Bayawa si Jehova Ingon nga ang Matuod nga Diyos
Kapitulo 2
Bayawa si Jehova Ingon nga ang Matuod nga Diyos
1. (a) Kinsa ang matuod nga Diyos? (b) Samtang kita makakat-on bahin kaniya, sa unsang paagi gayod ang atong kaugalingong mga kinabuhi maapektahan?
NGADTO sa mga isigka-Kristohanon ang apostol nga si Pablo misulat nga, bisan tuod adunay daghang ginatawag nga mga diyos, “alang kanato adunay usa lamang ka Diyos ang Amahan . . . ug adunay usa ka Ginoo, si Jesu-Kristo.” (1 Cor. 8:5, 6) Ang “usa ka Diyos” nga gitumong ni Pablo mao si Jehova, ang Maglalalang sa tanang butang. (Deut. 6:4; Pin. 4:11) Ang mapabilhong mga tawo kinsa makakat-on sa iyang mga hiyas ug sa mga butang nga iyang gibuhat alang sa katawhan makakaplag sa ilang kaugalingon nga mabutad gayod ngadto kaniya. Uban sa unsang resulta? Maoy natural lamang alang kanila nga bayawon Siya nga ilang dulot nga gimahal, nga ginahimo kana pinaagig mga pulong ug mga buhat. Samtang ang ilang gugma sa Diyos magauswag, sila bationg tinukmod sa pagsulti sa uban bahin kaniya, ug kutob sa ilang maarangan ingong mga tawo gusto nilang sundogon siya. Ang Bibliya nagapalig-on kanatong tanan sa pagbuhat niana, nga nag-ingon: “Magmaawaton kamo sa Diyos, ingong mga anak nga pinalangga, ug padayon sa paglakaw diha sa gugma.” (Efe. 5:1, 2) Sa pagpadapat nianang tambaga, gikinahanglan ang pagkaila kang Jehova sumala gayod sa iyang pagkamao.
Ang Matang sa Pagkapersona ni Jehova
2. Unsa ang pipila sa talagsaong mga hiyas sa Diyos nga magpalihok kanato sa pagdayeg kaniya?
2 Sa tibuok nga Bibliya makaplagan ang ubay-ubay diretsong mga pahayag nga nagpaila sa talagsaong mga hiyas sa Diyos. Sa dihang imong mabasa kini, gahini ug panahon sa paghunahuna kon unsa gayod ang kahulogan sa maong mga hiyas ug kon unsa ka importante kini alang kanimo. Pananglitan: “Ang Diyos maoy gugma.” (1 Juan 4:8) “Ang tanan niyang mga dalan maoy hustisya.” (Deut. 32:4) ‘Anaa kaniya ang kaalam.’ (Job 12:13) Siya “kusgan sa kagahom.” (Isa. 40:26) Samtang palandongon mo kining mga hiyasa, ikaw ba dili matandog, tungod sa imong pagmahal sa Diyos, sa pagdayeg kaniya?
3. Unsang ubang mga bahin sa personalidad ni Jehova nga madanihon kaayo?
3 Nga dugang nagapasinati kanato sa iyang madanihong personalidad, ang Bibliya nagtug-an kanato nga si Jehova maoy “usa ka Diyos nga maluloy-on ug mapuangoron, mahinay sa pagkasuko ug dagaya sa mahigugmaong-kalulot ug kamatuoran.” (Ex. 34:6) “Ikaw, O Jehova, maoy maayo ug andam sa pagpasaylo.” (Sal. 86:5) “Ug mahitungod kang Jehova, ang iyang mga mata nagadalagan ngadto-nganhi sa tibuok nga yuta aron ipakita ang iyang kakusganon alang kanilang kansang kasingkasing nabug-os ngadto kaniya.” (2 Cron. 16:9) “Ang Diyos wala ing pinalabi, hinunoa sa matag nasod iyang ginadawat ang tawo nga magakahadlok kaniya ug magabuhat sa pagkamatarong.” (Buh. 10:34, 35) Si Jehova “nagahatag nga madagayaon” ug mao “ang Diyos nga malipayon.” (Sant. 1:5; 1 Tim. 1:11) Pagkamakapahayahay sa pag-alagad ning maong Diyos nga walay ikatandi ug sa pagtagamtam sa iyang mahigugmaong pag-amoma!
4. (a) Si Jehova nanginahanglan ug unsang matang sa debosyon, ug unsa ka importante kana? (b) Diha sa unsa nagadapit kanato ang Salmo 34:3 sa pagpakig-ambit?
4 Nga uyon sa iyang mga hiyas mao ang punto nga siya “usa ka Diyos nga nanginahanglan ug bug-os nga pagkamahinalaron.” (Ex. 20:5) Aron makaalagad kaniya nga madawaton kinahanglan natong ihatag kaniya ang atong bug-os nga debosyon. Dili mahimong higugmaon ta usab ang kalibotan nga si Satanas mao ang diyos. (1 Juan 2:15-17; 2 Cor. 4:3, 4) Makita ni Jehova ang bisan unsang takoban lang nga pagkamatarong. Hibalo siya kaayo dili lang kon unsa ang atong ginabuhat kondili usab ang ginabati bahin niana ug kon unsang matang sa mga tawo nga atong ginatinguha. Kon gihigugma ta gayod ang pagkamatarong, siya motabang kanato. (Jer. 17:10; Prov. 15:9) Tungod sa matang sa pagkapersona ni Jehova, mga menilyon sa katawhan sa tibuok yuta ang malipayong midawat sa pagdapit sa salmista sa Bibliya kinsa misulat: “O padakoon ninyo si Jehova uban kanako, ug usahan ta sa pagbayaw ang iyang ngalan.” (Sal. 34:3) Ikaw ba usa kanila?
5. Unsa ang makatabang kanato sa bug-os nga pagbenepisyo gikan sa atong pagtuon sa personalidad ni Jehova?
5 Ang imong tinguha sa paghisgot bahin sa Diyos magakalalom, ug ikaw matabangan ug dako sa imong mga panikaysikay sa pagsundog kaniya kon susihon mo pag-ayo ang iyang talagsaong mga hiyas. Susiha (1) kon unsa gayod ang kada hiyas, kon unsa kaha ang nagapalahi niana gikan sa ubang mga hiyas, (2) kon giunsa ni Jehova sa pagpasundayag kana ug ngadto kang kinsa, usab (3) kon sa unsang paagi ikapadayag mo kana o kon unsa gayod ang epekto niana sa imong panghunahuna.
6. Ginamit ang gugma ingong ehemplo, ipakita kon unsaon mo sa pagsusi sa mga hiyas ni Jehova. Buhata kini pinaagig pagtubag sa mga pangutana nga anaa sa kataposan niining parapoha, nga ilakip ang mga teksto sa imong mga tubag.
6 Tagda dinhi ang usa lang ka ehemplo. Sa miingon ang Bibliya, “Ang Diyos maoy gugma,” unsa man ang kahulogan niana? (1 Juan 4:8) Siyempre, adunay ubay-ubay nga matang sa gugma. Ang Gregong pulong nga gigamit niining tekstoha maoy a·gaʹpe, nga nagpunting sa labing hataas nga porma sa gugma, sama sa gipanig-ingon diha kang Jehova nga Diyos mismo. Ang maong gugma maoy ekspresyon sa kompletong pagkadimahakogon. Sa paghinumdom niana, balaya ang imong mga tubag sa mga pangutana sa ubos, nga nagagamit sa mga teksto nga gisitar.
Giunsa kining hiyasa sa pagpasundayag diha sa mga buhat ni Jehova sa paglalang? (Buh. 14:16, 17)
Unsa ang labing dakong panig-ingnan sa gugma ni Jehova sa katawhan? (Juan 3:16) Tungod ba sa pagkabuotan sa tawo nga gihimo kini ni Jehova? (Roma 5:8)
Sa unsang paagi ang gibuhat ni Jehova pinaagi sa iyang Anak mag-impluwensiya gayod sa paagi sa atong pagkinabuhi? (2 Cor. 5:14, 15, 18, 19)
Diha sa unsang mga paagi nga kita unta ingong mga Kristohanon magpakita nga nahuptan ta ang samang matang sa gugma alang sa mga isigka-Kristohanon? (1 Cor. 13:4-7; 1 Juan 4:10, 11; 3:16-18)
Ngadto kang kinsa pa nga kinahanglang ipakita ta ang gugma, ug sa unsang paagi? (Mat. 5:43-48; 28:19, 20; Gal. 6:10)
7. Diha sa imong personal nga pagtuon, sa unsang paagi makaplagan mo ang susamang materyal maylabot sa ubang mga hiyas ni Jehova?
7 Gusto mo ba usab nga tinoon pa ang pipila sa ubang mga hiyas ni Jehova? Sa pagsugod, diha sa personal nga pagtuon nganong dili sulayan ang “hustisya” ug “kaalam,” unya tingali ang “mahigugmaong-kalulot” ug “kaluoy.” Pinaagig paggamit sa mga indise sa mga basahon sa Watch Tower ug sa konkordansiya sa Bibliya, imong makaplagan ang bahandi sa malamdagon nga materyal.
Tabangi ang Uban sa Pagkakat-on sa Kamatuoran Bahin sa Diyos
8. (a) Unsang mga diyos ang ginasimba sa katawhan sa kalibotan? (b) Kinsa ang nagapaluyo ning tanang kalibog, ug nganong ingon niana ang imong tubag?
8 Diha sa pagsupak sa pagsimba sa matuod nga Diyos, sa tininuod mga menilyon sa ubang mga diyos ang ginasimba sa mga tawo. Sa ikaupat nga siglo, ang Kakristiyanohan misagop sa pagtuo sa usa ka “Trinidad,” nga gitudlo sa mga Babilonyanhon, mga Ehiptohanon, mga Hindu ug mga Budhista nga una pa kanhi. Nga dugang pa niining maong pagtulon-an bahin sa Diyos, dihay gamhanang mga magmamando, talagsaong mga magdudula ug mga mag-aawit kinsa gisimba samag mga diyos. Ang salapi, kaugalingon ug sekso nahimo usab nga mga diyos nga ginahatag ang mainit nga debosyon. Kinsa man ang nagpaluyo niining tanan? “Ang diyos niining sistemaha sa mga butang,” si Satanas nga Yawa. (2 Cor. 4:4; 1 Cor. 10:20) Pinaagig tanang mahunahunaan, malinlangong mga paagi siya nagapanlimbasog sa pagyudyod sa katawhan gikan kang Jehova, o sa labing menos sa pagbahin sa ilang pagkamahinalaron.
9. Unsa ang labing maayong paagi sa pag-abag kang bisan kinsa sa pagkakat-on sa kamatuoran bahin sa Diyos?
9 Unsaon ta man sa pag-abag sa maong mga tawo, sila man nagaangkong mga Kristohanon o uban pa, aron makaila sa kamatuoran bahin sa Diyos? Ang usa sa labing maayong mga paagi mao ang pagpakita kanila diha sa matinabangong paagi kon unsa gayod ang ginaingon mismo sa Bibliya maylabot sa pagkamao sa matuod nga Diyos ug ang matang sa iyang pagkapersona. Unya ato gayong paluyohan kini pinaagig kagawian nga nagasumbaliksilaw sa diyosnong mga hiyas diha sa atong kaugalingong mga kinabuhi.—1 Ped. 2:12.
10. Sa dihang makigsulti ngadto sa usa ka Trinitaryo, nganong dili maalamong maghunahuna nga hibalo na ta kaayo sa iyang ginatuohan?
10 Pero unsa na man kon ang pipila kinsa mga membro sa mga iglesya sa Kakristiyanohan makigbisog kanimo, nga nagaangkon nga ang ilang pagtuo sa “Trinidad” maoy Kasulatanhon? Una sa tanan, amgoha nga, bisan tuod adunay opisyal nga mga pahayag sa doktrinang “Trinidad,” daghang tawo nga nagahupot sa ilang kaugalingong mga ideya. Dapita sila sa pagsulti sa ilang kaugalingon, ug unya abagi sila nga itandi ang ilang gituohan kon unsa ang anaa sa ilang kaugalingong Bibliya. Ngadtongadto, dasiga usab sila nga ikomparar ang opisyal nga pagtulon-an sa iglesya uban sa Pulong sa Diyos.
11. Nga ang lima ka dagkong puntos pagatagdon sa tinagsatagsa lang, gamita ang mga pangutana ug mga teksto nga gitala uban niining parapoha aron mangatarongan bahin sa pagkadi-kasulatanhon sa doktrinang “Trinidad.”
11 Tungod kay nasilsil sa hunahuna ang tinguha sa pagtabang sa sinserong mga tawo, tagda kon unsaon mo sa paggamit ang mga teksto nga gitala sa ubos aron mangatarongan sa mga puntos nga ginabutyag niining maong mga kasulatan:
(1) Ang pipilang mga Trinitaryo nagapasiugda sa ideya nga adunay tulo ka balaang Persona (Amahan, Anak ug Espiritu Santo) pero usa ra ka Diyos.
Apan ang Buhat 2:4, 17 nagbutyag ba nga ang “Espiritu Santo,” o “balaang espiritu,” usa ka persona?
Nganong makatabang nga matikdan kon pila ka persona ang gipasabot sa matag usa sa mosunod nga mga kasulatan? (Juan 17:20-22; Buh. 7:56; Pin. 7:10)
(2) Ang uban nagatuo nga ang tanang membro sa “Trinidad” maoy pareho ug himaya, nga walay labaw o ubos kanila, nga sila tupong maingon man parehong walay kataposan.
Uyon ba niana ang Kasulatan? (Alang sa tubag, tan-awang Juan 14:28; Mateo 24:36; Pinadayag 3:14.)
(3) Ang ubang tawo mopunting sa Juan 1:1 ingong pamatuod sa “Trinidad.” Mangatarongan sila nga ang Gregong teksto dinhi walay di-tinong artikulong (“a”) ug busa ang teksto kinahanglang basahong: “Diyos ang Pulong,” inay kay “usa ka diyos.”
Pero pila man ka persona ang gihisgotan sa Juan 1:1? Tulo? O duha? Sa unsang paagi usab mahasupak ang Juan 1:18 sa “Trinidad” nga doktrina?
Tinuod nga ang Grego wala ing di-tinong artikulo, apan ang daghang linguwahe aduna man niana, ug gigamit kana sa maong mga linguwahe aron sa husto ikapasiugda ang kahulogan. Kon adunay tawo nga mobati nga sayop ang paggamit sa di-tinong artikulo sa dihang hubaron ang Juan 1:1, gusto ba usab niya nga dili gamiton kana diha sa Buhat 28:6 sumala sa King James Version ug uban pa? (Ang laing paagi sa paghubad sa Juan 1:1, ingon sa gipakita sa An American Translation, maoy “ang Pulong balaan,” nga buot ingnon, nabatonan niya ang samang balaang mga hiyas nga iya sa Diyos.)
(4) Mangatarongan usab ang mga Trinitaryo nga sa Genesis 1:1, 26 nga ang Hebreohanong pulong nga gihubad nga “Diyos” maoy El·o·himʹ ug nga kana maoy plural diha sa Hebreohanon ug nagakahulogan gayong “mga Diyos.”
Nganong kana wala magsuportar sa pagtulon-an sa tulo ka balaang Persona diha sa “usa ka Diyos”?
Kon kana nagbutyag pa ug “Trinidad” sa Genesis 1:1, unsa man ang gibutyag niana sa Maghuhukom 16:23, nga migamit ug el·o·himʹ alang sa “diyos,” uban sa Hebreohanong berbo diha sa singular, dili plural?
Ngano ang pormang plural maylabot sa Diyos gigamit niining mga tekstoha diha sa Hebreohanon? Mao kiniy usa ka paagi nga sa Hebreohanon ang ideya sa kahamili o kahalangdon ikapaila. Kon labaw sa usa ka persona ang gipasabot, ang duyog nga mga berbo sa plural usab unta, apan sa pananglitan sa itaas dili man ingon niana.
(5) Tungod sa pasiugda nga gihimo sa mga iglesya bahin kang Jesus (uban sa punto nga ang ngalang Jehova giwala na gikan sa daghang hubad sa Bibliya), ang ubang tawo naghunahuna lang kang Jesus sa dihang hisgotan ang Diyos.
Pero unsang panig-ingnan diha sa pagsimba ang gihatag ni Jesus alang kanato nga pagasundogon? (Luc. 4:8)
12. Nganong haom ang pagtawag ni Jesus sa iyang Amahan ingong “ang bugtong matuod nga Diyos”?
12 Bisan tuod si Jesus gihisgotan diha sa Kasulatan ingong “usa ka diyos,” gani “Gamhanang Diyos,” apan siya nagbayaw sa iyang Amahan, nga nagtumong kaniya ingong “akong Diyos ug inyong Diyos.” (Juan 1:1; 20:17; Isa. 9:6) Siya miuyon kang Moises, kinsa kanhiay miingon: “Si Jehova mao ang matuod nga Diyos; wala nay lain gawas kaniya.” (Deut. 4:35) Si Jehova lahi kaayo sa mga butang nga ginasimba sama sa mga idolo, sa mga tawo nga gipakadiyos ug kang Satanas nga Yawa. Sa pagkalahi niini nga tanan, si Jehova mao, ingon sa pagtawag ni Jesus kaniya, “ang bugtong matuod nga Diyos.”—Juan 17:3.
“Paglakaw Diha sa Ngalan ni Jehova”
13, 14. Unsa ang nalangkit diha sa “pagkaila” ug ‘paglakaw diha’ sa ngalan ni Jehova?
13 Human sa mga tuig sa kalibog bahin sa pagkanailhan sa Diyos, daghang tawo nahinam sa una nilang pagkakaplag sa personal nga ngalan sa Diyos, nga Jehova, diha sa ilang Bibliya. (Ex. 6:3) Pero sila sa dumalayon mabenepisyohan pinaagi lamang niining kahibaloa kon sila ‘magalakaw diha sa ngalan ni Jehova sa walay kataposan.’ (Miq. 4:5) Dako ang nalambigit niini kay sa pagkahibalo lamang sa ngalang Jehova o pag-angkon nga sila maoy mga Saksi ni Jehova.
14 Mahitungod sa pagkahinungdanon sa ngalan sa Diyos, ang Salmo 9:10 nag-ingon: “Kanimo managsalig ang mga nakaila sa imong ngalan, . . . O Jehova.” Unsa man ang nalangkit niana? Nagalangkit kana ug labaw pa kay sa pagkaila sa ngalang Jehova, nga wala sa awtomatiko magkahulogan sa pagsalig diha kang Jehova. Ang “pagkaila” sa ngalan sa Diyos dinhi nagakahulogan sa pagpabili sa matang nga Pagkadiyos ni Jehova, nga nagatahod sa iyang awtoridad, nagasunod sa iyang mga sugo. Sa susamang paagi, ang ‘paglakaw diha sa ngalan ni Jehova’ nagapasabot nga napahinungod ngadto kaniya ug nagarepresentar kaniya ingong usa sa iyang mga magsisimba, nga sa tinuoray nagagamit sa iyang kinabuhi sumala sa kabubut-on sa Diyos. (Luc. 10:27) Ikaw ba nagabuhat niana?
15. Unsa, gawas pa sa pagbati nga katungdanan, ang gikinahanglan kon kita ugaling magaalagad kang Jehova sa walay kataposan?
15 Kon kita magaalagad man kang Jehova sa walay kataposan, kinahanglang ang magtukmod kanato mao kanang labaw pa kay sa pagbati nga katungdanan. Ang apostol nga si Pablo miagda kang Timoteo, kinsa nag-alagad na kang Jehova sa daghang katuigan: “Bansaya ang imong kaugalingon uban ang diyosnong pagkamahinalaron ingon nga imong tumong.” (1 Tim. 4:7) Ang pagkamahinalaron nagasumikad sa kasingkasing; kana mapalihok pinaagig pagpabili alang sa tawo nga ginapunting niana. Ang “diyosnong pagkamahinalaron” maoy dulot nga pagtahod kang Jehova mismo. Nagapadayag kana ug mahigugmaong pagtapot ngadto kaniya tungod sa pagpabili kaniya ug sa iyang mga dalan. Magpahimo kana natong gusto nga ang tanan mobayaw gayod sa iyang ngalan. Kinahanglang atong ugmaron ang “diyosnong pagkamahinalaron” ingong tumong o tinguha sa atong mga kinabuhi kon kita ugaling magalakaw diha sa ngalan ni Jehova, ang matuod nga Diyos, sa walay kataposan.—Sal. 37:4; 2 Ped. 3:11.
Repasong Panaghisgot
● Unsang matang nga pagkapersona si Jehova? Unsaon nga kita mabenepisyohan pinaagig pagbaton ug matin-aw nga pagsabot sa matag usa sa iyang mga hiyas?
● Unsaon ta man sa pagtabang sa ubang mga tawo sa pagkakat-on sa kamatuoran bahin sa Diyos?
● Unsa may nalangkit diha sa “pagkaila” kang Jehova ug sa ‘paglakaw diha sa iyang ngalan’?
[Mga Pangutana sa Pagtuon]
