Pasiuna

Ang mga Saksi ni Jehova maoy usa ka katawhan nga nailhan sa daghang dapit. Ang ilang pagwali ug paagi sa pagsimba mituhop sa nasodnon ug rasanhong mga grupo sa tibuok kalibotan ug gidawat sa mga batan-on ug tigulang, sa matag ang-ang sa kinabuhi ug edukasyon. Ang ilang kadasig ingong mga magmamantala sa Gingharian sa Diyos gidayeg bisan sa ilang mga tigsaway. Ang ilang gugma alang sa usag usa nakatukmod sa pipila ka dili-Saksi sa pagpangandoy nga unta daghan pang tawo ang magkinabuhi nianang paagiha.

Apan, daghan pa ang buot masayod, ‘Kinsa ba gayod ang mga Saksi ni Jehova?’ Ang uban nagsulat mahitungod kanila, nga usahay mapihigon. Tingali sila walay kasayoran sa tanang panghitabo. Sa pagkatinuod, walay mausa ang labawng nahibalo sa ilang modernong-adlaw nga kasaysayan kay sa ilang kaugalingon mismo. Ang mga editor niining tomoha naningkamot nga dili-magmapihigon ug makapahayag sa tinuod nga kasaysayan. Alang sa tanan nga nasayod kon unsay gitagna sa Bibliya alang sa kataposang mga adlaw, kining kasaysayan mahitungod sa usa ka katawhan kinsa nagatuo gayod ug nagasangyaw sa mga butang nga ginasulti sa Bibliya mahimong makapatin-aw gayod.

Ang mga Magpapatik