Kapitulo 12

Ang Kahulogan sa Imong Bawtismo

1, 2. (a) Nganong ang bawtismo sa tubig kinahanglang sa personal magpainteres sa matag usa kanato? (b) Sa mubo, unsaon mo man pagtubag ang mga sukna nga anaa sa parapo 2?

 SA TUIG 29 K.P., si Jesus gilusbog sa tubig didto sa Subang Jordan. Si Jehova mismo nagtan-aw ug mipadayag ug pag-uyon. (Mat. 3:16, 17) Tulo ug tunga ka tuig sa ulahi, human sa iyang pagkabanhaw, si Jesus mihatag ug mga instruksiyon ngadto sa iyang mga tinun-an, nga nag-ingon: “Ang tanang kagahom sa langit ug sa yuta gikahatag kanako. Busa panglakaw kamo ug maghimog mga tinun-an sa katawhan sa tanang kanasoran, nga nagabawtismo kanila.” (Mat. 28:18, 19) Ikaw ba nabawtismohan uyon sa gimando ni Jesus didto? O ikaw ba nagapangandam alang niana?

² Diha sa unsa man nga kahimtang ang matin-aw nga pagsabot sa bawtismo maoy hinungdanon. Ang mga pangutana nga angay sa pagtagad maglakip niini: Ang bawtismo ba sa mga Kristohanon karon adunay samang kahulogan sa iya ni Jesus? Ang tanan ba nga gisulti sa Bibliya bahin sa bawtismo mapadapat alang kanimo? Unsa may nalangkit diha sa pagkinabuhi nga uyon sa kahulogan sa Kristohanong bawtismo sa tubig?

Mga Bawtismo nga Gihimo ni Juan

3. Ngadto kang kinsa nga ang bawtismo ni Juan limitado?

³ Mga unom ka bulan sa wala pa si Jesus bawtismohi, si Juan nga Bautista miadto sa kamingawan sa Judea, nga nagsangyaw: “Paghinulsol kamo, kay ang gingharian sa mga langit haduol na.” (Mat. 3:1, 2) Mga tawo gikan sa tanang dapit nakadungog sa gisulti ni Juan, sa dayag misugid sa ilang mga sala ug gibawtismohan pinaagi kaniya didto sa Jordan. Kadto nga bawtismo maoy alang sa mga Hudiyo.​—Buh. 13:23, 24; Luc. 1:13-16.

4. (a) Nganong sa dinalian ang mga Hudiyo kinahanglang maghinulsol? (b) Unsa ang gikinahanglan kon ugaling malikayan nila ang ‘pagkanabawtismohan sa kalayo’?

 ⁴ Kadtong maong mga Hudiyo dinaliang nanginahanglan ug paghinulsol. Sa tuig 1513 W.K.P. didto sa Bukid Sinai ang ilang katigulangan misulod ug nasodnong tugon uban kang Jehova nga Diyos. Pero wala nila tumana ang ilang mga kaakohan ubos sa maong tugon ug busa gitunglo niana ingong mga makasasala. Ang ilang kahimtang nameligro. “Ang dako ug makalilisang nga adlaw ni Jehova” nga gitagna ni Malaquias nagkaduol na, ug niadtong 70 K.P. kana midangat sa Jerusalem ingong kalit nga kalaglagan. Si Juan nga Bautista, uban sa kasibot sa matuod nga pagsimba nga sama sa kang Elias, gipadala nga una sa maong kalaglagan “aron andamon ang usa ka katawhan alang kang Jehova.” Gikinahanglan nilang maghinulsol sa ilang mga sala batok sa tugon sa Kasugoan ug magmaandam sa kasingkasing ug hunahuna sa pagdawat sa Anak sa Diyos, kinsa gipadala ni Jehova ngadto kanila. (Mal. 4:4-6; Luc. 1:17; Buh. 19:4) Ingon sa gipatin-aw ni Juan, ang Anak sa Diyos magbawtismo pinaagig balaang espiritu (nga ang maong bawtismo unang nasinatian sa matinumanong mga tinun-an sa Pentekostes sa 33 K.P.) ug pinaagig kalayo (nga midangat sa mga di-mahinulsolon sa pagkalaglag sa Jerusalem sa 70 K.P.). (Luc. 3:16) Aron sa personal makalikay sa pagsugamak nianang ‘bawtismo pinaagig kalayo’ kadtong unang-siglong mga Hudiyo kinahanglang mabawtismohan sa tubig diha sa simbolo sa ilang paghinulsol, ug sila kinahanglang mahimong mga tinun-an ni Jesu-Kristo sa mabuksan na ang maong higayon.

5. (a) Sa miadto si Jesus aron mabawtismohan, nganong si Juan nagduhaduha niana? (b) Unsay gisimbolohan sa bawtismo ni Jesus diha sa tubig? (c) Unsa ka matinud-anon si Jesus maylabot sa pagtuman sa kabubut-on sa Diyos alang kaniya?

⁵ Apil niadtong miduol kang Juan aron mabawtismohan mao si Jesus mismo. Pero ngano? Sayod si Juan nga si Jesus walay mga sala nga isugid, ug busa siya miingon: “Ako ang kinahanglang imong bawtismohan, ug ikaw ba hinuon ang mianhi kanako?” Apan ang bawtismo ni Jesus nagsimbolo kadto ug laing butang. Mao nga siya mitubag: “Itugot lang  kini, karon, kay angay kanato ang pagtuman sa tanan nga matarong.” (Mat. 3:13-15) Ang bawtismo ni Jesus dili simbolo sa paghinulsol tungod sa sala; ni gikinahanglan niyang ipahinungod ang iyang kaugalingon ngadto sa Diyos, kay siya membro man sa usa ka nasod nga napahinungod na ngadto kang Jehova. Hinunoa, ang iyang bawtismo, sa pagdangat niya sa Hudiyong pagkahamtong sa 30 anyos ang edad, nagsimbolo sa pagtanyag sa iyang kaugalingon ngadto sa iyang langitnong Amahan aron buhaton ang Iyang dugang nga kabubut-on. Ang kabubut-on sa Diyos alang sa “tawo, si Kristo Jesus,” naglangkit ug buluhaton nga maylabot sa Gingharian, ingon man ang halad sa iyang hingpit tawhanong kinabuhi ingong lukat ug ingong pasukaranan sa bag-ong tugon. (Luc. 8:1; 17:20, 21; Heb. 10:5-10; Mat. 20:28; 26:28; 1 Tim. 2:5, 6) Tiunay gayod ang pagtagad ni Jesus kon unsa ang gisimbolohan sa iyang bawtismo sa tubig. Wala niya tugoti ang iyang kaugalingon nga mapasimang ngadto sa laing mga interes. Hangtod sa kataposan sa iyang yutan-ong kinabuhi siya miunong o milahutay sa pagbuhat sa kabubut-on sa Diyos.​—Juan 4:34.

Bawtismo Ngadto sa Kamatayon

6. Unsang laing bawtismo ang naagian ni Jesus ug sa unsang gidugayon?

⁶ Uyon sa simbolo sa bawtismo ni Jesus sa tubig, siya usab nakaagi ug laing bawtismo. Nahibalo siya nga ang asaynment nga gibutang sa Diyos sa iyang atubangan mohatod ngadto sa kamatayon sa iyang tawhanong kinabuhi ingong usa ka halad pero siya pagabanhawon diha sa espiritu sa ikatulong adlaw. Siya naghisgot niini ingong usa ka bawtismo. Kining maong “bawtismo” nagsugod sa 29 K.P. pero wala makompleto hangtod sa iya na gayong pagkamatay ug pagkabanhaw. Busa sa mga tulo ka tuig human sa iyang paglusbog sa tubig siya sa tukma makaingon: “Ako adunay bawtismo nga kanako igabawtismo, ug hilabihan ang kaguol ko hangtod mamatuman kini!”​—Luc. 12:50.

7. (a) Kinsa pa ang nabawtismohan ngadto sa kamatayon? (b) Kinsa ang naghimo ning maong bawtismo?

⁷ Silang magamando uban ni Kristo didto sa iyang langitnong Gingharian kinahanglan usab nga mabawtismohan  ngadto sa kamatayon. (Mar. 10:37-40; Col. 2:12) Diha sa ilang kamatayon ila nang itugyan ang ilang tawhanong kinabuhi sa walay kataposan, ingon sa gibuhat ni Jesus. Ug sa ilang pagkabanhaw sila moduyog kaniya sa langitnong pagmando. Kini maoy bawtismo nga buhaton, dili pinaagig bisan kinsang tawo, kondili sa Diyos pinaagi sa iyang langitnong Anak.

8. Unsa may kahulogan sa ila usab nga “pagkanabawtismohan ngadto kang Kristo Jesus”?

⁸ Silang bawtismohan ngadto sa kamatayon ni Jesus gikaingon usab nga “pagabawtismohan ngadto kang Kristo Jesus.” Pinaagig balaang espiritu nga gipadala pinaagi ni Kristo sila mahimong mahiusa ngadto kaniya, ang ilang ulo, ingong mga membro sa iyang dinihogan-espiritu nga kongregasyon, ang iyang “lawas.” Tungod kay ang maong espiritu magpaarang kanila sa pagsumbaliksilaw sa labawng personalidad ni Kristo, ikaingon bahin kanila nga silang tanan mahimong “usa ka tawo nga nahiusa uban kang Kristo Jesus.”​—Roma 6:3-5; 1 Cor. 12:13; Gal. 3:27, 28; Buh. 2:32, 33.

Bawtismo sa Tubig sa Kristohanong mga Tinun-an

9. (a) Kanus-a man unang gihimo ang bawtismo sumala sa paagi nga gisugo ni Jesus sa Mateo 28:19? (b) Ginamit ang mga pangutana ug mga teksto nga gitagana niining parapoha, analisaha kon unsa ang gibutyag ni Jesus nga kinahanglang ilhon sa mga kandidato sa bawtismo.

⁹ Ang unang mga tinun-an ni Jesus gibawtismohan sa tubig pinaagi ni Juan ug unya gitultolan ngadto kang Jesus ingong malaomang mga membro sa iyang espirituwal nga pangasaw-onon. (Juan 3:25-30) Ubos sa pagtultol ni Jesus sila usab nagbawtismo man, nga dihay samang kahulogan sa bawtismo ni Juan. (Juan 4:1-3) Sugod sa Pentekostes sa 33 K.P., bisan pa niana, sila misugod sa pagtuman sa sugong magbawtismo “sa ngalan sa Amahan ug sa Anak ug sa balaang espiritu.” (Mat. 28:19) Imong makaplagan nga makaayo kaayo sa pagsubli kon unsa ang kahulogan niana, sumala sa mga kasulatan nga gisitar uban sa mosunod nga mga pangutana:

  Aron mabawtismohan “sa ngalan sa Amahan,” unsa gayod ang pagailhon sa usa ka tawo maylabot sa Amahan? (2 Hari 19:15; Sal. 3:8; 73:28; Isa. 6:3; Roma 15:6; Heb. 12:9; Sant. 1:17)

 Ang bawtismo sa ngalan “sa Anak” nanginahanglan ug pag-ila sa unsa? (Mat. 16:16, 24; Filip. 2:9-11; Heb. 5:9, 10)

 Unsay kinahanglang tuhoan sa usa ka tawo aron mabawtismohan sa ngalan “sa balaang espiritu”? (Luc. 11:13; Juan 14:16, 17; Buh. 1:8; 10:38; Gal. 5:22, 23; 2 Ped. 1:21)

10. (a) Unsa ang gisimbolohan sa Kristohanong bawtismo sa tubig karon? (b) Sa unsang paagi kini lahi gikan sa bawtismo mismo ni Jesus? (c) Sa dihang bawtismohan ang mga tawong takos na sumala sa Kasulatan, sila mahimong unsa?

¹⁰ Ang una nga mga nabawtismohan uyon sa maong mga instruksiyon nga gihatag ni Jesus maoy mga Hudiyo (ug Hudiyonhong mga kinabig), kinsa ingong usa ka nasod napahinungod na ngadto sa Diyos ug gipakitaan niya ug espesyal nga konsiderasyon hangtod sa 36 K.P. Apan, sa dihang gipadangat ang pribilehiyo sa Kristohanong pagkatinun-an ngadto sa mga Samaritano ug sa mga Hentil, sa dili pa bawtismohan sila kinahanglang sa personal maghimog walay ukon-ukon nga pahinungod ngadto kang Jehova sa pag-alagad kaniya ingong mga tinun-an sa iyang Anak. Alang sa tanan, apil ang mga Hudiyo, kini padayong mao ang kahulogan sa Kristohanong bawtismo sa tubig hangtod sa atong adlaw. Kining “usa ka bawtismo” mapadapat ngadto sa tanan kinsa mahimong tinuod nga mga Kristohanon. Busa sila mahimong Kristohanong mga saksi ni Jehova, nga ordinadong mga ministro sa Diyos.​—Efe. 4:5; 2 Cor. 6:3, 4.

11. (a) Ngadto sa unsa nga katakdo ang Kristohanong bawtismo sa tubig, ug sa unsang paagi? (b) Busa gikan sa unsa nga ang usa ka Kristohanon naluwas?

¹¹ Ang maong bawtismo adunay dakong bili sa mga mata sa Diyos. Human hisgoti ang pagtukod ni Noe sa arka nga diha niana siya ug ang iyang pamilya naluwas latas sa Lunop, ang apostol nga si Pedro mipatagad niini. Siya misulat: “Agig katakdo niini usab karon nga nagaluwas kaninyo, nga mao, ang bawtismo, (dili ang pagwagtang sa kahugawan sa unod, kondili pangamuyo ngadto sa Diyos alang sa maayong tanlag,) pinaagi sa pagkabanhaw ni Jesu-Kristo.”  (1 Ped. 3:21) Ang arka maoy makamkam nga ebidensiya nga si Noe nagpahinungod sa iyang kaugalingon sa pagbuhat sa kabubut-on sa Diyos ug niadtong panahona matinumanong nagbuhat sa buluhaton nga gitudlo sa Diyos. Kini mitultol ngadto sa iyang kaluwasan. Diha sa matakdoong paagi, silang nagapahinungod sa ilang kaugalingon ngadto kang Jehova pinasukad sa pagtuo diha sa nabanhawng Kristo, nga magapabawtismo sa pagsimbolo niana ug unya magapadayon sa pagbuhat sa kabubut-on sa Diyos alang sa iyang mga alagad sa atong adlaw ginaluwas gikan sa presenteng daotang kalibotan. (Gal. 1:3, 4) Dili na sila mahauban sa kasagaran sa kalibotan padulong sa kalaglagan. Sila giluwas na gikan niini ug gihatagan ug maayong konsensiya sa Diyos.

Pagtuman sa Atong mga Kaakohan

12. Nganong ang pagkanabawtismohan na sa usa ka tawo dili garantiya mismo sa kaluwasan?

¹² Maoy sayop sa pagkanayon nga basta mabawtismohan na kana mismo usa ka garantiya sa kaluwasan. Aduna lamang kana ing bili kon ang usa ka tawo sa tinuoray nagpahinungod sa iyang kaugalingon ngadto kang Jehova pinaagi ni Jesu-Kristo ug human niana magabuhat sa kabubut-on sa Diyos, nga magmatinumanon hangtod sa kataposan.​—Mat. 24:13.

13. (a) Unsa man ang kabubut-on sa Diyos sa paagi nga gamiton sa bawtismadong mga Kristohanon ang ilang mga kinabuhi? (b) Unsa gayod ka importante ang Kristohanong pagkatinun-an diha sa atong mga kinabuhi?

¹³ Ang kabubut-on sa Diyos alang kang Jesus naglakip sa paagi sa iyang paggamit sa iyang kinabuhi ingong usa ka tawo. Gikinahanglan kanang itugyan sa kamatayon ingong usa ka halad. Sa atong kahimtang ang atong mga lawas kinahanglang itanyag ngadto sa Diyos, aron tumanon ang sakripisyo-kaugalingon nga kinabuhi. Ang mga lawas ta sa bug-os gamiton diha sa pagbuhat sa kabubut-on sa Diyos. (Roma 12:1, 2) Tino nga dili ta kana ginabuhat kon, bisan kon usahay ra, sa tinuyo naggawi kita sa atong kaugalingon sama sa kalibotan nga naglibot kanato o kon ang atong mga kinabuhi gisentro sa hinakog nga mga pangagpas samtang  ang ginahatag ta sa pag-alagad sa Diyos maoy timailhan lamang. (1 Ped. 4:1-3; 1 Juan 2:15-17) Sa nangutana ang usa ka Hudiyo kon unsay iyang kinahanglang buhaton aron mabatonan ang kinabuhing walay kataposan, si Jesus nagpahinumdom kaniya sa importansiya sa pagkinabuhi sa mahinlong kagawian sa kinabuhi, ug unya iyang gipunting ang panginahanglan sa paghimog Kristohanong pagkatinun-an, nga mahimong sumusunod ni Jesus, ang unang butang sa kinabuhi. Dili mahimong ibutang kana nga ikaduha sa materyal nga mga pangagpas.​—Mat. 19:16-21.

14. (a) Adunay unsang kaakohan ang tanang Kristohanon maylabot sa Gingharian? (b) Ingon sa giilustrar sa panid 101, unsa ang pipila sa epektibong mga paagi nga mabuhat kining buluhatona? (c) Kon kita sa tinuoray nagapakig-ambit ning maong buluhaton sa kinasingkasing, kana maghatag ug unsang ebidensiya?

¹⁴ Kinahanglan usab nga hinumdoman nga ang kabubut-on sa Diyos alang kang Jesus naglakip sa hinungdanong buluhaton maylabot sa Gingharian. Si Jesus mismo gidihogan sa pagkahimong Hari. Pero samtang dinhi sa yuta siya usab masibotong saksi bahin sa Gingharian. Aduna kitay susamang buluhaton sa pagpanaksi nga pagabuhaton ug aduna kitay katarongan gayod nga moduyog niana sa kinasingkasing. Sa pagbuhat niana atong ginapasundayag ang atong pagpabili sa pagkamagmamando ni Jehova ug atong gugma sa mga isigkatawo. Ato usab nga ginapakita nga kita nahiusa uban sa atong mga isigkamagsisimba sa tibuok kalibotan, nga ang tanan kanila maoy mga saksi sa Gingharian, diha sa pagpadayon ngadto sa tumong sa kinabuhing walay kataposan diha sa ginsakpan sa maong Gingharian.

Repasong Panaghisgot

● Adunay unsang mga kasamahan ug mga kalainan tali sa bawtismo ni Jesus ug sa bawtismo sa tubig karon?

● Alang kang kinsa ang bawtismo ni Juan? Kinsa ang nabawtismohan ngadto sa kamatayon? Ug kinsa ang “gibawtismohan ngadto kang Kristo Jesus”?

● Unsa ang nalangkit diha sa pagtuman sa mga kaakohan sa Kristohanong bawtismo sa tubig?

[Mga Pangutana sa Pagtuon]

 [Kahon/​Mga hulagway sa panid 101]

Diha sa Unsang mga Paagi nga Ikaw Nagamantala sa Gingharian?

Sa pamalaybalay

Sa pagbalikduaw sa mga interesado

Sa mga pagtuon sa Bibliya sa balay

Sa kadalanan

Ngadto sa mga eskolmet

Ngadto sa mga kaubanan sa trabaho