Kapitulo 22

Padayon sa Pagsulti sa Pulong sa Diyos Uban ang Kaisog

1. (a) Unsang maayong balita nga gimantala sa mga tinun-an ni Jesus sugod sa Pentekostes sa 33 K.P., pero unsa ang pagsanong sa mga magmamando ug mga ansiano sa mga Hudiyo? (b) Unsang mga sukna nga ikapangutana sa atong kaugalingon mahitungod niini?

 ANG labing hinungdanong mga hitabo sa kapin sa 4,000 ka katuigan sa tawhanong kasaysayan nahitabo. Ang mismong Anak sa Diyos, si Jesu-Kristo, gidihogan ingong umaabot nga Hari ibabaw sa tibuok nga yuta. Bisan pa sa iyang kamatayon gumikan sa paghulhog sa relihiyosong mga kaaway, si Jehova mibanhaw kaniya gikan sa mga patay. Pinaagi kaniya ang kaluwasan nahimong posible uban sa panglantaw sa kinabuhing walay kataposan. Pero sa dihang ang matinumanong mga tinun-an ni Jesus mimantala sa katilingban niining maayong balita, ang mabangis nga pagsupak mitungha. Una, duha sa mga apostol gibalhog sa bilanggoan, unya ang tanan kanila. Sila gibunalan ug gimandoan nga dili na mosulti mahitungod sa ngalan ni Jesus. (Buh. 4:1-3, 17; 5:17, 18, 40) Unsa man gayod ang ilang buhaton? Unsa man unta ang imong gibuhat? Ikaw kayha magpadayon sa pagpamatuod nga maisogon?

2. (a) Unsa ang mas pa ganing kahibulongang balita nga kinahanglang imantala sa atong adlaw? (b) Kinsa ang may kaakohan sa pagbuhat niana?

² Sa tuig 1914 K.P. ang labaw pa ganing kahibudngan nga hitabo sa unibersohanong kahinungdanon nahitabo. Ang Gingharian sa Diyos diha sa mga kamot ni Jesu-Kristo natukod gayod didto sa langit. Unya, si Satanas ug ang iyang mga demonyo gitambog nganhi sa yuta. (Pin. 12:1-5, 7-12) Ang kataposang mga adlaw ning presenteng daotang sistema nagsugod na. Sa dili pa mahanaw ang kaliwatan nga nakasaksi sa mga hitabo sa 1914, ang Diyos modugmok sa interong sistema sa mga butang ni Satanas. (Mat. 24:34)  Ang mga mangaluwas magaatubang sa kalaoman sa kinabuhing dayon. Diha sa katumanan sa orihinal nga katuyoan sa Diyos, ang tibuok nga yuta mahimong usa ka Paraiso. Kon ikaw nakadawat na ning maong maayong balita, ikaw adunay kaakohan sa pagpaambit niana sa uban. (Mat. 24:14) Pero unsang pagsanong ang imong madahom?

3. (a) Sa unsang paagi ang mga tawo mosanong sa mensahe sa Gingharian? (b) Busa, unsang suliran nga kinahanglan natong sagubangon?

³ Samtang ang pipila ka tawo hayan mainitong modawat kanimo ingong magmamantala sa Gingharian, ang kadaghanan dili ra magmatagdanon. (Mat. 24:37-39) Ang uban mahimong motamay o mosupak kanimo sa hilabihan. Si Jesus nagpasidaan nga ang pipila ka pagsupak mahimong magagikan sa imong kaugalingong mga paryente. (Luc. 21:16-19) Ikahibalag usab kana diha sa imong trabahoanan o sa eskuwelahan. Sa daghang bahin sa yuta ang mga Saksi ni Jehova napailalom gani sa dili hustong gobyernohanong pagbando. Sa dihang makasugamak sa bisan unsa o sa tanan ning maong mga hitabo, ikaw ba magapadayon sa pagsulti sa Pulong sa Diyos nga maisogon?

4. Ang personal ba nga determinasyon (hugot nga tinguha) magapaseguro nga kita magapadayon sa pag-alagad sa Diyos nga matinumanon?

⁴ Sa walay duhaduha, gusto mo nga mahimong maisogong alagad sa Diyos. Apan, ang pipila kinsa mibati nga walay makapahunong kanila mikawas sa ranggo sa mga magmamantala sa Gingharian. Sa kasukwahi, ang uban, apil ang mga tawo nga daw maulawon sa kinaiya, nagapadayon nga masibotong mga alagad sa Diyos. Unsaon mo man sa pagpamatuod nga usa kinsa nagabarog nga “malig-on diha sa pagtuo”?​—1 Cor. 16:13.

Dili Magsalig sa Atong Kaugalingong Kusog

5. (a) Aron pamatud-an ang atong kaugalingong matinumanong mga alagad sa Diyos, unsa ang pasukaranang kinahanglanon? (b) Ngano ang mga miting hinungdanon kaayo?

⁵ Siyempre, adunay daghang butang nalangkit sa pagkahimong matinumanong alagad sa Diyos. Pero ang pasukaranan niining tanan mao ang pagsalig diha kang Jehova ug sa iyang mga tagana. Unsaon ta man sa pagpakita sa maong  pagsalig? Ang usa ka paagi maoy pagtambong sa mga miting sa kongregasyon. Ang Kasulatan nag-agda kanato nga dili isalikway kana. (Heb. 10:23-25) Silang nagpadayon nga matinumanong mga saksi ni Jehova, bisan nakasugamak sa dili pagkamatinagdanon sa publiko o sa paglutos, nagpanikaysikay sa ilang kaugalingon sa pagkaregular diha sa pagtambong sa mga tigom uban sa kaubanang mga magsisimba. Niining mga mitinga ang atong kahibalo sa Kasulatan mapauswag, pero dili ang daw pagkamalamaton uban sa bag-ong mga butang ang nagapatigom kanato. (Itanding Buhat 17:21.) Ang atong pagpabili sa ilado kaayong mga kamatuoran mapalambo, ug atong pagkaigmat sa mga paagi nga kana magamit mapalantik. Ang panig-ingnan nga gihatag ni Jesus alang kanato mahimong mapadulot pa gayod sa atong hunahuna ug kasingkasing. (Efe. 4:20-24) Kita mahimong suod sa atong Kristohanong kaigsoonan diha sa hiniusang pagsimba ug kita sa personal mapalig-on sa pagpadayon sa pagbuhat sa kabubut-on sa Diyos. Ang espiritu ni Jehova nagataganag pagtultol pinaagi sa kongregasyon, ug pinaagi nianang maong espiritu si Jesus anaa sa atong taliwala sa dihang magkatigom kita diha sa iyang ngalan.​—Pin. 3:6; Mat. 18:20.

6. Sa dapit nga ang mga Saksi ni Jehova gibando, unsa ang gihimo maylabot sa mga tigom?

⁶ Ikaw ba sa regular nagatambong sa tanang miting ug ikaw ba nagahimog personal nga pagpadapat sa imong napatalinghogang gihisgotan? Usahay, sa dihang ubos sa bando, gikinahanglan nga himoon ang mga tigom diha sa gagmayng mga grupo sa pribadong mga balay. Ang mga dapit ug mga panahon mahimong lainlainon ug hayan dili kanunayng kombeniyente, ang pipila ka miting ginahimo sa lalom nang kagabhion. Apan, bisan pa sa personal nga kalisdanan ug kapilegrohan, ang matinumanong mga igsoong lalaki ug babaye nanikaysikay nga makatambong sa matag tigom.

7. (a) Sa unsang paagi pa nga atong ikapasundayag ang atong pagsalig kang Jehova? (b) Unsaon nga kini makaabag kanato sa padayong pagsulti nga maisogon?

⁷ Ang pagsalig kang Jehova ginapakita usab sa regular nga pagdangop kaniya diha sa pag-ampo​—dili ingong naandang batasan lang, kondili uban sa kinasingkasing nga  pagkaamgo nga atong gikinahanglan ang tabang sa Diyos. Imo ba kanang gibuhat? Si Jesus miampong masubsob sa panahon sa iyang ministeryo sa yuta. (Luc. 3:21; 6:12, 13; 9:18, 28; 11:1; 23:39-44) Ug sa gabii antes sa iyang pagkalansang siya miagda sa iyang mga tinun-an: “Padayon kamo sa pagtukaw ug pag-ampo, aron dili kamo mahulog sa pagsulay.” (Mar. 14:38) Kon kita makasugamak ug hilabihang pagkadimatinagdanon sa mensahe sa Gingharian, mahimong adunay tentasyon nga magmaluya diha sa atong ministeryo. Kon ang katawhan magbugalbugal kanato o aduna pa ganiy mas grabeng paglutos, hayan kita matental nga maghilom na aron makaipsot niana. Pero kon kita maikagong mag-ampo alang sa espiritu sa Diyos sa pag-abag kanato sa padayong pagsulti nga maisogon, kita mapanalipdan batok sa pagpadaog sa maong tentasyon.​—Luc. 11:13; Efe. 6:18-20.

Talaan sa Maisogong Pagpanaksi

8. (a) Ngano ang talaan diha sa Mga Buhat sa linain magpainteres kanato? (b) Tubaga ang mga pangutana nga anaa sa kataposan niining parapoha, nga ipasiugda kon sa unsang paagi ang impormasyon makahatag kanatog kaayohan.

⁸ Ang talaan nga anaa sa basahon sa Mga Buhat sa linain makapainteres kanatong tanan. Nagtug-an kana kanato kon sa unsang paagi ang mga apostol ug ubang unang mga tinun-an, mga tawo nga kansang mga pagbati pareho sa atoa, nakabuntog sa mga kababagan ug nagpamatuod nga maisogon ug matinumanong mga saksi ni Jehova. Atong pagasusihon ang usa ka bahin nianang talaana uban sa tabang sa mosunod nga mga pangutana ug sa gisitar nga mga teksto. Samtang atong buhaton kana, tagda kon sa unsang paagi ikaw sa personal makabenepisyo gikan sa imong ginabasa.

 Ang mga apostol ba edukado kaayong mga tawo? Sila ba mga indibiduwal nga sa kinaiya mga maisogon, nga walay pag-isip kon unsay mahitabo? (Buh. 4:13; Juan 18:17, 25-27; 20:19)

 Unsay nagpahimo kang Pedro sa pagsulting maisogon atubangan sa Hudiyong hukmanan nga nagtunglo sa kaugalingong Anak sa Diyos sa milabayng pipila ka semana? (Buh. 4:8; Mat. 10:19, 20)

  Unsa man ang gibuhat sa mga apostol sulod sa mga semana sa wala pa sila dad-a atubangan sa Sanhedrin? (Buh. 1:14; 2:1, 42)

 Sa gimandoan sila sa mga punoan nga dili na magsangyaw pinasukad sa ngalan ni Jesus, unsa ang tubag nila ni Pedro ug Juan? (Buh. 4:19, 20)

 Human sila buhii, ngadto kang kinsa nga sila mitutok pag-usab alang sa panabang? Mihangyo ba sila kaniya nga ihunong na ang paglutos, o unsa? (Buh. 4:24-31)

 Pinaagig unsa nga si Jehova mitaganag tabang sa dihang nanlimbasog ang mga magsusupak sa pagpahunong sa buluhatong pagsangyaw? (Buh. 5:17-20, 33-40)

 Giunsa sa pagpakita sa mga apostol nga sila nakasabot sa katarongan nga sila giluwas? (Buh. 5:21, 41, 42)

 Bisan sa panahong daghan sa mga tinun-an ang nagkatibulaag tungod sa gidak-on sa paglutos, unsa ang ilang gipadayon sa pagbuhat? (Buh. 8:3, 4; 11:19-21)

9. (a) Unsang kulba-hinam nga mga resulta ang nakab-ot gikan sa ministeryo niadtong unang mga tinun-an? (b) Sa unsang paagi kita nalambigit?

⁹ Ang ilang buluhaton maylabot sa maayong balita wala makawang. Mga 3,000 ka tinun-an ang nabawtismohan sa Pentekostes sa 33 K.P. “Misamot kadaghan ang nahidugang nga mga magtutuo diha sa Ginoo, mga panon sa mga lalaki ug mga babaye.” (Buh. 2:41; 4:4; 5:14) Miabot ang panahong gitaho nga bisan ang usa sa labing madasigong mga maglulutos, si Saulo sa Tarso, nahimong usa ka Kristohanon ug siya mismo maisogong nagsangyaw sa kamatuoran. Siya nailhang ingong ang apostol nga si Pablo. (Gal. 1:22-24) Ang buluhaton nga nagsugod sa unang siglo wala mahunong. Kini nagakakusog niining “kataposang mga adlaw” ug nakakaylap ngadto sa tanang bahin sa yuta. Aduna kita ing pribilehiyo sa pakig-ambit niana, ug samtang atong buhaton kana kita makakat-on sa panig-ingnan nga gipahimutang sa maunongong mga saksi nga nag-alagad una pa kanato.

10. (a) Unsang mga kahigayonan ang gipahimuslan ni Pablo sa pagsangyaw? (b) Diha sa unsang mga paagi nga ipakaylap mo ang balita sa Gingharian ngadto sa uban?

¹⁰ Sa nakat-onan ni Pablo ang kamatuoran bahin kang  Jesu-Kristo, wala siya mag-unyaunya. “Dihadiha . . . si Jesus iyang giwali, nga kini Siya mao ang Anak sa Diyos.” (Buh. 9:20) Iyang gipabilhan ang di-takos nga kalulot sa Diyos ngadto kaniya ug siya nakaamgo nga ang tanan nanginahanglan sa maayong balita nga iyang nadawat. Sumala sa batasan niadtong adlawa, sanglit siya usa ka Hudiyo siya misulod sa mga sinagoga, nga maoy Hudiyong mga dapit sa katilingbanong panagkatigom, sa paghatag ug pamatuod. Misangyaw usab siya sa kabalayan ug nangatarongan uban sa mga tawo diha sa merkadohan. Ug siya nahinangop sa pagbalhin ngadto sa bag-ong mga teritoryo aron sa pagmantala sa maayong balita.​—Buh. 17:17; 20:20; Roma 15:23, 24.

11. (a) Giunsa sa pagpakita ni Pablo nga, samtang maisogon, siya usab mailahon sa paagi sa iyang pagsangyaw? (b) Unsaon ta man sa pagbanaag nianang hiyasa sa dihang nagapamatuod ngadto sa mga paryente, mga isigkatrabahante o mga eskolmet?

¹¹ Si Pablo maisogon, pero usab mailahon, nga kinahanglan kitang ingon niana. Ngadto sa mga Hudiyo siya nangamuyo pinasukad sa mga saad nga gihimo sa Diyos ngadto sa ilang katigulangan. Ngadto sa mga Grego siya misulti binase sa mga butang nga sila sinati niana. May mga panahon nga siya migamit sa iyang kaugalingong kasinatian sa pagkakat-on sa kamatuoran ingong paagi sa paghatag ug pamatuod. Ingon sa iyang gipatin-aw: “Akong gibuhat ang tanang butang tungod sa maayong balita, aron ako makapaambit niana sa uban.”​—1 Cor. 9:20-23; Buh. 22:​3-21.

12. (a) Bisan tuod maisogon, unsa ang gibuhat ni Pablo aron dili ipugos ang kanunayng pagharongay uban sa mga magsusupak? (b) Kanus-a nato tingali maalamong masundog ang maong panig-ingnan, ug sa unsang paagi? (c) Diin man gikan ang gahom aron magapadayon sa pagsulti nga maisogon?

¹² Kon ang pagsupak sa maayong balita daw madayag nga mas maayong mosangyaw sa laing dapit o sa pagbalhin ngadto sa laing teritoryo sa kasamtangan, kini gibuhat ni Pablo inay kay ipugos ang kanunayng pagharongay uban sa mga kaaway sa kamatuoran. (Buh. 14:5-7; 18:5-7; Roma 12:18) Pero wala gayod niya ikaulaw ang maayong balita. (Roma 1:16) Bisan tuod nakaplagan ni Pablo nga dili lalim  ang mabiaybiayon, mabangison pa gani, nga pagtratar sa mga magsusupak, siya “nagbaton ug kaisog pinaagi sa atong Diyos” aron sa pagpadayon sa pagwali. Bisan pa sa malisod nga mga kahimtang nga iyang giagoman, siya miingon: “Ang Ginoo mibarog tupad kanako ug iya akong gilig-on, aron pinaagi kanako ang pagsangyaw mahimong sa bug-os matuman.” (1 Tes. 2:2; 2 Tim. 4:17) Ang pangulo sa Kristohanong kongregasyon, ang Ginoong Jesus, nagapadayon sa pagtagana ug gahom nga gikinahanglan sa pagbuhat sa buluhaton nga iyang gitagna alang sa atong adlaw.​—Mar. 13:10.

13. Unsa ang nagapamatuod sa Kristohanong kaisog, ug unsa ang pasukaranan alang niana?

¹³ Aduna gayod kitay katarongan sa pagpadayon sa pagsulti sa Pulong sa Diyos nga maisogon, sama gayod sa gibuhat ni Jesu-Kristo ug sa ubang matinumanong mga alagad sa Diyos sa unang siglo. Wala kini magkahulogan nga mahimong haras o gahian sa atong pamatasan. Walay kinahanglan nga mahimong di-mahunahunaon o ipugos ang balita niadtong dili gusto niana. Pero dili kita mosurender tungod kay ang mga tawo dili matinagdanon, ni kita malisang nga maghilom na lang tungod sa pagsupak. Sama kang Jesus, atong ginapunting ang Gingharian sa Diyos ingon ang angay nga kagamhanan sa tibuok nga yuta. Kita nagasulti uban ang pagsalig kay kita nagahawas kang Jehova, ang Unibersohanong Magmamando, ug ang mensahe nga atong ginamantala dili gikan kanato kondili gikan kaniya.​—Filip. 1:27, 28; 1 Tes. 2:13.

Repasong Panaghisgot

● Nganong importante man nga ipaambit ang balita sa Gingharian ngadto sa tanan kutob sa maarangan? Pero unsang mga pagsanong ang ato gayong dahomon?

● Unsaon nato sa pagpakita nga kita wala magsalig sa atong kaugalingong kusog sa pag-alagad kang Jehova?

● Unsang bililhong mga leksiyon nga atong makat-onan gikan sa basahon sa Mga Buhat?

[Mga Pangutana sa Pagtuon]