Kapitulo 17

Mga Kombensiyon Pamatuod sa Among Panag-igsoonay

ANG mga kombensiyon nahimong regular nga bahin sa modernong-adlaw nga organisasyon sa mga Saksi ni Jehova. Apan ang nasyonal ug internasyonal nga mga panagkatigom sa mga magsisimba ni Jehova dugay nang gihimo sa wala pa ang ika-20ng siglo.

Gibaoran ni Jehova ang tanang lalaki sa karaang Israel nga magtigom sa Jerusalem alang sa tulo ka piyesta kada tuig. Ang pila sa mga lalaki nagdala sa ilang tibuok pamilya. Sa pagkatinuod, ang Moisesnong Kasugoan nagbaod nga ang kada membro sa pamilya​—mga lalaki, babaye, ug mga bata​—kinahanglang presente sa pila ka okasyon. (Ex. 23:​14-17; Deut. 31:​10-13; Luc. 2:​41-43) Sa sinugdan, ang mga tumatambong maoy mga tawo nga nagpuyo sulod sa mga utlanan sa Israel. Sa ulahi, sa dihang natibulaag na ang mga Hudiyo, ang mga tigtambongan naggikan na sa daghang nasod. (Buh. 2:​1, 5-11) Sila nagkatigom dili lamang tungod kay si Israel ug si Abraham maoy ilang katigulangan kondili tungod kay giila nila si Jehova nga ilang halangdon langitnong Amahan. (Isa. 63:16) Kining mga piyestaha maoy malipayong mga okasyon. Nagtabang usab kana sa tanang presente sa pagbutang sa ilang mga hunahuna diha sa pulong sa Diyos ug dili mabalaka pag-ayo sa adlaw-adlawng mga kalihokan sa kinabuhi nga basin ilang mahikalimtan ang labing importanteng espirituwal nga mga butang.

Sa susama, ang mga kombensiyon sa mga Saksi ni Jehova sa modernong panahon nasentro sa espirituwal nga intereses. Alang sa sinserong mga tigpaniid kining mga kombensiyona nagahatag ug dili ikalimod nga ebidensiya nga ang mga Saksi nahiusa tungod sa lig-on Kristohanong panag-igsoonay.

Sayong mga Kombensiyon sa mga Estudyante sa Bibliya

Ang mga kahikayan alang sa mga panagkatigom sa mga Estudyante sa Bibliya gikan sa lainlaing mga siyudad ug kayutaan inanay nga naugmad. Dili sama sa naandan relihiyosong mga pundok, ang mga Estudyante sa Bibliya, pinaagi sa ilang mga kombensiyon, daling makaila sa ilang isigkamagtutuo sa ubang mga dapit. Sa sinugdan, kining mga kombensiyona gihimo sa Allegheny, Pennsylvania, may kalabotan sa tinuig nga paghinumdom sa kamatayon sa Ginoo. Niadtong 1891 gihatag ang espisipikong pahibalo nga adunay usa ka “kombensiyon alang sa pagtuon sa Bibliya ug sa pagsaulog sa Memoryal nga Panihapon sa Ginoo.” Sa misunod nga tuig, ang Watch Tower may ulohan nga nagpahibalo “KOMBENSIYON SA MGA MAGTUTUO, SA ALLEGHENY, PA., . . . ABRIL 7 HANGTOD 14, INKLUSIBO, 1892.”

Ang publiko sa katibuk-an wala dapita niadtong sayong mga kombensiyon. Apan, niadtong 1892, mga 400 ka tawo nga nakapakita ug ebidensiya sa pagtuo  diha sa lukat ug sinserong interes sa buluhaton sa Ginoo ang presente. Ang programa naglakip sa lima ka adlaw nga mabug-osong pagtuon sa Bibliya ug laing duha ka adlaw sa mapuslanong tambag alang sa mga colporteur.

Matud sa usa nga presente sa unang higayon sa usa niining mga tigoma: “Ako nakatambong na sa daghang Kombensiyon, apan wala pa gayod makatambong sukad ug sama niini, nga ang kabubut-on ug plano sa Diyos mao lamang ang kanunayng hisgotan gikan sa pagmata sa buntag hangtod sa dayon nang mangatulog sa gabii; sa balay, sa dalan, sa tigom, sa paniudto ug sa tanang dapit.” Mahitungod sa espiritu nga gipasundayag sa mga delegado, usa gikan sa Wisconsin, T.B.A., nagsulat: “Nakadayeg gayod ako sa espiritu sa gugma ug inigsoong kalulot nga gipadayag sa tanang okasyon.”

Giusab ang mga kahikayan alang sa tinuig nga kombensiyon niadtong 1893. Aron makapahimulos sa barato nga plete sa tren may labot sa Columbian Exposition nianang ting-init, ang mga Estudyante sa Bibliya nagtigom sa Chicago, Illinois, gikan sa Agosto 20 hangtod 24. Mao kini ang ilang unang kombensiyon sa gawas sa Pittsburgh. Ugaling, tungod sa panglantaw nga magamit nga labing maayo ang panahon ug salapi alang sa buluhaton sa Ginoo, walay gihimong dagkong mga kombensiyon sulod sa pipila ka tuig.

Unya, sugod niadtong 1898, ang mga Estudyante sa Bibliya sa lainlaing mga dapit sa ilang kaugalingon nagsugod sa paghikay ug mga asembliya, nga pagatambongan sa mga tawo diha sa limitadong dapit. Niadtong 1900 may 3 ka dagkong mga kombensiyon nga giorganisar sa Sosyedad; apan may 13 usab ka lokal nga mga asembliya sa Tinipong Bansa ug Canada, nga ang kadaghanan gihimo sa usa ka adlaw lamang ug sa subsob gihimo atol sa duaw sa usa sa mga pilgrim. Ang gidaghanon padayon nga nag-uswag. Sa pag-abot sa tuig 1909 sa labing menos dihay 45 ka lokal nga asembliya sa Amerika del Norte, ingong dugang sa mga kombensiyon  nga gialagaran ni Brader Russell sa espesyal nga mga pagduaw nga nagdala kaniya ngadto sa lainlaing mga bahin sa kontinente. Usa ka dakong bahin sa programa sa tagsa-ka-adlaw nga mga asembliya gidesinyo ilabina sa pagdasig sa interes sa publiko. Ang tumatambong mokabat ug gikan sa usa ka gatos hangtod sa pipila ka libo.

Sa laing bahin, ang dagkong mga kombensiyon, nga sa kinadak-an tambongan sa mga Estudyante sa Bibliya, nagpasiugda sa instruksiyon alang niadtong nahiluna nag maayo sa dalan sa kamatuoran. Alang niining mga kombensiyona, ang espesyal nga mga tren nga puno sa mga delegado mangabot gikan sa pangunang mga siyudad. Ang tumatambong, usahay, ingon ka daghan sa 4,000, naglakip pa sa pipila ka delegado gikan sa Uropa. Kini maoy mga panahon sa tinuod espirituwal nga pagpabaskog nga misangpot sa labaw nga kasibot ug gugma sa bahin sa katawhan ni Jehova. Matud sa usa ka igsoon sa pagkatapos sa usa ka kombensiyon niadtong 1903: “Dili nako ibaylo ug usa ka libo ka dolyar ang kaayohan nga akong nadawat gikan niining Kombensiyona;​—bisan pag ako kabos lamang nga tawo.”

Ang mga igsoong pilgrim nga naatlan diha sa dapit modiskurso sa mga asembliya. Si Brader Russell naningkamot usab sa pagtambong ug sa pag-alagad sa programa sa lokal nga mga asembliya ingon man diha sa dagkong mga kombensiyon sa Tinipong Bansa ug subsob sa Canada. Kana naglangkit sa daghang pagbiyahe. Kadaghanan niana gihimo sa hinapos sa semana nga mga biyahe. Apan, niadtong 1909, usa ka igsoong lalaki sa Chicago miabang ug pipila ka seksiyon sa tren sa pagdala sa mga delegado nga mibiyahe uban ni Brader Russell gikan sa usa ka kombensiyon ngadto sa lain. Niadtong 1911 ug 1913, enterong mga tren ang gipakyaw sa maong igsoon aron sa pagdala sa mga delegado sa pagduaw sa mga kombensiyon nga giabtan ug usa ka bulan o kapin pa ug nagkobre sa kasadpang Tinipong Bansa ug Canada.

Ang pagbiyahe sa maong tren para sa kombensiyon maoy usa ka halandumong kasinatian. Niadtong 1913, si Malinda Keefer misakay niana sa Chicago, Illinois. Mga tuig sa ulahi, siya nag-ingon: “Sa wala madugay akong nasabtan nga usa kami ka dakong pamilya . . . ug ang tren mao ang among balay sa usa ka bulan.” Samtang mibiya ang tren sa estasyon, kadtong mga naghatod kanila miawit ug “Ang Diyos Magauban Kaninyo Hangtod sa Sunod Natong Pagkita,” samtang nagpakayabkayab sa ilang mga kalo ug mga panyo hangtod ang tren dili na makita. Si Sister Keefer midugang: “Sa matag hunong sa biyahe may himoon nga kombensiyon​ —kadaghanan tagtulo ka adlaw, ug kami moestar ug usa ka adlaw sa matag usa ka kombensiyon. Sa maong mga paghunong si Brader Russell mohatag ug duha ka pakigpulong, usa alang sa mga igsoon sa hapon, ug ang lain alang sa publiko sa gabii bahin sa ulohang ‘Saylo sa Lubnganan.’”

Sa ubang mga yuta usab, nagkadaghan ang mga asembliya. Kasagaran sila gagmay ra. Mga 15 ang presente sa una sa Norway, niadtong 1905; apan kadto maoy sinugdanan. Unom ka tuig sa ulahi, sa dihang si Brader Russell miduaw sa Norway, gihimo ang linaing paningkamot aron madapit ang publiko, ug ang tumatambong niadtong okasyona gibanabana nga 1,200. Sa 1909, sa dihang mitambong siya sa mga kombensiyon sa Scotland, siya midiskurso ngadto sa mga 2,000 sa Glasgow ug laing 2,500 sa Edinburgh sa makapukaw-sa-interes nga ulohang “Ang Kawatan sa Paraiso, ang Tawong Dato sa Impiyerno, ug si Lazaro sa Sabakan ni Abraham.”

Sa pagkatapos sa sayong mga kombensiyon, ang mga brader naghimo ug gitawag nilang piyesta sa gugma, nga nagbanaag sa ilang pagbati sa Kristohanong panag-igsoonay. Unsay nalakip sa maong “piyesta sa gugma”? Ingong pananglitan, ang mga mamumulong molinya nga may mga plato sa pormag-dayes nga mga tinapay, ug unya ang mga mamiminaw maglinya pag-agi kanila, nga mokaon sa tinapay, molamano, ug moawit ug “Salamat sa Bugkos nga Nag-usa sa Atong mga Kasingkasing sa Kristohanong Gugma.” Mga luha sa kalipay modaligdig sa ilang mga aping samtang sila nag-awit. Sa ulahi, sa dihang midaghan sila, ilang giwala ang paglamanohay ug pagkaon sa tinapay apan tiklopan kana sa awit ug pag-ampo ug, subsob, dugayng pamalakpak sa pagpahayag sa ilang apresasyon.

Paglansad sa Tibuok-Kalibotang Kampanya sa Pagmantala sa Gingharian

Ang unang dakong kombensiyon tapos sa Gubat sa Kalibotan I gihimo sa Cedar Point, Ohio (sa Lake Erie, 96 kilometros sa kasadpan sa Cleveland), gikan sa Septiyembre 1 hangtod sa 8 niadtong 1919. Tapos sa kamatayon ni Brader Russell, ang pila ka iladong nakig-uban sa organisasyon mibiya sa kamatuoran. Ang mga igsoon nailalom sa grabeng pagsulay. Sayo sa 1919, ang presidente sa Sosyedad ug ang iyang mga kauban gibuhian gikan sa ilang dili makataronganong pagkabilanggo. Busa dihay maidlot nga pagdahom. Bisan tuod sa unang-adlaw ang tumatambong diyutay ra, sa ulahi niadtong adlawa daghang delegado ang nangabot sakay sa espesyal nga mga tren. Unya ang mga hotel nga nagtanyag sa pagdawat sa mga delegado dili na makaapas. Si R. J. Martin ug si A. H. Macmillan (nga parehong bag-o lang napagawas sa bilanggoan) miboluntaryo sa pagtabang. Sila nag-asayn ug mga kuwarto hangtod lapas na sa tungang gabii, ug si Brader Rutherford ug daghan pang uban nalipay sa pag-alagad ingong mga bellboy, nga nagdala sa mga maleta ug nag-uban sa mga igsoon ngadto sa ilang mga kuwarto. Dihay makatakod nga espiritu sa kadasig taliwala nilang tanan.

Mga 2,500 ang gidahom nga motambong. Hinuon, sa tanang paagi ang kombensiyon napamatud-ang labaw pa sa gidahom. Sa ikaduhang adlaw, ang awditoryum naghuot na ug dugang mga tigomanan ang gigamit. Sa dihang kana dili pa igo, ang mga sesyon gibalhin sa gawas sa tinukod ngadto sa usa ka dapit nga may nindot nga pundok sa mga kahoy. Mga 6,000 ka Estudyante sa Bibliya gikan sa Tinipong Bansa ug Canada ang presente.

 Alang sa pangunang pakigpulong sa Dominggo, labing menos 1,000 gikan sa publiko miabot usab, nga nakadugang sa mamiminaw nga mikabat ug 7,000, nga gidiskursohan sa mamumulong sa gawas nga wala mogamit ug mikropono o sistema sa pagpakusog sa tingog. Nianang diskursoha, “Ang Paglaom Alang sa Naalaot nga Katawhan,” si J. F. Rutherford nagpatin-aw nga ang Mesiyanikong Gingharian sa Diyos mao ang sulbad sa mga suliran sa katawhan, ug iyang gipakita usab nga ang Liga sa Kanasoran (nga sa maong panahon namugna na ug gipaluyohan sa klero) sa bisan unsang paagi dili politikal nga kapahayagan sa Gingharian sa Diyos. Ang Sandusky Register (usa ka lokal nga mantalaan) nagdala ug mabug-osong taho bahin sa maong diskurso sa publiko, ingon man sa sumada sa kalihokan sa mga Estudyante sa Bibliya. Ang mga kopya nianang mantalaana gipadala sa mga mantalaan sa tibuok Tinipong Bansa ug Canada. Apan may labaw pang kahulogan kining kombensiyona kay sa publisidad lamang.

Ang tinuod nga tayuktok nga bahin sa entirong kombensiyon mao ang pakigpulong ni Brader Rutherford nga “Pahibalo Alang sa Isigka-mamumuo,” nga sa ulahi gipatik ubos sa titulong “Pagpahayag sa Gingharian.” Kini gitumong sa mga Estudyante sa Bibliya mismo. Panahon nianang pakigpulonga ang kahinungdanon sa mga letrang G A nga nakita sa programa sa kombensiyon ug sa kadaiyang mga dapit sa kombensiyon natin-aw. Gipahibalo ang umaabot nga pagpublikar sa usa ka bag-ong magasin, ang The Golden Age, aron gamiton sa pagtultol sa pagtagad sa mga tawo ngadto sa Mesiyanikong Gingharian. Tapos ilaraw ang buluhatong pagahimoon, si Brader Rutherford miingon ngadto sa mga mamiminaw: “Ang pultahan sa kahigayonan nabuksan sa imong atubangan. Dali sa pagsulod niana. Timan-i nga samtang ikaw nagabuhat niining buluhatona dili ka lamang ahente sa usa ka magasin, apan ikaw embahador sa Hari sa mga hari ug Ginoo sa mga ginoo, nga  nagamantala sa katawhan niining halangdong paagi sa umaabot nga Bulawanong Kapanahonan (Golden Age), ang mahimayaong gingharian sa atong Ginoo ug Agalon, nga gilaoman ug giampo sa tinuod nga mga Kristohanon sa daghang siglo.” (Tan-awa ang Pinadayag 3:8.) Sa dihang ang mamumulong nangutana kon pila ang gustong makig-ambit sa buluhaton, ang maiinitong sanong makapadasig nga tan-awon. Ingon sa usa ka tawo, ang mamiminaw nga 6,000 nanindog. Sa sunod tuig, kapin sa 10,000 ang nakig-ambit sa pag-alagad sa kanataran. Ang tibuok kombensiyon may makapahiusa ug makapalagsik nga epekto sa mga nanambong.

Tulo ka tuig sa ulahi, niadtong 1922, ang laing halandumong kombensiyon gihimo sa Cedar Point. Kadto maoy siyam-ka-adlaw nga programa, gikan sa Septiyembre 5 hangtod 13. Dugang pa sa mga delegado gikan sa Tinipong Bansa ug Canada, ang pipila miabot gikan sa Uropa. Ang mga tigom gihimo sa napulo ka pinulongan. Ang aberids nga tumatambong sa matag adlaw maoy mga 10,000; ug alang sa pakigpulong nga “Minilyon nga Buhi Karon Dili na Gayod Mamatay,” daghang gikan sa publiko ang naminaw nga hapit doble ang nanambong.

Ang mga Estudyante sa Bibliya wala magtapok niining kombensiyona uban sa paghunahuna nga sila nagplano sa pagtrabaho dinhi sa yuta nga mohangtod ug mga dekada sa umaabot. Sa pagkatinuod, sila nag-ingon nga basin kadto na ang ilang kataposang dakong kombensiyon una pa “ang kaluwasan sa iglesya . . . ngadto sa langitnong bahin sa gingharian sa Diyos, ug sa pagkamatuod ngadto sa aktuwal nga presensiya sa atong Ginoo ug atong Diyos.” Apan bisag unsa pa ka mubo sa panahon, ang pagbuhat sa kabubut-on sa Diyos mao ang ilang labaw nga gikaikagan.  Uban niana sa hunahuna, sa Biyernes, Septiyembre 8, si Brader Rutherford naghatag sa halandumong diskurso nga “Ang Gingharian.”

Una pa niini, lagpad nga mga bandera nga adunay mga letrang A D V ang gibitay sa lainlaing bahin sa dapit kombensiyonan. Panahon sa diskurso ang kahinungdanon niadtong mga letraha nadayag sa dihang ang mamumulong midasig: “Magmatinumanon ug magmatinuod nga mga saksi sa Ginoo. Asdang sa pagpakiggubat hangtod ang tanang bahin sa Babilonya malaglag. Imantala ang mensahe bisan asa. Ang kalibotan kinahanglang masayod nga si Jehova mao ang Diyos ug si Jesu-Kristo mao ang Hari sa mga hari ug Ginoo sa mga ginoo. Mao kini ang adlaw sa tanang adlaw. Tan-awa, ang Hari nagamando na! Kamo ang iyang mga magsasangyaw. Busa imantala, imantala, imantala, ang Hari ug iyang gingharian.” Sa maong yugto usa ka dakong bandera, 11 ka metros ang gitas-on, ang gibukhad sa atubangan sa tumatan-aw. Diha niana nahisulat ang makapukaw nga islogan “Imantala [Ingles: “Advertise,” nga gihawasan sa ADV] ang Hari ug ang Gingharian.” Kadto maoy dramatikong yugto. Ang mamiminaw malipayong namalakpak. Ang gulangon na nga si Brader Pfannebecker, diha sa orkestra sa asembliya, nagkayab sa iyang biyolin ibabaw sa iyang ulo ug kusog nga nagsulti uban sa iyang gahing Aleman nga tonada: “Ach, Ya! Und now ve do it, no?” [Husto na! Ug buhaton nato kana karon, dili ba?] Ug ila gayod kanang gibuhat.

Upat ka adlaw sa ulahi, samtang nagpadayon pa ang sesyon sa kombensiyon, si Brader Rutherford personal nga nakig-ambit uban sa mga kombensiyonista sa balay-sa-balay nga buluhatong pagwali sa Gingharian sulod sa 72 kilometros sa dapit sa kombensiyon. Kana wala matapos niana. Ang buluhaton sa pagmantala sa Gingharian gidasig pag-ayo nga makaabot sa tibuok yuta. Niadtong tuiga kapin sa 17,000 ka masibotong mga magbubuhat sa 58 ka kayutaan nakig-ambit sa pagsangyaw. Mga dekada sa ulahi, si George Gangas, nga nakatambong niadtong kombensiyona ug sa ulahi nahimong membro sa Nagamandong Lawas, nag-ingon labot niadtong programa sa Cedar Point: “Kadto maoy usa ka butang nga nasulat nga dili mapala sa akong hunahuna ug kasingkasing, nga dili gayod makalimtan samtang ako buhi.”

Mga Milyahan sa Espirituwal nga Pagtubo

Ang tanang kombensiyon maoy mga panahon sa pagpabaskog ug instruksiyon sa Pulong sa Diyos. Apan ang pila kanila gihinumdoman sa daghang dekada ingong mga milyahan sa espirituwalidad.

Pito niana ang nahitabo, sa sunodsunod nga tuig, sukad sa 1922 hangtod 1928, sa Tinipong Bansa, Canada, ug Britanya. Usa ka katarongan sa kahinungdanon niining mga kombensiyona mao ang kusganong mga resolusyon nga gisagop, ang pito nalista diha sa kahon sa sunod nga panid. Bisan tuod ang mga Saksi diyutay ra, sila nakaapod-apod ug 45 ka milyong kopya sa usa ka resolusyon, ug 50 ka milyon sa laing uban pa, diha sa daghang pinulongan sa tibuok-yuta. Ang pipila gisibya sa internasyonal nga mga radio hook-up. Mao nga usa ka talagsaong pamatuod ang nahatag.

Apan lain pang makasaysayanhong kombensiyon ang gihimo sa Columbus, Ohio, niadtong 1931. Sa Dominggo, Hulyo 26, tapos makadungog sa Kasulatanhong argumento, ang mga Estudyante sa Bibliya nagsagop sa bag-ong ngalan​ —mga Saksi ni Jehova. Pagkahaom gayod! Ania ang usa ka ngalan nga nagapunting sa pangunang pagtagad ngadto sa Maglalalang mismo ug tin-awng nagpaila sa responsabilidad niadtong nagasimba kaniya. (Isa. 43:​10-12) Ang pagsagop nianang ngalana naghatag sa mga igsoon ug mas dakong kadasig kay sa nangagi ingong mga magmamantala sa ngalan ug Gingharian sa Diyos. Ingon sa gipahayag sa usa ka sulat nga gisulat sa usa ka Saksi nga Olandes: “Oh, pagkatahom nga ngalan, mga Saksi ni Jehova, oo, hinaot kitang tanan mahimong ingon.”

Niadtong 1935 laing halandumong kombensiyon ang gihimo, sa Washington, D.C. Sa ikaduhang adlaw nianang kombensiyona, Biyernes, Mayo 31, si Brader Rutherford naghisgot sa dakong panon nga gihisgotan sa Pinadayag 7:​9-17. Sulod sa kapin sa katunga sa siglo, ang mga Estudyante sa Bibliya wala molampos sa ilang tinguha nga mailhan kanang grupoha sa husto. Karon, sa tukmang panahon ni Jehova, sa lamdag sa mga panghitabo nga nagakatuman, gipunting nga sila mao ang mga tawo nga may paglaom nga mabuhing walay kataposan dinhi mismo sa yuta. Kini nga pagsabot naghatag ug bag-ong kahulogan sa pag-ebanghelyo nga buluhaton ug nagsaysay sa Kasulatanhong paagi sa usa ka dakong kausaban nga kaniadto bag-o pa lamang nagsugod sa pagkaporma sa modernong-adlaw nga organisasyon sa mga Saksi ni Jehova.

Ang kombensiyon sa St. Louis, Missouri, niadtong 1941 gihinumdoman sa daghan nga nakatambong sa usa ka pangbukas unang-adlaw nga pakigpulong nga nag-ulohan ug “Integridad,” nga si Brader Rutherford nagpunting sa pagtagad sa dakong isyu nga giatubang sa tanang intelihenteng linalang. Sukad niadto ang pakigpulong nga “Magmamando Alang sa Katawhan,” niadtong  1928, ang mga isyu nga gibangon sa pag-alsa ni Satanas gihatagan ug sublisubling pagtagad. Apan karon gipatin-aw nga “ang pangunang isyu nga gibangon sa masukihong hagit ni Satanas niadto ug karon mao ang mahitungod sa UNIBERSOHANONG PAGMANDO.” Ang apresasyon nianang isyuha ug sa kahinungdanon sa paghupot ug integridad kang Jehova ingong Unibersohanong Soberano maoy usa ka kusganong panukmod diha sa mga kinabuhi sa mga alagad ni Jehova.

Sa tunga sa Gubat sa Kalibotan II, niadtong 1942, sa dihang ang pila nahibulong kon kaha ang pagwaling buluhaton tingali natapos na, ang diskurso sa kombensiyon nga gihatag ni N. H. Knorr, ang bag-ong natudlo nga presidente sa Watch Tower Society, maoy “Kalinaw​—Makalahutay Ba?” Ang pagpatin-aw nianang diskursoha bahin sa simbolikong “kolor-pula nga mapintas nga mananap” sa Pinadayag kapitulo 17 nagpadayag sa panan-aw sa mga Saksi ni Jehova sa usa ka yugto tapos sa Gubat sa Kalibotan II nga niana may kahigayonan sa pagtultol sa daghan pang tawo ngadto sa Gingharian sa Diyos. Kini nagdasig sa usa ka tibuok-kalibotang kampanya nga latas sa katuigan nakaabot sa kapin sa 235 ka kayutaan ug wala pa matapos.

Ang laing milyahang nakab-ot sa panahon sa usa ka kombensiyon sa Yankee Stadium sa New York niadtong Agosto 2, 1950. Niadtong okasyona ang nahingangha ug nalipay pag-ayo nga mamiminaw ang unang nakadawat sa New World Translation of the Christian Greek Scriptures. Ang ubang bahin sa New World Translation giluwat nga inanay sa misunod nga dekada. Kining modernog-pinulongan nga hubad sa Balaang Kasulatan nagpasig-uli sa personal nga ngalan sa Diyos ngadto sa iyang hustong dapit diha sa iyang Pulong. Ang katukma niana sa orihinal nga mga pinulongan sa Bibliya nakahimo niana nga dakong tabang sa mga Saksi ni Jehova sa ilang kaugalingong pagtuon sa Kasulatan ingon man sa ilang buluhatong pag-ebanghelyo.

Sa adlaw una pa sa kataposang adlaw sa kombensiyon, si F. W. Franz, nga kaniadto bise presidente sa Watch Tower Society, nagpahayag sa mamiminaw bahin  sa “Bag-ong Sistema sa mga Butang.” Sa daghang katuigan ang mga Saksi ni Jehova nagtuo nga bisan sa wala pa ang Armageddon ang pila ka una-Kristohanong mga alagad ni Jehova pagabanhawon gikan sa kamatayon aron mahimong mga prinsipe sa bag-ong kalibotan, ingong katumanan sa Salmo 45:16. Unya, imong mahanduraw ang epekto diha sa daghang mamiminaw sa dihang ang mamumulong nangutana: “Kini bang internasyonal nga asembliya malipay nga mahibalo nga dinhi, karong gabhiona, sa atong taliwala, may daghang umaabot nga mga prinsipe sa bag-ong yuta?” May makusog ug malahutayong pamalakpak nga inubanan sa mga singgit sa kalipay. Unya ang mamumulong nagpakita nga ang Biblikanhong gamit sa termino nga gihubad ug “prinsipe” uban sa talaan sa pagkamatinumanon sa daghan sa “ubang mga karnero” sa modernong panahon nga nagpaposible sa pagtuo nga ang pila nga buhi karon mahimong pagapilion ni Jesu-Kristo alang sa prinsipenhong pag-alagad. Hinuon, gipunting usab niya nga walay ihatag nga mga titulo niadtong sinaligan sa maong pag-alagad. Sa pagtapos sa iyang diskurso, siya miawhag: “Nan, asdang, walay moatras, kitang tanan, ingong usa ka sosyedad sa Bag-ong Kalibotan!”

May daghan pang ubang hinungdanon kaayong mga diskurso nga gipahayag diha sa mga kombensiyon sa mga Saksi ni Jehova: Niadtong 1953, ang “Sosyedad sa Bag-ong Kalibotan Giatake Gikan sa Halayong Amihanan” maoy usa ka makainteres gayod nga pahayag sa kahulogan sa pag-atake ni Gog sa Magog sama sa gihulad diha sa Ezekiel kapitulo 38 ug 39. Nianang samang tuig, ang diskursong “Pagpuno sa Balay ug Himaya” nakapalipay niadtong nakadungog niana samtang nakita sa ilang kaugalingong mga mata ang dayag nga ebidensiya sa katumanan sa saad ni Jehova, sa Hageo 2:​7, sa pagdala sa bililhong mga butang, sa tilinguhaong mga butang, gikan sa tanang mga nasod ngadto sa balay ni Jehova.

Bisan pa, ang labing talagsaong kombensiyon sa modernong mga panahon gihimo sa New York niadtong 1958, sa dihang kapin sa un-kuwarto ka milyong tawo miawas sa kinadak-ang mga pasilidad nga mabatonan aron maminaw sa diskursong  “Ang Gingharian sa Diyos Nagamando Na​—Haduol na ba ang Kataposan sa Kalibotan?” May mga delegado gikan sa 123 ka kayutaan, ug ang ilang mga taho ngadto sa mga mamiminaw sa kombensiyon nakatabang sa paglig-on sa mga bugkos sa internasyonal nga panag-igsoonay. Aron matabangan ang espirituwal nga pagtubo niadtong mitambong ug aron ilang gamiton sa pagtudlo sa uban, ang mga publikasyon giluwat diha sa 54 ka pinulongan sa panahon nianang talagsaong kombensiyon.

Niadtong 1962, usa ka serye sa mga pakigpulong bahin sa temang “Pagpasakop sa Superyor nga mga Awtoridad” nagtul-id sa pagsabot nga nabatonan sa mga Saksi mahitungod sa kahulogan sa Roma 13:​1-7. Niadtong 1964, “Paglabang Gikan sa Kamatayon Ngadto sa Kinabuhi” ug “Gikan sa mga Lubnganan Ngadto sa Pagkabanhaw” nagpadako sa ilang apresasyon sa dakong kaluoy ni Jehova ingon sa gipakita sa tagana sa pagkabanhaw. Ug daghan pa kaayo sa ingong mga highlight sa kombensiyon ang mahisgotan.

Kada tuig may tinagpulo ka libo, oo, gatosan ka libo, nga bag-ohan ang nagtambong sa mga kombensiyon. Bisan tuod ang ipahayag nga impormasyon sa katibuk-an dili gayod bag-o sa organisasyon, kana sa subsob mohatag ug salabotan bahin sa balaang kabubut-on alang sa bag-ohang mga tumatambong nga tinuod makapalipay kanila. Lagmit sila makakita ug mapalihok sa pagpahimulos sa mga kahigayonan sa pag-alagad nga mobag-o sa bug-os sa dalan sa ilang kinabuhi.

Sa daghang kombensiyon ang pagtagad gipunting sa kahulogan sa pipila ka basahon sa Bibliya. Pananglitan, niadtong 1958 ug usab niadtong 1977, giluwat ang mga libro nga gigamit sa bug-os sa paghisgot sa mga tagna nga narekord sa propetang si Daniel mahitungod sa katuyoan sa Diyos alang sa usa ka kagamhanan sa kalibotan nga si Kristo ang Hari. Niadtong 1971, ang basahon ni Ezekiel ang gihatagan ug pagtagad, uban sa iyang pagpasiugda sa balaang pahayag, “Ang mga nasod makaila nga ako mao si Jehova.” (Ezek. 36:23) Niadtong 1972, ang mga tagna nga gitala ni Zacarias ug Hageo maoy gihisgotan nga detalyado. Niadtong 1963, 1969, ug 1988, may mabug-osong panaghisgot sa maukyabong mga tagna sa Pinadayag, nga tin-awng nagtagna sa pagkagun-ob sa Babilonyang Bantogan ug sa umaabot nga mahimayaong bag-ong mga langit ug bag-ong yuta sa Diyos.

Ang mga kombensiyon nagpasiugda ug nagkadaiyang mga tema​—Pag-uswag sa Teokrasya, Putli nga Pagsimba, Nahiusang mga Magsisimba, Maisogong mga Ministro, Mga Bunga sa Espiritu, Paghimog Tinun-an, Maayong Balita Alang sa Tanang Nasod, Balaang Ngalan, Balaang Soberanya, Balaang Pag-alagad, Madaogong Pagtuo, Pagkamaunongon sa Gingharian, Mga Maghuhupot sa Integridad, Pagsalig Kang Jehova, Diyosnong Debosyon, Mga Tigdala  sa Kahayag ug daghan pa. Ang kada usa niini nakaamot sa espirituwal nga pagtubo sa organisasyon ug niadtong nakig-uban niana.

Panukmod sa Buluhatong Pag-ebanghelyo

Ang dagkong mga kombensiyon, ingon man gagmayng mga asembliya, nahimong tinubdan sa dakong pagdasig may kalabotan sa pagwali sa maayong balita. Ang mga diskurso ug mga pasundayag nakahatag ug praktikal nga instruksiyon. Ang mga eksperyensiya nga nasinatian sa pag-alagad sa kanataran ingon man niadtong giasoy sa mga tawo nga bag-o pang natabangan sa pagkat-on sa kamatuoran sa Bibliya kanunay maapil sa programa. Dugang pa, ang aktuwal nga pag-alagad sa kanataran nga gieskedyul sa panahon sa kombensiyon sa daghang tuig nakatabang gayod. Kana mihatag ug maayong pamatuod diha sa dapit sa kombensiyon ug maoy tinubdan sa dakong pagdasig sa mga Saksi mismo.

Ang pag-alagad sa kanataran nahimong bahin sa naeskedyul nga kalihokan sa kombensiyon sa Winnipeg, Manitoba, Canada, niadtong Enero 1922. Kana usab bahin sa dakong kombensiyon nga gihimo sa Cedar Point, Ohio, sa ulahi nianang tuiga. Human niadto, nahimong regular nga batasan ang paggahin ug usa ka adlaw, o bahin sa usa ka adlaw o mga bahin sa pipila ka adlaw, nga ang mga delegado moambit sa kalihokan sa pagwali diha mismo ug palibot sa dapit sa kombensiyon. Sa dagkong dakbayanong mga dapit, kini naghatag ug kahigayonan sa mga tawo nga tagsa rang makontak sa mga Saksi aron makadungog sa maayong balita mahitungod sa katuyoan sa Diyos nga hatagan ug kinabuhing walay kataposan ang mga mahigugmaon sa pagkamatarong.

Sa Denmark ang maong mga adlaw sa pag-alagad sa kombensiyon gisugdan niadtong 1925, sa dihang ang 400 ngadto sa 500 nagtigom sa Nørrevold. Alang sa kadaghanan sa 275 nga nakig-ambit sa pag-alagad sa kanataran niadtong kombensiyona, kadto ang ilang unang higayon. Ang pila matahapon. Apan tapos sila makatilaw niana, sila nahimong madasigong mga ebanghelista sa ilang kaugalingon usab nga mga teritoryo. Human niadtong kombensiyona ug hangtod sa kataposan sa Gubat sa Kalibotan II, may daghang asembliya nga may usa-ka-adlaw nga pag-alagad nga gihimo sa Denmark, ug ang mga igsoon gidapit gikan sa kasikbit nga  mga lungsod. Ang dugang nga kasibot dayag samtang sila nakig-ambit nga nahiusa diha sa ministeryo ug unya nagtigom sa pagpaminaw sa mga pakigpulong. Ang susamang mga asembliya nga may pag-alagad​—apan tagduha ka adlaw​—gihimo sa Britanya ug Tinipong Bansa.

Sa mas dagkong mga kombensiyon ang kalihokan sa kanataran sa mga delegado subsob nga mas dako. Sugod niadtong 1936, ang pakigpulong publiko sa kombensiyon gianunsiyo pinaagi sa mahusay nga mga parada sa mga Saksi nga nagsul-ob ug mga plakard ug nang-apod-apod ug mga handbill sa kombensiyon. (Kadtong mga plakard sa sinugdan gitawag ug “sandwits nga mga karatola” tungod kay gisul-ob nga ang usa sa atubangan ug usa sa likod.) Usahay, usa ka libo o kapin pa ka mga Saksi ang nakig-ambit sa maong mga parada sa usa ka kombensiyon. Ang uban nakig-ambit diha sa regular nga balay-sa-balay nga mga pagduaw, nga nagdapit sa tanan sa pagtambong ug sa pagpaminaw sa programa. Makapadasig gayod sa indibiduwal nga mga Saksi nga magkauban sa pagsangyaw ug sa pagkakita sa ginatos, ug gani sa linibo, ka ubang mga Saksi nga nakig-ambit diha sa ministeryo uban kanila. Sa samang panahon, ang publiko sulod sa dakong dapit sa palibot nasayod nga ang mga Saksi ni Jehova anaa sa lungsod; ang mga tawo nakahigayon sa pagpaminaw sa ilang kaugalingon kon unsay ginatudlo sa mga Saksi ug sa pagpaniid nga aktuwal sa ilang panggawi.

Ang mga pakigpulong nga gihatag sa mga kombensiyon subsob nadunggan dili lamang sa dayag nga mga mamiminaw. Sa dihang si Brader Rutherford, sa usa ka kombensiyon sa Toronto, Canada, niadtong 1927, naghatag ug pakigpulong nga “Kagawasan Alang sa Katawhan,” kana gisibya pinaagi sa makasaysayanhong panagsumpay sa 53 ka estasyon sa radyo ngadto sa dakong internasyonal nga mamiminaw sa radyo. Sa sunod tuig, gikan sa Detroit, Michigan (T.B.A.), ang pakigpulong nga “Ang Magmamando Alang sa Katawhan” gisibya sa doble pang gidaghanon sa mga estasyon, ug ang shortwave nga radyo nagsibya niana ngadto sa mga mamiminaw hangtod pa sa Australia, New Zealand, ug Habagatang Aprika.

Niadtong 1931, ang pangunang mga network sa radyo mingdumili sa pagkooperar sa mga plano sa pagsibya sa usa ka diskurso sa kombensiyon ni Brader Rutherford; busa ang Watch Tower Society, nga nakigsabot sa American Telephone and  Telegraph Company, nagmugna sa iyang kaugalingong network nga may 163 ka estasyon, lakip ang kinadak-ang nakonektar-sa-linya nga network nga sukad nasibya, sa pagdala sa mensahe nga “Ang Gingharian, ang Paglaom sa Kalibotan.” Dugang pa, kapin sa 300 ka laing mga estasyon sa daghang mga dapit sa kalibotan nagsibya sa programa pinaagi sa ponograpo.

Sa panahon sa kombensiyon sa Washington, D. C., niadtong 1935, si Brader Rutherford nagpahayag bahin sa ulohang “Kagamhanan,” nga kusganong nagdala sa pagtagad sa kamatuoran nga ang Gingharian ni Jehova ubos ni Kristo sa dili madugay mopuli sa tanang tawhanong kagamhanan. Kapin sa 20,000 ang nakadungog niana sa Washington Auditorium. Ang pakigpulong gisibya usab sa tibuok yuta pinaagi sa radyo ug mga linya sa telepono, nga nakaabot sa Sentral Amerika ug Amerika del Sur, Uropa, Habagatang Aprika, ug mga isla sa Pasipiko, ug mga yuta sa Sidlakan. Kadtong nakadungog sa pakigpulong niining paagiha mahimong mikabat ug minilyon. Duha ka dagkong mga mantalaan sa Washington ang wala motuman sa ilang mga kontrata sa pagpatik sa diskurso. Apan ang mga sakyanang may trompa gigamit sa mga igsoon ngadto sa 3 ka lokasyon sa siyudad ug 40 ka ubang mga dapit sa palibot sa Washington, ug pinaagi niini ang pakigpulong gisibya pag-usab ngadto sa dugang pang mamiminaw nga gibanabanang 120,000.

Unya, niadtong 1938, gikan sa Royal Albert Hall, sa Londres, Inglaterra, ang prangkang diskurso nga “Atubanga ang mga Kamatuoran” gipaabot ngadto sa mga 50 ka siyudad sa kombensiyon sa tibuok kalibotan, nga gitambongan sa mga 200,000. Dugang pa, daghan kaayong mamiminaw sa radyo nakadungog sa maong pakigpulong.

Mao nga, bisan tuod ang mga Saksi ni Jehova diyutay ra, ang ilang mga kombensiyon may dakong papel sa katilingbanong pagmantala sa mensahe sa Gingharian.

Tapos-Gubat nga mga Kombensiyon sa Uropa

Alang niadtong nakatambong, ang pila ka kombensiyon mas inila kay sa uban. Matuod kini sa mga gihimo sa Uropa dihadiha tapos sa Gubat sa Kalibotan II.

Ang usa sa maong kombensiyon gihimo sa Amsterdam, Netherlands, sa Agosto 5, 1945, sa wala pay upat ka bulan human pagawasa ang mga Saksi gikan sa mga kampo konsentrasyong Aleman. Mga 2,500 ka delegado ang gidahom; 2,000 niini ang magkinahanglan ug sak-anan. Sa pagtaganag mga dapit nga katulogan, ang lokal nga mga Saksi nagbukhad ug banig nga uhot sa salog sa ilang mga balay. Ang mga delegado nangabot gikan sa tanang direksiyon pinaagi sa tanang posibleng paagi​—pinaagig bangka, sa mga trak, sa mga bisikleta, ug pila ka pag-angkas.

Sa maong kombensiyon sila nangatawa ug nanghilak, sila nanag-awit, ug sila nagpasalamat kang Jehova tungod sa iyang kaayo. Sama sa giingon sa usa nga nakatambong: “Ang ilang gibati maoy dili mabatbat nga kalipay sa usa ka teokratikanhong organisasyon nga bag-o lang gibadbaran sa mga gapos!” Sa wala pa ang gubat, wala pay 500 ang mga Saksi sa Netherlands. Ang gidakop ug gibilanggo 426; ug niini, 117 ang namatay ingong direktang resulta sa paglutos. Pagkadako sa kalipay sa dihang panahon sa asembliya nakita sa pipila ang ilang mga hinigugma nga abi nilag patay na! Ang uban nanghilak kay wala makakita sa ilang gipangita. Nianang gabhiona 4,000 ang naminaw pag-ayo sa pakigpulong publiko nga nagpatin-aw  kon nganong ang mga Saksi ni Jehova maoy tumong niadtong mainit nga paglutos. Bisan pa sa ilang giantos, sila naorganisar sa pagpadayon sa ilang hinatag-sa-Diyos nga buluhaton.

Sa sunod tuig, 1946, ang mga igsoon sa Alemanya naghikay ug kombensiyon sa Nuremberg. Sila gitugotan sa paggamit sa Zeppelinwiese, ang kanhi paradahan sa mga sundalo ni Hitler. Sa ikaduhang adlaw sa kombensiyon, si Erich Frost, nga sa personal nakasinati sa kapintasan sa Gestapo ug nakagugol ug mga katuigan sa kampo konsentrasyon sa Nazi, naghatag sa pakigpulong publiko nga “Ang mga Kristohanon Diha sa Grabeng Pagsulay.” Ang 6,000 ka Saksi nga nagtambong gikuyogan sa 3,000 nga taga-Nuremberg alang sa okasyon.

Ang kataposang adlaw niadtong kombensiyona naatol usab sa adlaw nga pagabasahon ang mga sentensiya sa gibistang mga krimen-sa-gubat sa Nuremberg. Ang mga awtoridad sa militar nagpahibalo nga may curfew niadtong adlawa, apan tapos sa dugayng pakigsabot sila misugot nga tungod sa baroganan sa mga Saksi ni Jehova atubangan sa pagsupak sa Nazi, dili angay nga sila babagan aron taposon ang ilang kombensiyon diha sa kalinaw. Mao nga, niadtong kataposang adlaw, ang mga igsoon nagtigom sa pagpaminaw sa makapatandog nga pakigpulong “Walay Kahadlok Bisan pa sa Panagkomplot sa Kalibotan.”

Ilang nasabtan ang pagdumala ni Jehova diha sa nagkahitabo. Sa panahon mismo nga gisentensiyahan ang mga lalaki nga naghawas sa usa ka pagmando nga nagsulay sa pagpuo kanila, ang mga Saksi ni Jehova nagtigom sa pagsimba kang Jehova sa dapit nga gipasundayagan ni Hitler sa iyang labing talagsaong Nazi nga gahom. Matud sa tsirman sa kombensiyon: “Ang pagkasinati lamang niining adlawa, nga usa lamang ka pasiuna sa kadaogan sa katawhan sa Diyos ibabaw sa ilang mga kaaway sa gubat sa Armageddon, takos sa siyam ka tuig sa kampo konsentrasyon.”

Ubang Halandumong mga Kombensiyon

Samtang ang kalihokan sa mga Saksi ni Jehova mikatap, ang mga kombensiyon  gihimo sa tibuok yuta. Kining tanan may talagsaong mga bahin alang niadtong nanambong.

Sa Kitwe, Amihanang Rhodesia (karon Zambia), sa kinataliwad-an sa Copperbelt, usa ka kombensiyon ang gieskedyul nga himoon sa pagduaw sa presidente sa Watch Tower Society niadtong 1952. Ang dapit maoy usa ka dakong luna sa gawas sa usa sa mga kampo sa minahan, sa dapit nga gitawag karon ug Chamboli. Ang taluktok sa biniyaang bungtod sa anay gipatag, ug gitukoran ug pawod nga bubong nga magsilbing plataporma. Ang ubang pawod nga mga bubong nga magsilbing katulogan, nga duha ka andana, milukop sa mga 180 metros gikan sa pangunang dapit lingkoranan nga samag mga rayos sa ligid. Ang mga hamtong ug batang lalaki natulog sa pila niana; ang mga hamtong ug batang babaye sa uban. Ang pila ka delegado mibiyahe nga nagbisikleta sa duha ka semana aron makatambong. Ang uban mibaktas ug daghang adlaw ug unya misakay sa karaang bus aron makompleto ang biyahe.

Sa panahon sa mga sesyon kadtong nanambong naminaw pag-ayo, bisan tuod ang lingkoranan maoy gahing mga bangko nga ginama sa kawayan ug walay atop. Sila nanganha sa pagpaminaw, ug dili nila buot masayloan ang usa ka pulong. Ang pag-awit nianang 20,000 ka mamiminaw nakapatubod sa mga luha sa mga mata​—maanindot kaayo kadto. Walay duyog sa mga tulonggon, apan ang kananoy sa mga tingog nindot kaayo. Dili lamang sa ilang pagkanta apan sa tanang paagi, ang panaghiusa napadayag taliwala niining mga Saksi, bisan tuod sila lainlain ug kagikan ug tribo.

Ug imo bang mahanduraw ang mga pagbati sa mga Saksi ni Jehova sa Portugal sa dihang, tapos sa pakigbugno alang sa kagawasan sa pagsimba nga giabtan ug hapit 50 ka tuig, ang mga Saksi didto nakabaton ug legal nga pag-ila niadtong Disyembre 18, 1974. Niadtong panahona sila mga 14,000 lamang. Sulod sa pipila ka adlaw, 7,586 kanila ang mipuno sa usa ka isport pabilyon sa Porto. Sa sunod nga adlaw, laing 39,284 ang miawas sa estadyum sa potbol sa Lisbon. Sila si Brader Knorr ug Franz ang kauban nila niadtong malipayong okasyona, usa nga dili gayod malimtan sa daghan.

Pag-organisar ug Internasyonal nga mga Panagkatigom

Sulod sa kapig tunga sa siglo, ang mga Saksi ni Jehova nakahimo ug dagko, daghan nga lokasyon nga mga kombensiyon nga nagdungan diha sa daghang kayutaan. Ang ilang pagbati sa internasyonal nga panag-igsoonay napalig-on pa niining mga okasyona sa dihang silang tanan makapatalinghog sa pangunang diskurso nga gikan sa usa ka punoang siyudad.

Hinuon, pag-abot sa 1946 usa ka dakong internasyonal nga kombensiyon ang nagpatigom diha sa usa ka siyudad sa mga delegado gikan sa daghang dapit sa yuta. Kini nahitabo sa Cleveland, Ohio. Bisan tuod lisod pa ang pagbiyahe sa panahon  tapos sa gubat, ang nanambong mikabat ug 80,000, lakip ang 302 ka delegado gikan sa 32 ka nasod gawas sa Tinipong Bansa. Ang mga sesyon gihimo sa 20 ka pinulongan. Daghang praktikal nga instruksiyon ang gihatag uban sa panglantaw sa pagpakaylap sa buluhatong pag-ebanghelyo. Usa sa mga gipasiugda sa kombensiyon mao ang pakigpulong ni Brader Knorr mahitungod sa mga suliran sa pagpanukod pag-usab ug sa pagpadako. Ang mamiminaw malipayong namalakpak pagkadungog nila sa mga plano alang sa pagpadako sa imprintahan ug sa mga pasilidad sa buhatan sa hedkuwarter sa Sosyedad, ingon man sa mga pasilidad niana sa pagsibya sa radyo, alang sa pagtukod ug mga sangang buhatan sa pangunang mga nasod sa kalibotan, ug alang sa pagpalapad sa buluhaton sa misyonaryo. Dihadiha sa  pagkahuman niadtong kombensiyona, gihikay ang mga detalye aron nga si Brader Knorr ug si Brader Henschel makabiyahe sa tibuok kalibotan sa pagpadapat sa butang nahisgotan.

Sa mga tuig nga misunod, ang tinuod makasaysayanhong mga kombensiyon gihimo sa Yankee Stadium sa Siyudad sa New York. Sa unang kombensiyon, gikan sa Hulyo 30 hangtod sa Agosto 6, 1950, mga delegado gikan sa 67 ka kayutaan ang nanambong. Lakip sa programa ang mugbong mga taho sa mga alagad sa sanga, mga misyonaryo, ug ubang mga delegado. Kini naghatag sa kombensiyon ug makalilipayng pagsabot sa mainitong buluhaton sa pag-ebanghelyo nga ginahimo sa tanang kayutaan nga ilang gigikanan. Sa kataposang adlaw, ang nanambong mikabat  ug 123,707 alang sa diskursong “Ikaw ba Mabuhing Walay Kataposan sa Kalipay sa Yuta?” Ang tema sa kombensiyon maoy “Pagtubo sa Teokrasya.” Ang pagtagad gitumong sa dakong pagtubo sa gidaghanon. Bisan pa, ingon sa mainitong gipunting sa tsirman, si Grant Suiter, wala kini himoa sa pagdayeg kang bisan kinsang utokan sa sulod sa makitang organisasyon. Inay, pahayag niya: “Ang bag-ong kusog sa gidaghanon maoy nadedikar sa pagpasidungog kang Jehova. Mao kana ang angay nga paagi, ug dili gayod nato kana mabatonan sa laing paagi.”

Niadtong 1953, ang laing kombensiyon gihimo sa Yankee Stadium sa New York. Niining higayona may kinatas-ang mitambong nga 165,829. Sama sa unang kombensiyon didto, ang programa napuno sa mga panaghisgot mahitungod sa maukyabong mga tagna sa Bibliya, sa praktikal nga tambag kon sa unsang paagi buhaton ang pagwali sa maayong balita, ug mga taho gikan sa daghang kayutaan. Bisan tuod ang mga sesyon nagsugod sa mga alas 9:30 s.b., kasagaran dili sila matapos hangtod alas 9:00 o alas 9:30 s.g. Ang kombensiyon mitagana ug walo ka bug-os nga adlaw sa makalilipayng espirituwal nga kombira.

Alang sa ilang kinadak-ang kombensiyon, sa New York niadtong 1958, gikinahanglan nga gamiton dili lamang ang Yankee Stadium apan hasta pa ang duol nga Polo Grounds ingon man sa mga dapit alang sa sobrang tawo diha sa gawas sa mga estadyum aron mapaarang ang mga kombensiyonista. Sa kataposang adlaw, sa dihang ang tanang lingkoranan puno na, gihatag ang espesyal nga permiso nga magamit ang nataran nga dulaanan sa Yankee Stadium, ug pagkamakapalipay nga talan-awon samtang ang linibo miganayan, nanghubo sa ilang mga sapatos, ug nanglingkod sa sagbot! Ang ihap nagpakita nga 253,922 ang mitambong sa pagpaminaw sa pakigpulong publiko. Usa ka dugang ebidensiya sa panalangin ni Jehova sa ministeryo sa iyang mga alagad nakita sa dihang ang 7,136 niining kombensiyona ang nagpasimbolo sa ilang dedikasyon pinaagi sa pagpabawtismo sa tubig​—kapin sa doble sa gidaghanon nga nabawtismohan sa makasaysayanhong okasyon sa Pentekostes 33 K.P., sumala sa taho sa Bibliya!​—Buh. 2:41.

Ang bug-os nga pagpalakaw niining mga kombensiyona nagpamatuod ug labaw pa kay sa maayong organisasyon. Kadto maoy pagpadayag sa espiritu  sa Diyos nga nagalihok taliwala sa iyang katawhan. Ang inigsoong gugma nga pinasikad sa gugma alang sa Diyos maoy dayag bisan diin. Walay sinuholag dako nga mga organisador. Ang matag departamento gipalihok sa walay-suhol nga mga boluntaryo. Ang Kristohanong mga brader ug sister, kasagaran pinamilya, nag-atiman sa mga baligyaanan ug meryenda. Nag-andam usab sila ug init nga mga pagkaon, ug diha sa dagkong mga tolda sa gawas sa estadyum, ilang gisilbihan ang mga delegado sa gikusgong abot ug usa ka libo kada minuto. Tinagpulo ka libo​—nga tanan nalipay nga nakaambit sa buluhaton​—nagsilbi ingong mga katabang ug nag-atiman sa panginahanglan sa konstruksiyon, pagluto ug pagsilbi sa mga pagkaon, pagpanghinlo, ug daghan pa.

Daghang boluntaryo migugol ug ginatos ka libong oras aron matagan-an ang panginahanglan sa puluy-anan sa mga delegado. Sa pila ka tuig, aron matagan-an sa labing menos ang pipila sa mga kombensiyonista, giorganisar ang mga siyudad sa treyler ug mga tolda. Niadtong 1953 ang mga Saksi nag-ani sa 16 ka ektaryang trigo, nga wala magpasuhol, alang sa usa ka mag-uuma sa New Jersey nga nagpaabang kanila sa iyang yuta alang sa ilang siyudad sa treyler. Ang mga pasilidad sa sanitasyon, suga, kaligoan, labhanan, kapeteriya, ug tindahan sa groserya gitukod sa pagtagana alang sa populasyon nga kapin sa 45,000. Samtang sila nangabot, usa ka siyudad ang mitungha sa usa ka gabii. Linibo pa ang ming-estar sa mga hotel ug pribadong mga balay sa sulod ug palibot sa New York. Kadto maoy usa ka dakong buluhaton. Pinaagi sa panalangin ni Jehova, kadto nahimong malamposon.

Mga Kombensiyon nga Milibot

Ang mga membro niining internasyonal nga panag-igsoonay dulot nga interesado sa isigka-Saksi sa ubang kayutaan. Ingong sangpotanan, sila nagpahimulos sa mga kahigayonan sa pagtambong sa mga kombensiyon gawas sa ilang kaugalingong nasod.

Sa dihang ang una sa serye sa Putling Pagsimba nga Asembliya nagtigom sa Wembley Stadium sa Londres, Inglaterra, niadtong 1951, dihay nanambong nga mga Saksi gikan sa 40 ka nasod. Ang programa nagpasiugda sa praktikal nga bahin sa matuod nga pagsimba ug sa paghimo sa ministeryo nga karera sa kinabuhi sa usa. Gikan sa Inglaterra, daghang Saksi ang mibiyahe ngadto sa Kontinente, diin siyam pa ka kombensiyon ang pagahimoon sulod sa sunod duha ka bulan. Ang kinadak-an niini mao ang sa Frankfurt am Main, Alemanya, nga gitambongan sa 47,432 gikan sa 24 ka kayutaan. Ang kainit sa mga igsoon napasundayag sa pagkatapos sa programa sa dihang misugod sa pagtokar ang orkestra ug ang Alemang mga igsoon dihadiha nanganta ug awit sa panamilit nga nagtugyan sa Diyos sa ilang isigka-Saksi nga nangabot gikan sa ubang mga nasod aron sa pagkuyog kanila. Gipakayabkayab ang mga panyo, ug ginatos ang nagpanon sa pagtabok sa natad sa pagpahayag sa personal nga apresasyon tungod niining dakong teokratikanhong piyesta.

Niadtong 1955, daghan pang mga Saksi ang naghikay sa pagduaw sa ilang Kristohanong mga igsoon sa laing nasod sa panahon sa kombensiyon. Pinaagi sa gipakyawng duha ka barko (ang kada usa may 700 ka pasahero) ug 42 ka gipakyawng mga ayroplano, ang mga delegado gikan sa Tinipong Bansa ug Canada nangadto sa Uropa. Ang Uropanhong edisyon sa mantalaang The Stars and Stripes, nga gipatik sa Alemanya, naghubit sa pagpangabot sa mga Saksi ingon nga “tingali  ang kinadak-ang pagsulod sa daghang Amerikano latas sa Uropa sukad sa pagsulong sa Alyado panahon sa Gubat sa Kalibotan II.” Ang ubang delegado naggikan sa Sentral Amerika ug Amerika del Sur, Asia, Aprika, ug Australia. Bisan pa sa mga singkamot sa klero sa Kakristiyanohan nga pugngan ang mga Saksi sa paghimo sa ilang mga kombensiyon sa Roma ug Nuremberg, kining duha ug unom pa gihimo sa Uropa panahon sa ting-init. Ang tumatambong maoy gikan sa 4,351 sa Roma ngadto sa 107,423 sa Nuremberg. Ang laing grupo sa 17,729 nagtigom sa Waldbühne nga kaniadto gitawag ug West Berlin, nga maabot uban ang menos nga kapeligrohan sa mga igsoon gikan sa Sidlakang sona niadtong panahona. Daghan kanila nabilanggo tungod sa ilang pagtuo o may membro sa pamilya nga kaniadto nabilanggo, apan sila lig-on gihapon sa pagtuo. Pagkahaom sa tema sa kombensiyon​—“Madaogong Gingharian”!

Bisan tuod may daghang internasyonal nga kombensiyon, ang nahitabo niadtong 1963 maoy kinaunahan sa iyang matang. Kadto maoy libot-sa-kalibotan nga kombensiyon. Nga nagsugod sa Milwaukee, Wisconsin, sa Tinipong Bansa, kana mibalhin ngadto sa New York; sunod, ngadto sa upat ka dagkong siyudad sa Uropa; lahos sa Tungang Sidlakan; padayon sa India, Burma (karon Myanmar), Thailand, Hong Kong, Singapore, Pilipinas, Indonesia, Australia, Taiwan, Japan, New Zealand, Fiji, Republika sa Korea, ug Hawaii; ug unya balik ngadto sa dakong yuta sa Amerika del Norte. Tanantanan, ang mga delegado gikan sa 161 ka kayutaan presente. Ang kabug-osan sa nagtambong sobra sa 580,000. May 583 ka tawo, nga gikan sa mga 20 ka kayutaan, nga nag-uban sa kombensiyon, nga nagtambong gikan sa usa ka nasod ngadto sa lain, libot sa kalibotan. Ang espesyal nga mga pagpasiyo nakapaarang kanila sa pagkakita sa mga dapit nga may relihiyosong kalabotan, ug sila usab nakig-ambit uban sa ilang lokal nga mga brader ug sister diha sa balay-sa-balay nga ministeryo. Kining maong mga biyahedor migasto sa ilang kaugalingong salapi.

Ang mga delegado sa Latin Amerika gihawasan gayod sa kadaghanan sa internasyonal nga mga kombensiyon. Apan niadtong 1966-67, kadto maoy ilang turno sa pag-abiabi sa mga kombensiyon. Kadtong mga nanambong dili gayod makalimot sa drama nga naghatag kinabuhi sa asoy sa Bibliya mahitungod kang Jeremias ug kana nakatabang sa tanan sa pag-apresyar sa iyang kahulogan sa atong adlaw. a Ang mga bugkos sa Kristohanong gugma napalig-on samtang ang mga bisita nakakita sa ilang kaugalingong mata sa kahimtang nga niana ang dakong kampanya sa edukasyon sa Bibliya ginahimo sa Latin Amerika. Sila dulot nga natandog sa lig-ong pagtuo sa isigka-magtutuo, nga daghan kanila nakabuntog sa halos dili mabangbang nga mga kababagan​—pagsupak sa pamilya, mga baha, pagkawala sa mga kabtangan​—aron makatambong. Sila nadasig gayod tungod sa mga kasinatian nga sama niadtong iyaha sa luyahon-ug-panglawas nga taga-Uruguay nga espesyal payunir nga sister kinsa giinterbiyu ug uban niya sa plataporma ang kadaghanan sa 80 ka tawo nga iyang natabangan nga mouswag ngadto sa punto sa Kristohanong pagpabawtismo! (Sa tuig 1992, siya nakatabang sa 102 ka tawo kutob sa punto nga magpabawtismo. Siya sa gihapon luyahon ug sa gihapon usa ka espesyal payunir!) Pagkamakapadasig, usab, nga mahibalag ang mga misyonaryo gikan sa kinaunahang mga klase sa Gilead nga nagbuhat gihapon sa ilang mga asaynment! Kadtong  mga kombensiyona maoy maayong panukmod sa buluhaton nga ginahimo sa maong bahin sa kalibotan. Sa kadaghanan niadtong mga kayutaan, karon may 10, 15, o gani 20 ka pilo ang gidaghanon sa mga magdadayeg kang Jehova kay sa kaniadto.

Pipila ka tuig sa ulahi, niadtong 1970-71, posible niadto sa mga Saksi gikan sa ubang nasod sa pagpakig-uban sa ilang mga igsoon sa internasyonal nga mga kombensiyon nga gihimo sa Aprika. Ang kinadak-an niining mga kombensiyon maoy sa Lagos, Nigeria, diin ang tanang pasilidad kinahanglang tukoron gikan sa ubos pataas. Aron panalipdan ang mga delegado gikan sa init nga adlaw, usa ka siyudad nga ginama sa kawayan ang gitukod​—mga lingkoranan, tulganan, kapeterya, ug ubang departamento. Kini nagkinahanglan ug 100,000 ka bulos sa kawayan ug 36,000 ka dagko, tinagik nga mga banig nga tangbo​—ang tanan giandam sa mga brader ug sister. Ang programa gihimo diha sa 17 ka pinulongan nga dungan. Ang nagtambong mikabat ug 121,128, ug 3,775 ka bag-ohang mga Saksi ang gibawtismohan. Daghang tribonhong grupo ang gihawasan, ug daghan niadtong nanambong maoy mga tawo nga sa kaniadto naggubatay batok sa usag usa. Apan karon,  pagkamakapalipay nga makita sila nga nahiusa diha sa mga bugkos sa tinuod nga Kristohanong panag-igsoonay!

Tapos sa kombensiyon, ang pila ka langyawng mga delegado mingbiyahe pinaagig bus ngadto sa Igboland aron tan-awon ang dapit nga grabeng naapektohan sa bag-o pang gubat sibil. Naukay gayod ang matag lungsod nga maagian samtang ang mga bisita giabiabi ug gihalog sa lokal nga mga Saksi. Ang mga tawo nanagan sa kadalanan sa pagtan-aw. Ang maong pasundayag sa gugma ug panaghiusa tali sa itom ug puti maoy usa ka butang nga wala nila makita kaniadto.

Sa pipila ka kayutaan ang gidaghanon sa mga Saksi ni Jehova dili makatugot nga magtigom sa usa ka dapit. Hinuon, usahay, ang pipila ka dagkong kombensiyon himoon sa samang panahon, nga sundan sa daghan pa, sa matag semana. Niadtong 1969, ang panaghiusa nga gibati sa mga kombensiyon nga gihikay niining paagiha gipadako pa sa kamatuoran nga ang pila ka pangunang mga mamumulong nangadto-nganhi sakayg ayroplano tali sa mga kombensiyon, mao nga naalagaran silang tanan. Niadtong 1983 ug 1988, ang susamang panaghiusa gibati sa dihang ang ubay-ubay nga dagkong kombensiyon nga naggamit sa samang pinulongan gikonektar, gani sa daghang nasod, pinaagi ug telepono sa pagpaabot sa yawing mga diskurso nga gihatag sa mga membro sa Nagamandong Lawas. Hinuon, ang tinuod nga pundasyon sa panaghiusa taliwala sa mga Saksi ni Jehova mao ang kamatuoran nga silang tanan nagasimba kang Jehova nga mao lamang ang tinuod nga Diyos, silang tanan nag-isip sa Bibliya nga ilang giya, silang tanan nakabenepisyo gikan sa samang programa sa espirituwal nga pagpakaon, silang tanan nagsalig kang Jesu-Kristo ingong ilang Pangulo, silang tanan nagtinguha sa pagpadayag sa mga bunga sa espiritu sa Diyos diha sa ilang mga kinabuhi, silang tanan nagsalig sa Gingharian sa Diyos, ug silang tanan nakig-ambit sa pagwali sa maayong balita sa maong Gingharian ngadto sa uban.

Giorganisar Alang sa Internasyonal nga Pagdayeg Kang Jehova

Ang mga Saksi ni Jehova mingdaghan ngadto sa punto nga sila mas daghan pa kay sa populasyon sa ubay-ubayng tinagsa ka mga nasod. Aron nga ang ilang mga kombensiyon makapalampos sa pinakamaayo, gikinahanglan ang maampingon kaayong pagplano. Hinuon, ang yano gipublikar nga mga hangyo bahin sa kon diin ang mga Saksi gikan sa kadaiyang mga dapit angay motambong kasagaran mao lang ang gikinahanglan aron maseguro nga adunay igong luna alang sa tanan. Sa dihang giplano ang internasyonal nga mga kombensiyon, karon subsob gikinahanglan nga ang Nagamandong Lawas magtagad dili lamang sa gidaghanon sa mga Saksi gikan sa ubang nasod nga gustong moadto ug makaarang sa paghimo niana apan usab ang gidak-on sa mabatonan nga mga pasilidad sa kombensiyon, ang gidaghanon sa lokal nga mga Saksi nga motambong, ug ang gidaghanon sa sak-anan nga bakante alang sa mga delegado; unya ang kinatas-ang gidaghanon ang itagana sa matag nasod. Tinuod kana may kalabotan sa tulo ka “Diyosnong Debosyon” nga mga Kombensiyon nga gihimo sa Polandia niadtong 1989.

Alang niadtong mga kombensiyon ang mga 90,000 ka mga Saksi ni Jehova ang gidaghanon gikan sa Polandia, ingong dugang sa linibo ka bag-ohang mga interesadong tawo. Daghan usab ang gidapit sa pagtambong gikan sa Britanya, Canada, ug Tinipong Bansa. Daghang delegado ang giabiabi gikan sa Italya, Pransiya,  ug Hapon. Ang uban nangabot gikan sa Scandinavia ug Gresya. Sa labing menos 37 ka kayutaan ang gihawasan. Alang sa pila ka bahin sa programa, gikinahanglan nga hubaron ang Polako o Ingles nga mga pakigpulong ngadto sa mga 16 ka ubang pinulongan. Ang tanang mitambong maoy 166,518.

Dagkong grupo sa mga Saksi niining mga kombensiyona ang naggikan sa kanhi Unyon Sobyet ug gikan sa Czechoslovakia; dodagkong grupo usab ang nanambong gikan sa ubang mga nasod sa Sidlakang Uropa. Ang mga hotel ug mga dormitoryo sa tunghaan dili igo sa tanan. Sa kamaabiabihon, ang Polakong mga Saksi nagbukas sa ilang mga kasingkasing ug sa ilang mga puy-anan, nga malipayong nagpaambit sa ilang nabatonan. Usa ka kongregasyon nga may 146 ka magmamantala nakatagana ug katulganan alang sa kapin 1,200 ka delegado. Alang sa pila nga nagtambong niining mga kombensiyona, kini maoy unang higayon nga sila nakatambong sa usa ka dakong tigom nga kapin sa 15 o 20 sa katawhan ni Jehova. Ang ilang mga kasingkasing nahupong sa apresasyon samtang sila nagtan-aw sa tinagpulo ka libo diha sa estadyum, nga nagduyog kanila sa pag-ampo, ug nahiusa sa ilang mga tingog diha sa mga awit sa pagdayeg kang Jehova. Sa dihang sila nakighimamat sa usag usa panahon sa mga intermisyon, may mainitong paghalogay, bisan tuod ang kalainan sa pinulongan subsob nakapugong kanila sa pagpahayag sa ilang pagbati.

Sa naghinapos na ang kombensiyon, ang ilang mga kasingkasing napuno ug pasalamat kang Jehova, kinsa nagpaposible nianang tanan. Sa Warsaw, tapos sa panamilit nga komento sa tsirman, ang mamiminaw misigabo sa pagpamalakpak nga walay undang sa labing menos napulo ka minutos. Tapos sa paniklop nga awit ug  pag-ampo, ang pamalakpak nagpadayon, ug ang mga mamiminaw nagpabilin pa ug dugay diha sa mga lingkoranan. Naghulat sila ug daghang tuig alang niining okasyona, ug dili nila gusto nga kana matapos.

Sa sunod nga tuig, 1990, wala pay lima ka bulan tapos sa pagkuha sa 40-ka-tuig nga pagdili sa mga Saksi ni Jehova sa kanhi Sidlakang Alemanya, ang laing makalilipayng internasyonal nga kombensiyon gihimo, kining usa sa Berlin. Nahiapil sa 44,532 nga nanambong maoy mga delegado gikan sa 65 ka lainlaing nasod. Gikan sa pila ka kayutaan, pipila lamang ang nanganha; gikan sa Polandia, mga 4,500. Ang mga pulong dili makapahayag sa halalom nga mga pagbati niadtong walay kagawasan kaniadto sa pagtambong sa maong kombensiyon, ug sa dihang ang tibuok mamiminaw nagduyog sa mga pag-awit ug pagdayeg kang Jehova, sila wala makapugong sa ilang mga luha sa kalipay.

 Sa hinapos nianang tuiga, sa dihang ang susamang kombensiyon gihimo sa São Paulo, Brazil, duha ka dagkong mga estadyum ang gikinahanglan aron maarang ang internasyonal nga mamiminaw nga 134,406. Gisundan kini sa usa ka kombensiyon sa Argentina, nga sa makausa pa duha ka estadyum ang dungan nga gigamit aron mapaigo ang internasyonal nga mamiminaw. Sa pagsugod sa 1991, dugang internasyonal nga mga kombensiyon ang gihimo sa Pilipinas, Taiwan, ug Thailand. Daghang mamiminaw ang nanambong usab gikan sa daghang nasod niadtong tuiga alang sa mga kombensiyon sa Sidlakang Uropa​—sa Hungaria, Czechoslovakia, ug sa gitawag karon nga Croatia. Ug sa 1992, ang mga delegado gikan sa 28 ka kayutaan nag-isip niana nga usa ka linaing pribilehiyo nga makauban sa 46,214 sa St. Petersburg alang sa unang tinuod internasyonal nga kombensiyon sa mga Saksi ni Jehova sa Rusya.

Mga Kahigayonan Alang sa Regular Espirituwal nga Pagpabaskog

Dili tanang mga kombensiyon nga gihimo sa mga Saksi ni Jehova maoy internasyonal nga mga tigom. Hinuon, ang Nagamandong Lawas naghikay ug dagkong mga kombensiyon sa makausa kada tuig, ug ang samang programa gipahimuslan sa tibuok kalibotan diha sa daghang pinulongan. Kining mga kombensiyona mahimong dakodako, nga naghatag kahigayonan sa pagpakig-uban sa ubang mga Saksi gikan sa daghang dapit, o mahimong kana gamaygamay ra ug himoon diha sa daghang siyudad, aron dili malisdan ang mga bag-ohan sa pagtambong ug aron ang publiko diha sa ginatos ka gagmayng mga siyudad makakita sa duol sa usa ka dakong representasyon sa mga Saksi ni Jehova.

Dugang pa, makausa sa usa ka tuig ang kada sirkito (nga gilangkoban sa tingali 20 ka kongregasyon) magtigom alang sa duha-ka-adlaw nga programa sa espirituwal nga tambag ug pagdasig. b Usab, sukad niadtong Septiyembre 1987, ang espesyal nga asembliya, usa ka makapalig-ong usa-ka-adlaw nga programa, gihikay alang sa matag sirkito makausa kada tuig. Kon posible, usa ka membro sa hedkuwarter sa Sosyedad o usa nga gikan sa lokal nga sangang-buhatan ipadala sa pagpakig-ambit sa programa. Kining mga programaha giapresyar ug dako sa mga Saksi ni Jehova. Sa daghang dapit ang mga dapit sa asembliya dili layo o lisod abton. Apan dili kanunay ingon niana. Usa ka nagapanawng magtatan-aw ang nahinumdom sa edarang magtiayon nga nagbaktas ug 76 kilometros nga may mga maleta ug mga habol aron motambong sa sirkitong asembliya sa Zimbabwe.

Ang pag-alagad sa kanataran sa panahon sa kombensiyon dili na bahin sa tanan niining mga asembliya, apan kana dili tungod kay ang mga Saksi sa usa ka paagi nag-isip niana nga dili hinungdanon. Sa kadaghanang kaso ang mga tawo nga nagpuyo duol sa dapit sa asembliyahan sa karon ginaduaw na nga regular sa lokal nga mga Saksi​—sa pila ka kahimtang, sa matag pipila ka semana. Ang mga delegado sa asembliya nagmaalisto sa mga kahigayonan alang sa impormal nga pagsangyaw, ug ang ilang Kristohanong panggawi naghatag ug kusganong pamatuod sa laing paagi.

Ebidensiya sa Matuod nga Panag-igsoonay

Ang panag-igsoonay nga napadayag taliwala sa mga Saksi sa ilang mga kombensiyon makita dayon sa mga tigpaniid. Sila makakita nga walay pinalabi taliwala  kanila ug ang tinuod nga kainit maoy dayag bisan taliwala niadtong bag-o lang nag-ilhanay sa usag usa. Sa panahon sa Balaang Kabubut-on Internasyonal nga Asembliya sa New York niadtong 1958, ang New York Amsterdam News (Agosto 2) nagtaho: “Bisan diin ang mga Negro, mga puti ug mga taga-Sidlakan, gikan sa tanang kahimtang sa kinabuhi ug tanang dapit sa kalibotan, nakig-ubanay nga malipayon ug libre. . . . Ang magsisimbang mga Saksi gikan sa 120 ka kayutaan nagkinabuhi ug nagsimba nga malinawon nga nagpakita sa mga Amerikano nga sayon lang kana nga himoon. . . . Ang Asembliya maoy usa ka masilakon nga pananglitan kon sa unsang paagi ang mga tawo makatrabaho ug makapuyo nga magkauban.”

Dili pa dugay, sa dihang ang mga Saksi ni Jehova nagkombensiyon ug dungan sa Durban ug sa Johannesburg, Habagatang Aprika, niadtong 1985, ang mga delegado naglakip sa tanang dagkong mga grupo sa rasa ug pinulongan sa Habagatang Aprika, ingon man sa mga representante gikan sa 23 ka ubang kayutaan. Ang mainitong pakig-ubanay taliwala sa 77,830 nga nagtambong maoy dayag kaayo. “Matahom kini,” matud sa usa ka batan-ong Indian nga babaye. “Ang pagkakita sa mga tabonon, mga Indian, mga puti, ug mga itom nga nag-ubanay tanan nakausab sa akong tibuok panglantaw sa kinabuhi.”

Kining pagbati sa panag-igsoonay labaw pa sa mga pahiyom, mga lamano, ug pagtawganay sa usag usa ug “brader” ug “sister.” Ingong pananglitan, sa dihang gihimo ang mga kahikayan alang sa “Walay Kataposang Maayong Balita” nga Asembliya sa tibuok kalibotan niadtong 1963, ang mga Saksi ni Jehova gipahibalo nga kon sila buot nga motabang sa uban sa pinansiyal aron makatambong sa kombensiyon, ang Sosyedad malipay sa pagseguro nga ang mga salapi makabenepisyo sa mga igsoon sa tanang dapit sa yuta. Walay paghangyo ug salapi, ug walay pagakuhaon alang sa administratibong gastos. Ang tanang salapi gipadapat sa iyang tuyo. Niining paagiha, 8,179 ang natabangan sa pagtambong sa kombensiyon. Ang mga delegado gikan sa matag nasod sa Sentral Amerika ug Amerika del Sur natabangan, ingon man ang linibo gikan sa Aprika ug daghan gikan sa Haduol nga Sidlakan ug sa Halayong Sidlakan. Ang dakodakong bahin niadtong gitabangan maoy mga brader ug mga sister nga nakagugol ug daghang tuig sa bug-os-panahong ministeryo.

Sa hinapos ang 1978, usa ka kombensiyon ang gieskedyul nga himoon sa Auckland, New Zealand. Ang mga Saksi sa Cook Islands nahibalo niana ug nangandoy nga makatambong. Apan ang ekonomiya sa mga isla lisod nga ang usa makagasto ug dakodako sa biyahe. Hinuon, ang mahigugmaong espirituwal nga mga brader ug sister sa New Zealand miamot sa idabuwelta nga plete alang sa mga 60 ka taga-isla. Pagkadako sa ilang kalipay nga makatambong sa pagpakig-ambit sa espirituwal nga kombira uban sa ilang Maori, Samoan, Niuean, ug Caucasian nga mga igsoon!

Ang naandang espiritu taliwala sa mga Saksi ni Jehova mao ang nangibabaw sa kataposan sa “Balaang Hustisya” nga Distritong Kombensiyon sa Montreal, Canada, niadtong 1988. Sa upat ka adlaw ang mga delegadong Arabo, Ingles, Pranses, Grego, Italyano, Portuges, ug Espanyol nagpahimulos sa samang programa apan diha sa ilang kaugalingong pinulongan. Ugaling, sa kataposan sa pangataposang sesyon, ang tanang 45,000 nag-usa sa Olympic Stadium sa makatandog nga pasundayag sa panag-igsoonay ug panaghiusa sa katuyoan. Duyog silang nanganta, ang kada grupo sa iyang kaugalingong pinulongan, “Dali kamo mag-awit tang tanan . . . ‘Si Jehova nagmando na.’”

[Mga footnote]

[Blurb sa panid 255]

“Nakadayeg gayod ako sa espiritu sa gugma ug inigsoong kalulot”

[Blurb sa panid 256]

Mga tren sa kombensiyon​—nakasakay ang tanan!

[Blurb sa panid 275]

Dili dagkog-suweldo nga mga tig-organisar sa kombensiyon, apan mga boluntaryong walay suhol

[Blurb sa panid 278]

Panaghiusa tali sa itom ug puti

[Kahon/Hulagway sa panid 261]

Pito ka Hinungdanong mga Resolusyon sa Kombensiyon

Niadtong 1922, ang resolusyon nga nag-ulohang “Usa ka Hagit sa mga Magmamando sa Kalibotan” nag-awhag nga pamatud-an nila nga ang mga tawo may kaalam sa pagmando niining yutaa o dawaton nga ang kalinaw, kinabuhi, kagawasan, ug walay kataposang kalipay magagikan lamang kang Jehova pinaagi kang Jesu-Kristo.

Niadtong 1923, may “Usa ka Pasidaan sa Tanang Kristohanon” sa dinaliang panginahanglan sa pagkalagiw gikan sa mga organisasyon nga sa binakak nangangkon nga naghawas sa Diyos ug kang Kristo.

Niadtong 1924, “Ang mga Klero Gisaway” nagyagyag sa dili-kasulatanhong mga doktrina ug mga buhat sa klero sa Kakristiyanohan.

Niadtong 1925, ang “Mensahe sa Paglaom” nagpakita kon nganong kadtong nangangkong mga kahayag nga nagagiya sa kalibotan napakyas sa pagtagana sa kinadagkoang mga panginahanglan sa tawo ug kon sa unsang paagi nga ang Gingharian lamang sa Diyos ang makahimo.

Niadtong 1926, “Usa ka Pamatuod Alang sa mga Magmamando sa Kalibotan” nagpahibalo kanila nga si Jehova mao lamang ang tinuod nga Diyos ug nga si Jesu-Kristo karon nagamando na ingong may katungod nga Hari sa yuta. Kana nagdasig sa mga magmamando sa paggamit sa ilang impluwensiya sa pagpaliso sa mga hunahuna sa tawo ngadto sa tinuod nga Diyos aron nga ang katalagman tingali dili moabot kanila.

Niadtong 1927, ang “Resolusyon Alang sa Katawhan sa Kakristiyanohan” nagyagyag sa pinansiyal-politikal-relihiyoso nga panagkumboya nga nagdaogdaog sa katawhan. Kana nagdasig sa mga tawo sa pagbiya sa Kakristiyanohan ug ibutang ang ilang pagsalig kang Jehova ug sa iyang Gingharian diha sa mga kamot ni Kristo.

Niadtong 1928, ang “Deklarasyon Batok Kang Satanas ug Dapig Kang Jehova” nagpatin-aw nga ang dinihogang Hari ni Jehova, si Jesu-Kristo, sa dili madugay mogapos kang Satanas ug molaglag sa iyang yawan-ong organisasyon, ug kana nagdasig sa tanan nga nahigugma sa pagkamatarong sa pagbarog sa kiliran ni Jehova.

 [Kahon/Mga hulagway sa panid 272, 273]

Mga Bahin sa Pila ka Dagkong Kombensiyon

Gatos-gatos ka malipayong mga delegado nangabot pinaagi ug barko, linibo pinaagi ug ayroplano, ug tinagpulo ka libo ang sakayg kotse ug bus

Maayong organisasyon ug daghang andam nga boluntaryo ang kinahanglan aron mangita ug mag-asayn ug igong sak-anan

cSulod niining walo-ka-adlaw nga mga kombensiyon, ang init nga mga pagkaon​—tinagpulo ka libo niana​—ang gidalit sa regular ngadto sa mga delegado

 Niadtong 1953, usa ka siyudad sa treyler ug tolda ang gisak-an sa kapig 45,000 ka delegado

Sa New York, niadtong 1958, 7,136 ang nabawtismohan​—labaw kay sa bisan unsang panahon sukad sa Pentekostes 33 K.P.

Mga karatula sa pangomosta gikan sa daghang kayutaan gipasundayag, ug ang mga sesyon gihimo diha sa 21 ka pinulongan, sa New York niadtong 1953

[Hulagway sa panid 256]

Mga delegado sa kombensiyon sa IBSA sa Winnipeg, Man., Canada, niadtong 1917

[Mga hulagway sa panid 258]

Si J. F. Rutherford nga nagpakigpulong sa Cedar Point, Ohio, niadtong 1919. Iyang gidasig ang tanan sa pagpakig-ambit nga masiboton sa pagmantala sa Gingharian sa Diyos, nga gamiton ang “The Golden Age”

[Hulagway sa panid 259]

Ang kombensiyon sa Cedar Point niadtong 1922. Milanog ang awhag: “Imantala ang Hari ug ang Gingharian”

[Hulagway sa panid 260]

Si George Gangas presente sa Cedar Point niadtong 1922. Sulod sa mga 70 ka tuig sukad niadto siya masibotong nagmantala sa Gingharian sa Diyos

[Hulagway sa panid 262, 263]

Ang mga delegado sa 1931 nga kombensiyon sa Columbus, Ohio, nga madasigong midawat sa ngalang mga Saksi ni Jehova

[Hulagway sa panid 264]

Ang “New World Translation of the Christian Greek Scriptures” nga giluwat ni N. H. Knorr niadtong 1950

[Hulagway sa panid 264]

Ang mga diskurso ni F. W. Franz mahitungod sa katumanan sa tagna sa Bibliya maoy lutaw nga bahin sa kombensiyon (New York, 1958)

[Mga hulagway sa panid 265]

Sa daghang tuig ang pag-alagad sa kanataran maoy iladong bahin sa kada kombensiyon.

Los Angeles, T.B.A., 1939 (ubos); Stockholm, Sweden, 1963 (sulod)

[Mga hulagway sa panid 266]

Sa dihang si J. F. Rutherford nagpahayag gikan sa Washington, D.C., niadtong 1935, ang mensahe gisibya pinaagi ug radyo ug mga linya sa telepono ngadto sa unom ka kontinente

[Mga hulagway sa panid 268]

Sa Nuremberg, Alemanya, niadtong 1946, si Erich Frost mihatag ug mainitong diskurso nga “Ang mga Kristohanon Diha sa Grabeng Pagsulay”

[Hulagway sa panid 269]

Ang kombensiyon sa gawas didto sa Kitwe, Northern Rhodesia, sa panahon sa pagduaw ni N. H. Knorr niadtong 1952

[Mga hulagway sa panid 270, 271]

Niadtong 1958 ang mamiminaw nga 253,922, nga nanobra sa duha ka dagkong estadyum sa New York, nakadungog sa mensaheng “Ang Gingharian sa Diyos Nagmando Na​—Haduol na ba ang Kataposan sa Kalibotan?”

Polo Grounds

Yankee Stadium

[Hulagway sa panid 274]

Si Grant Suiter, tsirman sa kombensiyon sa Yankee Stadium niadtong 1950

[Hulagway sa panid 274]

Si John Groh (naglingkod), nga nakighisgot bahin sa pag-organisar sa kombensiyon uban kang George Couch niadtong 1958

[Mga hulagway sa panid 277]

Niadtong 1963 usa ka kombensiyon libot-sa-kalibotan ang gihimo, nga may mga delegado gikan sa mga 20 ka yuta nga nagbiyahe uban niana libot sa kalibotan

Ang Kyoto, Hapon (sa ubos sa wala), maoy usa sa 27 ka siyudad nga kombensiyonan. Mga delegado sa Republika sa Korea nag-ilailahay (tunga). Pangomosta sa Maori sa New Zealand (ubos sa tuo)

[Mga hulagway sa panid 279]

Usa ka kombensiyon nga dungang misilbi sa 17 ka grupo sa pinulongan, diha sa usa ka siyudad nga gama sa kawayan alang sa okasyon (Lagos, Nigeria, 1970)

[Mga hulagway sa panid 280]

Tulo ka dagkong kombensiyon ang gihimo sa Polandia niadtong 1989, nga may mga delegado nga nangabot gikan sa 37 ka kayutaan

Linibo ang nabawtismohan sa Chorzów

Ang mga mamiminaw namalakpak ug dugay sa Warsaw

Si T. Jaracz (sa tuo) nagpahayag ngadto sa mga delegado sa Poznan

Mga delegado gikan sa kanhi U.S.S.R. (sa ubos)

Mga bahin sa programa sa Chorzów gihubad ngadto sa 15 ka pinulongan