Bug-os Panahong mga Ministro Nagapanguna sa Buluhatong Pagsangyaw

Tingali ang una sa mga Saksi ni Jehova nga miduaw kanimo mao ang bug-os panahong payoner nga ministro o usa sa misyonero. Sanglit ang mga Saksi ni Jehova walay gibayrang ministeryo, tingali nakapalibog kanimo kon sa unsang paagi makabahin kining mga tawhana sa ministeryo sa bug-os panahon.

Ang tanang mga Saksi ni Jehova nga dedikado ug bawtismado maoy mga ministro, apan ang kadaghanan may mga pamilya o ubang mga responsabilidad nga nakapugong kanila sa paggugol ug mas daghang oras sa usa ka semana sa ilang ministeryo. Apan, gipaubsan sa libolibong mga Saksi sa tibuok yuta ang ilang sukdanan sa kinabuhi aron ilang maabot ang ilang napakubsang mga gastos sa part-time nga trabaho aron makagugol ug 1,000 ka oras o kapin pa sa usa ka tuig diha sa ministeryo.

Tinuod, ang bug-os panahong mga ministro wala kaayoy kuwartang magasto alang sa ilang kaugalingon, apan alang kanila kini maoy usa ka paagi sa pagpangita pag-una sa Gingharian sa Diyos. Ug nakadawat sila ug daghang mga panalangin. Ang pakigsulti lang sa uban bahin sa Pulong sa Diyos sa 90 ka oras o kapin pa sa usa ka bulan maoy maayo na kaayong eksperyensiya. Ang bug-os panahong ministro makapauswag sa iyang katakos sa ministeryo ug may panahon usab sa pag-atiman ug maayo sa interes nga ginapakita. Kini may mga makapadasig nga mga resulta. Ilang nabatonan ang ilang materyal nga mga panginahanglan, ug kini ilang gipabilhan ug dako.—Mateo 6:​33.

Sa Pebrero 1943, gitukod sa Watch Tower Society ang Watchtower Bible School of Gilead. Ang katuyoan mao ang pagbansay sa eksperyensiyadong bug-os panahong payoner nga mga ministro sa pag-alagad ingong mga misyonero sa langyawng mga nasod. Ang lima ka bulang kurso gilangkoban sa matukiong pagtuon sa Bibliya, kasaysayan sa Bibliya, organisasyon ni Jehova, ug sa nalangkit nga mga ulohan sa pagpangandam alang sa pag-alagad sa langyawng kanataran.

Ang Sosyedad ang mobayad sa transportasyon sa misyonerong asaynment ug motaganag maayong mga pagkaon ug kasarangang puy-anan sa misyoneryong mga balay. Mohatag usab kini sa kada misyonero ug igoigong pasig-uling salapi alang sa personal nga galastohan. Magbanosbanos  ang mga misyonero sa pagpalakaw sa balay pinaagi sa pagpamalit, pagluto, ug paghinlo. Pinaagi niining makataronganong pag-atiman ang mga misyonero nakahimo sa paggugol labing menos 140 ka oras sa usa ka bulan sa pagsangyaw sa balay ug balay ug sa pagdumala ug mga pagtuon sa Bibliya uban sa interesadong mga tawo.

Daghan niining mga misyoneroha giasayn sa libolibong milya nga halayo gikan sa balay ug pamilya. Ilang gipasibo ang ilang kaugalingon sa lahi nga sukdanan sa kinabuhi ug kultura, sa bag-ong mga batasan sa pagkaon, lahi nga klima, ug sa pagsulti sa laing pinulongan. Gihimo nila kining buluhatona tungod kay ilang gimahal ang mga tawo ug may lig-ong tinguha sa pagtabang kanila sa pagkat-on bahin sa Gingharian sa Diyos.

Sukad sa 1943 hangtod sa 1985, ang Watchtower Bible School of Gilead nakahimo ug 80 ka klase ug nakapadalag kapin sa 6,000 ka misyonero. Ubos sa pagdumala sa Sosyedad, kini sila ang nagapanguna sa pagpauswag sa edukasyon sa tibuok Aprika, Sentral ug Habagatang Amerika, sa Oryente, ug sa Habagatang Pasipiko, ug daghan ang ilang nahimo sa Uropa.

Bisan kon makigbahin man ang mga Saksi ni Jehova sa ministeryo sa bug-os panahon ingong mga payoner o mga misyonero o part time, sila nagaalagad nga walay pinansiyal nga ganansiya. Ilang gigugol ang ilang kaugalingong panahon ug salapi, ug ang ilang kaugalingon, sa pagtabang sa uban aron makabaton sa kahibalo nga motultol sa kinabuhing walay kataposan.​—Juan 17:​3.

● Sa unsang paagi ang ubang mga Saksi ni Jehova nakagugol sa ilang bug-os panahon sa ministeryo, ug nganong ilang gihimo kini?

● Sa unsang paagi gibansay ang mga ministro alang sa misyonerong buluhaton?

● Sa unsang paagi gisuportahan ang mga misyonero sa ilang langyawng asaynment?

[Mga hulagway sa panid 22]

Wala: Klasehanan sa Gilead School, Brooklyn, N.Y., U.S.A.

Tuo: Misyonerong nagtudlo sa Pulong sa Diyos sa Papua New Guinea

[Mga hulagway sa panid 23]

Payoner nga mga ministro ug mga misyonero nga nagsangyaw sa Pulong sa Diyos sa nagkalainlaing mga nasod

Brazil

Dominican Republic

Espanya

Sierra Leone, Aprika