Kapitulo 1

Kahiusa sa Pagsimba—Unsa Gayod ang Kahulogan Niana Alang Kanimo?

1, 2. (a) Diha sa unsang basihanan nga ang matuod nga pagsimba gipatungha sa atong adlaw? (b) Giunsa sa paghubit sa Bibliya kon unsa ang natuman?

 LIBOT sa globo adunay makatandog nga kalihokan alang sa kahiusa sa pagsimba. Kana nagapahiusa sa katawhan sa tanang kanasoran ug kabanayan ug pinulongan. Ang ilang panaghiusa dili resulta sa bisan unsang pakigkompromiso sa tinuhoan. Dili kana makab-ot pinaagig ilang dili pagsaway sa mga paagi sa kinabuhi nga nahasupak sa Pulong sa Diyos. Nan unsa man ang nakapahinabo niana? Tungod sa katarongan nga ang mga tawo sa tanang kagikan nanagpakaila kang Jehova ingong bugtong matuod nga Diyos ug mahinangpong nagapahiuyon sa ilang mga kinabuhi sa iyang matarong nga mga paagi.​—Itanding Pinadayag 15:3, 4.

² Kini maoy katumanan sa tagna nga gitala sa mga 2,700 ka katuigan kanhi pinaagi ni manalagnang Miqueas. Mahitungod sa “ulahing mga adlaw,” siya misulat: “Daghang mga nasod moadto gayod ug moingon: ‘Umari, kamong katawhan, ug mangadto kita sa bukid ni Jehova ug ngadto sa balay sa Diyos ni Jacob; ug siya magatudlo kanato sa iyang mga dalan, ug kita magalakaw sa iyang mga alagianan.’” (Miq. 4:1, 2) a Imo bang nakita nga kana natuman?

3, 4. (a) Sa unsang paagi tinuod nga ang “mga nasod” nagaliso ngadto kang Jehova? (b) Unsang mga pangutana nga kinahanglang suknaon ang atong kaugalingon?

³ Walay interong “mga nasod” ang nagapresentar sa ilang  kaugalingon didto sa espirituwal nga balay ni Jehova alang sa pagsimba. Pero ang mga indibiduwal nga gikan sa maong mga nasod nagapresentar man. Samtang ilang makat-onan ang mahigugmaong katuyoan ug makadani nga personalidad ni Jehova nga Diyos, ang ilang mga kasingkasing malukmay gayod. Sa pagkamapainubsanon ilang ginatino kon unsa ang gikinahanglan ni Jehova kanila. Ang ilang pag-ampo sama nianang iya kang David, tawo sa pagtuo kinsa miingon: “Tudloi ako sa pagbuhat sa imong kabubut-on, kay ikaw mao ang akong Diyos.”​—Sal. 143:10.

⁴ Nakita mo ba ang imong kaugalingon nga anaa sa taliwala sa dakong panon sa mga magsisimba ni Jehova? Ang imo bang pagsanong sa instruksiyon nga nadawat nagahatag pamatuod nga imo gayong ginaapresyar nga si Jehova ang tinubdan niana? Ngadto sa unsang gidak-on nga ikaw ‘nagalakaw sa iyang alagianan’?

Kon sa Unsang Paagi Kana Nakab-ot

5. (a) Ngadto sa unsang gidak-on nga sa kataposan makab-ot ang kahiusa sa pagsimba? (b) Nganong may pagkadinalian sa pagkahimong magsisimba ni Jehova karon, ug unsaon ta man sa pagtabang sa uban sa pagbuhat niini?

⁵ Ang katuyoan ni Jehova mao nga ang tanang intelihenteng linalang mahiusa diha sa pagsimba​—nga walay masalaag pinaagig kabakakan, nga walay magkarapkarap tungod sa kapakyasan sa pagkaplag sa tinuod nga kahulogan sa kinabuhi. Gipangandoy ta gayod nga moabot ang adlaw sa dihang ang tanang buhi magadayeg sa bugtong matuod nga Diyos! (Sal. 103:19-22) Pero sa dili pa kana mahitabo, kinahanglang hinloan ni Jehova ang iyang kalalangan kanilang nagasalikway sa iyang mahigugmaong pagkahari ug kinsa sa mapugsanon nagadaot sa kinabuhi sa uban. Sa kaluoy siya sa abante nagahatag ug pasidaan kon unsa ang iyang buhaton. Ang katawhan bisan diin aduna man ing higayon sa pagbag-o sa ilang dalan. Busa sa ato mismong kapanahonan kining dinaliang hangyo ginapalanog sa tibuok kalibotan: “Kahadloki ang Diyos ug ihatag kaniya ang himaya, kay ang takna sa paghukom pinaagi kaniya miabot na, ug busa simbaha Siya nga nagbuhat sa langit ug yuta ug dagat ug mga tuboran sa tubig.” (Pin. 14:6, 7) Imo bang  gidawat ang maong pagdapit? Kon gidawat mo, maoy imong pribilehiyo na karon sa pagbuhat uban sa kapunongan ni Jehova aron tabangan ang uban sa pagdawat niana.

6. Human makakat-on sa pasukaranang mga pagtulon-an sa Bibliya, unsang dugang pag-uswag nga maikagong pagahimoon ta?

⁶ Dili maoy katuyoan sa Diyos nga pasudlon ang katawhan sa iyang organisasyon kinsa nagaingon lamang nga sila nagatuo kang Jehova ug nga sila buot mopuyo sa Paraiso pero sa samang panahon nagapadayon sa pagtuman sa ilang kaugalingon hinakog nga intereses. Gusto Niyang ang katawhan makadangat sa “hustong kahibalo sa iyang kabubut-on,” ug kini kinahanglang isumbaliksilaw sa ilang mga kinabuhi. (Col. 1:9, 10) Human makat-oni sa mapabilhong mga tawo ang pasukaranang mga pagtulon-an sa Bibliya, gusto nilang mouswag ngadto sa Kristohanong pagkahamtong. Ang ilang tinguha mao ang suod nga pagkaila kang Jehova, aron padakoon ug palalomon ang ilang pagsabot sa iyang Pulong, ug aron sa mas bug-os ikapadapat kana sa ilang mga kinabuhi. Sila nagatinguha nga mahisama sa ilang langitnong Amahan, nga nagabanaag sa iyang mga hiyas ug nagatamod sa mga butang sama sa iyang pagtagad. Kini magpalihok kanila sa pagpangita ug mga paagi aron kutob sa mahimo makig-ambit sa bug-os diha sa buluhaton nga iyang ginapabuhat ibabaw sa yuta sa atong mga adlaw. Mao ba kana ang imong ginabuhat?​—Efe. 5:1; Heb. 5:12–6:3; 1 Tim. 4:15.

7. Diha sa unsang mga paagi nga ang panaghiusa posible karon, ug giunsa kana sa pagkab-ot?

⁷ Ang Bibliya nagapakita nga kadtong nagaalagad kang Jehova maoy katawhan nga nahiusa. (Efe. 4:1-3) Kining maong panaghiusa nagalungtad na karon, bisan tuod kita nagapuyo sa nabahinbahing kalibotan ug sa gihapon nagapaningkamot tungod sa atong kaugalingong pagkadihingpit. Si Jesus malugotong miampo nga magmausahon ang iyang mga tinun-an, nga tagamtamon ang tinuod nga panaghiusa. Unsa may kahulogan niini? Nga una sa tanan sila kinahanglang adunay maayong relasyon uban kang Jehova ug sa iyang Anak. Nga sila usab mahimong mausahon sa usag usa. (Juan 17:20, 21) Kini karon nakab-ot na samtang  sila nagapadapat sa instruksiyon nga nadawat diha sa “balay” ni Jehova.

Unsang mga Puntos nga Makadugang sa Panaghiusa?

8. (a) Unsa man ang atong ugmaron sa dihang sa personal atong gamiton ang Bibliya sa pagtubag sa mga pangutana nga mag-apektar kanato? (b) Sa pagtubag sa mga pangutana nga gitala sa itaas, analisaha ang mga puntos nga makadugang sa Kristohanong panaghiusa.

⁸ Ang pipila sa yawing mga puntos nga makadugang ning maong panaghiusa ginumerohan sa ubos. Sa tubagon mo ang mga pangutana nga nagasunod niini, palandonga kon sa unsang paagi ang matag usa mag-apektar sa imong kaugalingong relasyon kang Jehova ug uban sa imong mga isigka-Kristohanon. Ang pagpangatarongan niining mga puntoha pinasukad sa mga kasulatan nga gisitar makadugang sa imong pag-ugmad sa iya-Diyos nga katakos sa panghunahuna ug pag-ila, nga maoy mga hiyas nga gikinahanglan natong tanan. (Prov. 5:1, 2; Filip. 1:9-11) Busa tagda kining mga puntoha nga tinagsatagsa:

 (1) Kitang tanan nagasimba kang Jehova ug nagaila sa iyang katungod sa pagbutang ug sukdanan kon unsay maayo ug daotan.

 Unsa man ang pag-isip ni Jehova niana kon sa tinuyo isalindot ta ang iyang tambag maylabot sa butang nga daw gamay lang alang kanato? (Luc. 16:10; itanding Malaquias 1:6-8.)

 Ang uban ba maapektahan kon dili ta kanunay tumanon ang mga sugo ni Jehova? (Ikomparar ang Roma 5:12; Josue 7:20-26; 1 Hari 14:16.)

 (2) Sa bisan unsang dapita kita sa kalibotan, aduna kitay Pulong sa Diyos sa paggiya kanato.

 Sa dihang mohimo kitag mga desisyon, adunay unsang kapeligrohan sa pagbuhat lamang sa atong “gibati” nga matarong? (Jer. 17:9; Prov. 14:12)

 Kon kita wala mahibalo sa tambag nga gihatag sa Bibliya sa usa ka tinong butang, unsa man gayoy atong buhaton? (Prov. 2:3-5)

 (3) Kitang tanan makakuhag kaayohan gikan sa samang programa sa espirituwal nga pagpakaon.

  Nagalungtad ang unsang mga kahimtang taliwala kanilang wala magapabili sa mga kahikayan ni Jehova sa espirituwal nga pagpakaon? (Itanding Isaias 1:3; 9:16; 65:14.)

 (4) Si Jesu-Kristo, ug dili tawo, mao ang atong Pangulo ug pinaagi kaniya nga kita makaduol kang Jehova diha sa pagsimba.

 Aduna bay bisan kinsa kanato nga nakahupot ug balidong rason sa pagtuo nga ingong mga tawo kita labaw sa uban? (Roma 3:23, 24; 12:3; Mat. 23:8-10)

 (5) Bisan diin kita nagapuyo, kita nagatutok sa Gingharian sa Diyos ingong bugtong paglaom sa katawhan.

 Sa unsang paagi kini magpanalipod kanato batok sa mabahinbahinong mga impluwensiya? (Mat. 6:9, 10; Miq. 4:3)

 (6) Balaang espiritu nagapatungha diha sa mga magsisimba ni Jehova sa mga hiyas nga hinungdanon sa Kristohanong panaghiusa.

 Unsaon ta man sa pagbukas sa dalan alang sa espiritu sa Diyos sa pagpatungha ug mga bunga niana diha kanato? (Sal. 1:2; Prov. 22:4; Pin. 3:6; Buh. 5:32)

 Sa unsang paagi ang pagkabaton ta sa mga bunga sa espiritu mag-impluwensiya sa atong relasyon uban kang Jehova? Uban sa atong mga igsoon? (Gal. 5:22, 23)

 (7) Ang tanan kanato adunay kaakohan sa pagsangyaw sa maayong balita sa Gingharian sa Diyos.

 Sa unsang paagi ang atong pagkapuliki sa pakig-ambit niining buluhatona sa pagsangyaw uban sa atong mga isigka-Kristohanon mag-impluwensiya sa atong pagbati maylabot kanila? (Ikomparar ang Colosas 4:7, 11.)

9. Unsa man ang epekto sa dihang ipadapat ta gayod kining mga kamatuorana sa atong mga kinabuhi?

⁹ Ang pag-ila niining mga puntoha maoy usa ka butang. Ang pagkinabuhi uyon niana nanginahanglan ug mas dako pa. Pero kon atong buhaton kana, kita mapasuod ngadto kang Jehova. Ang atong pakig-uban sa kaubanang mga magtutuo mahimong tinubdan usab sa kahayahay. Ingon sa gisulti sa Salmo 133:1: “Tan-awa! Pagkamaayo ug pagkamalipayon gayod sa mga magsoon nga managpuyo sa panaghiusa!” Wala mo ba matagamtam sa personal ang pagkamakapahayahay niana nga mahilayo sa kalibotan, uban sa  tanang kahakog niini, ug maanaa sa mga tigom uban kanilang tinuod nga nahigugma kang Jehova?

Likaye ang Mabahinbahinong mga Impluwensiya

10. Nganong kinahanglang magmabinantayon kita nga likayan ang independeyenteng espiritu?

¹⁰ Aron dili madaot kanang bililhong panaghiusa, kinahanglang likayan ta ang mabahinbahinong mga impluwensiya. Ang usa sa mga kinadak-an niini mao ang espiritu sa independensiya. Si Jehova nagaabag kanato sa paglikay niana pinaagig pagyagyag sa tagmugna niana, si Satanas nga Yawa. Siya mao ang milimbong kang Eva sa paghunahuna nga kadto maoy sa iyang kaayohan sa pagsalikway sa gisulti sa Diyos ug sa paghimo sa iyang kaugalingong mga desisyon. Si Adan miduyog kaniya sa maong maalsahong dalan. Ang resulta mao ang katalagman alang kanila ug kanato. (Gen. 2:16, 17; 3:1-6, 17-19) Kita nagapuyo diha sa kalibotan nga nasunop nianang independeyenteng espiritu, mao nga dili gayod magpakugang kanato kon diha sa atong kaugalingon kinahanglan tang santaon ang maong espiritu. Si Jehova sa mahigugmaon nagatabang kanato sa pagbuhat niana pinaagig talambagan ginamit ang iyang organisasyon.

11. Unsa may magpakita kon kita ba tim-os nga nagapangandam alang sa kinabuhi sa matarong Bag-ong Kahikayan sa Diyos?

¹¹ Pinaagi nianang maong organisasyon atong nakat-onan ang dakong saad ni Jehova nga pulihan kining presenteng kakahimtangan sa bag-ong mga langit ug bag-ong yuta nga niana ang “pagkamatarong magapabilin.” (2 Ped. 3:13) Kita mahinam sa kalaoman nga sa dili madugay kining daotang kalibotan hanawon na ug ang yuta himoon nga Paraiso. Pero ang ato ba mismong paagi sa kinabuhi nagapakita nga kita sa tim-os nagapangandam alang sa kinabuhi diha sa usa ka kalibotan diin ang pagkamatarong mao na gayod ang igapatuman? Ang Bibliya tin-aw nga nagatug-an kanato: “Ayawg higugmaa ni ang kalibotan o ang mga butang sa kalibotan. Kon may si bisan kinsang mahigugma sa kalibotan ang gugma sa Amahan wala diha kaniya.” (1 Juan 2:15) Tinuod nga adunay daghang butang sa kalibotan  nga kitang tanan dili gusto. Apan ato bang giayran lamang ang mga bahin sa kalibotan nga magpadaot sa atong kaugalingong dihadiha nga pagpahimulos sa kinabuhi? O kita ba usab nagalikay sa espiritu niana​—ang independeyenteng tinamdan, ang hinobrang kabalaka niana sa kaugalingon? Kita ba sa dalisay nagabatasan sa pagpaminaw kang Jehova ug sa pagsunod kaniya gikan sa atong kasingkasing, bisan pa sa bisan unsang masupakong mga hilig sa unod? Ang atong bug-os nga pagkinabuhi​—bisan diin kita, unsa man ang atong ginabuhat​—kinahanglang mohatag ug pamatuod nga ang atong panghunahuna ug atong mga motibo maoy iya o gipunting-Diyos.​—Prov. 3:5, 6.

12. (a) Nganong importante nga pahimuslan karon ang higayon sa pagkat-on sa mga paagi ni Jehova ug tumanon kana sa atong mga kinabuhi? (b) Ang mga kasulatan nga gisitar diha sa parapo nagakahulogan ug unsa nganhi kanato sa personal?

¹² Sa dihang moabot na ang tinudlong panahon ni Jehova sa paglaglag ning daotang sistema sa mga butang ug sa tanan nga nahigugma sa mga dalan niini, siya dili maglangan. Dili niya ioktaba ang maong panahon o usbon ang iyang mga sukdanan aron sagopon silang nagasulay pa sa pagpabilin sa kalibotan, silang taphaw lamang mahitungod sa pagkat-on sa kabubut-on sa Diyos ug pagbuhat niana. Karon mao na ang panahon sa aksiyon! (Luc. 13:23, 24; 17:32; 21:34-36) Busa, pagkamakapalipay sa kasingkasing sa pagtan-aw sa “dakong panon” sa mga tawo kinsa nagapahimulos ning maong bililhong higayon, nga maikagong nagatinguha sa instruksiyon nga ginatagana ni Jehova pinaagi sa iyang mahigugmaong kapunongan ug unya mausahong nagalakaw diha sa iyang alagianan!

[Mga footnote]

Repasong Panaghisgot

● Unsa ang katuyoan ni Jehova maylabot sa pagsimba?

● Human makat-oni ang pasukaranang mga pagtulon-an sa Bibliya, unsang dugang pag-uswag nga maikagon gayong atong tinguhaon?

● Unsa man ang mabuhat ta sa tinagsatagsa, aron ang mausahong mga puntos nga atong nahisgotan na mag-impluwensiya gayod sa atong mga kinabuhi?

[Mga Pangutana sa Pagtuon]

 [Tibuok-panid nga hulagway sa panid 4]