Kapitulo 26

Pagbuhat ug Literatura sa Bibliya Alang sa Ministeryo

ANG nasulat nga pulong nagdula ug hinungdanong papel sa matuod nga pagsimba. Gihatag ni Jehova ang Napulo ka Sugo sa Israel, sa sinugdan sa binaba ug unya sa nasulat nga porma. (Ex. 20:​1-17; 31:18; Gal. 3:19) Aron maseguro nga ang iyang Pulong mapasa sa tukma, ang Diyos nagsugo kang Moises ug sa hataas nga linya sa mga propeta ug apostoles nga misunod kaniya nga kana isulat.​—Ex. 34:27; Jer. 30:2; Hab. 2:2; Pin. 1:11.

Kadaghanan niadtong sayo nga sinulat gihimo sa mga linukot. Hinuon, sa ikaduhang siglo K.P., ang codex, o librong may mga panid, maoy naugmad. Kini mas barato ug sayon nga gamiton. Ug ang mga Kristohanon ang nanguna sa paggamit niini, kay nasabtan nila ang bili niini sa pagpakaylap sa maayong balita mahitungod sa Mesiyanikong Gingharian sa Diyos. Si Propesor E. J. Goodspeed, diha sa iyang librong Christianity Goes to Press, nagpahayag labot niadtong unang mga Kristohanon ingong mga tigpublikar ug mga libro: “Dili lang kay minunot sila sa ilang mga panahon sa maong mga butang, sila abante pa bahin niana, ug ang mga tigpublikar sa misunod nga mga siglo nagsunod kanila.”​—1940, p. 78.

Busa, dili katingad-an nga ang mga Saksi ni Jehova karong adlawa, ingong mga magmamantala sa Gingharian sa Diyos, sa pipila ka paagi usa niadtong nanguna diha sa industriya sa pag-imprinta.

Pagtagana ug Literatura Alang sa Sayong mga Estudyante sa Bibliya

Ang usa sa unang mga artikulo nga gisulat ni C. T. Russell maoy napatik, niadtong 1876, diha sa Bible Examiner, nga giedit ni George Storrs sa Brooklyn, New York. Human makig-uban si Brader Russell kang N. H. Barbour sa Rochester, New York, si Russell ang migasto aron mapatik ang librong Three Worlds ug ang publikasyon nga nailhang Herald of the Morning. Siya nag-alagad ingong kaubang-editor nianang basahona ug, niadtong 1877, migamit sa mga pasilidad sa Herald aron mapatik ang pulyetong The Object and Manner of Our Lord’s Return. Si Brader Russell may mahait nga salabotan sa espirituwal nga mga butang ingon man sa pagdumala, apan si Barbour ang may kasinatian sa pagtipo ug pagkomposo.

Ugaling, sa dihang gisalikway ni Barbour ang nagahugas-sa-sala nga bili sa halad lukat ni Jesu-Kristo, si Brader Russell mibulag kaniya. Busa, niadtong 1879 sa dihang gisugdan ni Russell ang pagpublikar sa Zion’s Watch Tower and Herald of Christ’s Presence, siya misalig na lang sa komersiyal nga mga tig-imprinta.

 Sa misunod nga tuig ang una sa masangkarong serye sa mga tract nga gidesinyo sa pagdani sa mga tawo sa mga kamatuoran sa Bibliya giandam aron ipatik. Kining buluhatona midako dayon. Aron madumala kana, giporma ang Zion’s Watch Tower Tract Society niadtong Pebrero 16, 1881, uban ni W. H. Conley ingong presidente ug C. T. Russell ingong sekretaryo ug tesurero. Ang mga kahikayan gihimo na alang sa pagpaimprinta pinaagi sa komersiyal nga mga kompaniya sa lainlaing siyudad sa Pennsylvania, New York, ug Ohio, ingon man sa Britanya. Niadtong 1884, ang Zion’s Watch Tower Tract Society a legal nga giinkorporar, nga si C. T. Russell ang presidente, ug ang karta niini nagpakita nga kini dili lang usa ka sosyedad nga modumala sa pagpamatik. Ang tinuod nga katuyoan niini maoy relihiyoso; kini giaprobahan alang sa “pagpakaylap sa mga Kamatuoran sa Bibliya sa nagkalainlaing pinulongan.”

Pinaagi nianang kasibot nga ang tumong giagpas! Niadtong 1881, sulod sa yugto sa upat ka bulan, 1,200,000 ka tract nga mikabat ug 200,000,000 ka panid ang napatik. (Daghan niining mga “tract” sa pagkatinuod anaa sa porma nga gagmayng libro.) Human niadto, ang paghimog mga tract sa Bibliya nga iapod-apod ug libre misulbong sa tinagpulo ka milyon kada tuig. Kining mga tract giimprinta sa mga 30 ka pinulongan ug giapod-apod dili lang sa Amerika apan usab sa Uropa, Habagatang Aprika, Australia, ug ubang kayutaan.

Ang laing bahin sa buluhaton nabuksan niadtong 1886, sa dihang natapos ni Brader Russell sa pagsulat ang The Divine Plan of the Ages, ang una sa serye sa unom ka tomo nga personal niyang gisulat. May kalabotan sa pagpublikar sa unang upat ka tomo nianang seryeha (1886-97), ingon man sa mga tract ug sa Watch Tower gikan niadtong 1887 hangtod sa 1898, iyang gigamit ang Tower Publishing Company. b Sa ulahi, ang pagtipo ug pagkomposo gihimo na sa mga igsoon sa Bible House sa Pittsburgh. Aron makadaginot, nagpalit usab silag papel alang sa pag-imprinta. Bahin sa aktuwal nga pag-imprinta ug paghapin, si Brader Russell sa subsob mipidido sa kapin usa ka kompaniya. Nagplano siyag maayo, nga nagapidido ug abante kaayo aron makahangyo sa prisyo. Sukad sa panahon sa pagpublikar sa unang libro nga gisulat ni C. T. Russell hangtod sa 1916, ang katibuk-an nga 9,384,000 niadtong unom ka tomo ang nagama ug naapod-apod.

Ang pagpublikar sa literatura sa Bibliya wala mohunong sa pagkamatay ni  Brader Russell. Sa misunod nga tuig ang ikapitong tomo sa Studies in the Scriptures giimprinta. Kini giluwat sa pamilyang Bethel niadtong Hulyo 17, 1917. Kusog kaayo kini nga napahimutang nga sa kataposan niadtong tuiga, ang Sosyedad nakapididog 850,000 ka kopya sa Ingles sa komersiyal nga mga imprintahanan ug tighapin. Ang mga edisyon sa ubang pinulongan ginabuhat sa Uropa. Dugang pa, niadtong tuiga mga 38 ka milyong tract ang giimprinta.

Apan unya, sa panahon sa hilabihang paglutos niadtong 1918, samtang ang opisyales sa Sosyedad sa dili makataronganon gibilanggo, ang ilang hedkuwarter (nga nahimutang sa Brooklyn, New York) gibungkag. Ang mga plate alang sa pag-imprinta gidaot. Ang diyutay na lang nga kawani nagbalhin sa opisina balik sa Pittsburgh sa ikatulong andana sa usa ka tinukod sa 119 Federal Street. Kini ba makapahunong sa ilang pagpamuhat ug literatura sa Bibliya?

Angay ba Silang Mag-imprinta sa Kinaugalingon?

Tapos makagawas ang presidente sa Sosyedad, si J. F. Rutherford, ug ang iyang mga kauban gikan sa bilanggoan, ang mga Estudyante sa Bibliya nagtigom sa Cedar Point, Ohio, niadtong 1919. Ilang gihisgotan kon unsay gitugot sa Diyos nga mahitabo sa gisundang tuig ug kon unsay gipaila sa iyang Pulong nga angay nilang pagabuhaton sa umaabot nga mga adlaw. Gipahibalo nga usa ka bag-ong magasin, ang The Golden Age, igapublikar ingong instrumento nga magamit sa pagpunting sa mga tawo ngadto sa Gingharian sa Diyos ingong bugtong paglaom sa katawhan.

Sama sa gihimo niini sa miagi, gihikay sa Sosyedad nga usa ka komersiyal nga kompaniya ang moimprinta. Apan ang mga panahon nausab. Dihay mga suliran tali sa mga mamumuo ug sa mga tagdumala sa industriya sa pag-imprinta ug mga suliran sa negosyo sa papel. Gikinahanglan ang mas kasaligan nga kahikayan. Ang mga igsoon nag-ampo bahin niini ug naghulat sa mga pagtultol sa Ginoo.

Una sa tanan, asa nila ipahiluna ang mga buhatan sa Sosyedad? Angay ba nilang ibalik ang hedkuwarter sa Brooklyn? Ang hunta direktiba sa Sosyedad nagtimbangtimbang sa butang, ug usa ka komite ang gitudlo sa pagsusi sa kahimtang.

Gisugo ni Brader Rutherford si C. A. Wise, ang bise presidente sa Sosyedad, sa pag-adto sa Brooklyn aron susihon ang kalaoman nga mabuksan-pag-usab ang Bethel ug mangitag luna nga maabangan nga magamit sa Sosyedad sa pagsugod ug imprinta. Kay matinguhaon nga masayran ang kabubut-on sa Diyos, si Brader Rutherford miingon: “Lakaw ug sayra kon kabubut-on ba sa Ginoo nga kita mamalik sa Brooklyn.”

“Sa unsang paagi nako matino kon kana ba kabubut-on sa Ginoo nga kita mamalik o dili?” sukna ni Brader Wise.

“Niadtong 1918 kita napugos sa pagpahawa sa Brooklyn nga namalik sa Pittsburgh tungod kay walay mapalit nga karbon,” c tubag ni Brader Rutherford. “Himoon nato ang karbon ingong sulay. Lakaw ug pagpididog mga karbon.”

 “Pila ka tonelada sa imong hunahuna ang akong ipidido ingong sulay?”

“Nan, himoa kana nga dakong sulay,” ang sugyot ni Brader Rutherford. “Pagpididog 500 ka tonelada.”

Mao gayod kana ang gihimo ni Brader Wise. Ug unsa ang sangpotanan? Sa dihang miaplay siya sa mga awtoridad, siya gihatagan ug sertipiko aron makapalit ug 500 ka toneladang karbon​—igo na aron makatagana sa ilang mga panginahanglan sulod sa daghang tuig! Apan asa man nila kana ibutang? Ang dagkong mga seksiyon sa silong sa Balayng Bethel gihimong bodega sa karbon.

Ang sangpotanan niining pagsulaya giisip ingong dili-kaduhaduhaang pagpaila sa kabubut-on sa Diyos. Sa pagsugod sa Oktubre 1919, sila misugod sa pagpadayon pag-usab sa ilang kalihokan gikan sa Brooklyn.

Nan, angay bang magkinaugalingon sila sa pag-imprinta? Sila naningkamot nga makapalit ug rotary magazine press apan giingnan nga nihit kini sa Tinipong Bansa ug nga walay purohan nga makapalit ug usa sa daghang bulan. Bisan pa niini, sila masaligon nga kon kini kabubut-on sa Ginoo, siya makabukas sa dalan. Ug tinuod iyang gibuksan kana!

Pipila lang ka bulan human sa ilang pagbalik sa Brooklyn, sila milampos sa pagpalit ug usa ka rotary press. Walo ka bloke gikan sa Balayng Bethel, sa 35 Myrtle Avenue, ilang giabangan ang tulo ka andana sa usa ka tinukod. Sayo niadtong 1920 diha nay kaugalingong imprintahanan ang Sosyedad​—gamay, apan nasangkapan ug maayo. Ang mga igsoon nga may igong kasinatian sa pagpaandar sa makina miboluntaryo sa pagtabang sa buluhaton.

Ang Pebrero 1 nga isyu sa The Watch Tower niadtong tuiga giimprinta sa kaugalingong imprintahanan sa Sosyedad. Sa pagka Abril, ang The Golden Age gihimo na usab sa ilang kaugalingong imprintahanan. Sa kataposan sa tuig, nalipay ang The Watch Tower sa pagtaho: “Sa dakong bahin sa tuig ang tanang trabaho sa THE WATCH TOWER, THE GOLDEN AGE, ug daghan sa mga pulyeto, ginahimo na pinaagi sa nakonsagrar nga mga kamot, apan usa ra ang motibo nga nagatultol sa ilang mga lihok, ug kanang motibo maoy gugma alang sa Ginoo ug sa iyang kawsa sa pagkamatarong. . . . Sa dihang ang ubang mga basahon ug mga publikasyon napugos sa pag-undang tungod sa kanihit sa papel o mga kasamok sa pamuo, ang atong mga publikasyon nagpadayon nga walay suliran.”

Ang luna sa pabrika maoy limitado kaayo, apan ang gidaghanon sa trabaho nga nahimo kahibulongan. Ang regular nga giimprinta sa The Watch Tower maoy 60,000 ka kopya kada isyu. Apan ang The Golden Age giimprinta usab didto, ug sa unang tuig, ang Septiyembre 29 nga isyu maoy espesyal. Kini naundan sa detalyadong pagyagyag sa mga nagpaluyo sa paglutos sa mga Estudyante sa Bibliya sukad niadtong 1917 hangtod sa 1920. Upat ka milyong kopya ang giimprinta! Usa ka trabahante sa imprintahanan sa pabrika sa ulahi miingon: ‘Ang tanan sa Bethel mitabang gawas lang sa kusinero aron matapos kanang isyuha.’

Sa unang tuig sa ilang paggamit sa rotary magazine press , si Brader Rutherford nangutana sa mga igsoon kon makaimprinta ba usab sila ug mga pulyeto sa maong prensa. Sa sinugdan, morag dili kini mahimo. Ang mga tiggama sa prensa nag-ingon nga dili kini mahimo. Apan gisulayan sa mga igsoon ug may maayong  resulta. Sila usab nag-imbento sa ilang kaugalingong tigpilo ug sa ingon nagkunhod sa mga trabahante alang niining matang sa buluhaton gikan sa 12 ngadto sa 2. Unsay hinungdan sa ilang kalamposan? “Eksperyensiya ug ang panalangin sa Ginoo” maoy pagsumada sa tigdumala sa pabrika.

Hinuon, dili lang sa Brooklyn nga ang Sosyedad nagapundar ug imprintahanan. Ang pipila ka langyawng-pinulongan nga kalihokan gidumala gikan sa usa ka buhatan sa Michigan. Aron sa pagtagana sa mga panginahanglan nga nalangkit nianang buluhatona, niadtong 1921 ang Sosyedad nagmontar ug usa ka Linotype nga makina, mga prensa sa pag-imprinta, ug ubang gikinahanglan nga mga himan sa Detroit, Michigan. Didto ang literatura giimprinta sa Polako, Ruso, Ukrainiano, ug ubang pinulongan.

Sa maong tuig, ang Sosyedad nagluwat sa librong The Harp of God, nga gisulat sa paagi nga angayan alang sa mga bag-ohan nga nagtuon sa Bibliya. Hangtod niadtong 1921 ang Sosyedad wala pa makasulay sa pag-imprinta ug paghapin sa kaugalingon niining mga libro. Angay ba silang maningkamot usab sa pag-atiman niining bulohatona? Sa makausa pa, sila nagpaabot sa pagtultol sa Ginoo.

Dedikadong mga Igsoon Nag-imprinta ug Naghapin ug mga Libro

Niadtong 1920, ang The Watch Tower nagtaho nga daghang colporteur ang napugos sa paghunong sa maong pag-alagad tungod kay dili makaapas ang mga tig-imprinta ug mga tighapin ug libro sa mga gipidido sa Sosyedad. Ang mga igsoon sa hedkuwarter nangatarongan nga kon sila dili na magdepende sa komersiyal nga mga kompaniya uban sa mga kasamok sa pamuo niini, sila mahimong makalampos ug mas dakong pamatuod may kalabotan sa katuyoan sa Diyos alang sa katawhan. Kon sila makaimprinta ug makahapin sa ilang kaugalingong mga libro, malisdan usab ang mga magsusupak sa pagpanghilabot sa buluhaton. Ug ngadtongadto sila naglaom nga makadaginot sa gasto sa mga tomo ug busa makahimo nga mas dali kanang mabatonan sa publiko.

Apan kini magkinahanglan sa dugang luna ug kagamitan, ug kinahanglan nilang makakat-on ug bag-ong mga kahanas. Mahimo kaha nila kana? Si Robert J. Martin, ang magtatan-aw sa pabrika, nakahinumdom nga sa mga adlaw ni Moises, si Jehova ‘nagpuno kang Bezalel ug Oholiab sa kaalam sa paghimo sa tanang buluhaton’ nga gikinahanglan sa pagtukod sa balaang tabernakulo. (Ex. 35:​30-35) Kay naghunahuna nianang maong asoy sa Bibliya, si Brader Martin masaligon nga si Jehova mohimo usab sa bisan unsa nga gikinahanglan aron nga ang iyang mga alagad makapublikar sa literatura aron imantala ang Gingharian.

Human sa daghang pamalandong ug pag-ampo, ang tinong mga plano nag-anam sa pagpadayag. Sa pagtan-awg  balik sa nahitabo, si Brader Martin sa ulahi misulat kang Brader Rutherford: “Ang kinamaayohang adlaw sa tanan mao ang adlaw sa dihang gusto nimong mahibaloan kon dihay maayong katarongan nganong dili kita angayng mag-imprinta ug maghapin sa atong kaugalingong mga libro. Kadto maoy usa ka makapahinam nga ideya, tungod kay kini magakahulogan sa pagbukas sa kompletong pagtipo, electroplating, pag-imprinta, ug planta sa pagpanghapin, uban sa pagpaandar sa daghan kaayong wala nato maanding mga makina, nga kadaghanan mga makinang wala kitay kasayoran nga kana naglungtad, ug ang panginahanglan sa pagkat-on sa kapin sa usa ka dosenang kahanas. Apan daw mao kana ang kinamaayohang paagi aron masagubang ang liwas sa gubat nga mga galastohan sa pagbuhat ug mga libro.

“Imong giabangan ang unom-ka-andana nga tinukod sa 18 Concord Street (nga dihay mga nag-abang sa duha ka andana); ug niadtong Marso 1, 1922, kami namalhin didto. Gipalitan nimo kami ug usa ka kompletong kasangkapan sa pagtipo, electroplating, makinarya sa pag-imprinta ug paghapin, nga kadaghanan niini bag-o, ang pipila segunda-mano; ug kami misugod sa pagtrabaho.

“Usa sa dagkong kompaniya sa pag-imprinta nga nagabuhat sa kadaghanan sa atong trabaho nakadungog sa atong ginahimo ug ang presidente mianhi sa pagduaw kanamo. Iyang nakita ang bag-ong kagamitan ug masulob-ong miingon, ‘Kamo adunay primera-klaseng imprintahanan, ug walay mausa dinhi ang nahibalo sa pagpaandar niini. Sulod sa unom ka bulan ang tanang butang mangaguba ug mahimong walay-kapuslanan; ug inyong madiskobrehan nga ang mga tawo nga makahimo sa pag-imprinta alang kaninyo mao kadtong kanunay na nga nagbuhat niini, ug kadtong nagnegosyo sa pag-imprinta.’

“Kana morag tinuod paminawon, apan wala kana naglakip sa kamatuoran nga nagauban kanato ang Ginoo; ug siya kanunay gayod nga nagauban kanato. Sa dihang gisugdan ang paghapin iyang gipadala ang usa ka igsoon nga nakagugol sa iyang tibuok kinabuhi sa paghapin nga negosyo. Siya dako gayod ug nahimo sa panahon nga labaw siyang gikinahanglan. Uban sa iyang tabang, ug uban sa espiritu sa Ginoo nga nagalihok pinaagi sa kaigsoonan nga naningkamot sa pagkat-on, sa wala madugay kami nagahimo na ug mga libro.”

Sanglit kay may dakong luna sa pabrika sa Concord Street, ang mga pag-imprinta gikan sa Detroit giusa na lang didto sa Brooklyn. Sa ikaduhang tuig niining dapita, ang mga igsoon nagagama na sa 70 porsiento sa mga libro ug mga pulyeto nga gikinahanglan, gawas pa sa mga magasin, mga tract, ug mga handbill. Sa misunod nga tuig, ang pag-uswag sa buluhaton nagkinahanglan nga gamiton ang nanghibiling duha ka andana sa pabrika.

Mapadali ba nila ang ilang pagpamuhat ug libro? Dihay gipagama nilang prensa sa pag-imprinta sa Alemanya, gipadala sa Amerika, ug gigamit niadtong 1926 alang lamang sa maong tuyo. Kutob sa ilang nahibaloan, kana mao ang unang rotary press nga gigamit sa Amerika sa pag-imprinta ug mga libro.

Ugaling, ang palakaw sa pag-imprinta nga gitultolan sa mga Estudyante sa Bibliya dili lang sa Amerika.

 Unang mga Palakaw sa Pag-imprinta sa Ubang Kayutaan

Nga migamit sa komersiyal nga mga kompaniya, si Brader Russell nagpaimprinta sa Britanya ingon ka sayo sa 1881. Ginahimo na kini sa Alemanya sa pagka 1903, sa Gresya pagka 1906, sa Pinlandia pagka 1910, ug bisan sa Hapon pagka 1913. Sa mga tuig sunod sa unang gubat sa kalibotan, daghan kaayo sa maong pag-imprinta​—sa mga libro, pulyeto, magasin, ug tract​— ang gihimo sa Britanya, sa kayutaan sa Scandinavia, Alemanya, ug Polandia, ug ang pipila gihimo sa Brazil ug India.

Unya, niadtong 1920, ang samang tuig nga ang Sosyedad nagsugod sa kaugalingon niining pag-imprinta sa mga magasin sa Brooklyn, naghimog mga kahikayan alang sa atong mga igsoon sa Uropa aron sa paghimo usab sa pipila niining mga buluhatona. Usa ka grupo nila sa Switzerland ang nag-organisar ug usa ka imprintahanan sa Bern. Kini maoy ilang kaugalingong kompaniya. Apan silang tanan maoy maoy mga Estudyante sa Bibliya, ug sila naggamag literatura alang sa Sosyedad sa Uropanhong mga pinulongan sa ubos kaayong pasig-uli. Sa  ulahi, ang Sosyedad nakapanag-iya nianang planta sa pag-imprinta ug gipadako kana. Aron matagan-an ang dinaliang panginahanglan sa naglisod sa ekonomiya nga mga yuta sa Uropa niadtong panahona, daghan kaayong libreng literatura ang gigama didto. Sa hinapos sa katuigan sa 1920, ang mga publikasyon diha sa kapin sa usa ka dosenang pinulongan gipadala gikan niining pabrikaha.

Sa samang panahon, dakong interes sa mensahe sa Gingharian ang ginapakita sa Romania. Bisan pa sa grabeng pagsupak sa atong buluhaton didto, ang Sosyedad nagtukod ug planta sa pag-imprinta sa Cluj, aron makunhoran ang gasto sa literatura ug nga daling mabatonan kini sa gigutom-sa-kamatuoran nga katawhan sa Romania ug sa sikbit nga mga nasod. Niadtong 1924 kadtong maong imprintahanan nakagamag hapit un kuwarto sa usa ka milyon nga nahapinang mga libro, ingong dugang sa mga magasin ug mga pulyeto, sa Romaniano ug Hungariano. Apan usa nga nagatan-aw sa buluhaton didto ang napamatud-ang dili matinumanon sa gisalig kaniya ug naghimog mga lakang nga misangpot sa pagkawala sa propiedad ug kagamitan sa Sosyedad. Bisan pa niini, ang matinumanong mga igsoon sa Romania nagpadayon sa paghimo sa ilang maarangan aron ipakig-ambit ang kamatuoran sa Bibliya sa uban.

Sa Alemanya human sa Gubat sa Kalibotan I, daghang tawo ang nagapanon sa mga tigom sa mga Estudyante sa Bibliya. Apan ang mga Aleman nagaantos sa hilabihang kalisod sa ekonomiya. Aron mahuptang ubos ang gasto sa literatura sa Bibliya alang sa ilang kaayohan, ang Sosyedad nagmugna usab sa kaugalingong palakaw niini sa pag-imprinta didto. Sa Barmen, niadtong 1922, ang pag-imprinta gihimo sa flatbed press diha sa tugkaran sa hagdanan sa Balayng Bethel ug ang lain pa sa bodega. Sa misunod nga tuig ang mga igsoon namalhin sa Magdeburg sa mas maayong mga pasilidad. May maayong mga tinukod sila didto, daghan pa ang gidugang, ug giinstalar ang mga makinarya alang sa pag-imprinta ug paghapin ug libro. Sa kataposan sa 1925, gikataho nga ang kapasidad sa paggama niining plantaha mahimong sa labing menos ingon ka daghan niadtong nahimo sa hedkuwarter sa Brooklyn.

Ang kadaghanan sa pag-imprinta nga sa aktuwal gihimo sa mga igsoon gisugdan sa ginagmay. Mao kanay nahitabo sa Korea, diin niadtong 1922 ang Sosyedad nagbutang ug gamayng planta nga imprintahanan aron mogamag literatura sa Koreano ingon man sa Hapones ug Intsik. Human sa pipila ka tuig, ang makinarya gibalhin sa Hapon.

Sa pagka 1924 ang pag-imprinta sa ginagmayng mga basahon gihimo usab sa Canada ug sa Habagatang Aprika. Niadtong 1925 usa ka gamayng imprintahanan ang giinstalar sa Australia ug dihay usa pa sa Brazil. Ang mga igsoon sa Brazil sa wala madugay nagagamit na sa ilang makinarya sa pag-imprinta sa Portuges nga edisyon sa The Watch Tower. Ang sanga sa Sosyedad sa Inglaterra nakabaton sa iyang unang makinarya sa pag-imprinta niadtong 1926. Niadtong 1929  ang espirituwal nga kagutom sa mapaubsanong mga tawo sa Espanya gitagbaw sa publikasyong The Watch Tower sa usa ka gamayng imprintahanan didto. Duha ka tuig sa ulahi usa ka imprintahanan ang miandar sa silong sa sangang buhatan sa Pinlandia.

Sa kasamtangan, dihay pagpadako usab sa hedkuwarter sa tibuok kalibotan.

Kaugalingon Nilang Pabrika sa Hedkuwarter sa Kalibotan

Sukad niadtong 1920 ang Sosyedad nagaabang nag luna alang sa pabrika sa Brooklyn. Gani ang tinukod nga gigamit sukad niadtong 1922 dili na lig-on; ang tibuok tinukod nagatay-og inig-andar sa rotary press nga diha sa silong. Gawas pa, dugang luna ang gikinahanglan aron matagan-an ang nagauswag nga buluhaton. Ang mga igsoon nagtuo nga ang mabatonang salapi magamit pag maayo kon sila may kaugalingong pabrika.

May lote nga nahimutang sa pipila ka bloke gikan sa Balayng Bethel nga morag usa ka maayo kaayong lokasyon, busa mitanyag sila aron nga paliton kana. Ang gisangpotan, ang Squibb Pharmaceutical Corporation ang nakakuha niana; apan sa dihang nagtukod na sila sa maong yuta, gikinahanglan nilang motagsok ug 1,167 ka usok aron may lig-ong pundasyon. (Mga tuig sa ulahi, ang Watch Tower Society nakapalit niadtong maong mga tinukod gikan sa Squibb, nga may maayo nang mga pundasyon!) Hinuon, ang yuta nga gipalit sa Sosyedad niadtong 1926 may lig-ong yuta nga mahimong tukoran.

Niadtong Pebrero 1927 namalhin na sila ngadto sa ilang bag-ong tinukod sa 117 Adams Street sa Brooklyn. Kini naghatag kanilag halos doble sa luna nga ilang gigamit hangtod niadtong panahona. Maayo ang pagkadesinyo niini, nga ang trabaho modagan gikan sa ibabaw nga mga andana paubos agi sa nagkalainlaing departamento hangtod makaabot kini sa Departamento sa Shipping sa unang andana.

 Hinuon, ang pag-uswag wala pa matapos. Sulod sa napulo ka tuig kining pabrikaha kinahanglang padak-an; ug dihay daghan pang pagpadako sa ulahi. Dugang pa sa pag-imprinta sa minilyong kopya sa magasin ug pulyeto kada tuig, ang pabrika nagapatungha ug mga 10,000 ka nahapinang libro kada adlaw. Sa dihang ang kompletong mga Bibliya giapil na sa maong mga libro niadtong 1942, ang Watch Tower Society sa makausa pa nanguna sa bag-ong natad sa industriya sa pag-imprinta. Ang mga igsoon nag-eksperimento hangtod nakaarang sila sa paggamit ug nipis nga papel sa Bibliya sa mga rotary press​—usa ka butang nga ang ubang mga tig-imprinta wala mosulay hangtod sa mga tuig sa ulahi.

Samtang ang maong dinaghang produksiyon ginahimo, ang mga grupo nga may linaing panginahanglan wala kalimti. Ingon ka sayo sa 1910, usa ka Estudyante sa Bibliya sa Boston, Massachusetts, ug usa sa Canada ang nagtambayayong sa pagkopya sa literatura sa Sosyedad sa Braille. Pagka 1924, gikan sa usa ka buhatan sa Logansport, Indiana, ang Sosyedad nagahimo nag mga publikasyon alang sa kaayohan sa mga buta. Hinuon, tungod sa limitado kaayong sanong niadtong panahona, ang paggama sa Braille gihunong niadtong 1936, ug gipasiugda ang pagtabang sa mga buta pinaagi sa mga rekord sa ponograpo ingon man sa personal nga pagtagad. Sa ulahi, niadtong 1960, gisugdan pag-usab ang paggama ug literatura sa Braille​—niining panahona daghan nag kapilian, ug sa inanay dihay maayong pagsanong.

Pag-atubang sa Hagit sa Hilabihang Pagsupak

Sa ubay-ubayng kayutaan, ang pag-imprinta gihimo atubangan sa hilabihan ka lisod nga mga kahimtang. Apan ang atong mga igsoon milahutay, nga nakaapresyar nga ang pagmantala sa maayong balita sa Gingharian maoy usa ka buluhaton nga gisugo ni Jehova nga Diyos, pinaagi sa iyang Anak. (Isa. 61:​1, 2; Mar. 13:10) Sa Gresya, pananglitan, ang mga igsoon nagtukod sa ilang imprintahanan niadtong 1936 ug nagpaandar niana sulod lamang sa pipila ka bulan sa dihang may kausaban sa kagamhanan ug ang mga awtoridad nagsirado sa ilang planta. Sa susama, sa India, niadtong 1940, si Claude Goodman naningkamot sa daghang bulan aron makamontar ug usa ka prensa ug makakat-on sa pagpaandar niana, apan sa wala madugay ang mga polis nga gipadala sa maharaja nangabot, gihakot ang makinarya, ug giyabo ang maayong pagkapinig nga mga tipo sa usa ka dakong panudlanan.

Sa daghang ubang lokasyon, tungod sa mga balaod alang sa giimportar nga literatura gipakamaayo sa mga igsoon nga magpaimprinta sa lokal komersiyal nga imprintahanan, bisan pag ang Sosyedad may imprintahanan sa duol nga nasod nga nasangkapan sa paghimo sa buluhaton. Mao kanay nahitabo niadtong tungatunga sa katuigang 1930 sa mga dapit sama sa Denmark, Latvia, ug Hungaria.

Niadtong 1933 ang kagamhanan sa Alemanya, nga gisulsolan sa klero, nagpahunong sa pag-imprintang kalihokan sa mga Saksi ni Jehova sa Alemanya. Ang  polis miokupar sa pabrika sa Watch Tower Society sa Magdeburg ug nagsirado niana sa Abril niadtong tuiga, apan wala silay makit-ang tinuod nga ebidensiya, busa sila misibog. Bisan pa niana, nanghilabot sila pag-usab niadtong Hunyo. Aron makapadayon sa pagsabwag sa mensahe sa Gingharian, ang Sosyedad nagtukod ug imprintahanan sa Prague, Czechoslovakia, ug daghang makinarya ang gidala didto gikan sa Magdeburg. Pinaagi niini, ang mga magasin sa duha ka pinulongan ug mga pulyeto sa unom ka pinulongan gigama sulod sa misunod nga pipila ka tuig.

Unya, niadtong 1939, ang mga tropa ni Hitler misulong sa Prague, busa ang mga igsoon nagbungkag ug dali sa ilang makinarya ug gipadala kana sa gawas sa nasod. Ang pipila niana nakaabot sa Netherlands. Kining lihoka maoy atol kaayo. Ang komunikasyon sa Switzerland lisod na kaayo alang sa mga igsoong Olandes. Busa karon sila nag-abang ug luna ug, pinaagi sa ilang bag-ong nabatonan nga mga prensa, nag-imprinta sa ilang kaugalingon. Hinuon, kini nagpadayon sulod lamang sa mubong panahon sa wala pa iloga ang planta sa Nazi nga manunulong. Apan ang mga igsoon migamit nianang makinaryaha kutob sa mahimo.

Sa dihang ang maharihariong paglihok sa kagamhanan sa Pinlandia nagpugos sa pagpahunong sa publikasyon sa Ang Bantayanang Torre sa panahon sa gubat, ang mga igsoon didto nag-mimeograph sa pangunang mga artikulo ug nagpadala niini pinaagig tighatod. Human mailalom ang Austria sa pagdumala sa Nazi niadtong 1938, Ang Bantayanang Torre naimprinta pinaagi sa mimeograph machine nga kanunay lang ibalhinbalhin sa lainlaing dapit aron dili hisakpan sa Gestapo. Sa susama, sa Canada sa panahon nga ang mga Saksi ubos sa pagdili sa panahon sa gubat, kinahanglan nilang ibalhin ang ilang makinarya sa makadaghan aron makapadayon sa pagtaganag espirituwal nga pagkaon alang sa ilang mga igsoon.

Sa Australia sa panahon nga ang buluhaton sa mga Saksi ni Jehova gidili, ang mga igsoon nag-imprinta sa ilang kaugalingong magasin ug gani nag-imprinta ug naghapin ug mga libro​—usa ka butang nga wala nila mahimo didto bisan pa ubos sa mas paborableng mga kahimtang. Kinahanglan nilang ibalhin ang ilang makinarya sa paghapin ug 16 ka beses aron dili makompiskar, apan sila nakaarang sa paggama ug 20,000 ka gahig-hapin nga libro sa panahon sa pagluwat sa usa ka kombensiyon nga gihikay niadtong 1941 bisan pa sa daghang kababagan!

Pagpadako Human sa Gubat sa Kalibotan II

Human sa gubat, ang mga Saksi ni Jehova nagtigom sa internasyonal nga asembliya sa Cleveland, Ohio, niadtong 1946. Didto si Nathan H. Knorr, kanhi presidente sa Watch Tower Society, nagpakigpulong mahitungod sa pagpanukod  pag-usab ug sa pagpalapad. Sukad sa pagbuto sa Gubat sa Kalibotan II, ang gidaghanon sa mga Saksi mitubo ug 157 porsiento, ug ang mga misyonaryo tulin nga nagabukas sa buluhaton sa bag-ong mga natad. Sa pagtagana sa tibuok-yutang panginahanglan alang sa literatura sa Bibliya, si Brader Knorr naghimo ug mga plano sa pagpadako sa mga pasilidad sa hedkuwarter sa kalibotan. Ingong sangpotanan sa giplanong pagpadako, ang luna sa pabrika misobra pa sa doble kay sa orihinal nga tinukod niadtong 1927, ug usa ka gipadako pag-ayo nga Balayng Bethel ang igatagana alang sa mga boluntaryo. Kining mga pagdugang natapos ug gigamit niadtong 1950.

Ang pabrika ug mga pasilidad sa buhatan sa hedkuwarter sa kalibotan sa Brooklyn kinahanglang padak-an sa makadaghan sukad niadtong 1950. Sa pagka 1992 kini nag-okupar sa dapit nga tumbas sa mga walo ka bloke sa siyudad ug naglakip sa 230,071 metro-kwadrado nga luna sa salog. Kini dili lang mga tinukod sa paghimog mga libro. Kini gidedikar kang Jehova, aron gamiton sa paggama  ug literatura nga gidesinyo sa pag-edukar sa katawhan mahitungod sa iyang mga kinahanglanon alang sa kinabuhi.

Sa pipila ka dapit lisod ang pagsugod pag-usab sa mga palakaw sa pag-imprinta sa Sosyedad human sa ikaduhang gubat sa kalibotan. Ang mga tinukod sa pabrika ug buhatan nga gipanag-iya sa Sosyedad sa Magdeburg, Alemanya, nasulod sa sonang sakop sa Komunista. Ang Alemang mga Saksi namalik didto, apan sila nakagamit lang ug makadiyot ug kana gikompiskar pag-usab. Sa pagtagana sa panginahanglan sa Kasadpang Alemanya, usa ka imprintahanan ang kinahanglang tukoron didto. Ang mga siyudad nahimong kagun-oban ingong resulta sa pagpamomba. Hinuon, ang mga Saksi sa wala madugay nakagamit sa gamay nga imprintahanan nga gigamit kaniadto sa mga Nazi, sa Karlsruhe. Sa pagka 1948 diha nay duha nila ka flatbed press nga nagaandar sa adlaw ug gabii diha sa usa ka tinukod nga gipagamit kanila sa Wiesbaden. Sa misunod nga tuig ilang gipadak-an ang mga pasilidad sa Wiesbaden ug gihimog upat-ka-pilo ang gidaghanon sa mga  makinarya aron matagan-an ang mga panginahanglan sa tulin nga pag-uswag sa mga magmamantala sa Gingharian nianang dapita sa natad.

Sa dihang ang Sosyedad nag-imprinta pag-usab sa dayag sa Gresya niadtong 1946, ang abiyo sa koryente dili kasaligan. Usahay walay koryente sa daghang oras. Sa Nigeria niadtong 1977, ang mga igsoon nag-atubang sa susamang suliran. Hangtod nakapalit ang sanga sa Nigeria ug ilang kaugalingong generator, ang mga trabahante sa pabrika mamalik sa trabaho sa bisan unsang oras, sa adlaw o gabii, inigbalik sa koryente. Uban nianang espirituha, wala gayod sila makalaktaw ug usa ka isyu sa Ang Bantayanang Torre.

Human sa pagduaw ni Brader Knorr sa Habagatang Aprika niadtong 1948, may gipalit nga yuta sa Elandsfontein; ug sayo niadtong 1952, ang sanga gibalhin didto sa usa ka bag-ong pabrika didto​—ang unang aktuwal nga gitukod sa Sosyedad sa Habagatang Aprika. Ginamit ang usa ka bag-ong flatbed press, sila nag-imprinta sa mga magasin sa walo ka pinulongan nga gigamit sa Aprika. Niadtong 1954 ang sanga sa Sweden nasangkapan sa pag-imprinta sa mga magasin niini sa flatbed press, ingon man ang sanga sa Denmark niadtong 1957.

Samtang ang panginahanglan alang sa literatura nagatubo, ang kusog-kaayong mga rotary letterpress gitagana, una sa usa ka sanga ug unya sa lain. Ang Canada nakadawat sa iyang unang kusog-kaayong rotary press niadtong 1958; ang  Inglaterra, niadtong 1959. Sa pagka 1975 ang Watch Tower Society may 70 ka dagkong rotary press nga nagaandar sa iyang mga imprintahanan sa tibuok kalibotan.

Usa ka Tibuok-Yutang Organisasyon sa Pagpublikar sa Kamatuoran sa Bibliya

Sa ulahing bahin sa katuigan sa 1960 ug human niadto, usa ka nahiusang paningkamot ang gihimo aron malampos ang dugang pag-imprinta sa literatura gawas sa hedkuwarter sa Watch Tower Society. Kusog ang pagdaghan sa mga Saksi ni Jehova. Dugang luna sa pabrika ang gikinahanglan aron makatagana ug literatura sa Bibliya nga ilang magamit ug aron iapod-apod sa publiko. Apan ang pagpadako sa Brooklyn maoy usa ka hinay nga proseso tungod sa limitadong propiedad nga mapalit ingon man sa legal nga pasikotsikot. Gihimo ang mga plano aron himoon ang dugang pag-imprinta sa laing dapit.

Mao nga, niadtong 1969 gisugdan ang pagdesinyo sa usa ka bag-ong imprintahanan nga pagatukoron duol sa Wallkill, New York, mga 150 kilometros sa amihan-kasapdan sa Brooklyn. Kini motabang ug mopakatag sa mga pasilidad sa hedkuwarter, ug ngadtongadto halos ang tanang Bantayanang Torre ug Pagmata! nga mga magasin alang sa Tinipong Bansa nagagikan sa Wallkill. Tulo ka tuig sa ulahi ang ikaduhang pabrika sa Wallkill giplano na, kini mas dako kay sa una. Sa  pagka 1977 ang mga rotary letterpress didto naggama ug kapin sa 18 ka milyong magasin kada bulan. Sa pagka 1992, ang dagkong MAN-Roland ug Hantscho offset press (upat lamang ka offset press inay sa kanhi 15 ka letterpress) ang gigamit, ug ang kapasidad sa pag-imprinta maoy kapin sa usa ka milyong magasin kada adlaw.

Sa dihang ang mga plano alang sa pagpalakaw sa pag-imprinta sa Wallkill unang gihan-ay, Ang Bantayanang Torre gipublikar sa Brooklyn sa 32 sa kanhi 72 ka pinulongan niini; ang Pagmata! sa 14 sa 26 ka pinulongan niini. Mga 60 porsiento sa gidaghanon sa kopya sa naimprinta sa tibuok kalibotan ang gigama didto sa hedkuwarter sa tibuok kalibotan. Mahimong makaayo kon ang dugang niining buluhatona pagahimoon sa kayutaang gawas sa Tinipong Bansa ug pinaagi sa atong mga igsoon didto inay sa komersiyal nga mga kompaniya. Sa ingon, kon ang krisis sa kalibotan o ang pagpanghilabot sa kagamhanan sa mga Saksi ni Jehova sa umalabot makababag sa buluhaton sa bisan asang dapit sa yuta, ang gikinahanglang espirituwal nga pagkaon matagana lang gihapon.

Busa niadtong 1971, halos duha ka tuig una pa milihok ang pabrika sa Watch Tower sa Wallkill, gisugdan ang trabaho aron makataganag usa ka maayo bag-ong planta sa pag-imprinta sa Numazu, Hapon. Ang kapin sa lima-ka-pilong pagtubo sa mga magmamantala sa Gingharian sa Hapon sulod sa milabayng dekada nagpaila nga daghang literatura sa Bibliya ang gikinahanglan didto. Sa samang panahon, ang mga pasilidad sa sanga sa Brazil gipadak-an. Mao usab ang nahitabo sa Habagatang Aprika, diin ang literatura sa Bibliya gigama sa kapin sa duha ka dosenang Aprikanong pinulongan. Sa misunod nga tuig, 1972, ang mga pasilidad sa Sosyedad sa pagpublikar sa Australia gipadak-an ug upat-ka-pilo, uban sa panglantaw nga makatagana sa matag isyu sa Ang Bantayanang Torre ug Pagmata! nianang dapita sa kalibotan nga dili na malangan ang pagpadala. Dugang mga pabrika ang gitukod usab sa Pransiya ug sa Pilipinas.

Sayo niadtong 1972, si N. H. Knorr ug ang magtatan-aw sa pabrika sa Brooklyn, si M. H. Larson, milibot sa daghang nasod aron sutaon ang ginahimong buluhaton, aron organisahon ang mga butang alang sa kinamaayohang paggamit niining mga pasilidad ug sa pagpahiluna sa pasikaranan alang sa moabotay nga dugang pagpadako. Lakip sa ilang giduaw ang 16 ka nasod sa Amerika del Sur, Aprika, ug Halayong Sidlakan.

Wala madugay human niadto, ang sanga sa Hapon nagagama na sa Hapones nga mga magasin nga gikinahanglan alang sa maong dapit sa kanataran, inay nga mosalig sa komersiyal nga tig-imprinta. Nianang samang tuig, 1972, ang sanga sa Ghana nagsugod sa pag-imprinta sa Ang Bantayanang Torre sa tulo niana ka lokal nga pinulongan, inay nga magahulat nga padalhan gikan sa Tinipong Bansa ug Nigeria. Sunod, ang sanga sa Pilipinas nagsugod sa pagtagana alang sa komposisyon ug pag-imprinta sa Ang Bantayanang Torre ug Pagmata! sa walo ka lokal nga pinulongan (gawas sa pag-imprinta sa Ingles nga mga magasin nga gikinahanglan). Kini naghawas sa dugang dagkong lakang aron igahin sa ubang sanga ang buluhaton nga mga pagpalakaw sa pag-imprinta sa Watch Tower.

Sa pagkatapos sa 1975, ang Watch Tower Society nagapublikar na sa literatura sa Bibliya sa kaugalingon niining mga pasilidad sa 23 ka kayutaan nga nakatag  sa tibuok-yuta​—mga libro sa tulo ka nasod; mga pulyeto o mga magasin o kanang duha sa tanang 23 ka lokasyon. Sa 25 ka laing kayutaan, ang Sosyedad nagagama ug gagmayng mga publikasyon diha sa kaugalingon niining makinarya.

Ang kapasidad sa Sosyedad sa paggamag nahapinan nga mga libro gidugangan usab. Ang pipila ka paghapin gihimo sa Switzerland ug sa Alemanya ingon ka sayo sa tungatunga sa mga tuig 1920. Human sa Gubat sa Kalibotan II, niadtong 1948 ang mga igsoon sa Pinlandia nagsugod sa pagpanghapin sa mga libro (sa sinugdan, sa dakong bahin mano-mano) aron itagana ang pangunang panginahanglan nianang nasora. Duha ka tuig sa ulahi ang sanga sa Alemanya sa makausa pa nagdumalag himoanan ug hapin sa libro, ug sa lakaw sa panahon kana mipuli sa pagpanghapin nga gihimo sa Switzerland.

Unya, niadtong 1967, uban sa kapin usa ka milyong Saksi sa tibuok kalibotan ug uban sa pagpailaila sa de-bulsang mga libro aron gamiton sa ilang ministeryo, ang panginahanglan alang niining matanga sa literatura sa Bibliya misulbong. Sulod sa siyam ka tuig, dihay kapin sa unom-ka-pilo nga pagtubo sa paghapin nga seksiyon sa Brooklyn. Sa pagka 1992 ang Watch Tower Society may 28 ka seksiyon sa paghapin nga nagalihok sa walo ka lainlaing nasod.

Nianang samang tuig, 1992, dili lang kay ang Watch Tower Society nagaimprinta ug literatura sa Bibliya diha sa 180 ka pinulongan sa Tinipong Bansa apan upat sa kinadagkoang imprintahanan niini nga nahimutang sa Latin Amerika ang nagaabiyo sa kadaghanan sa literatura nga gikinahanglan sa sulod sa nasod ug sa ubang nasod nianang dapita sa kalibotan. Napulog-usa ka dugang pang imprintahanan ang nagagamag literatura sa Uropa, ug kining tanan nagatabang sa pagtagana sa mga panginahanglan sa literatura sa ubang kayutaan. Niini, ang Pransiya maoy regular nga nagaabiyo sa literatura sa 14 ka nasod, ug ang Alemanya, nga nagaimprinta sa kapin sa 40 ka pinulongan, nagapadala ug daghang literatura ngadto sa 20 ka nasod ug mas diyutay ngadto sa daghang ubang kayutaan. Sa Aprika, unom ka imprintahanan sa Watch Tower ang nagagamag literatura sa Bibliya sa katibuk-ang 46 ka pinulongan. Laing 11 ka imprintahanan​—ang pipila dagko, ang pipila gagmay​—ang nagaabiyog mga literatura sa Tungang Sidlakan ug sa Halayong Sidlakan, sa kaislahan sa Pasipiko, Canada, ug ubang mga dapit uban sa literaturang magamit sa dinaliang pagpakaylap sa mensahe mahitungod sa Gingharian sa Diyos. Sa lain pang 27 ka kayutaan, ang Sosyedad nagaimprinta sa ginagmayng publikasyon nga gikinahanglan sa mga kongregasyon aron makalihok ug maayo.

Bag-ong Pamaagi, Bag-ong Makinarya

Sa mga tuig 1960 ug 1970, dakong kausaban ang nahitabo sa industriya sa pag-imprinta. Sa katingad-ang gikusgon, ang letterpress gialisdan sa offset nga pag-imprinta. d Ang Watch Tower Society wala dayon migamit sa bag-ong mga pamaagi. Ang mga plate nga mabatonan alang sa mga offset press dili makalahutay sa dinaghang pag-imprinta nga gikinahanglan sa Sosyedad alang sa iyang literatura.  Dugang pa, kining matanga sa kausaban magkinahanglan ug bug-os bag-ong paagi sa pagtipo ug pagkomposo. Magkinahanglag bag-ong mga prensa. Gikinahanglan pang makat-onan ang bag-ong teknolohiya. Halos tanang makinarya sa pag-imprinta diha sa mga pabrika sa Sosyedad kinahanglang alisdan. Ang bili dako kaayo.

Ugaling, sa lakat sa panahon nadayag nga ang mga sangkap alang sa letterpress nga pag-imprinta dili na unya mapalit. Ang mga plate sa offset nagaanam ug lig-on. Kinahanglan nang himoon ang kausaban.

Ingon ka sayo sa 1972, kay naikag kaayo sila sa mga kaugmaran sa offset nga pag-imprinta, tulo ka membro sa pamilyang Bethel sa Habagatang Aprika mipalit sa usa ka segunda-manong sheetfed offset press. Dihay nakuhang pipila ka eksperyensiya gumikan sa pag-imprinta sa ginagmayng publikasyon pinaagi niini. Unya, niadtong 1974, kanang prensaha gigamit sa pag-imprinta sa Ang Kamatuoran nga Motultol sa Kinabuhing Dayon, usa ka de-bulsang libro, sa pinulongang Ronga. Ang paghimo nila niana sa madali nakapaposible nga madala ang bililhong instruksiyon sa Bibliya ngadto sa linibong gigutom-sa-kamatuoran nga mga tawo una pa gidili pag-usab ang buluhaton sa mga Saksi ni Jehova diha sa dapit nga gipuy-an niadtong mga tawhana. Usa pa ka sheetfed offset press, nga gihatag sa sanga sa Sosyedad sa Habagatang Aprika dili pa dugay human mapalit sa atong mga igsoon ang una, ang gipadala sa Zambia ug gigamit didto.

Ang pabrika sa Sosyedad sa Alemanya nakasugod usab ug sayo sa offset nga pag-imprinta. Niadtong Abril 1975 ang mga igsoon didto nagsugod sa paggamit sa usa ka sheetfed press aron mag-imprintag mga magasin sa papel nga pang-Bibliya alang sa mga Saksi ni Jehova sa Sidlakang Alemanya,  diin ang mga Saksi kaniadto nailalom sa pagdili. Sa misunod nga tuig, gisundan kini sa paggamag mga libro sa maong offset press alang niadtong gilutos nga mga igsoon.

Sa halos samang panahon, niadtong 1975, ang Watch Tower Society migamit sa unang web offset press niini alang sa mga magasin didto sa Argentina. Ugaling, kini nagamit lang ug kapin sa usa ka tuig, una pa gidili sa kagamhanan sa Argentina ang buluhaton sa mga Saksi ug gisirhan ang imprintahanan. Apan ang kalihokan nga nagagamit ug offset nga pag-imprinta sa ubang mga nasod padayong nag-uswag. Sayo niadtong 1978, sa planta sa hedkuwarter sa Watch Tower Society sa Brooklyn, New York, usa ka web offset press ang nagsugod sa paggama ug tulo-ka-kolor nga mga libro. e Ang ikaduhang prensa mao ang gipalit nianang samang tuiga. Apan, dugang pang mga makinarya ang gikinahanglan aron makompleto ang kausaban.

Ang Nagamandong Lawas masaligon nga si Jehova magahatag sa gikinahanglan aron malampos ang buluhaton nga iyang gustong matuman. Niadtong Abril 1979 ug Enero 1980, ang mga sulat gipadala ngadto sa mga kongregasyon sa Tinipong Bansa nga nagasaysay sa kahimtang. May gipadalang mga donasyon​—nga diyutay ra sa sinugdan, apan ngadtongadto may igo nang pondo aron masangkapan ang tibuok-yutang pasilidad sa mga pabrika sa Watch Tower alang sa offset nga pag-imprinta.

Sa kasamtangan, aron mapahimuslan pag-ayo ang nagalungtad nga mga makinarya ug aron mapadali ang kausaban, ang Watch Tower Society mikontrata nga ang kinabag-ohang modelo niining mga MAN press kombirtihon alang sa offset nga pag-imprinta. Dose ka nasod ang gipadalhan niining mga prensaha, lakip sa unom nga sa miagi wala makapatik sa ilang mga magasin sa lokal.

Upat-ka-Kolor nga Pag-imprinta

Ang sanga sa Pinlandia mao ang unang nakahimo sa offset nga pag-imprinta sa kada isyu sa mga magasin niini sa upat ka kolor, nga nagsugod sa yanong paagi uban sa mga isyu sa Enero 1981 ug unya sa progresibo nagagamit sa mas maayong paagi. Sunod, ang Hapon migamit sa upat-ka-kolor nga pag-imprinta alang sa nahapinang libro. Ang ubang imprintahanan sa Watch Tower nagsundog samtang ang makinarya mabatonan. Ang pipila ka prensa gipalit ug gipadala sa hedkuwarter sa kalibotan. Ang uban gigastohan sa mga Saksi ni Jehova diha sa nasod nga nahimutangan sa pabrika. Sa uban pang mga kaso, ang mga Saksi sa usa ka nasod naggasa sa gikinahanglang makinarya ngadto sa ilang mga igsoon sa laing yuta.

Sa panahon human sa Gubat sa Kalibotan II, ang kalibotan nawili sa mga naimprintang butang nga may hulagway, ug ang paggamit sa realistikong kolor nakatabang ug dako aron labi pang madanihon sa panan-aw ang mga publikasyon. Kining paggamit ug kolor nakahimo sa naimprintang panid nga dugang madanihon ug busa nakadasig sa pagbasa. Sa daghang dapit nakaplagan nga ang pag-apod-apod  sa Ang Bantayanang Torre ug Pagmata! miuswag ug dako tapos nga mapauswag ang panagway niini.

Pag-ugmad sa Nahaigong Sistema sa Kompiyuter

Sa pagpaluyo niini, usa ka kompiyuterisadong sistema sa pag-andam una sa pag-imprinta ang kinahanglang ugmaron; ug ang desisyon sa paghimo niini gihimo niadtong 1977. Ang mga Saksi nga mga eksperto diha sa natad nagboluntaryo sa pagtrabaho sa hedkuwarter sa kalibotan aron tabangan ang Sosyedad nga makab-ot sa madali kining panginahanglana. (Sa wala madugay human niini, niadtong 1979, usa ka tem sa Hapon nga sa kataposan gilangkoban sa mga 50 ka Saksi ang nagsugod sa pagtrabaho sa mga programa nga gikinahanglan alang sa pinulongang Hapones.) Ang mabatonang komersiyal nga hardware sa kompiyuter gigamit, ug ang mga programa maoy giandam sa mga Saksi aron makatabang sa pagtagana sa administratibo ug sa daghang-pinulongan nga mga panginahanglan sa Sosyedad sa pagpublikar. Aron mahuptan ang hataas nga mga sukdanan ug mabatonan ang gikinahanglang kamapailin-ilinon, kinahanglan nga magmugnag linaing mga programa alang sa typesetting ug photocomposition. Walay mapalit nga komersiyal nga mga programa alang sa pagtala ug pag-phototype sa daghan sa 167 ka pinulongan nga kaniadto ginaimprinta sa Watch Tower Society, busa ang mga Saksi kinahanglang magmugnag ilang kaugalingon.

Niadtong panahona ang komersiyal nga kalibotan dili makasapi diha sa mga pinulongan nga gigamit sa diyutayng populasyon o sa mga tawo nga gamayg kita, apan ang mga Saksi ni Jehova interesado sa mga kinabuhi. Sulod sa mubo ra kaayong panahon, ang mga typesetting program nga ilang naugmad maoy gigamit sa paggamag literatura sa kapin sa 90 ka pinulongan. Mahitungod sa ilang buluhaton ang tinamod nga Seybold Report on Publishing Systems nag-ingon: “Wala kitay laing mahimo kondili makadayeg sa panlimbasog, sa inisyatibo ug salabotan sa mga tawo sa Watchtower. Dihay pipila lamang karong adlawa nga mahimong ambisyoso ra o kaha maisogon ra sa pagsugod sa maong kapadapatan, ilabina nga sila pa ang unang naghimo niana nga wala nagasalig sa trabaho sa uban.”​—Tomo 12, Num. 1, Septiyembre 13, 1982.

Ang mga pagpalakaw sa pag-imprinta ug pagmintinar mapasayon ug dako kon ang makinarya nga gigamit sa tibuok kalibotan sa bug-os magkasama. Busa niadtong 1979 gihimo ang desisyon alang sa Watch Tower Society sa pagmugna sa kaugalingon niining sistema sa pag-phototypeset. Ang tem nga nagatrabaho niini maoy mohimo sa pangunang hardware, inay nga mosalig ug dako sa komersiyal nga makinarya.

Mao nga, niadtong 1979 usa ka grupo sa mga Saksi ni Jehova nga ang ilang sentro sa pagtrabaho sa Watchtower Farms, Wallkill, New York, ang nagdesinyo ug nagtukod sa Multilanguage Electronic Phototypesetting System (MEPS). Sa pagka Mayo 1986 ang tem nga nagatrabaho niining proyektoha wala lang nagdesinyo ug nagtukod sa MEPS nga mga kompiyuter, phototypesetter, ug mga graphics terminal apan, labing importante, sila usab nakamugna sa software nga gikinahanglan sa pagproseso sa materyal alang sa publikasyon sa 186 ka pinulongan.

 Gihiusa uban niining kaugmaran sa software mao ang palakaw sa usa ka dakong font-digitizing. Kini nagkinahanglan sa mabug-osong pagtuon sa talagsaong mga kinaiya sa kada pinulongan. Kinahanglang idibuho ang kada letra sa usa ka pinulongan (pananglitan, ang kada letra sa dagkong titik ug sa gagmayng titik, ingon man sa mga timaan sa paglitok niini ug pamunto​—ang tanan sa nagkalainlaing gidak-on), nga may separadong mga dibuho sa matag matang sa sulat (sama sa, nipis, pinahandag, baga, ug labihan ka baga), malagmit sa ubay-ubay nga talagsaong font, o estilo sa pagsulat. Ang kada Romanong estilo nagkinahanglan ug 202 ka letra. Busa, ang 369 ka romanong estilo nagkinahanglan ug 74,538 ka letra. Ang pag-andam sa Intsik nga estilo nanginahanglan ug pagdibuho sa 8,364 ka letra sa kada usa, nga mas daghan pang letra ang igadugang sa ulahi.

Human sa pagdibuho, ang software gidesinyo nga magpaposible nga maimprinta ang mga letra sa hinlo, tin-aw nga porma. Ang software kinahanglang makahimo dili lang sa Romanhong alpabeto apan usab sa Bengali, Cambodianhon, Cyrillic, Grego, Hindi, ug Koreano ingon man sa Arabe ug Hebreohanon (nga parehong basahon gikan sa tuo ngadto sa wala) ug sa Hapones ug Intsik (nga wala nagagamit ug mga alpabeto). Sa pagka 1992 ang software mabatonan na alang sa pagproseso ug materyal diha sa kapin sa 200 ka pinulongan, ug ang mga programa alang sa ubang pinulongan nga gigamit sa minilyong tawo ang sa gihapon ginamugna.

Ang pagpatuman sa kausaban diha sa mga sanga nanginahanglan nga sagopon ang bag-ong mga pamaagi ug makat-onan ang bag-ong mga kahanas. Ang mga trabahante gipadala sa hedkuwarter sa kalibotan aron makakat-on kon unsaon sa pag-instalar, pagpaandar, ug pagmintinar sa dagkong web offset press. Ang pipila gitudloan kon unsaon pag-kolor pinaagi sa laser scanner. Dugang mga trabahante ang gibansay sa paggamit ug pagmintinar sa mga kompiyuter. Busa, dihang may mobangon nga mga suliran sa pagpanggama sa bisag haing dapit sa kalibotan dali rang masulbad aron nga ang buluhaton makapadayon.

Ang Nagamandong Lawas nakasabot nga kon ang mga Saksi ni Jehova sa tibuok kalibotan makatuon sa samang materyal diha sa ilang mga tigom sa kada semana ug mag-apod-apod ug samang literatura diha sa ministeryo sa kanataran, kini makahatag ug kusganong epekto sa paghiusa. Sa miagi, ang literatura nga gipublikar sa Ingles sa kasagaran dili mabatonan sa ubang pinulongan hangtod sa  labing menos upat ka bulan sa ulahi; alang sa daghang pinulongan giabtag tuig, o sagad mga tuig, sa ulahi. Apan karon ang kausaban posible. Ang pagkaangay sa bug-os sa mga makinarya diha sa nagaimprintang mga sanga maoy usa ka importanteng hinungdan sa dungan nga pagpublikar sa literatura sa nagkalainlaing pinulongan. Sa pagka 1984, ang dungan nga pagpublikar sa Ang Bantayanang Torre nakab-ot sa 20 ka pinulongan. Niadtong 1989, sa dihang ang kusganong mensahe nga anaa sa librong Pinadayag​—Hingpit nga Sangkoanan Niini Haduol Na! naapod-apod sa publiko pipila lang ka bulan tapos sa pagluwat niini, kanang libroha mabatonan na sa 25 ka pinulongan. Pagka 1992, ang dungan nga pagpublikar sa Ang Bantayanang Torre miuswag pa nga naglakip sa 66 ka pinulongan, kadtong gigamit sa dakong bahin sa populasyon sa kalibotan.

Sukad nga ang proyekto sa MEPS gisugdan niadtong 1979, ang industriya sa kompiyuter miuswag ug dako. Ang kusganong personal nga mga kompiyuter nga daghag gamit ang karon mabatonan na nga mas barato kay sa unang makinarya. Aron makasagnunot sa mga panginahanglan sa buluhatong pagpamatik niini, ang Watch Tower Society nakahukom sa paggamit niining personal nga mga kompiyuter, uban sa kaugalingong software sa Sosyedad. Kini nagpadali gayod sa proseso sa produksiyon. Kini nagpaposible nga ang mga kaayohan sa mga programa sa kompiyuter mahatag usab sa daghan pang mga sanga sa Sosyedad, ug ang gidaghanon sa mga sanga nga nagagamit niini mitubo dayon sa 83. Pagka 1992 ang Watch Tower Society, sa tibuok kalibotan, adunay kapin sa 3,800 ka terminal diin kini nagagamit sa kaugalingon niining mga programa sa kompiyuter. Dili tanang sanga nga nasangkapan sa maong kagamitan nagaimprinta, apan ang bisan unsang sanga nga may gamayng  kompiyuter ug software sa Sosyedad, lakip sa usa ka gamayng laser printer, may kapasidad sa pag-andam sa patikonon nga mga tract, magasin, libro, ug bisan unsang ubang imprintahonon nga kinahanglang himoon.

Dugang Tabang sa Kompiyuter Alang sa mga Maghuhubad

Ang kompiyuter ba kaha magamit usab aron sa pagtabang ug dako sa mga maghuhubad? Ang mga maghuhubad sa mga publikasyon sa Watch Tower karon nagatrabaho, sa kasagaran, sa mga terminal sa kompiyuter. Daghan kanila anaa sa mga sangang buhatan sa Sosyedad. Ang uban, nga mahimong mohubad sa balay ug nga nagtrabaho sa daghang tuig ginamit ang makinilya o gani kinamot lang, natabangan kon unsaon sa pagpasulod sa ilang gihubad diha sa kompiyuter nga sukaranan sa trabaho o sa laptop nga mga kompiyuter (kanang gamay) nga gipalit sa Sosyedad. Ang mga pagpasibo sa gihubad dali rang himoon diha mismo sa screen sa kompiyuter. Kon ang paghubad gihimo sa laing dapit nga gawas sa buhatan sa sanga diin ang aktuwal nga pag-imprinta pagahimoon, ang gikinahanglan lang mao ang pagbalhin sa teksto ngadto sa usa ka nipis, gamay nga plaka ug ipadala kana sa nagaimprinta nga sanga alang sa pagproseso.

Sa 1989-90, samtang ang kalit nga mga kausaban nagakahitabo sa mga kagamhanan sa daghang kayutaan, ang internasyonal nga komunikasyon nahimong mas sayon. Sa walay langan, ang mga Saksi ni Jehova nagtigom sa ilang mga maghuhubad gikan sa Sidlakang Uropa alang sa seminar. Kini gidesinyo aron matabangan sila sa pagpauswag sa kalidad sa ilang trabaho, aron sila makapahimulos gikan sa nabatonang kompiyuter, ug aron mapaposible ang dungan nga publikasyon sa Ang Bantayanang Torre sa ilang mga pinulongan. Dugang pa, ang mga maghuhubad sa Habagatan-sidlakang Asia gihatagan ug susamang tabang.

Apan ang kompiyuter ba magamit sa pagpadali sa buluhaton sa paghubad o sa pagpauswag sa kalidad niini? Oo. Pagka 1989, ang kusganong mga sistema sa kompiyuter mao ang ginagamit na sa mga Saksi ni Jehova aron makatabang sa paghubad sa Bibliya. Human sa mabug-osong pasikarang buluhaton, ang elektronikong mga payl ang gitagana nga magpaarang sa maghuhubad nga mapalutaw dayon sa screen ang bisan unsang pulong sa orihinal-nga pinulongan apil sa lista sa tanang paagi nga kana, sumala sa konteksto, gihubad ngadto sa Ingles diha sa New World Translation. Siya usab makapili ug usa ka yawing pulong sa Ingles ug ipalutaw ang tanang mga pulong sa  orihinal nga pinulongan nga gikan niana kini (ug malagmit mga pulong nga may susamang kahulogan) gikuha. Kini subsob mopadayag nga ang usa ka grupo sa mga pulong gigamit sa Ingles aron ipaabot ang ideya nga nahisulod diha sa nag-inusarang termino sa orihinal nga pulong. Kini daling mohatag sa maghuhubad ug halalom nga panglantaw sa iyang ginahubad. Kini motabang kaniya sa pagsabot sa laing kahulogan sa paninugdang ekspresyon sa orihinal nga pinulongan ingon man sa tukma nga kahulogan nga gikinahanglan sa konteksto ug sa ingon sa pagpahayag niini nga tukma diha sa iyang kaugalingong pinulongan.

Pinaagi niining mga payl sa kompiyuter, ang eksperyensiyadong mga maghuhubad magasusi sa tanang paggamit sa bisan unsang pulong diha sa Bibliya ug tumbasan kanag lokal nga pinulongan alang sa matag gamit niini sumala sa gikinahanglan sa konteksto. Kini magseguro sa hataas nga sukdanan sa pagkamakanunayon. Ang buluhaton sa matag maghuhubad pagasutaon sa uban nga sakop sa tem aron nga ang hubad makapahimulos sa kaayohan gikan sa panukiduki ug kasinatian nilang tanan. Human kini himoa, ang kompiyuter mahimong gamiton sa pagpalutaw sa usa ka teksto sa Kasulatan, nga nagapakita sa matag pulong sa Ingles nga teksto, usa ka yawi sa kon unsay makita diha sa orihinal nga pinulongan, ug sa tumbas lokal nga pinulongan nga napili. Kini dili magkompleto sa buluhaton. Ang maghuhubad sa gihapon magkinahanglan nga tul-iron ang pagkahan-ay sa mga pulong ug himoon kini nga maayong basahon diha sa iyang kaugalingong pinulongan. Apan samtang ginahimo kini, hinungdanon nga mabatonan ang tin-aw nga pagsabot sa kahulogan sa kasulatan. Sa pagtabang kaniya, siya gihatagan ug dihadihang katakos pinaagig kompiyuter sa pagsusi sa komentaryo sa Watch Tower mahitungod sa bersikulo sa Bibliya o bisan unsang ekspresyon bahin niini.

Busa ang panahon sa panukiduki makunhoran, ug usa ka hataas nga sukod sa pagkamakanunayon ang makab-ot. Pinaagi sa dugang kaugmaran niining maong katakos, gilaoman nga dugang bililhong mga publikasyon ang daling mabatonan bisan sa mga pinulongan nga limitado ang gidaghanon sa maghuhubad. Ang paggamit niining maong kasangkapan aron itagana ang literatura ingong pagpaluyo sa pagmantala sa mensahe sa Gingharian nakabukas sa dako kaayong natad sa pagpublikar.

Mao nga, sama sa ilang unang isigka-Kristohanon, ang mga Saksi ni Jehova sa modernong panahon naggamit sa kinabag-ohang mga paagi aron ipakaylap ang Pulong sa Diyos. Aron maabot ang mas daghang tawo kutob sa mahimo uban sa maayong balita, sila wala mahadlok sa pag-atubang sa bag-ong mga hagit diha sa natad sa pagpublikar.

[Mga footnote]

[Blurb sa panid 578]

“Himoon nato ang karbon ingong sulay”

[Blurb sa panid 595]

Pagsangkap sa tibuok-yutang pasilidad sa mga pabrika sa Watch Tower alang sa offset nga pag-imprinta

[Blurb sa panid 596]

“Wala kitay laing mahimo kondili makadayeg sa . . . mga tawo sa Watchtower”

[Kahon/Mga hulagway sa panid 581]

Pagtipo

Niadto gikinamot kana pagtrabaho, giusa-usa ang letra

Habagatang Aprika

Sukad niadtong 1920 hangtod sa katuigan sa 1980, ang Linotype nga mga makinarya ang gigamit

Tinipong Bansa

Sa pipila ka dapit ang pagtipo gihimo pinaagig Monotype nga makinarya

Hapon

Karon gigamit ang kompiyuterisadong pamaagi sa phototypesetting

Alemanya

 [Mga hulagway sa panid 582]

Paghimog Plate

Sukad sa katuigan sa 1920 hangtod sa mga tuig 1980, ang tingga nga mga plate gihimo alang sa letterpress nga pag-imprinta

[Mga hulagway]

1. Mga linya sa tipo alang sa mga panid sa imprintahon nga materyal itaod ngadto sa metal nga mga balayan nga gitawag ug chases

2. Pinaagi sa pagduot, makamarka ang tipo sa materyal nga himoong hulmahan

3. Ang gitunaw nga tingga iyabo sa hulmahan aron makahimog metal nga mga plate nga dihay mga letra nga igaimprinta

4. Ang wala kinahanglana nga metal kuhaon gikan sa nawong sa plate

5. Ang mga plate himoong nikilado aron mas lig-on

Sa ulahi, ang mga negatibo sa mga panid nga na-phototypeset iplastar, ug ibutang ang mga hulagway. Ang mga grupo sa mga panid ibalhin pinaagig potograpiko ngadto sa mapasiboon nga mga offset plate sa pag-imprinta

[Kahon/Mga hulagway sa panid 585]

‘Ebidensiya sa Espiritu ni Jehova’

“Ang malamposong pag-imprinta ug mga libro ug mga Bibliya nga gigamit ang mga rotary press sa mga tawo nga may diyutay ra o wala gani ing eksperyensiya kanhi [ug sa panahon nga wala pa kana buhata sa uban] maoy pamatuod sa pagdumala ni Jehova ug sa pagtultol sa iyang espiritu,” matud ni Charles Fekel. Si Brader Fekel nahibalo gayod kon unsay nalangkit, kay siya kauban man sa pagpauswag sa mga kalihokan sa pag-imprinta sa hedkuwarter sa Sosyedad sulod sa kapig katunga sa siglo. Sa iyang ulahing mga tuig, siya nag-alagad ingong membro sa Nagamandong Lawas.

[Hulagway]

Charles Fekel

[Kahon/Hulagway sa panid 586]

Nagasalig sa Labing Gamhanang Diyos

Usa ka kasinatian nga giasoy ni Hugo Riemer, nga kanhi tigpamalit alang sa Watch Tower Society, ang nagbanaag sa palakaw sa Watch Tower Society sa kalihokan niini.

Sa panahon sa Gubat sa Kalibotan II, ang papel nga gigamit sa pag-imprinta girasyon sa Tinipong Bansa. Kinahanglang mangayog suplay gikan sa tinudlo-sa-kagamhanan nga komite. Sa usa ka higayon usa sa iladong sosyedad sa Bibliya ang gihawasan sa mga abogado, dagkong mga negosyante, mga magwawali, ug uban pa didto sa atubangan sa komite. Sila gihatagan ug ubos pa kay sa ilang gikinahanglan. Human maatiman ang ilang hangyo, ang komite mitawag sa Watchtower Bible and Tract Society. Sa dihang miduol si Hugo Riemer ug Max Larson, ang tsirman nangutana: “Kamo rang duha?” Sila mitubag: “Oo. Naglaom usab kami nga ang Labing Gamhanang Diyos nagauban kanamo.” Sila gihatagan sa tanang suplay nga ilang gikinahanglan.

[Hulagway]

Hugo Riemer

 [Kahon/Mga hulagway sa panid 587]

Mga Prensa sa Pag-imprinta

Nagkalainlaing mga prensa ang gigamit sa Watch Tower Society sa kalihokan niini sa pag-imprinta

[Mga hulagway]

Sa daghang tuig lainlaing matang sa flatbed press ang gigamit (Alemanya)

Ang mga job press gigamit sa pag-imprinta dili lang sa mga porma ug mga handbill apan usab sa mga magasin (T.B.A.)

Sa lainlaing imprintahanan niini, 58 niining MAN rotary letterpress gikan sa Alemanya ang gigamit (Canada)

Karon, ang tulin-modagan nga bug-os-kolor nga mga web offset press nga gigama sa nagkalainlaing yuta ang gigamit sa pangunang mga imprintahanan sa Sosyedad

Italya

Alemanya

[Mga hulagway sa panid 588, 589]

Pagpanghapin ug Libro

Ang pipila ka unang paghapin ug libro sa mga pabrika sa Watch Tower gikinamot (Switzerland)

Ang dinaghang panggama diha sa Tinipong Bansa nagkinahanglag daghang separadong palakaw

1. Paghanip sa mga panid

2. Pagtahi sa mga panid

3. Pagpapilit sa punoan sa mga papel

4. Pagtabas

5. Pagngalan sa mga hapin

6. Pagtaod sa mga hapin sa mga libro

7. Paglugpit sa mga libro hangtod malig-on ang pilit

Karon, inay sa pagtahi, ang tulin nga paghapin ang subsob nga gigamit pinaagi sa tulin-ug-gikusgong mga makinarya nga ang kada usa mahimong makapatunghag 20,000 o kapin pang libro kada adlaw

[Kahon/Mga hulagway sa panid 594]

Pagpauswag sa Kahibalo sa Gingharian sa Diyos

Ang Watch Tower Society sa lainlaing panahon nakagamag literatura sa kapin sa 290 ka lainlaing pinulongan. Sa pagka 1992 sila nagapublikar ug literatura sa mga 210 ka pinulongan. Kining tanan gihimo aron tabangan ang mga tawo nga masayod mahitungod sa Gingharian sa Diyos ug unsay kahulogan niini alang kanila. Apil sa ilang mga tabang sa pagtuon sa Bibliya nga makaylapon kaayong naapod-apod hangtod niining petsaha mao ang mosunod:

“Ang Kamatuoran nga Motultol sa Kinabuhing Dayon” (1968): 107,553,888 ka kopya, sa 117 ka pinulongan

“Ikaw Mabuhing Walay Kataposan sa Paraiso sa Yuta” (1982): 62,428,231 ka kopya, sa 115 ka pinulongan

“Tagamtama ang Kinabuhi sa Yuta sa Walay Kataposan!” (1982): 76,203,646 ka kopya, sa 200 ka pinulongan

Ang mga numero sa ibabaw maoy ihap niadtong 1992.

[Kahon/Mga hulagway sa panid 598]

Audiocassette nga mga Rekording

Dugang pa sa paggamit ug naimprintang panid sa buluhatong pag-ebanghelyo niini, sukad niadtong 1978 ang Watch Tower Society nakagama ug mga audiocassette​—nga mikabat sa 65 ka milyong kopya pinaagi sa kaugalingong makinarya niini diha sa Tinipong Bansa ug Alemanya.

Ang tibuok “New World Translation” sa audiocasette narekord sa Ingles, Pranses, Aleman, Italyano, Hapones, ug Kinatsila. Sa pagka 1992 ang lainlaing gidaghanon niining hubara sa Bibliya mabatonan usab sa audiocassette sa walo ka ubang pinulongan.

Ingong tabang sa pagtudlo sa mga bata, ang mga teyp rekording gihimo sa Ingles nga “Akong Basahon sa mga Estorya sa Bibliya” ug “Pagpatalinghog sa Dakong Magtutudlo,” mga publikasyon nga gidesinyo ilabina alang sa mga batan-on.

Dugang pa sa pipila ka yuta ang mga audiotape gigama aron isibya sa radyo.

Ang mga rekording gigama sa usa ka orkestra nga sa bug-os gilangkoban sa mga Saksi. Kining mga teyp gigamit ingong duyog alang sa pag-awit sa mga kombensiyon sa mga Saksi ni Jehova. Ang nindot pagkatugtog sa orkestra nga musika mabatonan usab aron mapamatian sa balay.

Ang girekord nga mga drama (modernong-adlaw ug mga asoy sa Bibliya) gigamit sa mga kombensiyon, diin ang Saksing mga magdudula nagtabang sa mga tumatan-aw nga mahulagway ang mga panghitabo. Ang pipila niini sa ulahi gigamit alang sa matulon-anon ug makalilipay nga kalingawan sa pamilya.

Ang “Bantayanang Torre” ug “Pagmata!” nga mga magasin mabatonan sa mga audiocassette sa Ingles ug sa Pinlandes. Usab, “Ang Bantayanang Torre” mabatonan sa Pranses, Aleman, Danes, Norwegian, ug Sweko. Sa sinugdan gituyo alang sa mga tawong may suliran sa pagbasa, kining mga teyp giapresyar sa linibong uban pa.

[Hulagway]

J. E. Barr sa rekording studio

 [Kahon/Mga hulagway sa panid 600, 601]

Paggamit ug mga Videocassette sa Pagmantala sa Gingharian

Niadtong 1990 ang Watch Tower Society misulod sa usa ka bag-ong natad pinaagi sa pagluwat sa unang videocassette niini nga gidesinyo aron iapod-apod sa publiko.

Gibanabana nianang tuiga nga mikabat sa kapin sa 200,000,000 ka panimalay sa tibuok-yuta ang may mga VCR (videocassette recorder) sa lainlaing matang. Bisan sa kayutaan diin walay estasyon sa telebisyon, gigamit ang mga VCR. Mao nga, ang paggamit sa mga videocassette ingong paagi sa pagpanudlo nagtanyag ug bag-ong pamaagi aron maabot ang daghang tumatan-aw.

Ingon ka sayo sa 1985, gisugdan paggama ang presentasyon sa video nga gidesinyo aron ipatan-aw ang pipila ka kalihokan sa hedkuwarter sa kalibotan sa Sosyedad, sa nagaduaw sa mga pasilidad niini. Sa ngadtongadto, ang mga presentasyon sa video napamatud-an nga makapadali sa pagpasinati sa bag-ong membro  sa pamilyang Bethel. Kini bang pamaagi sa pagtudlo magamit sa ubang mga paagi sa pagtabang sa tibuok-yutang buluhaton sa paghimog tinun-an? Ang pipila ka igsoon nagtuo nga kana makatabang.

Ingong sangpotanan, niadtong Oktubre 1990, ang videocassette nga “Jehovah’s Witnesses​—The Organization Behind the Name” giluwatan. Daghang hangyo alang sa dugang pang samang mga programa ang nadawat. Aron matagan-an ang panginahanglan, usa ka bag-ong departamento nga gitawag Video Services ang gimugna.

Ang mga Saksi nga eksperto sa maong natad malipayong nagtanyag sa ilang tabang. Namalit ug mga kasangkapan. Nagtukod ug mga studio. Usa ka tem sa kamera ang nagbiyahe ngadto sa nagkalainlaing mga yuta aron kuhaan ug pelikula ang mga tawo ug mga butang nga magamit diha sa mga pasundayag sa video nga gidesinyo sa pagpalig-on sa pagtuo. Ang internasyonal nga pulos-Saksing orkestra nga sa makadaghan nakatabang sa espesyal nga mga proyekto nagtagana sa musika nga magpanindot pa sa mga pasundayag sa video.

Gipatuman na ang mga plano aron maabot ang dugang tawo nga lain ug mga pinulongan. Sa pagka tunga-tunga sa 1992, ang video nga “Jehovah’s Witnesses​—The Organization Behind the Name” gipadala na sa kapin sa usa ka dosenang pinulongan. Kana narekord sa 25 ka pinulongan, lakip sa pipila alang sa Sidlakang Uropa. Dugang pa, ang mga kahikayan gihimo na aron irekord kana sa Mandarin ingon man sa Cantones alang sa mga Intsik. Ang Sosyedad nakapalit usab sa mga katungod, sa pagkopya ug pag-apod-apod sa “Purple Triangles,” usa ka video mahitungod sa integridad sa usa ka pamilyang Saksi sa Alemanya sa panahon sa Nazi. Sulod sa duha-ka-tuig nga yugto, kapin sa usa ka milyong videocassette ang nagama aron gamiton sa mga Saksi ni Jehova diha sa ilang ministeryo.

Linaing pagtagad ang gihatag sa panginahanglan sa mga bungol. Usa ka edisyon sa “Jehovah’s Witnesses​—The Organization Behind the Name” ang gigama diha sa American Sign Language. Ug naghimog panukiduki uban sa panglantaw nga motaganag mga video nga alang sa mga bungol sa ubang kayutaan.

Samtang ginahimo kini, ginatrabaho na ang usa ka serye nga makatabang sa pagpalig-on sa pagtuo diha sa libro nga mao gayod ang pundasyon sa Kristohanong pagtuo, ang Bibliya. Sa pagka Septiyembre 1992, ang unang bahin nianang programaha, “The Bible​—Accurate History, Reliable Prophecy,” nakompleto sa Ingles, ug ang mga edisyon sa ubang pinulongan ginaandam na.

Ang mga videocassette dili gayod makapuli sa naimprintang panid o personal nga pagsangyaw. Ang mga publikasyon sa Sosyedad nagpadayon sa pagtagana sa hinungdanong papel diha sa pagpakaylap sa maayong balita. Ang balay-sa-balay nga buluhaton sa mga Saksi ni Jehova nagpabiling lig-on nga Kasulatanhong pasikaranan nga bahin sa ilang ministeryo. Hinuon, ang mga videocassette karon nagatabang niini ingong bililhong kasangkapan alang sa pag-ugmad sa pagtuo sa bililhong mga saad ni Jehova ug nagatukmod ug apresasyon alang sa butang nga iyang ginahimo sa yuta sa atong adlaw.

[Mga hulagway]

1. Human matino ang pasikaranang kaundan, isunod ang pag-videotape samtang ginaugmad ang script

2. Ang mga hulagway pilion ug ang ilang pagkasunodsunod gitino sa panahon sa off-line nga pag-edit

3. Ang honi sa orkestra nga gikomposo sa linain girekord aron mapanindot pa ang presentasyon

4. Ang digital nga musika ug mga tingog gisagol sa asoy ug mga hulagway

5. Ang mga bahin sa tingog ug hulagway ipailalom pa sa pangataposang pag-edit

[Mga hulagway sa panid 576]

Ang aktuwal nga pag-imprinta niining sayong mga publikasyon gihimo pinaagi sa komersiyal nga mga kompaniya

[Hulagway sa panid 577]

Si C. A. Wise nagsulay kon kaha ang mga Estudyante sa Bibliya angayng motukod pag-usab ug hedkuwarter sa Brooklyn

[Mga hulagway sa panid 579]

Ang unang rotary press sa Sosyedad gigamit sa pag-imprintag 4,000,000 ka kopya sa kusganong “Golden Age” Num. 27

[Hulagway sa panid 580]

Si R. J. Martin (tuo), unang magtatan-aw sa pabrika sa Sosyedad sa Brooklyn, nga nakighisgot kang Brader Rutherford

[Hulagway sa panid 583]

Usa sa unang mga imprintahanan sa Sosyedad sa Uropa (Bern, Switzerland)

[Mga hulagway sa panid 584]

Sa Magdeburg, Alemanya, ang Sosyedad nagtukod ug imprintahanan sa katuigang 1920

[Hulagway sa panid 590, 591]

Elandsfontein, Habagatang Aprika (1972)

[Hulagway sa panid 590]

Numazu, Hapon (1972)

[Hulagway sa panid 590]

Strathfield, Australia (1972)

[Hulagway sa panid 590]

São Paulo, Brazil (1973)

[Hulagway sa panid 591]

Lagos, Nigeria (1974)

[Hulagway sa panid 591]

Wiesbaden, Alemanya (1975)

[Hulagway sa panid 591]

Toronto, Canada (1975)

[Hulagway sa panid 597]

Ang mabug-osong font digitizing gihimo sa mga Saksi aron matagan-an ang ilang panginahanglan sa literatura sa Bibliya diha sa daghang pinulongan (Brooklyn, N.Y.)

[Hulagway sa panid 599]

Mga workstation sa kolor kompiyuter nakapaarang sa mga tigdesinyo sa dibuho sa pagplastar, pagtabas, ug paghashas sa mga hulagway pinaagig elektroniko

[Hulagway sa panid 602]

Ang mga Saksi ni Jehova naggamit ug mga sistema sa kompiyuter aron mapadali ug mahashasan ang buluhatong paghubad sa Bibliya (Korea)