Kapitulo 11

Sa Unsang Paagi Kami Nailhang mga Saksi ni Jehova

PANAHON sa sayong mga dekada sa ilang modernong-adlaw nga kasaysayan, sila sa yano sagad nga tawgong mga Estudyante sa Bibliya. Sa dihang suknaon sa uban mahitungod sa ngalan sa organisasyon, ang among mga igsoon sa subsob motubag, “Mga Kristohanon kami.” Si Brader Russell mitubag sa maong pangutana pinaagi sa pag-ingon, diha sa Watch Tower: “Wala kami magpalain sa among kaugalingon gikan sa ubang mga Kristiyano pinaagi sa pagdala ug bisan unsang talagsaon o linaing ngalan. Kami nakontento sa ngalang Kristohanon, nga pinaagi niana ang sayong mga balaan nailhan.”​—Isyu sa Septiyembre 1888.

Kon mao, sa unsang paagi nahitabo nga kami nailhan karong adlawa ingong mga Saksi ni Jehova?

Ang Ngalang Kristohanon

Ang tinuod nga mga sumusunod ni Jesu-Kristo, sa unang siglo ug sa modernong panahon, nagpaila sa ilang kaugalingon ug sa isigka-magtutuo ingong “mga igsoon,” “mga higala,” ug “kongregasyon sa Diyos.” (Buh. 11:29; 3 Juan 15; 1 Cor. 1:2) Sila usab naghisgot mahitungod kang Kristo ingong “Agalon” ug sa ilang kaugalingon ingong “mga ulipon ni Kristo Jesus” ug “mga ulipon sa Diyos.” (Col. 3:24; Filip. 1:1; 1 Ped. 2:16) Ang maong mga pagtawag kanunay nga gigamit sulod sa kongregasyon, ug dinha nasabtan kana pag-ayo.

Sa unang siglo, ang paagi sa pagkinabuhi nga nasentro sa pagtuo kang Jesu-Kristo (ug, agig paglugway, sa kongregasyon mismo) gitawag ingong “Ang Dalan.” (Buh. 9:2; 19:9) Ang ubay-ubayng hubad sa Buhat 18:25 nagpaila nga kana usab gitawag “ang dalan ni Jehova.” a Sa laing bahin, ang pila nga dili sakop sa kongregasyon mayubitong nagtawag niana ingong “ang pundok sa mga Nazareno.”​—Buh. 24:5.

Niadtong 44 K.P. o wala madugay human niadto, ang matinumanong mga sumusunod ni Jesu-Kristo gitawag ingong mga Kristohanon. Ang pila mipatuo nga mga taga-gawas ang nagtawag kanilang mga Kristohanon, nga nagbuhat niana sa mapasipalahong paagi. Hinuon, ubay-ubayng mga leksikograpo ug mga komentarista sa Bibliya nag-ingon nga ang berbong gigamit sa Buhat 11:26 nagpasabot  ug balaang pagtultol o pagpadayag. Mao nga, diha sa New World Translation, ang kasulatan mabasa: “Maoy una didto sa Antioquia nga ang mga tinun-an pinaagi sa balaang pagpaigo gitawag nga mga Kristohanon.” (Ang susamang mga paghubad makita diha sa Literal Translation of the Holy Bible ni Robert Young, Rebisadong Edisyon, sa 1898; The Simple English Bible, sa 1981; ug New Testament ni Hugo McCord, sa 1988.) Sa mga 58 K.P., ang ngalang Kristohanon ilado na kaayo bisan sa Romanong opisyales.​—Buh. 26:28.

Samtang ang mga apostol ni Kristo buhi pa, ang ngalang Kristohanon maoy talagsaon ug espisipiko. (1 Ped. 4:16) Ang tanan nga nangangkong mga Kristohanon apan kansang mga pagtuo o panggawi sukwahi sa ilang gipangangkon gipalagpot gikan sa Kristohanong katilingban. Ugaling, ingon sa gitagna ni Jesus, inigkamatay sa mga apostol si Satanas mipugas ug mga binhing namungag mini nga mga Kristohanon. Kining mga mini nangangkon usab sa ngalang Kristohanon. (Mat. 13:​24, 25, 37-39) Sa dihang ang apostatang Kristiyanidad migamit sa pinugos nga pangombirtir, ang pipila mipatuo nga mga Kristohanon aron lamang dili lutoson. Sa lakaw sa panahon, ang bisag kinsang Uropanhon nga wala mangangkong Hudiyo, Muslim, o ateyista kasagaran pagaisipong usa ka Kristohanon, walay sapayan sa iyang mga tinuohan o panggawi.

Mayubitong mga Angga

Sukad niadtong ika-16 nga siglo paunahan, kining kahimtanga naghatag ug suliran alang sa mga Repormador. Tungod kay ang ngalang Kristohanon gigamit sa daghang pundok, sa unsang paagi nila mapalahi ang ilang kaugalingon gikan sa uban nga nangangkong mga Kristohanon?

Sa subsob sila yanong mouyon sa paggamit sa mayubitong angga nga gidagnay kanila sa ilang mga kaaway. Mao nga ang mga teologong kaaway ni Martin Luther, sa Alemanya, maoy unang mipadapat sa iyang ngalan ngadto sa iyang mga sumusunod, nga nagtawag kanilang mga Lutherano. Silang nakig-uban kang John Wesley, sa Inglaterra, ginganlan ug mga Metodista tungod sa ilang dili naandan pulido ug metodikong pagtuman sa relihiyosong mga responsabilidad. Ang mga Baptist sa sinugdanan misupak sa dagnay nga Anabaptist (nagkahulogang, “Nagabawtismo Pag-usab”) apan sa inanay misagop sa ngalang Baptist ingong usa ka matang sa pagkompromiso.

Komosta na man ang mga Estudyante sa Bibliya? Sila gitawag ug mga Russellitas ug Rutherforditas sa klero. Apan ang pagsagop sa maong ngalan mahimong mopasiugda sa espiritu sa sektaryanismo. Wala kini mahiuyon sa pagsaway nga gihimo ni apostol Pablo sa sayong mga Kristohanon, nga misulat: “Sa diha nga ang usa magaingon: ‘Ako iya ni Pablo,’ ug ang usa: ‘Ako iya ni Apollos,’ dili ba kamo yanong mga tawo [nga mao, unodnon sa panglantaw inay ingong espirituwal]?” (1 Cor. 3:4) Ang pila ka tawo nagtawag kanila ingong “Millennial Dawnists”; apan ang Milenyal nga Pagmando ni Kristo usa lamang sa ilang mga gipanudlo. Ang uban nagtawag kanila nga “Katawhan sa Watch Tower”; apan kana usab dili haom, kay ang Watch Tower usa lamang sa mga publikasyon nga ilang ginagamit sa pagpakaylap sa kamatuoran sa Bibliya.

 Panginahanglan Alang sa Talagsaong Ngalan

Sa lakaw sa panahon, nagkadayag nga ingong dugang sa pagtawag nga Kristohanon, ang kongregasyon sa mga alagad ni Jehova sa tinuod nanginahanglan gayod ug usa ka talagsaong ngalan. Ang kahulogan sa ngalang Kristohanon nadaot na sa panghunahuna sa publiko tungod sa mga tawong nangangkong Kristohanon nga sa subsob may diyutay o kaha walay ideya kon kinsa si Jesu-Kristo, kon unsay iyang gitudlo, ug kon unsay angay nilang pagahimoon kon sila sa tinuod iyang mga sumusunod. Dugang pa, samtang ang among mga igsoon miuswag sa ilang pagsabot sa Pulong sa Diyos, sa tin-aw ilang nakita ang panginahanglan nga mahimulag ug mapalahi gikan sa relihiyosong mga sistema nga sa sayop nangangkong Kristohanon.

Tinuod, ang among mga igsoon sa subsob nagpaila sa ilang kaugalingon ingong mga Estudyante sa Bibliya, ug sugod niadtong 1910, gigamit nila ang ngalang International Bible Students’ Association kon mahitungod sa ilang mga miting. Niadtong 1914, aron malikayan ang kalibog bahin sa ilang bag-o pang naporma nga legal nga korporasyon nga gitawag ug International Bible Students Association, gisagop nila ang ngalang Associated Bible Students alang sa ilang lokal nga mga grupo. Apan ang ilang pagsimba naglangkit ug labaw pa kay sa pagtuon sa Bibliya. Dugang pa, dihay uban usab nga nagtuon sa Bibliya​—ang pipila, debotado; ang uban, ingong mga tigsaway; ug daghan, ingong mga tawo nga naglantaw niana sa yano ingong maayong literatura. Unya, pagkamatay ni Brader Russell, ang pipila ka kanhing kaubanan dili makigtambayayong sa Watch Tower Society ug sa International Bible Students Association, gani misupak pa sa buluhaton niining  mga sosyedara. Ang maong misip-ak nga mga pundok migamit sa nagkadaiyang ngalan, ang pipila kanila mipabilin sa ngalang Associated Bible Students. Kini nakamugnag dugang kalibog.

Apan unya, niadtong 1931, gidawat namo ang tinuod talagsaong ngalang Mga Saksi ni Jehova. Ang awtor nga si Chandler W. Sterling nagtumong niini ingong “ang labihan ka dalayegong ideya” sa bahin ni J. F. Rutherford, presidente kaniadto sa Watch Tower Society. Ingon sa panglantaw niining magsusulat, kadto maoy usa ka maabtikong lakang nga wala lamang mohatag ug opisyal nga ngalan alang sa pundok apan nagpasayon usab alang kanila sa pagsabot sa tanang Biblikanhong mga teksto sa “pagsaksi” ug sa “pagpanaksi” ingong sa espisipiko mapadapat sa mga Saksi ni Jehova. Sa kasukwahi, si A. H. Macmillan, usa ka nahimong luyoluyo sa tulo ka presidente sa Watch Tower Society, miingon mahitungod nianang pahibalo ni Brader Rutherford: “Ako wala magduhaduha​—wala kaniadto ni karon—​nga ang Ginoo migiya kaniya niana, ug mao kana ang ngalan nga gusto ni Jehova nga atong dad-on, ug kami nalipay ug nahimuot gayod sa pagbaton niana.” Haing panglantaw ang gipaluyohan sa panghitabo? Ang ngalan ba ‘usa ka labihan ka dalayegon nga ideya’ sa bahin ni Brader Rutherford, o kana resulta sa balaang pagpaigo?

Mga Kaugmaran nga Nagpunting sa Ngalan

Kadto maoy sa ikawalong siglo W.K.P. nga si Jehova nagpalihok kang Isaias sa pagsulat: “‘Kamo mao ang akong mga saksi,’ miingon si Jehova, ‘ug ang akong alagad nga akong napili, aron kamo makaila ug magatuo kanako, ug makasabot nga ako mao ra gihapon ang Usa. Una kanako walay Diyos nga nahimo, ni aduna pay mosunod kanako. . . . Kamo mao ang akong mga saksi,’ miingon si Jehova, ‘ug ako ang Diyos.’” (Isa. 43:​10, 12) Ingon sa gipakita diha sa Kristohanon Gregong Kasulatan, daghang tagna ang natala ni Isaias nga nangatuman may kalabotan sa Kristohanong kongregasyon. (Itandi ang Isaias 8:18 uban sa Hebreohanon 2:​10-13; Isaias 66:22 uban sa Pinadayag 21:1, 2.) Apan, sa detalyado ang Isaias 43:​10, 12 wala gayod makutlo ni mahisgoti diha sa The Watch Tower sa iyang unang 40 ka tuig nga pagpublikar.

Hinuon, pagkatapos niadto ang pagtagad sa mga alagad ni Jehova gidala sa ilang pagtuon sa Kasulatan ngadto sa hinungdanong bag-ong mga kaugmaran. Ang Gingharian sa Diyos uban ni Jesus ingong Mesiyanikong Hari nahimugso na sa mga langit niadtong 1914. Niadtong 1925, ang tuig nga kini gipatin-aw sa The Watch Tower, ang matagnaong sugo, diha sa Isaias kapitulo 43, nga mahimong mga saksi ni Jehova gihatagan ug pagtagad diha sa 11 ka lainlaing isyu sa magasin.

Diha sa The Watch Tower sa Enero 1, 1926, ang pangunang artikulo nagpasundayag sa mahagitong pangutana: “Kinsay Mopasidungog Kang Jehova?” Sa sunod lima ka tuig, ang The Watch Tower mihisgot sa pila ka bahin sa Isaias 43:​10-12 diha sa 46 ka separadong mga isyu ug sa matag higayon nagpadapat niana sa tinuod nga  mga Kristohanon. b Niadtong 1929 gipailaila nga ang talagsaong isyu nga giatubang sa tanang intelihenteng linalang naglangkit sa pagpasidungog sa ngalan ni Jehova. Ug may kalabotan sa responsabilidad nga nabatonan sa mga alagad ni Jehova mahitungod niining isyuha, ang Isaias 43:​10-12 sa sublisubli gitagad.

Mao nga ang mga kamatuoran nagpakita nga ingong sangpotanan sa pagtuon sa Bibliya, ang pagtagad sa sublisubli gidala ngadto sa ilang  obligasyon nga mahimong mga saksi ni Jehova. Dili ang ngalan sa usa ka pundok ang gitagad dinhi apan ang buluhaton nga ilang pagabuhaton.

Apan sa unsang ngalan kadtong mga saksiha mismo mamailhan? Unsa ang mahimong haom sumala sa buluhatong ilang ginahimo? Sa unsang panghinapos mipunting ang kaugalingong Pulong sa Diyos? Kining butanga gihisgotan sa kombensiyon sa Columbus, Ohio, T.B.A., sa Hulyo 24-30, 1931.

Usa ka Bag-ong Ngalan

Ang dagkong mga letra nga J W nga klarong mabasa diha sa hapin sa atubangan sa programa sa kombensiyon. Unsay kahulogan niana? Sa Dominggo na lamang, Hulyo 26, nga ang kahulogan niana gitin-aw. Sa maong adlaw si Brader Rutherford naghatag ug publikong diskurso nga nag-ulohang “Ang Gingharian, ang Paglaom sa Kalibotan.” Sa maong diskurso, sa dihang nagpaila kon kinsa ang nagawali mahitungod sa Gingharian sa Diyos, ang mamumulong naghimog linaing pagtumong sa ngalang mga Saksi ni Jehova.

Sa ulahi nianang adlawa gipasundan kana ni Brader Rutherford ug laing pakigpulong, diin iyang gihisgotan ang mga katarongan nganong ang usa ka talagsaong ngalan gikinahanglan. c Sa unsang ngalan ang Kasulatan mismo mipunting? Ang mamumulong mikutlo sa Buhat 15:​14, nga nagdala sa pagtagad ngadto sa katuyoan sa Diyos sa pagkuha gikan sa kanasoran ug “usa ka katawhan alang sa iyang ngalan.” Didto sa iyang diskurso iyang gipasiugda ang kamatuoran nga sumala sa ginaingon sa Pinadayag 3:​14, si Jesu-Kristo mao ang “matinumanon ug tinuod nga saksi.” Gikutlo niya ang Juan 18:​37, diin si Jesus nag-ingon: “Ug alang niini nga ako mianhi sa kalibotan, aron magapanghimatuod ako sa kamatuoran.” Iyang gidala ang pagtagad sa 1 Pedro 2:​9, 10, nga nagaingon nga ang mga alagad sa Diyos kinahanglang ‘magamantala sa halayo sa kahibulongang mga buhat niya nga nagtawag kaninyo gikan sa kangitngit ngadto sa iyang katingalahang kahayag.’ Siya nangatarongan pinaagi sa ubay-ubayng teksto gikan sa Isaias, diin dili ang tanan nasabtang tin-aw niadtong panahona, apan iyang gipalalim ang iyang presentasyon pinaagi sa Isaias 43:​8-12, nga naglakip sa balaang sugo: “‘Kamo mao ang akong mga saksi,’ miingon si Jehova, ‘ug ako ang Diyos.’” Nan, sa unsang paghinapos nga ang kaugalingong Pulong ni Jehova mitultol kanila? Unsang ngalan ang mahimong kaharmoniya sa paagi nga ang Diyos sa pagkatinuod nagagamit kanila?

Ang dayag nga tubag anaa sa usa ka resolusyon nga madasigong gisagop niadtong okasyona. d Kanang resolusyona nag-ingon, sa bahin:

 “Aron ang atong tinuod nga baroganan mahimong mailhan, ug mituo nga kini maoy kaharmoniya sa kabubut-on sa Diyos, ingong gipahayag diha sa iyang Pulong, KINI GIKAUYONAN, ingon sa mosunod, nga mao:

“NGA kami nahigugma gayod kang Brader Charles T. Russell, tungod sa iyang nahimo, ug malipayon namong gidawat nga ang Ginoo migamit kaniya ug dagayang nagpanalangin sa iyang binuhatan, apan sa among pagpahiuyon sa Pulong sa Diyos dili kami makatugot nga pagatawgong mga ‘Russellitas’; nga ang Watch Tower Bible and Tract Society ug ang International Bible Students Association ug ang Peoples Pulpit Association maoy mga ngalan lamang sa mga korporasyon nga gihuptan, gidumala ug gigamit namo ingong usa ka pundok sa mga tawong Kristohanon sa pagpatunhay sa among buluhaton diha sa pagtuman sa kasugoan sa Diyos, apan walay usa man niining mga ngalana ang sa tukma ikalangkit o ikapadapat kanamo ingong usa ka lawas sa mga Kristohanong nagsunod sa mga lakang sa atong Ginoo ug Agalon, si Kristo Jesus; nga kami maoy mga estudyante sa Bibliya, apan, ingong usa ka lawas sa mga Kristohanon nga napormang asosasyon, midumili kami sa pagdala sa ngalan o pagatawgong mga ‘Estudyante sa Bibliya’ o sa susamang mga ngalan sa pagpaila sa among tukma nga baroganan sa atubangan sa Ginoo; midumili kami sa pagdala o pagatawgon pinaagi sa ngalan ni bisan kinsang tawo;

“NGA, tungod kay gipalit na sa bililhong dugo ni Jesu-Kristo nga atong Ginoo ug Manunubos, gimatarong ug gianak ni Jehova nga Diyos ug gipanagtawag ngadto sa iyang gingharian, kami sa walay ukon-ukon nagpahayag sa among bug-os nga pag-unong ug debosyon kang Jehova nga Diyos ug sa iyang gingharian; nga kami maoy mga alagad ni Jehova nga Diyos nga gitahasan sa usa ka buluhaton diha sa iyang ngalan, ug, ingong pagsugot sa iyang sugo, sa paghimog pamatuod bahin kang Jesu-Kristo, ug sa pagpahibalo sa katawhan nga si Jehova mao ang tinuod ug Labing Gamhanan nga Diyos; busa malipayon namong gidawat ug gidala ang ngalan nga ginganlan sa baba sa Ginoong Diyos, ug buot namong mailhan sa ingon ug pagatawgon sa ngalan, nga mao, mga saksi ni Jehova.​—Isa. 43:​10-12.” e

Human sa presentasyon sa tibuok resolusyon, ang malanog, malahutayong pamalakpak nagpaila sa bug-os nga pag-uyon sa mamiminaw sa gipahayag.

Pagdawat sa Responsabilidad

Pagkadakong dungog ang magdala sa ngalan sa bugtong tinuod nga Diyos, ang Soberano sa uniberso! Apan uban nianang ngalana ang responsabilidad. Kini maoy usa ka responsabilidad nga dili gusto sa ubang mga relihiyosong pundok. Sama sa giingon ni Brader Rutherford diha sa iyang diskurso: “Malipayon  sila nga nagdala sa ngalan nga walay mausa ilalom sa adlaw ang nakagusto gawas kanila nga sa bug-os ug sa walay pagsapayan mideboto kang Jehova.” Bisan pa, pagkahaom alang sa mga alagad ni Jehova sa pagdala sa personal nga ngalan sa Diyos, nga ila kanang ipahibalo, ug nga kana sa dayag nalangkit uban sa pagpahayag sa iyang katuyoan!

Bisag unsang pundok o indibiduwal nga mosulti sa ngalan ni Jehova nagpailalom sa ilang kaugalingon sa katungdanan sa pagpahibalo sa iyang pulong nga matinud-anon. (Jer. 23:​26-28) Kinahanglang ilang ipahibalo dili lamang ang mga tagana ni Jehova alang sa pagpanalangin sa mga mahigugmaon sa pagkamatarong apan usab ang iyang mga paghukom batok sa mamumuhat ug dili matarong. Sama sa gisugo ni Jehova sa iyang mga propeta sa milabayng panahon, mao usab karong adlawa, nga kinahanglang dili kuhaan sa iyang mga saksi ang pulong sa Diyos pinaagi sa dili pagpahibalo niana. (Jer. 1:17; 26:2; Ezek. 3:​1-11) Kinahanglang ilang ipahayag “ang tuig sa maayong kabubut-on sa bahin ni Jehova ug ang adlaw sa panimalos sa bahin sa atong Diyos.” (Isa. 61:​1, 2) Silang misagop sa gihisgotang resolusyon midawat nianang responsabilidara, ug diha sa ulahing bahin sa resolusyon, sila mipahayag:

“Ingong mga saksi ni Jehova ang among sulamente ug bugtong katuyoan mao ang magmasinugtanon sa bug-os sa iyang mga sugo; ang pagpahibalo nga siya mao ang bugtong tinuod ug Labing Gamhanang Diyos; nga ang iyang Pulong maoy tinuod ug nga ang iyang ngalan angayan sa tanang pasidungog ug paghimaya; nga si Kristo maoy Hari sa Diyos, nga iyang gihatagan ug awtoridad sa paglingkod sa iyang trono; nga ang iyang gingharian sa pagkakaron miabot na, ug ingong pagsugot sa mga sugo sa Ginoo kami sa pagkakaron kinahanglang mopahayag niining maayong balita ingong pagpamatuod o pagpanaksi sa kanasoran ug sa pagpahibalo sa mga magmamando ug sa katawhan bahin sa ug mahitungod sa mapintas ug madaogdaogong organisasyon ni Satanas, ug sa partikular may kalabotan sa ‘Kakristiyanohan’, nga maoy labing daotang bahin nianang makitang organisasyona, ug bahin sa ug mahitungod sa katuyoan sa Diyos sa paglaglag sa dili madugay sa organisasyon ni Satanas, nga ang maong dakong buhat pagasundan dayon sa pag-agak ni Kristo nga Hari sa masinugtanong mga tawo diha sa yuta sa kalinaw ug kadagaya, kagawasan ug kahimsog sa panglawas, kalipay ug kinabuhing walay kataposan; nga ang gingharian sa Diyos maoy paglaom sa kalibotan, ug wala nay lain, ug nga kining mensahea kinahanglang ipahayag niadtong nailhang mga saksi ni Jehova.

“Sa mapaubsanon among gidapit ang tanang katawhan nga debotado sa bug-os kang Jehova ug sa iyang gingharian sa pagduyog sa pagmantala niining maayong balita sa uban, nga ang matarong sukdanan sa Ginoo igatuboy, nga ang mga katawhan sa kalibotan mahibalo unta kon diin makit-an ang kamatuoran ug paglaom alang sa kahupayan; ug, labaw sa tanan, nga ang dako ug balaang ngalan ni Jehova nga Diyos mabindikar ug mabayaw.”

Dili lamang sa Columbus, Ohio, sa Amerika, apan kutob sa halayong Australia nga ang mga mamiminaw misigabo sa pamalakpak sa dihang ilang nadunggan ang pahibalo nianang bag-ong ngalan. Sa Hapon, pagkatapos sa daghang oras nga paningkamot, usa ka mubong bahin lamang sa programa ang nasakgaw sa shortwave radio sa tungang gabii. Dihadiha kana nga gihubad. Mao nga ang gamayng pundok didto nakadungog sa resolusyon ug sa malanogong pamalakpak. Si Matsue Ishii  atua didto kauban nila, ug ingon sa iyang gisulat sa ulahi, sila ‘naninggit sa kalipay duyog sa ilang mga kaigsoonan sa Amerika.’ Human sa kombensiyon sa Columbus, ang mga asembliya ug mga kongregasyon sa mga Saksi ni Jehova sa tanang kayutaan diin sila nagministeryo nagpahayag sa ilang kaugalingon sa bug-os nga pag-uyon sa resolusyon. Gikan sa Norway, ingong pananglitan, miabot ang taho: “Sa among tinuig nga kombensiyon . . . sa Oslo kaming tanan nanindog ug uban sa dakong kalipay misinggit ug ‘Ja’, sa dihang misagop sa among bag-ong ngalang ‘mga saksi ni Jehova’.”

Labaw pa sa Usa ka Ngalan

Ang kalibotan ba sa linangkob masayod nga ang atong mga kaigsoonan misagop nianang bag-ong ngalan? Oo, sa pagkatinuod! Ang pakigpulong nga unang nagpahibalo sa ngalan gisibya sa kinadak-ang radio hook-up nga nagamit sukad hangtod niadtong panahona. Sa dugang, ang resolusyon nga nagpahibalo sa bag-ong ngalan gilakip diha sa pulyetong The Kingdom, the Hope of the World. Sa sunod nga kombensiyon, ang mga Saksi ni Jehova nakaapod-apod sa minilyong kopya nianang pulyetoha diha sa daghang pinulongan sa Amerika del Norte ug del Sur, Uropa, Aprika, Asia, ug kaislahan sa dagat. Ingong dugang sa pagtanyag sa mga kopya sa balay-sa-balay, gipaningkamotan nila nga makahatag ug kopya sa matag opisyal sa kagamhanan, iladong negosyante, ug klerigo. Ang pila nga buhi pa sa 1992 nakahinumdom pag-ayo sa ilang bahin sa maong hinungdanong kampanya.

Dili ang tanan midawat ug maayo sa pulyeto. Si Eva Abbott nahinumdom nga sa iyang pagbiya sa balay sa usa ka klerigo sa Tinipong Bansa, ang pulyeto kusog nga gilabay ug nahulog sa yuta. Dili niya gustong ibilin kana didto, iya kadtong gipunit; apan usa ka dakong iro mipaghot, misakmit niana gikan sa iyang kamot, ug midala niana sa iyang agalon, ang magwawali. Siya miingon: “Ang wala nako mahimo, gihimo sa iro!”

Si Martin Poetzinger, kinsa sa ulahi mialagad ingong usa ka membro sa Nagamandong Lawas sa mga Saksi ni Jehova, nahinumdom: “Nahinganghang mga nawong ang makit-an sa matag pultahan sa dihang gipailaila namo ang among kaugalingon pinaagi sa mga pulong: ‘Miduaw ako kaninyo karong adlawa ingong usa sa mga saksi ni Jehova.’ Ang mga tawo manglingo sa ilang ulo o mosukna: ‘Apan mga Estudyante sa Bibliya gihapon kamo, dili ba? O miduyog ba kamo sa usa ka bag-ong sekta?’” Ngadtongadto ang kahimtang nausab. Pipila ka dekada pagkatapos nila sugdi sa paggamit ang ilang talagsaong ngalan, si Brader Poetzinger misulat: “Pagkadakong kausaban! Sa dili pa ako makasulti ang mga tawo moingon: ‘Usa ka sa mga saksi ni Jehova no.’” Oo, nahibalo na sila sa ngalan karon.

Kanang ngalana dili lamang usa ka ngalan. Mabatan-on man o matigulang, malalaki man o mababaye, ang tanang mga Saksi ni Jehova nakigbahin diha sa buluhaton sa pagpanaksi kang Jehova ug sa iyang dakong katuyoan. Ingong sangpotanan, si C. S. Braden, usa ka propesor sa relihiyosong kasaysayan, misulat: “Ang mga Saksi ni Jehova sa literal milukop sa yuta sa ilang pagpanaksi.”​—These Also Believe.

Bisan pag ang pagpanaksi nga gihimo sa atong mga igsoon sa wala pa nila masagop ang ngalang mga Saksi ni Jehova maoy tibuok yuta na, sa pagtan-awg-balik kana mipadayag nga si Jehova nag-andam kanila alang sa mas dakong buluhaton​—ang pagtigom sa dakong panon nga mapreserbar nga buhi latas sa Armageddon, nga may kahigayonan nga mabuhi sa walay kataposan sa paraisong yuta.

[Mga footnote]

[Blurb sa panid 149]

“Ang mga tinun-an pinaagi sa balaang pagpaigo gitawag nga mga Kristohanon”

[Blurb sa panid 150]

Ang ngalang Kristohanon nadaot sa panghunahuna sa publiko

[Blurb sa panid 151]

Sila labaw pa kay sa mga Estudyante lang sa Bibliya

[Blurb sa panid 157]

“‘Kamo mao ang akong mga saksi,’ miingon si Jehova, ‘ug ako ang Diyos’”

[Kahon sa panid 151]

Ang Ngalang Mga Saksi ni Jehova sa Amerika

Arabe ش‍هود ‍ي‍هوه‍

Armenyano Եհովայի Վկաներ

Intsik 耶和華見證人

Ingles Jehovah’s Witnesses

Pranses Témoins de Jéhovah

Grego Μάρτυρες του Ιεχωβά

Greenlandiko Jehovap Nalunaajaasui

Italyano Testimoni di Geova

Hapones エホバの証人

Koreano 여호와의 증인

Papiamento Testigonan di Jehova

Polako Świadkowie Jehowy

Portuges Testemunhas de Jeová

Samoano Molimau a Ieova

Kinatsila Testigos de Jehová

Sranantongo Jehovah Kotoigi

Tagalog Mga Saksi ni Jehova

Vietnamese Nhân-chứng Giê-hô-va

[Kahon sa panid 152]

Ang Uban Nakakita Niana

Dili lamang ang “The Watch Tower” ang nagtudlo gikan sa Bibliya nga si Jehova magbaton ug mga saksi sa yuta. Ingong pananglitan, si H. A. Ironside, sa librong “Lectures on Daniel the Prophet” (unang napatik niadtong 1911), mihisgot kanila kang kinsa ang bililhong mga saad sa Isaias kapitulo 43 mamatuman ug miingon: “Kini sila mahimong mga saksi ni Jehova, nga magpamatuod sa gahom ug himaya sa usa ka tinuod nga Diyos, sa panahong ang apostatang Kakristiyanohan mihurar sa kusganong panglimbong sa pagtuo sa pamakak sa Antikristo.”

[Kahon sa panid 153]

Ang Ngalang Mga Saksi ni Jehova sa Oriente ug Kaislahan sa Pasipiko

Bengali যিহোবার সাক্ষিরা

Bicol, Cebuano, Hiligaynon,

Samar-Leyte, Tagalog Mga Saksi ni Jehova

Bislama Ol Wetnes blong Jeova

Intsik 耶和華見證人

Ingles Jehovah’s Witnesses

Fijian Vakadinadina i Jiova

Gujarati યહોવાહના સાક્ષીઓ

Hindi यहोवा के साक्षी

Hiri Motu Iehova ena Witness Taudia

Iloko Dagiti Saksi ni Jehova

Indonesian Saksi-Saksi Yehuwa

Hapones エホバの証人

Kannada ಯೆಹೋವನ ಸಾಕ್ಷಿಗಳು

Koreano 여호와의 증인

Malayalam യഹോവയുടെ സാക്ഷികൾ

Marathi यहोवाचे साक्षीदार

Marshallese Dri Kennan ro an Jeova

Myanmar ယေဟောဝါသက်သေမျာ

Nepali यहोवाका साक्षीहरू

New Guinea Pidgin Ol Witnes Bilong Jehova

Niuean Tau Fakamoli a Iehova

Palauan reSioning er a Jehovah

Pangasinan Saray Tasi nen Jehova

Ponapean Sounkadehde kan en Siohwa

Rarotongan Au Kite o Iehova

Ruso Свидетели Иеговы

Samoan, Tuvaluan Molimau a Ieova

Sinhalese යෙහෝවාගේ සාක්ෂිකරුවෝ

Solomon Islands Pidgin all’gether Jehovah’s Witness

Tahisyano Ite no Iehova

Tamil யெகோவாவின் சாட்சிகள்

Telugu యిహోవాసాక్షులు

Thai พยาน​พระ​ยะโฮวา

Tongan Fakamo‘oni ‘a Sihova

Trukese Ekkewe Chon Pwarata Jiowa

Urdu

Vietnamese Nhân-chứng Giê-hô-va

Yapese Pi Mich Rok Jehovah

 [Kahon sa panid 154]

(Alang sa aktuwal nga pagkahan-ay, tan-awa ang publikasyon)

Ang Ngalang Mga Saksi ni Jehova sa Aprika

Aprikaan Jehovah se Getuies

Amharic የይሖዋ ምሥክሮች

Arabe ش‍هود ‍ي‍هوه‍

Chicheŵa Mboni za Yehova

Cibemba Inte sha kwa Yehova

Efịk Mme Ntiense Jehovah

Ingles Jehovah’s Witnesses

Ewe Yehowa Ðasefowo

Pranses Témoins de Jéhovah

Ga Yehowa Odasefoi

Gun Kunnudetọ Jehovah tọn lẹ

Hausa Shaidun Jehovah

Igbo Ndịàmà Jehova

Kiluba Ba Tumoni twa Yehova

Kinyarwanda Abahamya ba Yehova

Kirundi Ivyabona vya Yehova

Kisi Seiyaa Jɛhowaa

Kwanyama Eendombwedi daJehova

Lingala Batemwe ya Jéhovah

Luganda Abajulirwa ba Yakuwa

Malagasy Vavolombelon’i Jehovah

Moore A Zeova Kaset rãmba

Ndonga Oonzapo dhaJehova

Portuges Testemunhas de Jeová

Sango A-Témoin ti Jéhovah

Sepedi Dihlatse tša Jehofa

Sesotho Lipaki tsa Jehova

Shona Zvapupu zvaJehovha

Silosi Lipaki za Jehova

Swahili Mashahidi wa Yehova

Tigrinya ናይ የሆዋ መሰኻኽር

Tshiluba Bantemu ba Yehowa

Tsonga Timbhoni ta Yehova

Tswana Basupi ba ga Jehofa

Twi Yehowa Adansefo

Venda Ṱhanzi dza Yehova

Xhosa amaNgqina kaYehova

Yoruba Ẹlẹ́rìí Jehofa

Zulu oFakazi BakaJehova

[Kahon sa panid 154]

Ang Ngalang Mga Saksi ni Jehova sa Uropa ug Tungang Sidlakan

Albanian Dëshmitarët e Jehovait

Arabe ش‍هود ‍ي‍هوه‍

Armenian Եհովայի Վկաներ

Bulgariano Свидетелите на Йехова

Croatiano Jehovini svjedoci

Czech svĕdkové Jehovovi

Danes Jehovas Vidner

Olandes Jehovah’s Getuigen

Ingles Jehovah’s Witnesses

Estonian Jehoova tunnistajad

Pinlandes Jehovan todistajat

Pranses Témoins de Jéhovah

Aleman Jehovas Zeugen

Grego Μάρτυρες του Ιεχωβά

Hebreohanon עדי־יהוה

Hungariano Jehova Tanúi

Icelandiko Vottar Jehóva

Italyano Testimoni di Geova

Macedonian, Serbiano Јеховини сведоци

Maltese Xhieda ta’ Jehovah

Norwegian Jehovas vitner

Polako Świadkowie Jehowy

Portuges Testemunhas de Jeová

Romanyano Martorii lui Iehova

Ruso Свидетели Иеговы

Slovak Jehovovi svedkovia

Eslobenyano Jehovove priče

Kinatsila Testigos de Jehová

Sweko Jehovas vittnen

Turko Yehova’nın Şahitleri

Ukrainiano Свідки Єгови

[Mga hulagway sa panid 155]

Ang mga titik nga J W (nga walay pagpatin-aw) dayag diha sa 1931 nga kombensiyon. Ang kahulogan niana gipadayag diha sa usa ka makahinam nga pakigpulong bahin sa bag-ong ngalan

[Mga hulagway sa panid 156]

Sila magarbohon sa pagpahibalo sa uban nga sila mga Saksi ni Jehova