Kapitulo 7

Kon Unsa ang Atong Makat-onan Gikan sa Pagtugot sa Diyos sa Daotan

1. (a) Kon ang mga rebelde didto sa Eden gipatay pa gilayon ni Jehova, sa unsang paagi unta kana nag-apektar kanato? (b) Hinunoa, unsang mahigugmaong mga tagana ang gihimo ni Jehova nga atong mabatonan?

 WALAY sapayan sa mga kalisdanan nga mahimong modangat sa atong kinabuhi, ang atong pagkahimugso dili inhustisya sa bahin sa Diyos. Iyang gitugahan (gisangkapan) ang unang mga tawo sa kahingpitan ug gihatagag Paraiso ingong ilang puy-anan. Kon iya pa dayong gipatay sila human sa ilang pag-alsa, wala untay tawhanong kaliwatan nga naliminan sa sakit, kawalad-on ug krimen ingon sa atong nailhan. Apan, sa kamaluloy-on, si Jehova nagtugot kang Adan ug Eva sa pagpatunghag pamilya sa wala pa sila mamatay, bisan tuod kini sila makapanunod sa pagkadihingpit. Pinaagi kang Kristo siya naghimog tagana alang sa mga kaliwatan ni Adan nga aduna ing pagtuo sa paghupot sa giwala ni Adan​—ang kinabuhing dayon ubos sa mga kahimtang nga magpahimong posible sa tumang pagpahimulos sa kinabuhi.​—Deut. 32:4, 5; Juan 10:10.

2. Kini bang tanan gihimo lang alang sa atong kaluwasan?

² Ang mga benepisyo niini nganhi kanato sa personal dili masukod. Pero gikan sa rekord sa Bibliya atong masayran nga adunay mas hinungdanon nga nalangkit kay sa atong personal nga kaluwasan.

Tungod sa Iyang Bantogang Ngalan

3. Unsa ang nalambigit may kalabotan sa katumanan sa katuyoan ni Jehova alang sa yuta ug sa katawhan?

³ Ang ngalan ni Jehova, ang iyang kadungganan ingong Unibersohanong Magmamando ug ang Diyos sa kamatuoran,  nalambigit diha sa katumanan sa iyang katuyoan maylabot sa yuta ug sa katawhan. Tungod sa baroganan ni Jehova, ang pakigdait ug kaayohan sa tibuok nga uniberso nanginahanglan nga ang iyang ngalan hatagan ug bug-os nga pagtahod nga angay niana ug ang tanan magmasinundanon ngadto kaniya.

4. Unsa gayod ang nalakip sa maong katuyoan?

⁴ Human sila si Adan ug Eva lalanga, sila iyang gihatagan ug asaynment aron tumanon. Iyang gipatin-aw nga ang iyang katuyoan dili lang sa pagmando sa tibuok yuta, nga sa ingon ipasangkad ang mga utlanan sa Paraiso, kondili pun-on kana sa mga kaliwatan sa unang lalaki ug babaye, sila si Adan ug Eva. (Gen. 1:28) Kini ba nga katuyoan napakyas tungod sa ilang sala, nga misangpot sa pasipala ngadto sa ngalan sa Diyos?

5. (a) Sumala sa Genesis 2:17, kanus-a man ang bisan kinsang tawo mamatay tungod sa pagkaon gikan sa kahoy sa pag-ila sa maayo ug sa daotan? (b) Giunsa ni Jehova kana pagtuman, samtang usab nagtahod sa iyang katuyoan maylabot sa pagpuno sa yuta?

⁵ Si Jehova nagpasidaan kang Adan nga kon siya sa masukihon mokaon gikan sa kahoy sa pag-ila sa maayo ug sa daotan siya gayod mamatay “sa adlaw” sa iyang pagkaon. (Gen. 2:17) Sumala gayod sa pulong sa Diyos, sa maong adlaw sa pagpakasala ni Adan si Jehova mihusay sa mga maglalapas ug gihukman sa kamatayon. Ang silot dili malikayan. Subay sa hukom, sumala sa panglantaw sa Diyos, si Adan ug Eva namatay sa maong adlaw. (Itanding Lucas 20:37, 38.) Pero aron matuman ang iyang kaugalingong gikabungat nga katuyoan maylabot sa pagpuno sa yuta, si Jehova nagtugot kanila sa pagpanganak antes sila sa literal namatay. Apan, gikan sa punto de bista sa Diyos nga ang 1,000 ka tuig sama sa usa ka adlaw, sa natapos ang kinabuhi ni Adan sa 930 ka tuig, kini sulod man sa usa ka “adlaw.” (Gen. 5:3-5; ikomparar ang Salmo 90:4; 2 Pedro 3:8.) Busa ang pagkamaminatud-on ni Jehova nabayaw maylabot sa panahon nga ang silot gipahamtang, ug ang iyang katuyoan sa pagpuno sa yuta sa kaanakan ni Adan wala mapakyas. Pero nagkahulogan kana, nga sa makadiyot, ang makasasalang katawhan gitugotan nga mabuhi.

6, 7. (a) Unsa ang gipakita sa Exodo 9:15, 16 kon nganong ginatugotan ni Jehova ang paglungtad sa mga daotan sa makadiyot? (b) Sa kahimtang ni Paraon, giunsa pagpakita ang gahom ni Jehova ug giunsa sa pagkahimong bantog sa Iyang ngalan? (c) Busa unsa man ang mahimong sangpotanan sa kataposan sa presenteng daotang sistema?

 ⁶ Kon unsa ang gisulti ni Jehova ngadto sa magmamando sa Ehipto sa mga adlaw ni Moises nagpakita ug dugang kon nganong gitugotan sa Diyos ang pagpadayon sa daotan sa makadiyot. Sa nagdumili si Paraon sa pagpalakaw sa mga anak sa Israel gikan sa Ehipto, wala dayon patya ni Jehova si Paraon. Gipadangat ang napulo ka hampak ibabaw sa maong nasod, nga nagpasundayag sa gahom ni Jehova diha sa mga paaging nakapahibulong ug nagkalainlain. Sa gipasidan-an sa ikapito, miingon si Jehova kang Paraon nga dali lang untang nawagtang si Paraon ug ang iyang katawhan gikan sa yuta. “Apan, sa pagkamatuod,” miingon si Jehova, “alang niining tuyoa gipapadayon ko ikaw sa paglungtad, aron sa pagpakita kanimo sa akong gahom ug aron ang akong ngalan igasangyaw sa tibuok nga yuta.”​—Ex. 9:15, 16.

⁷ Sa giluwas ni Jehova ang Israel, ang iyang ngalan nabantog gayod. Karon, duolan sa 3,500 ka katuigan sa ulahi, kon unsa ang iyang nabuhat wala mahikalimti. Dili lang ang personal nga ngalang Jehova namantala kondili usab ang kamatuoran bahin Kaniya nga nagdala sa maong ngalan. Kini naglig-on sa kadungganan ni Jehova ingong Diyos nga tigtuman sa iyang mga tugon ug tiglihok sa kaayohan sa iyang mga alagad. Kadto nagpasundayag nga tungod sa iyang kusganong gahom walay unsa man nga makababag sa iyang katuyoan. Labaw pa ganing mabihagon mao ang taliabot nga kalaglagan sa bug-os daotang sistema, makita ug dimakita. Ang maong pasundayag sa kusganong gahom ug himaya nga ihatag niana sa ngalan ni Jehova dili gayod mahikalimtan diha sa unibersohanong kasaysayan. Ang mga benepisyo niana maoy dumalayon!​—Ezek. 38:23; Pin. 19:1, 2.

‘O Pagkalalom sa Kaalam sa Diyos!’

8. Unsang dugang mga puntos ang giawhag ni Pablo nga atong pagatagdon?

⁸ Sa iyang sulat ngadto sa Taga-Roma, ang apostol nga si  Pablo mipatunghag pangutana: “Nga wala ang hustisya diha sa Diyos?” Ug unya mitubag siya sa pagpasiugda sa kaluoy sa Diyos ug sa pagtumong ngadto sa giingon ni Jehova kang Paraon. Iya usab nga gipahinumdom ang kamatuoran nga kitang mga tawo sama ug yutang kulonon diha sa mga kamot sa magkukolon. Moreklamo ba ang kulon sa paggamit niana kon unsay isulod? Midugang si Pablo: “Kon, karon, ang Diyos, bisan maoy magbuot aron ipasundayag ang iyang kapungot ug sa pagpaila sa iyang gahom, nagtugot uban ang tumang pagkamapailobon sa mga sudlanan nga gikapungtan nga gihimong angay sa kalaglagan, aron iyang ikapaila ang kadagaya sa iyang himaya, alang sa mga sudlanan nga ginakaloy-an nga giandam niyang daan aron pagahimayaon, nga mao, kita, nga iyang gitawag dili lang gikan sa taliwala sa mga Hudiyo kondili gikan usab sa kanasoran, nan unsay naa niana?”​—Roma 9:14-24.

9. (a) Kinsa ang “mga sudlanan nga gikapungtan nga gihimong angay sa kalaglagan”? (b) Nganong si Jehova nagpakitag dakong pagkamapailobon bisan pa sa ilang pagkabangis, ug sa unsang paagi ang ultimang sangpotanan mahimong maayo alang kanilang nahigugma kaniya?

⁹ Sukad gayod sa pagbungat ni Jehova sa matagnaong pahayag nga natala sa Genesis 3:15, si Satanas ug ang iyang binhi nahimong “mga sudlanan nga gikapungtan nga gihimo angay sa kalaglagan.” Sulod nianang maong panahon si Jehova nagmapailobon. Ang mga daotan nagtamay sa iyang mga paagi; ilang gilutos ang iyang mga alagad, gipatay pa gani ang iyang Anak. Pero si Jehova nagpakitag dakong pagpugong, uban sa dumalayong kaayohan alang sa iyang mga alagad. Ang tibuok kalalangan nakabaton ug kahigayonan sa pagtan-aw sa malaglagong mga sangpotanan sa rebelyon batok sa Diyos. Sa samang panahon, ang kamatayon ni Jesus mitagana ug paagi sa pagluwas sa masinundanong katawhan ug sa ‘pagbungkag sa mga buhat sa Yawa.’​—1 Juan 3:8; Heb. 2:14, 15.

10. Nganong padayong gitugotan ni Jehova ang mga daotan sulod sa miaging 1,900 ka katuigan?

¹⁰ Sulod sa kaping 1,900 ka katuigan sukad sa pagkabanhaw ni Jesus si Jehova dugang mitugot sa “mga sudlanan  nga gikapungtan,” nga gipugngan una ang ilang kalaglagan. Ngano? Tungod kay siya nangandam sa ikaduhang bahin sa binhi sa babaye, silang mahiuban kang Jesu-Kristo didto sa iyang langitnong Gingharian. (Gal. 3:29) Kini sila, nga 144,000 ang gidaghanon, mao ang “mga sudlanan nga ginakaloy-an” nga gihisgotan ni apostol Pablo. Una, ang mga indibiduwal gikan sa taliwala sa mga Hudiyo mao ang gidapit sa paglangkob ning maong matang. Dayon ang tinuling mga Samaritano gidugang ug, sa kataposan, ang katawhan sa Hentil nga mga nasod. Uban sa dakong pagkamapailobon si Jehova nagpaigo sa iyang katuyoan, nga walay gipugos sa pag-alagad kaniya, kondili mihatag ug dagayang panalangin kanilang misanong nga maabiabihon sa iyang mahigugmaong mga tagana. Karon ang pangandam sa maong langitnong matang hapit na makompleto.

11. Unsang laing grupo nga karon nakabenepisyo gikan sa pagkamapailobon ni Jehova?

¹¹ Pero komosta na man ang mga molupyo alang sa yuta? Sa tinudlong panahon sa Diyos mga benilyon ang pagabanhawon ingong yutan-ong mga ginsakpan sa Gingharian. Usab, ilabina sukad sa 1935 K.P. ang pagkamapailobon ni Jehova nagpaposible sa pagtigom sa usa ka “dakong panon” gikan sa tanang kanasoran uban sa panglantaw alang sa ilang kaluwasan.​—Pin. 7:9, 10; Juan 10:16.

12. (a) Ingong resulta, unsa man ang atong nakat-onan bahin kang Jehova mismo? (b) Unsa man ang imong pagsanong ngadto sa paagi sa pagdumala ni Jehova niining mga butanga?

¹² Diha bay bisan unsang inhustisya niining tanan? Wala gayod! Kon ang Diyos nagapugong una sa kalaglagan sa mga daotan, ang “mga sudlanan nga gikapungtan,” aron iyang ikapakita ang kaluoy ngadto sa uban nga subay sa iyang katuyoan, unsaon man kang bisan kinsang tawo sa husto nga pagreklamo? Hinunoa, samtang atong mapanid-an ang katumanan sa iyang katuyoan, atong makat-onan ang mas pa bahin kang Jehova mismo. Kita mahibulong sa mga dagway sa iyang personalidad nga napatugbabaw​—iyang hustisya, iyang kaluoy, iyang pagkamapailobon, ang pagkadaiya sa iyang kaalam. Ang maalamong pagdumala ni Jehova sa gumonhap sa walay kataposan magabarog  ingong pamatuod sa kamatuoran nga ang iyang paagi sa pagmando mao ang labing maayo. Duyog kang apostol Pablo kita moingon: “O pagkalalom sa mga bahandi sa Diyos ug kaalam ug kahibalo! Pagkadimatugkad sa iyang mga paghukom ug pagkadimatukib sa iyang mga paagi!”​—Roma 11:33.

Kahigayonan Aron Ipakita ang Atong Pagkamahinalaron

13. (a) Sa dihang masugamak ta ang personal nga pag-antos unsang kahigayonan ang anaa sa atong atubangan? (b) Unsa man ang makatabang kanato sa pagsanong nga maalamon?

¹³ Adunay mga kahimtang nga nagalangkit sa tinuod personal nga pag-antos tungod kay wala pa man laglaga sa Diyos ang mga daotan ug ipatungha ang gitagnang kapasig-ulian sa katawhan. Unsa man ang atong sanong sa maong kahimtang? Ato bang makita diha niana ang kahigayonan nga moduyog sa pagpapha sa pasipala sa ngalan ni Jehova ug sa pagpamatuod nga ang Yawa bakakon? Kita gayod mapalig-on kaayo sa pagbuhat niana pinaagig paghinumdom sa tambag: “Magmaalamon anak ko, ug lipaya ang akong kasingkasing, aron matubag ko siya nga nagatamay kanako.” (Prov. 27:11) Si Satanas, mao ang nagatamay ni Jehova, nagpasangil nga kon ang mga tawo mag-antos sa materyal nga kawalad-on o lawasnong kasakit, sila magadat-og sa Diyos, tunglohon pa gani siya. (Job 1:9-11; 2:4, 5) Kita magapalipay sa kasingkasing ni Jehova kon, pinaagig atong pagkamaunongon sa Diyos bisan pa sa mga kalisdanan, atong ginapasundayag nga kana dili tinuod sa atong bahin. Aduna kita ing bug-os nga pagsalig nga si Jehova maluloy-on kaayo alang sa iyang mga alagad ug nga, ingon sa kahimtang ni Job, sa tinudlong panahon si Jehova magaganti kanatong madagayaon kon kita magmatinumanon.​—Sant. 5:11; Job 42:10-16.

14. Kon kita mosalig kang Jehova sa dihang makasugamak ug mga pagsulay, unsang ubang mga benepisyo nga atong maangkon?

¹⁴ Kon kita masaligong magdepende kang Jehova sa dihang makasugamak ug grabeng mga pagsulay, atong maugmad ang hamili kaayong mga hiyas. Ingong resulta sa mga butang nga giantos ni Jesus, siya “nakakat-on sa pagkamasinundanon” diha sa paagi nga wala niya gayod maagii  kanhi. Kita, usab, makakat-on​—makaugmad ug pagkamapailobon, pagkamalahutayon ug napadulot nga pagpabili sa matarong nga mga dalan ni Jehova. Kita ba mapailobong modawat sa maong pagbansay?​—Heb. 5:8, 9; 12:11; Sant. 1:2-4.

15. Samtang mapailobong antoson ta ang kalisdanan, sa unsang paagi ang uban makabenepisyo?

¹⁵ Ang uban makapaniid sa atong gibuhat. Tungod sa atong giagoman gumikan sa atong gugma sa pagkamatarong, ang pipila kanila sa kapulihay makadangat ra sa pag-ila kon kinsa gayod ang tinuod nga “mga igsoon” ni Kristo karon, ug pinaagig pagduyog sa iyang “mga igsoon” diha sa pagsimba sila mahalaray alang sa mga panalangin sa kinabuhing dayon. (Mat. 25:34-36, 40, 46) Si Jehova ug ang iyang Anak gusto nga sila makabaton nianang kahigayonana. Kita ba buot niana? Kita ba mahinangop sa pag-agwanta sa kalisdanan aron sa pagkab-ot niana?

16. Sa unsang paagi ang atong tinamdan sa maong personal nga kalisdanan ikalangkit sa panaghiusa?

¹⁶ Pagkaanindot sa dihang ato diay nga isipon bisan ang malisod nga mga kahimtang sa kinabuhi ingong kahigayonan sa pagpakita sa atong pagkamahinalaron kang Jehova ingon man sa pag-ambit diha sa pagpalampos sa iyang kabubut-on! Ang atong pagbuhat niana magpamatuod nga kita gayod nagapadayon sa panaghiusa uban sa Diyos ug ni Kristo nga alang niana si Jesus miampo sa kaayohan sa tanang matuod nga mga Kristohanon.​—Juan 17:20, 21.

Repasong Panaghisgot

● Samtang nagatugot sa daotan, sa unsang paagi si Jehova hustong nagpakita ug dakong pagtahod alang sa iyang kaugalingong ngalan?

● Sa unsang paagi ang pagtugot sa Diyos sa “mga sudlanan nga gikapungtan” nagpaarang sa iyang kaluoy nga nahiabot hangtod kanato?

● Unsa gayod ang panlimbasogan tang matino diha sa mga kahimtang nga nagalangkit sa pag-antos nga sa personal atong masugamak?

[Mga Pangutana sa Pagtuon]