Paggamag mga Literatura sa Bibliya sa Pagdayeg sa Diyos

Ilado ang mga Saksi ni Jehova sa ilang pagsangyaw sa Gingharian sa Diyos pinaagi sa pinatik nga panid. Sukad sa 1920 ang Watch Tower Society migamit ug boluntaryong mga trabahante taliwala sa mga Saksi sa paggamag mga magasin ug mga libro aron ipanagtag. Kini gihimo aron seguradong mapadayon ang paggamag literatura sa labing kubos nga bili.

Sulod sa 60 ka tuig, ang Sosyedad nakahimo ug nakapauswag sa paggamag literatura sa Bibliya, una sa Brooklyn ug dayon sa ubang mga nasod. Ang tanang trabaho gihimo sa nagkadaghang pundok sa mga boluntaryo.

Sa naghinapos nga katuigan sa 1970 ang karaang mga paagi sa pagproseso ug pagprintag teksto giilisdan sa paagi sa kompiyoter, phototypesetting, ug offset printing. Ang problema dinhi mao nga ang mabatonang komersiyal nga gamit makaproseso lamag limitadong gidaghanon sa mga pinulongan. Apan, ang Sosyedad tiggama na ug literatura nga duolan sa 160 ka pinulongan, ug nagkinahanglan ug dugang pa.

Busa, gipatawag ang mga boluntaryo sa paghimo ug multilanguage electronic phototypesetting system. Maayo ang mga resulta. Ang gikinahanglang teknikal nga kauswagan nakab-ot, ug ang text-entry, komposisyon, ug phototypesetting system, nga gitawag MEPS, nahimo. Kini makaproseso ug duolan sa 200 ka pinulongan. Daghan pa ang ikadugang.

Karon ang kasangkapan alang sa MEPS text entry ug sa graphics, nga gihimo sa mga Saksi ni Jehova, gigamit sa 25 ka nasod, ug daghan pa ang giplanong idugang. Ang mga boluntaryong trabahante niining mga nasora gibansay sa pagpaandar ug sa pagmentenar sa kasangkapan. Ang Sosyedad nakagama karon ug kapin sa 100 ka pinulongan sa 36 ka nasod, ug gigama usab sa 5 niining nasora ang mga libro ug mga Bibliya.

Sa pagtrabaho niini nagkinahanglan kinig mga tawo​—mga magsusulat, mga maghuhubad, proofreaders, tigprinta, bookbinders, ug mga trabahante sa shipping. Ang uban maoy moatiman sa mga sulat sa mga kongregasyon. Ang uban  mag-uma, manghinlo, manglaba, ug uban pa. Kining tanan giatiman sa mga boluntaryong mga trabahante nga nagtanyag sa ilang kaugalingon sa nagkalainlaing mga nasod. Sa tibuok kalibotan sa 1985, dihay 8,438 ka boluntaryong mga trabahante nga nag-alagad sa nagkalainlaing opisina, pabrika, puy-anan, ug kaumahan.

Kinsa kining mga tawhana? Sila maoy mga lalaki ug mga babaye, dili-minyo ug minyo, batan-on ug tigulang, tanan dedikadong mga Saksi ni Jehova. Ang uban nagtrabaho na niining buluhatona sa 40, 50, ug 60 pa gani ka tuig. Mogugol sila sa aberids ug labing menos 44 ka oras sa usa ka semana sa ilang trabaho, uban sa ekstrang panahon kon gikinahanglan. Ang mga gabii ug hinapos sa semana igugol sa pagsangyaw sa maayong balita sa balay ug balay, ug sa ubang mga kalihokan sa kongregasyon.

Sa tibuok yuta gitagan-an kining mga trabahantea ug kasarangang puy-anan sa usa sa mga tinukod sa Sosyedad, nga gitawag Puy-anang Bethel. Dugang pa makadawat sila ug igoigong pasig-uling salapi aron may magasto sa mga pletehan sa ilang mga ministeryo ug sa ilang personal nga mga panginahanglan.

Sukad sa 1920, kining boluntaryong mga trabahante nakagamag kapin sa nuybe ka bilyong mga Bibliya, mga libro, mga magasin, ug mga pulyeto sa mga 200 ka pinulongan alang sa tibuok-yutang pagpanagtag. Ilang gihimo ang ilang bahin aron ang walay kataposang maayong balita ikawali ingong makapalipayng mga balita sa tanang nasod ug tribo ug pinulongan ug katawhan.​—Pinadayag 14:​6, 7.

● Unsang pagpalakaw sa pagprinta ang nabatonan sa Sosyedad, ug ngano?

● Kinsa ang nagtrabaho niining tanan, ug sa unsang paagi sila nagkinabuhi?

[Mga hulagway sa panid 24]

Mga boluntaryo nga nagtrabaho may labot sa paggamag literatura sa Bibliya sa pabrika, sa puy-anan, opisina, ug sa uma, sa Brooklyn ug sa Wallkill, New York, U.S.A.

[Mga hulagway sa panid 25]

Mga boluntaryo nga nagtrabaho sa nagkalainlaing mga buluhaton sa direkta o sa dili-direkta sa paggamag mga Bibliya ug literatura sa Bibliya

Espanya

Alemanya

Finland

Canada

Denmark

Sweden

Habagatang Aprika

Brazil

Netherlands

Australia