DILI katuyoan niining maong brosyur nga hisgotan ang tanang tinuhoan sa mga Saksi ni Jehova. Hinunoa, kami naningkamot nga ipatin-aw ang pipila ka prinsipyo nga gituohan sa mga Saksi ug ipakita sa tin-awng paagi ang matang sa mga impluwensiya sa pamilya nga nagaapektar sa inyong estudyante kon usa o duha ka ginikanan maoy mga Saksi.

Gihatagan ug dakong importansiya sa mga Saksi ni Jehova ang espirituwal nga pagtubo sa ilang mga anak. Ug sila mibating masaligon nga kini makapalambo sa pagtubo sa ilang mga anak sa ubang mga natad. Ang mga tinuhoan nga ilang gidawat ug ang mga prinsipyo nga ilang ginasunod nagahatag ug kahulogan sa ilang mga kinabuhi ug nakatabang kanila sa pagsagubang sa ilang mga suliran matag adlaw. Dugang pa, ang maong mga tinuhoan ug mga prinsipyo angayng magdasig kanila nga maningkamot nga mahimong maikagong mga estudyante ug maayong mga lungsoranon sa tibuok kinabuhi.

Ang mga Saksi naningkamot nga mahimong realistiko bahin sa kinabuhi, busa ilang gihatagan ug dakong importansiya ang edukasyon. Busa, buot nila nga makigtambayayong kaninyo kutob sa ilang mahimo. Sa ilang bahin, diha sa ilang mga balay ug diha sa ilang mga dapit sa pagsimba sa tibuok kalibotan, ilang ipadayon ang pagdasig sa ilang mga anak nga buhaton ang ilang bahin niining mabungahong pagtinabangay.