Pagmaya ug Pagdayeg sa Diyos sa mga Asembliya

Sukad sa sayong katuigan sa 1880 nakita sa mga Estudyante sa Bibliya nga, gawas pa sa lokal nga mga tigom, maayong masinati pa silag dugang sa ilang isigkamagtutuo sa ubang mga dapit. Busa misugod sila sa paghikay ug tinuig nga mga kombensiyon sa mga Estudyante sa Bibliya sa bug-os nga Tinipong Bansa, ug sa ulahi sa Canada usab. Kini maoy mga panahon sa espirituwal nga pagpalagsik; sa daghang adlaw ang matukiong instruksiyon sa Bibliya gitagana, ug ang tanan nakapahimulos sa makalilipayng pagbayloay sa pagdasig. Ang pagbawtismo sa bag-ong mga magtutuo nahimong regular nga bahin sa mga kombensiyon. Ang mga kombensiyon gigamit usab sa paghatag ug mas kaylap nga pagsangyaw sa publiko.—Roma 1:​11, 12.

Karon gitagamtam sa mga Saksi ni Jehova ang regular nga mga asembliya. Sagad mga 18 ngadto sa 25 ka kongregasyon hugpongon sa gitawag nga mga sirkito, nga duawon, o alagaran, sa nagalakbayng mga magtatan-aw. Makaduha sa usa ka tuig, hikayon ang mga asembliya diin ang mga kongregasyon sa usa ka sirkito, o bahin nianang sirkitoha, magtigom sa Sabado ug/o Domingo.

Kausa sa usa ka tuig, mas dako nga tulo o upat ka adlawng mga kombensiyon, nga gitawag distritong mga kombensiyon, hikayon sa matag nasod, diin libolibo ang hugpongon sa usa ka dapit. Kining mga kombensiyona nagataganag espirituwal nga pagpalig-on sa mga Saksi ni Jehova ug sa uban nga interesado sa ilang mga kalihokan, ug mosangyaw usab sila sa publiko.

Ang programa niining mga asembliya ug mga kombensiyon ginahikay sa Nagamandong Lawas sa mga Saksi ni Jehova ug gibase sa mga panginahanglan sa mga Saksi sa tibuok kalibotan. Gilangkoban kini sa mga pakigpulong, mga diskusyon, ug tinuod sa kinabuhing mga pasundayag nga gitawag mga demonstrasyon, nga ipresentar sa nagalakbayng mga magtatan-aw ug kuwalipikadong mga Saksi gikan sa mga kongregasyon. Mohatag usab ang uban ug mga eksperyensiya kon sa unsang paagi ilang giatubang ang hagit sa pagkinabuhi ingong mga Kristohanon sa dili-diyosnong kalibotan o sa resulta nga nahimo sa ilang ministeryo. Diha sa distritong mga kombensiyon adunay dugang nga bahin​—buhi nga mga presentasyon sa porma sa mga drama sa Bibliya o mga drama nga may modernong mga esena, nga nagalarawan kon sa unsang paagi mabuntog sa mga Kristohanon ang mga problema nga ilang giatubang karon.

May hinikayng mga pagkaon ug mga painit nga gitagana. Naghatag kini ug makalilipayng pag-ubanay sa panahong walay sesyon. Ang tanang trabahong nalangkit sa pagpalakaw niini ginahimo sa mga boluntaryo taliwala sa mga Saksi ni Jehova. Ang gastos sa mga pasilidad ug sa uban pa gikobrehan sa boluntaryong mga amot. Walay bayad ang pagsulod, ug walay koleksiyong himoon.

Imong mahibaloan gikan sa lokal nga kongregasyon sa mga Saksi ni Jehova kon diin ug asa kining mga tigoma giiskedyol sa imong dapit. Ihatag usab ang impormasyon bahin sa kahikayan sa pagbiyahe, maingon man kon unsaon sa pagbaton ug mga abtanan.

Kining mga asembliyaha ug mga kombensiyona makatabang sa mga Saksi ni Jehova ug sa tanang nakig-uban kanila sa pagtan-aw sa gawas sa ilang lokal nga kongregasyon ug sa pagpabili sa tibuok nga pag-ubanay sa ilang mga igsoon sa kalibotan.​—1 Pedro 2:​17.

● Unsang mga kaayohan ang nabatonan sa sayong mga Estudyante sa Bibliya sa ilang mga kombensiyon?

● Ipatin-aw ang kahikayan ug programa sa sirkitong mga asembliya ug distritong mga kombensiyon.

 [Mga hulagway sa panid 18]

Drama sa Bibliya sa distritong kombensiyon, Tinipong Bansa

Internasyonal nga kombensiyon, Polandiya

Internasyonal nga kombensiyon, Argentina

Sirkitong asembliya, Japan

Mga delegado nanguhag literatura sa Bibliya, Switzerland

Bawtismo sa internasyonal nga kombensiyon, South Africa

Nagluwat ug bag-ong publikasyon sa Bibliya, Canada

Mga delegado sa kombensiyon miduyog sa pag-awit, Espanya