Kapitulo 31

Kon sa Unsang Paagi Gipili ug Gitultolan sa Diyos

“MAKATARONGANON lamang nga adunay usa ka matuod nga relihiyon. Kini nahiuyon sa kamatuoran nga ang matuod nga Diyos maoy usa ka Diyos, ‘dili sa kasamok, kondili sa kalinaw.’ (1 Cor. 14:33) Ang Bibliya sa pagkatinuod nag-ingon nga adunay ‘usa lamang ka pagtuo.’ (Efe. 4:5) Nan, kinsa ang mga tawo nga naglangkob sa lawas sa matuod nga mga magsisimba karong adlawa? Kami dili magpanuko sa pag-ingon nga sila mao ang mga Saksi ni Jehova,” pahayag sa librong Ikaw Mabuhing Walay Kataposan sa Paraiso sa Yuta. a

‘Sa unsang paagi matino ninyo pag-ayo nga kamo naghupot sa matuod nga relihiyon?’ ang pipila tingali mosukna. ‘Wala kamo ing labaw-kinaiyanhong pamatuod​—sama sa milagrosong mga gasa. Ug latas sa katuigan dili ba nga kamo nakahimog mga kausaban sa inyong mga panglantaw ug mga pagtulon-an? Nan, sa unsang paagi nga kamo masaligon kaayo nga kamo gitultolan sa Diyos?’

Sa pagtubag sa maong mga pangutana, makatabang nga tagdon una kon sa unsang paagi si Jehova mipili ug miagak sa iyang katawhan sa karaang panahon.

Ang Pagpili sa Diyos sa Kapanahonan sa Bibliya

Sa ika-16 nga siglo W.K.P., gitigom ni Jehova ang mga Israelinhon sa Bukid sa Sinai ug gidapit sila nga mahimong iyang piniling katawhan. Hinunoa, unang gipahibalo ni Jehova kanila nga dihay tinong mga kinahanglanon nga angay nilang kab-oton. Siya miingon kanila: “Kon kamo magasugot gayod sa akong tingog . . . , nan kamo mahimo gayod nga akong linaing kabtangan.” (Ex. 19:5) Pinaagi kang Moises, tin-awng gipakita ni Jehova ang mga kinahanglanon, nga human niana ang katawhan misanong: “Ang tanang mga pulong nga gisulti ni Jehova among pagabuhaton.” Unya si Jehova mihimog usa ka pakigtugon uban sa Israel ug gihatag kanila ang iyang Kasugoan.​—Ex. 24:​3-8, 12.

Pinili sa Diyos​—pagkahamiling pribilehiyo! Apan kanang pribilehiyoa naghatag sa Israel sa kaakohan nga sundon gayod ang Kasugoan sa Diyos. Ang dili pagtuman niana mosangpot sa pagsalikway kanila ingong usa ka nasod. Aron masilsil kanila ang maayong pagkahadlok nga sila mosunod kaniya, gipahinabo ni Jehova ang talagsaon labaw-kinaiyanhong mga ilhanan​—“ang mga dalugdog ug mga kilat misugod sa pagkahitabo,” ug “ang tibuok nga bukid mikurog sa hilabihan gayod.” (Ex. 19:​9, 16-18; 20:​18, 20) Sa misunod nga 1,500 ka tuig, ang mga Israelinhon diha na sa usa ka talagsaong kahimtang​—sila maoy piniling katawhan sa Diyos.

Ugaling, sa unang siglo K.P., nausab ug dako ang kahimtang. Ang Israel nawad-an sa pinaborang kahimtang niini, nga gibiyaan ni Jehova tungod sa ilang pagsalikway sa iyang Anak. (Mat. 21:43; 23:​37, 38; Buh. 4:​24-28) Unya gipatungha  ni Jehova ang unang Kristohanong kongregasyon, nga gitukod diha kang Kristo. Sa Pentekostes 33 K.P., gibubo ni Jehova ang iyang balaang espiritu diha sa mga sumusunod ni Jesus sa Jerusalem, nga nagtawag kanila nga “usa ka piniling rasa, . . . usa ka balaang nasod, usa ka katawhan alang sa linain nga kabtangan.” (1 Ped. 2:9; Buh. 2:​1-4; Efe. 2:​19, 20) Sila nahimong “mga pinili sa Diyos.”​—Col. 3:12.

Ang pagkamembro nianang pinili nga nasod maoy kondisyonal. Gilatid ni Jehova ang hingpit nga mga kinahanglanon sa moral ug espirituwal nga angayng kab-oton. (Gal. 5:​19-24) Kadtong kinsa motuman sa mga kinahanglanon nagpalinya sa ilang kaugalingon nga mahimong pilion niya. Apan, sa dihang mapili na sa Diyos, hinungdanon nga sila magpabiling masinugtanon sa iyang mga kasugoan. “Kadtong magasugot [lamang] kaniya ingong magmamando” ang padayong makadawat sa iyang balaang espiritu. (Buh. 5:32) Kadtong mapakyas sa pagsugot kaniya mameligro nga ipalagpot gikan sa kongregasyon ug mawad-an sa ilang panulondon sa Gingharian sa Diyos.​—1 Cor. 5:​11-13; 6:​9, 10.

Apan sa unsang paagi mahibalo ang uban nga ang Diyos sa tino nagpili nianang unang Kristohanong kongregasyon aron sa paghulip sa Israel ingong “ang kongregasyon sa Diyos”? (Buh. 20:28) Dayag ang pagpili sa Diyos. Human sa kamatayon ni Jesus, Iyang gihatag ang milagrosong mga gasa sa mga membro sa unang Kristohanong kongregasyon aron ipakita nga sila maoy mga pinili sa Diyos.​—Heb. 2:​3, 4.

Ang labaw-kinaiyanhong mga ilhanan, o mga milagro, kinahanglanon ba kanunay sa pag-ila niadtong kinsa gipili ug gitultolan sa Diyos sa kapanahonan sa Bibliya? Dili, dili gayod. Ang milagrosong mga buhat dili kasagarang panghitabo sa kasaysayan sa Bibliya. Ang kadaghanang mga tawo nga nabuhi sa kapanahonan sa Bibliya wala gayod makasaksi ug milagro. Ang kadaghanang milagro nga girekord sa Bibliya nahitabo sa mga adlaw ni Moises ug Josue (ika-16 ug ika-15ng siglo W.K.P.), ni Elias ug Eliseo (ika-10 ug ika-9 nga siglo W.K.P.), ug ni Jesus ug sa iyang mga apostol (unang siglo K.P.). Ang ubang matinumanong mga tawo nga gipili sa Diyos alang sa tinong mga katuyoan, sama kang Abraham ug David, nakakita ug nakasinati sa kapahayagan sa gahom sa Diyos, apan walay pamatuod nga sila nakahimo ug mga milagro sa ilang kaugalingon. (Gen. 18:14; 19:​27-29; 21:​1-3; itandi ang 2 Samuel 6:21; Nehemias 9:7.) Bahin sa milagrosong mga gasa nga gipakita sa unang siglo, ang Bibliya mitagna nga kini “igahiklin ra.” (1 Cor. 13:8) Ug kini nahitabo sa dihang namatay ang kataposan sa 12 ka apostol ug kadtong nakadawat sa milagrosong mga gasa pinaagi kanila.​—Itandi ang Buhat 8:14-20.

Komosta na man ang Pagpili sa Diyos Karong Adlawa?

Pagkatapos sa unang siglo, ang gitagnang apostasiya wala mapugngi sa pagkaylap. (Buh. 20:​29, 30; 2 Tes. 2:​7-12) Sa daghang siglo ang suga sa matuod nga Kristiyanidad naawop. (Itandi ang Mateo 5:​14-16.) Bisan pa, gipaila sa ilustrasyon ni Jesus nga sa ‘konklusyon sa sistema sa mga butang,’ aduna unyay tin-aw nga kalainan tali “sa trigo” (matuod nga mga Kristohanon) ug “sa bunglayon” (bakak nga mga Kristohanon). Ang trigo, o “mga pinili,” pagatigomon ngadto sa usa ka matuod Kristohanong kongregasyon, sama sa unang siglo. (Mat. 13:​24-30, 36-43; 24:31) Gihubit usab ni Jesus ang dinihogang mga membro nianang kongregasyona  ingong “ang matinumanon ug maalamong ulipon” ug gipaila nga sa panahon sa kataposan, sila magaapod-apod sa espirituwal nga pagkaon. (Mat. 24:​3, 45-47) Ang maong matinumanong ulipon pagaduyogan sa “usa ka dakong panon” sa matuod nga mga magsisimba gikan sa tanang kanasoran.​—Pin. 7:​9, 10; itandi ang Miqueas 4:​1-4.

Sa unsang paagi mailhan kining matuod nga mga magsisimba nga nagkinabuhi sa panahon sa kataposan? Sila ba kanunayng husto, ang ila bang mga paghukom dili masayop? Ang mga apostol ni Jesus nagkinahanglan gihapon ug pagtul-id. (Luc. 22:​24-27; Gal. 2:​11-14) Sama sa mga apostol, ang matuod nga mga sumusunod ni Kristo sa atong adlaw kinahanglang mapainubsanon, andam sa pagdawat ug disiplina ug, sa dihang gikinahanglan, mohimog mga kausaban, aron suod pa nga ipahiuyon ang ilang panghunahuna nianang iyaha sa Diyos.​—1 Ped. 5:​5, 6.

Sa dihang ang kalibotan misulod sa kataposang mga adlaw niadtong 1914, unsang grupo ang napamatud-ang usa ka matuod Kristohanong organisasyon? Ang Kakristiyanohan daghag iglesya nga miangkong naghawas kang Kristo. Apan ang pangutana mao: Hain, kon duna man, taliwala kanila ang nakakab-ot sa mga kinahanglanon sa Kasulatan?

Ang usa ka matuod Kristohanong kongregasyon kinahanglang usa ka organisasyon nga nagahupot sa Bibliya ingong pangunang awtoridad niini, dili ang usa ka organisasyon nga mokutlo sa nagkatibulaag nga mga bersikulo apan nagasalikway sa ubang teksto sa dihang kini dili mahiuyon sa naandang teolohiya niini. (Juan 17:17; 2 Tim. 3:​16, 17) Kini maoy usa ka organisasyon kansang mga membro​—dili ang pipila apan ang tanan​—maoy sa pagkatinuod dili bahin sa kalibotan, ingong pagsundog kang Kristo. Busa sa unsang paagi nila malangkit ang ilang kaugalingon sa politika, sama sa sublisubling gibuhat sa mga iglesya sa Kakristiyanohan? (Juan 15:19; 17:16) Ang matuod Kristohanong organisasyon kinahanglang magpamatuod sa balaang ngalang, Jehova, ug buhaton ang buluhaton nga gisugo ni Jesus​—ang pagsangyaw sa maayong balita sa Gingharian sa Diyos. Sama sa unang-siglong kongregasyon, dili lamang pipila apan tanang membro niini maoy tibuok-kalag nga mga ebanghelista. (Isa. 43:​10-12; Mat. 24:14; 28:​19, 20; Col. 3:23) Ang matuod nga mga magsisimba mailhan usab pinaagi sa ilang nagasakripisyo-sa-kaugalingon nga gugma alang sa usag usa, usa ka gugma nga mosaylo sa rasanhon ug nasodnong mga utlanan ug maghiusa kanila ngadto sa usa ka tibuok-kalibotang panag-igsoonay. Ang maong gugma kinahanglang ipakita dili lamang sa tinagsang mga kaso apan sa paagi nga magpalahi gayod kanila ingong usa ka organisasyon.​—Juan 13:​34, 35.

Dayag, nga dihang misugod ang panahon sa kataposan niadtong 1914, walay mausa sa mga iglesya sa Kakristiyanohan ang nakakab-ot niining mga sukdanana sa Bibliya alang sa usa ka matuod Kristohanong kongregasyon. Apan, unsay ikasulti bahin sa mga Estudyante sa Bibliya, ingong pagtawag sa mga Saksi ni Jehova kaniadto?

Usa ka Mabungahong Pagpangita sa Kamatuoran

Ingong usa ka batan-on, si C. T. Russell nakahinapos nga ang Bibliya gituis gayod sa Kakristiyanohan. Nagtuo usab siya nga panahon na nga masabtan ang Pulong  sa Diyos ug nga kadtong sa tim-os magtuon sa Bibliya ug magpadapat niini diha sa ilang mga kinabuhi makabatog salabotan.

Ang kaagi ni Russell, nga gipatik human dayon sa iyang kamatayon, nag-ingon: “Siya dili magtutukod sa usa ka bag-ong relihiyon, ug wala gayod mangangkon niana. Iyang gipasig-uli ang dagkong mga kamatuoran nga gitudlo ni Jesus ug sa Apostoles, ug gipadan-ag ang kahayag niini sa ika-20ng siglo. Wala siya mangangkon nga nakabaton ug linaing pagpadayag gikan sa Diyos, apan nagtuo nga miabot na ang panahong gitagal sa Diyos aron masabtan ang Bibliya; ug nga, kay nakonsagrar sa bug-os ngadto sa Ginoo ug sa Iyang pag-alagad, siya gitugotan nga makasabot niini. Tungod kay iyang gigugol ang iyang kaugalingon sa pag-ugmad sa mga bunga ug mga hiyas sa Balaang Espiritu, ang saad sa Ginoo natuman diha kaniya: ‘Kay kon kining mga butanga mabatonan ninyo ug magatubo, kini magapahilayo kaninyo sa pagkataspokan o sa pagkadili mabungahon diha sa inyong kahibalo sa atong Ginoong Jesu-Kristo.’​—2 Ped. 1:​5-8.”​—The Watch Tower, Disyembre 1, 1916, p. 356.

Ang tinguha ni C. T. Russell ug sa iyang mga kauban alang sa Kasulatanhong pagsabot maoy mabungahon. Ingong mga mahigugmaon sa kamatuoran, sila nagtuo nga ang Bibliya maoy dinasig nga Pulong sa Diyos. (2 Tim. 3:​16, 17) Ilang gisalikway ang ebolusyonaryong mga ideya ni Darwin ug ang makadaot sa pagtuo nga mga hunahuna sa matukiong mga tigsaway sa Bibliya. Nga midawat sa Kasulatan ingong kinalabwang awtoridad, gisalikway usab nila ang dili-kasulatanhong mga pagtulon-an sa Trinidad, imortalidad sa kalag, ug walay kataposang pagsakit​—mga doktrinang may paganong relihiyosong mga kagikan. Lakip sa “dagkong mga kamatuoran” nga ilang gidawat mao nga si Jehova ang Maglalalang sa tanang butang, nga si Jesu-Kristo mao ang Anak sa Diyos, nga mihatag sa iyang kinabuhi ingong lukat alang sa daghan, ug nga sa iyang pagbalik si Jesus moanhi nga dili makita ingong usa ka espirituhanong linalang. (Mat. 20:28; Juan 3:16; 14:19; Pin. 4:11) Tin-aw nilang nasabtan usab nga ang tawo maoy mamatay nga kalag.​—Gen. 2:7; Ezek. 18:20.

Dili buot ingnon nga ang mga Estudyante sa Bibliya lamang nga nakig-uban kang Russell ang nakadiskobre niining tanang mga kamatuorana; daghan ang nasabtan niadto pa sa sinserong mga tawo nga nag-angkong mga Kristohanon, ang pipila kanila mibarog niining mga pagtulon-ana sa dihang kini dili popular. Apan ang mao bang mga tawo nagsunod sa tanang kinahanglanon sa Kasulatan alang sa matuod nga pagsimba? Pananglitan, sila ba tinuod gayod nga dili bahin sa kalibotan, sumala sa giingon ni Jesus nga mahitabo sa iyang mga sumusunod?

Dugang pa sa ilang panglantaw sa Bibliya, sa unsang ubang paagi ang unang mga Estudyante sa Bibliya nga nakig-uban kang Russell nalahi? Sa walay duhaduha ang kasibot nga ilang gipadayag diha sa pagpakig-ambit sa ilang mga tinuohan ngadto sa uban, nga sa linain gipasiugda ang pagmantala sa ngalan ug Gingharian sa Diyos. Bisan pag sila diyutay ra sa gidaghanon, dali ra nilang naabot ang daghang kayutaan dala ang maayong balita. Sila ba usab tinuod nga dili bahin sa kalibotan, ingong mga sumusunod ni Kristo? Sa pila ka butang, oo. Apan ang ilang kasayoran sa kaakohang nalangkit niini miuswag sukad sa Gubat sa Kalibotan I, hangtod karon kini nahimong iladong kinaiya sa mga Saksi ni Jehova. Angay hinumdoman nga, sa dihang ang ubang relihiyosong mga pundok nagatuboy sa Liga  sa Kanasoran, ug, sa ulahi sa Hiniusang Kanasoran, ang mga Saksi ni Jehova nagamantala sa Gingharian sa Diyos​—dili sa bisan unsang hinimog-tawo nga organisasyon​—ingong bugtong paglaom sa katawhan.

Apan dili ba ang pipila ka pagtulon-an sa mga Saksi ni Jehova nakaagig mga kausaban latas sa katuigan? Kon kadtong unang mga Estudyante sa Bibliya tinuod nga pinili ug tinultolan sa Diyos ug kon ang ilang mga pagtulon-an gipaluyohan sa awtoridad sa Kasulatan sa pagsugod, nganong kinahanglanon man ang maong mga kausaban?

Sa Unsang Paagi si Jehova Nagatultol sa Iyang Katawhan?

Kadtong naglangkob sa usa ka matuod Kristohanong organisasyon karong adlawa walay nadawat nga mga pinadayag gikan sa mga manulonda o diyosnong pagkadinasig. Apan nakabaton sila sa dinasig nga Balaang Kasulatan, nga naundan sa mga pinadayag sa hunahuna ug kabubut-on sa Diyos. Ingong usa ka organisasyon ug ingong indibiduwal, kinahanglang ilang dawaton ang Bibliya ingong balaang kamatuoran, tun-an kana nga maampingon, ug tugotan kana nga mopalihok kanila. (1 Tes. 2:13) Apan sa unsang paagi nila nakuha ang hustong pagsabot sa Pulong sa Diyos?

Ang Bibliya mismo nagaingon: “Dili ba ang mga interpretasyon iya sa Diyos?” (Gen. 40:8) Kon sa ilang pagtuon sa Kasulatan may bahin nga lisod sabton, sila kinahanglang manukiduki sa pagpangita sa laing dinasig nga mga bahin sa Kasulatan nga naghatag ug lamdag sa maong butang. Busa ilang gitugotan ang Bibliya sa pagpasabot sa kaugalingon niini, ug gikan niini maningkamot sila nga masabtan “ang sumbanan” sa kamatuoran nga gilatid diha sa Pulong sa Diyos. (2 Tim. 1:13) Si Jehova nagatultol o nagagiya kanila sa maong pagsabot pinaagi sa iyang balaang espiritu. Apan aron makabaton sa giya sa maong balaang espiritu, kinahanglang ugmaron nila ang mga bunga niini, dili magpaguol o mobatok niini, ug mosanong kanunay sa mga pangagda niini. (Gal. 5:​22, 23, 25; Efe. 4:30) Dugang pa, pinaagi sa masibotong pagpadapat sa ilang nakat-onan, padayon nilang nalig-on ang ilang pagtuo, ingong pasukaranan alang sa pagbatog mas tin-aw ug mas tin-aw pa nga pagsabot kon sa unsang paagi buhaton nila ang kabubut-on sa Diyos diha sa kalibotan nga diin sila dili bahin.​—Luc. 17:5; Filip. 1:​9, 10.

Si Jehova kanunay nga nagtultol sa iyang katawhan ngadto sa mas tin-awng pagsabot sa iyang kabubut-on. (Sal. 43:3) Kon sa unsang paagi siya naggiya kanila mahimong ikailustrar niining paagiha: Kon ang usa ka tawo anaa sa mangitngit nga lawak sa hataas nga yugto sa panahon, dili ba labing maayo nga inanay siya nga iladlad sa kahayag? Giladlad ni Jehova ang iyang katawhan ngadto sa kahayag sa kamatuoran diha sa susamang paagi; siya naghatag kanila ug pagsabot nga progresibo. (Itandi ang Juan 16:​12, 13.) Kini sama sa giingon sa proverbio: “Ang dalan sa mga matarong sama sa usa ka banagbanag sa kahayag nga nagakasanag ngadto sa pagkahingpit sa adlaw.”​—Prov. 4:18.

Ang pagpakiglabot ni Jehova sa iyang piniling mga alagad sa kapanahonan sa Bibliya nagpamatuod nga ang tin-aw nga pagsabot sa iyang kabubut-on ug mga katuyoan sagad moabot nga inanay. Busa, wala hisabti sa bug-os ni Abraham kon sa unsang paagi ang katuyoan ni Jehova mamatuman maylabot sa “binhi.” (Gen. 12:​1-3, 7; 15:​2-4; itandi ang Hebreohanon 11:8.) Wala hisabti ni Daniel ang kataposang  sangpotanan sa mga tagna nga iyang girekord. (Dan. 12:​8, 9) Si Jesus, sa dinhi pa sa yuta, miadmiter nga siya wala mahibalo sa adlaw ug takna nga matapos ang presenteng sistema sa mga butang. (Mat. 24:36) Ang mga apostol sa sinugdan wala makasabot nga ang Gingharian ni Jesus maoy langitnon, nga kini dili pagatukoron sa unang siglo, ug nga bisan ang mga Hentil makapanunod niini.​—Luc. 19:11; Buh. 1:​6, 7; 10:​9-16, 34, 35; 2 Tim. 4:18; Pin. 5:​9, 10.

Dili makapahibulong kanato nga sa modernong kapanahonan, usab, kasagarang gitultolan ni Jehova ang iyang katawhan ingong usa ka progresibong organisasyon, inanay nga nagahatag ug pagsabot kanila bahin sa mga kamatuoran sa Bibliya. Dili ang mga kamatuoran mismo ang nausab. Ang kamatuoran magpabiling kamatuoran. Ang katuyoan ug kabubut-on ni Jehova, ingon sa gilatid diha sa Bibliya, magpabiling piho. (Isa. 46:10) Apan ang ilang pagsabot niining mga kamatuorana progresibong nagakatin-aw “sa hustong panahon,” sa gitagal nga panahon ni Jehova. (Mat. 24:45; itandi ang Daniel 12:​4, 9.) Usahay, tungod sa tawhanong kasaypanan o wala-matunong nga kasibot, ang ilang panglantaw tingali kinahanglang usbon.

Pananglitan, sa nagkalainlaing panahon sa modernong-adlaw nga kasaysayan sa mga Saksi ni Jehova, ang ilang kasibot ug kadasig alang sa kabayawan sa pagkasoberano ni Jehova mitultol sa wala sa panahon nga mga pagdahom kon kanus-a moabot ang kataposan sa daotang sistema sa mga butang ni Satanas. (Ezek. 38:​21-23) Apan si Jehova wala magpahibalo daan sa tukmang panahon. (Buh. 1:7) Busa, ang katawhan ni Jehova angayng magpasibo sa ilang mga panglantaw bahin niining butanga.

Ang maong mga pagpasibo sa panglantaw wala magpasabot nga nausab ang katuyoan sa Diyos. Ni nagsugyot sila nga ang kataposan niining sistemaha halayo pa. Sa kasukwahi, ang katumanan sa mga tagna sa Bibliya maylabot “sa konklusyon sa sistema sa mga butang” nagapamatuod nga haduol na ang kataposan. (Mat. 24:3) Nan, ang kamatuoran ba nga dihay wala sa panahon nga mga pagdahom ang mga Saksi ni Jehova nagpasabot nga sila wala tultoli sa Diyos? Walay kalainan sa mga tinun-an nga nagdahom nga ang Gingharian nag-angat na sa ilang adlaw nagpasabot nga sila wala pilia ug tultoli sa Diyos!​—Buh. 1:6; itandi ang Buhat 2:47; 6:7.

Nganong ang mga Saksi ni Jehova segurado gayod nga sila nakabaton sa matuod nga relihiyon? Tungod kay sila nagatuo ug nagadawat sa ginaingon sa Bibliya bahin sa mga ilhanan sa matuod nga mga magsisimba. Ang ilang modernong-adlaw nga kasaysayan, nga gihisgotan sa mas unang mga kapitulo niining publikasyona, nagapakita nga, dili lamang ingong mga indibiduwal kondili ingong usa ka organisasyon, sila nakakab-ot sa mga kinahanglanon: Sila maunongong nagalaban sa Bibliya ingong balaang Pulong sa Diyos sa kamatuoran (Juan 17:17); sila nagpabiling bug-os nga nahimulag sa mga kalihokan sa kalibotan (Sant. 1:27; 4:4); sila nagapamatuod sa balaang ngalang, Jehova, ug nagamantala sa Gingharian sa Diyos ingong bugtong paglaom sa katawhan (Mat. 6:9; 24:14; Juan 17:26); ug sila sa tininuod nagahigugmaay sa usag usa.​—Juan 13:​34, 35.

Nganong ang gugma usa ka talagsaong ilhanan sa mga magsisimba sa matuod nga Diyos? Unsang matanga kini sa gugma nga nagapaila sa matuod nga mga Kristohanon?

[Footnote]

[Blurb sa panid 705]

Dihang mapili na sa Diyos, hinungdanon nga sila magpabiling masinugtanon sa iyang kasugoan

[Blurb sa panid 706]

Sa unsang paagi mailhan kining matuod nga mga magsisimba nga nagkinabuhi sa panahon sa kataposan?

[Blurb sa panid 707]

“Wala siya mangangkon nga nakabaton ug linaing pagpadayag gikan sa Diyos”

[Blurb sa panid 708]

Ilang gitugotan ang Bibliya sa pagpasabot sa kaugalingon niini

[Blurb sa panid 709]

Gitultolan ni Jehova ang iyang katawhan ingong usa ka progresibong organisasyon, inanay nga nagahatag ug pagsabot kanila bahin sa mga kamatuoran sa Bibliya