Kapitulo 23

Mga Misyonaryo Nangusog sa Tibuok-Kalibotang Pag-uswag

ANG masibotong kalihokan sa mga misyonaryo nga andam sa pag-alagad bisan diin nga sila gikinahanglan maoy importanteng hinungdan sa tibuok-yutang pagmantala sa Gingharian sa Diyos.

Sa wala pa makatukod ug tunghaan alang nianang katuyoana ang Watch Tower Bible and Tract Society, nagpadala na ug mga misyonaryo sa ubang kayutaan. Ang unang presidente sa Sosyedad, si C. T. Russell, miila sa panginahanglan alang sa kuwalipikadong mga tawo aron magsugod ug manguna sa pagwali sa maayong balita sa langyawng mga natad. Nagpadala siyag mga tawo alang nianang katuyoana​—si Adolf Weber sa Uropa, si E. J. Coward ngadto sa Caribbeanong dapit, si Robert Hollister ngadto sa Oriente, ug si Joseph Booth sa habagatang Aprika. Ikasubo, si Booth napamatud-ang mas interesado sa iyang kaugalingong mga plano; busa, niadtong 1910, si William Johnston gipadala gikan sa Scotland ngadto sa Nyasaland (karon Malawi), diin ang dili-maayong impluwensiya ni Booth ilabinang nabati. Sukad niadto, si Brader Johnston giasayn aron motukod ug sangang buhatan alang sa Watch Tower Society sa Durban, Habagatang Aprika, ug sa ulahi siya mialagad ingong magtatan-aw sa sanga sa Australia.

Human sa unang gubat sa kalibotan, si J. F. Rutherford mipadala pag dugang mga misyonaryo​—pananglitan, si Thomas Walder ug George Phillips gikan sa Britanya ngadto sa Habagatang Aprika, si W. R. Brown gikan sa asaynment sa Trinidad ngadto sa Kasadpang Aprika, si George Young gikan sa Canada ngadto sa Amerika del Sur ug sa Uropa, si Juan Muñiz una sa Espanya ug unya sa Argentina, si George Wright ug Edwin Skinner ngadto sa India, nga gisundan ni Claude Goodman, Ron Tippin, ug daghan pa. Sila maoy tinuod nga mga payunir, nga miadto sa mga dapit diin kadiyot ra o wala pay pagsangyaw sa maayong balita ang nahimo ug nagapahiluna ug usa ka lig-ong pundasyon alang sa umaabot organisasyonal nga pagtubo.

Usab, dihay uban pa kansang espiritu sa pagmisyonaryo nakapalihok kanila sa pagsangyaw sa gawas sa ilang kaugalingong nasod. Apil kanila mao si Kate Goas ug ang iyang anak nga babayeng si Marion, kinsa migugol ug mga tuig sa masibotong pag-alagad sa Colombia ug Venezuela. Ang lain pa mao si Joseph Dos Santos, kinsa mibiya sa Hawaii alang sa pagwaling panaw nga mitultol sa 15 ka tuig nga ministeryo sa Pilipinas. Anaa usab si Frank Rice, kinsa mibiyahe sakayg barko pangkargamento gikan sa Australia aron buksan ang pagwali sa maayong balita sa isla sa Java (karon sa Indonesia).

 Hinuon, niadtong 1942 naugmad ang mga plano alang sa usa ka tunghaan nga may kursong sa linain gidesinyo aron mobansay sa mga lalaki ug babaye nga andam sa pagsulod sa misyonaryong pag-alagad bisag asa nga sila gikinahanglan sa tibuok-yutang natad.

Tunghaang Gilead

Diha sa taliwala sa gubat sa kalibotan, sa tawhanong panglantaw daw dili praktikal ang magplano alang sa pagpalapad sa mga kalihokan sa pagwali sa Gingharian sa langyawng mga natad. Bisan pa, niadtong Septiyembre 1942, nga nagsalig kang Jehova, ang mga direktor sa duha ka pangunang legal nga mga korporasyon nga gigamit sa mga Saksi ni Jehova miuyon sa sugyot ni N. H. Knorr nga magtukod ug tunghaan nga gidesinyo sa pagbansay sa mga misyonaryo ug uban pa alang sa linaing pag-alagad. Kana pagatawgong Watchtower Bible College of Gilead. Sa ulahi kanang ngalana giusab ngadto sa Watchtower Bible School of Gilead. Walay matrikula, ug ang mga estudyante tagan-an ug puy-anan ug pagkaon nga ang gasto iya sa Sosyedad sulod sa yugto sa ilang pagbansay.

Apil niadtong gidapit aron motabang sa paglaraw sa kurso sa pagtuon mao si Albert D. Schroeder, nga nakabaton nag dakong kasinatian sa Departamento sa Pag-alagad sa hedkuwarter sa Sosyedad sa Brooklyn ug ingong magtatan-aw sa sanga sa Sosyedad sa Britanya. Ang iyang positibong panglantaw, ang paagi nga iyang gihatag ang iyang kaugalingon, ug ang iyang mainitong kaikag sa mga estudyante maoy nagpamahal kaniya ngadto kanilang iyang gitudloan sulod sa 17 ka tuig nga siya mialagad ingong tigtala ug ingong magtutudlo sa tunghaan. Niadtong 1974 nahimo siyang membro sa Nagamandong Lawas, ug sa misunod nga tuig siya giasayn aron moalagad sa Komite sa Pagpanudlo.

 Si Brader Schroeder ug ang iyang mga isigkamagtutudlo (si Maxwell Friend, Eduardo Keller, ug si Victor Blackwell) naglaraw ug lima-ka-bulan nga kurso sa pagtuon nga nagpasiugda sa pagtuon sa Bibliya mismo ug sa teokratikanhong organisasyon, usab sa mga doktrina sa Bibliya, pakigpulong publiko, ministeryo sa kanataran, misyonaryong pag-alagad, kasaysayan sa relihiyon, balaang balaod, kon unsaon pagpakig-atubang sa opisyales sa kagamhanan, internasyonal nga balaod, paghupot ug mga rekord, ug langyawng pinulongan. May mga pagbag-o sa kurikulum latas sa katuigan, apan ang pagtuon sa Bibliya mismo ug ang kahinungdanon sa buluhatong pag-ebanghelyo sa kanunay gibutang sa unang dapit. Ang tumong sa kurso mao ang pagpalig-on sa pagtuo sa mga estudyante, aron tabangan sila sa pag-ugmad sa espirituwal nga mga hiyas nga gikinahanglan aron makasagubang sa mga hagit sa misyonaryong pag-alagad. Gipasiugda ang kahinungdanon sa bug-os nga pagsalig kang Jehova ug pagkamaunongon kaniya. (Sal. 146:​1-6; Prov. 3:​5, 6; Efe. 4:24) Ang mga estudyante wala hatagig sag-ulohong mga tubag sa tanang pangutana apan gibansay sa pagpanukiduki ug gitabangan sa pag-apresyar kon nganong ang mga Saksi ni Jehova may ingong pagtuo ug kon ngano nga sila mosunod sa tinong mga paagi sa pagbuhat sa mga butang. Sila nakakat-on sa pagsabot sa mga prinsipyo nga pasukaran sa ilang pagbuhat. Sa ingon ang pundasyon napahiluna alang sa dugang pagtubo.

Ang mga imbitasyon sa gilaomang mga estudyante alang sa unang saring gipadala niadtong Disyembre 14, 1942. Kadto maoy tungatunga-sa-tingtugnaw sa dihang ang 100 ka estudyante nga naglangkob nianang saringa nagpatala didto sa mga pasilidad sa tunghaan nga nahimutang sa ilaya sa New York, sa South Lansing. Sila andam, ikag, ug morag ginerbiyos. Bisan pag ang mga pagtuon sa klase maoy pangunang kabalaka, dili nila mapugngan nga magmausisaon kon diin nga natad sa kalibotan sila ipadala tapos sa graduwasyon.

Sa usa ka diskurso alang nianang unang saring niadtong Pebrero 1, 1943, ang adlaw sa pagsugod sa tunghaan, si Brader Knorr miingon: “Kamo gihatagan ug dugang pagpangandam alang sa buluhaton nga susama sa kang apostol Pablo, Marcos, Timoteo, ug uban pa kinsa mibiyahe sa tanang bahin sa Empiryo sa Roma nga nagamantala sa mensahe sa Gingharian. Sila kinahanglang palig-onon pinaagi sa Pulong sa Diyos. Kinahanglan silang makabaton ug tin-aw nga kahibalo mahitungod sa Iyang mga katuyoan. Sa daghang dapit sila kinahanglang mobarog nga mag-inusara batok sa hawod ug kusgan niining kalibotana. Ang inyong bahin mahimong susama; ug ang Diyos maoy mahimo ninyong kusog didto.

“Daghan pang dapit ang wala masangyawig maayo mahitungod sa Gingharian. Ang mga tawong nagpuyo niining mga dapita anaa sa kangitngit, nga ginapos sa ilang relihiyon. Sa pipila niining mga nasora diin dihay pipila ka Saksi namatikdan nga ang mga tawo nga may maayong-kabubut-on andam nga maminaw ug makig-uban sa organisasyon sa Ginoo, kon matudloan sa husto. Dihay ginatos ug linibo pa nga mahimong maabot kon dihay daghang magbubuhat diha sa kanataran. Pinaagi sa grasya sa Ginoo, daghan pa ang maabot.

“DILI katuyoan niining tunghaana nga sangkapan kamo aron mahimong ordinadong mga ministro. Kamo mga ministro na ug aktibo na nga mga ministro sa daghang katuigan. . . . Ang bugtong katuyoan niining kursoha mao ang pag-andam kaninyo nga mahimong mas takos nga mga ministro diha sa mga teritoryo nga inyong adtoan.  . . .

 “Ang inyong pangunang buluhaton mao ang pagwali sa ebanghelyo sa Gingharian gikan sa balay ngadto sa balay sama sa gihimo ni Jesus ug sa apostoles. Sa dihang makakaplag kamo ug usa nga mopatalinghog, hikaya ang usa ka balik-duaw, sugdi ang usa ka pagtuon sa balay, ug organisaha ang tanang susama niana ingong usa ka kompaniya [kongregasyon] sa usa ka siyudad o lungsod. Dili lang kay mahimuot ka sa pag-organisar ug usa ka kompaniya, apan kinahanglang tabangan ninyo sila nga makasabot sa Pulong, palig-ona sila, pakigsulti kanila sa popanahon, tabangi sila sa ilang mga tigom sa pag-alagad ug sa ilang organisasyon. Sa dihang malig-on na sila ug makahimo na sa ilang kaugalingon ug makaatiman na sa pagbuhat sa teritoryo, makabalhin na kamo ngadto sa laing siyudad aron sa pagmantala sa Gingharian. Sa ngadtongadto basin gikinahanglan nga mobalik kamo aron palig-onon sila diha sa labing balaang pagtuo ug tul-iron sila diha sa doktrina; busa ang inyong buluhaton mao ang pag-atiman sa ‘ubang karnero’ sa Ginoo, ug dili ang pagbiya kanila. (Juan 10:16) Ang inyong tinuod nga buluhaton mao ang pagtabang sa maayog-kabubut-ong mga tawo. Kinahanglan ninyong gamiton ang inyong inisyatibo, apan nagalantaw sa paggiya sa Diyos.” a

Lima ka bulan sa ulahi ang mga membro nianang unang saring nakakompleto na sa ilang linaing pagbansay. Mikuha ug mga visa, mihimog mga kahikayan sa pagbiyahe, ug sila nangadto sa siyam ka kayutaan sa Latin Amerika. Tulo ka bulan human sa ilang graduwasyon, ang unang nabansay-sa-Gilead nga mga misyonaryo nga mibiya sa Tinipong Bansa miadto na sa Cuba. Sa pagka 1992, kapin sa 6,500 ka estudyante gikan sa kapin 110 ka nasod ang nabansay ug sukad niadto nag-alagad sa kapin sa 200 ka kayutaan ug kaislahan.

Hangtod sa iyang kamatayon 34 ka tuig tapos sa inagurasyon sa Tunghaang Gilead, si Brader Knorr mipasundayag sa labihang personal nga kaikag diha sa buluhaton sa mga misyonaryo. Sa tingtungha, kon mahimo sa makadaghan siya moduaw sa mga estudyante, nga nagahatag ug mga pakigpulong ug iyang iuban ang ubang membro sa kawani sa hedkuwarter aron makigsulti sa mga estudyante. Dihang ang mga graduwado sa Gilead nakasugod na sa ilang pag-alagad sa ubang nasod, sa personal siya miduaw sa mga grupo sa misyonaryo, mitabang kanila sa pagsulbad sa mga suliran, ug mihatag kanila sa gikinahanglang pagdasig. Samtang nagkadaghan ang mga misyonaryo, siya mihikay alang sa ubang kuwalipikado-kaayong mga igsoon nga makaduaw usab, aron nga ang tanang misyonaryo, bisag asa  pa sila nagaalagad, makadawat ug regular personal nga pagtagad.

Lahi Kining mga Misyonaryoha

Ang mga misyonaryo sa Kakristiyanohan nagtukod ug mga ospital, mga sentro sa kagiw, ug mga balay sa ilo aron tagan-an ang materyal nga panginahanglan sa mga tawo. Nga mipapel ingong mga tigpaluyo sa kabos nga katawhan, sila usab nakapahinabo ug pag-alsa ug miapil sa paggerilya. Sa kasukwahi, ang mga misyonaryo nga graduwado sa Tunghaang Gilead nagtudlog Bibliya sa mga tawo. Inay magtukod ug mga simbahan ug magdahom nga ang mga tawo moduol kanila, sila nagduaw gikan sa balay ngadto sa balay aron pangitaon ug tudloan kadtong gigutom ug giuhaw alang sa pagkamatarong.

Suod nga nagasunod sa Pulong sa Diyos, gipakita sa Saksi nga mga misyonaryo ngadto sa mga tawo kon nganong ang tinuod ug dumalayong sulbad sa mga suliran sa katawhan mao ang Gingharian sa Diyos. (Mat. 24:14; Luc. 4:43) Ang kalainan tali niining buluhatona ug nianang sa mga misyonaryo sa Kakristiyanohan maoy gipatataw kang Peter Vanderhaegen niadtong 1951 sa dihang nagpadulong sa iyang asaynment sa Indonesia. Ang lain lamang nga pasahero sakay sa barkong pangkargamento mao ang usa ka misyonaryong Baptist. Bisan pag si Brader Vanderhaegen naningkamot sa pagpakighisgot kaniya mahitungod sa maayong balita sa Gingharian sa Diyos, ang Baptist nagpatin-aw nga ang iyang mainitong interes mao ang pagsuportar sa mga panlimbasog ni Chiang Kai-shek sa Taiwan nga makabalik sa gahom sa mainland.

Bisan pa niana, daghang ubang tawo ang nakaapresyar sa bili sa mga gipahayag diha sa Pulong sa Diyos. Sa Barranquilla, Colombia, sa dihang si Olaf Olson nagsangyaw kang Antonio Carvajalino, kinsa usa ka kusganong tigpaluyo sa usa ka linain nga kalihokan sa politika, si Brader Olson wala modapig kaniya, ni siya mituboy sa ubang politikal nga ideolohiya. Hinunoa, mitanyag siya sa pagtuon sa Bibliya nga walay bayad uban kang Antonio ug sa iyang mga igsoong babaye. Sa wala madugay nasabtan ni Antonio nga ang Gingharian sa Diyos mao lamang ang tinuod nga paglaom alang sa kabos nga katawhan sa Colombia ug sa uban pa sa kalibotan. (Sal. 72:​1-4, 12-14; Dan. 2:44) Si Antonio ug ang iyang mga igsoong babaye nahimong masibotong mga alagad sa Diyos.

Ang kamatuoran nga ang Saksing mga misyonaryo bulag ug lahi gikan sa relihiyosong sistema sa Kakristiyanohan maoy napasiugda sa laing paagi sa usa ka hitabo sa Rhodesia (karon Zimbabwe). Sa dihang si Donald Morrison miduaw sa balay sa usa ka misyonaryo sa Kakristiyanohan didto, ang misyonaryo mireklamo nga  ang mga Saksi wala nagatahod sa mga utlanan nga gihimo. Unsang mga utlanan? Aw, ang mga relihiyon sa Kakristiyanohan nagbahinbahin sa nasod ngadto sa mga dapit diin ang kada usa makabuhat nga dili samokon sa uban. Ang mga Saksi ni Jehova dili makauyon sa maong kahikayan. Si Jesus miingon nga ang mensahe sa Gingharian kinahanglang iwali sa tibuok pinuy-anang yuta. Ang Kakristiyanohan sa tino wala nagabuhat niana. Ang nabansay-sa-Gilead nga mga misyonaryo determinadong mobuhat nga makaylapon, ingong pagsugot kang Kristo.

Kining mga misyonaryoha gipadala, dili aron pagaalagaran, apan aron moalagad. Kana dayag sa daghang paagi nga mao gayod kana ang ilang gipaningkamotan nga himoon. Dili sayop nga modawat ug materyal nga mga tagana nga libreng gitanyag (ug dili tungod sa pagpangayo) ingong apresasyon sa espirituwal nga tabang. Apan aron abton ang mga kasingkasing sa katawhan sa Alaska, si John Errichetti ug Hermon Woodard nakadiskobre nga makaayo ang paggahin ug labing menos pila ka panahon sa pagbuhat uban sa ilang mga kamot aron matagan-an ang ilang pisikal nga mga panginahanglan, sama sa gihimo ni apostol Pablo. (1 Cor. 9:​11, 12; 2 Tes. 3:​7, 8) Ang ilang pangunang kalihokan mao ang pagwali sa maayong balita. Apan sa dihang sila makadawat ug mga pagdapit, sila usab mitabang sa mga buluhaton nga kinahanglang pagabuhaton​—pananglitan, pag-ayo sa atop sa tagbalay tungod kay ilang nasabtan nga nagkinahanglan siyag tabang. Ug sa dihang sila mobiyahe gikan sa lainlaing dapit pinaagig bangka, sila mitabang sa pagdiskarga sa kargamento. Ang mga tawo dali rang makasabot nga kining mga misyonaryoha dili diay sama sa klero sa Kakristiyanohan.

Sa pipila ka dapit kinahanglan alang sa Saksing mga misyonaryo nga magtrabaho sa sekular sa makadiyot aron lamang makapundar diha sa nasod aron nga sila makatuman sa ilang ministeryo didto. Sa ingon, sa dihang si Jesse Cantwell miadto  sa Colombia, nagtudlo siyag Ingles sa medikal nga departamento sa usa ka unibersidad hangtod ang politikal nga kahimtang nausab ug ang relihiyosong mga pagdili natapos. Human niana siya nakaarang sa paggamit sa iyang kasinatian sa bug-os-panahon diha sa ministeryo ingong nagapanawng magtatan-aw sa mga Saksi ni Jehova.

Sa daghang dapit, sa sinugdan ang mga misyonaryo kinahanglang mokuhag mga visa ingong turista nga motugot kanila ug usa o tingali pipila ka bulan sa sulod sa usa ka nasod. Unya kinahanglan silang mobiya ug mobalik pag-usab. Apan sila milahutay, nga nagahimo niana sa sublisubli hangtod ang gikinahanglang mga papeles sa pagpuyo mabatonan. Ang tinguha sa ilang mga kasingkasing mao ang pagtabang sa mga tawo diha sa mga nasod diin sila giasayn.

Kining mga misyonaryoha wala maglantaw sa ilang kaugalingon ingong labaw sa lokal nga mga tawo. Ingong nagapanaw nga magtatan-aw, si John Cutforth, kinsa sa sinugdan usa ka magtutudlo sa Canada, miduaw sa mga kongregasyon ingon man sa nahilit nga mga Saksi sa Papua New Guinea. Siya miyaka sa salog uban kanila, nakigsalo kanila, ug midawat sa mga imbitasyon nga matulog sa banig diha sa salog sa ilang mga balay. Siya nalipay sa pakig-uban kanila samtang sila kauban nga nagbaktas diha sa ministeryo sa kanataran. Apan kini katingad-an alang sa mga dili-Saksi nga nagpaniid niana, kay ang Uropanhong mga pastor sa mga misyon sa Kakristiyanohan nailhang nagapalayo gikan sa lokal nga mga tawo, nga nakig-uban  lamang sa makadiyot sa ilang mga parokyano sa pila nila ka tigom, apan dili gayod makigsalo kanila.

Ang mga tawo nga gialagaran niining mga Saksi nakaamgo sa mahigugmaong interes sa mga misyonaryo ug sa organisasyon nga nagpadala kanila. Sa pagtubag sa usa ka sulat gikan kang João Mancoca, usa ka mapaubsanong Aprikano nga nabilanggo sa kolonya penal sa Portuges nga Kasadpang Aprika (karon Angola), usa ka misyonaryo sa Watch Tower ang gipadala aron motaganag espirituwal nga tabang. Sa pagtan-awg balik niadtong pagduaw, si Mancoca sa ulahi miingon: “Wala na akoy duda nga kini mao ang tinuod nga organisasyon nga gipaluyohan sa Diyos. Wala gayod ako maghunahuna ni magtuo nga dihay laing relihiyosong organisasyon nga mohimo sa maong butang: nga walay bayad, mopadala ug misyonaryo gikan sa layo aron pagduaw sa usa ka ubos nga tawo tungod lamang kay siya misulat.”

Mga Kahimtang sa Pagkinabuhi ug mga Kustombre

Kasagaran ang mga kahimtang sa pagkinabuhi diha sa mga yuta diin ang mga misyonaryo gipadala dili sama ka adelantado niadtong gigikanan nilang mga dapit. Sa dihang si Robert Kirk midunggo sa Burma (karon Myanmar) sayo sa 1947, ang mga epekto sa gubat sa gihapon makita pa, ug pipila lang ka balay ang may mga suga nga de-koryente. Sa daghang kayutaan, ang mga misyonaryo nakadiskobre nga tinagsa ang paglaba nga gigamit ang palanggana o ibabaw sa mga bato diha sa usa ka suba inay nga pinaagi sa de-koryente nga washing machine. Apan sila nangadto aron tudloan ang mga tawo sa kamatuoran sa Bibliya, busa sila mipasibo sa lokal nga mga kahimtang ug nagmapuliki diha sa ministeryo.

Niadtong unang mga adlaw, ang kasagarang nahitabo mao nga walay tawong nagahulat aron moabiabi sa mga misyonaryo. Sila ang mangita sa ilang kapuy-an. Sa dihang si Charles Eisenhower, kauban ang 11 pa, miabot sa Cuba niadtong 1943, sila natulog sa salog sa unang gabii. Sa sunod adlaw mipalit silag mga katre ug gigama ingong mga aparador ug mga kabinet ang mga kahon sa mansanas. Nga nagagamit sa bisan unsang kontribusyon nga ilang nadawat gumikan sa napahimutang nga literatura, uban sa kasarangang alawans nga gitagana sa Watch Tower Society sa espesyal nga mga payunir, ang matag grupo sa mga misyonaryo naglaom kang Jehova nga mopanalangin sa ilang mga paningkamot aron makabayad sa abang, makapalit ug pagkaon, ug makabayad sa ubang kinahanglanong mga galastohan.

Ang pagdigamo sa mga pagkaon usahay nagkinahanglan ug kausaban sa panghunahuna. Kon diin walay repridyeretor, kinahanglan nga mamalit sa merkado kada adlaw. Sa daghang kayutaan ang pagluto gihimo ibabaw sa haling sa uling o kahoy inay sa gas o de-koryenteng kusinilya. Si George ug Willa Mae Watkins, nga naasayn sa Liberia, nakadiskobre nga ang ilang sug-angan maoy tulo lamang ka bato nga katak-angan sa kaldero.

 Komosta na man ang tubig? Sa pagtan-aw sa iyang bag-ong balay sa India, si Ruth McKay miingon: ‘Ania ang usa ka balay nga walay kaparehas sa akong mga nakita. Ang kusina walay lababo, gripo lamang diha sa suok sa bungbong nga may nagtuybong semento aron dili mosalanap ang tubig sa salog. Kana dili 24-oras nga agos sa tubig, apan kinahanglang magpundo ug tubig alang sa mga panahon nga walay agas.’

Kay wala sila maanad sa lokal nga mga kahimtang, ang pila ka misyonaryo nagkasakit sa una nilang mga bulan sa ilang asaynment. Si Russell Yeatts sunodsunod nga giatake ug kalibanga sa iyang pag-abot sa Curaçao niadtong 1946. Apan ang usa ka lokal nga brader mitanyag ug mainitong pag-ampo sa pagpasalamat kang Jehova tungod sa mga misyonaryo nga dili gayod sila makahunahuna sa pagbiya. Sa pag-abot sa Upper Volta (karon Burkina Faso), si Brian ug Elke Wise nakadiskobre sa ilang kaugalingon diha sa mapintas nga klima nga makadaot sa panglawas sa tawo. Kinahanglang tun-an nila sa pag-agwanta ang kaigang sa maadlaw nga 43° C. Sa ilang unang tuig, ang naglagiting kainit inubanan sa malarya maoy hinungdan nga si Elke nagkasakit sa daghang semana sa usa ka panahon. Sa misunod nga tuig, si Brian nagkasakit sulod sa lima ka bulan tungod sa grabeng hepatitis. Apan sa wala madugay ilang nakaplagan nga kutob sa ilang madumala daghan gayod ang ilang matudloan sa Bibliya​—ug unya dihay dugang pa nga dili na nila matagad sa bug-os. Ang gugma alang niadtong mga tawhana nakatabang kanila sa paglahutay; ingon usab sa kamatuoran nga ilang giisip ang ilang asaynment ingong usa ka pribilehiyo ug ingong maayong pagbansay alang sa bisan unsang katuyoan ni Jehova alang kanila diha sa umaabot.

Samtang milabay ang mga tuig, dugang mga misyonaryo ang giabiabi sa ilang mga assaynment niadtong mga nauna kanila o sa lokal nga mga Saksi. Ang pila giasayn sa kayutaan diin ang pangunang mga siyudad daw moderno na. Sugod niadtong 1946, ang Watch Tower Society naningkamot usab sa pagtagana ug nahiangay nga puloy-an ug gikinahanglang muwebles sa matag grupo sa misyonaryo ingon man sa salapi alang sa pagkaon, sa ingon dili na sila mabalaka niini ug sila makahimo na sa paghatag ug dugang pagtagad sa buluhatong pagwali.

Sa ubay-ubayng dapit, ang pagbiyahe maoy usa ka kasinatian nga misulay sa ilang pagkamalahutayon. Iniglurang sa ulan, dili lang usa ka sister nga misyonarya sa Papua New Guinea ang nakakaplag sa iyang kaugalingon nga nag-ambilay ug backpack sa mga abiyo samtang naglatas sa kamingawan diha sa dangog lapokon kaayong mga agianan nga usahay mahuslo ang iyang sapatos. Sa Amerika del Sur, daghang misyonaryo ang nakasinatig makuyaw nga mga biyahe sa bus agi sa piot nga mga kalsada didto sa ibabaw sa mga Bukid Andes. Kini usa ka kasinatian nga dili dayon makalimtan sa dihang ang gisakyan nimong bus, sa ngilit sa kalsada, makaenkuwentrog  dakong sakyanan sa usa ka kurbada nga walay barandilya ug mabati nimong mitakilid ang bus sa pangpang!

Ang politikal nga mga rebolusyon daw regular na nga bahin sa kinabuhi sa pila ka dapit, apan ang mga Saksing misyonaryo wala makalimot sa gisulti ni Jesus nga ang iyang mga tinun-an “dili bahin sa kalibotan”; busa sila neyutral kon bahin sa maong mga away. (Juan 15:19) Sila nakakat-on kon unsaon pagpukgo sa bisan unsang kamausisaon nga moladlad kanila sa wala-kinahanglanang peligro. Kasagaran, labing maayo nga dili mogawas sa kadalanan hangtod mahimong normal ang kahimtang. Siyam ka misyonaryo sa Vietnam ang nagpuyo mismo diha sa sentro sa Saigon (karon Siyudad sa Ho Chi Minh) sa dihang mikanap ang gubat sa siyudad. Ilang nakita ang mga bomba nga gihulog, mga sunog sa tibuok siyudad, ug linibo ka tawo nga nangalagiw aron dili mamatay. Apan kay nakaapresyar nga si Jehova nagpadala kanila aron itanyag ang nagahatag-kinabuhi nga kahibalo sa gigutom-sa-kamatuoran nga mga tawo, sila nagsalig kaniya alang sa panalipod.

Gani bisan sa dihang may igong kalinaw, lisod alang sa mga misyonaryo ang pagtuman sa ilang ministeryo sa pila ka seksiyon sa mga siyudad sa Asia. Ang pagpakita lamang sa usa ka langyaw diha sa sigpit nga kadalanan sa timawang seksiyon sa Lahore, Pakistan, igo na nga makadani sa panon sa walay-ligo, bulingit nga mga bata sa tanang pangedaron. Nga nagasinggit ug nagatinuloray sa usag usa, ilang sundan ang misyonaryo gikan sa balay ngadto sa balay, nga sa subsob modayon sa mga balay nga gisundan ang magmamantala. Sa dili madugay ang tanang molupyo sa dapit nasultihan na sa kantidad sa mga magasin ug nga ang langyaw ‘nangombirtir sa pagka-Kristiyano.’ Ubos sa maong mga kahimtang, kasagarang kinahanglanon na nga mobiya sa dapit. Ang pagbiya sagad nga dinuyogan sa pagsinggit, pamalakpak, ug, usahay, ulan sa mga bato.

Tungod sa lokal nga mga kustombre ang mga misyonaryo kasagaran kinahanglang magpasibo. Sa Hapon natun-an nila ang paghubo sa ilang mga sapatos sa balkon sa dihang modayon sa balay. Ug kinahanglang maanad sila, kon mahimo, sa pagyaka sa salog sa atubangan sa mubong lamesa sa panahon sa mga pagtuon sa Bibliya. Sa pila ka bahin sa Aprika, sila nakakat-on nga ang paggamit ug wala nga kamot sa pagtanyag ug usa ka butang sa laing tawo giisip nga usa ka insulto. Ug ilang nakaplagan nga nianang bahina sa kalibotan, dili maayong batasan ang modiretso sa tuyo sa ilang pagduaw nga wala pay yanong pakigkabildo​—nga nagapakigsayod sa panglawas sa usag usa ug nga nagatubag sa mga pangutana kon diin ba gikan ang usa, pila ang anak sa usa, ug uban pa. Sa Brazil ang mga misyonaryo nakadiskobre nga inay nga manuktok sa mga pultahan, kasagaran mopalakpak lang sila sa atubangan sa ganghaan aron tawgon ang tagbalay.

Hinuon, sa Lebanon ang mga misyonaryo miatubang sa laing matang sa mga kustombre. Diyutay rang brader ang nagdala sa ilang mga asawa ug mga anak nga babaye sa mga tigom. Ang mga babaye nga mitambong kanunayng naglingkod sa luyo, dili gayod taliwala sa mga lalaki. Ang mga misyonaryo, nga wala masayod sa kustombre, nakapahinabog dakong kasamok sa ilang unang tigom. Usa ka magtiayon ang milingkod sa atubangan, ug ang dalagang mga misyonarya milingkod sa bisag asang lingkoranan nga bakante. Apan inigkahuman sa tigom usa ka panaghisgot sa Kristohanong mga prinsipyo ang nakatabang sa pagwala sa dili-pagsinabtanay. (Itandi ang Deuteronomio 31:12; Galacia 3:28.) Ang paglainlain nahunong.  Daghan pang mga asawa ug mga anak nga babaye ang mitambong sa mga tigom. Sila usab mikuyog sa mga misyonarya diha sa balay-sa-balay nga ministeryo.

Ang Hagit sa Usa ka Bag-ong Pinulongan

Ang gamayng grupo sa mga misyonaryo nga miabot sa Martinique niadtong 1949 diyutay rag kahibalo sa Pranses, apan sila nasayod nga ang mga tawo nagkinahanglan sa mensahe sa Gingharian. Uban sa tinuod nga pagtuo sila nagsangyaw gikan sa pultahan ngadto sa pultahan, nga nagasulay sa pagbasa sa pipila ka bersikulo gikan sa Bibliya o mokutlo gikan sa usa ka publikasyon nga ilang ginatanyag. Uban sa pailob ang ilang Pranses miuswag ra sa inanay.

Bisan tuod nga sila nagtinguha sa pagtabang sa lokal nga mga Saksi ug ubang interesado, sa kasagaran ang mga misyonaryo mismo ang unang nagkinahanglag tabang​—tungod sa pinulongan. Kadtong gipadala sa Togo nakadiskobre nga ang gramatika sa Ewe, ang pangunang lumad nga diyalekto, maoy lahi kaayo gikan sa Uropanhong mga pinulongan, usab ang gikusgon sa tono sa paglitok sa pulong mahimong mag-usab sa kahulogan. Mao nga, ang duhag-letra nga pulong to, kon litokon sa taas nga tono, magkahulogan ug dalunggan, bukid, ugangang lalaki, o tribo; uban sa mobong tono, kana magkahulogan ug kabaw. Ang mga misyonaryo nga nag-alagad sa Vietnam miatubang sa pinulongan nga nagagamit ug unom ka tono sa paglitok sa bisan unsang pulong, nga ang matag tono mosangpot sa lahi nga kahulogan.

Si Edna Waterfall, nga naasayn sa Peru, wala makalimot sa unang balay nga gisulayan niyag sangyaw sa Kinatsila. Nga gipaningot ug bugnaw, nagkabungabunga siya sa iyang gisag-ulo nga presentasyon, mitanyag sa literatura, ug mihikay alang sa usa ka pagtuon sa Bibliya uban sa edarang babaye. Unya ang babaye miingon sa larinong Ingles: “Husto na, kanang tanan maayo kaayo. Motuon ako uban kanimo ug buhaton nato kanang tanan sa Kinatsila aron matabangan ka nga makakat-on sa Kinatsila.” Nga nakuratan, si Edna mitubag: “Nahibalo kag Ingles? Ug ako gipasagdan nimo sa akong salikwaot nga Kinatsila?” “Makaayo kadto kanimo,” tubag sa babaye. Ug, tinuod, kadto mao! Ingon sa naapresyar ni Edna sa wala madugay, nga ang aktuwal nga pagsulti sa usa ka pinulongan maoy importanteng bahin sa pagkat-on niana.

Sa Italya, sa dihang si George Fredianelli misulay sa pagsulti sa pinulongan, iyang  nadiskobrehan nga ang iyang gituohang mga ekspresyon sa Italyano (apan sa tinuod mga Ingles diay nga pulong nga gilitok ug Italyano) dili masabtan. Aron masagubang ang suliran, nakahukom siya nga isulat tanan ang iyang mga pagkigpulong sa kongregasyon ug basahon kana gikan sa manuskrito. Apan daghan sa iyang mamiminaw ang katulogon. Busa wala na niya gamita ang manuskrito, midiskurso nga ekstemporanyo, ug nangayog tabang sa mamiminaw sa dihang mahutdan siyag pulong. Nakatabang kini kanila nga dili makatulog, ug kini nakatabang kaniya nga mouswag.

Aron mahatagan ang mga misyonaryo ug ideya sa ilang bag-ong pinulongan, ang kurso sa pagtuon sa Gilead alang sa unang mga saring naglakip sa mga pinulongan nga sama sa Kinatsila, Pranses, Italyano, Portuges, Hapones, Arabe, ug Urdu. Latas sa katuigan, kapin sa 30 ka pinulongan ang gitudlo. Apan kay dili tanan sa mga graduwado sa usa ka saring ang mangadto sa mga dapit diin ang maong pinulongan maoy ginasulti, kining mga saring sa pagtuon sa pinulongan sa ulahi gipulihan sa mga kahikayan alang sa mabug-osong yugto sa binantayang pagtuon sa pinulongan inig-abot sa ilang mga asaynment. Alang sa unang bulan, ang mga bag-ong abot mokugi gayod sa pagtuon sa pinulongan sulod sa 11 ka oras kada adlaw; ug pagka sunod bulan, ang katunga sa ilang panahon gigugol sa pagtuon sa pinulongan diha sa balay, ug ang laing katunga gigugol sa paggamit nianang kahibaloa diha sa ministeryo sa kanataran.

Hinuon, namatikdan nga ang aktuwal nga paggamit sa pinulongan diha sa ministeryo sa kanataran maoy pangunang yawi sa pag-uswag; busa kini gipasibo. Sa unang tulo ka bulan sa ilang asaynment, ang bag-ong mga misyonaryo nga wala mahibalo sa lokal nga pinulongan mogugol ug upat ka oras kada adlaw uban sa usa ka kuwalipikadong magtutudlo, ug dihadiha sa sinugdan, pinaagi sa pagsangyaw sa lokal nga mga tawo mahitungod sa Gingharian sa Diyos, ilang mapadapat ang ilang nakat-onan.

 Daghang grupo sa misyonaryo ingong mga tem ang nagtambayayong aron mapauswag ang ilang pagsabot sa pinulongan. Sila mohisgot ug pipila, o mga 20, ka bag-ong pulong kada adlaw sa tingpamahaw ug unya naningkamot sa paggamit niini sa ilang ministeryo sa kanataran.

Ang pagkahibalo sa lokal nga pinulongan nahimong importanteng butang aron maangkon nila ang ang pagsalig sa mga tawo. Sa pila ka dapit, may usa ka sukod sa katahap sa mga langyaw. Si Hugh ug si Carol Cormican nakaalagad nga nag-inusara o ingong magtiayon sa lima ka Aprikanhong nasod. Sila nasayod pag-ayo sa katahap nga kasagaran naglungtad tali sa mga Aprikano ug mga Uropanhon. Apan sila miingon: “Ang pagsulti sa lokal nga pinulongan dali rang magwagtang niining pagbatia. Dugang pa, ang uban nga wala makiling sa pagpaminaw sa maayong balita gikan sa ilang katagilungsod andam nga maminaw kanamo, mokuhag literatura, ug motuon, tungod kay naningkamot kami sa pakigsulti kanila diha sa ilang kaugalingong pinulongan.” Aron sa pagbuhat niana, si Brader Cormican nakakat-on ug lima ka pinulongan, gawas sa Ingles, ug si Sister Cormican nakakat-on ug unom.

Siyempre, mahimong may mga suliran sa pagpaningkamot sa pagtuon sa usa ka bag-ong pinulongan. Sa Puerto Rico usa ka igsoong lalaki nga nagatanyag sa pagpatokar sa narekord nga mensahe sa Bibliya alang sa mga tagbalay ang motak-op sa iyang ponograpo ug mobalhin sa sunod pultahan sa dihang ang tawo motubag, “¡Como no!” Alang kaniya, kana morag nagpasabot nga “No” (“Dili”), ug dugaydugay pa una niya hisayri nga ang ekspresyon nagkahulogan ug “Nganong dili god!” Sa laing bahin, ang mga misyonaryo usahay wala makasabot sa dihang ang tagbalay miingon nga dili siya interesado, busa padayon gihapon sila sa pagpamatuod. Ang pipila ka mabinationg mga tagbalay nakabatog kaayohan ingong sangpotanan.

Dihay mga kataw-anan usab nga mga kahimtang. Si Leslie Franks, sa Singapore, nakakat-on nga kinahanglan mag-amping siya nga dili mohisgot mahitungod sa lubi (kelapa) sa dihang ang iyang buot ipasabot ulo (kepala), ug sagbot (rumput) sa dihang buot ipasabot niya buhok (rambut). Usa ka misyonarya sa Samoa, tungod sa sayop nga paglitok, nangutana sa usa ka lumad, “Komosta ang imong bangas?” (ang lumad walay bungot), sa dihang sa matinahuron buot unta niyang mangutana mahitungod sa asawa sa tawo. Sa Ecuador, sa dihang ang usa ka drayber sa bus mipaandar ug kalit, si Zola Hoffman, kinsa nagbarog diha sa sulod sa bus, nahitumpawak sa sabakan sa usa ka lalaki. Kay naulaw, naningkamot siya nga mangayog pasaylo. Apan ang iyang nalitok maoy, “Con su permiso” (Uban sa imong pagtugot). Sa dihang ang lalaki sa kamaayo mitubag, “Kon gusto nimo Day, puwede kang magpasabak kanako,” ang ubang mga pasahero nangatawa.

Bisan pa niana, ang maayong mga resulta sa ministeryo umaabot tungod kay ang mga misyonaryo naningkamot. Si Lois Dyer, kinsa miabot sa Hapon niadtong 1950, nahinumdom sa tambag nga gihatag ni Brader Knorr: “Himoa ang labing maayo nga inyong maarangan, ug, bisan pag magkasayopsayop kamo, paningkamot!” Iyang gituman kana, ug mao usab ang daghang uban pa. Sa misunod nga 42 ka tuig, ang mga misyonaryong gipadala sa Hapon nakakita sa pagtubo sa gidaghanon sa mga magmamantala sa Gingharian didto gikan sa maihap ra ngadto sa kapin sa 170,000, ug ang pag-uswag nagapadayon. Pagkadagayang ganti tungod kay, human mosalig kang Jehova alang sa pagtultol, sila andam nga mosulay!

 Pagbukas sa Bag-ong mga Natad, Pag-ugmad sa Uban

Sa daghang kayutaan ug kaislahan, ang nabansay-sa-Gilead nga mga misyonaryo ang nagsugod o kaha nagpakusog sa buluhatong pagwali sa Gingharian human sa limitadong pagsangyaw nga nahimo sa uban. Daw sila ang unang mga Saksi ni Jehova nga nagsangyaw sa maayong balita sa Somalia, Sudan, Laos, ug ubay-ubayng kaislahan sa tibuok yuta.

Dihay nahimong pipila ka mas unang pagwali sa mga dapit sama sa Bolivia, Dominican Republic, Ecuador, El Salvador, Honduras, Nicaragua, Ethiopia, Gambia, Liberia, Cambodia, Hong Kong, Hapon, ug Vietnam. Apan walay mga Saksi ni Jehova ang nagatahog kalihokan niining mga nasora sa dihang ang unang mga misyonaryo nga migraduwar sa Tunghaang Gilead nangabot. Diin posible, ang mga misyonaryo mihimog sistematikong pagkobre sa nasod, nga nagtumong pag-una sa mas dagkong mga siyudad. Sila wala lamang nagpahimutang ug literatura ug milakaw, sama sa mga colporteur sa nangagi. Sila mapailobong nagbalik duaw sa mga interesado, nagdumalag mga pagtuon sa Bibliya uban kanila, ug nagbansay kanila diha sa pagministeryo sa kanataran.

Ang ubang kayutaan may mga napulo lamang ka magmamantala sa Gingharian (ug, sa daghang higayon, mas ubos pa) sa wala pa moabot ang mga misyonaryo nga graduwado sa Tunghaan sa Gilead. Apil niini mao ang Colombia, Guatemala, Haiti, Puerto Rico, Venezuela, Burundi, Ivory Coast (karon Côte d’Ivoire), Kenya, Mauritius, Senegal, Habagatan-Kasadpang Aprika (karon Namibia), Ceylon (karon Sri Lanka), Tsina, ug Singapore, uban sa daghang kaislahan. Ang mga misyonaryo naghatag ug masibotong panig-ingnan diha sa ministeryo, mitabang sa lokal nga mga Saksi sa pagpauswag sa ilang mga katakos, nag-organisar sa mga kongregasyon, ug mitabang sa mga igsoon aron mahimong kuwalipikado sa pagpanguna. Sa daghang higayon sila usab nagbukas sa pagwaling buluhaton sa mga dapit nga wala pa matandog kaniadto.

Pinaagi niining tabanga ang gidaghanon sa mga Saksi mitubo. Sa kadaghanan niining mga nasora, karon dihay linibo na ka aktibong mga Saksi ni Jehova. Sa pila niana, dihay tinagpulo ka libo, o gani kapin pa sa usa ka gatos ka libo, nga mga magdadayeg ni Jehova.

Ang Pila ka Tawo Gusto Gayod nga Maminaw

Sa pila ka dapit nakaplagan sa mga misyonaryo nga daghang tawo ang andam ug gusto gayod nga makakat-on. Sa dihang si Ted ug Doris Klein, mga graduwado sa unang saring sa Gilead, miabot sa Virgin Islands niadtong 1947, dihay daghan kaayong tawo ang gustong motuon sa Bibliya nga sagad matapos nila ang ilang adlaw sa pag-alagad sa tungang gabii. Alang sa unang publikong pakigpulong nga gihatag ni Brader Klein sa Market Square of Charlotte Amalie, dihay usa ka libo nga mitambong.

Si Joseph McGrath ug Cyril Charles gipadala sa teritoryo sa mga Amis sa Taiwan niadtong 1949. Sila nagpuyo sa mga balay nga pinawod ang mga atop ug ang salog yuta. Apan sila nangadto didto aron sa pagtabang sa mga tawo. Ang pipila ka nitibo nga Amis nakabaton ug literatura sa Watch Tower, nalipay sa ilang nabasahan, ug gipaambit ang  maayong balita sa uban. Karon didto ang mga misyonaryo aron tabangan sila nga mouswag sa espirituwal. Sila giingnan nga 600 ka tawo ang interesado sa kamatuoran, apan tanantanan 1,600 ang nanambong sa mga tigom nga ilang gihimo samtang sila mibalhin gikan sa balangay ngadto sa balangay. Kining mapaubsanong mga tawo maoy andam nga makakat-on, apan sila kulang sa tukmang kahibalo sa daghang mga butang. Sa kamapailobon ang mga igsoon misugod sa pagtudlo kanila, nga nagahisgot ug usa ka ulohan sa matag higayon, sa kasagaran nagagugol ug walo o kapin pang mga oras sa usa ka pangutanag-tubag nga panaghisgot sa usa ka ulohan sa matag balangay. Gitagana usab ang pagbansay sa 140 nga gustong mopakig-ambit sa pagpamatuod gikan sa balay ngadto sa balay. Makalipay gayod kadto nga kasinatian alang sa mga misyonaryo! Apan dako pa gihapon ang gikinahanglan aron ang espirituwal nga pag-uswag mahimong lig-on.

Mga 12 ka tuig sa ulahi, si Harvey ug Kathleen Logan, nabansay-sa-Gilead nga mga misyonaryo nga nakaalagad sa Hapon, giasayn sa paghatag ug dugang tabang sa mga igsoong Amis. Si Brader Logan migugol ug dakong panahon sa pagtabang kanila nga makasabot sa paninugdang doktrina sa Bibliya ug mga prinsipyo ingon man sa organisasyonal nga mga butang. Ikuyog ni Sister Logan sa pagsangyaw ang Amis nga mga sister kada adlaw, nga inigkahuman iyang paningkamotan nga itudlo kanila ang paninugdang mga kamatuoran sa Bibliya. Unya, niadtong 1963, gihikay sa Watch Tower Society nga ang mga delegado gikan sa 28 ka kayutaan makauban sa tigom sa lokal nga mga Saksi didto sa balangay sa Shou Feng, may kalabotan sa tibuok-kalibotan nga kombensiyon. Kining tanan misugod sa pagpahiluna ug lig-ong pundasyon alang sa dugang pag-uswag.

Niadtong 1948, duha ka misyonaryo, si Harry Arnott ug Ian Fergusson, miabot sa Amihanang Rhodesia (karon Zambia). Diha nay 252 ka kongregasyon sa lumad nga Aprikanong mga Saksi niadtong tungora, apan karon ang pagtagad gipunting usab ngadto sa mga Uropanhon nga namalhin didto tungod sa mga trabaho sa pagminag-tumbaga. Ang sanong makalilipay. Daghang literatura ang napahimutang;  kadtong gidumalahan sa mga pagtuon sa Bibliya tulin nga miuswag. Niadtong tuiga adunay 61-porsientong pag-uswag sa gidaghanon sa mga Saksi nga aktibo diha sa ministeryo sa kanataran.

Sa daghang dapit kasagaran na alang sa mga misyonaryo nga ilista ang nagahulat nga mga tawo nga gustong magtuon sa Bibliya. Usahay ang mga paryente, mga silingan, ug ubang mga higala presente usab sa dihang gidumala ang mga pagtuon. Gani bisan wala pay personal nga pagtuon sa Bibliya ang mga tawo, lagmit regular na sila nga nagatambong sa Kingdom Hall.

Hinuon, sa ubang kayutaan, bisan pag hilabihang paningkamot ang gihimo sa mga misyonaryo, ang pagpangani limitado kaayo. Ingon ka sayo sa 1953, ang mga misyonaryo sa Watch Tower gipadala sa Sidlakang Pakistan (karon Bangladesh), diin ang populasyon, nga karon kapin na sa 115,000,000, sa kasagaran maoy Muslim ug Hindu. Hilabihang paningkamot ang gihimo aron tabangan ang mga tawo. Bisan pa, sa tuig 1992, dihay 42 lamang ka magsisimba ni Jehova nianang yutaa. Hinuon, sa mga mata sa mga misyonaryo nga nag-alagad sa maong mga dapit, ang matag usa nga midawat sa matuod nga pagsimba maoy bililhon gayod​—tungod kay sila talagsa ra kaayo.

Mahigugmaong Tabang sa Isigka-Saksi

Ang pangunang buluhaton sa mga misyonaryo mao ang pag-ebanghelyo, ang pagwali sa maayong balita sa Gingharian sa Diyos. Apan samtang sila sa personal nagbuhat niining maong kalihokana, sila usab nakatabang ug dako sa lokal nga mga Saksi. Ang mga misyonaryo midapit kanila nga mokuyog diha sa ministeryo sa kanataran ug nakapakig-ambit kanila sa mga sugyot kon unsaon sa pag-atubang ang lisod nga mga kahimtang. Pinaagi sa pagpaniid sa mga misyonaryo, ang lokal nga mga Saksi sa kasagaran nakakat-on kon unsaon pagtuman ang ilang ministeryo diha sa mas organisadong paagi ug kon unsaon nga mahimong mas epektibong mga magtutudlo. Sa baylo, ang mga misyonaryo natabangan sa lokal nga mga Saksi sa pagpasibo sa lokal nga mga kustombre.

Sa iyang pag-abot sa Portugal niadtong 1948, si John Cooke naghimog mga lakang sa pag-organisar sa sistematikong balay-sa-balay nga buluhaton. Bisan pag sila may kaandam, daghan sa lokal nga mga Saksi nagkinahanglan ug pagbansay. Sa ulahi siya miingon: “Dili gayod nako makalimtan ang una nakong pagsangyaw nga kauban ang mga igsoong babaye sa Almada. Oo, unom sila nga miadto sa usa ka balay. Hunahunaa lang ang grupo sa unom ka babaye nga naglibot sa pultahan samtang ang usa kanila nagsermon! Apan sa inanay naugmad ang mga butang ug miuswag.”

Ang maisogong panig-ingnan sa mga misyonaryo nakatabang sa mga Saksi diha sa Leeward Islands nga magmaisogon, nga dili mahadlok sa mga magsusupak nga misulay sa pagbalda sa buluhaton. Ang pagtuo nga gipakita sa usa ka misyonaryo nakatabang sa mga igsoon sa Espanya sa pagsugod sa balay-sa-balay nga ministeryo, bisan pa sa Pasistang Katoliko nga diktadora nga ilalom niana sila nagkinabuhi niadtong panahona. Ang mga misyonaryong nagaalagad sa Hapon human sa Gubat sa Kalibotan II naghatag ug pananglitan sa pagkamataktikanhon​—nga dili balikbalikon ang kapakyasan sa nasodnong relihiyon, human isalikway sa Hapones nga emperador ang iyang pagkadiyos, apan hinuon nagapahayag sa madanihong ebidensiya alang sa pagtuo sa Maglalalang.

 Ang lokal nga mga Saksi naniid sa mga misyonaryo ug sa subsob dulot nga naapektohan sa mga paagi nga lagmit wala maamgohi sa mga misyonaryo niadtong panahona. Sa Trinidad, ang mga panghitabo nga nagpasundayag sa kamapaubsanon sa mga misyonaryo, ang ilang kaandam sa pagsagubang sa lisod nga mga kahimtang, ug ang ilang kakugi sa pag-alagad kang Jehova walay sapayan sa mainit nga klima gihisgotan gihapon sa daghang tuig sa ulahi. Ang mga Saksi sa Korea dulot nga nakadayeg sa nagasakripisyo-sa-kaugalingon nga espiritu sa mga misyonaryo nga sa napulo ka tuig wala mobiya sa nasod aron duawon ang ilang mga pamilya tungod kay ang kagamhanan dili mohatag ug mga permiso sa pagsulod-pag-usab gawas sa pipila ka dinaliang “makitawhanong” mga kaso.

Sa panahon ug human sa ilang unang pagtuon sa Gilead, kadaghanan sa mga misyonaryo nakakita sa duol kon unsa ang palakaw sa hedkuwarter sa makitang organisasyon ni Jehova. Kasagaran daghan silag kahigayonan nga makapakig-uban sa mga membro sa Nagamandong Lawas. Sa ulahi, sa ilang misyonaryong mga asaynment, ilang napaambit ngadto sa lokal nga mga Saksi ug bag-o pa nainteres nga mga tawo ang mga impormasyon nga sila mismo ang nakakita kon bahin sa paglihok sa organisasyon ingon man sa ila mismong apresasyon niana. Ang kalalom sa apresasyon nga ilang gipaambit mahitungod sa teokratikanhong palakaw sa organisasyon sa subsob usa ka importanteng hinungdan sa nasinatiang pag-uswag.

Sa daghang dapit nga gipadalhan sa mga misyonaryo, walay mga tigom sa kongregasyon sa ilang pag-abot. Busa ilang gihimo ang gikinahanglang mga kahikayan, gidumala ang mga tigom, ug gihatag ang kadaghanan sa mga bahin sa tigom hangtod ang uban mahimong kuwalipikado sa pagpakig-ambit sa maong mga pribilehiyo. Padayon silang nagabansay sa ubang mga igsoon aron nga sila mahimong kuwalipikado nga mopuli sa responsabilidad. (2 Tim. 2:2) Ang unang tigomanan sa kasagaran mao ang balay misyonaryo. Sa ulahi, ang mga kahikayan gihimo alang sa mga Kingdom Hall.

Diin may mga kongregasyon na, ang mga misyonaryo mitabang sa paghimo sa mga tigom nga mas makaiikag ug matulon-anon. Ang ilang maayong-pagkaandam nga mga komento giapresyar ug sa wala madugay nahimong hularan nga gisulayan sa uban sa pagsundog. Nga nagagamit sa ilang natun-an sa Gilead, ang mga igsoon naghatag ug maayong panig-ingnan sa paghatag ug pakigpulong publiko ug sa pagpanudlo, ug sila malipayong migugol ug panahon uban sa lokal nga mga igsoon aron tabangan sila nga makat-onan ang arte. Sa kayutaan diin ang mga tawo naanad nga magpasayon ug dili mabinantayon sa pagkauntop sa panahon, ang mga misyonaryo mapailobon usab nga mitabang kanila sa pag-apresyar sa bili sa pagsugod sa mga tigom sa untop nga panahon ug midasig sa tanan nga mangabot didto sa panahon.

Ang mga kahimtang nga ilang nakaplagan sa pila ka dapit nagpaila nga nagkinahanglan ug tabang aron mapalig-on  ang apresasyon sa kahinungdanon sa pagsunod sa matarong nga mga sukdanan ni Jehova. Sa Botswana, pananglitan, ilang nadiskobrehan nga ang pila ka sister nagbutang gihapon ug mga tanod o lubitos sa ilang mga masuso ingong panalipod batok sa kadaot, nga wala makasabot sa bug-os nga kanang kustombreha naggikan sa patuotuo ug pamarang. Sa Portugal ilang nakaplagan ang mga kahimtang nga nagapahinabog pagkabahinbahin. Uban sa pailob, mahigugmaong tabang, ug kalig-on kong kinahanglan, nadayag ang napauswag nga espirituwal nga kahimsog.

Ang mga misyonaryong naasayn sa mga posisyon sa pagtan-aw sa Pinlandia migugol ug dakong panahon ug paningkamot sa pagbansay sa lokal nga mga brader sa pagpangatarongan mahitungod sa mga suliran diha sa lamdag sa mga prinsipyo sa Bibliya ug sa ingon makahimog desisyon nga uyon sa kaugalingong panghunahuna sa Diyos. Sa Argentina sila usab mitabang sa mga igsoon nga makat-onan ang bili sa usa ka eskedyul, kon unsaon sa paghupot ug mga rekord, ang kahinungdanon sa mga payl. Sa Alemanya ilang gitabangan ang maunongong mga igsoon nga sa pila ka bahin morag estrikto ra sa ilang mga panglantaw, ingong gisangpotan sa ilang pakigbugno alang sa kaluwasan sa mga kampo konsentrasyon, aron nga sa mas bug-os makasundog sa kalulot ni Jesu-Kristo samtang sila nagbantay sa panon sa Diyos.​—Mat. 11:​28-30; Buh. 20:28.

Ang buluhaton sa pila ka misyonaryo naglakip sa pagpakiglabot sa opisyales sa kagamhanan, sa pagtubag sa ilang mga pangutana, ug sa pag-aplay alang sa legal nga pag-ila sa buluhaton sa mga Saksi ni Jehova. Pananglitan, latas sa yugto nga hapit upat ka tuig, si Brader Joly, nga naasayn sa Cameroon uban sa iyang asawa, naningkamot ug makadaghan sa pagkuhag legal nga pag-ila. Siya subsob nga nakigsulti sa Pranses ug Aprikanong opisyales. Sa kataposan, human sa pagkausab sa kagamhanan, ang legal nga pag-ila gihatag. Nianang panahona ang mga Saksi aktibo na sa Cameroon sulod sa 27 ka tuig ug mikabat nag kapin sa 6,000.

Pag-atubang sa mga Hagit sa Nagapanawng Pag-alagad

Ang pila ka misyonaryo naasayn sa pag-alagad ingong nagapanawng mga magtatan-aw. Dihay linaing panginahanglan sa Australia, diin ang pila ka paningkamot sa mga igsoon maoy dili maalamon nga napasimang gikan sa intereses sa Gingharian ngadto sa sekular nga mga pangagpas sa panahon sa Gubat sa Kalibotan II. Sa hustong panahon, kini natul-id, ug sa pagduaw ni Brader Knorr niadtong 1947, gipasiugda ang kahinungdanon sa pag-una sa buluhatong pagwali sa Gingharian. Human niadto, ang kadasig, maayong panig-ingnan, ug mga paagi sa pagpanudlo sa mga graduwado sa Gilead nga mialagad ingong mga magtatan-aw sa sirkito ug distrito nakatabang pag dugang sa pag-ugmad sa usa ka tinuod espirituwal nga atmospera taliwala sa mga Saksi didto.

Ang pagpakig-ambit sa maong nagapanawng pag-alagad sa subsob nagkinahanglan ug kaandam sa paggugol ug dakong paningkamot ug pag-atubang sa kapeligrohan. Si Wallace Liverance nakadiskobre nga ang paagi lamang sa pag-abot sa pamilya sa nahilit nga mga magmamantala sa Volcán, Bolivia, mao ang pagbaktas ug 90 kilometros paadto-pabalik latas sa batoon, umaw nga dapit sa nagalagiting adlaw sa gihabogong mga 3,400 metros, samtang nagadala sa iyang higdaanan nga bag, pagkaon, ug tubig, ingon man sa literatura. Aron sa pag-alagad sa mga kongregasyon  sa Pilipinas, si Neal Callaway subsob nga mosakay sa nagdasok nga mga bus sa kabanikanhan diin ang luna gigamit dili lang sa mga tawo apan usab sa mga hayop ug mga produkto. Si Richard Cotterill nagsugod sa iyang buluhaton ingong nagapanawng magtatan-aw sa India sa panahon nga linibong mga tawo ang gipamatay tungod sa relihiyosong pagdumot. Sa dihang siya gieskedyul sa pag-alagad sa mga igsoon sa gubot nga dapit, ang eskribiyente sa lukatanan ug tiket sa tren misulay sa pagmaymay nga dili siya magpadayon. Kadto napamatud-ang usa ka makalilisang nga biyahe alang sa kadaghanang mga pasahero, apan si Brader Cotterill may halalom nga gugma alang sa iyang mga igsoon, walay sapayan kon diin sila nagpuyo o kon unsang pinulongan ang ilang ginasulti. Uban sa pagsalig kang Jehova, siya nangatarongan: “Kon kabubut-on ni Jehova, sulayan nako nga makaabot didto.”​—Sant. 4:15.

Pagdasig sa Uban sa Pagpakig-ambit sa Bug-os-Panahong Pag-alagad

Ingong resulta sa masibotong espiritu nga gipasundayag sa mga misyonaryo, ang daghan nga ilang gitudloan misundog sa ilang panig-ingnan pinaagi sa pagsulod sa bug-os panahong pag-alagad. Sa Hapon, diin 168 ka misyonaryo ang nakaalagad, dihay 75,956 ka payunir niadtong 1992; kapin sa 40 porsiento sa mga magmamantala sa Hapon ang anaa sa pila ka matang sa bug-os-panahong pag-alagad. Sa Republika sa Korea, ang proporsiyon maoy susama.

Gikan sa kayutaan diin ang proporsiyon sa mga Saksi ngadto sa populasyon morag paborable, daghang bug-os-panahong ministro ang gidapit nga pagabansayon sa Tunghaan sa Gilead ug unya gipadala sa pag-alagad sa ubang mga dapit. Daghang misyonaryo ang naggikan sa Tinipong Bansa ug Canada; mga 400 gikan sa Britanya; kapin sa 240 gikan sa Alemanya; kapin sa 150 gikan sa Australia; kapin  sa 100 gikan sa Sweden; ingong dugang sa ubay-ubayng gidaghanon gikan sa Denmark, Pinlandia, Hawaii, Netherlands, New Zealand, ug uban pa. Ang pila ka nasod nga natabangan mismo sa mga misyonaryo sa ulahi mitagana usab ug umaabot nga mga misyonaryo alang sa pag-alagad sa ubang kayutaan.

Pagtagana sa mga Panginahanglan sa Usa ka Nagauswag nga Organisasyon

Samtang ang organisasyon nagauswag, ang mga misyonaryo mismo nakadawat ug dugang mga responsabilidad. Ubay-ubay kanila nakaalagad ingong mga ansiano o ministeryal nga mga alagad sa mga kongregasyon nga ilang gitabangan sa pagpauswag. Sa daghang kayutaan sila ang unang mga magtatan-aw sa sirkito ug distrito. Samtang ang dugang pag-uswag nakahimong mas bentaha alang sa Sosyedad sa pagtukod ug bag-ong sangang mga buhatan, ubay-ubayng misyonaryo ang gisaligan sa responsabilidad may kalabotan sa pagpalakaw sa sanga. Sa pila ka kaso kadtong may maayong kahibalo sa pinulongan gihangyo sa pagtabang sa paghubad ug pagsuta sa literatura sa Bibliya.

Hinuon, sila sa linain mibati nga gigantihan sa dihang kadtong ilang gitun-an sa Pulong sa Diyos, o kadtong mga igsoon nga natabangan sa pagtubo diha sa espirituwal, nahimong kuwalipikado sa pagdawat sa maong mga kaakohan. Mao nga ang usa ka magtiayon sa Peru nalipay sa pagkakita sa pipila sa ilang gitun-an nga nag-alagad ingong espesyal nga mga payunir, nga nagatabang sa pagpalig-on sa bag-ong mga kongregasyon ug sa pagbukas ug bag-ong teritoryo. Gikan sa usa ka pagtuon nga gidumala sa usa ka misyonaryo uban sa usa ka pamilya sa Sri Lanka naggikan ang usa ka membro sa Komite sa Sanga alang nianang nasora. Daghang ubang misyonaryo ang may susamang mga kalipay.

Sila usab nakaatubang ug pagsupak.

Sa Atubangan sa Pagsupak

Giingnan ni Jesus ang iyang mga sumusunod nga sila pagalutoson, ingon nga siya gilutos. (Juan 15:20) Sanglit kay ang mga misyonaryo sa kasagaran gikan sa langyaw nga yuta, sa subsob sa dihang ang hilabihang paglutos mahitabo sa usa ka nasod, kana magkahulogan sa pagpalagpot.

Niadtong 1967, si Sona Haidostian ug ang iyang mga ginikanan gidakop sa Aleppo, Syria. Sila gibilanggo sulod sa lima ka bulan ug unya gipalagpot gikan sa nasod nga wala madala ang ilang mga kabtangan. Si Margarita Königer, gikan sa Alemanya, giasayn sa Madagascar; apan ang sunod-sunod nga mga pagpalagpot midala kaniya sa bag-ong mga asaynment, sa Kenya, Dahomey (Benin), ug Upper Volta (Burkina Faso). Si Domenick Piccone ug iyang asawa, si Elsa, gipalagpot gikan sa Espanya niadtong 1957 tungod sa ilang pagwali, unya gikan sa Portugal niadtong 1962, ug gikan sa Morocco niadtong 1969. Hinuon, sa matag nasod samtang nagatinguha sa pagpalangan sa mando sa pagpalagpot, maayo ang nalampos. Usa ka pamatuod ang nahatag sa opisyales. Sa Morocco, pananglitan, sila may kahigayonan sa pagsangyaw sa opisyales sa Sécurité Nationale, sa huwes sa Korte Suprema, sa hepe sa polis sa Tangier, ug sa mga hawas sa T.B. sa Tangier ug sa Rabat.

Ang pagpalagpot sa mga misyonaryo wala magtapos sa buluhaton sa mga Saksi ni Jehova, ingon sa pagdahom sa pila ka opisyales. Ang mga binhi sa kamatuoran nga napugas na padayon nga nagatubo. Pananglitan, upat ka misyonaryo ang nagtuman  sa ilang ministeryo sa pipila lamang ka bulan sa Burundi sa wala pa ang pinugos nga pagpahawa kanila sa kagamhanan niadtong 1964. Apan ang usa kanila padayon nga nakigsulatay sa usa ka interesadong tawo, nga misulat nga siya nagtuon sa Bibliya uban sa 26 ka tawo. Usa ka taga-Tanzania nga Saksi nga sa bag-o pa mibalhin ngadto sa Burundi nagmapuliki usab sa pagsangyaw. Sa inanay ang ilang gidaghanon mitubo hangtod ginatos kanila ang nakig-ambit sa mensahe sa Gingharian sa uban pa.

Bisag asa, una pa momando sa pagpalagpot, ang opisyales mogamit ug kapintasan aron sulayan ang tanan sa pagpasakop sa ilang mga mando. Sa Gbarnga, Liberia, niadtong 1963, ang mga sundalo nagtapok sa 400 ka lalaki, babaye, ug mga bata nga nagtambong sa usa ka Kristohanong kombensiyon didto. Ang mga sundalo nagparada kanila ngadto sa kampo militar, mihulga kanila, mikulata kanila, ug mimando sa tanan​—walay sapayan sa nasyonalidad o relihiyosong pagtuo​—sa pagsaludar sa Liberianhong bandera. Apil niadto sa grupo mao si Milton Henschel, gikan sa Tinipong Bansa. Dihay pila usab ka misyonaryo, apil si John Charuk gikan sa Canada. Usa sa mga graduwado sa Gilead mikompromiso, sama sa iyang nahimo sa unang higayon (bisan tuod wala niya kadto ipahibalo), ug kana sa walay duhaduha nakadaldal sa uban nga didto sa asembliya sa pagkompromiso. Nahimong dayag kon kinsa ang tinuod nga nahadlok sa Diyos ug kinsa ang nalit-agan sa kahadlok sa tawo. (Prov. 29:25) Sunod niini, ang kagamhanan mimando sa tanang misyonaryong Saksi gikan sa langyawng yuta sa pagbiya sa nasod, bisan tuod sa ulahi nianang samang tuiga usa ka ehekutibong mando gikan sa presidente ang nagtugot kanila sa pagbalik.

Kasagaran, ang aksiyon nga gihimo sa opisyales sa kagamhanan batok sa mga misyonaryo maoy resulta sa pagpit-os sa klero. Usahay ang pagpit-os gihimo sa malipotong paagi. Sa ubang mga panahon, ang tanan nahibalo kon kinsa ang tinuyong nagpukaw sa pagsupak. Si George Koivisto dili gayod makalimot sa iyang unang buntag sa pagministeryo sa kanataran sa Medellín, Colombia. Sa kalit mitungha ang nagasiyagit nga panon sa nagtunghang mga bata, nga nanglabayg bato ug mga inumol nga lapok. Ang tagbalay, nga wala gayod makakita kaniya kaniadto, nagpadayon kaniya sa balay ug nagtak-op sa kahoyng sira sa bintana, nga nagsigeg pangayog pasaylo alang sa panggawi sa magubtanong panon sa gawas. Sa dihang miabot ang polis, ang pipila mipasangil sa magtutudlo sa pagpagawas sa mga bata. Apan laing tingog ang milanog: “Dili kana! Ang pari kadto! Gianunsiyo niya sa trompa nga pagawason ang mga estudyante aron ‘batoon ang mga Protestante.’”

Ang diyosnong kaisog inubanan sa gugma alang sa karnero maoy gikinahanglan. Si Elfriede Löhr ug Ilse Unterdörfer giasayn sa walog sa Gastein  sa Austria. Sa mubong panahon, daghang literatura sa Bibliya ang napahimutang sa mga tawo nga gigutom sa espirituwal nga pagkaon. Apan unya ang klero misumbalik. Giaghat nila ang mga estudyante nga singgitan ang mga misyonaryo sa kadalanan ug modagan pag-una kanila aron pasidan-an ang mga tagbalay nga dili maminaw. Ang mga tawo nahadlok. Apan pinaagi sa mahigugmaong paglahutay, pipila ka maayong mga pagtuon ang nasugdan. Sa dihang ang usa ka Biblikanhong pakigpulong sa publiko ang gihikay, ang kura mibarog nga mahagiton diha mismo sa atubangan sa dapit tigomanan. Apan sa dihang ang mga misyonaryo nangadto sa dalan aron abiabihon ang mga tawo, ang kura nawala. Mitawag siyag polis ug unya mibalik, nga nagalaom sa pagbalda sa tigom. Apan ang iyang mga paningkamot napakyas. Sa ulahi usa ka maayong kongregasyon ang naporma didto.

Sa mga lungsod duol sa Ibarra, Ecuador, si Unn Raunholm ug Julia Parsons miatubang sa makadaghan sa dinasig-sa-pari nga magubtanong panon. Tungod kay ang pari nagpahinabog kasamok sa matag higayon nga ang mga misyonaryo mopakita sa San Antonio, ang mga sister nakahukom nga ibug-os ang pagtagad sa laing lungsod, nga gitawag Atuntaqui. Apan usa ka adlaw ang lokal nga polis didto maukyabong miawhag kang Sister Raunholm sa pagbiya dayon sa lungsod. “Ang pari nag-organisar ug demonstrasyon batok kaninyo, ug ako walay igong mga tawo sa pagpanalipod kaninyo,” pahayag niya. Tin-aw niyang nahinumdoman: “Ang panon migukod kanamo! Ang puti ug dalag nga bandera sa Batikano giwarawara sa atubangan sa pundok samtang ang pari nagsinggit ug mga eslogan sama sa ‘Mabuhi ang Katolikong Simbahan!’ ‘Pukanon ang mga Protestante!’ ‘Mabuhi ang pagkaulay sa Birhen!’ ‘Mabuhi ang pagkumpisal!’ Sa matag higayon, ang panon mopalanog sa mga eslogan nga pulong por pulong nga gisumay ang pari.” Niadtong tungora duha ka lalaki ang midapit sa mga Saksi ngadto sa lokal nga Buhatan sa Unyon sa mga Mamumuo alang sa kaluwasan. Didto ang mga misyonarya puliking nagsangyaw sa mausisaong mga tawo nga mingsulod aron sutaon kon unsay nagakahitabo. Ilang napahimutang ang tanan nilang literatura.

Mga Kursong Gidesinyo Aron sa Pagtagana sa Linaing mga Panginahanglan

Sa mga tuig sukad sa unang pagpadalag mga misyonaryo gikan sa Tunghaan sa Gilead, ang organisasyon sa mga Saksi ni Jehova nakasinatig pagtubo sa kahibulongang gikusgon. Niadtong 1943, sa dihang ang tunghaan gibuksan, dihay 129,070 lamang ka Saksi sa 54 ka kayutaan (apan 103 ka yuta sumala sa mga utlanan sa mapa sayo sa katuigan sa 1990). Sa tuig 1992, dihay 4,472,787 ka Saksi sa 229  ka nasod ug kaislahan sa tibuok kalibotan. Samtang nagakahitabo kining pagtubo, ang panginahanglan sa organisasyon nausab. Ang mga sangang buhatan nga kaniadto nag-atiman sa wala pay usa ka gatos ka Saksi nga nagtigom sa pipila ka kongregasyon ang karon nagadumala na sa kalihokan sa tinagpulo ka libong Saksi, ug daghan niining mga sanga ang nakakaplag nga kinahanglanon ang pag-imprintag literatura sa lokal aron sangkapan kadtong nakigbahin sa buluhatong pag-ebanghelyo.

Aron matagan-an ang nagakausab nga mga panginahanglan, 18 ka tuig human sa pagbukas sa Tunghaan sa Gilead, ang napulo-ka-bulan nga kurso sa pagbansay sa hedkuwarter sa kalibotan sa Sosyedad maoy gitagana ilabina sa mga igsoon nga nag-abaga sa bug-at nga lulan sa responsabilidad diha sa mga sangang buhatan sa Watch Tower Society. Ang pila kanila sa miagi nakatambong na sa lima-ka-bulan nga kurso sa misyonaryo sa Gilead; ang uban wala. Silang tanan makakuhag kaayohan gikan sa linaing pagbansay alang sa ilang buluhaton. Ang mga panaghisgot kon unsaon sa pagdumala sa nagkalainlaing mga kahimtang ug matagan-an ang organisasyonal nga mga panginahanglan nga kaharmoniya sa mga prinsipyo sa Bibliya may makapahiusang epekto. Ang ilang kurso naglakip sa bersikulo-por-bersikulo nga masusihong pagtuon sa tibuok Bibliya. Kana usab nagtagana ug repaso sa kasaysayan sa relihiyon; pagbansay sa mga detalye nga nalangkit sa pagpalakaw sa sangang buhatan, sa Balayng Bethel, ug imprintahanan; ug mga instruksiyon sa pagdumala sa ministeryo sa kanataran, pag-organisar sa bag-ong mga kongregasyon, ug pagbukas sa bag-ong mga natad. Kining mga kursoha (lakip ang pangataposan nga gipamub-an sa walo ka bulan) gidumala sa hedkuwarter sa kalibotan, sa Brooklyn, New York, sukad sa 1961 hangtod sa 1965. Daghan sa mga graduwado ang gipadalag balik sa mga nasod diin sila nagaalagad na; ang pipila giasayn sa ubang mga yuta diin sila makahimog bililhong mga tabang sa buluhaton.

Sa pagka Pebrero 1, 1976, usa ka bag-ong kahikayan ang gipatuman sa mga sangang buhatan sa Sosyedad aron sa pagpangandam alang sa dugang pagpalapad nga gidahom kaharmoniya sa tagna sa Bibliya. (Isa. 60:​8, 22) Inay sa pagbaton ug usa lamang ka magtatan-aw sa sanga, uban sa iyang luyoluyo, aron modumala sa matag sanga, ang Nagamandong Lawas nagtudlo ug tulo o kapin pa ka kuwalipikadong mga igsoon aron moalagad sa matag Komite sa Sanga. Sa mas dagkong mga sanga ang membro sa komite mahimong mokabat ug pito. Aron sa pagtagana ug pagbansay alang niining tanang mga igsoona, usa ka espesyal lima-ka-semana nga kurso sa Gilead sa Brooklyn, New York, ang gihikay. Napulog-upat ka saring nga gilangkoban sa mga membro sa Komite sa Sanga gikan sa tanang bahin sa yuta ang gihatagan niining espesyal nga pagbansay sa hedkuwarter sa kalibotan sukad sa hinapos sa 1977 hangtod sa 1980. Kadto maoy usa ka maayong kahigayonan aron hiusahon ug lunsayon ang mga pagpalakaw.

Ang Tunghaan sa Gilead padayon nga nagbansay niadtong may kasinatian na latas sa katuigan diha sa bug-os panahong ministeryo ug andam ug makaarang nga ipadala sa langyawng nasod, apan dugang pa ang magamit. Aron mapadali ang pagbansay, ang mga tunghaan gipalihok sa ubang mga nasod ingong ekstensiyon sa Gilead aron nga ang mga estudyante dili na kinahanglang motuon ug Ingles una pa mahimong kuwalipikado sa pagtambong. Niadtong 1980-81, ang Kultural nga Tunghaan sa Gilead sa Mexico mitaganag pagbansay alang sa nagasultig-Kinatsila nga mga estudyante nga mitabang sa pagtagana sa dinaliang panginahanglan alang  sa kuwalipikadong mga magbubuhat sa Sentral Amerika ug Amerika del Sur. Niadtong 1981-82, 1984, ug sa makausa pa niadtong 1992, ang mga saring sa Ekstensiyon nga Tunghaan sa Gilead gidumala usab sa Alemanya. Gikan didto ang mga graduwado gipadala sa Aprika, Sidlakang Uropa, Amerika del Sur, ug nagkadaiyang mga islang nasod. Dugang mga saring ang gihimo sa India niadtong 1983.

Samtang ang masibotong lokal nga mga Saksi miduyog sa mga misyonaryo sa pagpalapad sa pagpamatuod sa Gingharian, ang gidaghanon sa mga Saksi ni Jehova mitubo ug tulin, ug kini mitultol ngadto sa pagporma ug dugang mga kongregasyon. Tali sa 1980 ug 1987, ang gidaghanon sa mga kongregasyon sa tibuok kalibotan mitubo ug 27 porsiento, ngadto sa katibuk-ang 54,911. Sa pila ka dapit, bisan pag daghan ang nagatambong sa mga tigom ug nakigbahin diha sa ministeryo sa kanataran, ang kadaghanan sa mga igsoon bag-ohan pa. Dihay dinaliang panginahanglan alang sa eksperyensiyadong Kristohanong mga lalaki aron moalagad ingong espirituwal nga mga magbalantay ug mga magtutudlo, ingon man sa pagpanguna sa buluhatong pag-ebanghelyo. Aron makatabang sa pagtagana niining panginahanglana, niadtong 1987 ang Nagamandong Lawas nagpalihok sa Tunghaan sa Ministeryal nga Pagbansay ingong usa ka sanga sa programa mahitungod sa edukasyon sa Bibliya sa Tunghaang Gilead. Ang walo-ka-bulan nga kurso naglakip sa mabug-osong pagtuon sa Bibliya ingon man sa personal nga pagtagad sa espirituwal nga pag-uswag sa matag estudyante. Ang organisasyonal ug hudisyal nga mga butang, uban sa mga responsabilidad sa mga ansiano ug ministeryal nga mga alagad, gitagad, ug ang linaing pagbansay gitagana sa publikong pakigpulong. Nga wala magbalda sa regular nga mga saring alang sa pagbansay sa mga misyonaryo, kining tunghaana migamit sa ubang mga pasilidad, nga nagtigom sa nagkadaiyang mga yuta. Ang mga graduwado karon nagatagana na sa hinungdanong mga panginahanglan sa daghang nasod.

 Sa ingon ang napalapad nga pagbansay nga gitagana sa Watchtower Bible School of Gilead nakanunot sa nagakausab nga panginahanglan sa tuling nagatubo nga internasyonal nga organisasyon.

“Ania Ako! Ipadala Ako”

Ang espiritu nga gipakita sa mga misyonaryo maoy sama niadtong kang propetang Isaias. Sa dihang si Jehova nagpahibalo kaniya sa usa ka kahigayonan alang sa linaing pag-alagad, siya misanong: “Ania Ako! Ipadala Ako.” (Isa. 6:8) Kining espiritu sa kaandam nakadasig sa linibo sa batan-ong mga lalaki ug babaye aron biyaan ang naandang mga palibot ug mga paryente aron moalagad alang sa pagtuman sa kabubut-on sa Diyos bisag diin nga sila kinahanglanon.

Ang mga kahimtang sa pamilya nakadalag mga kausaban sa mga kinabuhi sa daghang misyonaryo. Ang ubay-ubayng may mga anak human mahimong mga misyonaryo nakaarang sa pagpabilin sa nasod nga ilang naasaynan, nga nagtrabaho sa gikinahanglang sekular nga trabaho ug nagabuhat uban sa mga kongregasyon. Ang pila, human sa mga tuig sa pag-alagad, kinahanglang mopauli sa ilang yutang-natawhan aron moatiman sa tigulang nga mga ginikanan, o alang sa ubang katarongan. Apan ilang giisip nga usa ka pribilehiyo nga makigbahin sa misyonaryong pag-alagad kutob sa ilang mahimo.

Ang uban nakaarang sa paghimo sa ilang misyonaryong pag-alagad nga ilang tibuok kinabuhing buluhaton. Sa pagbuhat niana, silang tanan kinahanglang mosagubang sa mahagitong mga kahimtang. Si Olaf Olson, nga nakapahimulos sa dugayng karera sa pagmisyonaryo sa Colombia, miadmiter: “Ang unang tuig mao ang kinalisdan.” Kana sa kinadak-an maoy tungod sa kakulang-sa-katakos sa pagpahayag nga husto sa iyang kaugalingon sa iyang bag-ong pinulongan. Siya midugang: “Kon nagsige pa akog hunahuna sa nasod nga akong gitalikdan, dili unta ako magmalipayon, apan ako nakahukom sa pagkinabuhi sa pisikal ug sa hunahuna sa Colombia, sa pakighigala sa mga igsoong lalaki ug babaye sa kamatuoran didto, sa pagpuliki sa akong kinabuhi sa ministeryo, ug sa wala madugay naanad ra ako sa akong asaynment.”

Ang ilang paglahutay diha sa ilang mga asaynment maoy dili tungod kay ilang nakaplagan ang ilang pisikal nga palibot nga maayo. Si Norman Barber, kinsa mialagad sa Burma (karon Myanmar) ug sa India, sukad sa 1947 hangtod sa iyang kamatayon niadtong 1986, mipahayag sa iyang kaugalingon niining paagiha: “Kon ang usa ka tawo nalipay nga gamiton ni Jehova, nan ang usa ka dapit maoy sama ra ka maayo sa uban. . . . Sa prangka nga pagkasulti, ang tropikonhong klima maoy dili maayong klima nga gusto nakong pagapuy-an. Ni ang paagi sa tropikonhong mga tawo sa pagkinabuhi maoy paagi nga sa personal akong pilion sa pagkinabuhi. Apan may labing importanteng mga butang nga pagatagdon kay sa maong ginagmayng mga butang. Ang pagtabang sa mga tawo nga sa pagkatinuod kabos sa espirituwal maoy usa ka pribilehiyo nga saylo sa tawhanong mga galamhan sa pagpahayag.”

Daghan pa ang may samang panglantaw, ug kining nagasakripisyo-sa-kaugalingon nga espiritu nakatabang ug dako sa katumanan sa tagna ni Jesus nga kining maayong balita sa Gingharian igawali sa tibuok pinuy-anang yuta, alang sa pagpamatuod sa tanang kanasoran, sa dili pa moabot ang kataposan.​—Mat. 24:14.

[Footnote]

[Blurb sa panid 523]

Gipasiugda ang kahinungdanon sa bug-os nga pagsalig kang Jehova ug pagkamaunongon kaniya

[Blurb sa panid 534]

Ang maayong katistis nakatabang!

[Blurb sa panid 539]

Pailob, mahigugmaong tabang, ug kalig-on kon kinahanglan

[Blurb sa panid 546]

‘Ang pagtabang sa mga tawo nga sa pagkatinuod kabos sa espirituwal maoy usa ka pribilehiyo nga saylo sa tawhanong mga galamhan sa pagpahayag’

[Kahon sa panid 533]

Mga Saring sa Gilead

1943-60: Ang tunghaan sa South Lansing, New York. Sa 35 ka saring, 3,639 ka estudyante gikan sa 95 ka kayutaan ang migraduwar, ang kadaghanan giasayn sa misyonaryong pag-alagad. Ang mga magtatan-aw sa sirkito ug distrito nga nagaalagad sa Tinipong Bansa gilakip usab sa mga saring.

1961-65: Ang tunghaan sa Brooklyn, New York. Sa lima ka saring, 514 ka estudyante ang migraduwar ug gipadala sa kayutaan diin ang Watch Tower Society may sangang mga buhatan; ang kadaghanan sa mga graduwado gisaligan sa administratibong mga asaynment. Upat niining mga saringa may 10-ka-bulang mga kurso; ang usa, 8-ka-bulang kurso.

1965-88: Ang tunghaan sa Brooklyn, New York. Sa 45 ka saring, nga ang matag usa may 20-ka-semanang kurso, laing 2,198 ka estudyante ang nabansay, kadaghanan niini alang sa misyonaryong pag-alagad.

1977-80: Ang tunghaan sa Brooklyn, New York. Lima-ka-semanang kurso sa Gilead alang sa mga membro sa Komite sa Sanga. Katorse ka saring ang gihimo

1980-81: Ang Kultural nga Tunghaan sa Gilead sa Mexico; 10-ka-semana nga kurso; tulo ka saring; 72 ka nagasultig-Kinatsila nga mga graduwado ang nag-andam sa pag-alagad sa Latin Amerika.

1981-82, 1984, 1992: Ang Ekstensiyon nga Tunghaan sa Gilead sa Alemanya; 10-ka-semanang kurso; upat ka saring; 98 ka nagasultig-Aleman nga mga estudyante gikan sa Uropanhong kayutaan.

1983: Mga saring sa India; 10-ka-semana nga kurso, gidumala sa Ingles; 3 ka grupo; 70 ka estudyante.

1987- : Ang Tunghaan sa Ministeryal nga Pagbansay, nga may 8-ka-semanang kurso, gihimo sa dagkong mga dapit sa lainlaing bahin sa kalibotan. Sa pagka 1992, ang mga graduwado nagaalagad na sa kapin sa 35 ka kayutaan sa gawas sa ilang nasod.

1988- : Ang tunghaan sa Wallkill, New York. Kaluhaan-ka-semanang kurso sa pagpangandam alang sa misyonaryong pag-alagad ang gidumala karon didto. May plano nga ang tunghaan ibalhin sa Watchtower Educational Center sa Patterson, New York, sa dihang kini makompleto.

[Kahon sa panid 538]

Internasyonal nga Grupo sa Estudyante

Ang mga estudyante nga nakatungha sa Tunghaang Gilead naghawas sa daghang nasyonalidad ug naggikan sa kapin sa 110 ka kayutaan.

Ang unang internasyonal nga grupo mao ang ikaunom nga saring, niadtong 1945-46.

Gihimo ang pag-aplay sa kagamhanan sa T.B. alang sa langyawng mga estudyante nga pasudlon ilalom sa dili-imigranteng mga termino sa visa pang-estudyante. Sa pagtubag, ang Buhatan sa Edukasyon sa T. B. miila sa Tunghaang Gilead ingong nagahatag ug edukasyon nga ikatandi sa propesyonal nga mga kolehiyo ug edukasyonal nga mga institusyon. Busa, sukad niadtong 1953, ang mga consul sa T. B. sa tibuok kalibotan naglakip sa Watchtower Bible School of Gilead sa ilang listahan sa inuyonang edukasyonal nga mga institusyon. Sa pagka Abril 30, 1954, kining tunghaana mabasa diha sa publikasyon nga nag-ulohang “Educational Institutions Approved by the Attorney General.”

[Mga hulagway sa panid 522]

Ang mga estudyante sa unang saring sa Tunghaang Gilead

[Hulagway sa panid 524]

Si Albert Schroeder nga nagahisgot sa mga dagway sa tabernakulo uban sa mga estudyante sa Gilead

[Hulagway sa panid 525]

Si Maxwell Friend nga nagatudlo sa ampiteatro sa Tunghaang Gilead

[Mga hulagway sa panid 526]

Ang mga graduwasyon sa Gilead maoy espirituwal nga mga highlight

. . . ang pipila didto sa dagkong mga kombensiyon (New York, 1950)

. . . ang pipila diha sa nataran sa tunghaan (diin si N. H. Knorr gipakita nga nagasulti sa atubangan sa librarya sa tunghaan, niadtong 1956)

[Mga hulagway sa panid 527]

Ang nataran sa Tunghaang Gilead sa South Lansing, New York, ingon sa panagway niini sa katuigang 1950

[Hulagway sa panid 528]

Si Hermon Woodard (wala) ug John Errichetti (tuo) nga nagaalagad sa Alaska

[Hulagway sa panid 529]

Si John Cutforth nga nagagamit ug mga hulagway sa pagtudlo sa Papua New Guinea

 [Hulagway sa panid 530]

Mga misyonaryo sa Irlandia, uban sa magtatan-aw sa distrito, niadtong 1950

[Hulagway sa panid 530]

Mga graduwado padulong sa ilang mga asaynment sa Oriente niadtong 1947

[Hulagway sa panid 530]

Pila ka misyonaryo ug kaubanan sa Hapon niadtong 1969

[Mga hulagway sa panid 530]

Mga misyonaryo sa Brazil niadtong 1956

. . . sa Uruguay niadtong 1954

. . . sa Italya niadtong 1950

[Hulagway sa panid 530]

Unang upat ka nabansay-sa-Gilead nga mga misyonaryo nga gipadala sa Jamaica

[Hulagway sa panid 530]

Unang balay sa misyonaryo sa Salisbury (karon Harare, Zimbabwe), niadtong 1950

[Hulagway sa panid 530]

Si Malcolm Vigo (Gilead, 1956-57) uban sa iyang asawang si Linda Louise; sila magkaubang nag-alagad sa Malawi, Kenya, ug Nigeria

[Hulagway sa panid 530]

Si Robert Tracy (wala) ug si Jesse Cantwell (tuo), uban sa ilang mga asawa​—mga misyonaryo sa nagapanawng buluhaton sa Colombia niadtong 1960

[Hulagway sa panid 532]

Saring sa pagtuon sa pinulongan sa misyonaryong balay sa Côte d’Ivoire

[Hulagway sa panid 535]

Si Ted ug Doris Klein, kinsa nakakaplag ug daghang tawo nga ikag nga maminaw sa kamatuoran sa Bibliya diha sa Virgin Islands sa T. B. niadtong 1947

[Hulagway sa panid 536]

Si Harvey Logan (tunga sa atubangan) kauban sa mga Saksing Amis sa atubangan sa Kingdom Hall, niadtong katuigan sa 1960

[Hulagway sa panid 540]

Si Victor White, nabansay-sa-Gilead nga magtatan-aw sa distrito, nga nagapakigpulong sa Pilipinas niadtong 1949

[Hulagway sa panid 542]

Si Margarita Königer, sa Burkina Faso, nga nagadumalag usa ka pagtuon sa Bibliya sa balay

[Hulagway sa panid 543]

Si Unn Raunholm, usa ka misyonarya sukad sa 1958, kinahanglang moatubang sa gipangunahan-sa-pari nga magubtanong panon sa Ecuador

[Mga hulagway sa panid 545]

Tunghaan sa Ministeryal nga Pagbansay

Unang saring, Coraopolis, Pa., T.B.A., niadtong 1987 (ibabaw)

Ikatulong saring sa Britanya, sa Manchester, niadtong 1991 (tuo)