Kapitulo 2

Si Jesu-Kristo, ang Kasaligang Saksi

SULOD sa mga 4,000 ka tuig, usa ka taas nga linya sa una-Kristohanong mga saksi ang nakatanyag sa ilang pamatuod. Apan ang mga isyu nga nalambigit sa soberanya sa Diyos ug sa integridad sa iyang mga alagad sa tino wala pa mahusay. Ang panahon karon ming-abot na alang sa gikasaad nga harianong “binhi,” ang Mesiyas, sa pagpakita sa yuta.​—Gen. 3:15.

Sa iyang minilyon espirituhanong mga anak, kinsa man ang gipili ni Jehova alang ning buluhatona? Silang tanan nakasaksi kon unsay nahitabo didto sa Eden ug sa walay duhaduha nasayod sa unibersohanong mga isyu nga nabangon. Apan kinsa ang labawng mabalak-on sa pag-alagad aron mahinloan ang ngalan ni Jehova ug matuboy ang iyang pagkasoberano? Kinsa ang makahatag ug labing mabug-osong tubag sa hagit ni Satanas nga walay mausa ang makapabilin sa iyang integridad ngadto sa soberanya sa Diyos ubos sa pagsulay? Ang usa nga gipili ni Jehova mao ang iyang Panganay, iyang bugtong Anak, si Jesus.​—Juan 3:16; Col. 1:15.

Si Jesus sa kamaikagon ug sa kamapainubsanon midawat niining buluhatona, bisag kini nagkahulogan sa pagbiya sa langitnong puloy-anan nga iyang giambitan uban sa iyang Amahan sa dugayng panahon labaw sa uban. (Juan 8:23, 58; Filip. 2:5-8) Ang iyang motibo? Halalom nga gugma kang Jehova ug usa ka masibotong tinguha sa pagtan-aw nga ang Iyang ngalan mahinloan sa tanang pasipala. (Juan 14:31) Si Jesus usab naglihok tinukmod sa gugma alang sa katawhan. (Prov. 8:30, 31; itandi ang Juan 15:13.) Ang iyang pagkatawo dinhi sa yuta, sa sayong tinglarag sa tuig 2 W.K.P., gihimong posible pinaagi sa balaang espiritu​—diin pinaagi niana si Jehova nagbalhin sa kinabuhi ni Jesus gikan sa langit ngadto sa tagoangkan sa Hudiyong ulay nga si Maria. (Mat. 1:18; Luc. 1:26-38) Sa ingon si Jesus natawo ngadto sa nasod sa Israel.​—Gal. 4:4.

Labaw kang bisan kinsa nga Israelinhon, si Jesus nahibalo nga siya kinahanglang mahimong saksi ni Jehova. Ngano? Siya sakop sa nasod kang kinsa si Jehova pinaagi ni propetang Isaias nag-ingon: “Kamo ang akong mga saksi.” (Isa. 43:10) Dugang pa niana, sa bawtismo ni Jesus didto sa Suba sa Jordan niadtong 29 K.P., si Jehova nagdihog kaniyag balaang espiritu. (Mat. 3:16) Sa ingon si Jesus gihatagan ug gahom, sama sa iyang gipamatud-an sa ulahi, aron sa “pagwali sa tuig sa maayong kabubut-on sa bahin ni Jehova.”​—Isa. 61:​1, 2; Luc. 4:16-19.

Si Jesus sa kamatinumanon nagtuman sa iyang buluhaton ug nahimong labing dako nga saksi ni Jehova masukad sa yuta. Busa, may katarongan nga si apostol Juan, kinsa nagbarog duol ni Jesus sa panahon sa iyang kamatayon, nagtawag kang Jesus “ang Kasaligang Saksi.” (Pin. 1:5) Ug diha sa Pinadayag 3:14, ang hinimayang Jesus nagtawag sa iyang kaugalingon “ang Amen” ug “ang kasaligan ug matuod nga saksi.” Unsang pamatuod ang gitanyag niining “Kasaligang Saksi”?

 ‘Pagsaksi sa Kamatuoran’

Sa dihang gihusay sa atubangan sa Romanong gobernador nga si Pilato, si Jesus nagpahayag: “Alang niini nga ako natawo, ug alang niini ako mianhi sa kalibotan, aron pagsaksi sa kamatuoran. Ang matag-usa nga dapig sa kamatuoran nagapamati sa akong tingog.” (Juan 18:37) Sa unsang kamatuorana si Jesus nagsaksi? Kini mao ang kamatuoran sa Diyos, ang pagpadayag sa walay kataposang mga katuyoan ni Jehova.​—Juan 18:​33-36.

Ugaling, sa unsang paagi si Jesus nagsaksi niining kamatuorana? Ang Gregong berbo alang sa “pagsaksi sa” usab nagkahulogang “pagpahayag, panghimatuod, madapigong pagsaksi, pagsultig maayo (sa), pag-uyon (sa).” Sa karaang Gregong papiro, ang sagad nga pagpadayag sa laing porma sa berbo (mar·ty·roʹ) maoy human sa usa ka pirma, sama diha sa mga transaksiyon sa negosyo. Busa, pinaagi sa iyang ministeryo, si Jesus nagpanghimatuod sa kamatuoran sa Diyos. Sa tino kini nanginahanglan nga siya magapahayag, o magawali, nianang kamatuorana ngadto sa uban. Hinuon, labaw pa kay sa yanong pagsulti ang gikinahanglan.

“Ako mao . . . ang kamatuoran,” sulti ni Jesus. (Juan 14:6) Oo, siya nagkinabuhi sa paagi nga nagtuman sa kamatuoran sa Diyos. Ang katuyoan sa Diyos may kalabotan sa Gingharian ug sa iyang Mesiyanikong Magmamando gipasabot diha sa tagna. Si Jesus, pinaagi sa dalan sa iyang tibuok yutan-ong kinabuhi, nga natapos diha sa iyang mahalarong kamatayon, nagtuman sa tanang gipanagna mahitungod kaniya. Sa ingon iyang gipanghimatud-an ug gigarantiyahan ang pagkatinuod sa matagnaong pulong ni Jehova. Tungod niining katarongana nga si apostol Pablo nakasulti: “Bisag unsa ka daghan sa mga saad sa Diyos, sila nahimong Oo pinaagi kaniya. Mao nga pinaagi usab kaniya ang ‘Amen’ [nagkahulogan, “hinaot unta,” o “tinuod”] gisulti ngadto sa Diyos alang sa himaya pinaagi kanato.” (2 Cor. 1:20) Oo, si Jesus mao ang usa kang kinsa ang mga saad sa Diyos nakakaplag ug katumanan.​—Pin. 3:14.

Pagsaksi sa Ngalan sa Diyos

Si Jesus nagtudlo sa iyang mga sumusunod sa pag-ampo: “Amahan namo nga anaa sa mga langit, pagabalaanon unta ang imong ngalan [o, “pagahuptang sagrado; pagatratahon ingong balaan”].” (Mat. 6:​9, potnot) Sa kataposang gabii sa iyang yutan-ong kinabuhi, diha sa pag-ampo ngadto sa iyang langitnong Amahan, si Jesus namulong usab: “Akong gipadayag ang imong ngalan sa mga tawo nga gitugyan mo kanako gikan sa kalibotan. Sila mga imo man, ug imong gitugyan sila kanako, ug ilang gibantayan ang imong pulong. Ug ang imong ngalan akong gipaila kanila ug igapaila pa, aron nga ang gugma nga imong ginahuptan sa imong paghigugma kanako maanaa kanila ug ako mahiusa uban kanila.” (Juan 17:​6, 26) Kini, sa pagkatinuod, mao ang pangunang katuyoan ni Jesus sa pag-anhi sa yuta. Unsa ang nalambigit diha sa iyang pagpaila sa ngalan sa Diyos?

Ang mga sumusunod ni Jesus daan nang nahibalo ug naggamit sa ngalan sa Diyos. Ilang nakita ug nabasa kini diha sa Hebreohanong Bibliya nga mga linukot sa ilang mga sinagoga. Nakita ug nabasa usab nila kini diha sa Septuagint​—usa ka Gregong hubad sa Hebreohanong Kasulatan, nga ilang gigamit sa pagpanudlo ug pagsulat. Kon ilang nahibaloan ang balaang ngalan, sa unsang diwa si Jesus nagpadayag, o nagpaila, niini kanila?

 Sa mga panahon sa Bibliya, ang mga ngalan maoy dili lamang mga ilhanan. Matud sa A Greek-English Lexicon of the New Testament, ni J. H. Thayer: “Ang ngalan sa Diyos diha sa B[ag-ong] T[estamento] gigamit alang niadtong tanang mga hiyas nga alang sa iyang mga magsisimba natingob nianang ngalana, ug pinaagi niana ang Diyos nagapaila sa iyang kaugalingon ngadto sa mga tawo.” Si Jesus nagpaila sa ngalan sa Diyos dili lamang pinaagi sa paggamit niini apan pinaagi sa pagpadayag sa Persona luyo nianang ngalana​—iyang mga katuyoan, mga kalihokan, ug mga hiyas. Ingong ang usa ‘kinsa naggikan sa sabakan sa Amahan,’ si Jesus makahimo sa paghatag ug katin-awan mahitungod sa Amahan sa paagi nga walay laing makahimo. (Juan 1:18) Dugang pa, sa hingpit gayod gisumbalik-silaw ni Jesus ang iyang Amahan nga ang mga tinun-an ni Jesus makaarang sa ‘pagkakita’ sa Amahan diha sa Anak. (Juan 14:9) Pinaagi sa iyang gipamulong ug gihimo, si Jesus nagsaksi sa ngalan sa Diyos.

Siya Nagsaksi Labot sa Gingharian sa Diyos

Ingong “ang Kasaligang Saksi,” si Jesus usa ka inila nga magmamantala sa Gingharian sa Diyos. Siya mabinationg nag-ingon: “Kinahanglang ipahayag ko ang maayong balita sa gingharian sa Diyos, kay alang niini nga ako gipadala.” (Luc. 4:43) Iyang gimantala kanang langitnong Gingharian sa tibuok Palestina, nga naglukop sa gatosan ka milya nga nagbaktas. Siya miwali bisan diin nga may mga tawong maminaw: sa mga baybayon sa lanaw, sa mga kilid sa bungtod, sa mga siyudad ug mga balangay, sa mga sinagoga ug sa templo, sa mga taboanan, ug sa mga balay sa katawhan. Apan si Jesus nahibalo nga may kinutoban ang dapit nga iyang maabot ug ang gidaghanon sa tawo nga iyang masangyawan. (Itandi ang Juan 14:12.) Busa uban sa katuyoang malukop ang nataran sa kalibotan, gibansay ni Jesus ang iyang mga tinun-an ug gipadala aron mahimong mga magmamantala sa Gingharian.​—Mat. 10:​5-7; 13:38; Luc. 10:​1, 8, 9.

Si Jesus usa ka kugihan, masibotong saksi, ug wala niya tugoti ang iyang kaugalingon nga mahitipas. Bisan pag siya nagpakitag personal nga kabalaka alang sa mga panginahanglan sa katawhan, wala siya mapuliki kaayo sa pagbuhat sa mga butang nga maghatag ug temporaryong kahupayan nga gipasagdan niya ang iyang hinatag-Diyos nga buluhaton sa pagtultol sa katawhan ngadto sa dumalayong kasulbaran sa ilang mga suliran​—ang Gingharian sa Diyos. Sa usa ka higayon, human niya pakan-a sa milagrosong paagi ang mga 5,000 ka lalaki (tingali mokabat ug kapin sa 10,000 ka tawo kon apilon sa ihap ang mga babaye ug kabataan), usa ka grupo sa mga Hudiyo ang buot mosakmit kaniya ug mohimo kaniyang usa ka yutan-ong hari. Unsa man ang gihimo ni Jesus? Siya “mibiya na usab padulong sa bukid nga nag-inusara.” (Juan 6:​1-15; itandi ang Lucas 19:​11, 12; Buh. 1:​6-9.) Bisan pag nagbuhat siya ug daghang mga milagro sa pagpang-ayo, si Jesus sa panguna wala mailhi ingong ang Tighimog Milagro, kondili, hinuon, siya nailhan sa mga magtutuo ug sa mga dili-magtutuo ingong “Magtutudlo.”​—Mat. 8:19; 9:11; 12:38; 19:16; 22:​16, 24, 36; Juan 3:2.

Sa tin-aw, ang pagsaksi labot sa Gingharian sa Diyos mao ang labing hinungdanon nga buluhatong gihimo ni Jesus. Kabubut-on ni Jehova nga ang tanan mahibalo kon unsa ang Iyang Gingharian ug sa unsang paagi kini mopalampos sa Iyang mga katuyoan. Kini mahal kaayo sa Iyang kasingkasing, tungod kay kini ang gamiton Niya sa pagbalaan sa Iyang ngalan, sa paghinlo niini sa tanang pasipala.  Si Jesus nahibalo niana, ug busa naghimo nianang Ginghariana nga tema sa iyang pagwali. (Mat. 4:17) Pinaagi sa bug-os-kasingkasing nga pagpakig-ambit sa pagmantala niini, si Jesus nagbayaw sa may-katungod nga pagkasoberano ni Jehova.

Kasaligang Saksi Bisan sa Kamatayon

Walay mausa ang makahimo sa paghigugma kang Jehova ug sa Iyang soberanya nga labaw pa sa gihimo ni Jesus. Ingong “ang panganay sa tanang kalalangan,” si Jesus ‘bug-os nahibalo’ sa Amahan gumikan sa iyang suod nga pakig-uban kaniya ingong usa ka espirituhanong linalang didto sa mga langit. (Col. 1:15; Mat. 11:27) Siya kinabubut-ong nagpasakop sa iyang kaugalingon sa soberanya sa Diyos sulod sa dili-maihap nga katuigan sa panahon una pa lalanga ang unang lalaki ug babaye. (Itandi ang Juan 8:​29, 58.) Unsa ka dulot ang kasakit nga iyang gibati sa dihang si Adan ug si Eva mitalikod sa soberanya sa Diyos! Bisan pa, siya mapailobong naghulat didto sa mga langit sa mga 4,000 ka tuig, ug unya, sa kataposan, ang panahon miabot alang kaniya sa pag-alagad ingong labing dako nga saksi ni Jehova sukad masukad sa yuta!

Si Jesus sa bug-os nasayod nga ang unibersohanong mga isyu direktang naglambigit kaniya. Morag nadayag nga si Jehova nagbutang ug alad likos kaniya. (Itandi ang Job 1:9-11.) Tinuod, iyang napasundayag ang iyang pagkamatinumanon ug debosyon didto sa mga langit, apan padayon ba niyang huptan ang iyang integridad ingong usa ka tawo ibabaw sa yuta ubos sa bisan unsang matang sa pagsulay? Siya ba makasukol kang Satanas diha sa usa ka kahimtang diin ang iyang kaaway sa dayag may bentaha?

Ang samag-serpente nga Kaaway wala mag-usik ug panahon. Wala madugay human sa pagbawtismo ug pagdihog kang Jesus, si Satanas nagtental kaniya sa pagpasundayag ug kahakog, sa pagpataas sa iyang kaugalingon, ug, sa kataposan, sa pagsalikway sa soberanya sa iyang Amahan. Apan ang klaro nga pahayag ni Jesus ngadto kang Satanas, “Maoy simbaha si Jehova nga imong Diyos, ug kaniya lamang nga ikaw mohatag ug balaang pag-alagad,” nagpakita kon diin siya nagbarog bahin sa mga isyu. Pagkalahi gikan kang Adan!​—Mat. 4:​1-10.

Ang dalan nga gitudlo alang kang Jesus nagkahulogan ug pag-antos ug kamatayon, ug si Jesus nahibalog maayo niini. (Luc. 12:50; Heb. 5:​7-9) Bisan pa, “sa dihang nakaplagan niya ang iyang kaugalingon nga nahisama sa dagway nga tawhanon, siya nagpaubos sa iyang kaugalingon ug nahimong masinugtanon hangtod sa kamatayon, oo, kamatayon diha sa kahoy sa pagsakit.” (Filip. 2:​7, 8) Pinaagi niana si Jesus nakapamatuod nga si Satanas usa ka dakong bakakon, nga sa hingpit naghusay sa pangutana, Ang bisan kinsa ba makahupot sa iyang integridad ngadto sa soberanya sa Diyos kon si Satanas tugotan sa pagbutang kaniya sa pagsulay? Apan ang kamatayon ni Jesus nakapalampos ug labaw pa.

Pinaagi sa iyang kamatayon diha sa kahoy sa pagsakit, si Jesus usab naghatag sa “iyang kalag ingong lukat alang sa daghan.” (Mat. 20:28; Mar. 10:45) Ang iyang hingpit tawhanong kinabuhi dunay haladnong bili. Ang paghalad ni Jesus sa iyang kinabuhi wala lamang makapaarang kanato sa pagbaton ug kapasayloan sa mga sala apan nagbukas usab kanato sa kahigayonan alang sa kinabuhing dayon diha sa paraisong yuta, uyon sa unang katuyoan sa Diyos.​—Luc. 23:43; Buh. 13:​38, 39; Heb. 9:​13, 14; Pin. 21:​3, 4.

 Si Jehova nagpamatuod sa iyang gugma ug pag-uyon kang Jesus ingong “ang Kasaligang Saksi” pinaagi sa pagbanhaw kaniya gikan sa mga patay sa ikatulong adlaw. Kini nagpamatuod nga ang panghimatuod nga gihatag ni Jesus labot sa Gingharian maoy tinuod. (Buh. 2:​31-36; 4:10; 10:​36-43; 17:31) Human magpabilin diha sa kasikbitan sa yuta sulod sa 40 ka adlaw, diin sulod nianang panahona siya nagpakita sa iyang mga apostoles sa daghang higayon, si Jesus mikayab sa langit.​—Buh. 1:​1-3, 9.

Si Jesus nagpasabot nga ang pagkatukod sa Mesiyanikong Gingharian sa Diyos mahitabo sa halayong umaabot. (Luc. 19:​11-27) Kanang hitaboa magtimaan usab sa pagsugod sa “presensiya [ni Jesus] ug sa kataposan sa sistema sa mga butang.” (Mat. 24:3) Apan sa unsang paagi ang iyang mga sumusunod sa yuta makasabot kon kanus-a kining  mga butanga mahitabo? Si Jesus naghatag kanila ug “ilhanan”​—usa ka hugpong sa ilhanan nga inapilan sa daghang timailhan, lakip sa mga gubat, linog, kanihit sa pagkaon, mga sakit, ug ang nagausbaw nga pagkamalapason. Ang dakong bahin sa maong ilhanan mao usab ang pagwali sa maayong balita sa Gingharian sa tibuok pinuy-anang yuta ingong pamatuod sa tanang kanasoran. Ang tanang kinaiyahan sa maong talagsaong ilhanan makita sa atong adlaw, nga nagkahulogang kita nagakinabuhi na sa panahon sa presensiya ni Jesus ingong langitnong Hari ug sa kataposan sa sistema sa mga butang. a​—Mat. 24:​3-14.

Hinuon, komosta na man ang mga sumusunod ni Jesus? Niining panahon sa presensiya ni Jesus, ang mga tawong nanagsunod sa daghang nagkalainlaing mga simbahan nag-angkon nga nagasunod kang Kristo. (Mat. 7:22) Apan, ang Bibliya nagaasoy nga duna lamang ing “usa ka pagtuo.” (Efe. 4:5) Busa sa unsang paagi nimo mailhan ang matuod Kristohanong kongregasyon, ang usa nga may pag-uyon ug paggiya sa Diyos? Makahimo ka pinaagi sa pagsusi kon unsay ginasulti sa Kasulatan mahitungod sa unang-siglo nga Kristohanong kongregasyon ug unya tan-awon kon kinsa karong adlawa ang nagasunod sa samang sulondan.

[Mga footnote]

[Blurb sa panid 20]

‘Natawo aron magpanghimatuod sa kamatuoran’

[Blurb sa panid 21]

Si Jesus naghimo sa Gingharian sa Diyos ingong tema sa iyang pagwali

[Blurb sa panid 22]

Si Jesu-Kristo mao ang labing dako nga saksi ni Jehova sukad masukad sa ibabaw sa yuta

 [Tibuok-panid nga hulagway sa panid 23]