GILUWATAN sa National Institute of Mental Health sa T.B. ang mga resulta sa usa ka surbi sa mga ginikanang giisip nga malamposon​—kadtong kansang mga anak, nga kapin sa 21 anyos ang edad, “tanan mabungahong mga hamtong nga dayag nakapasibo ug maayo sa atong katilingban.” Kining maong mga ginikanan gipangutana: ‘Pinasikad sa inyong personal nga kasinatian, unsay mahatag ninyong labing maayong tambag sa ubang mga ginikanan?’  Ang labing subsob nga mga tubag mao kini: ‘Lumsi sa gugma,’ ‘lig-ona ang disiplina,’ ‘gugoli ug panahon,’ ‘tudloi ang imong mga anak sa kalainan sa husto ug sayop,’ ‘ugmara ang pagtinahoray,’ ‘paminawi gayod sila,’ ‘giyahi inay sermonan,’ ug ‘magmarealistiko ka.’

Hinunoa, ang mga ginikanan wala mag-inusara sa paningkamot nga makaumol ug maayong-pagkapasibo nga mga batan-on. Ang mga edukador nagadula usab ug yawing papel niini. Usa ka eksperyensiyadong magtatambag sa tunghaan ang nagpahayag: “Ang pangunang katuyoan sa pormal nga edukasyon mao ang pagtabang sa mga ginikanan nga makaumol ug responsableng mga batan-on nga naugmad ug maayo sa pangisip, sa pisikal, ug sa emosyonal.”

Busa pareho ang tumong sa mga ginikanan ug sa mga edukador​—aron makaumol ug mga batan-on nga sa ulahi mahimong hamtong ug timbang nga mga tawo nga malipayon sa kinabuhi ug makapasibo sa ilang kaugalingon diha sa katilingban diin sila nagpuyo.

Hinunoa, ang mga suliran mobangon sa dihang ang mga ginikanan dili makigtambayayong sa mga edukador. Pananglitan, ang pipila ka ginikanan wala gayoy interes sa edukasyon sa ilang mga anak; ang uban nakig-indig sa mga magtutudlo. Sa paghisgot niining maong kahimtang, usa ka Pranses nga basahon ang nag-ingon: “Ang magtutudlo wala na mag-inusara sa paggiya. Ang mga ginikanan, nga sobrang nabalaka sa kalamposan sa ilang mga anak, mosusi sa mga basahon sa tunghaan, mohukom ug manaway sa mga pamaagi sa pagtudlo, ug mapikal dayon sa unang mubo nga grado sa ilang anak.” Ang maong mga aksiyon makapanghilabot sa mga katungod sa mga magtutudlo.

Ang mga Saksi ni Jehova mibati nga ang ilang mga anak mas maalagaran ug maayo kon ang mga ginikanan makigtambayayong sa mga edukador, nga magbatog aktibo, matinabangong interes sa edukasyon sa ilang mga anak. Sila nagtuo nga ang maong kooperasyon ilabinang mahinungdanon tungod kay ang inyong trabaho ingong usa ka edukador mas nagakalisod.

Nagsumbalik-silaw sa katilingban diin sila usa ka bahin, ang mga tunghaan wala mahigawas gikan sa mga suliran sa katilingban sa kinatibuk-an. Ang sosyal nga mga suliran tulin pang nagkadaghan latas sa mga tuig. Sa paghubit sa mga kahimtang sa usa ka tunghaan sa Tinipong Bansa, ang The New York Times nagtaho: “Ang mga estudyante mangatulog sa klase, magbinaharay sila diha sa kargadog-eslogan nga mga pasilyo, ilang tamayon ang maayong mga estudyante. . . . Halos tanang estudyante nagaatubang sa mga suliran sama sa pagbantay sa gagmayng mga bata, pakiglabot sa binilanggong mga ginikanan ug paglingkawas sa away sa mga gang. Sa bisan unsang adlaw, halos ikalimang bahin sa mga estudyante maoy dili presente sa tunghaan.”

Ilabinang makapatugaw mao ang nagatubong internasyonal nga suliran bahin sa  kapintasan sa mga tunghaan. Ang kaniadto panagsang mga sinukmagay gipulihan na sa naandang pinusilay ug dinunggabay. Ordinaryo na kaayo ang mga hinagiban, mas nagakagrabe ang mga atake, ug mas nagakamubo ang pangedaron niadtong madalidalion sa kapintasan.

Sa walay duhaduha, dili tanang nasod ang nag-atubang niining mangiob nga mga kahimtang. Ugaling, daghang edukador sa tibuok kalibotan ang nag-atubang sa kahimtang nga gihisgotan sa Pranses nga senemanang basahon nga Le Point: “Ang magtutudlo wala na tahora; wala na siyay awtoridad.”

Ang maong kawalay-pagtahod sa awtoridad usa ka tinuod nga hulga sa tanang mga bata. Busa naningkamot ang mga Saksi ni Jehova nga isilsil sa ilang mga anak ang pagsugot ug pagtahod sa awtoridad, mga hiyas nga subsob wala diha sa kinabuhi sa tunghaan karon.