Kapitulo 20

Nagtambayayong sa Tibuok-yutang Pagpanukod

ANG pagbati sa tinuod nga panag-igsoonay taliwala sa mga Saksi ni Jehova dayag diha sa daghang paagi. Kadtong mitambong sa ilang mga tigom nakakita sa pamatuod niana. Sa ilang mga kombensiyon kana gipasundayag sa dakong sukod. Kana usab tataw nga makita samtang sila nagtambayayong sa pagtagana ug maayong mga tigomanan sa ilang mga kongregasyon.

Sa pagsugod sa dekadang 1990, dihay kapin sa 60,000 ka kongregasyon sa mga Saksi ni Jehova sa tibuok kalibotan. Sa gisundan nga dekada, sa aberids 1,759 ka bag-ong kongregasyon ang nadugang kada tuig. Sayo sa katuigang 1990, kanang katulinon mikusog pa ngadto sa kapin sa 3,000 kada tuig. Ang pagtaganag maayong mga tigomanan alang kanila dako kaayong buluhaton.

Mga Kingdom Hall

Sama sa nahitabo niadtong unang-siglong mga Kristohanon, daghang kongregasyon sa mga Saksi ni Jehova sa sinugdan migamit sa pribadong mga balay alang sa kadaghanan sa ilang mga tigom. Sa Stockholm, Sweden, ang pipila nga nagsugod ug tigom nga regular migamit ug pandayan, nga ilang giabangan aron magamit human sa trabaho sa talyer sa adlaw. Tungod sa paglutos, usa ka gamayng grupo sa probinsiya sa La Coruña, Espanya, ang naghimo sa ilang unang mga tigom sa usa ka gamayng balay-tipiganan, o dapa.

Sa dihang kinahanglan ang dugang luna, sa kayutaan nga may kagawasan sa paghimo niana, ang lokal nga mga kongregasyon sa mga Saksi ni Jehova moabang ug tigomanan. Ugaling, kon kini usa ka tigomanan nga gigamit usab sa ubang mga organisasyon, ang kagamitan kinahanglang dad-on ug imontar kada tigom, ug kasagaran nagpabilin pa ang baho sa sigarilyo. Kon posible, abangan sa mga igsoon ang wala-gamitang tindahan o lawak sa ikaduhang andana aron solong gamiton sa kongregasyon. Apan, sa ulahi, tungod sa nagaumentong abang sa daghang dapit ug sa kakulang sa angayng mga tigomanan, gihimo ang ubang kahikayan. Sa pila ka higayon ang mga tinukod gipalit ug giayo.

Sa wala pa ang Gubat sa Kalibotan II, pipila lang ka kongregasyon ang nagtukod ug mga tigomanan nga gidesinyo ilabina  alang sa ilang gamit. Gani ingon ka sayo sa 1890, usa ka grupo sa mga Estudyante sa Bibliya sa Tinipong Bansa sa Mount Lookout, West Virginia, ang nagtukod sa ilang kaugalingong tigomanan. a Hinuon, ang makaylapong pagpanukod ug mga Kingdom Hall wala masugdi hangtod sa katuigang 1950.

Ang ngalang Kingdom Hall gisugyot niadtong 1935 ni J. F. Rutherford, nga kaniadto presidente sa Watch Tower Society. May kalabotan sa mga pasilidad sa sanga sa Sosyedad sa Honolulu, Hawaii, gihikay niya nga ang mga igsoon motukod ug usa ka tigomanan. Sa dihang nangutana si James Harrub kon unsay pagtawag ni Brader Rutherford sa tinukod, siya mitubag: “Uyon ka ba nga tawgon nato kinig ‘Kingdom Hall,’ sanglit kay kana ang atong ginabuhat, nga nagawali sa maayong balita sa Gingharian?” Sukad niadto, kon posible, ang mga tigomanan nga sa regular gigamit sa mga Saksi sa hinayhinay nailhan pinaagi sa mga karatulang “Kingdom Hall.” Mao nga, sa dihang ang London Tabernacle giayo niadtong 1937-38, kana ginganlan pag-usab ug Kingdom Hall. Sa ulahi, ang pangunang lokal nga tigomanan sa mga kongregasyon sa tibuok kalibotan nailhang Kingdom Hall sa mga Saksi ni Jehova.

Kapin sa Usa ka Paagi sa Paghimo Niana

Ang matag kongregasyon modesisyon sa lokal kon kaha moabang o motukod ug Kingdom Hall. Abagahon usab nila ang bisan unsang gastos sa pagtukod ug pagmentinar. Aron makadaginot, ang kadaghanan sa mga kongregasyon naningkamot sa pagpangunay sa kadaghanan sa buluhaton sa pagtukod kutob sa mahimo nga dili mogamit ug komersiyal nga mga kontraktor.

Ang mga tigomanan mismo mahimong ginama sa tisa, bato, kahoy, o ubang materyales, depende sa prisyo ingon man sa mabatonan diha sa dapit. Sa Katima Mulilo, Namibia, ang gigamit nga atop maoy pinawod nga kogon, ug ang mga bungbong ug salog minolde nga lapok gikan sa bungtod sa olmigas (nga gahi kaayo kon mauga). Ang mga Saksi sa Segovia, Colombia, naghimo sa ilang kaugalingong sementong mga haloblak. Ang wala-madugmok nga lava gikan sa Mount Lassen maoy gigamit sa Colfax, California.

 Tungod sa tumatambong nga sa subsob mokapig 200 niadtong 1972, ang kongregasyon sa Maseru, Lesotho, nasayod nga sila kinahanglan nang magtukod ug maayong Kingdom Hall. Ang tanan mitabang sa proyekto. Ang tigulang nga mga igsoon mibaktas ug 32 kilometros aron makatabang. Ang mga bata nagpaligid ug dram nga may tubig ngadto sa dapit tukoranan. Ang mga sister nagtaganag mga pagkaon. Gigamit usab nila ang ilang mga tiil aron bagtokon ang yuta aron andamon kana sa pagbuhos sa semento alang sa salog, samtang nag-awit sa mga awitonon sa Gingharian ug nagbundak sa mga tiil duyog sa ritmo sa musika. Ang migahing balas, nga libreng makuha gikan sa dug-ol nga kabukiran, maoy gigamit nga mga bungbong. Ang resulta maoy usa ka Kingdom Hall nga malingkoran ug 250.

Usahay, ang mga Saksi gikan sa duol nga mga kongregasyon mitabang sa pagtukod. Mao nga, niadtong 1985, sa dihang ang mga Saksi ni Jehova sa Imbali, usa ka lungsod sa mga itom sa Habagatang Aprika, nagtukod ug tigomanan nga sa kahamogaway malingkoran ug 400, ang isigka-Saksi gikan sa duol nga lungsod sa Pietermaritzburg ug Durban nangabot sa pagtabang. Mahanduraw ba nimo kon unsa ka dako ang katingala sa mga silingan sa dihang, niadtong panahona sa rasanhong kasamok sa Habagatang Aprika, ilang nakita ang daghang puti, tabonon, ug Indianhong mga Saksi nga nangabot ngadto sa lungsod ug nagtrabaho abaga sa abaga uban sa ilang itom Aprikanong mga igsoon? Sama sa gipahayag sa lokal nga mayor: “Kana mahimo lamang pinaagi sa gugma.”

Bisan tuod may espiritu sa kaandam, nadiskobrehan sa mga kongregasyon nga ang lokal nga mga kahimtang naglimite sa mahimo sa mga igsoon. Ang mga lalaki sa mga kongregasyon may mga pamilya nga suportahan ug kasagarang makatrabaho lamang sa maong proyekto sa hinapos semana ug tingali sa makadiyot sa mga gabii. Daghang kongregasyon ang may pipila ra, kon aduna man ugaling, ing mga igsoong hanas sa pagpanukod. Bisan pa niana, ang yano lang, sama sa walay-bungbong nga tinukod nga angayan sa tropiko mahimong tukoron sa pipila ka adlaw o pipila ka semana. Uban sa tabang sa mga Saksi sa nag-alirong nga mga kongregasyon, ang mas lig-ong mga tinukod lagmit mahuman sa lima o unom ka bulan. Sa ubang mga kaso kana basin abtan ug usa o duha ka tuig.

Bisan pa, samtang sila misulod sa katuigang 1970, ang mga Saksi ni Jehova sa tibuok kalibotan nagtubo sa gikusgong duha o tulo ka bag-ong kongregasyon kada adlaw. Pag-abot sa sayo sa katuigang 1990, ang gikusgon sa pagtubo mokabat ug siyam ka kongregasyon kada adlaw. Ang ila bang dili-malikayang panginahanglan sa bag-ong mga Kingdom Hall matagan-an?

Nagmugnag mga Teknik sa Dinaliang-Konstruksiyon

Sayo sa katuigang 1970, sa Tinipong Bansa, kapin sa 50 ka Saksi gikan sa sikbit nga mga kongregasyon ang mitabang sa pagtukod ug bag-ong Kingdom Hall sa Carterville, Missouri, alang sa grupo nga nagatigom sa Siyudad sa Webb. Sa usa ka hinapos-semana ilang napabarog ang tigbalayon ug nagtapos sa dakong trabaho sa atop. Dako pa ang pagabuhaton, ug giabtag mga bulan una pa matapos; apan usa ka bahin niana ang nahuman sa mubo kaayong panahon.

Sulod sa misunod nga dekada, samtang ang mga igsoon nagtambayayong sa paghimog mga 60 ka tigomanan, ang mga babag nabuntog, ug namugna ang mas  maayong mga pamaagi. Sa ulahi, ilang naamgohan nga pagkahuman sa pundasyon, halos matapos nila ang tibuok Kingdom Hall sa usa ka hinapos-semana.

Pipila ka magtatan-aw sa kongregasyon​— tanan naggikan sa tungang-kasadpan sa Tinipong Bansa​—nagsugod sa pagtumong niana. Sa dihang ang mga kongregasyon mihangyog tabang sa konstruksiyon sa ilang Kingdom Hall, usa o kapin pa niining mga igsoona maghisgot sa proyekto uban kanila ug maghatag ug mga detalye may labot sa mga pagpangandam nga pagahimoon sa lokal una pa ang dakong trabaho. Apil sa ubang mga butang, ang mga permiso sa konstruksiyon kinahanglang mabatonan, ang pundasyon ug ang sementong salog kinahanglang nabuhos na, may magamit nga koryente, ang mga tubo nataod na sa ilalom sa yuta, ug ang kasaligang mga kahikayan angayng himoon alang sa pagdeliber ug mga materyales sa pagpanukod. Unya mahimo nang sabotan ang petsa sa pagpatindog sa Kingdom Hall mismo. Ang tinukod dili kay naporma-nang-daan; kana pagatukoron gikan sa ubos pataas diha mismo sa dapit tukoranan.

Kinsa ang mobuhat sa aktuwal nga pagtukod? Kutob sa maarangan, kana himoon pinaagig boluntaryo, walay-suhol nga trabahante. Usahay entirong mga pamilya ang motabang. Kadtong mag-organisar sa proyekto mokontak sa mga Saksing may kahanas ug andam nga motabang niining mga proyektoha. Daghan kanila ang maikagong magpaabot sa kada bag-ong proyekto sa pagpanukod. Ang ubang mga Saksi nga nahibalo mahitungod sa mga proyekto buot nga makabahin; ginatos gikan sa sikbit nga dapit​—ug gikan sa mas lagyong mga dapit​—nagpanon ngadto sa dapit tukoranan, nga maikagon sa pagtanyag sa ilang serbisyo sa bisan unsang paagi nga ilang mahimo. Ang kadaghanan kanila dili propesyonal nga mga magtutukod, apan sila sa tino naghatag ug pamatuod nga sila mohaom sa gihubit nga mahimong mga tigpaluyo sa Mesiyanikong Hari ni Jehova ingon sa nahisulat sa Salmo 110:​3, nga nagaingon: “Ang imong katawhan motanyag sa ilang kaugalingon sa kinabubut-on.”

Sa Huwebes sa gabii sa dili pa pagasugdan ang dakong trabaho, kadtong magdumala sa proyekto magtagbo sa pagplano sa kataposang mga detalye. Sa sunod nga gabii, ang mga trabahante patan-awon sa presentasyon sa slayd sa pamaagi aron sila makasabot kon sa unsang paagi ang trabaho pagahimoon. Gipasiugda ang kahinungdanon sa diyosnong mga hiyas. Ang mga igsoon gidasig sa pagtambayayongay diha sa gugma, sa kalulot, sa pagpailob ug konsiderasyon. Ang tanan gidasig sa pagtrabaho diha sa makanunayong gikusgon apan dili magdali ug dili magpanuko sa pagpaambit sa uban ug pila ka minutos sa makapalig-ong kasinatian. Sayo sa sunod buntag, ang konstruksiyon gisugdan.

Sa tinudlong panahon sayo sa buntag sa Sabado, ang tanan moundang sa iyang gihimo aron maminaw sa paghisgot sa Kasulatan sa maong adlaw. Himoon ang pag-ampo, kay giapresyar gayod nga ang kalamposan sa tibuok buluhaton nagdepende sa panalangin ni Jehova.​—Sal. 127:1.

Sa dihang gisugdan ang trabaho, kana mitulin. Sa usa ka oras ang mga marko napatindog na. Misunod ang mga sagbayan sa atop. Ang mga pliego sa plywood sa bungbong gipanglansang na. Ang mga elektrisyan nagsugod nag taod sa mga linya sa koryente. Ang mga tubo sa air-conditioning ug heating gitaod. Gitukod ug gipahimutang ang mga kabinet. Usahay moulan sa tibuok hinapos-semana, o ang panahon mahimong tugnaw kaayo o hilabihang iganga, apan ang trabaho magpadayon.  Walay kompetisyon, walay indigay taliwala sa mga hanas nga trabahante.

Kasagaran, sa dili pa mosalop ang adlaw sa ikaduhang adlaw, ang Kingdom Hall mahuman na​—nga nadayandayanan ug maanindot sa sulod, basin ganig na-landscape na sa gawas. Sa dihang mas praktikal, ang mga trabaho ieskedyul nga dangtan ug kapin sa tulo ka adlaw, o tingali duha ka hinapos-semana. Sa kataposan sa proyekto, daghan sa mga trabahante magpabilin, gikapoy apan malipayon kaayo, aron sa pagtagamtam sa unang regular nga tigom sa kongregasyon, ang pagtuon sa Ang Bantayanang Torre.

Kay nagduhaduha nga ang de-kalidad nga trabaho mahuman nga dali kaayo, pipila ka tawo sa Guymon, Oklahoma, T.B.A., nagtawag sa inspektor sa siyudad. “Giingnan nako sila nga kon gusto nilang makakitag usa ka butang nga hustong pagkabuhat, angay silang moduaw sa tigomanan!” matud sa inspektor sa dihang mibatbat sa ulahi sa nahitabo ngadto sa mga Saksi. “Kamo nagabuhat gani nga husto sa mga natago ug dili makita!”

Samtang midako ang panginahanglan alang sa mga Kingdom Hall, ang mga igsoon nga nakaugmad sa mga pamaagi sa dinaliang-konstruksiyon nagbansay sa uban. Ang mga taho mahitungod sa nalampos nakaabot sa ubang kayutaan. Ang sama bang mga pamaagi sa konstruksiyon magamit usab didto?

Ang Dinaliang-Konstruksiyon Nahimong Internasyonal

Ang pagtukod ug Kingdom Hall sa Canada wala makaapas sa panginahanglan sa mga kongregasyon. Ang mga Saksi sa Canada midapit niadtong nag-organisar sa dinaliang-konstruksiyon nga mga proyekto sa Tinipong Bansa aron isaysay ang ilang pagdumala niana. Sa sinugdan, ang mga Canadiano morag maduhaduhaon nga kana mahimo sa Canada, apan sila mihukom sa pagsulay. Ang unang Kingdom Hall nga natukod niining paagiha sa Canada mibarog sa Elmira, Ontario, niadtong 1982. Sa pagka 1992, may 306 ka Kingdom Hall sa Canada nga natukod niining paagiha.

Ang mga Saksi sa Northampton, Inglaterra, naghunahuna nga mahimo usab nila kana. Ang ilang proyekto, niadtong 1983, maoy kinaunahan sa Uropa. Ang mga igsoon nga eksperyensiyado niining matanga sa konstruksiyon mibiyahe gikan sa Tinipong Bansa ug Canada sa pagdumala sa proyekto ug sa pagtudlo sa lokal nga mga Saksi sa paghimo niana. Ang ubang mga boluntaryo presente gikan sa layo sama sa Hapon, India, Pransiya, ug Alemanya. Sila miadto didto ingong mga boluntaryo, dili tungod sa suhol. Sa unsang paagi kana nahimong posible? Sama sa giingon sa magtatan-aw sa usa ka tem sa mga Saksing taga-Irlandia nga nakatrabaho sa maong proyekto, ‘Kana malamposon tungod kay ang tanang igsoong lalaki ug babaye nagtambayayong ubos sa impluwensiya sa espiritu ni Jehova.’

Bisan sa dihang ang lokal nga mga lagda sa pagpanukod morag nakapalisod sa maong mga proyekto, ang mga Saksi nakadiskobre nga, kasagaran, sa dihang ang mga detalye ipatin-aw sa opisyales sa siyudad, sila malipayong mouyon.

Human sa usa ka dinaliang-konstruksiyon nga proyekto sa Norway, amihanan sa Arctic Circle, ang mantalaang Finnmarken nagpahayag: “Kahibulongan gayod. Kana lamang ang pahayag nga among makaplagan sa paghubit sa gihimo sa mga Saksi ni Jehova sa miaging hinapos-semana.” Sa susama, sa dihang ang mga  Saksi sa Amihanang Isla sa New Zealand nagpatindog ug maanindot nga Kingdom Hall sulod sa duha ug tunga ka adlaw, ang ulohan sa atubangang panid sa lokal nga mantalaan mipahayag: “Proyekto nga Halos Milagro.” Ang artikulo midugang: “Tingali ang labing makalibog nga bahin sa proyekto mao ang organisasyon ug ang kahilom sa palakaw.”

Ang pagkahilit sa lokasyon nga pagatukoran sa gikinahanglang Kingdom Hall dili babag. Sa Belize usa ka proyektong dinaliang-konstruksiyon ang gihimo, bisan tuod kana nagkahulogan nga ang tanang materyales hakoton ngadto sa isla nga 60 kilometros gikan sa Siyudad sa Belize. Sa dihang gitukod ang air-conditioned nga Kingdom Hall sa Port Hedland, Kasadpang Australia, sa usa ka hinapos-semana, ang halos tanang materyales ug mga trabahante mibiyaheg 1,600 kilometros o kapin pa. Ang gastos sa biyahe kaugalingong salapi sa mga trabahante. Kadaghanan niadtong mitabang sa proyekto wala makaila sa personal sa mga Saksi sa Kongregasyon sa Port Hedland, ug pipila ra gayod kanila ang makatambong sa mga tigom didto. Apan kana wala makapugong kanila sa pagpahayag sa ilang gugma nianang paagiha.

Bisan sa dapit nga diyutay ra ang mga Saksi, kana wala makapugong sa paggamit niining pamaagiha sa pagtukod ug mga tigomanan. Mga 800 ka Saksi gikan sa Trinidad ang miboluntaryo sa pag-adto sa Tobago aron tabangan ang ilang 84 ka Kristohanon nga igsoong mga lalaki ug babaye didto sa pagtukod ug tigomanan sa Scarborough niadtong 1985. Ang 17 ka Saksi (kadaghanan kanila mga babaye ug mga bata) sa Goose Bay, Labrador, sa tino nanginahanglan ug tabang kon sila motukod ug ilang kaugalingong Kingdom Hall. Niadtong 1985, ang mga Saksi gikan sa ubang mga bahin sa Canada miabang ug tulo ka ayroplano sa pagdalag 450 kanila ngadto sa Goose Bay sa paghimo sa buluhaton. Tapos sa duha ka adlaw nga munamunang trabaho, sila may programa sa pagpahinungod sa nakompletong tigomanan sa Dominggo sa gabii.

Kini wala magkahulogan nga ang tanang Kingdom Hall karon gitukod pinaagi sa dinaliang-konstruksiyon, apan ang nag-uswag kanunay nga gidaghanon niana gihimo sa maong pamaagi.

Rehiyonal nga mga Komite sa Pagpanukod

Sa tungatunga sa 1986 ang panginahanglan sa bag-ong Kingdom Hall mikusog pag-ayo. Sa gisundang tuig, 2,461 ka bag-ong mga kongregasyon ang naporma sa tibuok kalibotan; 207 niini sa Tinipong Bansa. Ang pila ka Kingdom Hall gigamit sa tulo, upat, o gani lima ka kongregasyon. Sumala sa tagna sa Kasulatan, si Jehova tinuod nga nagpadali sa buluhatong pagpanigom.​—Isa. 60:22.

Aron maseguro nga magamit ang mga trabahante sa labing maayo ug aron ang tanan nga nagtukod ug mga Kingdom Hall makabenepisyo gikan sa naangkong eksperyensiya, ang Sosyedad nagsugod sa paghiusa sa ilang kalihokan. Sa pagsugod, niadtong 1987 ang Tinipong Bansa gibahin taliwala sa 60 ka Rehiyonal nga mga Komite sa Pagpanukod. Daghan ang buluhaton alang kanilang tanan; ang pipila kanila sa wala madugay may mga proyekto nga naghulat sulod sa usa ka tuig o kapin pa. Kadtong gitudlo sa pag-alagad nianang mga komiteha maoy mga lalaki nga, una sa tanan, may espirituwal nga kuwalipikasyon, mga ansiano sa mga kongregasyon, sulondan sa ilang pagpadapat sa mga bunga sa espiritu sa  Diyos. (Gal. 5:​22, 23) Daghan kanila usab ang may eksperyensiya sa real estate, enhinyeriya, konstruksiyon, pagdumala sa patigayon, luwas nga pagtrabaho, ug sa susamang mga natad.

Ang mga kongregasyon gidasig nga mokonsulta sa Rehiyonal nga Komite sa Pagpanukod una pa mopili ug dapit alang sa usa ka bag-ong Kingdom Hall. Diin dihay kapin sa usa ka kongregasyon sa usa ka siyudad, gidasig usab sila nga mokonsulta sa (mga) magtatan-aw sa sirkito, sa magtatan-aw sa siyudad, ug sa mga ansiano diha sa duol nga mga kongregasyon. Ang mga kongregasyon nga nagaplano ug dagkong pagpang-ayo o sa pagtukod ug usa ka bag-ong Kingdom Hall gitambagan nga magpahimulos sa kasinatian sa mga igsoon sa Rehiyonal nga Komite sa Pagpanukod sa ilang dapit ug gikan sa mga lagda nga gihatag kanila sa Sosyedad. Pinaagi nianang komiteha, ang mga kahikayan maorganisar aron matigom ang gikinahanglang hanas nga mga tawo gikan sa taliwala sa mga igsoong lalaki ug babaye diha sa mga 65 ka panarbaho nga nakaboluntaryo na sa pagtabang sa maong mga proyekto.

Samtang ang mga pamaagi gihashasan pa, posible nga pakunhoran ang gidaghanon sa trabahante nga malangkit sa bisan unsang usa ka proyekto. Inay sa linibo diha sa dapit tukoranan nga motan-aw o nga motanyag sa ilang mga serbisyo, tagsa rang may mokapin ug 200 ang diha sa dapit sa bisan unsang panahon. Inay sa paggugol sa entirong hinapos-semana didto, ang mga trabahante moadto lamang sa dihang ang ilang partikular nga kahanas gikinahanglan. Mao nga sila may daghang panahon nga gugolon uban sa ilang mga pamilya ug alang sa kalihokan sa ilang kaugalingong mga kongregasyon. Sa dihang ang lokal nga mga igsoon makahimo sa usa ka matang sa trabaho sulod sa makataronganong panahon, nadiskobrehan nga subsob mas praktikal nga ang grupo sa dinaliang-konstruksiyon dapiton lamang alang nianang mga bahin sa buluhaton nga sila labing gikinahanglan.

Bisan tuod ang entirong trabaho kusog kaayo, kini dili mao ang pangunang gikabalak-an. Ang hinungdanon kaayo mao ang pagtagana ug maayong trabaho sa kasarangang mga Kingdom Hall nga gidesinyo aron matagan-an ang lokal nga panginahanglan. Ang maampingong pagplano himoon aron malampos kini samtang gipaningkamotan nga makadaginot sa gastos. Gihimo ang mga lakang aron matino nga ang seguridad hatagan ug pangunang pagtagad​—ang kaluwasan sa mga trabahante, mga silingan, mga lumalabay, ug sa umaabot nga mogamit sa Kingdom Hall.

Samtang ang mga taho mahitungod niining kahikayana alang sa pagtukod ug mga Kingdom Hall nakaabot sa ubang kayutaan, ang mga sangang buhatan sa Sosyedad nga nagtuo nga kana makaayo sa ilang mga dapit gihatagan ug gikinahanglang mga detalye. Sa pag-abot sa 1992, ang Rehiyonal nga mga Komite sa Pagpanukod nga tinudlo sa Sosyedad nakatabang sa pagpanukod ug Kingdom Hall sa mga nasod sama sa Argentina, Australia, Britanya, Canada, Pransiya, Alemanya, Hapon, Mexico, Habagatang Aprika, ug Espanya. Ang mga pamaagi sa pagtukod gipasibo sa lokal nga mga kahimtang.Sa dihang gikinahanglan ang tabang gikan sa laing sanga alang sa pagtukod sa Kingdom Hall, kini gihikay pinaagi sa buhatan sa hedkuwarter sa Sosyedad. Sa pila ka bahin sa kalibotan, ang bag-ong mga tigomanan gitukod sulod sa pila ka adlaw; sa ubang dapit, sa mga semana o tingali sa  pipila ka bulan. Uban sa maampingong pagplano ug organisadong mga paningkamot, ang panahong gikinahanglan sa pagtagana ug bag-ong Kingdom Hall sa tino nakunhoran.

Ang mga kalihokan sa pagpanukod sa mga Saksi ni Jehova dili limitado sa mga Kingdom Hall. Ang mas dagkong mga pasilidad gikinahanglan sa dihang ang mga grupo sa mga kongregasyon magtigom alang sa tinuig nga sirkitong mga asembliya ug espesyal nga mga asembliya.

Pagtagana sa Panginahanglan sa mga Assembly Hall

Latas sa katuigan, daghang matang sa pasilidad ang gigamit alang sa sirkitong mga asembliya. Ang mga Saksi ni Jehova nakaabang sa mga dapit sama sa mga awditoryum sibiko, mga eskuylahan, mga teatro, mga dapit bansayanan sa militar, mga dulaanan, ug sa natad peryahan. Sa pipila ka dapit, mabatonan ang maayo kaayong mga pasilidad sa baratong prisyo. Sagad, dakong panahon ug trabaho ang gikinahanglan sa paghinlo sa dapit, pagmontar sa kagamitan sa sound, pagtukod ug plataporma, ug paghakot ug mga lingkoranan. Usahay may ulahi-sa-panahon nga pagkanselar. Samtang ang mga kongregasyon nagdaghan, nagkasamot ka lisod ang pagpangita ug angayng mga dapit. Unsay mahimo?

Sa makausa pa, ang sulbad mao nga ang mga Saksi ni Jehova magbaton ug kaugalingong mga dapit. Kini maglangkit sa pag-ayo sa nahiangay nga mga tinukod ug pagtukod ug mga bag-o. Ang kinaunahan nianang maong mga Assembly Hall sa Tinipong Bansa mao ang usa ka teatro sa Siyudad sa Long Island, New York, nga giayo ug gigamit sa mga Saksi ni Jehova sa hinapos sa 1965.

Sa halos samang panahon, ang mga Saksi sa Caribbeanong isla sa Guadeloupe nagdesinyo ug Assembly Hall aron matagan-an ang ilang panginahanglan. Sila mibati nga makaayo kon sila makahimo sa ilang sirkitong mga asembliya sa nagkalainlaing lokasyon. Apan kadaghanan sa mga lungsod walay pasilidad nga dakodako. Busa ang mga Saksi naghimo ug mabalhinbalhing gambalay nga ginama sa puthaw nga mga tubo ug aluminum nga atop, nga maarang ang 700 ka tawo ug nga mapatindog bisan diin nga adunay bakanteng patag nga lote. Kinahanglang ilang padakoon ang tigomanan sa makadaghan, hangtod kana makaarang ug 5,000. Hunahunaa ra ang paghakot, pagmontar, ug pagtangtang sa 30 ka toneladang materyales alang sa matag asembliya! Kanang Assembly Hall gipatindog ug gitangtang sa makadaghan sa usa ka tuig sulod sa 13 ka tuig, hangtod nga lisod nang makakita ug bakanteng lote alang sa mabalhinbalhing tigomanan ug kinahanglan nang mopalit ug yuta ug magtukod ug permanenteng Assembly Hall, nga karon nagasilbi sa sirkitong mga asembliya ug distritong mga kombensiyon.

Sa ubay-ubayng dapit, ang mga proyekto sa Assembly Hall migamit sa naglungtad nga mga tinukod. Sa Inglaterra, sa Hays Bridge, Surrey, ang 50-anyos nga mga tinukod sa eskuylahan gipalit ug giayo. Kana nahimutang sa 11 ka ektarya sa maanindot nga kabanikanhan. Ang kanhing mga teatro ug industriyal nga mga bodega giusab ug gigamit sa Espanya; ang wala-na-gamitang pabrika sa panapton sa Australia; usa ka sayawanan sa Quebec, Canada; usa ka dulaanan sa bowling sa Hapon; usa ka bodega sa Republika sa Korea. Kining tanan giusab ngadto sa maanindot  nga mga Assembly Hall nga makasilbi ug maayo ingong dagkong mga sentro alang sa edukasyon sa Bibliya.

Ang ubang mga Assembly Hall sa bug-os bag-o, nga gitukod gikan sa ubos pataas. Ang talagsaong walo-ka-kiliran nga desinyo sa tigomanan sa Hellaby, South Yorkshire, Inglaterra, uban sa kamatuoran nga kadaghanan sa trabaho gihimo pinaagig boluntaryo maoy hinungdan sa usa ka artikulo sa basahon sa Institution of Structural Engineers. Ang Assembly Hall sa Saskatoon, Saskatchewan, sa Canada, gidesinyo nga malingkoran sa 1,200; apan sa dihang ang mga partisyon sa tunga gipahimutang, ang tinukod mahimong gamiton ingong upat ka nagtapad nga mga Kingdom Hall. Ang Assembly Hall sa Haiti (nabalay nang daan ug gipadala gikan sa Tinipong Bansa) maoy bukas sa duha ka kiliran aron kadtong nagalingkod sa sulod kanunay nga mabugnawan sa huyohoy sa hangin​—usa ka kahupayan nga dinawat kaayo tungod sa kaigang sa adlaw sa Haiti. Ang tigomanan sa Port Moresby, Papua New Guinea, gidesinyo sa paagi nga ang mga seksiyon sa mga bungbong maablihan samag mga pultahan aron masulod ang panon nga mas daghan kay sa maarang sa sulod.

Ang desisyon sa pagtukod ug Assembly Hall wala himoa sa gagmayng grupo sa mga magtatan-aw nga unya modahom sa tanan sa pagpaluyo niana. Una pa tukora ang bisan unsang bag-ong Assembly Hall, ang Sosyedad magseguro nga naanalisar nga maampingon ang panginahanglan alang niana ug ang kasubsob nga kana gamiton. Ang gitagad dili lamang ang lokal nga kaikag alang sa proyekto kondili usab ang katibuk-ang panginahanglan sa kanataran. Kana hisgotan uban sa tanang kongregasyon nga malangkit, aron sa pagtino sa kaandam ug katakos sa mga igsoon sa pagsuportar niana.

Mao nga, sa dihang sugdan ang trabaho, ang mga Saksi ni Jehova nianang dapita bug-os-kasingkasing nga magpaluyo niana. Ang matag gasto sa proyekto abagahon sa mga Saksi mismo. Ang pinansiyal nga panginahanglan ipatin-aw, apan ang mga amot boluntaryo ug walay ngalan. Ang maampingong plano himoong abante, ug ang proyekto makabenepisyo gikan sa eksperyensiya nga nabatonan na sa pagtukod ug mga Kingdom Hall ug, kasagaran, gikan sa mga proyekto sa Assembly  Hall sa ubang mga dapit. Kon kinahanglanon, ang pila ka bahin sa trabaho mahimong ihatag sa komersiyal nga mga kontraktor, apan kadaghanan niana kasagarang himoon sa madasigong mga Saksi. Kini makadaginot ug katunga sa gasto.

Pinaagi sa hanas propesyonal nga mga trabahante ug ubang nagboluntaryo sa ilang panahon ug mga abilidad, ang entirong proyekto kasagaran nga daling matapos. Ang pila ka proyekto mahimong abtan ug kapin sa usa ka tuig. Apan sa Isla sa Vancouver sa Canada, niadtong 1985, mga 4,500 ka boluntaryo nagtapos sa usa ka 2,300-metro-kuwadrado nga Assembly Hall sulod lamang sa siyam ka adlaw. Ang tinukod naglakip usab sa malingkoran ug 200 nga Kingdom Hall alang sa lokal nga mga kongregasyon. Sa New Caledonia, nagpahamtang ug curfew ang kagamhanan niadtong 1984 tungod sa politikal nga kasamok, bisan pa niana abot ug 400 ka boluntaryo ang nagtrabaho sa Assembly Hall matag higayon, ug kana natapos sa upat lamang ka bulan. Duol sa Stockholm, Sweden, usa ka maanindot, praktikal nga Assembly Hall, nga may 900 ka de-kutsong lingkoranan nga gama sa kahoyng oak, gitukod sa pito ka bulan.

Usahay ang malahutayong paningkamot diha sa mga korte kinahanglan aron makakuhag mga permiso sa pagtukod niining mga Assembly Hall. Kana nahitabo sa Canada sa Surrey, British Columbia. Sa dihang napalit ang yuta, ang legal nga lagda alang nianang dapita nagtugot sa pagtukod sa maong dapit sa pagsimba. Apan human ipasa ang mga plano sa pagpanukod, niadtong 1974, ang Konsilyo sa Distrito sa Surrey nagpasa ug lagda nga nagaingon nga ang mga simbahan ug mga assembly hall mahimong tukoron lamang sa Sona P-3​— usa ka sona nga wala maglungtad! Apan, 79 ka simbahan ang natukod sa miagi diha sa lungsod nga walay bisan unsang hasol. Ang maong butang gidala sa korte. Sublisubling mga paghukom ang gihatag pabor sa mga Saksi ni Jehova. Sa dihang ang babag sa pagpihig sa opisyales sa ulahi nakuha, ang boluntaryong mga trabahante mipadayon sa proyekto uban ang tumang kadasig nga ilang natapos kana sulod sa pito ka bulan. Sama sa nahitabo kang Nehemias sa iyang tinguha sa pagtukod pag-usab sa mga paril sa karaang Jerusalem, sila mibati nga ‘ang kamot sa Diyos nag-uban kanila’ aron taposon ang buluhaton.​—Neh. 2:18.

Sa dihang gipalit sa mga Saksi ni Jehova sa Tinipong Bansa ang Stanley Theater sa Siyudad sa Jersey, New Jersey, ang tinukod nalista sa listahan sa makasaysayanhong mga dapit sa estado. Bisan tuod ang teatro guba na, kana dako kaayog purohan nga magamit nga Assembly Hall. Apan, sa dihang gustong ayohon sa mga Saksi, ang opisyales sa siyudad midumili sa paghatag ug permiso. Ang mayor dili gusto sa mga Saksi ni Jehova nianang dapita; siya may ubang plano alang sa propiedad. Gikinahanglan ang aksiyon sa korte aron mapugngan ang opisyales gikan sa dili subay sa balaod nga paggamit sa ilang awtoridad. Ang korte mihukom pabor sa mga Saksi. Wala madugay human niana, ang lokal nga mga molupyo miboto batok sa mayor. Ang trabaho sa tigomanan gisugdan dayon. Ang resulta maoy usa ka maanindot nga Assembly Hall nga malingkoran ug kapin sa 4,000. Kana maoy usa ka dapit nga parehong ikapasigarbo sa mga negosyante ug mga molupyo sa siyudad.

Sulod sa milabayng 27 ka tuig, sa daghang bahin sa yuta, ang maanindot ug praktikal nga mga Assembly Hall natukod sa mga Saksi ni Jehova aron mosilbing  mga sentro sa edukasyon sa Bibliya. Ang maong mga tigomanan karon makaplagan na sa padayong-nagatubo nga gidaghanon diha sa Amerika del Norte ug del Sur, Uropa, Aprika, ug Oriente, ingon man sa daghang isla. Sa pila ka kayutaan​—pananglitan, sa Nigeria, Italya, ug Denmark​—ang mga Saksi ni Jehova nakatukod gani ug mas dako, permanente, walay-bungbong nga mga pasilidad nga magamit sa ilang distritong mga kombensiyon.

Bisan pa, ang mga Assembly Hall ug mga Kingdom Hall dili lamang mao ang mga proyekto sa pagpanukod sa mga Saksi ni Jehova aron sa pagpalapad sa pagmantala sa Gingharian sa Diyos.

Mga Buhatan, Imprintahanan, ug Balayng Bethel sa Tibuok Kalibotan

Sa tibuok yuta niadtong 1992, dihay 99 ka sangang buhatan sa Watch Tower Society nga ang kada usa niana nagasilbi sa paghiusa sa mga kalihokan sa mga Saksi ni Jehova diha sa bahin niini sa natad sa kalibotan. Kapin sa katunga niining mga sangaha nagaimprinta sa lainlaing matang aron mapalapad ang buluhaton sa edukasyon sa Bibliya. Kadtong nagtrabaho sa mga sanga nagpuyo, sa kasagaran, ingong dakong pamilya diha sa mga balay nga gitawag ug Bethel, nga nagkahulogang “Balay sa Diyos.” Tungod sa pag-uswag sa gidaghanon sa mga Saksi ni Jehova ug sa ilang buluhatong pagwali, gikinahanglan nga padak-an kining maong mga pasilidad ug magtukod ug bag-o.

Pagkakusog sa pagtubo sa organisasyon nga kanunay may 20 hangtod 40 ka programa sa pagpalapad-sa-sanga nga nagapadayon sa usa ka panahon. Kini nanginahanglan ug dako kaayong programa sa internasyonal nga konstruksiyon.

Tungod sa dako kaayong buluhaton sa konstruksiyon nga ginahimo sa tibuok kalibotan, ang Watch Tower Society may kaugalingong Departamento sa Enhinyeriya ug Pagdibuho sa hedkuwarter niini sa New York. Ang mga enhinyero nga may daghang tuig nga eksperyensiya namiya sa ilang sekular nga trabaho ug nagboluntaryo sa pagtabang nga bug-os-panahon sa mga proyekto sa pagpanukod nga sa laktod nalangkit sa kalihokan sa Gingharian. Dugang pa, kadtong may eksperyensiya nagbansay sa ubang lalaki ug babaye diha sa buluhaton sa enhinyeriya, desinyo, ug pagdibuho. Tungod sa pag-organisar sa trabaho pinaagi niining departamentoha, ang eksperyensiya nga naangkon diha sa konstruksiyon sa sanga sa bisan diing bahin sa kalibotan makahatag ug kaayohan niadtong nagtrabaho sa mga proyekto sa ubang kayutaan.

Sa ulahi, tungod sa dakong buluhaton nga ginahimo mapuslanon nga magbukas ug usa ka Rehiyonal nga Buhatan sa Enhinyeriya sa Hapon aron motabang sa teknikal nga mga dibuho sa konstruksiyon alang sa mga proyekto sa Oriente. Ang ubang Rehiyonal nga Buhatan sa Enhinyeriya nagalihok sa Uropa ug Australia, nga may mga tawo nga gikuha gikan sa lainlaing kayutaan. Kini sila nagtrabaho nga suod nakigtambayayong sa buhatan sa hedkuwarter, ug ang ilang mga serbisyo, uban sa paggamit sa teknolohiya sa kompiyuter, nagpakunhod sa gidaghanon sa mga tawo nga tigdibuho nga gikinahanglan sa bisan diing dapit sa konstruksiyon.

Ang pila ka proyekto kasarangan ug gidak-on. Kana ang tinuod sa sangang buhatan nga gitukod sa Tahiti niadtong 1983. Kini naglakip sa buhatan, mga tipiganan, ug katulganan sa walo ka boluntaryong trabahante. Tinuod usab kana sa  upat-ka-andanang sangang buhatan nga gitukod sa Caribbeanong isla sa Martinique sa mga tuig sa 1982 ug 1984. Kining mga tinukora mahimong dili talagsaon alang sa taga-dagkong-siyudad sa ubang kayutaan, apan sila nakadani sa pagtagad sa publiko. Ang mantalaang France-Antilles nagdeklarar sa pasilidad sa sanga sa Martinique ingong “usa ka obra-maestra sa arkitektura” nga nagbanaag sa “dakong gugma sa trabahong maayong pagkahimo.”

Sa kasukwahi gikan sa punto-de-vista sa gidak-on, ang mga tinukod nga nahuman sa Canada niadtong 1981 naglakip sa usa ka imprintahanan, o pabrika, nga may kapin sa 9,300 metros kuwadrado nga gilapdon sa salog ug usa ka puy-anan alang sa 250 ka boluntaryo. Sa Cesario Lange, sa Brazil, ang pasilidad sa Watch Tower nga nakompleto sa samang tuig naglakip sa walo ka tinukod, nga may hapit 46,000 metros kuwadrado nga luna sa salog. Kana nagkinahanglan ug 10,000 ka trak nga semento, graba, ug balas, ingon man sa kongkretong mga ugsok nga moabot sa dobleng gihabogon sa Bukid sa Everest! Niadtong 1991, sa dihang natapos ang usa ka dakong imprintahanan sa Pilipinas, kinahanglanon usab nga itagana ang 11-ka-andana nga puy-anan.

Aron matagan-an ang panginahanglan sa nagatubong gidaghanon sa mga magmamantala sa Gingharian sa Nigeria, usa ka dakong proyekto sa pagpanukod ang gisugdan sa Igieduma niadtong 1984. Kini naglakip sa usa ka pabrika, usa ka luag nga tinukod pang-opisina, upat ka konektadong tinukod nga puy-anan, ug ubang kinahanglanong pasilidad. Giplano nga ang pabrika bug-os nga mabalay-daan sa Tinipong Bansa una pa ipadala. Apan unya ang mga igsoon nahisugamak sa morag imposibleng mga tagal sa pag-importar. Sa dihang kining mga tagal nakab-ot ug ang tanang butang nakaabot nga luwas sa dapit tukoranan, ang mga Saksi wala moangkon sa dungog apan nagpasalamat kang Jehova tungod sa iyang panalangin.

Kusog nga Pag-uswag sa Tibuok Yuta

Hinuon, kusog kaayo ang pag-uswag sa buluhatong pagwali sa Gingharian nga bisan human sa dakong pagpauswag sa mga pasilidad sa sanga sa usa ka nasod, sa subsob kinahanglang sugdan na usab ang pagpanukod sulod sa mubo kaayong panahon. Tagda ang pipila ka pananglitan.

Sa Peru ang usa ka maayong bag-ong sanga​—nga may luna sa buhatan, 22 ka lawak-katulganan ingon man sa ubang paninugdang pasilidad alang sa mga membro sa pamilyang Bethel, ug usa ka Kingdom Hall​—natapos sa kataposan sa 1984. Apan ang sanong sa mensahe sa Gingharian nianang yutaa sa Amerika del Sur mas dako kay sa gidahom. Upat ka tuig sa ulahi kinahanglang kopyahon ang nagalungtad nga pasilidad, niining panahona gigamit ang batok-linog nga desinyo aron mamenosan ang kadaot gumikan sa mga linog.

Usa ka halapad bag-ong pasilidad sa sanga ang natapos sa Colombia niadtong 1979. Mora kadtog makatagana ug igong luna sulod sa daghang tuig nga umaabot. Ugaling, sulod sa pito ka tuig ang gidaghanon sa mga Saksi sa Colombia hapit midoble, ug ang sanga karon nag-imprinta sa mga magasing La Atalaya ug ¡Despertad! dili lamang alang sa Colombia kondili alang usab sa upat ka silingang nasod. Kinahanglan silang magtukod pag-usab niadtong 1987​—niining panahona kutob sa dapit nga may mas dakong lote alang sa pagpalapad.

 Sa 1980, ang mga Saksi ni Jehova sa Brazil migugol ug mga 14,000,000 ka oras sa publikong pagwali sa mensahe sa Gingharian. Ang numero misulbong ngadto sa hapit 50,000,000 niadtong 1989. Mas daghang tawo ang nagpakita ug kaikag nga busgon ang ilang espirituwal nga kagutmanan. Ang haluag nga mga pasilidad sa sanga nga nadedikar niadtong 1981 dili na igo. Pag-abot sa Septiyembre 1988, ang pagkalot alang sa usa ka bag-ong pabrika nasugdan na. Kini motaganag 80 porsiento nga dugang luna sa salog kay sa naglungtad nga pabrika, ug siyempre, ang mga puy-anan alang sa nagkadakong pamilyang Bethel kinahanglanon usab.

Sa Selters/Taunus, Alemanya, ang ikaduhang-kinadak-ang pasilidad sa pag-imprinta sa Watch Tower Society gipahinungod niadtong 1984. Lima ka tuig sa ulahi, tungod sa mga pag-uswag sa Alemanya maingon usab sa mga kahigayonan sa pagpalapad sa pagwaling buluhaton diha sa kayutaan nga ginaimprintahan ug literatura sa sangang buhatan didto, may mga plano na alang sa pagpadako sa pabrika sa kapin ug 85 porsiento ug pagdugang ug ubang mga pasilidad alang sa mga trabahante.

Ang sanga sa Hapon gibalhin gikan sa Tokyo ngadto sa dako bag-ong mga pasilidad sa Numazu niadtong 1972. May dugang pang dakong pagpalapad niadtong 1975. Sa pagka 1978 laing propiedad ang napalit, sa Ebina; ug ang trabaho sa pabrika nga kapin sa tulo ka pilo ang gidak-on nianang sa Numazu sa walay langan gisugdan. Kini natapos niadtong 1982. Kadto dili pa igo; daghang tinukod ang gidugang niadtong 1989. Dili ba mahimo nga kas-a lang motukod ug dakoon kana pag-ayo? Dili. Ang gidaghanon sa mga magmamantala sa Gingharian sa Hapon midoble pag-usab ug pag-usab sa paagi nga walay tawo ang makatagna. Gikan sa 14,199 niadtong 1972, ang ilang membro misulbong ngadto sa 137,941 niadtong 1989, ug ang daghan kanila mideboto sa bug-os panahon sa ministeryo.

Ang kaamgid nga dagan makita diha sa ubang bahin sa yuta. Sulod sa usa ka dekada​—ug usahay sulod sa pipila ka tuig​—human sa pagtukod ug dagkong mga sanga nga nasangkapan alang sa pag-imprinta, kinahanglan nga mohimog dakong pagpalapad. Kana ang nahitabo sa Mexico, Canada, Habagatang Aprika, ug sa Republika sa Korea, lakip sa uban.

Kinsa ang nangamot sa buluhaton sa konstruksiyon? Sa unsang paagi kanang tanan nalampos?

Mga Linibo ang Andam Motabang

Sa Sweden, sa 17,000 ka Saksi sa nasod sa panahon nga gitukod ang ilang sangang buhatan sa Arboga, mga 5,000 ang miboluntaryo aron motabang sa buluhaton. Ang kadaghanan yanong andam nga mga katabang, apan diha usay igoigong hanas kaayong mga propesyonal sa pagtino nga ang buluhaton mabuhat sa hustong paagi. Ang nakapalihok kanila? Gugma kang Jehova.

Sa dihang usa ka opisyal sa usa ka opisina sa surbeyor sa Denmark nakadungog nga ang tanang buluhaton sa bag-ong sanga sa Holbæk pagabuhaton sa mga Saksi ni Jehova, siya mipahayag ug pagduhaduha. Bisan pa niana, taliwala sa mga Saksi nga miboluntaryo sa pagtabang, ang tanang gikinahanglan nga kahibalo nakaplagan. Apan, sila ba makabentaha unta kon ang komersiyal nga mga kontraktor ang gisuholan sa pagbuhat? Human makompleto ang proyekto, ang mga eksperto  gikan sa departamento sa pagpanukod sa lungsod misuroy sa pasilidad ug mikomento bahin sa pulidong trabaho​—usa ka butang nga tagsa ra nilang makita sa komersiyal nga trabaho karong adlawa. Bahin sa opisyal nga sayosayo mipahayag ug pagduhaduha, siya mipahiyom ug miingon: “Hibalo mo, niadtong panahona wala akoy kasayoran kon unsang matanga ang inyong organisasyon.”

Ang mga sentro sa populasyon sa Australia lagyog distansiya; mao nga, ang kadaghanan sa 3,000 nga miboluntaryo sa pagtrabaho sa mga pasilidad sa sanga sa Ingleburn tali sa 1978 ug 1983 kinahanglang mobiyahe sa labing menos 1,600 ka kilometros. Hinuon, ang pagbiyaheg bus alang sa mga grupo sa boluntaryo giorganisar, ug ang mga kongregasyon sa agianan maabiabihong midalit ug pagkaon ug panagkauban alang sa mga igsoon sa matag hunong sa pagpahulay. Ang pila ka igsoon nagbaligya sa ilang mga balay, nagsira sa mga negosyo, nagbakasyon, ug naghimog ubang mga pagsakripisyo aron makaambit diha sa proyekto. Ang mga tem sa eksperyensiyadong mga panday ug mason nangadto​—ang pipila kanila dili lang makausa​—sa pagbuhos ug semento, pagtaod ug mga kisame, ug pagpatindog ug mga koral. Ang uban midonar ug materyales.

Ang kadaghanan sa mga boluntaryo niining mga proyektoha dili hanas, apan pinaagi sa makadiyot nga pagbansay, ang pipila kanila miabaga ug dakong mga responsabilidad ug nakahimog maayong trabaho. Sila nakakat-on sa paghimog mga bintana, pagpadagan sa mga traktora, pagmasa ug semento, ug pagtaod ug mga tisa. Sila nagpahimulos ug tinong bentaha kay sa dili mga Saksi nga naghimog samang matang sa trabaho sa komersiyal nga paagi. Sa unsang paagi? Kadtong mga eksperyensiyado andam nga magpaambit sa ilang kahibalo. Walay nahadlok nga pulihan siya sa iyang trabaho; may daghang buluhaton alang sa tanan. Ug may kusganong panukmod sa paghimo ug taas-kalidad nga trabaho, tungod kay kana gihimo ingong pagpahayag sa gugma alang sa Diyos.

Sa tanang dapit sa konstruksiyon, ang pila ka Saksi nahimong uyok sa “pamilya” sa konstruksiyon. Sa panahon sa trabaho sa Selters/Taunus, Alemanya, gikan sa 1979 hangtod sa 1984, pipila ka gatos ang sa katibuk-an naglangkob nianang uyok sa mga trabahante. Linibong uban pa nagtabang kanila sa lainlaing yugto sa panahon, daghan sa hinapos semana. May maampingong pagplano aron nga inig-abot sa mga boluntaryo, may daghang buluhaton alang kanila.

Samtang ang mga tawo dili hingpit, may mga suliran, apan kadtong nagtrabaho niining mga proyektoha nagsulay sa pagsulbad niini pinasikad sa mga prinsipyo sa Bibliya. Sila nasayod nga ang pagbuhat sa mga butang sa Kristohanong paagi mas hinungdanon kay sa pagkaepisyente. Ingong pahinumdom, sa dapit sa konstruksiyon sa Ebina, Hapon, may dagkong mga karatula nga may mga hulagway sa mga trabahante nga may gahing kalo, ug sa matag gahing kalo may nakasulat sa Hinapon nga usa sa mga bunga sa espiritu sa Diyos: gugma, kalipay, kalinaw, pailob, kalulot, kamaayo, pagtuo, kalumo, pagpugong-sa-kaugalingon. (Gal. 5:​22, 23) Kadtong nagduaw sa mga dapit trabahoanan makakita ug makadungog sa kalainan. Nagpahayag sa iyang kaugalingong namatikdan, ang usa ka reporter nga mipasiyo sa dapit sa konstruksiyon sa sanga sa Brazil nag-ingon: “Walay kaguliyang o kakulang sa kooperasyon . . . Kining Kristohanong atmospera dinhi naghimo niini nga lahi gikan sa naandang makita sa komersiyal nga konstruksiyon sa Brazil.”

 Permanenteng Pag-uswag sa Hedkuwarter sa Tibuok Kalibotan

Samtang ang mga sanga sa Watch Tower Society nagatubo, kinahanglan usab nga padak-an ang mga pasilidad sa tibuok-kalibotang hedkuwarter. May dagkong mga gidugang sa pabrika ug mga buhatan niini sa Brooklyn ug sa ubang mga lokasyon sa New York State nga kapin sa napulo ka pilo sukad sa Gubat sa Kalibotan II. Aron mapuy-an sa mga trabahante, kinahanglang motukod o mopalit ug ayohon ang ubay-ubayng tinukod, dagko ug gagmay. Ang dugang dakong pagpalapad sa Brooklyn gipahibalo niadtong Agosto 1990 ug niadtong Enero 1991​—bisan pag sa amihanan sa Siyudad sa New York ang konstruksiyon nga gisugdan niadtong 1989 nagpadayon sa haluag nga Watchtower Educational Center, nga gidesinyong mapuy-an ug 1,200 ka tawo, lakip na ang residente nga mga trabahante ug mga estudyante.

Sukad niadtong 1972, walay hunong ang buluhatong konstruksiyon sa hedkuwarter sa tibuok kalibotan sa Brooklyn ug sa kaubang mga pasilidad niini sa ubang bahin sa New York ug sa New Jersey. Sa ulahi, nadayag nga bisan tuod nga nakaabot nag ginatos, ang regular nga mga trabahante sa konstruksiyon dili makaapas sa trabaho. Busa, niadtong 1984 ang nagapadayong programa sa temporaryong trabahante gisugdan. Gipadalhan ug sulat ang kaniadto 8,000 ka kongregasyon sa Tinipong Bansa aron dapiton ang kuwalipikadong mga igsoon sa pag-adto sa usa ka semana o kapin pa aron motabang. (Ang susamang programa may maayong resulta sa pila ka sanga, apil sa Australia, diin kadtong makaarang sa pagpabilin ug duha ka semana gidapit sa pagboluntaryo.) Ang mga trabahante pagatagan-an ug katulganan ug pagkaon apan mogasto sa ilang kaugalingon sa pagbiyahe ug walay madawat nga suhol. Kinsa ang mosanong?

Pag-abot sa 1992, kapin sa 24,000 ka aplikasyon ang giproseso! Labing menos 3,900 niana maoy sa mga tawo nga mobalik sa ika-2 o ika-3, gani ika-10 o ika-20, ka beses. Kadaghanan kanila maoy mga ansiano, ministeryal nga mga alagad, o mga payunir​—mga tawong may maayong espirituwal nga mga kuwalipikasyon. Silang tanan miboluntaryo sa pagbuhat sa bisan unsa nga kinahanglanon, kon kaha kana magkinahanglan nga gamiton nila ang ilang kahanas o dili. Ang trabaho kasagaran bug-at ug hugaw. Apan ilang giisip nga usa ka pribilehiyo nga makatabang niining paagiha sa pagpauswag sa intereses sa Gingharian. Ang pipila mibati nga kana nakatabang kanila sa labawng pag-apresyar sa espiritu sa pagsakripisyo-sa-kaugalingon nga maoy kinaiya sa trabaho nga ginahimo sa hedkuwarter sa tibuok kalibotan. Silang tanan mibati nga madagayaong gigantihan ingong sangpotanan sa pagtambong sa programa sa pagsimba sa buntag sa pamilyang Bethel ug sa senemanang pagtuon sa pamilya sa Bantayanang Torre.

Internasyonal nga mga Boluntaryo

Samtang midako ang panginahanglan alang sa kusog nga pagpalapad, ang kahikayan alang sa internasyonal nga mga boluntaryo gisugdan niadtong 1985. Dili kadto mao ang pagsugod sa internasyonal nga pagtambayayong sa pagpanukod, apan ang kahikayan karon giorganisar pag-ayo gikan sa hedkuwarter. Ang tanan nga makig-ambit maoy mga Saksi nga moboluntaryo aron motabang sa buluhaton sa konstruksiyon sa gawas sa ilang kaugalingong nasod. Sila maoy hanas nga mga magbubuhat, ingon man ang mga asawa nga mokuyog sa ilang mga bana aron makatabang  sa bisan unsang paagi nga ilang mahimo. Kadaghanan kanila mogasto sa ilang kaugalingong biyahe; walay mausa ang suholan sa ilang trabaho. Ang pipila kanila moboluntaryo sa makadiyot, nga kasagaran mopabilin gikan sa duha ka semana hangtod tulo ka bulan. Ang uban tagdugay nga mga boluntaryo, nga magpabilin sulod sa usa ka tuig o kapin pa, tingali hangtod matapos ang proyekto. Kapin sa 3,000 ka Saksi ni Jehova gikan sa 30 ka nagkalainlaing kanasoran ang nakig-ambit niini sulod sa unang lima ka tuig, ug daghan pa ang gustong makaambit samtang kinahanglanon ang ilang mga kahanas. Ilang giisip nga usa ka pribilehiyo ang paghatag sa ilang kaugalingon ug ilang materyal nga kahinguhaan sa pagpauswag sa intereses sa Gingharian sa Diyos niining paagiha.

Ang internasyonal nga mga boluntaryo tagan-an ug kasak-an ug pagkaon. Sa subsob ang kahimtang dili kaayo komportable. Ang lokal nga mga Saksi nagpasalamat ug dako sa ginahimo sa ilang bisitang mga igsoon, ug kon mahimo, ila silang pasak-on sa ilang mga balay, bisag unsa pa kini ka ubos. Sa subsob didto mangaon sa dapit trabahoan.

Ang mga igsoon gikan sa langyawng nasod wala moadto didto sa paghimo sa tanang trabaho. Ang ilang tuyo mao ang pagtrabaho uban sa lokal nga tem sa konstruksiyon. Ug gatosan, ngani linibo, nga uban pa diha sa nasod mahimong mangadto sa pagtabang sa hinapos semana o sa usa ka semana o kapin pa sa usa ka higayon. Sa Argentina, 259 ka boluntaryo gikan sa ubang nasod nagtrabaho uban sa pipila ka libong lokal nga mga igsoon, ang pipila kanila nagtrabaho kada adlaw, ang uban sa pipila ka semana, ug daghan pa sa hinapos-semana. Sa Colombia, kapin sa 830 ka internasyonal nga mga boluntaryo ang mitabang sa nagkalainlaing yugto sa panahon. May kapin usab sa 200 ka lokal nga mga boluntaryo nga nakig-ambit sa proyekto sa bug-os panahon ug, kada hinapos-sa-semana, laing 250 o kapin pa ang mitabang. Ang katibuk-an sa kapin sa 3,600 ka lainlaing indibiduwal ang nakigbahin.

 Ang kalainan sa pinulongan makapahinabo ug mga suliran, apan kana wala makapugong sa internasyonal nga mga grupo sa pagtambayayongay. Ang senyas, mga ekspresyon sa nawong, maayong katistis, ug ang tinguha nga malampos ang usa ka buluhaton nga makapasidungog kang Jehova nakatabang sa pagpalampos sa buluhaton.

Ang talagsaong pagtubo sa organisasyon​—nga misangpot sa panginahanglan alang sa mas dagkong mga pasilidad sa sanga​—usahay masinatian sa kayutaan diin diyutay ra ang mga tawo nga hanas sa pagpanukod. Apan dili kini babag taliwala sa mga Saksi ni Jehova, nga malipayong magtinabangay sa usag usa. Sila magtambayayongay ingong bahin sa usa ka tibuok-yutang pamilya nga wala mabahinbahin tungod sa nasyonalidad, pamanit, o pinulongan.

Sa Papua New Guinea, ang mga boluntaryo nga gikan sa Australia ug New Zealand matag usa nagbansay ug usa ka taga-Papua New Guinea diha sa iyang kahanas, uyon sa hangyo sa Departamento sa Pamuo sa Kagamhanan. Niining paagiha, samtang nagboluntaryo, ang lokal nga mga Saksi nakakat-on ug mga kahanas nga makatabang kanila sa pag-atiman sa ilang kaugalingong mga panginahanglan ug sa ilang mga pamilya.

Sa dihang nagkinahanglan ug bag-ong sanga sa El Salvador, ang lokal nga mga igsoon gitabangan sa 326 ka boluntaryo gikan sa ubang nasod. Alang sa proyekto sa Ecuador, 270 ka Saksi gikan sa 14 ka kayutaan nagtrabaho kauban sa ilang taga-Ecuador nga igsoong mga lalaki ug babaye. Ang pila ka internasyonal nga mga boluntaryo nagtabang sa pipila ka proyekto nga ginahimo sa samang panahon. Sila nagbalhinbalhin tali sa mga dapit sa konstruksiyon sa Uropa ug Aprika, sumala sa panginahanglan sa ilang mga kahanas.

Sa pag-abot sa 1992, ang internasyonal nga mga boluntaryo napadala na sa 49 ka lokasyon sa sanga aron motabang sa lokal nga mga magtutukod. Sa pila ka higayon kadtong nakadawat ug tabang gikan niining programaha nakaarang, sa baylo, sa pagtabang sa uban. Mao nga, kay nakabenepisyo gikan sa mga paghago sa mga 60 ka tagdugay nga internasyonal nga mga alagad nga mitabang sa proyekto sa pagpanukod sa sanga sa Pilipinas, ingon man ang kapin sa 230 ka boluntaryo gikan sa ubang nasod nga mitabang sa makadiyot, ang pila ka Pilipino miboluntaryo sa pagtabang sa pagtukod ug mga pasilidad sa ubang mga bahin sa Habagatan-sidlakang Asia.

Ang pagpanukod ginahimo sa mga Saksi ni Jehova tungod sa panginahanglan nga naglungtad karon may kalabotan sa pagwali sa maayong balita. Sa tabang sa espiritu ni Jehova, gusto nilang himoon ang kinadak-ang pagpamatuod nga posible sulod sa nanghibilin nga panahon una pa ang Armageddon. Sila kombinsido nga ang bag-ong kalibotan sa Diyos duol na kaayo, ug sila nagtuo nga sila makalabang-buhi ingong usa ka organisadong katawhan ngadto nianang bag-ong kalibotan, ubos sa pagmando sa Mesiyanikong Gingharian sa Diyos. Sila usab naglaom nga tingali daghan sa maayong mga pasilidad nga ilang gitukod ug gipahinungod kang Jehova padayon nga pagagamiton tapos sa Armageddon ingong mga sentro nga gikan niana ang kahibalo sa bugtong matuod nga Diyos mapakaylap hangtod nga mapuno gayod niana ang yuta.​—Isa. 11:9.

[Footnote]

[Blurb sa panid 322]

Ang mga Saksi gikan sa duol nga mga kongregasyon mitabang sa buluhaton

[Blurb sa panid 323]

Ang buluhaton sa konstruksiyon gihimo pinaagig boluntaryo, walay suhol nga trabaho

[Blurb sa panid 324]

Ang gipasiugda mao ang espirituwal nga mga hiyas

[Blurb sa panid 326]

De-kalidad nga konstruksiyon, kaluwasan, daginot nga gasto, gikusgon

[Blurb sa panid 328]

Usa ka mabalhinbalhin nga Assembly Hall!

[Blurb sa panid 331]

Midangop sa mga korte

[Blurb sa panid 332]

Dinagko internasyonal nga pagpalapad

[Blurb sa panid 333]

Ang mga trabahante nagpasidungong kang Jehova, dili sa ilang kaugalingon

[Blurb sa panid 334]

Pag-uswag diha sa katulinon nga walay tawo ang mahimong makatagna

[Blurb sa panid 336]

Ilang giisip nga usa ka pribilehiyo ang makatabang sa pagpanukod sa hedkuwarter

[Blurb sa panid 339]

Sila nagtrabaho ingong usa ka tibuok-yutang pamilya, nga wala mabahinbahin tungod sa nasyonalidad, pamanit, o pinulongan

 [Kahon/Mga hulagway sa panid 320, 321]

Nagtambayayong Alang sa Daling Pagtukod sa mga Kingdom Hall

Linibo ka bag-ong kongregasyon ang maporma kada tuig. Sa kadaghanang kaso, ang bag-ong mga Kingdom Hall gitukod sa mga Saksi mismo. Kining mga letratoha gikuha sa panahon sa pagtukod sa usa ka Kingdom Hall sa Connecticut, T.B.A., niadtong 1991

Biyernes, 7:40 s.b.

Biyernes, alas-12 sa udto

 Sabado, 7:41 s.g.

Ang dakong trabaho natapos, Dominggo, 6:10 s.g.

Sila nagdepende kang Jehova alang sa iyang panalangin, ug sila naghatag ug panahon sa paghisgot sa tambag gikan sa iyang Pulong

Ang tanan walay suhol nga mga boluntaryo, malipayon nga nagtrabaho nga magkauban

 [Kahon/Mga hulagway sa panid 327]

Mga Kingdom Hall sa Lainlaing Kayutaan

Ang mga tigomanan nga gigamit sa mga Saksi ni Jehova sagad nga kasarangan. Kana hinlo, komportable, matahom sa ilang mga palibot

Pilipinas

Hapon

Colombia

Pransiya

Papua New Guinea

Norway

Peru

Republika sa Korea

Irlandia

Lesotho

 [Kahon/Mga hulagway sa panid 330]

Mga Assembly Hall sa mga Saksi ni Jehova

Aron magamit sa panahon sa ilang mga asembliya, ang mga Saksi ni Jehova sa pila ka dapit nakadiskobre nga praktikal ang pagtukod sa ilang kaugalingong mga Assembly Hall. Ang kadaghanan sa buluhaton sa pagpanukod gihimo sa lokal nga mga Saksi. Ania ang pipila lamang niining mga tigomanan nga gigamit sa sinugdan sa katuigang 1990

Italya

Alemanya

Britanya

Venezuela

Canada

Hapon

 [Kahon/Mga hulagway sa panid 338]

Ang Internasyonal nga Programa sa Konstruksiyon Nagatagana sa Dinaliang Panginahanglan

Ang kusog nga pag-uswag sa organisasyon nagkinahanglan sa padayong pagpalapad sa mga buhatan, mga pabrika, ug mga balayng Bethel sa tibuok yuta

Ang internasyonal nga mga boluntaryo nagtabang sa lokal nga mga Saksi

Espanya

Ang mga pamaagi sa konstruksiyon nga gigamit nagpaarang sa daghang boluntaryo nga may limitadong eksperyensiya sa paghimo ug bililhong trabaho

Puerto Rico

Ang mga hanas nga trabahante malipayong nagtanyag sa ilang mga serbisyo

New Zealand

Gresya

Brazil

Ang paggamit sa durableng materyales nakatabang sa pagpakunhod sa gastos sa pag-atiman

Britanya

Ang taas-ug-kalidad nga trabaho mosangpot gikan sa personal nga kaikag sa bahin niadtong nagahimo niana; kini maoy pagpahayag sa ilang gugma kang Jehova

Canada

Kining mga proyektoha maoy makalilipayng mga okasyon; daghang malahutayong mga panaghigalaay ang nahimo

Colombia

Ang karatula sa Hapon nagapahinumdom sa mga trabahante mahitungod sa kaluwasan, usab mahitungod sa panginahanglan sa pagpakita sa mga bunga sa espiritu sa Diyos

[Hulagway sa panid 318]

Ang kinaunahang tinukod nga gitawag ug Kingdom Hall, sa Hawaii

[Mga hulagway sa panid 319]

Daghang unang mga Kingdom Hall maoy mga tinukod nga giabangan o maoy mga lawak lamang sa ibabaw sa mga tindahan; ang pipila gitukod sa mga Saksi

[Mga hulagway sa panid 329]

Duha sa kinaunahang mga Assembly Hall

Siyudad sa New York

Guadeloupe

[Mga hulagway sa panid 337]

Bag-ong nangabot nga temporaryong mga trabahante sa konstruksiyon sa hedkuwarter sa tibuok kalibotan sa New York

Ang matag grupo gipahinumdoman nga ang pagkaespirituhanong tawo ug paghimo sa de-kalidad nga trabaho maoy panguna kay sa pagdali sa trabaho