga Saksi ni Jehova dili mohunong sa pagpahayag sa maayong balita. Busa sa tungatunga sa Disyembre 1941, pipila ka semana una pa sa iyang kamatayon, iyang gipatawag ang upat ka direktor sa duha ka pangunang legal nga korporasyon nga gigamit sa mga Saksi ni Jehova ug nagsugyot nga sa labing madali inigkamatay niya, ang tanang membro sa duha ka hunta magmiting sa usa ka tingob nga sesyon ug magpili ug presidente ug bise presidente.

Sa hapon sa Enero 13, 1942, lima lamang ka adlaw human sa kamatayon ni Rutherford, ang tanang membro sa hunta sa duha ka korporasyon tingob nga nagtigom sa Brooklyn Bethel. Mga pipila ka adlaw sayo niana, ang bise presidente sa Sosyedad, ang 36-anyos nga si Nathan H. Knorr, nagsugyot nga pangitaon gayod  nila ang langitnong kaalam pinaagi sa pag-ampo ug pagpamalandong. Ang mga membro sa hunta nakasabot nga samtang ang igsoon nga mahimong presidente magadumala sa legal nga mga kalihokan sa Watch Tower Society, siya usab magaalagad nga pangunang magtatan-aw sa organisasyon. Kinsa ang may espirituwal nga mga kuwalipikasyon nga gikinahanglan alang niining bug-at nga responsabilidad sa pag-atiman sa buluhaton ni Jehova? Ang tiningob nga miting gibuksan pinaagig pag-ampo, ug human sa maampingong pagtimbangtimbang, si Brader Knorr ang napili sa kadaghanan ingong presidente sa duha ka korporasyon ug ang 30-anyos nga si Hayden C. Covington, ang abogado sa Sosyedad, nga bise presidente. b

Sa ulahi nianang adlawa, si W. E. Van Amburgh, ang sekretaryo-tesurero sa Sosyedad, nagpahibalo sa pamilyang Bethel sa mga resulta sa piliay. Si R. E. Abrahamson, nga presente niadtong okasyona, nahinumdom nga si Van Amburgh nag-ingon: ‘Ako pang mahinumdoman sa dihang si C. T. Russell namatay ug gipulihan ni J. F. Rutherford. Ang Ginoo nagpadayon sa paggiya ug sa pagpauswag sa Iyang buluhaton. Karon, ako nagdahom gayod nga ang buluhaton mouswag uban kang Nathan H. Knorr ingong presidente, tungod kay kini buluhaton sa Ginoo, dili sa tawo.’

Unsay pagbati sa mga membro sa pamilyang Bethel sa Brooklyn mahitungod sa mga resulta sa piliay? Usa ka makatandog nga sulat gikan kanila nga pinetsahan ug Enero 14, 1942, ang adlaw human sa piliay, mitubag: “Ang pag-ilis kaniya [kang Rutherford] dili makapahinay kanamo sa pagbuhat sa buluhaton nga giasayn sa Ginoo kanamo. Kami determinado nga magpabiling suod sa Ginoo ug sa usag-usa, nga padayong modasdas sa gubat kutob sa ganghaan, makiggubat abaga sa abaga. . . . Ang  among suod nga pakig-uban kang Brader Knorr sulod sa mga kawhaan ka tuig . . . nakapaarang kanamo sa pag-apresyar sa pagtultol sa Ginoo diha sa pagpili kang Brader Knorr ingong presidente ug busa ang Ginoo nagabantay ug nagaatiman sa Iyang katawhan.” Mga sulat ug mga telegrama sa pagpaluyo sa wala madugay mibaha sa hedkuwarter gikan sa tibuok kalibotan.

Walay pagduhaduha kon unsay angay buhaton. Usa ka linaing artikulo ang giandam alang sa Pebrero 1, 1942, nga Watchtower, ang isyu mismo nga nagpahibalo sa kamatayon ni J. F. Rutherford. “Ang kataposang pagpanigom sa Ginoo nagpadayon,” pahayag niini. “Walay bisan unsang butang ang tugotan bisag makadiyot nga mobalda sa pag-abante sa iyang katawhan-sa-tugon diha sa Iyang pag-alagad. . . . Ang paghupot sa atong integridad ngadto sa Labing Gamhanang Diyos mao karon ang IMPORTANTE-SA-TANAN nga butang.” Ang mga Saksi ni Jehova gidasig sa pagpadayon sa masibotong pagmantala sa maayong balita.

Apan ‘ang paghupot sa ilang integridad’ maoy usa ka tinuod nga hagit niadtong sayong katuigan sa 1940. Ang kalibotan nakigbugno gihapon sa gubat. Ang mga pagdili sa panahon sa gubat sa daghang bahin sa yuta nagpalisod sa mga Saksi ni Jehova sa pagsangyaw. Ang pangdakop ug pangatake sa magubtanong panon batok sa mga Saksi wala milurang. Si Hayden Covington, ingong abogado sa Sosyedad, nagdireher sa legal nga pakigbugno, nga nanukad usahay gikan sa iyang buhatan sa hedkuwarter sa Brooklyn ug usahay gikan sa mga tren samtang siya nagbiyahe sa pag-atiman sa legal nga mga kaso. Nga nakigtambayayong sa lokal nga mga abogado, sama kang Victor Schmidt, Grover Powell, ug si Victor Blackwell, si Brader Covington nakigbugnog maayo sa pagpalig-on sa konstitusyonal nga mga katungod sa mga Saksi ni Jehova sa pagsangyaw gikan sa balay ngadto sa balay ug sa pag-apod-apod ug literatura sa Bibliya nga walay pagdili gikan sa lokal nga mga opisyales. c

Pagpalanog sa “Senyas nga Padayon”

Bisan pa sa panahon sa gubat nga pagrasyon sa pagkaon ug sa gasolina, sayo niadtong Marso 1942, ang mga plano gipahibalo alang sa Bag-ong Kalibotan Teokratikanhong Asembliya, nga pagahimoon sa Septiyembre 18-20. Sa pagpasayon sa biyahe, 52 ka siyudad gipili alang sa kombensiyon latas sa Tinipong Bansa, daghan niana gikonektar pinaagig telepono sa Cleveland, Ohio, ang pangunang siyudad. Sa samang panahon, ang mga Saksi ni Jehova nagtigom sa 33 ka laing mga siyudad sa tibuok yuta. Unsay tumong niining asembliyaha?

‘Kita wala magtigom dinhi sa pagpamalandong bahin sa miagi o kon unsay nahimo sa mga indibiduwal,’ pahayag sa tsirman, si Brader Covington, sa iyang pasiunang mga pulong sa pangbukas nga sesyon. Unya, iyang gipailaila ang sukaranang pakigpulong, “Ang Bugtong Kahayag,” pinasikad sa Isaias mga kapitulo 59 ug 60, nga gihatag ni Brader Franz. Nga naghisgot sa matagnaong sugo ni Jehova nga gitala ni Isaias, ang mamumulong madasigong nagpahayag: “Nan, ania, ang senyas nga ‘Padayon’ gikan sa Labing Hataas nga Awtoridad sa pagpadayon sa iyang [buluhaton] sa pagpanaksi bisag unsay mahitabo una pa moabot ang Armageddon.” (Isa. 6:​1-12) Dili kini panahon sa pagtinapolan ug pagpahayahay.

“May dugang pang buluhaton nga pagahimoon; daghang buluhaton!” pahayag  ni N. H. Knorr sa sunod nga pakigpulong sa programa. Sa pagtabang sa iyang mga mamiminaw sa ilang pagsanong sa senyas nga “Padayon,” si Brader Knorr nagpahibalo sa pagluwat sa edisyon sa King James nga bersiyon sa Bibliya, nga gipatik sa kaugalingong mga imprintahanan sa Sosyedad ug kompleto sa konkordansiya nga gidesinyo ilabina aron magamit sa mga Saksi ni Jehova diha sa ilang ministeryo sa kanataran. Kanang pagluwat nagpasundayag sa mainitong kaikag ni Brader Knorr sa pagpatik ug pag-apod-apod sa Bibliya. Sa pagkatinuod, tapos nga siya nahimong presidente sa Sosyedad sayosayo nianang tuiga, si Brader Knorr milihok dayon sa pagkuhag mga katungod sa pagpatik alang niini nga hubad ug gihikay ang pagpangandam sa konkordansiya ug sa ubang mga bahin. Sulod sa mga bulan kining linain nga edisyon sa King James Version andam na nga iluwat sa panahon sa kombensiyon.

Sa kataposang adlaw sa asembliya, si Brader Knorr naghatag sa diskursong “Kalinaw​—Molungtad ba Kini?” Dinha iyang gihan-ay ang kusganong ebidensiya gikan sa Pinadayag 17:8 nga ang Gubat sa Kalibotan II, nga kaniadto nagsilaob pa, dili motultol ngadto sa Armageddon, ingon sa gihunahuna sa pipila, apan ang gubat matapos ug ang usa ka yugto sa kalinaw mosugod. May buluhaton pa gihapon nga angay himoon sa pagmantala sa Gingharian sa Diyos. Ang mga kombensiyonista giingnan nga aron makatabang sa pag-atiman alang sa gidahom nga pag-uswag diha sa organisasyon, sugod sa sunod bulan ang Sosyedad mopadala ug “mga alagad sa kaigsoonan” nga makigtambayayong sa mga kongregasyon. Ang matag kongregasyon duawon kada unom ka bulan.

“Kadtong Bag-ong Kalibotan Teokratikanhong Asembliya lig-ong naghugpong sa organisasyon ni Jehova alang sa buluhaton sa unahan,” matud ni Marie Gibbard, kinsa mitambong sa Dallas, Texas, kauban sa iyang mga ginikanan. Ug daghan pa ang buluhaton nga pagahimoon. Ang mga Saksi ni Jehova naglantaw sa unahan sa yugto sa kalinaw nga moabot. Sila determinado sa pagdaro nga walay likoliko bisan pa sa pagsupak ug paglutos, nga magapahayag sa maayong balita nga walay hunong!

Usa ka Panahon sa Nagauswag nga Edukasyon

Sila nakagamit na sa tarheta nga may pamatuod ug sa ponograpo diha sa ilang balay-sa-balay nga pagsangyaw, apan mahimo ba nga ang matag saksi ni Jehova mouswag diha sa iyang katakos sa pagsaysay gikan sa Kasulatan sa mga katarongan sa ilang paglaom? Ang ikatulong presidente sa Sosyedad, si N. H. Knorr, naghunahuna niana. Si C. James Woodworth, kansang amahan sulod sa katuigan editor sa The Golden Age ug Consolation nagpahayag niining paagiha: “Samtang sa adlaw ni Brader Rutherford ang pasiugda maoy bahin sa ‘Ang Relihiyon Usa ka Lit-ag ug Panglimbong,’ karon namanagbanag ang panahon sa tibuok-kalibotang  pag-uswag, ug ang edukasyon​—Biblikanhon ug organisasyonal​—nagsugod sa sukod nga sukad wala masinatii sa katawhan ni Jehova.”

Ang panahon sa edukasyon nagsugod halos dihadiha. Niadtong Pebrero 9, 1942, mga usa ka bulan human mapili si N. H. Knorr nga presidente sa Sosyedad, usa ka layog-abot nga pahibalo ang gihimo sa Brooklyn Bethel. Mga kahikayan gihimo sa Bethel alang sa Abanteng Kurso sa Teokratikanhong Ministeryo​—usa ka tunghaan nga nagpasiugda sa pagdukiduki sa Bibliya ug sa pagsulti atubangan sa publiko.

Pagkasunod tuig, ang pundasyon gipahiluna alang sa susamang tunghaan nga pagadumalahon diha sa lokal nga mga kongregasyon sa mga Saksi ni Jehova. Sa “Tawag sa Aksiyon” nga Asembliya nga gihimo sa tibuok Tinipong Bansa sa Abril 17 ug 18, 1943, ang pulyeto nga Course in Theocratic Ministry giluwatan. Ang kada kongregasyon gidasig sa pagsugod sa bag-ong tunghaan, ug ang Sosyedad nagtudlo ug mga instruktor sa pag-alagad ingong mga tsirman ug sa paghatag ug makapalig-on nga tambag mahitungod sa mga pakigpulong sa estudyante nga gihatag sa mga nagpatala nga mga lalaki. Sa labing madali, ang kurso gihubad ug gipadapat sa ubang kayutaan.

Ingong sangpotanan, ang kuwalipikadong mga mamumulong nga nabansay niining tunghaan sa ministeryo misugod sa pagpakigbahin diha sa tibuok-kalibotan nga kampanya sa pagsulti sa atubangan sa publiko sa pagmantala sa mensahe sa Gingharian. Daghan kanila sa ulahi nakagamit gayod sa ilang kahanas ingong mga mamumulong sa kombensiyon ug diha sa pag-atiman sa bug-at organisasyonal nga mga responsabilidad.

Apil kanila mao si Angelo C. Manera, Jr., usa ka nagapanaw nga magtatan-aw sulod sa mga 40 ka tuig. Siya usa sa unang mga nagpatala diha sa tunghaan sa iyang kongregasyon, ug siya mipahayag: “Kaming nagtambong sa mga tigom ug nanggawas sa pag-alagad sa kanataran sulod sa daghang katuigan nga wala kining taganaha nag-isip niini ingong usa ka dakong lakang sa among personal ug organisasyonal nga pag-uswag.”

Mahitungod sa iyang pagkabansay diha sa tunghaan nga giinagurahan sa Brooklyn Bethel niadtong 1942, si George Gangas, usa ka Gregong maghuhubad niadtong panahona, sa ulahi nag-ingon: “Akong nahinumdoman ang panahon nga mihatag ako sa akong unang unom-ka-minuto nga pakigpulong. Wala akoy pagsalig sa akong kaugalingon busa ako kanang gisulat. Apan sa dihang ako mibarog sa pagsulti, ang kahadlok sa mga mamiminaw mihakop kanako ug ako nayungit ug nagbungabunga, nga nakalimot sa akong igsusulti. Unya ako midangop sa pagbasa gikan sa manuskrito. Apan ang akong mga kamot nangurog pag-ayo nga ang mga linya sa sinulat nagluksolukso!” Bisan pa, wala siya moundang. Sa nahaigong panahon, siya naghatag na ug mga pakigpulong sa atubangan sa daghang mamiminaw sa kombensiyon ug gani nag-alagad ingong usa ka membro sa Nagamandong Lawas sa mga Saksi ni Jehova.

Usa ka Tunghaan nga Natukod sa Pagtuo

Niadtong Septiyembre 24, 1942, usa pa ka dakong lakang ang gihimo sa panahon sa nagauswag nga edukasyon. Sa tiningob nga miting sa hunta direktiba sa duha ka legal nga korporasyon, si Brader Knorr misugyot nga ang Sosyedad motukod  ug laing tunghaan, nga mogamit sa usa ka tinukod nga gipatindog sa Kingdom Farm, sa South Lansing, New York, 410 kilometros sa amihan-kasadpan sa Siyudad sa New York. Ang katuyoan niini nga tunghaan mao ang pagbansay sa mga misyonaryo alang sa pag-alagad sa langyawng mga nasod diin may dakong panginahanglan sa mga magmamantala sa Gingharian. Ang sugyot giuyonan sa tanan.

Si Albert D. Schroeder, niadto 31 anyos ang panuigon, gitudlo nga magtatala ug nag-alagad ingong tsirman sa komite sa pag-organisar sa bag-ong tunghaan. “Aw, ang among mga kasingkasing tinuod nga nanglukso tungod sa kalipay niining dili-katuohang bag-ong asaynment!” matud niya. Ang mga instruktor napuliki dayon; sila may upat lamang ka bulan sa paghikay sa mga kurso, paghan-ay sa mga pakigpulong, ug paghimo ug librarya. “Ang kurso sa abanteng Kristohanong edukasyon mikabat ug 20 ka semana, nga ang Bibliya mao ang pangunang tun-anang basahon,” saysay ni Brader Schroeder, nga karon nagaalagad ingong membro sa Nagamandong Lawas.

Pagka Lunes, Pebrero 1, 1943, usa ka mabugnaw nga adlaw sa tingtugnaw sa ilaya sa New York, ang unang saring, nga may 100 ka estudyante, nagsugod. Ania ang usa ka tunghaan nga sa tinuod natukod sa pagtuo. Sa taliwala sa Gubat sa Kalibotan II, may pipila lamang ka dapit sa kalibotan nga mapadad-an ug mga misyonaryo. Bisan pa, uban sa hingpit nga pagsalig nga may yugto sa kalinaw nga sa maong panahon sila magamit, ang umaabot nga mga misyonaryo gibansay.

Tapos-Gubat nga Pag-organisar Pag-usab

Niadtong Mayo 1945 ang panag-away sa Gubat sa Kalibotan II sa Uropa natapos. Upat ka bulan sa ulahi, sa Septiyembre, ang away mihunong sa Pasipiko. Ang Gubat sa Kalibotan II human na. Sa Oktubre 24, 1945, kapin lang ug diyutay sa tulo ka tuig pagkatapos ihatag sa presidente sa Sosyedad ang pakigpulong “Kalinaw​—Molungtad ba Kini?” ang Karta sa Hiniusang Kanasoran miepekto.

Ang mga taho mahitungod sa kalihokan sa mga Saksi ni Jehova misugod sa pagdagayday gikan sa Uropa. Sa gilapdon nga nakapahingangha sa ilang igsoong mga lalaki ug igsoong mga babaye sa tibuok kalibotan, ang buluhaton sa pagmantala sa Gingharian nagpadayon diha sa Uropanhong mga nasod bisan pa sa gubat. Ang The Watchtower sa Hulyo 15, 1945, nagtaho: “Niadtong 1940 sa Pransiya may 400 ka magmamantala; karon may 1,100 nga nanagsulti bahin sa Gingharian. . . . Niadtong 1940 ang Holland may 800 ka magmamantala. Upat ka gatos kanila ang gibalhog ngadto sa mga kampo konsentrasyon sa Alemanya. Kadtong nahabilin nagsulti bahin sa Gingharian. Ang gisangpotan? Sa maong yuta karon dihay 2,000 ka magmamantala sa Gingharian.” Ang bukas nga ganghaan sa kagawasan karon naghatag ug mga kahigayonan sa dugang pagmantala sa maayong balita, dili lamang sa Uropa kondili sa tibuok kalibotan. Ugaling, gikinahanglan una ang dakong pagtukod pag-usab ug pag-organisar pag-usab.

 Kay maikagon nga masurbi ang mga panginahanglan sa mga Saksi ni Jehova sa nadaot-sa-gubat nga mga nasod, ang presidente sa Sosyedad, kuyog sa iyang sekretaryo, si Milton G. Henschel, mipanaw sa pagbisita sa Britanya, Pransiya, Switzerland, Belgium, ang Netherlands, ug Scandinavia niadtong Nobyembre 1945 sa pagdasig sa mga igsoon ug sa pagsusi sa mga sangang buhatan sa Sosyedad. d Ang ilang tumong maoy tapos-gubat nga pag-organisar pag-usab. Mga kahikayan gihimo alang sa mga abiyo sa literatura ingon man sa pagkaon ug sinina nga ipadala sa mga igsoon nga nanginahanglan. Ang mga sangang buhatan gitukod pag-usab.

Si Brader Knorr nasayod pag-ayo nga ang maayong organisasyon sa sanga gikinahanglan aron makanunot sa pag-abante sa pagsangyaw nga buluhaton. Ang  iyang kinaiyanhong mga katakos sa pag-organisar nagamit sa bug-os diha sa pagpadako sa mga pasilidad sa mga sanga sa Sosyedad sa tibuok kalibotan. Pagka 1942, sa dihang siya nahimong presidente, dihay 25 ka sangang buhatan. Pagka 1946, bisan pa sa mga pagdili ug mga kababagan sa Gubat sa Kalibotan II, may mga sanga na diha sa 57 ka kayutaan. Latas sa misunod nga 30 ka tuig, hangtod sa 1976, ang gidaghanon sa mga sanga ming-uswag ngadto sa 97.

Nasangkapan Aron Mahimong mga Magtutudlo

Gikan sa iyang internasyonal nga mga pagbiyahe pagkatapos gayod sa gubat, ang presidente sa Sosyedad nakahukom nga ang mga Saksi ni Jehova kinahanglan nga masangkapan pag-ayo aron mahimong mga magtutudlo sa Pulong sa Diyos. Dugang edukasyon sa Bibliya ang gikinahanglan ingon man sa tukmang mga instrumento nga magamit diha sa ministeryo sa kanataran. Kadtong mga panginahanglana natagan-an dayon sa tapos-gubat nga panahon.

Sa Malipayong Kanasoran Teokratikanhong Asembliya, nga gihimo sa Cleveland, Ohio, niadtong Agosto 4-11, 1946, si Brader Knorr mihatag sa pakigpulong “Nasangkapan Alang sa Tanang Maayong Buhat.” Nadasig ang entirong mamiminaw samtang iyang gisukna ang mga pangutanang sama sa: “Dili ba dako nga tabang ang makabaton ug impormasyon sa matag usa sa kan-uman-ug-unom ka basahon sa Bibliya? Dili ba makatabang sa pagsabot sa Kasulatan kon kita nahibalo kong kinsa ang nagsulat sa kada basahon sa Bibliya? kanus-a ang matag libro nasulat? diin kana nasulat?” Ang tanan nahinam nga makadungog sa iyang mga pulong samtang iyang gipahayag: “Mga igsoon, kanang tanang impormasyon ug daghan pa inyong mabatonan diha sa bag-ong libro nga nag-ulohang ‘Equipped for Every Good Work’!” Ang masipang pamalakpak misunod nianang pahibaloa. Ang bag-ong publikasyon magsilbing usa ka tun-anang-basahon alang sa tunghaan sa ministeryo nga ginahimo diha sa mga kongregasyon.

Ang mga Saksi ni Jehova dili lamang nasangkapan sa publikasyon sa pagpalalom sa ilang kahibalo sa Kasulatan apan sila usab gihatagan ug pila ka maayong tabang nga magamit sa kanataran. Ang 1946 nga kombensiyon dili gayod makalimtan tungod sa pagluwat sa unang isyu sa Awake! Kining bag-ong magasin maoy ilis sa Consolation (kanhi nailhang The Golden Age). Usab giluwatan (sa Ingles) ang librong “Pasagdi ang Diyos Maminatud-on.” e Si Henry A. Cantwell, nga sa ulahi nag-alagad ingong usa ka nagapanaw nga magtatan-aw, nagsaysay: “Sulod sa dugaydugay nga panahon kami nagkinahanglan gayod ug usa ka libro nga magamit nga epektibo diha sa pagdumala ug mga pagtuon sa Bibliya uban sa bag-ong interesadong mga tawo, usa nga mokobre sa paninugdang mga doktrina ug mga kamatuoran sa Bibliya. Karon tungod sa pagluwat sa ‘Pasagdi ang Diyos Maminatud-on,’ kami nakabaton sa kon unsay gikinahanglan.”

Kay nasangkapan sa maong bililhong mga tabang sa pagpanudlo, ang mga Saksi ni Jehova dugang nga nagdahom sa tulin nga pag-uswag. Nagpahayag sa  kombensiyon bahin sa ulohang “Ang mga Suliran sa Pagtukod Pag-usab ug sa Pagpalapad,” gisaysay ni Brader Knorr nga sa katuigan sa tibuok-kalibotang gubat, walay nahitabong paghunong diha sa mga paningkamot sa pagpanaksi. Gikan sa 1939 hangtod sa 1946, ang gidaghanon sa mga magmamantala sa Gingharian nadugangan ug kapin sa 110,000. Sa pagtagana sa nagatubo tibuok-kalibotan nga panginahanglan alang sa literatura sa Bibliya, ang Sosyedad nagplano sa pagpadako sa pabrika ug sa Balayng Bethel sa Brooklyn.

Ang gipaabot nga yugto sa kalinaw sa kalibotan miabot na. Ang panahon sa tibuok-kalibotang pagpalapad sa edukasyon sa Bibliya nagsugod nag maayo. Ang mga Saksi ni Jehova namauli gikan sa Malipayong Kanasoran Teokratikanhong Asembliya nga nasangkapan ug maayo aron mahimong mga magtutudlo sa maayong balita.

Ang Pagpahayag sa Gingharian Kusog nga Miuswag

Uban sa panglantaw sa tibuok kalibotang pagpalapad, niadtong Pebrero 6, 1947, ang presidente sa Sosyedad ug ang iyang sekretaryo, si Milton G. Henschel, nagsugod sa usa ka 76,916-kilometros tibuok-kalibotan nga biyahe sa pag-alagad. Ang biyahe nagdala kanila sa mga isla sa Pasipiko, New Zealand, Australia, Habagatan-sidlakang Asia, India, Tungang Sidlakan, ang dapit sa Mediteranyo, Sentral ug Kasadpang Uropa, Scandinavia, Inglaterra, ug Newfoundland. Kadto maoy unang higayon sukad sa 1933 nga ang mga hawas sa kawani sa hedkuwarter sa Sosyedad sa Brooklyn nakaduaw sa ilang mga igsoon sa Alemanya. Ang mga Saksi ni Jehova sa tibuok kalibotan nagsubay sa duha ka biyahero samtang ang mga taho sa biyahe gipatik diha sa mga isyu sa The Watchtower sulod sa 1947. f

“Kadto ang unang higayon nga kami masinati sa mga igsoon sa Asia ug sa ubang mga dapit ug sa pagtan-aw kon unsay mga panginahanglan,” saysay ni Brader Henschel, karon usa ka sakop sa Nagamandong Lawas sa mga Saksi ni Jehova. “Kami naghunahuna sa pagpadala ug mga misyonaryo, busa kinahanglan namong mahibaloan ang mga kahimtang nga ila unyang sagubangon ug kon unsay ilang mahimong kinahanglanon.” Sunod sa biyahe, usa ka makanunayong agos sa nabansay-sa-Gilead nga mga misyonaryo ang nangabot sa langyawng mga yuta aron manguna sa buluhatong pagwali sa Gingharian. Ug ang mga gisangpotan dalayegon. Latas sa kapin ug lima ka tuig (1947-52), ang gidaghanon sa mga magwawali sa Gingharian sa tibuok kalibotan mikapin sa doble, gikan sa 207,552 ngadto sa 456,265.

Pag-uswag sa Teokrasya

Niadtong Hunyo 25, 1950, ang mga kusog militar gikan sa Republika sa Demokratikanhong Katawhan sa Korea misulong sa Republika sa Korea sa habagatan. Ngadtongadto, mga tropa gipadala gikan sa laing 16 ka kayutaan. Apan samtang ang gubat nagparang sa dagkong mga nasod batok sa usag-usa, ang mga Saksi ni  Jehova nangandam sa pagtigom alang sa usa ka internasyonal nga kombensiyon nga mopasundayag dili lamang sa ilang tibuok-kalibotang panaghiusa apan usab nga si Jehova nagpanalangin kanila ug pag-uswag.​—Isa. 60:22.

Ang Pag-uswag sa Teokrasya nga Asembliya gieskedyul sa Hulyo 30 hangtod Agosto 6, 1950. Kini hangtod niadtong panahona maoy kinadak-ang kombensiyon nga sukad gihimo sa mga Saksi ni Jehova sa usa ka dapit. Mga 10,000 ka langyawng delegado gikan sa Uropa, Aprika, Asia, Latin Amerika, mga kaislahan sa Pasipiko​—tanantanan 67 ka lainlaing kayutaan​—nagtigom sa Yankee Stadium sa Siyudad sa New York. Ang kinatas-ang tumatambong nga kapin ug 123,000 sa publikong pakigpulong​—kon itandi sa kinatas-ang 80,000 nga mitambong sa Malipayong Kanasoran Teokratikanhong Asembliya upat ka tuig lamang una niana​—mismo dakong pamatuod sa pag-uswag.

Ang importanteng hinungdan sa pag-uswag nga nasinatian sa mga Saksi ni Jehova mao ang pagpatik ug pag-apod-apod sa Pulong sa Diyos. Usa ka halandomong punto niining bahina nakab-ot niadtong Agosto 2, 1950, sa dihang si Brader Knorr nagpahibalo sa pagluwat sa modernong-pinulongan nga New World Translation of the Christian Greek Scriptures sa Ingles. Ang mga kombensiyonista nalipay sa pagkahibalo nga kining bag-ong hubad nagpasig-uli sa balaang ngalan nga Jehova sa 237 ka beses diha sa pangunang teksto gikan sa Mateo ngadto sa Pinadayag! Sa pagtapos sa iyang diskurso, ang mamumulong mihimog makapatandog nga hangyo: “Dad-a kining hubara. Basaha kini sa bug-os. Tun-i kini, tungod kay kini motabang kanimo sa maayong pagsabot sa Pulong sa Diyos. Ipahimutang kini sa uban.” Ang ubang mga bahin misunod latas sa sunod nga dekada, mao nga sa kataposan ang mga Saksi ni Jehova nakabaton ug tukma, sayon-basahon nga hubad sa entirong Bibliya nga ilang maikagong gitanyag ngadto sa uban.

Una pa mobiya sa siyudad nga gikombensiyonan, ang mga delegado gidapit sa pagduaw sa bag-ong hedkuwarter sa Bethel sa 124 Columbia Heights ug ang gipadak-an pag-ayo nga pabrika sa imprintahanan sa 117 Adams Street. Gitukod pinaagi sa pinansiyal nga tabang sa mga Saksi gikan sa tibuok kalibotan, ang bag-ong mga pasilidad nagkompleto sa dakong programa sa pagpadako nga gipahibalo ug maikagong giuyonan niadtong 1946 nga kombensiyon sa Cleveland. Ang mga Saksi ni Jehova kaniadto wala mahibalo kon unsa pa unya ka dako ang pagpalapad, dili lamang sa Brooklyn, apan sa tibuok-kalibotan. Dugang pa ug mas dagkong mga imprintahanan ang gikinahanglan sa pag-atiman sa kanunay nagauswag nga gidaghanon sa mga magmamantala sa Gingharian.

Giuswagang Pagbansay sa Balay-sa-Balay nga Ministeryo

Sa Bag-ong Kalibotang Sosyedad nga Asembliya, nga gihimo sa Siyudad sa New York, niadtong Hulyo 19-26, 1953, bag-ong mga publikasyon ang gitagana alang sa mga Saksi ni Jehova mismo ug magamit ilabina diha sa balay-sa-balay nga pagmantala sa Gingharian. Pananglitan, ang pagluwat sa “Make Sure of All Things” nakapahinabo ug masipang pamalakpak gikan sa 125,040  nga presente sa Lunes, Hulyo 20. Usa ka sayon dad-on nga galamiton sa pag-alagad sa kanataran, ang 416-panid sukod-sa-bulsa nga libro nagbalay sa kapin ug 4,500 ka teksto ubos sa 70 ka pangunang mga tema. Ang mga Saksi ni Jehova niadtong tungora may daling mabatonan nga Kasulatanhong mga tubag sa mga pangutana nga isukna diha sa ilang balay-sa-balay nga pagsangyaw.

Sa Miyerkoles sa buntag sa panahon sa pakigpulong nga “Ang Pangunang Buluhaton sa Tanang mga Alagad,” si Brader Knorr nagpahibalo sa dugang lakang diha sa nagapadayon nga edukasyon sa mga Saksi ni Jehova​—usa ka programa sa mabug-oson nga pagbansay sa balay-sa-balay nga ministeryo ipalihok diha sa tanang kongregasyon. Ang mas sinati nga mga magmamantala gihangyo sa pagtabang niadtong kulang ug kasinatian aron mahimong regular, epektibong mga magmamantala sa Gingharian sa balay-sa-balay. Kining layog-abot nga programa nagsugod niadtong Septiyembre 1, 1953. Si Jesse L. Cantwell, usa ka nagapanaw nga magtatan-aw nga nakig-ambit sa pagbansay nga buluhaton, nag-ingon: “Kining programaha sa pagkatinuod nakatabang sa mga magmamantala nga mahimong mas epektibo.”

Sa mga bulan sunod sa Hulyo 1953, ang palugway nga mga kombensiyon gihimo sa tanang lima ka kontinente, uban sa gipasibo-sa-lokal nga mga porma sa samang programa. Ang giuswagan nga pagbansay sa balay-sa-balay nga ministeryo gisugdan diha sa mga kongregasyon sa mga Saksi ni Jehova sa tibuok kalibotan. Nianang samang tuig ang gidaghanon sa mga magmamantala sa Gingharian nakaabot sa kinatas-ang 519,982.

Pagtagana sa mga Panginahanglan sa Tibuok-Kalibotang Pagpalapad

Sa tungatunga sa katuigang 1950, ang dugang mga kahikayan gihimo sa pag-atiman sa tulin nga pagtubo sa organisasyon. Sulod sa kapin sa usa ka dekada, si N. H. Knorr nakabiyahe sa tibuok nga yuta sa pagsusi sa dagan sa mga sanga. Ang maong biyahe dakog nahimo sa pagseguro sa husto nga pagdumala sa buluhaton diha sa matag nasod ug sa paglig-on sa tibuok-kalibotan nga panaghiusa sa mga Saksi ni Jehova. Si Brader Knorr may halalom nga gugma alang sa mga misyonaryo ug kanilang nag-alagad diha sa mga sanga sa tibuok kalibotan. Bisan diin siya moadto,  mogahin siyag panahon sa pagpakigkukabildo kanila mahitungod sa ilang mga suliran ug mga kinahanglanon ug sa pagdasig kanila diha sa ilang ministeryo. Apan niadtong 1955, dihay 77 ka sangang buhatan sa Watch Tower Society ug 1,814 ka nabansay-sa-Gilead nga mga misyonaryo nga nag-alagad sa 100 ka lainlaing kayutaan. Nakaamgo nga kadto sobra na kay sa iyang madumala nga nag-inusara, si Brader Knorr naghimog mga lakang sa paglangkit sa uban niining hinungdanong buluhaton sa pagduaw sa mga sanga ug sa misyonaryong mga balay.

Ang mga kahikayan gihimo sa pagbahin sa yuta ngadto sa napulo ka sona, ang matag sona nagsakop sa ubay-ubayng sanga sa Sosyedad. Kuwalipikado nga mga igsoong lalaki gikan sa buhatan sa Brooklyn ug may-kasinatiang mga magtatan-aw sa sanga gitudlo nga mga alagad sa sona (karon gitawag nga mga magtatan-aw sa sona) ug gibansay alang niining buluhatona ni Brader Knorr. Niadtong Enero 1, 1956, ang una niining mga alagad sa sona nagsugod niining bag-ong pag-alagad sa pagduaw sa mga sanga. Pagka 1992, kapin sa 30 ka brader, lakip sa mga sakop sa Nagamandong Lawas, ang nag-alagad ingong mga magtatan-aw sa sona.

Edukasyon sa Balaang Kabubut-on

Sa ting-init sa 1958, ang hulga sa gubat midag-om sa Tungang Sidlakan. Bisan pa sa kadaot sa internasyonal nga mga relasyon, ang mga Saksi ni Jehova nag-andam sa pagtigom alang sa internasyonal nga kombensiyon nga sa dugang moedukar kanila diha sa balaang kabubut-on. Kana usab napamatud-an nga ilang kinadak-ang kombensiyon sa bisan haing usa ka siyudad.

Ang kinatas-ang ihap nga 253,922 ka delegado gikan sa 123 ka kayutaan mibaha sa Yankee Stadium ug sa Polo Grounds sa Siyudad sa New York alang sa Balaang Kabubut-on Internasyonal nga Asembliya, sa Hulyo 27 hangtod Agosto 3. “Ang mga Saksi ni Jehova Midagsa sa Pagpangabot ug Napuno ang mga Estadyum,” matud sa Daily News sa New York sa Hulyo 26, 1958. “Walo ka espesyal nga tren, 500 ka gipakyaw nga bus ug 18,000 ka kotse nagdala sa mga membro, gawas pa sa duha ka gipakyaw nga barko ug 65 ka gipakyaw nga ayroplano.”

Ang nabansay-sa-Gilead nga mga misyonaryo nagpahibalo sa hedkuwarter sa Sosyedad sa hagit nga ilang giatubang sa pagtudlo sa kamatuoran sa Bibliya ngadto kanilang dili sinati sa mga pagtuo ug doktrina sa mga simbahan sa Kakristiyanohan. Kon makabaton unta sila ug publikasyon nga mohan-ay lamang sa tinuod nga mga pagtulon-an sa Bibliya, apan sayon nga basahon ug sabton! Sa kalipay sa 145,488 ka delegado nga presente sa Huwebes sa hapon, Hulyo 31, si Brader Knorr nagpahibalo sa pagluwat sa bag-ong libro nga Gikan sa Paraisong Nawala Ngadto sa Paraisong Nabatonan Pag-usab.

Si Brader Knorr nagdasig sa tanan sa paggamit sa bag-ong libro diha sa ilang ministeryo sa kanataran. Siya usab nagsugyot nga ang mga ginikanan makakaplag niini nga makatabang sa ilang pagtudlo sa ilang mga anak sa kamatuoran sa Bibliya. Daghang ginikanan ang namati sa sugyot ug nagpadapat niana. Si Grace A. Estep, usa ka magtutudlo sa eskuylahan nga nagdako sa usa ka gamay nga lungsod duol sa Pittsburgh, Pennsylvania, nag-ingon: “Usa ka tibuok kaliwatan sa mga bata ang nagdako nga nagpaklipakli sa Paraiso nga libro, nagdala niana sa mga tigom uban kanila, nagpaambit niana sa ilang batang mga kadula, nakahimo sa pag-asoy, sa wala pa sila magpangedaron nga igo nang mobasa, sa tanang estorya sa Bibliya gumikan lamang sa mga hulagway.”

 Ang gahi nga mga materyal alang sa abanteng mga estudyante sa Pulong sa Diyos gitagana usab. Sa paghinapos sa iyang makapatandog nga diskursong “Matuman ang Imong Kabubut-on,” gipaukyaban ni Brader Knorr ang mga tumatan-aw sa dihang iyang gipahibalo ang pagluwat sa bag-ong librong nag-ulohang “Ang Imong Kabubut-on Matuman sa Yuta.” Kining bag-ong publikasyon, naundan sa mabug-osong pagtuon sa basahon ni Daniel, nag-edukar sa mga magbabasa niana kon sa unsang paagi ang balaang kabubut-on natuman kaniadto ug ginatuman karon. “Malingaw ka pag-ayo niining libroha!” pahayag sa mamumulong. Pinaagi sa masipang pamalakpak ang bagang mamiminaw nga dihay 175,441 nagpahayag sa ilang kangaya sa pagdawat niining bag-ong instrumento sa pagpalalom sa ilang apresasyon sa balaang kabubut-on!

Sa iyang panghinapos nga pamulong, si Brader Knorr nagpahibalo ug dugang sa linaing edukasyonal nga mga programa nga makaayo sa tibuok-kalibotang organisasyon. “Ang edukasyonal nga buluhaton wala magaus-os,” pahayag ni Knorr, “hinunoa kini nagauswag paunahan.” Iyang gilaraw ang mga plano alang sa pagtagana ug usa ka napulo-ka-bulan nga kurso sa pagbansay sa Brooklyn alang sa mga magtatan-aw gikan sa mga sanga sa Sosyedad sa tibuok kalibotan. Usab, diha sa daghang nasod sa tibuok kalibotan, may mga kurso sa pagbansay sa usa ka bulan alang sa nagapanaw nga mga magtatan-aw ug kanilang may buluhaton sa pagbantay diha sa mga kongregasyon. Ngano man kining tanang edukasyon? “Buot natong mouswag ngadto sa hataas nga sukod sa pagsabot,” saysay niya, “aron nga kita makatugkad sa halalom nga mga panghunahuna ni Jehova ingon sa iyang gipahayag diha sa iyang Pulong.”

Dihadiha gisugdan pagtrabaho ang mga kurso nga pagatun-an alang niining mga programa sa pagbansay. Pito ka bulan sa ulahi, sa Marso 9, 1959, ang unang saring sa bag-ong tunghaan, ang Tunghaan sa Ministeryo sa Gingharian, nagsugod sa South Lansing, New York, ang dapit sa Tunghaang Gilead. Ang gisugdan dinha sa wala madugay nakaabot sa tibuok kalibotan sanglit ang bag-ong tunghaan gigamit sa pagbansay sa mga magtatan-aw sa mga kongregasyon.

 Gipalig-on sa “Pagbarog nga Malig-on Diha sa Pagtuo”

Sa katuigang 1960, ang tawhanong katilingban nalumsan sa dakong balod sa relihiyoso ug sosyal nga mga kausaban. Ang mga klerigo nagtawag sa mga bahin sa Bibliya ingong tinumotumo o kinaraan. Ang ideolohiya nga “ang Diyos patay” nagkapopular pag-ayo. Ang tawhanong katilingban nagkaunlod ug lalom ug lalom nganha sa yanang sa seksuwal nga imoralidad. Pinaagi sa The Watchtower ug ubang mga publikasyon ingon man sa mga programa sa kombensiyon, ang katawhan ni Jehova gipalig-on sa “pagbarog nga malig-on diha sa pagtuo” sa panahon niining magubutong dekada.​—1 Cor. 16:13.

Sa usa ka serye sa mga kombensiyon nga gihimo sa tibuok kalibotan niadtong 1963, ang pakigpulong “Ang Basahon sa ‘Walay Kataposang Maayong Balita’ Mapuslanon” naglaban sa Bibliya batok sa pangatake sa mga kritiko. “Ang mga kritiko sa Bibliya dili na kinahanglan nga mopunting nga mga tawo lamang ang nagsulat niining basahona,” saysay sa mamumulong. “Ang Bibliya mismo sa kamatinud-anon nagpahibalo kanato nianang kamatuorana. Apan unsay nagpalahi niining basahona gikan sa bisan unsang libro nga gisulat sa tawo mao nga ang Balaang Bibliya ‘dinasig sa Diyos.’” (2 Tim. 3:​16, 17) Kining makapatandog nga pakigpulong mitultol ngadto sa pagluwat (sa Ingles) sa librong “Ang Tibuok Kasulatan Dinasig sa Diyos ug Mapuslanon.” Ang bag-ong publikasyon naglakip sa panaghisgot sa matag basahon sa Bibliya, naghatag sa kasaysayan sa basahon, sama sa kon kinsay nagsulat niana, kanus-a ug diin kana gisulat, ug ebidensiya sa iyang pagkakasaligan. Unya miabot ang usa ka sumada sa basahon sa Bibliya, gisundan sa usa ka seksiyong gitawag ug “Nganong Mapuslanon,” nga nagpakita sa unsang paagi kining partikular nga basahon sa Bibliya dakog bili alang sa magbabasa. Usa ka bililhong instrumento diha sa nagapadayong edukasyon sa Bibliya sa mga Saksi ni Jehova, kining publikasyona gigamit gihapon ingong tun-anang libro diha sa Tunghaan sa Teokratikanhong Ministeryo tapos sa mga 30 ka tuig gikan sa pagluwat niana! g

Ang mga Saksi ni Jehova dili kay wala maapektahe sa dakong kausaban sa seksuwal nga panglantaw sa katuigang 1960. Sa pagkatinuod, ang pipila ka libo​—usa ka gamay nga porsiento sa ilang tibuok nga gidaghanon​—ang kinahanglang ipalagpot kada tuig, ang kadaghanan tungod sa seksuwal nga imoralidad. Nan, uban sa maayong katarongan, ang katawhan ni Jehova gihatagan ug direktang tambag diha sa serye sa distritong mga kombensiyon nga gihimo niadtong 1964. Si Lyle Reusch, usa ka nagapanaw nga magtatan-aw nga sa sinugdan gikan sa Saskatchewan, Canada, nahinumdom sa pakigpulong nga “Hupti ang Organisasyon sa mga Alagad sa Publiko nga Lunsay, Putli.” Matud ni Reusch: “Ang prangka, matarong nga pinulongan bahin sa moralidad nagpatin-aw pag-ayo sa mga butang diha sa yano nga mga pulong.”

Ang kaundan sa pakigpulong gipatik diha sa The Watchtower sa Nobyembre 15, 1964. Apil sa ubang mga butang, kana nagpahayag: “Mga babaye, ayaw himoa ang inyong kaugalingon nga usa ka hugaw nga tuwalya alang sa publikong paggamit, nga mabatonan sa hugaw nga mga kamot ni bisan kinsang bohemyo, bisan kinsang simbolikong ‘iro.’”​—Itandi ang Pinadayag 22:15.

 Ang maong prangkang tambag gidesinyo sa pagtabang sa mga Saksi ni Jehova ingong usa ka katawhan nga naghupot sa hinlo moral nga kahimtang, nga takos sa pagpadayon sa pagmantala sa mensahe sa Gingharian.​—Itandi ang Roma 2:​21-23.

“Tug-ani Ako, Unsay Ipasabot Niining 1975?”

Ang mga Saksi dugay nang nagtuo nga ang Usa ka Libo ka Tuig nga Pagmando ni Kristo mosunod inigkatapos sa 6,000 ka tuig nga kasaysayan sa tawo. Apan kanus-a matapos ang 6,000 ka tuig nga paglungtad sa tawo? Ang librong Kinabuhing Walay Kataposan​—Sa Kagawasan sa mga Anak sa Diyos, nga giluwatan (sa Ingles) sa serye sa distritong kombensiyon nga gihimo niadtong 1966, nagpunting sa 1975. Mismo sa kombensiyon, samtang ang mga kaigsoonan nagsusi sa mga kaundan, ang bag-ong libro nakapahinabog daghang mga panaghisgot mahitungod sa 1975.

Sa kombensiyon nga gihimo sa Baltimore, Maryland, si F. W. Franz naghatag sa panghinapos nga pakigpulong. Siya misugod sa pagsulti, “Sa dayon nakong saka sa plataporma usa ka batan-ong lalaki miduol kanako ug miingon, ‘Tug-ani ako, unsay ipasabot niining 1975?’” Unya si Brader Franz naghisgot sa daghang mga pangutana nga mibangon kon kaha ang materyal diha sa bag-ong libro nagpasabot nga pagka 1975 ang Armageddon matapos na, ug si Satanas gaposon na. Siya miingon, sa diwa: ‘Mahimo. Apan wala kami magsulti. Ang tanang mga butang posible sa Diyos. Apan wala kami magsulti. Ug bisag kinsa kaninyo ayaw pagsultig espisipiko bahin sa bisan unsa nga mahitabo tali karon ug sa 1975. Apan ang dakong punto niining tanan, minahal nga mga higala mao kini: Ang panahon hamubo. Ang panahon talitapos, walay duhaduha mahitungod niana.’

Sa katuigan nga misunod sa 1966, daghan sa mga Saksi ni Jehova nanglihok uyon sa espiritu nianang tambaga. Ugaling, laing mga pahayag napatik bahin niining ulohan, ug ang pila maoy lagmit labaw nga nagpiho kay sa angayng isulti. Kini gidawat diha sa Ang Bantayanang Torre sa Septiyembre 15, 1980 (panid 17). Apan ang mga Saksi ni Jehova gipasidan-an usab sa paghatag ug bug-os nga pagtagad diha sa pagbuhat lamang sa kabubut-on ni Jehova ug dili mabalaka pag-ayo mahitungod sa mga petsa ug mga pagpaabot sa sayong kaluwasan. h

Usa ka Instrumento Alang sa Pagpadali sa Buluhaton

Sa ulahing katuigan sa 1960, ang mga Saksi ni Jehova nagmantala sa maayong balita uban ang pagbati sa pagpaabot ug kadinalian. Sulod sa 1968 ang gidaghanon sa mga magmamantala sa Gingharian midaghan ngadto sa 1,221,504 diha sa 192 ka kayutaan. Ugaling, alang sa pila ka tawo ang pagtuon sa Bibliya kasagaran modagan ug pila ka tuig nga walay paglihok pinasikad sa ilang kahibalo nga nabatonan. May paagi ba sa pagpadali sa buluhaton sa paghimo ug tinun-an?

Ang tubag miabot niadtong 1968 tungod sa pagluwat sa usa ka bag-ong tabang  sa pagtuon sa Bibliya, Ang Kamatuoran nga Motultol sa Kinabuhing Dayon. Kining 192-panid sukod-bulsa nga libro giandam nga gihunahuna ang bag-ong mga interesado. Kana naundan ug 22 ka makapaikag nga mga kapitulo nga naghisgot sa mga ulohan sama sa “Ngano man nga Maalamon ang Pagsusi sa Inyong Relihiyon,” “Kon Ngano nga Kita Matigulang ug Mamatay” “Hain ang mga Patay?” “Nganong Gitugotan pa sa Diyos ang Pagkadaotan Hangtod Karon?” “Kon Unsaon Pag-ila sa Matuod nga Relihiyon,” ug “Pagtukod ug Malipayong Kinabuhing Panimalaynon.” Ang Kamatuoran nga libro gidesinyo sa pagdasig sa estudyante sa Bibliya sa pagpangatarongan bahin sa materyal nga gitun-an ug sa pagpadapat niana sa iyang kaugalingong kinabuhi.

Kining bag-ong publikasyon pagagamiton may kalabotan sa unom-ka-bulan nga programa sa pagtuon sa Bibliya. Ang Septiyembre 1968 nga isyu sa Ministeryo sa Gingharian nagpatin-aw sa unsang paagi ang bag-ong programa malampos: “Maayo ang pagsulay sa pagtuon sa usa ka tibuok kapitulo sa ‘Kamatuoran’ nga libro matag semana, bisan tuod kini lagmit dili posible sa tanang tagbalay o sa tanang kapitulo sa libro. . . . Kon, sa kataposan sa unom ka bulan sa mabug-osong pagtuon ug tininuod nga paningkamot nga patambongon sila sa mga tigom, sila sa gihapon wala pa magapakig-uban sa kongregasyon, nan lagmit mas maayo nga imong igugol ang imong panahon sa pagtuon kauban sa lain nga gusto gayod makakat-on sa kamatuoran ug mouswag. Himoa nga imong tumong ang pagpresentar sa maayong balita diha sa mga gitun-an sa Bibliya sa paagi nga ang mga interesado molihok sulod sa unom ka bulan!”

Ug tinuod sila nanglihok! Sa hamubong panahon, ang unom-ka-bulan nga programa sa pagtuon sa Bibliya may dakong kalamposan. Sulod sa tulo ka tuig sa pag-alagad sugod sa Septiyembre 1, 1968, ug natapos sa Agosto 31, 1971, nabawtismohan ang 434,906 ka tawo​—kapin sa doble sa gidaghanon sa nabawtismohan sa panahon sa milabayng tulo ka tuig sa pag-alagad! Sanglit kini miabot sa panahon dihang may pagbati sa pagpaabot ug kadinalian taliwala sa mga Saksi ni Jehova, ang Kamatuoran nga libro ug ang kampanya sa unom-ka-bulan nga pagtuon sa Bibliya nakatabang ug dako sa pagpadali sa paghimog-tinun-an nga buluhaton.​—Mat. 28:​19, 20.

“Kinahanglan Kanang Molampos; Gikan Kana Kang Jehova”

Sulod sa daghang katuigan ang mga kongregasyon sa mga Saksi ni Jehova giorganisar aron ang usa ka kuwalipikado sa espirituwal nga lalaki itudlo sa Sosyedad nga mahimong alagad sa kongregasyon, o “magtatan-aw,” ug gitabangan sa ubang tinudlo nga mga “alagad.” i (1 Tim. 3:​1-10, 12, 13) Kining mga lalakiha moalagad sa panon, dili sa pagharihari ibabaw kanila. (1 Ped. 5:​1-4) Apan ang mga kongregasyon ba makapahiuyon nga mas suod sa katukoran sa unang-siglo nga Kristohanong mga kongregasyon?

 Niadtong 1971, sa serye sa mga kombensiyon nga gihimo sa tibuok yuta, ang pakigpulong “Teokratikanhong Organisasyon Taliwala sa mga Demokrasya ug Komunismo” gipahayag. Sa Hulyo 2, si F. W. Franz mihatag sa pakigpulong sa Yankee Stadium sa Siyudad sa New York. Didto iyang gipunting nga kon dihay igong kuwalipikadong mga lalaki, ang unang-siglo nga mga kongregasyon may kapin sa usa ka magtatan-aw. (Filip. 1:1) “Ang pundok sa kongregasyonal nga mga magtatan-aw,” matud niya, “molangkob sa usa ka ‘lawas sa mga ansiano’. . . Ang mga sakop sa maong ‘lawas [o, asembliya] sa mga ansiano’ tanantanan managsama, nga may samang opisyal nga kahimtang, ug walay mausa kanila ang labing importante, labing inila, labing gamhanan nga membro diha sa kongregasyon.” (1 Tim. 4:14) Ang maong pakigpulong sa pagkatinuod nakaukay sa entirong kombensiyon. Unsay epekto sa maong impormasyon diha sa mga kongregasyon sa mga Saksi ni Jehova sa tibuok kalibotan?

Ang tubag miabot duha ka adlaw sa ulahi, diha sa panghinapos nga pakigpulong nga gihatag ni N. H. Knorr. Sugod sa Oktubre 1, 1972, ang mga pagpasibo diha sa pagtan-aw sa mga kongregasyon sa tibuok kalibotan mahimo nang ipatuman. Dili na lamang usa ang alagad sa kongregasyon, o magtatan-aw. Apan sulod sa mga bulan hangtod sa Oktubre 1, 1972, ang responsable, hamtong nga mga lalaki sa matag kongregasyon kinahanglang magrekomendar sa Sosyedad sa mga ngalan aron matudlo kadtong kinsa mahimong makaalagad ingong usa ka lawas sa mga ansiano (ug mga ngalan niadtong kinsa mahimong moalagad ingong ministeryal). Usa ka ansiano kinahanglang himoong tsirman, j apan ang tanang ansiano kinahanglang may samang awtoridad ug bahin sa responsabilidad sa paghimog mga desisyon. “Kining mga pagpasibo sa organisasyon,” saysay ni Brader Knorr, “motabang sa pagpalakaw sa mga kongregasyon nga mas mapahiuyon ngadto sa Pulong sa Diyos, ug sa tino kana moresulta ug dagkong mga panalangin gikan kang Jehova.”

Sa unsang paagi gidawat sa nagtigom nga mga delegado kining impormasyona mahitungod sa mga pagpasibo sa organisasyon? Usa ka nagapanawng magtatan-aw napalihok sa pagsulti: “Kinahanglan kanang molampos; gikan kana kang Jehova.” Laing Saksi nga may hataas nga kasinatian midugang: “Makapadasig sa tanang hamtong nga mga lalaki ang pagdawat ug responsabilidad.” Sa pagkatinuod, sama ka daghan sa mga lalaki nga kuwalipikado karon ang ‘makapangab-ot’ ug igatudlo sa “kaakohan sa magtatan-aw.” (1 Tim. 3:1) Mao nga ang daghan sa igsoong mga lalaki mahimong makabaton ug bililhong kasinatian sa pag-abaga sa responsabilidad sa kongregasyon. Bisan tuod sila wala makaamgo niini sa sinugdanan, tanan sila kinahanglanon aron sa pagbantay sa daghang modugok nga mga bag-ohan sa umaabot nga katuigan.

Ang materyal nga gipahayag sa kombensiyon mitultol usab sa pila ka pagpatin-aw ug pagpasibo nga naglangkit sa Nagamandong Lawas. Pagka Septiyembre 6, 1971, gikauyonan nga ang pagkatsirman sa Nagamandong Lawas kinahanglang magbansili taliwala sa mga membro niini, nga naghimo niana sumala sa alpabeto.  Mga pipila ka semana sa ulahi, sa Oktubre 1, 1971, si F. W. Franz nahimong tsirman sa Nagamandong Lawas alang sa usa ka tuig.

Sa misunod nga tuig, sa Septiyembre 1972, ang unang pagbalhin ug mga responsabilidad diha sa kongregasyon gisugdan, ug pagka Oktubre 1 ang pagbansili sa kadaghanang mga kongregasyon nakompleto. Sulod sa misunod nga tulo ka tuig, ang mga Saksi ni Jehova nakasinati ug dakong pag-uswag​—kapin sa tres kuwartos sa usa ka milyon nga katawhan ang nagpabawtismo. Apan karon sila nag-atubang sa tingdagdag sa 1975. Kon ang tanang mga gidahom may labot sa 1975 dili matuman, sa unsang paagi kini moapektar sa ilang kasibot alang sa tibuok-yutang kalihokan sa pagsangyaw ingon usab sa ilang tibuok-kalibotang panaghiusa?

Usab, sulod sa mga dekada si Nathan H. Knorr, usa ka tawo nga may dinamikong personalidad ug maayo kaayong katakos sa pag-organisar, nakadula ug yawing papel sa pagpasiugda sa edukasyon sulod sa organisasyon ug sa pagpahimutang sa Bibliya nganha sa mga kamot sa katawhan ug sa pagtabang kanila sa pagsabot niana. Sa unsang paagi ang kausaban ngadto sa suod nga pagdumala pinaagi sa Nagamandong Lawas moapektar niining mga tumonga?

[Mga footnote]

[Blurb sa panid 92]

Nagwali bisan pa sa mga pagdakop ug pangatake sa magubtanong panon

[Blurb sa panid 94]

‘Tibuok yuta nga pagpalapad ug pag-edukar sa sukod nga wala pa masinatii’

[Blurb sa panid 103]

Pagpanalipod sa Bibliya batok sa atake sa mga kritiko

[Blurb sa panid 104]

“Ang dakong punto niining tanan, minahal nga mga higala mao kini: Ang panahon hamubo”

[Blurb sa panid 106]

“Makapadasig sa tanang hamtong nga mga lalaki ang pagdawat ug responsabilidad”

[Kahon sa panid 91]

Kaagi ni N. H. Knorr

Si Nathan Homer Knorr natawo sa Bethlehem, Pennsylvania, T.B.A., niadtong Abril 23, 1905. Sa dihang siya 16 anyos, siya nakig-uban sa Kongregasyon sa mga Estudyante sa Bibliya sa Allentown. Niadtong 1922 mitambong siya sa kombensiyon sa Cedar Point, Ohio, diin siya nakahukom sa pagluwat gikan sa Reformed Church. Sa misunod nga tuig, sa Hulyo 4, 1923, tapos ihatag ang pakigpulong alang sa bawtismo ni Frederick W. Franz, nga gikan sa Brooklyn Bethel, ang 18-anyos nga si Nathan maoy kauban niadtong gibawtismohan sa Suba sa Little Lehigh, sa Sidlakang Pennsylvania. Sa pagka Septiyembre 6, 1923, si Brader Knorr nahimong sakop sa pamilyang Bethel sa Brooklyn.

Si Brader Knorr nagmakugihon sa Departamento sa Shipping, ug sa wala madugay ang iyang kinaiyanhong mga katakos sa pag-organisar nailhan. Sa dihang ang manedyer sa pabrika sa Sosyedad, si Robert J. Martin, namatay niadtong Septiyembre 23, 1932, si Brader Knorr gitudlo sa pagpuli kaniya. Sa pagka Enero 11, 1934, si Brader Knorr gipili nga mahimong direktor sa Peoples Pulpit Association (karon Watchtower Bible and Tract Society of New York, Inc.), ug sa misunod nga tuig siya nahimong bise presidente sa Asosasyon. Sa pagka Hunyo 10, 1940, siya nahimong bise presidente sa Watch Tower Bible and Tract Society (Pennsylvania corporation). Ang pagkapili niya ngadto sa pagkapangulo sa duha ka sosyedad ug sa Britanikong korporasyon, ang Internasyonal nga Asosasyon sa mga Estudyante sa Bibliya, miabot pagka Enero 1942.

Sa misunod nga mga tuig, usa sa kinasuorang mga kaubanan ug sinaligang magtatambag ni Brader Knorr mao si Frederick W. Franz, usa ka tawo nga mas tigulang kay kaniya ug usa kansang kahibalo sa mga pinulongan ug kasinatian ingong eskolar sa Bibliya napamatud-ang dakong tabang sa organisasyon.

[Kahon sa panid 93]

Usa ka Makapadasig nga Panglantaw sa Unahan

Ang mga delegado sa Bag-ong Kalibotan Teokratikanhong Asembliya sa Cleveland, Ohio, niadtong Septiyembre 1942, nalipay sa dihang ang edaran nang sekretaryo-tesurero sa Sosyedad, si W. E. Van Amburgh, namulong sa kombensiyon. Si Brader Van Amburgh nahinumdom nga ang unang kombensiyon nga iyang gitambongan maoy sa Chicago niadtong 1900, ug kadto maoy usa ka “dako” nga kombensiyon​—dihay nanambong nga mga 250. Pagkatapos ibatbat ang ubang “dagkong” mga kombensiyon latas sa katuigan, siya naghinapos pinaagi sa iyang makapadasig nga panglantaw sa unahan: “Kining kombensiyona k morag dako alang kanato karon, apan samtang kining kombensiyona maoy dako kon itandi sa mga kombensiyon nga akong natambongan sa miagi, sa ingon ako nagdahom nga kining kombensiyona mahimong gamay ra kaayo kon itandi nianang sa umaabot sa dihang ang Ginoo mosugod sa pagtigom sa iyang katawhan gikan sa tanang suok sa yuta.”

[Footnote]

[Kahon/Mga mapa sa panid 96]

(Alang sa aktuwal nga pagkahan-ay, tan-awa ang publikasyon)

Mga Panaw sa Pag-alagad ni N. H. Knorr, 1945-56

1945-46: Sentral Amerika, Amerika del Sur, Amerika del Norte, Uropa, ang Caribbeano

1947-48: Amerika del Norte, mga isla sa Pasipiko, ang Oriente, Tungang Sidlakan, Uropa, Aprika

1949-50: Amerika del Norte, Sentral Amerika, Amerika del Sur, ang Caribbeano

1951-52: Amerika del Norte, mga isla sa Pasipiko, Oriente, Uropa, Tungang Sidlakan, Aprika

1953-54: Amerika del Sur, ang Caribbeano, Amerika del Norte, Sentral Amerika

1955-56: Uropa, mga isla sa Pasipiko, Oriente, Amerika del Norte, Tungang Sidlakan, Amihanang Aprika

[Mga mapa)

(Tan-awa ang publikasyon)

[Kahon sa panid 105]

“Karong Adlawa Ako Misugod sa Paghunahuna Pag-usab”

Giluwatan niadtong 1968, ang librong “Ang Kamatuoran nga Motultol sa Kinabuhing Dayon” sa makaylapon gigamit sa mga Saksi ni Jehova sa pagtuon sa Bibliya kauban sa interesadong mga tawo. Kining tukma-sa-panahon nga tagana nagtabang sa gatosan ka libo nga naghunahuna nga mga tawo sa pagbaton sa tukmang kahibalo sa Kasulatan. Usa ka sulat sa pagdayeg nga nadawat niadtong 1973 gikan sa usa ka magbabasa sa Tinipong Bansa nag-ingon: “Usa ka maayohon kaayong babaye mianhi sa akong pultahan karong adlawa ug mihatag kanako ug usa ka librong gitawag ‘Ang Kamatuoran nga Motultol sa Kinabuhing Dayon.’ Bag-o lang gayod nako kana natapos. Sa unang higayon sa akong kinabuhi ako nakabasa ug 190 ka panid bahin sa bisan unsa sa usa lamang ka adlaw. Niadtong Hunyo 29, 1967, ako mihunong sa pagtuo sa Diyos. Karong adlawa ako misugod sa paghunahuna pag-usab.”

[Hulagway sa panid 95]

Tunghaang Gilead sa South Lansing, New York

[Hulagway sa panid 97]

Si Brader Knorr, gipakita dinhi nga nagduaw sa Cuba, mibiyahe sa tibuok kalibotan sa makadaghan

[Mga hulagway sa panid 98]

Gibati ni Brader Knorr nga ang kada Saksi kinahanglang makasangyaw gikan sa balay ngadto sa balay

Inglaterra

Lebanon

[Hulagway sa panid 99]

Ingong presidente sa Sosyedad, si Brader Knorr suod nga nagtrabaho uban ni Brader Franz sa kapin ug 35 ka tuig

[Hulagway sa panid 100]

Hunta direktiba sa Watch Tower Bible and Tract Society of Pennsylvania, niadtong tunga-tunga sa katuigang 1950. (Gikan sa wala patuo) Lyman A. Swingle, Thomas J. Sullivan, Grant Suiter, Hugo H. Riemer, Nathan H. Knorr, Frederick W. Franz, Milton G. Henschel

[Mga hulagway sa panid 102]

Niadtong 1958, ang mga delegado gikan sa 123 ka kayutaan nagtigom sa Yankee Stadium alang sa Balaang Kabubut-on Internasyonal nga Asembliya

[Hulagway sa panid 107]

Mga publikasyon sa pagbansay sa mga Saksi ni Jehova alang sa ministeryo

[Hulagway sa panid 107]

Pila sa mga publikasyon nga gigamit sa ministeryo sa kanataran

[Hulagway sa panid 107]

Mga libro nga nagtagana ug gahi nga pagkaon sa pagpalig-on sa espirituwalidad sa katawhan ni Jehova

[Hulagway sa panid 107]

Mga tabang sa pagdukiduki ug pagtuon