Nagalakbayng mga Magtatan-aw—Mga Isigkamumuo sa Kamatuoran

Sa Kristohanong kongregasyon sa unang siglo, dihay nagalakbayng mga magtatan-aw nga nagduaw sa mga kongregasyon sa pagpalig-on kanila. Ilang gitanyag ang ilang kaugalingon, wala mangitag personal nga kaayohan, aron makatabang sila sa sakop sa mga kongregasyon sa pagpadayon sa paglakaw nga takos sa Diyos.​—Buhat 11:​23, 24; 14:​21, 22; 15:​32; 20:​2, 31-35; Filipos 2:​20-22, 29; 1 Tesalonica 2:​5-12.

Karon ang mga kongregasyon sa mga Saksi ni Jehova makadawat usab sa mga kaayohan sa nagalakbayng mga magtatan-aw. Kining mga tawhana may daghang katuigang eksperyensiya sa mga kalihokan sa pagsangyaw sa mga Saksi ni Jehova ug ingong mga magtatan-aw. Ilang gipahigawas ang ilang kaugalingon sa sekular nga trabaho ug mga responsabilidad sa pamilya aron ilang ikahalad ang ilang kaugalingon sa bug-os panahong ministeryo. Alang niadtong mga minyo, ang mga asawa nakigbahin usab sa ministeryo sa bug-os panahon uban sa ilang mga bana.

Ang magtatan-aw sa sirkito itudlo sa pag-atiman sa sirkito nga may mga 18 ngadto sa 25 ka kongregasyon. Iyang duawon ang kada kongregasyon sa sirkito mga duha ka beses sa usa ka tuig ug tapos sa duha o tulo ka tuig ibalhin ngadto sa laing sirkito. Niining paagiha ang mga kongregasyon makapahimulos sa nagkadaiyang eksperyensiya ug mga katakos sa nagkalainlaing mga magtatan-aw sa sirkito.

Susihon sa magtatan-aw sa sirkito ang espirituwal nga kahimtang sa kongregasyon ug sa kalihokan niini. Mohatag siya ug daghang pakigpulong sa kongregasyon ug makigtigom usab sa mga ansiano ug sa ministeryal nga mga alagad sa pagtagad kon unsaon nila sa pagpauswag sa ilang pag-alagad sa kongregasyon.

Sa panahon sa semana siya ug ang iyang asawa, kon siya minyo, mokuyog sa lokal nga mga Saksi, sa pagtabang kanila sa pagpauswag sa ilang balay ug balay nga ministeryo. Siya ug ang iyang asawa moduaw usab sa bag-ong interesadong mga tawo sa pagdasig kanila sa ilang pagtuo. Makahangyo kamo niana nga pagduaw.

Ang distritong magtatan-aw may samang espirituwal nga mga kuwalipikasyon ug kasinatian. Molakbay siya gikan sa usa ka sirkito ngadto sa lain, mag-alagad matag semana may kalabotan sa mga sirkitong  asembliya. Siya ug ang iyang asawa mogula usab sa pag-alagad sa kanataran uban sa mga Saksi sa usa sa mga kongregasyon sa sirkito nga iyang duawon. Siya ang modumala sa kataposang pagpangandam sa programa sa sirkitong asembliya ug mohatag daghang pakigpulong sa asembliya, lakip sa pakigpulong publiko.

Kon makatapos na ang nagalakbayng mga magtatan-aw sa ilang pagduaw sa kongregasyon kun sirkito, sila mopadayon sa laing pagduaw, sundon ang samang iskedyol, hangtod ang tanang mga kongregasyon o mga sirkito maduaw sa mga unom ka bulan; dayon magsugod na usab sila.

Diha sa daghang nasod ang nagalakbayng mga magtatan-aw mobiyahe pinaagig awto o publikong sakyanan. Sa ubang mga nasod bisikleta ang ilang gamiton o kaha magbaktas. Bayran sa Sosyedad ang gasto sa plete sa nagalakbayng magtatan-aw ug hatagan usab siya ug ang iyang asawa ug igoigong pasig-uling salapi alang sa ilang personal nga mga panginahanglan. Sa kasagaran ang nagalakbayng magtatan-aw ug ang iyang asawa tagan-an ug abtanan ug pagkaon sa mga sakop sa tagsatagsa ka kongregasyon.

Kining pag-alagara nagkinahanglag espiritu sa pagsakripisyo sa kaugalingon. Ang nagalakbayng mga magtatan-aw ug ang ilang mga asawa determinado sa paghatag sa ilang pag-alagad sa mga kongregasyon nga dili magpabug-at kanila.​—1 Tesalonica 2:​9.

● Unsay katuyoan sa nagalakbayng mga magtatan-aw sa Kristohanong kongregasyon sa unang siglo?

● Sa unsang paagi ang nagalakbayng mga magtatan-aw nahimong kuwalipikado ug magamit alang niini nga ministeryo?

● Ipatin-aw ang pag-alagad sa sirkito ug distritong mga magtatan-aw ug ang ilang paagi sa pagkinabuhi.

[Hulagway sa panid 20]

Magtatan-aw sa distrito nga nagpakigpulong sa sirkitong asembliya

[Mga hulagway sa panid 21]

Ang mga magtatan-aw sa sirkito mohatag instruksiyon sa pagsangyaw sa balay ug balay, makigsulti sa mga ansiano sa kongregasyon, moduaw sa pagtuon sa Bibliya uban sa bag-ong mga interesado, mohatag mga pakigpulong sa kongregasyon