Pagpublikar sa Ang Bantayanang Torre

Sa unang gula, niadtong Hulyo 1879, kini gitawag ug Zion’s Watch Tower and Herald of Christ’s Presence. Kining magasina, nga maoy tiglaban sa halad lukat ni Jesu-Kristo, gipublikar aron modalit ug espirituwal nga pagkaon alang sa panimalay sa pagtuo. Niadtong Enero 1, 1909, ang titulo gialisdan ug The Watch Tower and Herald of Christ’s Presence, aron nga sa mas tin-aw dad-on ang pagtagad ngadto sa katuyoan sa magasin. Sa pagka Enero 1, 1939, nga nagpasiugda pa sa kamatuoran nga si Kristo nagamando na gikan sa langit ingong Hari, ang titulo giusab nga mabasang The Watchtower and Herald of Christ’s Kingdom. Unya niadtong Marso 1, 1939, pinaagi sa pag-usab sa titulo ngadto sa Ang Bantayanang Torre Nagapahayag sa Gingharian ni Jehova, ang pagtagad gipunting ug labi pa ngadto kang Jehova ingong Unibersohanong Soberano, ang usa nga naghatag ug awtoridad sa pagmando sa iyang Anak.

Sa dihang unang gipublikar, ang Watch Tower maoy usa ka walo-ka-panid nga publikasyon, nga gipatik makausa sa usa ka bulan. Ang gidak-on gidugangan ngadto sa 16 ka panid niadtong 1891, ug nahimo kanang duha-ka-gula sa usa ka bulan nga magasin niadtong 1892. Ang 32-ka-panid nga porma gisagop sa daghang pinulongan niadtong 1950.

Ang paghubad sa Watch Tower ngadto sa ubang pinulongan sa hinayhinay gisugdan. Usa ka sampol nga isyu ang gipatik sa Sweko niadtong 1883 aron gamitong tract. Gikan sa 1886 hangtod 1889, ang gamayng-edisyon  sa magasin gipatik sa Aleman. Apan hangtod niadtong 1897 lang nga ang Watch Tower migula pag-usab sa Aleman ug padayong gipatik nga makanunayon. Sa pagka 1916 kana gipatik sa pito ka pinulongan​—Danes-Norwego, Ingles, Pinlandes, Pranses, Aleman, Polako, ug Sweko. Sa dihang ang pagwali sa maayong balita nikusog pa niadtong 1922, ang gidaghanon sa pinulongan nga gipatik ang magasin miuswag ngadto sa 16. Hinuon, sa pagka 1993 kini regular nga gigama diha sa 112 ka pinulongan​—kadtong gigamit sa dakong bahin sa populasyon sa yuta. Kini naglakip dili lamang sa mga pinulongang sama sa Ingles, Kinatsila, ug Hapones, nga minilyong kopya kada isyu ang giimprinta, apan usab sa Palauan, Tuvaluan, ug uban nga pipila lamang ka gatos ang giapod-apod.

Sulod sa daghang tuig Ang Bantayanang Torre giisip ingong usa ka magasin nga sa kinadak-an alang sa “gamayng panon” sa napahinungod nga mga Kristohanon. Ang sirkulasyon niana morag limitado; pagka 1916 45,000 lamang ka kopya ang giimprinta. Apan sa pagsugod sa 1935, ang balikbalik nga pagpasiugda gibutang sa pagdasig sa “mga Jonadab,” o sa “dakong panon,” nga magbaton ug magbasa sa regular sa Ang Bantayanang Torre. Niadtong 1939, sa dihang ang hapin sa magasin nagsugod sa pagpasiugda sa Gingharian, ang mga suskrisyon sa Ang Bantayanang Torre gitanyag ngadto sa publiko sulod sa usa ka upat-ka-bulang kampanya sa suskrisyon sa daghang nasod. Ingong sangpotanan, ang lista sa nagsuskriber miuswag ngadto sa 120,000. Sa misunod nga tuig Ang Bantayanang Torre sa regular gitanyag sa mga tawo diha sa kadalanan. Ang sirkulasyon midaghan dayon. Sayo sa 1993 ang giimprinta kada isyu sa tanang pinulongan maoy 16,400,000.