Kapitulo 4

Ang Usa nga Kaniya ang Tanang Manalagna Nagpamatuod

1. Unsa ang gipakita sa mga kamatuoran bahin sa paglungtad ni Jesus sa wala pa mahimong tawo maylabot sa iyang relasyon kang Jehova?

 NAGHUBIT sa iyang kaugalingong mainit nga pakiglabot kang Jehova, si Jesus miingon: “Ang Amahan nahigugma sa Anak ug ginapakita kaniya ang tanang butang nga iya mismong ginabuhat.” (Juan 5:19, 20) Ang pagkasuod sa maong relasyon nagsugod sa panahon sa iyang pagkalalang, sa dili maihap nga mga milenyo antes sa iyang tawhanong pagkahimugso. Siya bugtong nga Anak sa Diyos, ang bugtong nga gilalang mismo ni Jehova. Ang tanang butang sa langit ug sa yuta gilalang pinaagi sa gimahal kaayong panganay nga Anak. Siya usab nag-alagad ingong Pulong sa Diyos o Tigpamaba, nga pinaagi kaniya ang balaang kabubut-on ginapaabot ngadto sa uban. Kini siya, ang Anak nga ang Diyos sa linain nahimuot, nahimong ang tawo nga si Jesu-Kristo.​—Col. 1:15, 16; Juan 1:14; 12:49, 50.

2. Ngadto sa unsang gidak-on nga ang mga tagna sa Bibliya nagtumong kang Jesus?

² Sa wala pa ang iyang milagrosong pagkahimugso ingong tawo, mga tagkawhaan ka dinasig nga mga tagna bahin kaniya ang gitala. Ingon sa gipamatuod ni apostol Pedro ngadto kang Cornelio, “Ngadto kaniya ang tanang propeta nagpamatuod.” (Buh. 10:43) Sa maong gidak-on ang papel ni Jesus may kalabotan sa putling pagsimba gipasiugda diha sa Bibliya nga ang usa ka manulonda miingon ngadto kang apostol Juan: “Maoy simbaha ang Diyos; kay ang pagpamatuod ngadto kang Jesus mao man ang nagadasig sa pagpanagna.” (Pin. 19:10) Ang maong mga tagna matin-aw nga nagpaila kaniya ug nagpatagad sa  mga bahin sa katuyoan sa Diyos mahitungod kaniya nga sa dulot magpainteres kanato karon.

Kon Unsa ang Gibutyag sa mga Tagna

3. (a) Diha sa tagna sa Genesis 3:14, 15, kinsa ang girepresentahan sa “serpente”? Sa “babaye”? Sa ‘binhi sa serpente’? (b) Ngano ang ‘pagsamad sa serpente diha sa ulo’ magpainteres gayod sa mga alagad ni Jehova?

³ Ang una sa maong mga tagna gibungat didto sa Eden human sa pag-alsa. Kana nalangkob diha sa hukom ni Jehova nga gitumong ngadto sa serpente. Si Jehova miingon: “Ug ibutang ko ang panagkaaway tali kanimo ug sa babaye ug tali sa imong binhi ug sa iyang binhi. Siya magasamad sa imong ulo ug ikaw magasamad sa iyang tikod.” (Gen. 3:14, 15) Unsa man ang kahulogan niana? Nga sa gitakdang panahon sa Diyos ang ubang mga tagna nagpatin-aw ug nagpadako niana. Ingong resulta kita nakaila sa usa nga gitumong niana, ingon nga ang girepresentahan sa serpente, mao si Satanas nga Yawa. “Ang babaye” mao ang kaugalingon langitnong organisasyon ni Jehova, nga ngadto kaniya sama ug usa ka matinumanong asawa. ‘Ang binhi sa serpente’ naglakip sa mga anghel ug mga tawo kinsa nagapadayag ug espiritu sa Yawa, silang nagasupak kang Jehova ug sa iyang katawhan. Tungod sa paagi sa Yawa sa paggamit sa serpente didto sa Eden, masabtan gikan sa maong tagna nga ang ‘pagsamad sa serpente diha sa ulo’ nagpunting sa ultimang kalaglagan ning maong rebeldeng anak sa Diyos kinsa nagpakaulaw kang Jehova ug nagpatunghag dakong kagul-anan ngadto sa katawhan. Pero bahin sa pagkanailhan sa “binhi” nga mao ang magasamad, kini sa dugayng panahon nagpabiling balaang tinago.​—Roma 16:25, 26.

4. Sa unsang paagi ang kaliwatan ni Jesus nakatabang sa pagpaila kaniya ingong sinaad nga Binhi?

⁴ Human sa mga 2,000 ka katuigan sa tawhanong kasaysayan si Jehova mitagana ug dugang mga detalye. Iyang gibutyag nga ang Binhi mopatim-aw diha sa kabanayan ni Abraham. (Gen. 22:15-18) Apan, ang kaliwat nga motultol ngadto sa Binhi magdepende dili ra sa unodnong kagikan  kondili sa pagpili sa Diyos. Bisan pa sa gugma ni Abraham sa iyang anak nga si Ismael, nga gipanganak sa ulipong babayeng si Agar, si Jehova sa laktod miingon: “Pagatukoron ko ang akong pakigsaad uban kang Isaac, nga igaanak ni Sara kanimo.” (Gen. 17:18-21; 21:8-12) Sa ulahi ang maong pakigsaad natino, dili ngadto sa panganay nga anak ni Isaac nga si Esau, kondili ngadto kang Jacob, nga gikan kaniya ang 12 ka tribo sa Israel. (Gen. 28:10-14) Ngadtongadto gibutyag nga ang Binhi matawo sa banay ni Juda, diha sa panimalay ni David.​—Gen. 49:10; 1 Cron. 17:3, 4, 11-14.

5. Bisan sayo sa yutan-ong ministeryo ni Jesus, unsa pa ang nagpamatuod nga siya mao ang Mesiyas?

⁵ Kapin sa 700 ka tuig nga abante pa, ang Bibliya nagngalan sa Betlehem ingong dapit sa tawhanong pagkahimugso sa Binhi pero mibutyag usab nga siya mao ang usa kinsa naglungtad na “gikan sa mga adlaw sa panahong walay katinoan,” sukad sa panahon nga siya gilalang didto sa langit. (Miq. 5:2) Ang panahon sa iyang pagtungha ibabaw sa yuta ingong Dinihogang Usa ni Jehova, ang Mesiyas, gitagna pinaagi ni propetang Daniel. (Dan. 9:24-26) Ug sa gidihogan siya sa balaang espiritu, ang usa ka tingog gikan sa langit nagpaila kaniya. (Mat. 3:16, 17) Busa, human mahimong sumusunod ni Jesus, si Felipe nakasulti uban ang hugot nga pagtuo: “Among gikahibalag siya nga mahitungod kaniya si Moises, diha sa Kasugoan, ug ang mga Propeta nagsulat, si Jesus, ang anak [pinaagig pagsagop] ni Jose, gikan sa Nazaret.”​—Juan 1:45.

6. (a) Human sa kamatayon ni Jesus unsa man ang naamgohan sa iyang mga tinun-an? (b) Kinsa, sa panguna, ang ‘binhi sa babaye,’ ug unsa ang gipasabot sa iyang pagsamad sa ulo sa serpente?

⁶ Human niadto, ang mga sumusunod ni Jesus nakaamgo nga sa tinuoray mga tagkawhaan ka matagnaong mga reperensiya alang kaniya ang gisal-ot sa dinasig nga Kasulatan. Human sa iyang kamatayon ug pagkabanhaw, siya sa personal “misaysay ngadto kanila sa mga butang mahitungod sa iyang kaugalingon diha sa tibuok nga Kasulatan.” (Luc. 24:27) Karon matin-aw na nga si Jesus, nga sa panguna, mao ang ‘binhi sa babaye,’ ang usa nga mosamad  sa ulo sa “serpente” diha sa paagi gayod nga si Satanas sa ultima malaglag na. Pinaagi ni Jesus ang tanang saad sa Diyos ngadto sa katawhan, ang tanang butang nga atong maikagong ginapangandoy, pagatumanon.​—2 Cor. 1:20.

7. Dugang pa sa pagkanailhan sa usa nga gitumong niining mga tagnaa, unsa pa ang makaayo nga pagatagdon?

⁷ Sa unang pagbasa mo sa pipila niining mga tagnaa hayan ikaw misukna, sama gayod sa Etiopianong eunoko, “Kinsa may ipasabot niini sa propeta?” Pero wala motugot ang eunoko nga ihunong na ang maong butang sa dihang nadawat niya ang tubag. Human makapatalinghog ug maayo sa pagpatin-aw nga gibungat ni Felipe, naamgohan sa maong tawo nga ang pagpabili kon sa unsang paagi si Jesus mituman sa maong tagna nanginahanglan ug aksiyon maylabot sa iyang kaugalingon, pinaagig pagpabawtismo niya. (Buh. 8:32-38; Isa. 53:3-9) Kita ba nagasanong nga susama niana? Usahay ang paagi sa pagpresentar sa tagna mao ang dulot nga magpalihok kanato, o ang atong kasingkasing mahimong matandog sa mga konklusiyon nga ginahimo diha sa Bibliya mismo sa dihang ang katumanan ginapatin-aw.

8. Upat ka matagnaong mga sumbanan bahin kang Jesu-Kristo ang gitagad dinhi. Mangatarongan maylabot sa mga pangutana ug mga kasulatan nga gitagana aron ipakita kon sa unsang paagi kining mga tagnaa mag-apektar kanato. Tagsatagsaa lang kini.

⁸ Matikdi ang paagi nga kini nahimo uban sa mosunod nga matagnaong mga tagna ug mga sumbanan mahitungod kang Jesu-Kristo. Ang mga pangutana pagatubagon mo uban sa tabang sa gisitar nga mga teksto.

 (1) Sa unsang paagi ang talaan bahin sa tinguha ni Abraham sa paghalad kang Isaac motabang kanato sa pagpabili sa gibuhat ni Jehova diha sa pagtagana sa halad pinaagi sa iyang Anak? (Juan 3:16; Gen. 22:1-18 [matikdi giunsa si Isaac sa paghubit diha sa bersikulo 2.])

 Mohatag gayod kini kanato ug unsang pagsalig? (Roma 8:32, 38, 39)

 Pero unsa man ang gikinahanglan sa atong bahin? (Gen. 22:18; Juan 3:36)

 (2) Diha sa pagpaila kang Jesus ingong manalagna sama kang Moises, sa unsang mabug-at nga responsabilidad nga  ang Bibliya nagapahinumdom kanato? (Buh. 3:22, 23; Deut. 18:15-19)

 Unsa ang pipila sa mga butang nga gisulti ni Jesus nganhi kanato, ug nganong kini karon angayng panahon? (Mat. 28:18-20; 19:4-9; 18:3-6)

 (3) Sa nagpatin-aw kon unsa ang gilandongan sa pagkasaserdote ni Aaron, sa unsang makadani nga mga hiyas ni Jesus ingong hataas nga saserdote ang ginapatagad sa Bibliya? (Heb. 4:15–5:3; 7:26-28)

 Busa unsa man gayod ang atong pagbati maylabot sa pagduol sa Diyos diha sa pag-ampo pinaagi kang Kristo alang sa panabang sa pagbuntog sa atong mga kahuyangan?

 (4) Tungod sa pagkalabaw sa halad ni Jesus (nga nagpuli sa tanang gihalad ubos sa Moisesnong Kasugoan), nganong kita kinahanglan gayong magmabinantayon nga dili magbatasan sa pagbuhat ug bisan unsa nga atong nasayran nga dili makapahimuot sa Diyos? (Heb. 10:26, 27)

 Kon sa tinuoray atong ginapabilhan ang paglaom sa kinabuhi nga nahimong posible ingong resulta sa halad ni Jesus, unsang mga butang nga kita magmakugihon sa pagbuhat? (Heb. 10:19-25)

Unsaon nga Ikapakita Ta ang Atong Pagtuo Kang Kristo?

9. Nganong walay kaluwasan alang kanato kon wala si Jesu-Kristo?

⁹ Human ikapunting ngadto sa Hudiyong hataas nga hukmanan sa Jerusalem kon sa unsang paagi ang tagna natuman diha kang Jesus, ang apostol nga si Pedro sa kusganon mihinapos: “Walay kaluwasan diha kang bisan kinsa, kay walay lain nga ngalan sa silong sa langit nga gikahatag sa taliwala sa mga tawo nga pinaagi niana kita gayod maluwas.” (Buh. 4:11, 12; Sal. 118:22) Ang tanang kaliwat ni Adan mga makasasala, busa ang ilang kamatayon maoy tungod sa pagkatinunglo sa sala ug walay unsa mang bili nga ikapadapat ingong lukat alang kang bisan kinsa. Pero si Jesus hingpit, ug ang paghatag sa iyang kinabuhi ingong halad adunay haladnong bili. (Sal. 49:6-9; Heb. 2:9) Iyang gitanyag ngadto sa Diyos ang usa ka lukat nga sibo gayod sa bili sa giwala ni Adan alang sa iyang mga  kaliwatan. Sa unsang paagi kini mihatag kanatog kaayohan?​—1 Tim. 2:5, 6.

10. Ipatin-aw ang usa ka paagi nga ang halad ni Jesus mihatag kanatog dakong kaayohan.

¹⁰ Kana nagpahimong posible sa atong pagbaton ug mahinlong tanlag tungod sa kapasayloan sa mga sala​—butang nga labaw kaayo ang nahimo sukad alang sa Israel kay sa mga halad nga mananap ubos sa Moisesnong Kasugoan. (Buh. 13:38, 39; Heb. 9:13, 14) Siyempre, ang pagbaton niini nanginahanglan nga kita magmaminatud-on sa atong kaugalingon ug nga kita magbaton ug dalisay nga pagtuo diha kang Jesu-Kristo. Kita ba sa personal nagapabili sa gidak-on sa atong panginahanglan sa halad ni Kristo? “Kon kita magaingon: ‘Kita walay sala,’ kita nagapahisalaag sa atong kaugalingon ug ang kamatuoran wala kanato. Kon isugid ta ang atong mga sala, siya kasaligan ug matarong aron pasayloon ang atong mga sala ug hinloan kita gikan sa tanang pagkadimatarong.”​—1 Juan 1:8, 9.

11. Ngano ang bawtismo sa tubig hinungdanong bahin sa pagbaton ug maayong tanlag ngadto sa Diyos?

¹¹ Natural, ang pipila moingon nga ilang giila nga sila mga makasasala ug nag-angkon sa pagtuo kang Kristo, kinsa mopakig-ambit pa ganig diyutay sa pagsulti ngadto sa uban sa Gingharian sa Diyos ingon sa gibuhat ni Jesus, apan walay bug-os nga pagtuo diha kang Jesus. Sa unsang paagi? Buweno, ingon sa gipakita sa Bibliya, sa nahimong tinuod nga mga magtutuo ang mga tawo sa unang siglo, giunsa man nila sa pagpasundayag kana sa katilingban? Sila nagpabawtismo. Ngano? Kay misugo man si Jesus nga bawtismohan ang mga tinun-an. (Mat. 28:19, 20; Buh. 8:12; 18:8) Sa dihang ang kasingkasing sa tawo malukmay gayod sa mahigugmaong tagana ni Jehova pinaagi ni Jesu-Kristo, siya dili magduhaduha. Siya mohimog bisan unsang gikinahanglang mga kausaban sa iyang kinabuhi, ipahinungod ang iyang kaugalingon sa Diyos ug simbolohan kini pinaagig pagtuslob sa tubig. Ingon sa gipakita sa Bibliya, maoy pinaagi sa pagpasundayag ug pagtuo niining paagiha nga siya nagahimog ‘hangyo ngadto sa Diyos alang sa usa ka maayong konsensiya.’​—1 Ped. 3:21.

12. Kon kita makaamgo nga nakahimo kitag sala, unsa man gayod ang atong buhaton bahin niana, ug ngano?

 ¹² Bisan human niana, siyempre, ang masalaypong mga kinaiya mopatim-aw man. Nan unsa? “Nagasulat ako kaninyo niining mga butanga aron kamo dili managpakasala,” miingon ang apostol nga si Juan. Busa kinahanglang dili ra palabyon ang sala diha sa atong kaugalingon, kana man dayag sa buhat, sa sinultihan o tinamdan. “Apan, kon may makasala man gayod, kita adunay magtatabang nga mangatubang sa Amahan, si Jesu-Kristo, nga matarong. Ug siya ang usa ka halad pasighiuli alang sa atong mga sala, apan dili alang lamang sa atong mga sala kondili sa mga sala usab sa tibuok kalibotan.” (1 Juan 2:1, 2) Kana ba nagakahulogan nga, bisan kon unsa ang atong buhaton, kon kita moampo sa Diyos, ‘Pasayloa kami sa among mga sala,’ ang tanan maayo na? Dili. Ang yawi sa kapasayloan mao ang tiunay nga paghinulsol. Hayan ang tabang gikinahanglan usab gikan sa mga ansiano sa Kristohanong kongregasyon. Kinahanglang ilhon ta ang pagkadaotan sa nabuhat ug bation ang tim-os nga pagbasol sa nahitabo aron kita makahimog maikagong panlimbasog nga dili na kana mabuhat pag-usab. (Buh. 3:19; Sant. 5:13-16) Kon buhaton ta kini, atong mapaneguro ang tabang ni Jesus. Pinasukad sa atong pagtuo diha sa halad-sala nga bili sa iyang sakripisyo, ang kapasig-ulian ngadto sa pabor ni Jehova mahimong posible, ug kini hinungdanon kon ang atong pagsimba mahimong madawaton ngadto kaniya.

13. (a) Ipatin-aw ang laing paagi nga ang halad ni Jesus mihatag kanatog kaayohan. (b) Ngano ang atong pag-alagad sa Diyos dili magpahimong takos ning maong ganti nga hinagoan? (c) Pero kon kita aduna gayod ing pagtuo, unsa man ang atong pagabuhaton?

¹³ Ang halad ni Jesus nagbukas usab kanato sa kahigayonan alang sa kinabuhing dayon​—didto man sa mga langit alang sa “gamayng panon,” ug ibabaw sa Paraisong yuta alang sa mga benilyon pa sa katawhan. (Luc. 12:32; Pin. 20:11, 12; 21:3, 4) Dili kini ganti nga atong gihagoan. Bisan unsa pa ka dako ang atong mabuhat diha sa pag-alagad kang Jehova, dili ta gayod matukod ang maong merito nga ang Diyos may utang kanato nga kinabuhi. Ang kinabuhing  dayon maoy “gasa nga igahatag sa Diyos . . . pinaagi ni Kristo Jesus nga atong Ginoo.” (Roma 6:23; Efe. 2:8-10) Apan, kon kita adunay pagtuo sa maong gasa ug pagpabili sa paagi nga kana gihimong posible, ato man kining igapadayag. Tungod sa pag-ila sa kahibulongang paagi ni Jehova sa paggamit ni Jesus sa pagtuman sa Iyang kabubut-on ug sa pagkahinungdanon nga kitang tanan magasunod gayod sa mga tikang ni Jesus, atong himoon ang Kristohanong ministeryo nga usa sa labing importanteng mga butang sa atong kinabuhi. Ang atong pagtuo mahimong dayag gikan sa hugot nga pagtuo nga niana atong tug-anan ang uban bahin niining kahibulongang gasa nga iya sa Diyos.​—Itanding Buhat 20:24.

14. Sa unsang paagi ang maong pagtuo diha kang Jesu-Kristo adunay mahiusahong epekto?

¹⁴ Pagkaanindot, mahiusahong epekto ang nakab-ot sa maong pagtuo! Pinaagi niana kita mapasuod kang Jehova, sa iyang Anak ug alang sa usag usa sulod sa Kristohanong kongregasyon. (1 Juan 3:23, 24) Magpahimo kana natong malipayon nga si Jehova sa kalulot mihatag sa iyang Anak sa “ngalan nga labaw sa tanang ngalan [gawas sa ngalan sa Diyos], aron diha sa ngalan ni Jesus ang tanang tuhod mangapiko didto sa langit ug silang dinhi sa yuta ug sa ilalom sa yuta, ug ang tanang dila magasugid sa dayag nga si Jesu-Kristo mao ang Ginoo alang sa himaya sa Diyos ang Amahan.”​—Filip. 2:9-11.

Repasong Panaghisgot

● Sa mitungha ang Mesiyas, nganong ang iyang pagkamao matin-aw ngadto kanilang tinuod nga nagtuo sa Pulong sa Diyos?

● Sa unsa gayong paagi nga ang matagnaong mga sumbanan nga natuman diha kang Jesus, ingon sa gihulagway sa panid 34, mag-apektar kanato?

● Diha sa unsang mga paagi nga ang halad ni Jesus nakahatag na ug kaayohan kanato? Unsaon ta man sa pagpakita sa atong pagpabili niana?

[Mga Pangutana sa Pagtuon]

 [Kahon/​Mga hulagway sa panid 34]

Matagnaong mga Sumbanan Maylabot Kang Jesus—Sa Unsang Paagi Mag-apektar Gayod Kana Kanimo?

Si Abraham mihalad kang Isaac

Si Moises ingong tigpamaba sa Diyos

Si Aaron ingong hataas nga saserdote

Mga halad nga mananap