Kapitulo 18

Kinahanglang Atong Tumanon ang Diyosnong Pagkamahinalaron sa Panimalay

1. (a) Human makakat-on sa mga sukdanan ni Jehova sa kaminyoon, unsang mga kausaban ang gihimo sa daghang tawo? (b) Pero unsa pa ang nalangkit diha sa Kristohanon pamilyahanong kinabuhi?

 APIL sa makapadasig-kasingkasing nga mga kamatuoran nga atong nakat-onan sulod sa atong unang pagtuon sa Bibliya mao kanang maylabot sa kaminyoon ug pamilyahanong kinabuhi. Kita nakadangat sa pag-ila nga si Jehova mao ang Tagmugna sa kaminyoon ug mitino nga diha sa Bibliya iyang gitagana ang labing maayo nga giya alang sa mga pamilya. Ingong resulta sa maong giya, daghang tawo nga sa dalayegon misalindot sa kinabuhi nga iya sa seksuwal nga imoralidad ug sa husto nagparehistro sa ilang kaminyoon. Pero aduna pa ing mas labaw kay niana alang sa Kristohanon pamilyahanong kinabuhi. Nagalangkit usab kana sa atong tinamdan maylabot sa pagkadumalayon sa panagtiayon, sa pagtuman sa atong mga kaakohan diha sa banay, ug kon unsaon ta sa pagdumala sa ubang mga membro sa pamilya.​—Efe. 5:33–6:4.

2. (a) Ang tanan ba diha sa panimalay nagapadapat sa iyang nahibaloan gikan sa Bibliya? (b) Giunsa ni Jesus ug ni Pablo sa pagpasiugda sa importansiya sa pagbuhat niana?

² Mga menilyon sa mga tawo nasayod sa ginaingon sa Bibliya bahin niining mga butanga. Pero sa dihang masugamak ang mga suliran diha sa ilang kaugalingong panimalay, kana dili nila ipadapat. Komosta na man ang atong kaugalingon? Tino nga walay gusto kanato nga mahisama kanilang gitunglo ni Jesus tungod kay sila milapas sa sugo sa Diyos nga nagbaod sa mga anak sa pagpasidungog sa ilang mga ginikanan pinaagig pagpangatarongan nga ang pagpaaron-ingnon  sa relihiyosong pagkamahinalaron igo na. (Mat. 15:4-9) Dili ta buot nga mahimong mga tawo nga adunay diyosnong pagkamahinalaron apan nagadumili sa pagtuman niana “diha sa iyang kaugalingong panimalay.” Hinunoa, gusto ta gayod nga ipasundayag ang matuod diyosnong pagkamahinalaron, nga maoy “paagi sa dakong ganansiya.”​—1 Tim. 5:4; 6:6; 2 Tim. 3:5.

Sa Unsang Gidugayon Molungtad ang Kaminyoon?

3. (a) Unsa may nagakahitabo sa daghang kaminyoon, pero unsa man gayod ang atong hugot nga tinguha? (b) Gamita ang imong Bibliya sa pagtubag sa mga pangutana nga gitala sa itaas bahin sa pagkadumalayon sa kaminyoon.

³ Tungod sa nag-uswag nga panghitabo, ang mga bugkos sa panagtiayon napamatud-ang gabok kaayo. Ang pipila ka magtiayon nga nag-ipon sa 20, 30 o 40 anyos sa pagkakaron nakahukom sa pagsugod ug “bag-ong kinabuhi” ipon sa lain. Usab dili na talagsaon sa pagkadungog nga ang mga batan-ong magtiayon nagkabulag human lamang sa pipila ka bulan sa kaminyoon. Sa walay pag-isip kon unsa ang ginabuhat sa uban, ingong mga magsisimba ni Jehova kita kinahanglang magbaton ug tinguha sa pagpahimuot sa Diyos. Unsa man ang giingon sa iyang Pulong mahitungod niini?

 Sa maminyo ang lalaki ug babaye, unsang gidugayon nga kinahanglan silang dahomon nga mag-ipon pagpuyo? (Roma 7:2, 3; Mar. 10:6-9)

 Unsa lamang ang bugtong basihanan sa diborsiyo nga balido atubangan sa Diyos? (Mat. 19:3-9; 5:31, 32)

 Unsa ka lig-on ang pagbati ni Jehova bahin sa mga diborsiyo nga wala uyoni sa iyang Pulong? (Mal. 2:13-16)

 Ang Bibliya ba nagapaluyo sa panagbulag ingong paagi sa pagsulbad sa mga gumonhap sa panagtiayon? (1 Cor. 7:10-13)

4. Bisan pa sa modernong hilig, ngano ang pipila sa mga panagtiayon nagamalungtaron?

⁴ Ngano man ang pipila ka panagtiayon nagamalungtaron, samtang ang uban​—bisan taliwala sa nag-angkong mga Kristohanon​—nagakabungkag? Ang paghulat aron maminyo hangtod ang duha ka partido pulos hamtong na sagad maoy katin-awan. Ang pagkaplag ug kapikas nga  pareho ug interes sa usa ug nga siya libreng ikahisgot sa mga butang maoy importante usab. Pero ang mas hinungdanon mao ang iyang pagkatawo kinsa nagatuman sa dalisay diyosnong pagkamahinalaron. Kon ang usa ka tawo tinuod nga nahigugma kang Jehova ug kombensido nga ang Iyang mga paagi maoy husto, nan adunay ugdang nga pasukaranan alang sa pagdumala sa mga suliran nga motungha. (Sal. 119:97, 104; Prov. 22:19) Ang kaminyoon sa maong tawo dili madaot pinaagig tinamdan nga, kon dili mosaler, siya makakuha man dayon ug panagbulag o diborsiyo. Dili niya kompasan o pahimuslan ang mga kalapasan sa iyang kapikas ingong pasumangil sa pag-ayad sa iya mismong mga kaakohan. Hinunoa, siya mokat-on sa pagsagubang sa mga suliran sa kinabuhi ug mangitag mosaler nga mga sulbad.

5. (a) Sa unsang paagi ang pagkamaunongon ngadto kang Jehova nalangkit? (b) Bisan pa kon masugamak ang grabeng kalisdanan, unsang mga benepisyo ang maangkon tungod sa malig-ong pagtapot sa mga sukdanan ni Jehova?

⁵ Kita nahibalo kaayo nga ang Yawa nangatarongan nga sa dihang kita makasugamak ug personal nga pag-antos kita modumili na sa mga paagi ni Jehova ug magkanayon nga mas maayo pang mohukom alang sa atong kaugalingon kon unsa ang maayo ug kon unsa ang daotan. Pero ang mga tawo nga maunongon kang Jehova dili sama niana. (Job 2:4, 5; Prov. 27:11) Ang kadaghanan gayod sa mga Saksi ni Jehova kinsa nakasugamak ug paglutos gikan sa di-magtutuong mga kapikas wala magnulo sa ilang mga panaad sa kaminyoon. (Mat. 5:37) Ang pipila, human sa yugto sa katuigan, nakahupot pa gani ug kangaya sa pagduyog sa ilang mga kapikas diha sa pag-alagad kang Jehova. (1 Cor. 7:16; 1 Ped. 3:1, 2) Maylabot sa uban, kansang mga kapikas walay ilhanan sa kausaban o kansang mga kapikas nagbiya kanila tungod sa ilang pagpabiling malig-on sa ilang pagtuo​—kini usab sila nahibalo nga sila dagayang gipanalanginan tungod sa pagtapot sa mga sukdanan ni Jehova. Sa unsang paagi? Ang ilang mga kahimtang nagtudlo kanila sa mas suod nga pagduol kang Jehova. Sila nakakat-on sa pagsumbaliksilaw sa diyosnong mga hiyas bisan ubos sa kalisdanan. Sila maoy mga tawo kansang mga kinabuhi nagahatag ug  pamatuod sa gahom sa diyosnong pagkamahinalaron.​—Sal. 55:22; Sant. 1:2-4; 2 Ped. 1:5, 6.

Matag Usa Magbuhat sa Iyang Bahin

6. Aron mahuptan ang malamposong kaminyoon, unsang kahikayang kinahanglang tahoron?

⁶ Siyempre, labaw pa kay sa pag-ipon lamang ang gikinahanglan aron mahuptan ang tinuod malamposong kaminyoon. Ang pasukaranang panginahanglan mao ang pagtahod sa bahin sa kada membro sa banay alang sa kahikayan ni Jehova sa pagkaulo. Kini modugang sa kahapsay ug pagbati sa kasegurohan diha sa panimalay.​—1 Cor. 11:3; Tito 2:4, 5; Prov. 1:8, 9; 31:10, 28.

7. Sa unsang paagi gayod ang pagkaulo gamiton diha sa pamilya?

⁷ Unsaon man paggamit ang maong pagkaulo? Diha sa paagi nga magbanaag sa mga hiyas ni Jesu-Kristo. Si Jesus maoy malig-on sa pagbayaw sa mga paagi ni Jehova; iyang gihigugma ang pagkamatarong ug gidumtan ang pagkadaotan. (Heb. 1:8, 9) Dulot usab siyang nahigugma sa kongregasyon, nagtagana sa gikinahanglang pagtultol ug nag-atiman niana. Siya dili hambogero ug dili kay di-matinagdanon kondili, hinunoa, “maaghop ug mapainubsanon sa kasingkasing,” ug silang ilalom sa iyang pagkaulo ‘nakakaplag ug kapahulayan sa ilang mga kalag.’ (Mat. 11:28, 29; Efe. 5:25-33) Sa dihang dumalahon sa usa ka bana ug amahan ang iyang panimalay nianang paagiha, maoy dayag nga siya mismo nagapasakop kang Kristo, kinsa mihatag ug hingpit nga sumbanan diha sa diyosnong pagkamahinalaron. Ang Kristohanong mga inahan, siyempre, kinahanglang magbanaag sa samang mga hiyas diha sa pagdumala sa ilang mga anak.

8. (a) Sa pipila ka panimalay, nganong maorag ang Kristohanong mga paagi wala makakab-ot sa gitinguhang mga resulta? (b) Unsa man gayod ang atong buhaton kon ginaatubang sa maong kahimtang?

⁸ Bisan pa niana, tungod sa tawhanong pagkadihingpit, ang mga problema motungha man. Ang gidak-on sa kapikal maylabot sa pagtultol gikan sa uban hayan nakagamot na diha sa pipila antes ang bisan kinsa diha sa pamilya misugod sa pagpadapat sa mga prinsipyo sa Bibliya. Ang malulot nga mga hangyo ug mahigugmaong paagi basin walay mga  resulta. Sayod man kita nga ang Bibliya nag-ingong isalikway ang “kayugot ug kapungot ug singkahay ug pagtampalas.” (Efe. 4:31) Pero kon ang pipila ka tawo daw dili makasabot sa bisan unsang butang, unsa man gayod ang buhaton? Buweno, giunsa man ni Jesus sa pagsanong sa dihang napailalom sa grabeng kapit-osan? Wala niya sundoga silang nanghulga ug nagpasipala. Hinunoa, iyang gitugyan ang iyang kaugalingon ngadto sa iyang Amahan, nga misalig kaniya. (1 Ped. 2:22, 23) Mao man usab, kon ang masulayong mga kahimtang motungha diha sa panimalay, atong gihatag ang pamatuod sa diyosnong pagkamahinalaron kon kita modangop ngadto kang Jehova, nagaampo sa iyang panabang, inay kay mosagop sa mga paagi sa kalibotan.​—Prov. 3:5-7.

9. Inay kay mangita ra ug sayop, unsang mga paagi nga nakat-onang gigamit sa daghang Kristohanong bana?

⁹ Ang mga kausaban dili kanunay mahitabo gilayon, apan ang tambag sa Bibliya mosaler gayod. Daghang bana kinsa sagad nagreklamo sa hilabihan bahin sa kasaypanan sa ilang mga asawa nakakaplag nga ang kauswagan misugod sa dihang sila mismo nakadangat sa pag-ila nga mas bug-os pa sa mga pagdumala ni Kristo sa iyang kongregasyon. Ang maong kongregasyon wala man langkobi sa hingpit nga mga tawo. Apan si Jesus nahigugma sa kongregasyon, nagpahimutag hustong panig-ingnan alang niana, nga mihatag pa gani sa iyang kinabuhi tungod niana, ug migamit sa Kasulatan ingong paagi sa pagtabang niana nga mouswag aron kana sa bug-os makapahimuot kaniya. (Efe. 5:25-27; 1 Ped. 2:21) Ang iyang panig-ingnan nakapalig-on sa daghan Kristohanong mga bana sa paghago aron makataganag maayong ehemplo ug paghimog mahigugmaon personal nga tabang ngadto sa kauswagan. Ang maong mga paagi mopatunghag mas maayong mga resulta kay sa hilabihang pagpangitag sayop o basta dili na makigsulti.

10. (a) Diha sa unsang mga paagi tingali ang usa ka bana ug amahan​—bisan ang usa nga nagaangkong Kristohanon​—magpahimo sa kinabuhi nga malisod alang sa uban diha sa iyang panimalay? (b) Unsa may sarang mahimo aron mapauswag ang kahimtang?

¹⁰ Natural, mahimong ang kasaypanan sa bana ug amahan mao ang nagpatunghag mga suliran diha sa panimalay. Unsa na man kon siya dili mobati dayon sa emosyonal nga  mga panginahanglan sa iyang pamilya o dili lang gayod manguna pinaagig paghikay sa panaghisgot sa banay sa Bibliya ug ubang mga kalihokan? Ang pipila ka panimalay nakakitag maayong mga resulta human sa prangka, matinahorong mga panaghisgot sa suliran. (Prov. 15:22; 16:23; 31:26) Pero bisan pa kon ang mga resulta dili ang tanan nga gilaoman, ang matag usa makahimog bililhong amot ngadto sa napauswag nga kahimtang sa panimalay pinaagig personal nga pag-ugmad sa mga bunga sa espiritu ug sa pagpakitag mahigugmaong kabalaka ug pagtagad sa ubang mga membro sa pamilya. Ang progreso moabot, dili sa paghulat nga buhaton sa laing tawo ang usa ka butang, kondili sa pagbuhat sa ato mismong bahin nga minaayo, nga sa ingon nagapakita nga kita sa personal nagatuman sa diyosnong pagkamahinalaron sa panimalay.​—Col. 3:18-20, 23, 24.

Kon Hain Mabatoni ang mga Sulbad

11, 12. (a) Unsang mga tagana ang gihimo ni Jehova aron abagan kita bahin sa mga suliran sa pamilyahanong kinabuhi? (b) Aron bug-os makabenepisyo, unsa man ang girekomendar nga atong pagabuhaton?

¹¹ Adunay daghang tinubdan nga ngadto niana midangop ang mga tawo alang sa tambag sa ilang mga kalihokan sa banay. Pero kita nahibalo nga ang Pulong sa Diyos nasudlan sa labing maayong talambagan, ug kita mapasalamaton nga pinaagi sa iyang makitang organisasyon siya nagaabag kanato sa pagpadapat niana. Ikaw ba sa bug-os nakabenepisyo gikan sa maong tabang?​—Sal. 119:129, 130; Miq. 4:2.

¹² Nga dugang pa sa pagtambong sa mga tigom sa kongregasyon, kamo ba adunay regular nga mga panahon nga gigahin sa pagtuon sa Bibliya sa pamilya? Ang mga banay nga nagabuhat niining regular sa matag semana mahimong mausahon diha sa ilang pagsimba. Ang ilang pamilyahanong kinabuhi magmadagayaon samtang ilang hisgotan ang kapadapatan sa Pulong sa Diyos ngadto sa ila mismong mga kahimtang.​—Itanding Deuteronomio 11:18-21.

13. (a) Kon kita adunay mga suliran sa tinong mga butang sa panagtiayon o sa pamilya, diin ta man sagad makaplagi ang gikinahanglang tabang? (b) Unsa man gayod ang igabanaag diha sa tanang desisyon nga atong pagahimoon?

¹³ Tingali adunay mga suliran maylabot sa tinong mga  butang sa panagtiayon o sa pamilya nga nagapabalaka kanimo. Pananglitan, unsa na man ang maylabot sa kontrol sa panganak? Ang sterilization (pagpalanday) ba husto alang sa mga Kristohanon? Gipakamatarong ba ang aborsiyon (paghulog) kon daw lagmit ang bata matawo nga depektoso? Aduna ba ing mga utlanan sa matang sa mga relasyon sa sekso nga husto tali sa bana ug asawa? Kon ang usa ka tin-edyer magpakitag diyutayng interes diha sa espirituwal nga mga butang, ngadto sa unsang gidak-on nga siya kinahanglang pabuhaton aron moambit uban sa pamilya diha sa pagsimba? Sa walay duhaduha ikaw adunay opinyon sa matag usa niini. Apan makatubag ka ba pinasukad sa mga prinsipyo sa Bibliya? Ang matag usa niining mga pangutanaha gihisgotan na diha sa Ang Bantayanang Torre. Kat-oni ang paggamit sa mabatonan nga mga indise aron kaplagon ang maong materyal. Kon ikaw walay daandaang mga basahon nga may indise nga nagpunting, susiha ang librarya sa Kingdom Hall. Ayawg dahoma ang Oo o Dili alang sa kada suliran. Usahay ikaw ang kinahanglang maoy maghukom​—sa tinagsatagsa o ingong magtiayon. Pero kat-oni sa paghimog mga desisyon nga magbanaag sa imong gugma kang Jehova ug sa mga membro sa imong pamilya. Himoa ang mga desisyon nga mohatag ug pamatuod sa imong maikagong tinguha nga makapahimuot gayod sa Diyos. Kon imong buhaton kini, kini mahimong dayag ngadto kang Jehova ug sa uban nga imong kaila pag-ayo nga ikaw gayod nagatuman sa diyosnong pagkamahinalaron dili lang diha sa publiko kondili usab diha sa imong kaugalingong panimalay.​—Efe. 5:10; Roma 14:19.

Repasong Panaghisgot

● Sa unsang paagi ang pagkamaunongon ngadto kang Jehova nalangkit diha sa pagkamatinumanon sa panaad sa usa sa kaminyoon?

● Sa dihang mapailalom sa kapit-osan gikan sa mga gumonhap sa pamilya, unsa may makatabang kanato sa pagbuhat nianang makapahimuot sa Diyos?

● Bisan pa kon ang uban diha sa banay masayop, unsa may atong mahimo aron pauswagon ang kahimtang?

[Mga Pangutana sa Pagtuon]