Gitigom ug Gisangkapan ni Jehova ang Iyang Katawhan Alang sa Buluhaton

Sa tibuok kasiglohan, ang apostasiya mikaylap sa tibuok yuta. Ang daghang denominasyon sa iglesya adunay pila ka pagtulon-an sa Bibliya apan sa dakong bahin nagsunod lamang sa mga tradisyon sa tawo ug daghang kustombre nga pagano ug sinugdanan. Ang mga pagpaabot sa pagbalik ni Kristo gipadaplin.​—Itandi sa Mateo 13:​24-30, 37-43.

Apan, si Jesus miingon sa pagpadayon sa pagbantay sa iyang pagbalik! Ang usa ka grupo nga naghimo niini makita sa Allegheny, Pennsylvania, U.S.A. Sa sayong katuigan sa 1870 si Charles Taze Russell ug pipila sa iyang mga higala misugod sa paghimog matukion, walay gidapigang pagtuon sa Bibliya bahin sa pagbalik ni Kristo. Misugod usab sila sa pagtuki sa kamatuoran sa uban pang pangunang mga doktrina. Mao kini ang sinugdanan sa modernong-adlawng kalihokan sa mga Saksi ni Jehova.​—Mateo 24:​42.

Nasabtan niining grupoha nga ang doktrina sa Trinidad dili Biblikanhon kondili si Jehova lamang ang labing gamhanang Diyos ug Maglalalang; si Jesu-Kristo mao ang Iyang unang gilalang ug bugtong Anak; ug dili usa ka persona ang balaang espiritu kondili ang dili makitang aktibong gahom sa Diyos. Nakita niining grupoha nga ang kalag dili kay dili mamatay kondili mamatay, nga ang paglaom sa patay mao ang pagkabanhaw, ug nga ang silot tungod sa dili mahinulsolong kadaotan dili walay kataposang kasakit kondili kalaglagan.

Ang paghatag ni Jesus sa iyang kinabuhi ingong lukat alang sa katawhan nakitang mao ang pangunang pagtulon-an sa Bibliya. Una, ang 144,000 ka lalaki ug babaye, nga pinili gikan sa unang siglo hangtod sa atong panahon, gilukat gikan sa yuta aron mahimong kaubang manununod ni Kristo sa langitnong Gingharian. Dayon pinaagi sa lukat ni Jesus ang binilyong katawhan, diin ang kadaghanan pagabanhawon gikan sa patay makakab-ot sa tawhanong kahingpitan nga may palaabutong kinabuhing walay kataposan sa yuta ilalom sa pagmando niana nga Gingharian.

Nasabtan usab ni Russell ug sa iyang mga kauban nga ang presensiya ni Kristo maoy dili makita, sa espiritu. Ang mga Hentil nga Panahon, nga sulod niining panahona ang pagkasoberano sa Diyos wala ipahayag pinaagi sa usa ka kagamhanan sa yuta, natapos sa 1914. Dayon natukod ang Gingharian sa Diyos sa langit. Kining mga pagtulon-ana napaila diha sa mga Saksi ni Jehova karon.

Gipahayag ni Russell ug sa iyang mga kauban kining mga kamatuorana sa tanang dapit pinaagi sa mga pakigpulong ug sa pinatik nga panid. Sa Hulyo 1879 si Russell misugod sa pagpatik sa Zion’s Watch Tower (karon gitawag Ang Bantayanang Torre). Determinado siya nga ang mga buluhaton sa pagsangyaw sa mga Estudyante sa Bibliya kinahanglang bug-os ipasukad sa boluntaryong mga amot ug nga walay koleksiyong himoon. Dugang pa, ang balita kinahanglang ipakaylap pinaagi sa walay suweldo, boluntaryong mga paningkamot niadtong nagatuo. Si Russell mismo miamot gikan sa iyang natigom nga kuwarta sa negosyo hangtod niadtong panahona.

Ang mga Estudyante sa Bibliya nagtigom sa mga klase, nga maoy pagtawag kaniadto sa ilang mga kongregasyon. Sila tulo ka beses nagtigom sa usa ka semana, alang sa mga pakigpulong, pagtuon sa Kasulatan, ug mga tigom sa pagpamatuod. Regular silang nagpilig kasaligang mga lalaki ingong mga ansiano sa pagdumala sa espirituwal nga mga kalihokan sa matag klase.

 Sa 1884 ang Zion’s Watch Tower Tract Society gihimong usa ka dili negosyong korporasyon sa Pennsylvania. Ang presidente sa korporasyon gipili matag tuig. Naghatag kinig legal nga instrumento, wala magdepende sa kinabuhi sa usa ka indibiduwal, aron sa pagpadayon sa edukasyonal nga buluhaton sa Bibliya. Si Charles Taze Russell napiling presidente, ug ang iyang opisina giisip nga mao ang hedkuwarter.

Dagkong mga paningkamot ang gihimo sa pagpauswag sa buluhaton sa ubang mga nasod. Kini miabot sa Canada ug Inglaterra sa sayo sa katuigang 1880. Sa 1891 milibot si Russell sa Uropa ug sa Tungang Silangan sa pagtan-aw kon unsay mahimo sa pagpauswag sa kamatuoran didto. Sa sayo sa katuigang 1900, ang sangang mga opisina sa Sosyedad natukod sa Britanya, Alemanya, ug Australia.

Sa 1909 ang mga hedkuwarter sa Watch Tower Society gibalhin sa Brooklyn, New York, aron mapauswag pag maayo ang buluhatong pagsangyaw sa bug-os yuta. Nahimong hinungdanon ang pagpormag kaubang korporasyon ilalom sa balaod sa Estado sa New York, nga karon gitawag nga Watch Tower Bible and Tract Society of New York, Inc. Sa 1914 ang International Bible Students Association naporma sa London, Inglaterra, sa pagpauswag sa mga kalihokan sa mga Estudyante sa Bibliya sa tanang British Commonwealth. Sa karon duolan sa 70 ka legal nga mga korporasyon ug mga asosasyon nga naporma sa daghang mga nasod sa tibuok kalibotan nag-alagad sa mga katuyoan sa Watch Tower Society. Ang tanan pilantropiko, nga gisuportahan sa boluntaryong mga amot ug boluntaryong mga trabahante.

Sa 1916 si Charles Taze Russell namatay, ug si Joseph Franklin Rutherford misunod kaniya ingong presidente sa Watch Tower Society. Sa naghinapos ang katuigan sa Gubat sa Kalibotan I, ang mga Estudyante sa Bibliya grabeng gisulayan sa paglutos, nga gitapos sa sayop nga pagkabilanggo sa walo ka igsoon nga nag-alagad sa responsableng kaakohan sa mga hedkuwarter sa Sosyedad sa Amerika. Ang buluhaton sa mga Estudyante sa Bibliya daw nameligro. Apan, sa 1919 kining mga igsoona gibuhian ug gideklarar nga walay sala, ug karon nagsugod na ang mas dakong pagpauswag sa buluhaton sa pagsangyaw.

Pinaagi sa mga hedkuwarter sa Sosyedad, ang nahiusang lawas sa dinihogang Kristohanong mga Estudyante sa Bibliya nagpadayon sa pagtaganag espirituwal nga pagkaon sa tukmang panahon alang sa tanang mga indibiduwal nga sakop sa organisasyon. Sama nga ang kongregasyon sa dinihogang mga Kristohanon sa unang siglo gilangkoban sa “matinumanon ug maalamong ulipon” nga gihisgotan ni Jesus, sa ingon ang dinihogang grupo sa dedikadong mga Estudyante sa Bibliya, nga nakigbahin sa buluhaton sa Gingharian, gilangkoban sa “matinumanon ug maalamong ulipon” nga matang sa atong panahon. Sa panahon sa pag-abot ni Jesus sa pagsusi sa kongregasyon, iyang nakita kining matanga nga nagtaganag pagkaon sa mga sakop sa panimalay; dayon iyang gitudlo kini ibabaw sa tanan niyang katigayonan.​—Mateo 24:45-47; Lucas 12:​42.

Wala magdugay tapos sa Gubat sa Kalibotan I, dayag nga nakitang ang Gingharian sa Diyos pinaagi ni Kristo Jesus natukod sa mga langit sa 1914. Busa ang mga pulong ni Jesus midangat sa ilang bug-os nga katumanan: “Kining maayong balita sa gingharian kinahanglang igawali  sa tanang pinuy-anang yuta sa pagpamatuod sa tanang kanasoran; ug unya moabot ang kataposan.” Nanguna si Joseph Rutherford sa paghimo sa balita sa Gingharian nga mabatian sa mas daghan pang tawo.—Mateo 24:​14.

Busa, ang Sosyedad mihukom sa pagprinta sa iyang kaugalingon pinaagi sa paggamit sa boluntaryong mga trabahanteng lalaki nga dedikado, aron mapaneguro ang padayong pagpatik ug mga literatura sa Bibliya sa labing kubos nga bili. Ang tanang mga Estudyante sa Bibliya gidasig sa pakigbahin sa regular nga pagsangyaw sa maayong balita sa Gingharian. Ang pagsibya sa radyo sa mga pakigpulong sa Bibliya gigamit sa daghang nasod.

Sa wala pa ang 1918 nasabtan sa mga Estudyante sa Bibliya nga ang ilang katuyoan sa pagsangyaw mao ang pagtigom sa mga nanghibilin sa mga pinili nga makauban ni Kristo Jesus sa langit ug sa pagpasidaan sa kalibotan sa umaabot nga paghukom sa Diyos. Wala pa hatagig pagtagad niadto ang pagtigom sa makalabang-buhi sa kataposan sa presenteng daotang sistema aron magpuyo sa yuta. Dayon sa 1918 paunahan ang pakigpulong “Minilyon Karon nga Buhi Mahimong Dili na Mamatay!” kaylap nga gipahayag.

Sa 1923 ang pagtuon sa sambingay ni Jesus bahin sa karnero ug sa mga kanding sa Mateo 25:​31-46 nagpakita nga sa dili pa ang Armageddon ang matarong nga mga tawo nga dili alang sa langitnong Gingharian makabaton sa pag-uyon sa Diyos ug maluwas sa Armageddon. Sa 1935 ang dugang pagtuon nagpakita nga kining karnerohong katawhan managsama ra sa dako, dili-maisip nga panon sa katawhan nga gibatbat sa Pinadayag 7:​9-17. Kini sila pagatigomon gikan sa tanang kanasoran ug may palaabutong maluwas sa Dakong Kasakitan ug makabaton ug kinabuhing walay kataposan sa yuta. Kining maong pagsabot nakahatag dakong kadasig sa buluhaton sa pagsangyaw.​—Juan 10:​16.

Sa 1931 ang mga Estudyante sa Bibliya misagop sa ngalang mga Saksi ni Jehova. Una gitawag silang mga Estudyante sa Bibliya, Internasyonal nga mga Estudyante sa Bibliya, Millennial Dawn nga mga tawo, ug Watch Tower nga mga tawo. Gianggaan gani silang mga Russellites ug Rutherfordites. Tin-aw nga walay usa niining ngalana ang tukmang nagpaila kanila. Bisan pag ang ngalang Kristohanon, nga maoy gingalan sa Diyos sa mga disipulo  ni Jesus sa unang siglo, takos kanila, kini gigamit usab sa daghang grupo nga nagasunod sa bakak nga mga pagtulon-an. Aron maila sila gikan sa milyonmilyong mga Kristohanon sa ngalan lamang, kinahanglang may ngalan gayod nga magpaila sa tinuod nga mga sumusunod ni Kristo karong adlawa.

Sa pagsusi sa Kasulatan napatin-aw nga sama nga si Jehova nagtawag sa iyang katawhang Israel nga iyang mga saksi, sa ingon ang iyang katawhan sa konklusyon sa sistema sa mga butang, nga nagapahinungod sa pagpaila sa iyang ngalan ug katuyoan, tukmang tawgon usab nga mga Saksi ni Jehova. Kining ngalana tukmang nagapaila sa tinuod Kristohanong mga magsisimba ni Jehova gikan sa tanang nagaangkong mga Kristohanon karon.—Salmo 83:​18; Isaias 43:​10-12.

Sa 1942, sa panahon sa Gubat sa Kalibotan II, si Joseph Rutherford namatay, ug si Nathan H. Knorr ang mipuli kaniya nga presidente sa Watch Tower Society. Nasabtan niining panahona nga ang tagna tin-awng nagpakita nga tapos sa gubat adunay relatibong kalinaw ug kagawasan nga makahatag ug dakong kauswagan sa buluhatong pagsangyaw sa dili pa matapos kining sistemaha. Sa Pebrero 1943 ang Watchtower Bible School of Gilead gitukod aron sa pagbansay sa bug-os panahong mga ministro alang sa misyonerong buluhaton sa langyawng mga nasod. Sa ulahi nianang tuiga, usa ka linain nga programa sa pagbansay sa ministeryo ang gidugang sa senemanang iskedyol sa tigom sa mga Saksi ni Jehova.

Sa 1950 ang Sosyedad misugod sa pagluwat ug mga bahin sa New World Translation of the Holy Scriptures, usa ka modernong Ingles nga hubad sa Bibliya nga gikuha gikan sa mga teksto sa orihinal nga pinulongan. Kining tukmang pagkahubad, daling masabtan nga Bibliya, gigama sa kubos nga bili sa mga imprintahan sa Sosyedad, nahimong dakong tabang sa buluhatong pagsangyaw. Sa pagkakaron, kapin sa 40 ka milyong kopya ang napatik sa 11 ka pinulongan.

Sa kataposan sa 1985, kapin sa tulo ka milyong mga Saksi ni Jehova ang nakigbahin sa buluhatong pagsangyaw sa kapin sa 200 ka kayutaan ug kapuloan sa dagat. Sa Memoryal sa kamatayon ni Kristo, ang tigom nga may labing daghang tumatambong gihimo sa ilang 49,716 ka kongregasyon sa 1985, 7,792,109 ka tawo sa kinabug-osan ang mitambong.

Nga tinuod nga gigamit ni Jehova ang mga Saksi makita sa ilang pagpabiling aktibo sa iyang pag-alagad, sa ilang tibuok kalibotang panaghiusa, sa ilang kadasig sa pagpasidungog sa ngalan ni Jehova ug sa pagsangyaw sa iyang Gingharian, diha sa ilang mahinlong moral nga mga sukdanan, sa ilang pagdawat sa enterong Bibliya ingong dili-masayop nga Pulong sa Diyos, ug sa ilang kagawasan sa mga patuotuo ug sa espiritismo.

Ang mosunod nga mga bahin nagapakita kanimo kon sa unsang paagi ikaw makapahimulos niining pagpasig-uli sa tinuod nga pagsimba sa Diyos.

● Unsang pangunang mga pagtulon-an sa Bibliya ang nagpalahi sa mga Estudyante sa Bibliya gikan sa relihiyosong mga denominasyon?

● Unsang pag-uswag sa organisasyon ang naeksperyensiyahan sa mga Estudyante sa Bibliya hangtod sa 1918?

● Sa unsang paagi ikaingon nga ang grupo sa dinihogang mga Estudyante sa Bibliya gilangkoban sa “matinumanon ug maalamong ulipon” sa Mateo 24:​45-47?

● Unsang pagsabot sa katuyoan sa Diyos ang nakahatag dakong kadasig sa pagpauswag sa buluhatong pagsangyaw?

● Sa unsang katuyoan nag-alagad ang ngalang mga Saksi ni Jehova?

● Unsa ang mga ebidensiya nga tinuod gayod nga gigamit sa Diyos ang mga Saksi ni Jehova?

[Mga hulagway sa panid 8]

C. T. Russell sa 1879

Hulyo 1879 nga isyu

Unang Grupo sa mga Estudyante sa Bibliya, Pittsburgh, Pa.

[Mga hulagway sa panid 9]

Hedkuwarter, 1889-1909, Pittsburgh, Pa.

Dagkong mga opisina, 1909-1918, Brooklyn, N.Y.

Puy-anang hedkuwarter, 1909-1926, Brooklyn, N.Y.

[Mga hulagway sa panid 10]

Hedkuwarter sa kalibotan sa mga Saksi ni Jehova, Brooklyn, New York, U.S.A.

Itaas nga wala: Mga opisina,

Itaas nga tuo: Puy-anang mga tinukod

Ubos nga tuo: Pabrika,

Ubos nga wala: Sentro sa shipping

[Mga hulagway sa panid 11]

Pagsibya sa radyo ni J. F. Rutherford

Unang rotary nga imprintahan sa Sosyedad, gipaandar sa mga boluntaryo

New World Translation nga Bibliya, karon gipatik sa 11 ka pinulongan