Mga Kongregasyon Alang sa Pagpalig-on Diha sa Gugma ug Panaghiusa

Tingali nakatambong ka na sa pipila ka tigom sa kongregasyon sa mga Saksi ni Jehova duol sa imong gipuy-an. Ang mga tawo gikan sa nagkalainlaing matang sa kinabuhi​—mga grupo sa pamilya, dili-minyong mga tawo, tigulang ug batan-on​—nagtambong didto. Silang tanan nahiusa sa ilang pagsimba ug interesado sa pagtabang sa uban.

Sa bisan unsang kahikayan diin daghang tawo nagatinguha sa pagtrabaho nga may paghiusa, kinahanglang may magdumala. Ang Diyos maoy Diyos sa kahusay; busa, kanang kahusay kinahanglang makita sa kongregasyon sa iyang katawhan. Sama sa unang siglo, maingon man karon, ang kuwalipikado, hamtong, ug eksperyensiyadong Kristohanong mga lalaki ang gitudlo ingong mga ansiano, o mga magtatan-aw. Sila ang nagadumala sa kongregasyon ug nagatan-aw sa espirituwal nga mga panginahanglan niini. Sila gipaluyohan sa ubang matinumanong mga lalaki nga gitawag nga ministeryal nga mga alagad. Sila walay madawat nga suweldo o ubang pinansiyal nga kaayohan apan boluntaryong nagaalagad, nga nagatagana sa ilang kaugalingong mga gastos, sa kasagaran gikan sa ilang sekular nga trabaho.​—1 Corinto 14:33, 40; Filipos 1:​1; 1 Timoteo 3:​8, 9.

Sa unsang paagi sila gipili? Sila kinahanglan matinumanong mga alagad sa Diyos nga nagapakitag pipila ka Kasulatanhong mga kuwalipikasyon. Ang pipila niini mao: ‘kasarangan sa mga batasan, maligdong sa hunahuna, mahusay, maabiabihon, takos nga magapanudlo, ug makataronganon; dili mahigugmaon sa salapi; maayong modumala sa iyang panimalay; dili bag-ong kinabig; may maayog dungog sa gawas’; ‘malig-ong nagapabilin sa kasaligang pulong bahin sa arte sa pagpanudlo.’​—1 Timoteo 3:​1-15; Tito 1:​7-9.

Wala mapili pinaagi sa botasyon kining mga tawhana alang sa kaakohan sa kongregasyon, diin ang kadaghanan tingali bag-o pang mga Kristohanon. Hinunoa, sila girekomendar sa hamtong ug eksperyensiyadong mga lalaki kinsa mga ansiano sa kongregasyon ug nakasabot sa usa ka sukod kon naabot ba nila ang Kasulatanhong mga kinahanglanon. Dayon ang mga pagpanudlog mga ansiano ug ministeryal nga mga alagad gihimo ilalom sa  pagdumala sa Nagamandong Lawas sa mga Saksi ni Jehova, kini nagasunod sa sumbanan nga gihatag sa Kristohanong kongregasyon sa unang siglo.

Kining mga ansiano, o mga magtatan-aw, dili usa ka klero nga matang; dili sila mga agalon. Sumala sa gipamulong ni Jesus, ang usa nga magapanguna kinahanglang ulipon sa tanan. Diha sa kongregasyon sa mga Saksi ni Jehova, ang mga ansiano tinuod gayod nga isigkamamumuo sa Gingharian sa Diyos.​—Mateo 20:26, 27; 23:​8-11; Roma 12:​8; 1 Corinto 3:​5; 4:​1, 2; Colosas 4:​11; 1 Tesalonica 5:​12-14.

Ingong mga magtatan-aw, sila ang magdumala sa instruksiyon nga ihatag sa mga tigom ug manguna sa kalihokan sa pagsangyaw. Ang pagsangyaw sa maayong balita sa Gingharian sa tibuok gitudlong teritoryo mao ang pangunang tumong sa kongregasyon. Ang mga magtatan-aw nagaalagad usab ingong mga magbalantay, nagaduaw sa mga sakop sa kongregasyon sa pagpalig-on kanila kon gikinahanglan.​—Mateo 24:​14; Buhat 1:​8; 1 Tesalonica 2:​11, 12; 5:​14, 15; 2 Timoteo 2:​24-26; Hebreohanon 13:​17; Santiago 5:​13-16; 1 Pedro 5:​1-4.

Ang mga ansiano may kaakohan sa pagbadlong ug sa pagpadapat sa disiplina sa tanang nagasubay ug daotang dalan ug nga tingali mohatag kapeligrohan sa espirituwal ug moral nga kahinlo ug panaghiusa sa kongregasyon.​—1 Corinto 5:​4, 5, 7, 11-13; Tito 1:​9; 2:​15; 3:​10, 11.

Ang regular nga pag-ubanay sa kongregasyon mohatag kanimo ug maayong pagsandurotay ug daghang espirituwal nga mga kaayohan.—Salmo 35:18; 84:10.

● Kinsa ang nagadumala sa mga kalihokan sa tagsa-tagsa ka kongregasyon?

● Unsa ang basehanan sa pagpilig mga magtatan-aw?

● Unsa ang ilang mga kaakohan?

[Mga hulagway sa panid 13]

Ang mga magtatan-aw manudlo sa kongregasyon, manguna sa pagsangyaw sa balay ug balay, magapalig-on pinaagi sa mga pagduaw isip mga magbalantay, maghatag tambag ug pagbadlong kon gikinahanglan