Kapitulo 18

“Pagpangita Pag-una sa Gingharian”

ANG pangunang tema sa Bibliya mao ang pagbalaan sa ngalan ni Jehova pinaagi sa Gingharian. Gitudloan ni Jesu-Kristo ang iyang mga sumusunod nga unahon ang pagpangita sa Gingharian, nga unahon kana kay sa ubang intereses sa kinabuhi. Ngano?

Ang Bantayanang Torre kanunayng nagsaysay nga tungod sa iyang pagka-Maglalalang, si Jehova mao ang Unibersohanong Soberano. Takos siya sa kinatas-ang pagtamod sa iyang mga linalang. (Pin. 4:11) Ugaling, sayo kaayo sa kasaysayan sa tawo, usa ka espirituhanong anak sa Diyos nga naghimo sa iyang kaugalingon nga Satanas ug Yawa masukihong mihagit sa soberanya ni Jehova. (Gen. 3:​1-5) Dugang pa, si Satanas nagpasangil nga ang tanan nga nag-alagad kang Jehova mialagad tungod sa mahakogong motibo. (Job 1:​9-11; 2:​4, 5; Pin. 12:10) Mao nga nabungkag ang kalinaw sa uniberso.

Mga dekada na karon, nga ang mga publikasyon sa Watch Tower nagpatin-aw nga si Jehova nakahimog tagana aron husayon kining mga isyuha sa paagi nga mahimaya dili lamang ang iyang labing dakong gahom apan usab ang kadako sa iyang kaalam, iyang hustisya, ug iyang gugma. Ang kinauyokan nga bahin nianang taganaha mao ang Mesiyanikong Gingharian sa Diyos. Pinaagi nianang Ginghariana, ang katawhan hatagan ug igong kahigayonan aron makakat-on sa mga paagi sa pagkamatarong. Pinaagi niana, laglagon ang mga daotan, ang soberanya ni Jehova mabindikar, ug matuman ang iyang katuyoan nga mahimong paraiso ang yuta nga puy-an sa mga tawo nga sa tinuod nahigugma sa Diyos ug sa usag usa ug nga panalanginan sa hingpit nga kinabuhi.

Tungod sa kahinungdanon niini, gitambagan ni Jesus ang iyang mga sumusunod: “Busa, padayona pagpangita pag-una ang gingharian.” (Mat. 6:​10, 33) Ang mga Saksi ni Jehova sa modernong panahon nakapakitag daghang ebidensiya nga sila naningkamot sa pagtuman nianang tambaga.

Pagbiya sa Tanan Tungod sa Gingharian

Sa sayong panahon, ang mga Estudyante sa Bibliya naghunahuna kon unsay ipasabot sa pagpangita pag-una sa Gingharian. Ilang gihisgotan ang sambingay ni Jesus diin iyang gipanag-ing ang Gingharian sa usa ka mutya nga may taas kaayong bili nga ang usa ka tawo “nagbaligya sa tanan niyang butang ug gipalit kana.” (Mat. 13:​45, 46) Ilang gihinuktokan ang kahinungdanon sa tambag ni Jesus ngadto sa usa ka adunahan nga batan-ong magmamando sa pagbaligya sa tanang butang, paghatag niana ngadto sa mga kabos, ug pagsunod kaniya. (Mar. 10:​17-30) a Ilang nasabtan nga kon sila buot nga mahimong takos aron makabahin diha sa Gingharian sa  Diyos, kinahanglang ang Gingharian himoon nilang pangunang interes, nga malipayong gamiton ang ilang mga kinabuhi, ilang mga katakos, ilang mga kahinguhaan, diha sa iyang pag-alagad. Ang tanang butang sa kinabuhi maoy ikaduha lamang.

Si Charles Taze Russell sa personal milihok sumala sa maong tambag. Iyang gibaligya ang iyang nagauswag nga negosyo sa bisteng panglalaki, sa inanay gikunhoran ang ubang mga intereses sa negosyo, ug unya gigamit ang iyang tanang yutan-ong mga kabtangan aron tabangan ang mga tawo sa espirituwal nga paagi. (Itandi ang Mateo 6:​19-21.) Kana dili usa ka butang nga gihimo niya sa pipila ra ka tuig. Hangtod sa iyang kamatayon, iyang gigamit ang tanan niyang kahinguhaan​—ang iyang mental nga katakos, iyang pisikal nga kusog, iyang materyal nga kabtangan​—sa pagtudlo sa uban sa halangdong mensahe sa Gingharian sa Mesiyas. Sa lubong ni Russell usa ka kauban, si Joseph F. Rutherford, nag-ingon: “Si Charles Taze Russell maunongon sa Diyos, maunongon kang Kristo Jesus, maunungon sa kawsa sa Gingharian sa Mesiyas.”

Niadtong Abril 1881 (sa dihang pipila pa lamang ka gatos ka tawo ang nagtambong sa mga tigom sa mga Estudyante sa Bibliya), ang Watch Tower nagluwat ug artikulong nag-ulohang “Nanginahanglan ug 1,000 ka Magwawali.” Kini naglakip sa imbitasyon sa mga lalaki ug mga babaye nga walay gibuhing pamilya sa pagtrabaho ingong colporteur nga mga ebanghelista. Migamit sa pinulongan ni Jesus sa sambingay sa Mateo 20:1-16, ang Watch Tower misukna: “Kinsa ang may mainitong tinguha sa pag-adto ug pagbuhat diha sa Parrasan, ug nagaampo nga ang Ginoo mobukas sa dalan”? Kadtong makahatag sa labing menos katunga sa ilang panahon nga eksklusibo sa buluhaton sa Ginoo gidasig sa pag-aplay. Aron matabangan sila sa mga galastohan sa biyahe, pagkaon, sinina, ug puy-anan, ang Zion’s Watch Tower Tract Society mihatag sa unang mga colporteur ug literatura sa Bibliya aron ipahimutang, ug nagpahayag sa kasarangang kontribusyon nga mahimong hangyoon alang sa literatura, ug nag-awhag sa mga colporteur sa paghawid sa bahin sa salapi nga madawat. Kinsa ang misanong niining mga kahikayana ug misulod sa colporteur nga pag-alagad?

Sa 1885 may mga 300 ka colporteur nga nakig-uban sa Sosyedad. Niadtong 1914 ang gidaghanon sa kataposan mikapin sa 1,000. Dili kadto sayon nga buluhaton. Tapos makaduaw sa mga balay sa upat ka gagmayng mga lungsod ug makakaplag lamang ug tulo o upat ka tawo nga may diyutayng interes, usa ka colporteur misulat: “Ako magaingong ako mibating mamingawon nga mobiyaheg layo, nga makatagbo ug daghan kaayo, ug makakaplag ug diyutay kaayong nagpakitag pagtagad sa plano ug sa Iglesya sa Diyos. Tabangi ako pinaagi sa inyong mga pag-ampo, aron akong ikapahayag sa husto ug sa maisogon ang kamatuoran, ug dili maluya sa maayong buhat.”

Gitanyag ang Ilang Kaugalingon nga Kinabubut-on

Kadtong mga colporteur tinuod nga mga mangunguna. Ilang gisulod ang labing lisod aboton nga mga suok sa yuta sa panahon nga ang transportasyon karaan pa kaayo ug ang mga dalan maoy, sa kadaghanan, maarang-arang lang ug diyutay sa agianan sa karomata. Si Sister Early, sa New Zealand, maoy usa nga naghimo niana. Misugod sa wala pay Gubat sa Kalibotan I, migugol siya ug 34 ka tuig sa maong bug-os panahong pag-alagad una pa sa iyang kamatayon niadtong 1943. Iyang nakobrehan  ang halos tibuok nasod pinaagig bisikleta. Bisan sa dihang siya nabalda tungod sa artraytis ug dili na makabisikleta, iyang gamiton ang bisikleta aron masandigan ug kargahan sa iyang mga libro nga molibot sa komersiyal nga teritoryo sa Christchurch. Makasaka siyag hagdan, apan kinahanglan nga siya mokanaog nga paatras tungod sa iyang pagkabaldado. Bisan pa, samtang may kusog siya, iya kanang gigamit sa pag-alagad kang Jehova.

Kining mga tawhana wala mosulod niining buluhatona tungod kay mibati sila nga masaligon sa ilang kaugalingon. Ang pipila kinaiyanhong hilomon, apan gihigugma nila si Jehova. Una pa mosangyaw sa komersiyal nga teritoryo, usa niadtong sister mohangyo sa kada Estudyante sa Bibliya diha sa iyang dapit sa pag-ampo alang kaniya. Sa kadugayan, samtang siya nakakuhag eksperyensiya, nagmadasigon pa kaayo siya sa kalihokan.

Sa dihang si Malinda Keefer nakigsulti kang Brader Russell niadtong 1907 mahitungod sa iyang tinguha sa pagsulod sa bug-os-panahong pag-alagad, siya miingon nga gibati niyang kinahanglan una niyang makabaton ug dugang kahibalo. Sa pagkatinuod, sa miaging tuig lamang siya nakabasa sa literatura sa mga Estudyante sa Bibliya. Ang tubag ni Brader Russell mao: “Kon gusto nimong hulaton hangtod mahibalo ka sa tanan dili ka gayod makasugod, apan ikaw makakat-on samtang ikaw nagahimo niana.” Nga walay pagpanuko, dihadiha siya misugod sa Ohio, sa Tinipong Bansa. Kanunay niyang gihinumdoman ang Salmo 110:​3, nga nagaingon: “Ang imong katawhan motanyag sa ilang kaugalingon nga kinabubut-on.” Sa sunod 76 ka tuig, padayon lang siyang naghimo niana. b Nagsugod siya ingong dalaga. Sulod sa 15 ka tuig mangayaon siyang nag-alagad sa kahimtang nga minyo. Apan human mamatay ang iyang bana, padayon siya sa pagbuhat, uban sa tabang ni Jehova. Sa pagtan-aw ug balik sa mga tuig, siya miingon: “Pagkadako sa akong pasalamat nga gitanyag ko ang akong kaugalingon nga kinabubut-on ingong usa ka payunir sa dihang batan-on pa ug kanunay nga giuna ang intereses sa Gingharian!”

Sa dihang ang dagkong mga kombensiyon himoon niadtong unang mga adlaw, sa subsob may mga kahikayan alang sa linaing mga sesyon uban sa mga colporteur. Ang mga pangutana tubagon, ang mga bag-ohan bansayon, ug ang mga pagdasig gihatag.

Sukad sa 1919 paunahan, mas daghang mga alagad ni Jehova ang nagpabili pag-ayo sa Gingharian sa Diyos nga sila usab tinuod nga nagtukod sa ilang mga kinabuhi libot niana. Ang pila kanila nakaarang sa pagpadaplin sa sekular nga pangagpas ug paggugol sa ilang kaugalingon sa bug-os ngadto sa ministeryo.

Pag-atiman sa Materyal nga mga Panginahanglan

Sa unsang paagi sila nag-atiman sa ilang materyal nga mga panginahanglan? Si Anna Petersen (sa ulahi Rømer), usa ka bug-os-panahong ebanghelista sa Denmark, mihinumdom: “Natabangan kami sa napahimutang nga mga literatura alang sa adlaw-adlaw nga gastos, ug ang among panginahanglan dili dako. Kon may dagkong  galastohan, kini sa kanunay matagan-an sa usa o sa laing paagi. Ang mga sister mohatag kanamo ug pila ka mga sinina, mga bistida o mga amerikana, ug masul-ob dayon namo kini, mao nga kami maayog pamiste. Ug sa pila ka tingtugnaw ako motrabaho sa opisina sa pila ka bulan. . . . Pinaagi sa pagpamalit kon dihay baratilyo, ako makapalit ug sapot nga akong gikinahanglan sa usa ka tuig. Maayo ra ang lakaw sa mga butang. Wala gayod kami hikabsi.” Ang materyal nga mga butang dili mao ang ilang pangunang gikabalak-an. Ang ilang gugma alang kang Jehova ug sa iyang mga paagi nahisama sa usa ka kalayo nga nagdilaab sa sulod nila, ug kinahanglan nila kanang ipahayag.

Alang sa puy-anan sila mahimong moabang ug usa ka kasarangang kuwarto samtang sila nagduaw sa mga tawo diha sa dapit. Ang pila kanila migamit ug treyler​—wala nay dayandayan, may katulgan lang ug makan-an. Ang uban natulog sa mga tolda samtang sila nagbalhinbalhin ug mga dapit. Sa pila ka dapit ang mga brader naghikay ug “mga kampo sa payunir.” Ang mga Saksi diha sa dapit mahimong magsangkap sa usa ka balay, ug usa ka tawo ang maasayn sa pagdumala niana. Ang mga payunir nga nag-alagad dihang dapita makagamit sa sak-anan, ug sila motabang sa mga gastos nga nalangkit.

Kining bug-os-panahong mga magbubuhat wala motugot sa kakulang sa salapi nga mopugong sa karnerohong mga tawo sa pagbaton ug literatura sa Bibliya. Ang mga payunir sagad nga makigbaylo ug mga produkto sama sa patatas, mantekilya, itlog, lab-as ug de-latang prutas, manok, sabon, ug halos bisan unsang butang. Sila wala madato; inay, kini maoy usa ka paagi sa pagtabang sa sinserong mga tawo nga mabatonan ang mensahe sa Gingharian, samtang sa samang panahon nakadawat ug pisikal nga mga kinahanglanon sa kinabuhi aron ang mga payunir makapadayon sa ilang ministeryo. Sila may pagsalig sa saad ni Jesus nga kon sila “magpadayon . . . sa pagpangita pag-una sa gingharian ug sa pagkamatarong [sa Diyos],” unya​—ang gikinahanglang pagkaon ug sapot​—itagana ra.​—Mat. 6:33.

Andam nga Moalagad Bisag Diin nga May Panginahanglan

Ang ilang sinserong tinguha sa pagbuhat sa buluhaton nga giasayn ni Jesus sa iyang mga tinun-an nagdala sa bug-os-panahong mga magbubuhat ngadto sa bag-ong mga teritoryo, bisan sa bag-ong mga kayutaan. Sa dihang si Frank Rice gidapit  nga mobiya sa Australia aron buksan ang pagwali sa maayong balita sa Java (karon bahin sa Indonesia), niadtong 1931, siya may napulo ka tuig na nga kasinatian sa bug-os-panahong ministeryo. Apan karon may bag-ong mga kustombre, ingon man sa bag-ong pinulongan nga tun-an. Makagamit siyag Ingles sa pagsangyaw diha sa mga tindahan ug mga buhatan, apan gusto niyang ang uban masangyawan usab. Nagtuon siyag maayo, ug sulod sa tulo ka bulan nakahibalo siya ug igong Olandes aron sugdan ang balay ug balay nga pagsangyaw. Unya gitun-an niya ang Malayo.

Si Frank 26 anyos lamang sa dihang siya miadto sa Java, ug sa halos unom ka tuig nga didto siya ug sa Sumatra, siya nagbuhat nga nag-inusara. (Sa naghinapos na ang 1931, si Clem Deschamp ug si Bill Hunter miabot gikan sa Australia aron motabang sa buluhaton. Ingong usa ka tem, sila mihimog libot nga pagsangyaw painteryor, samtang si Frank nagsangyaw sa sulod ug gawas sa kabisera sa Java. Sa ulahi, si Clem ug si Bill nakadawat usab ug mga asaynment nga nagdala kanila ngadto sa bulag nga mga dapit.) Walay tigom sa kongregasyon nga matambongan si Frank. Usahay mingaw kaayo, ug kapin sa makausa nga siya naghunahuna sa pag-undang ug mobalik sa Australia. Apan siya nakapadayon. Sa unsang paagi? Ang espirituwal nga pagkaon nga anaa sa The Watch Tower nakatabang sa pagpalig-on kaniya. Niadtong 1937 siya mibalhin sa Indochina, diin hapit siya mamatay sa panahon sa mapintasong mga hitabo sa pagkatapos sa Gubat sa Kalibotan II. Kanang espiritu sa kinabubut-ong pag-alagad buhi gihapon niadtong katuigang 1970 sa dihang siya nagsulat sa pagpahayag sa iyang kalipay tungod sa kamatuoran nga ang iyang entirong pamilya nag-alagad kang Jehova ug sa pagpahibalo nga siya ug iyang asawa sa makausa pa nangandam sa pagbalhin ngadto sa usa ka dapit sa Australia diin dako ang panginahanglan.

‘Pagsalig Kang Jehova sa Bug-os Nilang Kasingkasing’

Si Claude Goodman nakahukom sa ‘pagsalig kang Jehova sa iyang bug-os kasingkasing ug dili mosalig sa iyang kaugalingong salabotan,’ busa iyang gipili ang colporteur nga pag-alagad ingong usa ka Kristohanong ebanghelista inay sa usa ka sekular nga kahigayonan sa negosyo. (Prov. 3:​5, 6) Uban kang Ronald Tippin, nga mitabang kaniya sa pagkat-on sa kamatuoran, siya mialagad ingong usa ka colporteur sa Inglaterra sulod sa kapin sa usa ka tuig. Unya, niadtong 1929, ang duha miadto sa India. c Pagkadako niana nga hagit!

Sa mga tuig nga misunod, sila mipanaw dili lamang pinaagig pagbaktas ug pinaagig pagsakay sa tren de-pasahero ug bus apan usab pinaagig tren de-karga, karomata, kamelyo, sampan, ricksha, ug gani ayroplano ug pribadong tren. Usahay ilang ibuklad ang ilang banig diha sa mga hulatanan sa tren, diha sa pasilongan sa baka, sa kasagbotan sa lasang, o sa payag nga may salog nga gama sa kinalibang sa baka, apan may mga panahon usab nga sila natulog sa maluhong mga hotel ug sa palasyo  sa usa ka raja. Sama kang apostol Pablo, nakat-onan nila ang sekreto sa pagkakontento sa dihang sila kulang sa abiyo o kon may kadagaya. (Filip. 4:​12, 13) Sa kasagaran ang ilang butang gamay lang ug materyal nga bili, apan wala gayod sila kawad-i sa ilang tinuod nga panginahanglan. Sila sa personal nakasinati sa katumanan sa saad ni Jesus nga kon ilang unahon pagpangita ang Gingharian ug ang pagkamatarong sa Diyos, ang materyal nga mga kinahanglanon sa kinabuhi igatagana ra.

May mga pag-atake sa grabeng sakit nga dengue fever, malaria, ug tipos, apan ang mahigugmaong pag-atiman gihimo sa mga isigka-Saksi. Kinahanglan ang pag-alagad sa mga kabos sa mga siyudad sama sa Calcutta, ug kinahanglang masangyawan ang mga taga-plantasyon sa tsa sa kabukiran sa Ceylon (karon nailhang Sri Lanka). Aron matagan-an ang espirituwal nga mga panginahanglan sa mga tawo, ang literatura gitanyag, ang mga rekord gipatokar diha sa lokal nga pinulongan, ug ang mga pakigpulong gihatag. Samtang ang buluhaton nagatubo, si Claude nakakat-on usab sa pagpaandar sa prensa sa pag-imprinta ug sa pag-atiman sa buluhaton sa mga sangang buhatan sa Sosyedad.

Sa iyang ika-87 nga tuig, siya makatan-aw ug balik sa usa ka kinabuhi nga tugob sa mga kasinatian diha sa pag-alagad kang Jehova sa Inglaterra, India, Pakistan, Ceylon, Burma (karon Myanmar), Malaya, Thailand, ug Australia. Ingong usa ka batan-ong ulitawo ug ingong usa ka bana ug amahan, iyang gibutang pag-una ang Gingharian sa iyang kinabuhi. Wala pay duha ka tuig human sa iyang bawtismo nga siya misulod sa bug-os-panahong pag-alagad, ug iyang gilantaw kana ingong iyang karera sa nahibilin sa iyang kinabuhi.

Ang Gahom sa Diyos Nahingpit Diha sa Kaluyahon

Si Ben Brickell maoy usa niadtong masibotong mga Saksi​—walay kalainan sa ubang mga tawo, siya adunay sama nilag mga panginahanglan ug mga kaluyahon. Siya talagsaon sa pagtuo. Niadtong 1930 misulod siya sa buluhatong colporteur sa New Zealand, diin siya nagsangyaw sa mga teritoryo nga wala makobrehe pag-usab sa mga dekada. Duha ka tuig sa ulahi, sa Australia, mihimo siyag lima-ka-bulan nga biyahe sa pagsangyaw latas sa desyertong kabanikanhan nga wala pa masangyawi sa miagi. Ang iyang bisekleta nakargahan ug mga habol, sinina, pagkaon, ug mga libro aron ipahimutang. Bisan tuod ang ubang mga lalaki namatay sa dihang misulay sa pagpanaw latas nianang dapita, siya mipadayon, uban sa pagsalig kang Jehova. Sunod, siya mialagad sa Malaysia, diin nagkasakit siyag grabe sa kasingkasing. Wala siya moundang. Tapos maulian sa panglawas, iyang gipadayon ang bug-os-panahong pagwali nga kalihokan sa Australia.  Duolag dekada sa ulahi, usa ka grabeng sakit ang nakapaospital kaniya, ug sa dihang nakagawas giingnan siya sa doktor nga siya “85 porsiento nga baldado nga dili makatrabaho.” Dili gani siya makalakaw sa dalan aron sa pagpamalit nga dili mopahulay sa matag karon ug unya.

Apan si Ben Brickell determinado nga mopadayon, ug iya kanang gihimo, nga magpahulay kon kinahanglanon. Sa wala madugay nagsangyaw na usab siya diha sa hilit nga kabanikanhan sa Australia. Gihimo niya ang iyang maarangan aron maatiman ang iyang panglawas, apan ang iyang pag-alagad kang Jehova mao ang pangunang butang sa iyang kinabuhi hangtod sa iyang kamatayon 30 ka tuig sa ulahi sa panuigong mga 65. d Iyang gidawat nga ang kakulang nga naglungtad ingong resulta sa iyang kaluyahon mapun-an sa gahom ni Jehova. Sa kombensiyon sa Melbourne niadtong 1969, nag-alagad siya sa talad sa payunir nga may dakong badge sa iyang dughan, nga mabasa: “Kon buot kang masayod mahitungod sa pagpayunir, pangutana kanako.”​—Itandi ang 2 Corinto 12:​7-10.

Pag-abot sa mga Balangay sa Lasang ug mga Kampo sa Minahan sa Bukid

Ang kasibot sa pag-alagad kang Jehova mitukmod dili lamang sa mga lalaki apan usab sa mga babaye sa pag-alagad sa wala pa masangyawi nga mga dapit. Si Freida Johnson maoy usa sa mga dinihogan, gamayon ug nagpangedaron ug mga 50 sa dihang nag-alagad siya nga nag-inusara latas sa mga dapit sa Sentral Amerika, nga mikobre sa mga dapit sama sa amihanang baybayon sa Honduras nga nagsakayg kabayo. Nagkinahanglan ug pagtuo ang pag-alagad nga nag-inusara niining dapita, nga miduaw sa nakatag nga mga plantasyon sa saging, sa mga lungsod sa La Ceiba, Tela, ug Trujillo, ug bisan sa mingaw nga mga balangay sa Carib sa unahan. Nagsangyaw siya didto niadtong 1930 ug 1931, sa makausa pa niadtong 1934, ug niadtong 1940 ug 1941, nga mipahimutang ug libolibong literatura nga naundan sa kamatuoran sa Bibliya.

Sulod sa maong mga tuig ang laing masibotong magbubuhat misugod sa iyang karera diha sa bug-os-panahong ministeryo. Kini mao si Kathe Palm, nga natawo sa Alemanya. Ang nakapalihok kaniya mao ang pagtambong sa kombensiyon sa Columbus, Ohio, niadtong 1931, diin ang mga Estudyante sa Bibliya misagop sa ngalang mga Saksi ni Jehova. Sukad niadto nakahukom siya sa pagpangita pag-una sa Gingharian, ug niadtong 1992, sa 89 anyos nga pangedaron, sa gihapon siya naghimo niana.

Ang iyang payunir nga pag-alagad nagsugod sa Siyudad sa New York. Sa ulahi, sa South Dakota, may kauban siya sulod sa pipila ka bulan apan unya mipadayon nga nag-inusara, nga nagbiyahe nga nagsakayg kabayo. Sa dihang gidapit sa pag-alagad  sa Colombia, Amerika del Sur, gidawat niya dayon kadto, nga miabot didto sa hinapos sa tuig 1934. Sa makausa pa, siya may kauban sa makadiyot apan unya siya nag-inusara. Kini wala makapabati kaniya sa pag-undang.

Usa ka magtiayon midapit kaniya sa pagkuyog kanila sa Chile. Ania ang laing halapad nga teritoryo, nga miabot hangtod sa 4,265 kilometros ubay sa kasadpang baybayon sa kontinente sa Amerika del Sur. Tapos makasangyaw sa mga opisina sa kabisera, siya miadto sa hilit nga amihanan. Sa matag kampo sa minahan, matag lungsod sa kompaniya, dagko ug gagmay, siya nagsangyaw sa pultahan ngadto sa pultahan. Ang mga mamumuo sa habog nga Andes nakuratan nga may nag-inusarang babaye nga miduaw kanila, apan siya determinado nga walay usang malaktawan diha sa dapit nga giasayn kaniya. Sa ulahi, mibalhin siya sa habagatan, diin ang pila ka estancias (ranso sa mga karnero) nagkobre sa mga 100,000 ektaryas. Ang mga tawo didto mahigalaon ug maabiabihon ug midapit kaniya sa ilang lamesa panahon sa pagkaon. Niini ug sa ubang mga paagi, si Jehova nag-atiman kaniya, aron nga mabatonan niya ang pisikal nga mga panginahanglan sa kinabuhi.

Ang pagwali sa maayong balita sa Gingharian sa Diyos nakapatugob sa iyang kinabuhi. e Sa paghinumdom sa mga tuig sa iyang pag-alagad, siya nag-ingon: “Ako mibati nga ako may buhong kaayong kinabuhi. Kada tuig sa dihang ako motambong sa asembliya sa katawhan ni Jehova, ako makabaton ug mainiton, tagbaw nga pagbati samtang akong makita ang daghan kaayong mga tawo nga akong nadumalahan sa pagtuon sa Bibliya nga nagamantala na sa maayong balita, nga nagatabang sa uban sa pagduol sa tubig sa kinabuhi.” Siya nalipay sa pagtan-aw nga mitubo ang mga dumadayeg ni Jehova sa Chile gikan sa mga 50 ngadto sa kapin sa 44,000.

“Ania Ako! Ipadala Ako”

Tapos makadungog sa pakigpulong nga pinasikad sa imbitasyon ni Jehova sa pag-alagad ingon sa narekord sa Isaias 6:8 ug sa positibong sanong sa propeta, “Ania ako! Ipadala ako,” si Martin Poetzinger, sa Alemanya, nabawtismohan. Duha ka tuig sa ulahi, niadtong 1930, misulod siya sa bug-os-panahong ministeryo sa Bavaria. f Sa wala madugay, ang mga opisyales didto nagdili sa pagsangyaw sa mga Saksi, ang mga tigomanan gisarad-an, ug giilog ang literatura. Ang Gestapo nahimong hulga. Apan kadtong mga hitaboa niadtong 1933 wala magpahunong sa ministeryo ni Brader Poetzinger.

Siya gidapit sa pag-alagad sa Bulgaria. Ang mga kard sa pamatuod diha sa Bulgariano gigamit sa pagpailaila sa literatura sa Bibliya. Apan daghang tawo ang dili makamaong mobasa. Busa, si Brader Poetzinger nagtuon aron makahibalo sa ilang pinulongan, nga nagagamit ug Cyrillic nga alpabeto. Sa dihang ang literatura ikabilin sa usa ka pamilya, sa subsob ang mga bata kinahanglan magbasa niana sa ilang mga ginikanan.

Sa kadaghanan sa unang tuig, si Brader Poetzinger nag-inusara, ug siya nagsulat: “Sa Memoryal, ako naghatag pakigpulong, ako ang nag-ampo, ug ako ang nagtiklop sa tigom.” Sa 1934, ang mga langyaw gipalagpot, busa miadto siya sa Hungaria.  Dinhi ang laing bag-ong pinulongan kinahanglang tun-an aron nga siya makapaambit sa maayong balita. Gikan sa Hungaria miadto siya sa mga nasod nga kanhi nailhang Czechoslovakia ug Yugoslavia.

May daghan siyang makalilipayng kasinatian​—nakakaplag ug mga mahigugmaon sa kamatuoran samtang siya nagbaktas sa kabanikanhan ug sa mga balangay, nga nagsambilay sa literatura; nakasinati sa pag-atiman ni Jehova samtang ang maabiabihong mga tawo nagtanyag kaniyag pagkaon ug gani higdaanan sa gabii; nakig-estorya hangtod sa lalom nga gabii niadtong nangadto sa iyang gisak-an aron maminaw ug dugang sa makahupayng mensahe sa Gingharian.

May grabe usab nga mga pagsulay sa pagtuo. Sa dihang nag-alagad sa gawas sa iyang yutang-natawhan, ug walay salapi, siya nagkasakit ug grabe. Walay doktor ang gustong motambal kaniya. Apan si Jehova mitagana. Sa unsang paagi? Sa kataposan, ang senyor nga konsultant sa lokal nga ospital gikontak. Kining tawhana, usa ka hugot nga magtutuo sa Bibliya, nag-atiman kang Brader Poetzinger sama ra gayod nga iyang anak, nga naghimo niana nga walay bayad. Ang doktor nakadayeg pag-ayo sa nagasakripisyo-sa-kaugalingon nga espiritu niining batan-ong lalaki nga dayag diha sa buluhaton nga iyang gihimo, ug iyang gidawat ang usa ka hugpong sa mga libro sa Sosyedad ingong gasa.

Ang laing grabeng pagsulay miabot upat ka bulan tapos sa kaminyoon. Si Brader Poetzinger giaresto niadtong Disyembre 1936 ug sa sinugdan gibilanggo sa usa ka kampo konsentrasyon ug unya sa lain, samtang ang iyang asawa gibilanggo sa laing ingon nga kampo. Wala sila magkit-anay sulod sa siyam ka tuig. Si Jehova wala magpugong sa maong pintas nga paglutos, apan iyang gipalig-on si Martin, iyang asawa nga si Gertrud, ug mga linibo pang uban aron makaantos niana.

Tapos siya ug ang iyang asawa gipagawas, si Brader Poetzinger nakapahimulos sa daghang katuigan sa pag-alagad ingong nagapanawng magtatan-aw sa Alemanya. Siya presente sa makalilipayng mga kombensiyon nga gihimo sa tapos-gubat nga kapanahonan sa kanhing paradahang nataran ni Hitler sa Nuremberg. Apan karon kadtong mga natara napuno sa dakong panon sa maunongong mga tigpaluyo sa Gingharian sa Diyos. Mitambong siya sa dili-makalimtang mga kombensiyon sa Yankee Stadium sa New York. Iyang gipahimuslan sa bug-os ang iyang pagkabansay sa Watchtower Bible School of Gilead. Ug niadtong 1977 nahimo siyang membro sa Nagamandong Lawas sa mga Saksi ni Jehova. Ang iyang panglantaw, hangtod sa pagtapos niya sa iyang yutan-ong kurso niadtong 1988, mapahayag nga labing maayo pinaagi sa mga pulong: ‘Kining usa ka butang akong gihimo​—pagpangita pag-una sa Gingharian.’

Pagkat-on Kon Unsa Gayoy Kahulogan Niini

Ang espiritu sa pagsakripisyo-sa-kaugalingon tin-aw nga dili bag-o taliwala sa mga Saksi ni Jehova. Sa dihang ang kinaunahang tomo sa Millennial Dawn gipatik balik niadtong 1886, ang butang  labot sa pagkonsagrar (o, ingon sa atong pagtawag karon, pagpahinungod) prangka nga gihisgotan. Pinasikad sa Kasulatan gipunting nga ang matuod nga mga Kristohanon “magakonsagrar” sa tanang butang ngadto sa Diyos; kana naglakip sa ilang mga katakos, ilang materyal nga kabtangan, ilang mga kinabuhi. Mao nga ang mga Kristohanon nahimong mga sinaligan sa “nakonsagrar” sa Diyos, ug ingong mga sinaligan, kinahanglang mohatag silag husay​—dili sa mga tawo kondili sa Diyos.

Ang nagatubong gidaghanon sa mga Estudyante sa Bibliya sa tinuod naghatag sa ilang kaugalingon diha sa pag-alagad sa Diyos. Ilang gigamit sa bug-os ang ilang mga katakos, ilang mga kabtangan, ilang kusog, sa pagbuhat sa iyang kabubut-on. Sa laing bahin, adunay mibati nga ang labing hinungdanon mao ang pag-ugmad sa ilang gitawag nga Kristohanong mga kinaiya ug pamatasan aron nga sila makuwalipikar sa pag-ambit sa Gingharian uban ni Kristo.

Bisan tuod nga ang tulubagon sa matag matuod nga Kristohanon sa pagsangyaw ngadto sa uban mahitungod sa Gingharian sa Diyos kanunay nga gipahayag ni Brader Russell, kini gipasiugda pag maayo tapos sa Gubat sa Kalibotan I. Ang artikulong “Maayong Panggawi o Pakigtugon​—Hain?” sa The Watch Tower sa Mayo 1, 1926, usa ka talagsaong pananglitan. Kana sa prangka naghisgot sa makadaot nga mga epekto gikan sa gitawag niadto nga pag-ugmad sa mga kinaiya ug unya gipasiugda ang kahinungdanon sa pagtuman sa obligasyon ngadto sa Diyos pinaagi ug mga buhat.

Sayo niana, ang The Watch Tower sa Hulyo 1, 1920, naghisgot sa dakong tagna ni Jesus mahitungod sa ‘ilhanan sa iyang presensiya ug sa kataposan sa kalibotan.’ (Mat. 24:​3, KJ) Kana nagdala sa pagtagad ngadto sa pagwaling buluhaton nga kinahanglang himoon sa katumanan sa Mateo 24:14 ug miila sa mensahe nga igapahayag, nga nag-ingon: “Ang maayong balita dinhi maoy may kalabotan sa kataposan sa karaang kahikayan sa mga butang ug ang pagkatukod sa gingharian sa Mesiyas.” Ang The Watch Tower nagpatin-aw nga pinasikad sa yugto nga kini gihisgotan ni Jesus may kalabotan sa ubang mga bahin sa ilhanan, kining buluhatona kinahanglang matuman “tali sa panahon sa dakong gubat sa kalibotan [Gubat sa Kalibotan I] ug sa panahon sa ‘dakong kasakitan’ nga gihisgotan sa Agalon diha sa Mateo 24:​21, 22.” Kanang buluhatona dinalian. Kinsay mobuhat niana?

Kini nga tulubagon sa tin-aw nahasandig sa mga membro sa “iglesia,” ang matuod nga Kristohanong kongregasyon. Bisan pa, niadtong 1932, pinaagi sa Agosto 1 nga isyu sa The Watchtower, sila gitambagan nga dasigon ang “Jehonadab nga matang” sa pag-ambit uban kanila sa buluhaton, uyon sa espiritu sa Pinadayag 22:17. Ang Jehonadab nga matang​—kansang paglaom mao ang walay-kataposang kinabuhi sa Paraiso sa yuta​—misanong, ug daghan kanila masiboton kaayo.

Ang kahinungdanon niining buluhatona kusganong gipasiugda: “Hinungdanon ang pagpakigbahin sa pag-alagad sa Ginoo sama sa pagtambong sa tigom,” matud sa The Watch Tower niadtong 1921. “Ang kada usa kinahanglang usa ka magwawali sa maayong balita,” punting niana niadtong 1922. “Si Jehova naghimo sa pagwali ingon nga ang labing importanteng buluhaton niining kalibotana nga mahimo ni bisan kinsa kanato,” pahayag niana niadtong 1949. Ang pahayag ni apostol Pablo sa 1 Corinto 9:16 kanunayng gikutlo: “Ang panginahanglan gipahamtang kanako. Sa pagkatinuod, alaot ako kon dili ko ipahayag ang maayong balita!” Kini nga kasulatan gipadapat sa kada usa sa mga Saksi ni Jehova.

 Pila ang Nagasangyaw? Unsay Kinutoban? Ngano?

May gipugos ba sa paghimo niining buluhatona nga supak sa ilang kabubut-on? “Wala,” ang The Watch Tower nagtubag, diha sa iyang isyu sa Agosto 1, 1919, “walay mausa ang gipugos sa pagbuhat ug bisan unsa. Kanang tanan bug-os nga boluntaryong pag-alagad, nga gihimo tungod sa gugma alang sa Ginoo ug sa iyang kawsa sa pagkamatarong. Si Jehova wala gayod magrekluta kang bisan kinsa.” Mahitungod sa panukmod nianang maong pag-alagad, ang The Watch Tower sa Septiyembre 1, 1922, dugang nga mipahayag: “Ang usa nga sa tinuod mapasalamaton diha sa iyang kasingkasing ug nakaapresyar sa nahimo sa Diyos kaniya gusto nga mobalos; ug sa nagadugang ang iyang apresasyon sa kalulot sa Diyos alang kaniya, mas modako ang iyang gugma; ug kon modako ang iyang gugma, modako ang iyang tinguha sa pag-alagad kaniya.” Ang gugma alang sa Diyos, sumala sa gibatbat, ipakita pinaagi sa pagbantay sa iyang mga sugo, ug usa sa maong mga sugo mao ang pagwali sa maayong balita sa Gingharian sa Diyos.​—Isa. 61:​1, 2; 1 Juan 5:3.

Kadtong naghimo niining kalihokana wala madani sa bisan unsang ideya sa kalibotanong ambisyon. Sila sa prangka giingnan nga sa dihang sila magpamalaybalay o motanyag ug literatura sa eskina sa dalan, sila pagaisipon ingong “buangbuang, maluya, ubos,” nga sila “pagatamayon, pagalutoson,” ug sila iklasipikar ingong “way-hinungdan sumala sa kalibotanong panglantaw.” Apan sila nasayod nga si Jesus ug iyang unang mga tinun-an gitratar sa samang paagi.​—Juan 15:​18-20; 1 Cor. 1:18-31.

Ang mga Saksi ni Jehova ba nag-isip nga sa usa ka paagi sila takos sa kaluwasan tungod sa ilang pagsangyaw nga kalihokan? Wala gayod! Ang librong Nahiusa sa Pagsimba sa Bugtong Matuod nga Diyos, nga gigamit sukad sa 1983 (sa Ingles) aron tabangan ang mga estudyante sa pag-uswag ngadto sa Kristohanong pagkahamtong, naghisgot niining butanga. Kana nagpahayag: “Ang halad ni Jesus nakabukas usab kanato ug kahigayonan alang sa walay-kataposang kinabuhi . . . Dili kini usa ka ganti nga kinahanglan natong hagoan. Bisag unsa ka daghan ang atong himoon diha sa pag-alagad kang Jehova, dili gayod kita makatipon ug merito nga ang Diyos utangan nato ug kinabuhi. Ang walay-kataposang kinabuhi ‘usa ka gasa nga ihatag sa Diyos . . . pinaagi ni Kristo Jesus nga atong Ginoo.’ (Roma 6:23; Efe. 2:​8-10) Bisan pa niana, kon kita may pagtuo nianang gasaha ug apresasyon sa paagi nga kana nahimong posible, ato kanang ipadayag. Ang pagkasabot kon sa unsang gidak-on si Jehova migamit kang Jesus sa pagtuman sa Iyang kabubut-on ug kon unsa ka hinungdanon nga kitang tanan suod nga mosunod sa mga lakang ni Jesus, atong himoon ang Kristohanong ministeryo nga usa sa labing hinungdanong mga butang sa atong kinabuhi.”

Ikaingon ba nga ang tanang mga Saksi ni Jehova mga magmamantala sa Gingharian sa Diyos? Oo! Mao kana ang kahulogan sa pagkahimong usa ka Saksi ni Jehova. Kapin sa katunga sa siglo kanhi, may mga mibati kaniadto nga sila dili kinahanglang makigbahin sa pag-alagad sa kanataran, nga mosangyaw sa publiko ug sa balay-balay. Apan karon walay mausa sa mga Saksi ni Jehova ang makapangangkon nga dili apil sa maong pag-alagad tungod sa posisyon diha sa lokal nga kongregasyon o diha sa tibuok-kalibotang organisasyon. Ang lalaki ug babaye ingon man sa batan-on ug edaran nagapakig-ambit. Ila kining gilantaw ingong usa ka bililhong pribilehiyo, usa ka sagradong pag-alagad. Daghan ang naghimo niini bisan pa sa seryosong  mga suliran sa panglawas. Ug alang sa uban nga sa yano dili makaarang sa pisikal sa pagsangyaw sa balay-sa-balay, sila mangitag laing mga paagi aron maabot ang mga tawo ug masangyawan sa personal.

Kaniadto, usahay may kiling nga tugotan dayon ang bag-ohan nga makig-ambit sa pag-alagad sa kanataran. Apan ning ulahing mga dekada, gihatag ang labawng pasiugda diha sa ilang pagkakuwalipikado una pa sila dapiton. Unsay ipasabot niana? Kana wala magkahulogan nga sila makasaysay na sa tanang butang diha sa Bibliya. Apan, ingon sa gipatin-aw sa librong Organisado sa Pagtuman sa Atong Ministeryo, kinahanglang nahibaloan nila ug gituohan ang paninugdang mga pagtulon-an sa Bibliya. Kinahanglan usab nga sila nagkinabuhing hinlo, nga kaharmoniya sa mga sukdanan sa Bibliya. Ang kada usa kinahanglang gusto gayod nga mahimong usa sa mga Saksi ni Jehova.

Wala dahoma nga ang tanang mga Saksi ni Jehova makagugol ug samang gidak-on sa pagsangyaw. Ang mga kahimtang sa mga indibiduwal nagkalahi. Ang pangedaron, panglawas, mga responsabilidad sa pamilya, ug ang kalalom sa apresasyon ngatanan pagakonsiderahon. Kini kanunay nga giila. Kini gipasiugda sa The Watchtower sa isyu niini sa Disyembre 1, 1950, sa dihang naghisgot sa “maayong yuta” diha sa sambingay ni Jesus mahitungod sa magpupugas, sa Lucas 8:​4-15. Ang Kurso sa Tunghaan sa Ministeryo sa Gingharian, nga giandam alang sa mga ansiano niadtong 1972, nag-analisar sa kinahanglanon sa ‘paghigugma kang Jehova uban sa tibuok kalag sa usa’ ug misaysay nga “ang importante dili ang gidaghanon sa gihimo sa usa kon itandi sa nahimo sa uban, apan ang paghimo sa maarangan sa usa.” (Mar. 14:​6-8) Hinuon, nga nagdasig sa ugdang nga pagsusi-sa-kaugalingon, kana usab nagpakita nga ang maong gugma nagkahulogan “nga ang tanang bahin sa kinabuhi sa usa maoy diha sa mahigugmaong pag-alagad sa Diyos; walay kalihokan, katakos o tinguha sa kinabuhi ang dili apil.” Ang tanan natong katakos, atong tibuok kalag, kinahanglang palihokon sa pagbuhat sa kabubut-on sa Diyos. Kanang tun-anang-basahon nagpasiugda nga “ang Diyos nagkinahanglan, dili lamang sa pag-apil, kondili sa tibuok-kalag nga pag-alagad.”​—Mar. 12:30.

Ikasubo, ang kiling sa dili-hingpit nga mga tawo mao ang paghingapin, nga pabug-atan ang usa ka butang samtang pasagdan ang lain. Mao nga, balik niadtong 1906, nadiskobrehan ni Brader Russell nga kinahanglang pasidan-an nga ang pagsakripisyo-sa-kaugalingon wala magkahulogan nga isakripisyo ang uban. Wala kana magkahulogan nga dili mohatag ug makataronganong suporta sa asawa, sa buluhiong mga anak, o sa tigulang nga mga ginikanan aron nga ang usa libre na nga mosangyaw sa uban. Matag karon ug unya sukad niadto, ang susamang mga pahinumdom migawas diha sa mga publikasyon sa Watch Tower.

Sa inanay, uban sa tabang sa Pulong sa Diyos, ang entirong organisasyon naningkamot mga makab-ot ang Kristohanong pagkabalanse​—nga magpakitag kasibot alang sa pag-alagad sa Diyos, samtang nagatagad ug husto sa tanang bahin sa pagkahimong tinuod nga Kristohanon. Bisan tuod ang “kaugmaran sa kinaiya” natukod pinasikad sa sayop nga pagsabot, ang The Watchtower nakapakita nga ang mga bunga sa espiritu ug ang Kristohanong kagawian dili pakamenoson. Niadtong 1942, ang The Watchtower pintok nga nag-ingon: “Ang pila sa dili maalamon nakahinapos nga kon sila mosangyaw sa balay-sa-balay sila makahimo sa bisan unsang gusto nila nga dili pagasilotan. Ang usa angayng maghinumdom nga ang pagsangyaw nga buluhaton dili lamang mao ang kinahanglanon.”​—1 Cor. 9:27.

 Pag-una sa Labing Hinungdanong mga Butang

Ang mga Saksi ni Jehova nakaapresyar nga ang ‘pagpangita pag-una sa Gingharian ug sa pagkamatarong sa Diyos’ mao ang pag-una sa ilang labing hinungdanong mga butang. Kana naglakip sa paghatag ug hustong dapit diha sa kinabuhi sa usa alang sa personal nga pagtuon sa Pulong sa Diyos ug sa regular nga pagtambong sa mga tigom sa kongregasyon ug dili pagtugot nga unahon ang ubang mga pangagpas. Kana naglakip sa paghimog mga desisyon nga mobanaag sa tinuod nga tinguha sa pagpahiuyon sa mga kinahanglanon sa Gingharian sa Diyos, ingon sa gipahayag diha sa Bibliya. Kana naglakip sa paggamit sa mga prinsipyo sa Bibliya ingong pasikaranan sa mga desisyon nga naglangkit sa kinabuhing pamilyahanon, kalingawan, sekular nga edukasyon, trabaho, mga batasan sa negosyo, ug relasyon uban sa isigkatawo.

Ang pagpangita pag-una sa Gingharian labaw pa kay sa pagpakig-ambit kada bulan sa pagpakigsulti sa uban mahitungod sa katuyoan sa Diyos. Kana nagkahulogan sa pag-una sa intereses sa Gingharian sa tibuok kinabuhi sa usa, samtang nag-atiman sa husto sa ubang Kasulatanhong mga obligasyon.

Adunay daghang paagi nga ang debotadong mga Saksi ni Jehova makapalambo sa intereses sa Gingharian.

Ang Pribilehiyo sa Pag-alagad sa Bethel

Ang pila nag-alagad ingong mga membro sa tibuok-kalibotang pamilyang Bethel. Kini usa ka grupo sa bug-os-panahong mga ministro nga miboluntaryo sa pagbuhat sa bisan unsa nga iasayn kanila diha sa pag-andam ug pagpatik sa literatura sa Bibliya, sa pag-atiman sa gikinahanglang buluhaton sa opisina, diha sa paghatag ug nagapaluyong mga serbisyo alang sa maong mga kalihokan. Kini dili buluhaton diin sila makabaton ug personal nga pagkainila o materyal nga mga kabtangan. Ang ilang tinguha mao ang pagpasidungog kang Jehova, ug sila natagbaw sa mga tagana nga gihimo kanila diha sa paagi sa pagkaon, puy-anan, ug kasarangang salaping pasig-uli sa personal nga galastohan. Tungod sa paagi sa kinabuhi sa pamilyang Bethel, ang sekular nga mga awtoridad sa Tinipong Bansa, pananglitan, nag-isip kanila ingong mga membro sa usa ka relihiyosong orden nga mihimo sa panaad sa kakabos. Kadtong anaa sa Bethel nakakaplag ug kalipay nga magamit ang ilang kinabuhi sa bug-os diha sa pag-alagad kang Jehova ug sa pagbuhat sa buluhaton nga makaayo sa daghan nilang Kristohanong mga igsoon ug bag-ong mga interesado, ug usahay sa ubang mga nasod. Sama sa ubang mga Saksi ni Jehova, sila usab nakig-ambit nga regular sa ministeryo sa kanataran.

Ang unang pamilyang Bethel, (o, pamilya sa Bible House, ingon sa pagtawag kanila kaniadto) nahimutang sa Allegheny, Pennsylvania. Niadtong tuig 1896, ang kawani maoy 12 lamang. Sa 1992, dihay 12,900 nga membro sa pamilyang Bethel, nga nag-alagad diha sa 99 nga kayutaan. Dugang pa, dihang walay igong kapuy-an sa sulod sa mga tinukod sa Sosyedad, gatosgatos ka ubang boluntaryo ang magbiyahe kada adlaw ngadto sa mga puy-anang Bethel ug mga pabrika aron sa pag-ambit diha sa buluhaton. Ilang giisip kini nga usa ka pribilehiyo nga makapakigbahin diha sa ginahimong buluhaton. Kon may panginahanglan, linibo ka ubang mga Saksi motanyag sa pagbiya sa ilang sekular nga trabaho ug ubang kalihokan sulod sa lainlaing yugto sa panahon aron motabang sa konstruksiyon sa mga pasilidad nga gikinahanglan  sa Sosyedad aron magamit may kalabotan sa tibuok-yutang pagwali sa maayong balita sa Gingharian sa Diyos.

Daghan sa mga membro sa tibuok-kalibotang pamilyang Bethel ang naghimo niana nga ilang tibuok-kinabuhi nga trabaho. Si Frederick W. Franz, kinsa niadtong 1977 nahimong ikaupat nga presidente sa Watch Tower Society, niadtong tungora 57 ka tuig na nga membro sa pamilyang Bethel sa New York, ug siya nagpadayon sa pag-alagad sa Bethel alang sa laing 15 ka tuig, hangtod sa iyang kamatayon niadtong 1992. Si Heinrich Dwenger nagsugod sa iyang pag-alagad sa Bethel sa Alemanya niadtong 1911, human niadto mapaubsanong nag-alagad bisag diin siya iasayn; ug niadtong 1983, ang tuig sa iyang pagkamatay, siya nagkalipay pa sa iyang pag-alagad ingong membro sa pamilyang Bethel sa Thun, Switzerland. Si George Phillips, gikan sa Scotland, midawat sa asaynment sa sangang buhatan sa Habagatang Aprika niadtong 1924 (sa dihang gidumala niini ang pagwali nga kalihokan gikan sa Cape Town hangtod sa Kenya) ug padayong mialagad sa Habagatang Aprika hangtod sa iyang kamatayon niadtong 1982 (nga sa maong panahon pito ka sangang buhatan sa Sosyedad ug mga 160,000 ka Saksi maoy aktibo nianang dapita). Ang Kristohanong mga sister, sama kang Kathryn Bogard, Grace DeCecca, Irma Friend, Alice Berner, ug Mary Hannan, nagdeboto usab sa ilang hingkod nga mga kinabuhi sa pag-alagad sa Bethel, nga naghimo niana hangtod sa kamatayon. Daghan pang ubang membro sa pamilyang Bethel sa susama nagaalagad sulod sa 10, 30, 50, 70, ug kapin pang mga tuig. g

Nagasakripisyo-sa-Kaugalingon nga Nagapanawng mga Magtatan-aw

Sa tibuok kalibotan, adunay mga 3,900 ka sirkito ug distritong mga magtatan-aw nga, uban sa ilang mga asawa, nag-atiman usab sa mga asaynment kon diin sila kinahanglanon, kasagaran sa ilang kaugalingong nasod. Daghan niini kanila mibiya sa mga balay ug karon mobalhin kada semana o kada pipila ka semana aron alagaran ang mga kongregasyon nga giasayn. Wala silay suweldo apan mapasalamaton alang sa pagkaon  ug puy-anan diha sa dapit nga gialagaran nila, ug uban sa igoigong salapi alang sa personal nga galastohan. Sa Tinipong Bansa, diin ang 499 nga sirkito ug distritong mga magtatan-aw nag-alagad niadtong 1992, kining nagapanawng mga ansiano miaberids ug 54 ka tuig sa pangedaron, ug ang pila kanila nag-alagad sa maong katungdanan sa kapig 30, 40, o kapin pa ka tuig. Sa ubay-ubayng kayutaan, kining mga magtatan-aw mobiyahe pinaagig kotse. Ang teritoryo sa dapit sa Pasipiko sa subsob nagkinahanglan sa paggamit sa komersiyal nga mga ayroplano ug mga barko. Sa daghang dapit ang mga magtatan-aw sa sirkito mosakay sa kabayo o mobaktas aron maabot ang hilit nga mga kongregasyon.

Mga Payunir Nagatagbaw sa Usa ka Hinungdanong Panginahanglan

Aron masugdan ang pagwali sa maayong balita diha sa mga dapit nga walay Saksi, o aron makatabang sa linaing panginahanglan sa usa ka dapit, ang Nagamandong Lawas mahimong mohikay sa pagpadala ug espesyal nga mga payunir. Sila maoy bug-os-panahong mga ebanghelista nga nagagugol ug labing menos 140 ka oras kada bulan sa ministeryo sa kanataran. Andam sila sa pag-alagad bisan diin nga sila kinahanglanon diha sa ilang kaugalingong nasod o, sa pila ka kaso, sa duol nga kayutaan. Sanglit sila may diyutay ra o wala nay panahon alang sa sekular nga trabaho aron matagan-an ang materyal nga mga panginahanglan tungod sa mga kinahanglanon sa ilang pag-alagad, sila hatagan ug igoigong pasig-uli sa gasto alang sa puy-anan ug ubang mga kinahanglanon. Sa 1992, may kapin sa 14,500 ka espesyal nga payunir sa lainlaing bahin sa yuta.

Sa dihang ang unang espesyal nga mga payunir gipadala niadtong 1937, sila nanguna sa buluhatong pagpatokar sa narekord nga pakigpulong sa Bibliya alang sa mga tagbalay diha mismo sa ilang mga pultahan ug migamit sa mga rekord ingong pasikaran sa mga panaghisgot sa Bibliya sa pagbalikduaw. Kini gihimo sa dagkong mga siyudad diin aduna nay mga kongregasyon. Tapos sa pila ka tuig, ang espesyal nga mga payunir gisugdan sa pagpadala ngadto sa mga dapit nga walay kongregasyon o diin ang mga kongregasyon nanginahanglan kaayo ug tabang. Ingong resulta sa ilang epektibong buluhaton, gatosgatos ka bag-ong mga kongregasyon ang naporma.

Inay nga kobrehan ang teritoryo ug mobalhin sa laing teritoryo, sila sublisubling motrabaho sa usa ka dapit, nga sundan ang tanang nagpakitag interes ug magdumala ug mga pagtuon sa Bibliya. Ang mga tigom hikayon alang sa mga interesado. Mao nga, sa Lesotho, habagatang Aprika, sa iyang unang semana diha sa usa ka bag-ong asaynment, usa ka espesyal payunir midapit sa tanan nga iyang nahibalag sa pag-adto ug tan-awon kon sa unsang paagi ang mga Saksi ni Jehova nagadumala sa Tunghaan sa Teokratikanhong Ministeryo. Siya ug iyang pamilya ang naghatag sa mga bahin sa tibuok programa. Unya iyang gidapit ang tanan alang sa Pagtuon sa Bantayanang Torre. Tapos matagbaw ang unang kamausisaon, 30 ang nagpadayon sa pagtambong sa Pagtuon sa Bantayanang Torre, ug ang aberids nga tumatambong sa Tunghaan maoy 20. Sa kayutaan nga ang nabansay-sa-Gilead nga mga misyonaryo nakahimo ug dako sa pagsugod sa pagwali sa maayong balita, ang kusog nga pagtubo usahay nahitabo sa dihang ang lumad nga mga Saksi nahimong kuwalipikado sa pag-alagad ingong espesyal nga payunir, kay sila sa subsob makabuhat nga mas epektibo taliwala sa lokal nga mga tawo.

Dugang pa niining masibotong mga magbubuhat, may ginatos pa ka linibong mga Saksi ni Jehova nga maabtikon usab nga nagapaluyo sa intereses sa Gingharian.  Kini naglakip sa batan-on ug tigulang, lalaki ug babaye, minyo ug mga dili-minyo. Ang regular nga mga payunir nagagugol ug labing menos 90 ka oras kada bulan sa ministeryo sa kanataran; ang mga oksilyare payunir, sa labing menos 60 ka oras. Sila mohukom kon diin nila gustong mosangyaw. Kadaghanan kanila nagabuhat uban sa natukod nang mga kongregasyon; ang pila mobalhin ngadto sa hilit nga mga dapit. Sila nagatagana sa ilang kaugalingong pisikal nga panginahanglan pinaagi sa pipila ka sekular nga trabaho, o ang membro sa ilang pamilya tingali nagasuportar kanila. Sulod sa 1992, kapin sa 914,500 ang nakig-ambit sa maong pag-alagad ingong regular o oksilyare nga mga payunir sulod sa labing menos bahin sa tuig.

Mga Tunghaan nga May Linaing mga Tumong

Aron masangkapan ang mga boluntaryo alang sa tinong mga matang sa pag-alagad, gitagana ang linaing instruksiyon. Sukad sa 1943, pananglitan, ang Tunghaang Gilead nakabansay nag linibo ka may-kasinatiang mga ministro alang sa misyonaryong buluhaton, ug ang mga graduwado gipadala ngadto sa tanang bahin sa yuta. Niadtong 1987 ang Tunghaan sa Ministeryal nga Pagbansay gisugdan aron makatabang sa pagtagana sa linaing mga panginahanglan, apil sa pag-atiman sa mga kongregasyon ingon man sa ubang mga responsabilidad. Ang kahikayan alang niining tunghaan nga magtigom sa nagkadaiyang mga dapit magpamenos sa biyahe sa mga estudyante ngadto sa usa ka nasentrong dapit ug dili na kinahanglan nga magtuon pa ug laing pinulongan aron makabenepisyo sa tunghaan. Ang tanan nga gidapit sa pagtungha niining mga tunghaan maoy mga ansiano o ministeryal nga mga alagad nga nakapakitag ebidensiya nga sa pagkamatuod ilang gipangita pag-una ang Gingharian. Daghan ang nagboluntaryo sa pag-alagad sa ubang kayutaan. Ang ilang espiritu maoy susama sa kang propeta Isaias, nga nag-ingon: “Ania ako! Ipadala ako.”​—Isa. 6:8.

Aron mapauswag ang katakos niadtong nagaalagad na ingong regular ug espesyal nga mga payunir, ang Tunghaan sa Payunir nga Pag-alagad gisugdan niadtong 1977. Kon mahimo, ang tunghaan hikayon sa matag sirkito sa tibuok kalibotan. Ang tanang payunir gidapit aron makabenepisyo gikan niining duha-ka-semana nga kurso. Sa inanay sukad niadto, ang mga payunir nga nakakompleto sa ilang unang tuig sa pag-alagad gihatagan ug samang pagbansay. Hangtod sa 1992, kapin sa l00,000 ka payunir ang nabansay niining tunghaana sa Tinipong Bansa lamang; ug kapin sa 10,000 ang gibansay kada tuig. Ang laing 55,000 gibansay sa Hapon, 38,000 sa Mexico, ug 25,000 sa Brazil, ug 25,000 sa Italya. Dugang pa niining kursoha, ang mga payunir sa regular nagpahimulos sa linaing miting uban sa magtatan-aw sa sirkito sa panahon sa iyang matag-unom-ka-bulan nga pagduaw sa kada kongregasyon ug sa usa ka espesyal nga sesyon sa pagbansay uban sa magtatan-aw sa sirkito ug magtatan-aw sa distrito sa panahon sa tinuig nga sirkitong asembliya. Busa, kadtong naglangkob sa dakong panon sa mga magmamantala sa Gingharian nga nag-alagad ingong mga payunir dili lamang andam nga mga magbubuhat kondili maayong-pagkabansay usab nga mga ministro.

 Nagaalagad Diin May Dakong Panginahanglan

Linibo ka Saksi ni Jehova​—ang pila mga payunir, ug ang uban dili—​nag-alagad dili lamang sa ilang lungsod apan sa laing mga dapit usab diin may dakong panginahanglan sa mga magmamantala sa maayong balita. Kada tuig linibo ang mogugol ug mga semana o mga bulan, sumala sa ilang mahikay sa personal, diha sa mga dapit nga sa subsob layo sa ilang mga balay aron sa pagwali ngadto sa mga tawo nga dili regular nga maduaw sa mga Saksi ni Jehova. Linibo pa ang mibalhin ug pinuy-anan aron makatabang sulod sa dugaydugay nga panahon. Daghan niini kanila maoy mga minyo o mga pamilya nga may mga anak. Ang ilang pagbalhin sa subsob duolduol ra, apan ang pila mibalhin ug makadaghan latas sa mga tuig. Daghan niining masibotong mga Saksi nag-alagad pa gani sa langyawng mga yuta​—ang pila sulod sa pipila ka tuig, ang uban permanente. Motrabaho silag bisan unsang sekular nga trabaho aron matagan-an ang ilang mga panginahanglan, ug sila ang mogasto sa ilang mga pagbalhin. Ang ilang tinguha mao lamang ang pagpakig-ambit kutob sa itugot sa ilang mga kahimtang diha pagpakaylap sa mensahe sa Gingharian.

Dihang ang ulo sa pamilya dili Saksi, lagmit iyang ibalhin ang iyang pamilya tungod sa trabaho. Apan ang mga membro sa pamilya nga mga Saksi motan-aw niini ingong usa ka kahigayonan sa pagpakaylap sa mensahe sa Gingharian. Kana maoy tinuod sa duha ka Saksi gikan sa Tinipong Bansa nga nakapuyo sa usa ka kampo sa konstruksiyon sa lasang sa Suriname sa ulahing bahin sa katuigang 1970. Duha ka beses sa usa ka semana sila mobangon sa alas 4:00 s.b., mosakay sa bus sa kompaniya alang sa usa ka oras nga batseng biyahe ngadto sa usa ka balangay, ug mogugol sa maong adlaw sa pagwali. Sa wala madugay sila nagdumala ug 30 ka pagtuon sa Bibliya kada semana uban sa gigutom-sa-kamatuoran nga mga tawo. Karong adlawa, diha nay kongregasyon sa kanhi dili-maabot nga bahin sa lasang.

Nagpahimulos sa Matag Haom nga Kahigayonan sa Pagpanaksi

Tinuod, dili tanang Saksi ni Jehova ang mobalhin ngadto sa ubang mga nasod, o bisan sa ubang mga lungsod, sa pagpadayon sa ilang ministeryo. Ang ilang mga kahimtang tingali dili motugot kanila sa pagpayunir. Bisan pa niana, sila nasayod pag-ayo sa tambag sa Bibliya nga buhaton ang “tanang mainitong paningkamot” ug sa “kanunay magmadagayaon sa buluhaton sa Ginoo.” (2 Ped. 1:​5-8; 1 Cor. 15:58) Ilang gipakita nga ilang gipangita pag-una ang Gingharian sa dihang ilang giuna ang intereses niini kay sa sekular nga buluhaton ug sa lulinghayaw. Silang may mga kasingkasing nga punog apresasyon sa Gingharian nakig-ambit nga regular sa ministeryo sa kanataran kutob sa itugot sa ilang mga kahimtang, ug daghan kanila nag-usab sa ilang mga kahimtang aron sila makaambit nga mas bug-os. Sila usab kanunay nga nagabantay sa pagpahimulos sa mga kahigayonan sa pagpanaksi sa uban mahitungod sa Gingharian.

Ingong pananglitan, si John Furgala, nga may negosyong hardware sa Guayaquil, Ecuador, nagbutang ug maanindot nga estante sa literatura sa Bibliya diha sa iyang tindahan. Samtang ang iyang katabang nagapamutos sa pinalit, sangyawan ni John ang pumapalit.

Sa Nigeria usa ka masibotong Saksi nga nagsuportar sa iyang pamilya ingong kontraktor sa elektrikal nga trabaho nakahukom usab sa paggamit ug maayo sa iyang mga kontak aron sangyawan. Kay kaugalingon man niya ang negosyo, siya ang nagbuot sa eskedyul sa trabaho. Kada buntag, sa dili pa magsugod ang trabaho,  iyang tigomon ang iyang asawa, mga anak, mga empliyado, ug mga aprentis alang sa paghisgot sa inadlaw nga teksto sa Bibliya, uban sa mga kasinatian gikan sa Yearbook of Jehovah’s Witnesses. Sa pagsugod sa kada tuig, hatagan usab niya ang iyang mga kustomer ug kalendaryo sa Watch Tower Society, inubanan sa duha ka magasin. Ingong resulta, ang pila sa iyang mga empleyado ug pila sa iyang mga kustomer miduyog kaniya diha sa pagsimba kang Jehova.

Daghang mga Saksi ni Jehova ang nakabaton sa samang espiritu. Walay sapayan kon unsa ang ilang ginahimo, sila kanunay nagapangita ug mga kahigayonan aron makapaambit sa maayong balita ngadto sa uban.

Usa ka Dakong Panon sa Malipayon Bug-os-Panahong mga Ebanghelista

Sa pag-aginod sa mga tuig, ang kasibot sa mga Saksi ni Jehova sa pagwali sa maayong balita wala maawop. Bisan tuod daghang tagbalay ang lig-ong mosulti kanila nga dili sila interesado, ubay-ubay ang mapasalamaton nga sila natabangan sa mga Saksi nga masabtan ang Bibliya. Ang determinasyon sa mga Saksi ni Jehova mao ang pagpadayon sa pagwali hangtod si Jehova mismo mohatag ug tin-aw nga ilhanan nga kining buluhatona nahuman na.

Inay nga maluya, ang tibuok-kalibotang asosasyon sa mga Saksi ni Jehova sa pagkatinuod nagmadasigon sa ilang pagwali nga kalihokan. Niadtong 1982 ang tinuig nga taho sa tibuok kalibotan nagpakita nga 384,856,662 ka oras ang nagugol sa ministeryo sa kanataran. Napulo ka tuig sa ulahi (sa 1992) 1,024,910,434 ka oras ang nagugol niining buluhatona. Unsay hinungdan niining dakong pagtubo sa kalihokan?

Tinuod ang mga Saksi ni Jehova midaghan. Apan dili sa samang gikusgon. Sulod sa maong panahon, samtang ang mga Saksi midaghan ug 80 ka porsiento, ang gidaghanon sa mga payunir misulbong ug 250 ka porsiento. Sa aberids kada bulan, 1 sa matag 7 ka Saksi ni Jehova sa tibuok kalibotan misulod sa usa ka matang sa bug-os-panahong buluhaton sa pagwali.

Kinsa ang mga nakig-ambit sa pagpayunir nga pag-alagad? Ingong pananglitan, sa Republika sa Korea, daghang mga Saksi maoy mga ginang sa panimalay. Ang mga responsabilidad diha sa pamilya lagmit dili motugot kanila nga mahimong regular payunir, apan daghan ang migamit sa hataas nga bakasyon sa tingtugnaw ingong mga kahigayonan sa pag-oksilyare payunir. Ingong resulta, 53 porsiento sa tanang mga Saksi sa Republika sa Korea anaa sa usa ka matang sa bug-os-panahong pag-alagad niadtong Enero 1990.

Sa sayong mga tuig, ang masibotong espiritu sa pagpayunir sa Pilipinong mga Saksi ang nakapaarang kanila sa pag-abot sa ginatos ka gipuy-ang mga isla sa Pilipinas sa mensahe sa Gingharian. Kanang kasibota mas dayag sukad niadto. Sa 1992, sa aberids kada bulan, 22,205 ka magmamantala ang nakig-ambit sa ministeryo sa kanataran ingong mga payunir sa Pilipinas. Apil kanila maoy daghang batan-on nga mipili sa ‘paghinumdom sa ilang Maglalalang’ ug sa paggamit sa ilang batan-ong kusog diha sa pag-alagad kaniya. (Eccl. 12:1) Tapos sa usa ka dekada sa pag-alagad ingong payunir, usa nianang mga batan-ona nag-ingon: “Ako nakakat-on nga mahimong mapailobon, sa pagkinabuhi ug yano, sa pagsalig kang Jehova, ug mahimong mapaubsanon. Tinuod nga nagkalisodlisod usab ako ug naluya, apan kining tanan bale-wala kon itandi sa mga panalangin nga gihatag sa pagpayunir.”

 Sulod sa Abril ug Mayo sa tuig 1989, Ang Bantayanang Torre nagyagyag sa Babilonyang Bantogan, nga mao ang bakak nga relihiyon diha sa iyang daghang matang sa tibuok kalibotan. Ang mga artikulo gipatik ug dungan diha sa 39 ka pinulongan ug makaylapong giapod-apod. Sa Hapon, diin ang nagapayunir nga mga Saksi sa subsob kapin sa 40 porsiento, usa ka bag-ong kinatas-an nga 41,055 ka oksilyare payunir ang nagpatala aron motabang sa buluhaton sa maong Abril. Sa Osaka Prefecture, Siyudad sa Takatsuki, Kongregasyon sa Otsuka, 73 sa 77 ka bawtismadong mga magmamantala ang anaa diha sa usa ka matang sa pag-alagad nga payunir nianang bulana. Sa Abril 8, sa dihang ang tanang magmamantala sa Hapon gidasig sa pag-ambit diha sa pag-apod-apod niining hinungdanong mensahe, ginatos ka kongregasyon, sama sa Kongregasyon sa Ushioda, sa Siyudad sa Yokohama, ang mihikay ug tibuok-adlaw nga pag-alagad diha sa dalan ug ngadto sa balay-sa-balay, gikan sa alas 7:00 s.b. hangtod sa alas 8:00 s.g., aron maabot ang tanan kutob sa mahimo diha sa dapit.

Sama sa nagakahitabo bisan diin, ang mga Saksi ni Jehova sa Mexico nagtrabaho aron matagan-an ang ilang materyal nga panginahanglan. Bisan pa niana, kada bulan sa tuig 1992, sa aberids 50,095 ka Saksi ni Jehova didto naghikay usab alang sa pagpayunir aron tabangan ang gigutom-sa-kamatuoran nga mga tawo sa pagkat-on mahitungod sa Gingharian sa Diyos. Sa pila ka pamilya ang tanan sa panimalay mikooperar aron ang tanan, o sa labing menos ang pila kanila, makapayunir. Sila nalipay sa mabungahong ministeryo. Sulod sa 1992, ang mga Saksi ni Jehova sa Mexico sa regular nagdumala ug 502,017 ka pagtuon sa Bibliya sa balay uban sa mga indibiduwal ug mga pamilya.

Ang mga ansiano nga nagaalagad sa mga panginahanglan sa mga kongregasyon sa mga Saksi ni Jehova may bug-at nga mga responsabilidad. Kadaghanan sa mga ansiano sa Nigeria may mga pamilya, ug mao usab kana ang kahimtang sa mga ansiano sa daghang ubang dapit. Bisan pa, dugang sa pagpangandam sa pagdumala o pakig-ambit diha sa mga tigom sa kongregasyon, ingon man sa buluhatong pagbantay sa panon sa Diyos, ang pila niining mga lalakiha mga payunir usab. Sa unsang paagi kini nahimo? Ang maampingong pag-eskedyul sa panahon ug maayong kooperasyon sa pamilya sa subsob maoy importanteng mga hinungdan.

Dayag nga, sa tibuok kalibotan, ang mga Saksi ni Jehova nagtuman sa tambag ni Jesus sa ‘pagpangita pag-una sa gingharian.’ (Mat. 6:33) Ang ilang ginabuhat maoy kinasingkasing nga ekspresyon sa ilang gugma alang kang Jehova ug sa ilang apresasyon sa iyang soberanya. Sama sa salmistang si David, sila nagaingon: “Ako magabayaw kanimo, Oh akong Diyos ang Hari, ug akong pagadayegon ang imong ngalan sa panahong walay katinoan, bisan sa walay kataposan.”​—Sal. 145:1.

[Mga footnote]

[Blurb sa panid 292]

Gipasiugda pag-ayo ang responsabilidad sa pagpanaksi

[Blurb sa panid 293]

Ilang giisip ang pagsangyaw sa balay-sa-balay ingong usa ka bililhong pribilehiyo

[Blurb sa panid 294]

Pagsabot sa kahulogan sa tibuok-kalag nga pag-alagad

[Blurb sa panid 295]

Kon unsa gayoy kahulogan sa “pagpangita pag-una sa gingharian”

[Blurb sa panid 301]

Ang masibotong mga Saksi nag-una sa intereses sa Gingharian kay sa sekular nga trabaho ug lulinghayaw

[Box/Hulagway sa panid 288]

“Asa man ang Siyam?”

Sa Memoryal sa kamatayon ni Kristo, niadtong 1928, usa ka pulyeto ang gihatag sa tanang mitambong nga nag-ulohang “Asa man ang Siyam?” Ang paghisgot niini sa Lucas 17:11-19 nakatandog sa kasingkasing ni Claude Goodman ug nakapalihok kaniya sa pagsulod sa colporteur, o payunir, nga buluhaton ug sa paglahutay nianang pag-alagara.

 [Kahon/Mga hulagway sa panid 296, 297]

Pag-alagad sa Bethel

Sa tuig 1992, may mga 12,974 nga nakig-ambit sa pag-alagad sa Bethel diha sa 99 ka kayutaan

[Mga hulagway]

Ang personal nga pagtuon hinungdanon alang sa mga membro sa pamilyang Bethel

Espanya

 Sa kada Balayng Bethel, ang adlaw sugdan pinaagi sa paghisgot sa usa ka teksto sa Bibliya

Pinlandia

Sama sa ginahimo sa tanang Saksi ni Jehova sa bisan diin, ang mga membro sa pamilyang Bethel nakig-ambit diha sa ministeryo sa kanataran

Switzerland

Kada Lunes sa gabii ang pamilyang Bethel dungan nga magtuon sa “Ang Bantayanang Torre”

Italya

Ang buluhaton nagkadaiya, apan kanang tanan gihimo sa pagsuporta sa pagmantala sa Gingharian sa Diyos

Pransiya

Papua New Guinea

Tinipong Bansa

Alemanya

Pilipinas

Mexico

Britanya

Nigeria

Netherlands

Brazil

Hapon

Habagatang Aprika

[Kahon/Mga hulagway sa panid 298]

Ang Pipila nga Nag-alagad ug Dugay sa Bethel

F. W.  Franz​—Tinipong Bansa (1920-92)

Heinrich Dwenger—Alemanya (mga 15 ka tuig sa 1911-33), Hungaria (1933-35), Czechoslovakia (1936-39), unya sa Switzerland (1939-83)

George Phillips—Habagatang Aprika (1924-66, 1976-82)

Ang mga magsoon sa unod (si Kathryn Bogard ug Grace DeCecca) nga migugol ug tiningob nga gidaghanon nga 136 ka tuig sa pag-alagad sa Bethel—Tinipong Bansa

[Graph sa panid 303]

(Alang sa aktuwal nga pagkahan-ay, tan-awa ang publikasyon)

Nagakadaghang mga Payunir!

Mga Payunir

Mga Magmamantala

Porsiento sa Pagtubo Sukad sa 1982

250%

200%

150%

100%

50%

1982 1984 1986 1988 1990 1992

[Hulagway sa panid 284]

Si Sister Early nagbiyahe sa halos tanang dapit sa New Zealand nga nagbisikleta aron ipaambit ang mensahe sa Gingharian

[Hulagway sa panid 285]

Sulod sa 76 ka tuig​—ingong dalaga, minyo, ug unya nabalo​—si Malinda Keefer migugol sa iyang kaugalingon sa bug-os-panahong ministeryo

[Mga hulagway sa panid 286]

Yano nga mga treyler nahimong katulganan alang sa pila ka sayong mga payunir samtang sila nagbalhinbalhin ug dapit

Canada

India

[Hulagway sa panid 287]

Si Frank Rice (nagtindog sa tuo), si Clem Deschamp (naglingkod sa atubangan ni Frank, uban sa asawa ni Clem, si Jean, sunod kanila), ug usa ka grupo sa Java apil ang mga isigka-Saksi ug mga bag-ong interesado

[Mga hulagway sa panid 288]

Ang kinabuhi ni Claude Goodman sa bug-os-panahong ministeryo nagdala kaniya sa pag-alagad sa India ug sa pito ka laing kayutaan

[Hulagway sa panid 289]

Sa dihang si Ben Brickell himsog pa, nalipay siya sa paggamit niana sa pag-alagad kang Jehova; ang seryosong mga suliran sa panglawas sa ulahing mga tuig wala makapahunong kaniya

[Hulagway sa panid 290]

Si Kathe Palm nagwali sa tanang matang sa teritoryo, gikan sa mga opisina sa dakong siyudad ngadto sa kinahilitang kampo sa minahan ug ranso sa mga karnero sa Chile

[Hulagway sa panid 291]

Ang determinasyon ni Martin ug Gertrud Poetzinger gipahayag niining mga pulonga: ‘Kining usa ka butang akong gihimo​—pagpangita pag-una sa Gingharian’

[Hulagway sa panid 300]

Ang Tunghaan sa Payunir nga Pag-alagad (ingon sa gipakita dinhi sa Hapon) nakahatag ug linaing pagbansay alang sa tinagpulo ka libong masibotong mga magbubuhat