Kapitulo 24

Mahimayaong Kalamposan Makab-ot sa Katuyoan ni Jehova

1, 2. (a) Unsa man ang katuyoan ni Jehova bahin sa iyang intelihenteng mga linalang? (b) Kinsa ang naapil diha sa nahiusang pamilya sa mga magsisimba sa Diyos? (c) Mahitungod niini, unsang personal nga pangutana nga takos sa pagtagad?

 TANANG intelihenteng linalang nga nahiusa diha sa matuod nga pagsimba ug ang tanan kanila nagatagamtam sa mahimayaong kagawasan sa mga anak sa Diyos​—mao kana ang maalamon ug mahigugmaong katuyoan ni Jehova. Mao usab kana ang maikagong ginatinguha sa tanang mahigugmaon sa pagkamatarong.

² Sugod nga gituman ni Jehova kining dakong katuyoan sa dihang gisugdan niya ang iyang mga buhat sa paglalang. Ang una niyang linalang mao ang usa ka Anak, usa nga nagpamatuod nga “ang panganinaw sa iyang himaya ug tukma nga hulad sa iya gayong kinaiya.” (Heb. 1:1-3) Kini siya maoy talagsaon, kay ang Diyos ra ang naglalang. Pinaagi kaniya ang ubang mga anak gilalang​—una, ang mga anghel sa langit, unya ang tawo ibabaw sa yuta. (Job 38:7; Luc. 3:38) Kining tanang maong mga anak naglangkob sa usa ka unibersohanong pamilya. Alang kanilang tanan si Jehova mao ang Diyos, nga bugtong pagasimbahon. Siya ang Unibersohanong Magmamando. Siya usab mao ang ilang mahigugmaong Amahan. Siya ba mao usab ang imong Amahan, ug ikaw ba usa sa iyang mga anak? Pagkabililhong relasyon kana!

3. (a) Ngano nga sa pagkahimugso walay kinsa man kanato nga mga anak sa Diyos? (b) Pero unsang mahigugmaong tagana ang gihimo ni Jehova alang sa mga anak ni Adan?

³ Apan, atong kinahanglang atubangon ang kamatuoran nga sa gitunglo ang atong unang tawhanong mga ginikanan ngadto sa kamatayon ingong tinuyong mga makasasala, sila gihinginlan gikan sa Eden ug giayran sa Diyos. Sila dili na  bahin sa unibersohanong pamilya ni Jehova. (Gen. 3:22-24; itanding Deuteronomio 32:4, 5.) Ang tanan kanato, tungod kay kita mga kaliwat sa makasasalang Adan, natawo nga dala ang masalaypong mga hilig. Sanglit kay kita mga anak man sa mga ginikanan nga gipalagpot gikan sa pamilya sa Diyos, dili kita makapangangkon nga mga anak sa Diyos pinaagi lamang ug tawhanong pagkahimugso. Pero si Jehova nahibalo nga ang pipila gikan sa taliwala sa kaliwatan ni Adan maghigugma sa pagkamatarong, ug Siya mahigugmaong mihimog tagana nga pinaagi niana kini sila makakab-ot sa mahimayaong kagawasan sa mga anak sa Diyos.​—Roma 8:20, 21.

Ang Piniling Kahimtang sa Israel

4. (a) Sa unsang pasukaranan nga ang mga Israelita “mga anak” sa Diyos? (b) Kini wala magkahulogan ug unsa?

⁴ Sa mga 2,500 ka katuigan human sa paglalang kang Adan, gipaabot na usab ni Jehova ngadto sa tinong mga tawo ang pribilehiyo sa paghupot ug kalabotan uban kaniya ingong iyang mga anak. Uyon sa iyang tugon uban kang Abraham, si Jehova mipili sa Israel sa pagkahimong iyang katawhan. Busa, ngadto kang Paraon sa Ehipto, siya misulti bahin sa Israel ingong “akong anak.” (Ex. 4:22, 23; Gen. 12:1, 2) Sa ulahi iyang gihatagan ang Israel ug iyang Kasugoan didto sa Bukid Sinai, nagporma sa maong katawhan ngadto sa usa ka nasod ug gigamit sila maylabot sa iyang katuyoan. Binase sa nasodnong punto de bista, tungod kay sila maoy “espesyal nga propyedad” ni Jehova, sila gitawag ingong “mga anak” sa Diyos. (Deut. 14:1, 2; Isa. 43:1) Labot pa, tungod sa iyang linaing mga pakiglabot sa tinong mga indibiduwal sa maong nasod, si Jehova nagpunting kanila ingong mga anak. (1 Cron. 22:9, 10) Kining maong baroganan gipasukad sa pakigtugon nga relasyon uban sa Diyos. Hinuon, wala kana magkahulogan nga ilang natagamtam ang mahimayaong kagawasan nga nabatonan ni Adan ingong usa ka anak sa Diyos. Sila sa gihapon naulipon pa sa sala ug kamatayon.

5. Giunsa sa Israel sa pagwala ang espesyal nga pagbarog niini uban sa Diyos?

⁵ Bisan pa niana, ingong mga anak sila nakahupot ug  tinabangan nga pagbarog uban sa Diyos. Sila usab dihay kaakohan sa pagtahod sa ilang Amahan ug sa pagbuhat uyon sa iyang katuyoan. Gipasiugda ni Jesus ang importansiya sa pagtuman sa ilang obligasyon​—dili ra sa pag-angkon sa Diyos ingong ilang Amahan, kondili sa ‘pagpamatuod sa ilang kaugalingon’ nga iyang mga anak. (Mat. 5:43-48; Mal. 1:6) Apan, ang mga Hudiyo ingong nasod napakyas niini. Busa, sulod sa ultimang tuig sa yutan-ong ministeryo ni Jesus, sa mipatugbaw ang mga Hudiyo kinsa naninguha sa pagpatay kang Jesus, “Kami may usa ka Amahan, ang Diyos,” malig-ong gipunting ni Jesus nga ang ilang mga buhat ug ang espiritu nga ilang gipakita nanghimakak sa maong pangangkon. (Juan 8:41, 44, 47) Sa 33 K.P. ang tugon sa Kasugoan gitapos sa Diyos, ug ang pasukaranan alang sa espesyal nga relasyon nga gipahimuslan sa Israel natapos. Apan, si Jehova padayon man sa paghupot taliwala sa katawhan niadtong iyang gidawat ingong mga anak.

Si Jehova Naghiusa sa Iyang Katawhan

6. Unsang “administrasyon” ang gihubit ni Pablo sa Efeso 1:9, 10, ug unsa ang tumong niini?

⁶ Ngadto sa mga Kristohanon sa Efeso ang apostol nga si Pablo misulat bahin sa programa ni Jehova sa paghiusa sa iyang katawhan​—ang kahikayan sa Diyos nga niana silang magbaton ug pagtuo mahimong hinigugmang mga membro sa Iyang panimalay, nga nag-ingon: “Ang [Diyos] nagpahibalo nganhi kanato sa balaang tinago sa iyang kabubut-on. Maoy sumala sa iyang maayong tuyo nga iyang gilaraw diha sa iyang kaugalingon ang usa ka administrasyon [pagdumala sa panimalay] nga pagatumanon inig-abot sa tinudlong mga panahon, nga mao, ang pagtigom pag-usab sa tanang butang diha kang Kristo, ang mga butang didto sa mga langit ug ang mga butang dinhi sa yuta.” (Efe. 1:9, 10) Kining maong “administrasyon” nasentro kang Jesu-Kristo. Pinaagi kaniya, ang mga tawo gidala ngadto sa inuyonang kahimtang atubangan sa Diyos​—ang pipila uban sa paglaom nga mahaadto sa langit; ang uban, sa yuta​—sa pag-alagad diha sa panaghiusa uban sa manulondang mga anak sa Diyos kinsa nagpamatuod nga maunongon kang Jehova.

7. Unsa ang “mga butang didto sa mga langit,” ug unsay kahulogan ang pagkatigom niini alang kanila?

 ⁷ Una, sukad sa Pentekostes sa 33 K.P., ang pagtagad gipunting sa “mga butang didto sa mga langit,” nga mao, silang mahimong kaubanang mga manununod uban ni Kristo didto sa langitnong Gingharian. Pinasukad sa ilang pagtuo sa bili sa halad ni Jesus, sila gipakamatarong sa Diyos. (Roma 5:1, 2) Unya sila “gipanganak pag-usab,” o gihimo ingong mga anak sa Diyos uban sa paglaom sa langitnong kinabuhi. (Juan 3:3; 1:12, 13) Uban niini kanila ingong espirituwal nga nasod ang Diyos naghimo ug bag-ong tugon. Sa naglakat ang panahon, ang mga Hudiyo ug mga Hentil giapil, ug kini sila mokabat ug 144,000.​—Gal. 3:26-29; Pin. 14:1.

8. Giunsa pagtandi ang relasyon sa mga manununod sa Gingharian uban sa Amahan niadtong ila sa mga Hudiyo ubos sa Moisesnong Kasugoan?

⁸ Bisan tuod dili gihapon hingpit diha sa unod, ang nanghibilin sa maong mga manununod sa langitnong Gingharian nagapahimulos ug bililhon ug suod nga relasyon uban sa Amahan. Mahitungod niini, si Pablo misulat: “Karon kay kamo mga anak man, ang Diyos mipadala sa espiritu sa iyang Anak nganhi sa atong mga kasingkasing ug nagatuwaw: ‘Abba, Amahan!’ Busa, diay, ikaw dili na ulipon kondili usa ka anak; ug kon usa ka anak, manununod usab pinaagi sa Diyos.” (Gal. 4:6, 7) Kanang Aramaikong pulong “Abba” nagkahulogang “amahan,” pero mao kanay paagi sa pagsulti nga mabination​—ang matang nga gigamit sa gamayng bata alang sa iyang tatay. Tungod sa pagkalabaw sa halad ni Jesus ug ang mismong di-takos nga kalulot sa Diyos, kini silang dinihogan-espiritung mga Kristohanon nagatagamtam ug relasyon uban sa Diyos nga mas suod kay sa bisan unsa pa nga maarangan alang sa dihingpit nga mga tawo ubos sa Kasugoan. Apan, kon unsa ang anaa sa umaabot alang kanila mas pa ganing kahibulongan.

9. Unsa man ang kahulogan sa bug-os nga katumanan sa ilang pagkaanak?

⁹ Kon sila magmatinumanon hangtod sa kamatayon, ilang dawaton ang bug-os nga katumanan sa ilang pagkaanak pinaagig pagbanhaw ngadto sa walay kamatayong kinabuhi  sa mga langit. Kini sila makapribilehiyo sa pag-alagad nga mausahon diha mismo sa atubangan ni Jehova nga Diyos. Aduna na lamay diyutay nga gidaghanon ning maong mga anak sa Diyos ang ania pa ibabaw sa yuta.​—Roma 8:14, 23; 1 Juan 3:1, 2.

Pagtigom sa “mga Butang Dinhi sa Yuta”

10. (a) Unsa man “ang mga butang dinhi sa yuta,” ug sukad kanus-a nga sila natigom ngadto sa panaghiusa sa pagsimba? (b) Unsa man ang ilang relasyon uban kang Jehova?

¹⁰ Ang samang “administrasyon” nga nagapaposible alang sa mga tawo nga matigom ngadto sa panimalay sa Diyos uban sa paglaom sa langitnong kinabuhi mao usab ang nagatagad sa “mga butang dinhi sa yuta.” Ilabina sukad sa 1935 K.P. nga ang mga tawong adunay pagtuo sa halad ni Kristo natigom uban sa paglaom sa kinabuhing dayon sa yuta. Abaga por abaga duyog sa mga nanghibilin sa dinihogang matang, sila nagadayeg sa ngalan ni Jehova ug nagabayaw sa iyang pagsimba. (Sof. 3:9; Isa. 2:2, 3) Uban sa dulot nga pagtahod kini sila, usab, nagatawag kang Jehova ingong “Amahan,” nga nag-ila kaniya ingong Tinubdan sa kinabuhi, ug sila maikagong nagapanlimbasog nga isumbaliksilaw ang iyang mga hiyas ingon sa iyang gidahom nga buhaton sa iyang mga anak. Sila nagatagamtam ug aprobadong pagbarog sa iyang atubangan pinasukad sa ilang pagtuo sa giulang dugo ni Jesus. (Mat. 6:9; Pin. 7:9, 14) Pero sila nahibalo nga ang kangaya sa bug-os nga pagkadinawat nila sa Diyos ingong iyang mga anak maoy sa ugma-damlag pa alang kanila.

11. (a) Unsang saad ang gihatag sa Roma 8:19-21 alang sa katawhan? (b) Unsa ang “pagkapinadayag sa mga anak sa Diyos” nga ilang mahinamong gihulat?

¹¹ Ingon sa gipakita sa Roma 8:19-21, sila mahinamong nagahulat sa “pagkapinadayag sa mga anak sa Diyos,” kay sa maong panahon unya moabot na man niini kanila alang sa tawhanong kalalangan nga “ipahigawas gikan sa kaulipnan sa pagkadunot.” Kanang maong “pagkapinadayag” mahitabo sa dihang ang mga tawo dinhi sa yuta makakitag ebidensiya nga ang dinihogan-espiritung mga anak sa Diyos kinsa nakakab-ot na sa ilang langitnong ganti modasdas ingong mga kaubanan sa ilang hinimayang Ginoo, si Jesu-Kristo.  Kini mahimong dayag diha sa kalaglagan sa interong daotang sistema sa mga butang, nga pagasundan sa mga panalangin sa Usa ka Libo ka Tuig nga Pagmando ni Kristo nga niana kining maong “mga anak sa Diyos” moambit uban kaniya ingong mga hari ug mga saserdote.​—Pin. 2:26, 27; 20:6.

12. Human sa dakong kasakitan, diha sa unsang awit sa pagdayeg nga ang madaogong dinihogan-espiritung mga anak sa Diyos mag-ambahan, ug unsa ang kahulogan niana?

¹² Pagkamasadyaon unya sa dihang ang dakong kasakitan moagi na ug silang mga anak sa Diyos kinsa nahiusa uban ni Kristo mag-ambahan sa ilang mga tingog diha sa pagdayeg sa Diyos, nga mangayaong magpatugbaw: “Dako ug kahibulongan ang imong mga buhat, Jehova nga Diyos, ang Labing Gamhanan. Matarong ug matuod ang imong mga dalan, Hari sa walay kataposan. Kinsa man ang dili gayod mahadlok kanimo, Jehova, ug maghimaya sa imong ngalan, kay ikaw lamang ang maunongon? Kay ang tanang kanasoran mangabot ug managsimba sa imong atubangan, kay ang imong matarong nga mga hukom gipadayag na man”! (Pin. 15:3, 4) Oo, ang tanang katawhan, nga gilangkoban ug mga tawo nga gikan sa kanhing mga nasod, maghiusa diha sa pagsimba sa matuod nga Diyos. Bisan kadtong atua sa handomanang mga lubnganan pagabanhawon ug hatagan ug kahigayonan sa pagduyog sa ilang mga tingog diha sa pagdayeg kang Jehova.

13. Unsang kahibudngang kagawasan nga pagatagamtamon dihadiha sa mga mangaluwas sa dakong kasakitan?

¹³ Dili na unya si Satanas nga Yawa ang mahimong “diyos niining sistemaha sa mga butang.” Dili na ang mga magsisimba ni Jehova dinhi sa yuta magpakigbisog sa iyang daotang impluwensiya. (2 Cor. 4:4; Pin. 20:1-3) Wala na ing bakak nga relihiyon nga sa tinuis mohawas sa atong mahigugmaong Diyos ug magsilbe ingong mabahinbahinong impluwensiya sa tawhanong katilingban. Dili na ang mga alagad sa matuod nga Diyos makaagom ug inhustisya ug panlupig diha sa mga kamot sa mga tawo nga anaa sa pangatungdanan sa gobyerno. Pagkakahibulongang kagawasan ang maangkon sa mga makalabang-buhi sa dakong kasakitan!

14. Pinaagig unsa nga sila ipahigawas gikan sa sala ug sa tanang epekto niana?

 ¹⁴ Ingong ang “Kordero sa Diyos nga nagkuha sa sala sa kalibotan,” si Jesu-Kristo mopadapat sa bili sa iyang halad aron wagtangon ang tanang kanhing kasal-anan sa katawhan. (Juan 1:29) Sa dinhi pa sa yuta, sa gibungat ni Jesus nga ang mga sala sa usa ka tawo gipasaylo na, iya usab nga giayo ang tawo nga gipasaylo ingong pamatuod niana. (Mat. 9:1-7) Sa samang paagi, gikan sa langit siya sa milagrosong paagi mag-ayo sa mga buta, mga bungol, mga amang, silang sa lawasnon baldado, silang masakiton sa utok ug silang adunay unsa mang mga sakit. Sa inanay, pinaagi sa matinumanong paghulma sa ilang kaugalingon sumala sa matarong nga mga paagi, ang tanang mahinangpon ug masinundanong mga tawo diha sa ilang mga kaugalingon sa bug-os makawagtang na sa “balaod sa sala” aron ang ilang tanang buhat, ilang mga panghunahuna ug mga tinguha sa ilang mga kasingkasing makapahimuot sa ilang kaugalingon ug sa Diyos. (Roma 7:21-23; itanding Isaias 25:7, 8 ug Pinadayag 21:3, 4.) Sa dili pa matapos ang Milenyo, sila matabangan na sa pagdangat sa bug-os tawhanong kahingpitan. Sila sa bug-os mahigawas na gikan sa sala ug sa tanang grabeng mga epekto niana. Sila sa husto magbanaag sa ‘dagway ug pagkasama sa Diyos’ diha sa taliwala sa yutan-ong Paraiso nga maglangkob sa interong globo.​—Gen. 1:26.

15. Sa pagkatapos sa Milenyo, unsang aksiyon ang buhaton ni Kristo, ug uban sa unsang tumong?

¹⁵ Sa mapadangat na ni Kristo ang katawhan ngadto sa kahingpitan, unya iyang iuli ngadto sa iyang Amahan ang awtoridad nga gihatag kaniya alang niining buluhatona. Ingon sa gitagna sa 1 Corinto 15:28: “Sa dihang ang tanang butang mahasakop na kaniya [ang Anak], unya ang Anak sa iyang kaugalingon magpasakop usab sa iyang kaugalingon ngadto sa Usa nga maoy nagsakop sa tanang butang ngadto kaniya, aron ang Diyos mahimong tanang butang sa tanan.”

16. Ngadto sa unsa ang tanang hiningpit nga katawhan ipaagi unya, ug ngano?

¹⁶ Unya ang hiningpit nga katawhan hatagan ug kahigayonan sa pagpasundayag nga ang ilang dili mausab nga pagpili mao ang pag-alagad sa bugtong buhi ug matuod nga  Diyos sa walay kataposan. Busa, sa dili pa sila sagopon ingong iyang mga anak pinaagi ni Jesu-Kristo, ipaagi ni Jehova ang tanan kanilang hiningpit nga mga tawo sa usa ka bug-os, kataposang pagsulay. Si Satanas ug ang iyang mga demonyo pagabuhian gikan sa bung-aw. Kini dili mosangpot sa bisan unsang kadaot ngadto kanilang tinuod nga nahigugma kang Jehova. Pero ang bisan kinsa nga masupilong nagatugot sa ilang kaugalingon nga mayudyod ngadto sa pagsukol kang Jehova pagalaglagon sa walay kataposan uban sa orihinal nga rebelde ug iyang mga demonyo.​—Pin. 20:7-10.

17. Sa katumanan sa katuyoan ni Jehova, unsang kahimtang nga sa makausa pa maglungtad taliwala sa tanan niyang intelihenteng linalang?

¹⁷ Sa maong panahon mahigugmaong sagopon na ni Jehova ingon iyang mga anak pinaagi ni Kristo ang tanang hiningpit nga mga tawo kinsa makabarog sa maong ultima, mahukmanong pagtigi. Unya sila sa bug-os magpakig-ambit diha sa “mahimayaong kagawasan sa mga anak sa Diyos.” (Roma 8:21) Unya sila mahimo na gayong bahin sa nahiusa, unibersohanong pamilya sa Diyos, nga alang kanilang tanan si Jehova mao ang mahimong walay kataposang bugtong Diyos, ang Unibersohanong Magmamando, ug ang ilang mahigugmaong Amahan. Dayon ang tanan sa intelihenteng linalang ni Jehova, didto sa langit ug dinhi sa yuta, sa makausa pa mahiusa diha sa pagsimba sa bugtong matuod nga Diyos.

Repasong Panaghisgot

● Antes ang rebelyon didto sa Eden, unsang relasyon ang nabatonan sa tanang magsisimba ni Jehova ngadto kaniya?

● Nahapatong ang unsang kaakohan alang kanilang kinsa mga anak sa Diyos?

● Kinsa karon ang mga anak sa Diyos? Kinsa pa ang mahimong mga anak sa Diyos sa kapulihay, ug giunsa kini sa pagkalangkit sa katuyoan ni Jehova maylabot sa nahiusang pagsimba?

[Mga Pangutana sa Pagtuon]