Pagbantay sa Panon sa Diyos Diha sa Panaghiusa

Ang uban nangutana: ‘Sa unsang paagi gidumala ang tibuok kalibotang kongregasyon sa mga Saksi ni Jehova?’ Kami motubag: Ang kahikayan sa kongregasyon nagsunod sa sumbanan sa Kristohanong kongregasyon sa unang siglo.

Sa katuigan sa 1870 si Charles T. Russell ug ang iyang mga kauban nanguna sa pagpakaylap sa mga resulta sa ilang mga pagtuon sa Bibliya pinaagi sa mga pakigpulong ug sa pinatik nga basahon. Sa tibuok nasod, kadtong mipili sa pakig-uban niining buluhatona naglantaw kang Russell ug sa iyang mga kauban ingong lawas sa mga lalaki nga labing eksperyensiyado sa pagbuhat sa buluhaton sa Ginoo ug nga ilang kadangpan sa pagpangayog tambag mahitungod sa ilang mga kalihokan.

Sa 1884 ang Zion’s Watch Tower Tract Society gihimong korporasyon ubos sa kabalaoran sa Commonwealth of Pennsylvania. Si Russell ug ang iyang may kaakohang mga kauban suod nga nalangkit sa pagdumala niini nga Sosyedad maingon man sa mga kalihokan sa mga Estudyante sa Bibliya. Sa 1909 ilang gibalhin ang ilang mga hedkuwarter sa Brooklyn, New York. Latas sa katuigan ang mga direktor sa Watch Tower Society ug ang ubang suod nga kauban, nga kuwalipikado sa espirituwal, dinihogang mga lalaki nagaalagad ingong nagamandong lawas sa mga Saksi ni Jehova.

Ang Nagamandong Lawas gilangkoban sa usa ka grupo sa dinihogang Kristohanong mga lalaki (13 sa 1986), lakip sa 7 nga nag-alagad ingong hunta direktiba sa Watch Tower Society. Kini sila ang nagadumala sa tibuok kalibotang mga kalihokan sa mga Saksi ni Jehova. Dili sila dinasig sa Diyos ug busa dili kay dili-masayop, kondili nagsalig sila sa dili-masayop nga Pulong sa Diyos ingong labing hataas nga awtoridad sa yuta, ug may bug-os kinabuhing kasinatian sa pagpasakop sa kabubut-on sa Diyos. Ang matag usa adunay rekord nga kapin sa 40 ka tuig sa bug-os panahong ministeryo uban sa mga Saksi ni Jehova.

Ang Nagamandong Lawas ang nagadumala sa ginapatik sa Sosyedad. Gipasukad ang mga sinulat sa pagbantay sa espirituwal nga panginahanglan sa panon ug sa resulta sa mainampoon ug ganid nga pagtuon ug pagtuki sa Pulong sa Diyos. Kining mga tawhana nagpadayon sa pagtuon sa Bibliya ug sa pagpaniid sa anam-anam  nga katumanan sa mga katuyoan sa Diyos, sa katumanan sa tagna sa mga hitabo sa kalibotan, ug sa kahimtang sa katawhan sa Diyos sa kalibotan, may mga panahon nga ilang nakitang kinahanglanon ang nadan-agang mga pagpasibo sa pagsabot sa pila ka pagtulon-an. Niining paagiha, ang kahibalo sa kamatuoran nahimong mas malamboon pa.—Salmo 97:11; Proverbio 4:18; Daniel 12:4.

Ang Nagamandong Lawas nagatudlo ug Komiti sa Sanga sa tulo kun upat ka kuwalipikado sa espirituwal nga mga lalaki sa matag usa sa kapin sa 90 ka sanga sa tibuok yuta sa pagdumala sa mga kalihokan sa kapin sa 200 ka yuta ug sa kaislahan. Ang mga sanga nakigkomunikar sa mga kongregasyon nga ilalom sa ilang pagdumala. Adunay regular nga komunikasyon tali sa Nagamandong Lawas ug sa mga Komiti sa Sanga, ug sa mga membro sa Nagamandong Lawas nga personal nga nagaduaw sa daghang mga sanga sa usa ka tuig aron mahibalo sa mga kahimtang.

Kining mga lalakiha dili mga agalon sa pagtuo sa uban kondili mga ministro nga nagapangabudlay aron daghan pa ang makakat-on sa Pulong sa Diyos. Wala sila mag-alagad alang sa pinansiyal nga ganansiya, apan sila gitagan-an sa ilang materyal nga mga panginahanglan sama sa tanang mga membro sa pamilyang Bethel. Pamatuod nga sila nag-alagad nga matinumanon makita sa kadasig, panaghiusa, hataas nga sukdanan sa moral, ug pagkamaunongon sa mga pagtulon-an sa Bibliya nga gipakita sa mga Saksi ni Jehova sa tibuok kalibotan.​—1 Corinto 3: 5-9; 4:​1, 2; 2 Corinto 1:24; 3:1-3; 1 Pedro 5:2, 3.

● Unsay mitunghang kahikayan sa pagdumala?

● Kinsa ang nag-alagad sa Nagamandong Lawas karon, ug unsa ang ilang mga responsabilidad?

● Sa unsang paagi ang buluhaton gidumala sa ubang kayutaan?

[Mapa sa panid 26]

(Alang sa aktuwal nga pagkahan-ay, tan-awa ang publikasyon)

Mga dapit nga nagahimo ang mga Saksi ni Jehova sa kabubut-on sa Diyos

[Mga hulagway sa panid 26]

Nangaging mga presidente sa Watch Tower Society

C. T. Russell, 1884-1916

J. F. Rutherford, 1916-1942

N. H. Knorr, 1942-1977

F. W. Franz, 1977-1992

[Mga hulagway sa panid 27]

Ang pila sa kapin sa 90 ka sangang opisina nga niini gidumala ang mga kalihokan sa mga Saksi ni Jehova sa tibuok kalibotan

Canada

Zambia

Alemanya

Japan

Australia

Brazil