TUNGOD sa importansiya nga ilang gibutang sa ilang pinasikad-sa-Bibliya nga edukasyonal nga buluhaton, hayan ang pipila maghunahuna nga sila dili interesado sa sekular nga edukasyon. Apan kana dili tinuod. Aron makatudlo sa uban, ang usa ka magtutudlo kinahanglan una nga makakat-on, ug kini nagkinahanglan ug haom nga pagbansay ug instruksiyon. Busa ingong dugang sa pagpahimulos ug maayo sa sekular nga  pagtungha, ang mga Saksi ni Jehova sulod sa daghang tuig nakabaton ug kaayohan gikan sa lainlaing edukasyonal nga mga programa ug mga tunghaan nga gipalakaw sa Watch Tower Society. Kini nakatabang sa mga Saksi ug sa uban nga mapauswag ang ilang kaugalingon sa pangisip, sa moral, ug sa espirituwal.

Pananglitan, sa daghang nasod ang mga Saksi nakaatubang sa usa ka linaing hagit​—kon unsaon pagtudlo sa mga tawo nga nakabaton ug diyutay o wala gani ing kahigayonan aron makadawat ug hustong edukasyon ug sa ingon dili mahibalong mobasa ug mosulat. Aron matagan-an kining panginahanglana, ang Watch Tower Society nag-organisar ug mga programa sa literasiya.

Pananglitan, sa Nigeria, ang mga Saksi ni Jehova naghimog mga klase sa literasiya sukad pa niadtong 1949. Tungod niini nga mga klase, libolibo sa Nigeria ang nakakat-on sa pagbasa. Gipakita sa usa ka surbi nga kapin sa 90 porsiyento sa mga Saksi ni Jehova sa Nigeria ang makamaong mobasa ug mosulat, kon itandi sa wala pay 50 porsiyento sa populasyon. Sa Mexico, ang mga Saksi ni Jehova naghimog mga klase sa literasiya sukad niadtong 1946. Sa usa lang ka tuig, kapin sa 6,500 ang natudloan sa pagbasa ug pagsulat. Gani kapin sa 100,000 ang makamao nang mobasa ug mosulat. Sa milabay nga mga tuig, ang mga klase sa literasiya giorganisar usab diha sa daghang nasod, sama sa Bolivia, Cameroon, Nepal, ug Zambia. Ang mga Saksi ni Jehova nakahimog kapin sa pito ka milyong kopya sa textbook nga Apply Yourself to Reading and Writing sa kapig 100 ka pinulongan.

Ang maong mga programa sa literasiya subsob nga giila sa edukasyonal nga mga awtoridad diha sa mga yuta nga kini gihimo. Sa Mexico, pananglitan, usa ka alagad sa gobyerno ang nagsulat: “Mapasalamaton ako tungod sa inyong pakigtambayayong, ug sa ngalan sa kagamhanan sa estado akong gipaabot kaninyo ang ilang labing sinserong pahalipay tungod sa inyong bililhon progresibong buluhaton alang sa kaayohan sa katawhan sa pagdala sa kahayag sa kahibalo ngadto sa walay edukasyon. . . . Nanghinaot ako sa kalamposan sa inyong edukasyonal nga buluhaton.”

Tungod kay ilang gihatagan ug dakong importansiya ang ilang binase-sa-Bibliya nga edukasyonal nga buluhaton, ang mga Saksi ni Jehova naningkamot sa pagpauswag sa ilang katakos sa pagsaysay sa mga pagtulon-an sa Bibliya ngadto sa uban. Pananglitan, sa matag usa sa kapig 119,000 ka kongregasyon sa tibuok kalibotan, ang mga estudyante ginabansay sa pagbasa ug pagdiskurso atubangan sa daghan. Bisan ang kinabataan, sa dihang makabasa na sila, makapatala ug makadawat niining maong pagbansay, nga napamatud-ang mapuslanon usab kanila sa ubang mga natad, lakip sa ilang sekular nga pagtungha. Daghang edukador ang mikomento nga ang mga estudyanteng Saksi lagmit nga makapahayag ug maayo sa ilang mga panghunahuna.

Dugang pa, ang matag kongregasyon sa mga Saksi ni Jehova gidasig nga  magbaton diha sa ilang Kingdom Hall, o dapit tigomanan, ug usa ka librarya nga dunay mga tabang sa pagtuon sa Bibliya, mga diksiyonaryo, ug ubang reperensiya. Kining maong librarya mahimong gamiton sa tanang tigtambongan sa mga tigom sa Kingdom Hall. Ang pagbasa mainitong gidasig sulod sa ilang mga kongregasyon, ug ang matag pamilya gidasig usab nga magbaton ug pamilyahanong librarya nga dunay lainlaing publikasyon sa pagtagbaw sa mga panginahanglan sa mga kabataan ug mga hamtong.

Ang Watch Tower Society nagadumala usab ug mga tunghaan alang sa pagbansay sa misyonaryong mga lalaki ug mga babaye,  ingon man mga tunghaan alang sa pagbansay sa mga lalaki nga dunay ministeryal nga mga responsabilidad diha sa lokal nga mga kongregasyon. Kining maong mga tunghaan maoy dugang nga pamatuod nga ang mga Saksi ni Jehova nagahatag ug dakong importansiya sa edukasyon.