Mga Kongregasyon Giorganisar sa Pagsangyaw sa Gingharian sa Diyos

Sa dinhi pa sa yuta, giwali ni Jesu-Kristo ang Gingharian sa Diyos, sa mga kalungsoran ug sa mga kasiyudaran. Nagbansay usab siya ug nagpadala sa iyang mga disipulo sa pagbuhat sa samang buluhaton. Sa wala pa mikayab sa langit, iyang gisugo ang iyang mga sumusunod sa paghimog mga tinun-an sa katawhan sa tanang kanasoran. Sukad pa sa pagsugod niini, ang unang Kristohanong kongregasyon giorganisar sa pagsangyaw sa maayong balita. Bisag asa moadto ang mga disipulo, makita sila nga nagsangyaw sa Gingharian sa Diyos.​—Mateo 4:​17, 23; 10:​1-16; 28:​19, 20; Lucas 4:​43, 44; 8:​1; 10:​1-9; Buhat 1:​8; 4:​31; 5:​42; 8:​12; 19:​8; 28:​23, 30, 31; Roma 10:​9, 10, 14.

Sa tagna ni Jesus sa konklusyon sa sistema sa mga butang, siya miingon: “Kining maayong balita sa gingharian kinahanglang igawali sa tanang pinuy-anang yuta sa pagpamatuod sa tanang kanasoran; ug unya moabot ang kataposan.” Ang pagsangyaw maoy pangunang obligasyon sa Kristohanong kongregasyon karon.​—Mateo 24:​14; Marcos 13:​10.

Sa tibuok kalibotan, ang tanang mga kongregasyon sa mga Saksi ni Jehova giorganisar sa pagkobre sa ilang lokal nga dapit sa sistematikong paagi sa pagsangyaw sa maayong balita sa Gingharian sa Diyos. Aron mahimo kini sa mahusay nga paagi, diha sa matag nasod ang sangang opisina sa Watch Tower Society nagtudlo sa kada kongregasyon ug lugar nga sangyawan. Bahinon sa kongregasyon ang teritoryong gitudlo, ug ihatag sa may kaakohan sa pagtino nga maduaw ang mga tawo.​—1 Corinto 14:​33, 40.

Sagad duawon sa mga Saksi ang mga tawo pinaagi sa pag-adto sa balay ug balay. Diha sa ilang mga tigom sa kongregasyon, ang mga Saksi ni Jehova gibansay sa paghatag ug mugbong mga presentasyon sa balita sa Gingharian diha sa mga pultahan, ginamit ang ilang mga Bibliya. Ang mga Saksi magdalag literatura sa Bibliya nga ikabilin sa mga tagbalay nga  gustong makabaton ug dugang kahibalo sa Pulong sa Diyos.

Aron mahatagan ang tanan diha sa teritoryo ug higayon nga makadungog sa bililhong balita sa Gingharian, ang mga Saksi nagatipig ug detalyadong rekord samtang nagapamalaybalay sila, nga ginapakita kon diin ang mga tawo wala sa balay o diin sa pila ka katarongan dili posible ang paghatag ug bug-os nga pagsangyaw. Mahimong himoon sa sunod higayon ang pagduaw. Kon magpakitag interes, ginarekord kini, ug mobalik ang mga Saksi sa paghatag dugang Kasulatanhong impormasyon. Kon gikinahanglan, usa ka regular nga pagtuon sa Bibliya ang himoon. Kining tanan gihimo nga walay bayad.

Ang mga Saksi ni Jehova magtanyag usab ug mga magasin sa lumalabay diha sa mga dalan. Niining paagiha makontak nila ang daghang tawo nga dili nila maabtan sa balay. Usa ka tinuod nga paningkamot ang gihimo sa pag-abot sa tanan aron makadungog.​—Buhat 17:​17; Pinadayag 14:6, 7; 22:​17.

Nganong padayon man ang mga Saksi sa pagduaw bisan pag walay interes ang kadaghanan? Napamatud-an nga ang situwasyon sa mga indibiduwal sagad dili managsama ug sila modawat sa sunod nga pagduaw, o tingali mahibalag ang ubang membro sa panimalay nga mopakitag interes.

Si Jesus miingon sa iyang mga disipulo: “Nan, padayon sa pagpangita pag-una sa gingharian ug ang iyang pagkamatarong.” Ang pagsangyaw sa Gingharian sa Diyos adunay dakong bahin sa atong pagpangita pag-una sa Gingharian, ug gihimo kini sa mga Saksi ni Jehova nga mao ang labing importanteng tumong sa ilang mga kinabuhi.​—Mateo 6:​33; 2 Timoteo 4:2.

● Unsang buluhaton ni Jesus ug sa unang mga Kristohanon ang gitagnang himoon sa atong adlaw?

● Sa unsang paagi giorganisar ang buluhatong pagsangyaw sa mga Saksi ni Jehova?

● Nganong padayon ang mga Saksi sa pagduaw sa mga tawo bisag walay interes ang kadaghanan?

[Mga hulagway sa panid 16, 17]

Ang mga Saksi ni Jehova nga nagasangyaw sa Gingharian sa Diyos sa nagkalainlaing mga nasod

Thailand

Mexico

Netherlands

Korea

Curaçao

Ghana

Britanya

Australia