Ang Kristohanong Kongregasyon sa Unang Siglo

Sa Pentekostes 33 K.P., ang balaang espiritu gibubo diha sa usa ka pundok sa 120 ka disipulo ni Jesus, ug sa daghang pinulongan misugod sila sa pagsulti bahin sa katingalahang mga butang sa Diyos. Mao kini ang pagkatukod sa Kristohanong kongregasyon. Hapit 3,000 ka bag-ong mga disipulo ang gibawtismohan niadtong adlawa.​—Buhat, kapitulo 2.

Ang mga kongregasyon sa nagkalainlaing dapit mitubo sa gidaghanon samtang ang mga apostoles ug ang uban nagpadayon sa pagsulti sa Pulong sa Diyos nga maisogon. Sumala sa girekord sa basahon sa Buhat, ang pagsangyaw sa ulahi mikaylap sa tibuok dapit sa Mediteraneo, gikan sa Babilonya ug sa Norte Aprika ngadto sa Roma ug tingali sa Espanya.—Roma 15:​18-29; Colosas 1:​23; 1 Pedro 5:​13.

Sa nahimong mga disipulo ang mga tawo, nagporma sila ug mga kongregasyon. Ang kuwalipikado, hamtong nga mga lalaki gitudlong mga ansiano, kun magtatan-aw, sa pagpatunhay sa sukdanan sa matarong nga pagtulon-an ug paggawi sa mga kongregasyon. Apan wala silay klerong matang; sila maoy mga ministro ug isigkamamumuo sa Gingharian sa Diyos.​—Buhat 14:​23; 20:​28; 1 Corinto 3:​5; 5:​13; Colosas 4:​11; 1 Timoteo 3:​1-15; Hebreohanon 13:​17; 1 Pedro 5:​1-4.

Ang mga apostoles ug ubang suod nga mga isigkamamumuo nag-alagad ingong usa ka nagamandong lawas. Sila nanguna sa buluhatong pagsangyaw. Ilang gisulbad ang mga suliran sa kongregasyon sa Jerusalem. Sila nagpadalag kuwalipikadong mga igsoon sa Samaria ug sa Antioquia aron mapalig-on ang bag-ong mga magtutuo didto. Ilang giatiman ang kasungian bahin sa sirkunsisyon, nagpadala sa ilang desisyon sa tanang mga kongregasyon aron ilang sundon. Apan kining mga tawhana dili mga agalon kondili mga alagad ug isigkamamumuo sa enterong kongregasyon.​—Buhat 4:​33; 6: 1-7; 8:​14-25; 11:​22-24; 15:​1-32; 16:​4, 5; 1 Corinto 3:​5-9; 4:​1, 2; 2 Corinto 1:​24.

Ang unang mga disipulo gitawag nga mga Kristohanon, ingong ngalan nga gihatag kanila sa Diyos. Sila may mga pagtulon-an usab nga nagpalahi kanila; gitawag kining pagtulon-an sa mga apostoles, o sumbanan sa maayong mga pulong.  Kining Kasulatanhong pagtulon-an gitawag usab nga kamatuoran.​—Juan 17: 17; Buhat 2:​42; 11:​26; Roma 6:​17; 1 Timoteo 4:​6; 6:​1, 3; 2 Timoteo 1:​13; 2 Pedro 2:​2; 2 Juan 1, 4, 9.

Sila maoy tibuok yutang kaubanan sa mga igsoon nga nahiusa sa gugma. Sila nagpakitag kaikag sa ilang isigkamagtutuo sa ubang mga nasod. Kon mobiyahe sa laing dapit, giabiabi sila sa isigkamagtutuo sa ilang mga balay. Ilang gisunod ang hataas nga sukdanan sa moral nga paggawi, ingong balaang katawhan nga bulag gikan sa kalibotan. Ilang gisilsil sa ilang hunahuna ang adlaw sa presensiya ni Jehova ug madasigong naghimog katilingbanong pagpahayag sa ilang pagtuo.—Juan 13:​34, 35; 15:​17-19; Buhat 5:​42; 11:​28, 29; Roma 10:​9, 10, 13-15; Tito 2:​11-14; Hebreohanon 10:​23; 13:​15; 1 Pedro 1:​14-16; 2:​9-12; 5:​9; 2 Pedro 3:​11-14; 3 Juan 5-8.

Apan, sumala sa gitagna, ang dakong apostasiya misugod sa pagtungha, sa ikaduha ug ikatulong siglo. Miresulta kini ug dagkong sistema sa iglesya nga wala maghupot sa kaputli sa unang Kristohanong kongregasyon bahin sa pagtulon-an, paggawi, organisasyon, ug baroganan diha sa kalibotan.​—Mateo 13:​ 24-30, 37-43; 2 Tesalonica, kapitulo 2.

Apan, si Jesus mitagna nga moabot ang pagpasig-uli sa tinuod nga pagsimba sa konklusyon sa sistema sa mga butang. Ang mga Saksi ni Jehova nagtuo nga kining pagpasig-uli makita sa ilang tibuok yutang buluhaton sa atong panahon, duolan sa 1,900 ka tuig human sa tagna ni Jesus. Ang mosunod nga mga panid mopatin-aw kon ngano.

● Sa unsang paagi natukod ang Kristohanong kongregasyon, ug sa unsang paagi mitubo kini?

● Sa unsang paagi gidumala kanang kongregasyona?

● Unsang mga butanga ang tin-awng nagpalahi sa mga Kristohanon sa unang siglo?

[Mapa sa panid 7]

(Alang sa aktuwal nga pagkahan-ay, tan-awa ang publikasyon)

Black Sea

Caspian Sea

Great Sea

Red Sea

Persian Gulf

Mga dapit nga naabot sa maayong balita sa unang siglo

ITALY

Rome

GREECE

MALTA

CRETE

CYPRUS

BITHYNIA

GALATIA

ASIA

CAPPADOCIA

CILICIA

SYRIA

ISRAEL

Jerusalem

MESOPOTAMIA

Babylon

Ang pila niining mga dapita nahimong mga magtutuo

ILLYRICUM

MEDIA

PARTHIA

ELAM

ARABIA

LIBYA

EGYPT

ETHIOPIA

[Mga hulagway sa panid 7]

Ang unang mga Kristohanon maisogong nagsangyaw sa Pulong sa Diyos

Ang mga Kristohanon giabiabi sa mga balay sa isigkamagtutuo kon sila mobiyahe sa laing dapit