Kapitulo 11

‘Padayong Pangitaa Pag-una ang Gingharian’

1. (a) Ngano, sa 1,900 ka katuigan kanhi, nga si Jesus miingon sa pagpangita una sa Gingharian? (b) Unsang pangutana nga kinahanglang isukna sa atong kaugalingon?

 KAPIN sa 1,900 ka katuigan kanhi, sa usa ka diskurso nga gihatag didto sa Galilea, si Jesus miagda sa iyang mga mamiminaw: “Nan, padayon nga pangitaa pag-una ang gingharian ug ang iyang pagkamatarong.” Apan ngano? Dili ba ang panahon sa paglingkod ni Kristo sa trono sa nangagi pang daghang kasiglohan? Oo. Pero kanang Mesiyanikong Gingharian mao ang paagi nga ang kaugalingong balaang ngalan ni Jehova pagabayawon ug ang iyang dakong katuyoan bahin sa yuta pagatumanon. Ang bisan kinsa nga nagaila gayod sa kahinungdanon niini mohatag sa Gingharian ug unang luna diha sa iyang kinabuhi. Kana tinuod sa unang siglo ug tino nga tinuod kana karon nga ang Gingharian nagamando na. Ang imo bang paagi sa kinabuhi nagapakita nga ikaw nagapangita una sa Gingharian?​—Mat. 6:33.

2. Unsa ang mga butang nga ang katawhan sa kasagaran maikagong nagapangagpas?

² Kasagaran sa katawhan labawng interesado diha sa ubang butang. Maikagon silang nagapangagpas ug mga bahandi ug bisti, kalan-on ug ubang materyal nga mga kabtangan ug mga kalingawan nga mapalit ug salapi. (Mat. 6:31, 32) Ang ilang paagi sa kinabuhi nagabanaag sa pagkaokupado sa kaugalingon ug sa kalipayan. Diha sa ilang mga kinabuhi, ang Diyos ginabutang sa ikaduhang dapit​—kon sila ugaling nagatuo man kaniya.

3. (a) Unsang matang sa bahandi nga si Jesus midasig sa iyang mga tinun-an sa pagpangita, ug ngano? (b) Nganong walay kinahanglan nga magmabalak-on sa hilabihan bahin sa materyal nga mga panginahanglan?

³ Pero ngadto sa iyang mga tinun-an si Jesus mihatag ug tambag: “Ayaw kamo pagtigom ug mga bahandi alang sa  inyong kaugalingon dinhi sa yuta,” kay wakay magmalungtarong dayon sa maong mga kabtangan. “Hinunoa,” siya miingon, “pagtigom kamog mga bahandi alang sa inyong kaugalingon didto sa langit,” pinaagig pag-alagad kang Jehova. Iyang giawhag ang iyang mga sumusunod sa paghimong “yano” sa ilang mata, nga nagapunting sa ilang pagtagad sa usa lang ka butang, ang pagbuhat sa kabubut-on sa Diyos. “Dili kamo arang makaalagad sa Diyos ug sa mga Bahandi,” iyang giingnan sila. Pero unsa na man ang materyal nga mga kinahanglanon​—pagkaon, bisti ug puy-anan? “Ayaw kamo pagkabalaka,” si Jesus mitambag. Iyang giwaling ang ilang pagtagad ngadto sa mga langgam​—ginapakaon man sila sa Diyos. Iyang gipalig-on ang iyang mga sumusunod sa pagkat-on gikan sa mga bulak​—sa katahom gibistihan sila sa Diyos. Dili ba ang intelihenteng tawhanong mga linalang ni Jehova mas bililhon kay kang bisan kinsa niini kanila? “Nan, padayon nga pangitaa pag-una ang gingharian ug ang iyang pagkamatarong,” si Jesus miingon, “ug kining tanang ubang [gikinahanglang] mga butang igadugang ra kaninyo.” (Mat. 6:19-34) Ikaw ba nagatuo niana? Ang imo bang mga lihok nagabutyag niana?

Ayawg Tugoti nga Malumos ang Kamatuoran sa Gingharian

4. Kon palabonon o mabalak-on kaayo ang usa ka tawo sa materyal nga mga butang, unsa ang hayan mahimong sangpotanan? Iilustrar.

⁴ Kon ang usa ka tawo sobra kaayong mabalak-on sa materyal nga mga butang, ang mga resulta mahimong malaglagon. Bisan tuod siya nagaangkong interesado sa Gingharian, kon diha sa iyang kasingkasing ginauna niya ang ubang mga butang, ang kamatuoran sa Gingharian malumos. (Mat. 13:18, 19, 22) Pananglitan, sa usa ka okasyon ang usa ka batan-on datong magmamando nangutana kang Jesus, “Unsa man gayoy akong buhaton aron makapanunod sa kinabuhing walay kataposan?” Ang iyang sanong ngadto sa tubag ni Jesus nagpakita nga hinlo man ang iyang kinabuhi ug maayo ang pagtagad sa uban. Pero siya hilabihan rang nabihag sa iyang materyal nga mga kabtangan. Dili niya mahimong ibulag ang iyang kaugalingon niana diha sa pagdapig nga mahimong sumusunod ni Kristo. Mao nga iyang  gipalabay ang kahigayonan nga mitultol unta sa pagkahimo niyang magmamando uban ni Kristo didto sa langitnong Gingharian. Ingon sa gisulti ni Jesus sa maong okasyon: “Pagkalisod gayod alang niadtong adunay bahandi sa pagsulod sa gingharian sa Diyos!”​—Mar. 10:17-23.

5. (a) Unsang mga butang nga si Pablo midasig kang Timoteo nga magmatagbaw, ug ngano? (b) Sa unsang paagi gigamit ni Satanas ang “gugma sa salapi” ingong malaglagong lit-ag?

⁵ Mga katuigan sa ulahi, ang apostol nga si Pablo misulat ngadto kang Timoteo, nga sa maong panahon didto sa Efeso, sentro sa naghingapin nga negosyo. Siya mipahinumdom kaniya: “Kay wala kitay bisan unsa nga gidala nganhi sa kalibotan, ug dili man kita makadala ug bisan unsa ngadto sa gawas sa kalibotan. Busa, kon kita adunay makaon ug ikabisti, kita magmatagbaw na uban niining mga butanga.” Ang pagtrabaho aron ikatagana ang angayng “makaon ug ikabisti” alang sa kaugalingon ug sa iyang pamilya husto man. Apan si Pablo mipasidaan: “Silang maikagon gayod nga mahimong dato mangahulog sa panulay ug bitik ug sa daghang binuang ug makadaot nga mga pangibog, nga nagaunlod sa mga tawo ngadto sa kalaglagan ug kapildihan.” Si Satanas malinlangon. Sa sinugdan iyang haylohon ang usa ka tawo sa ginagmay nga mga paagi. Sagad kini pagasundan ug mas dakong pagpit-os​—tingali kahigayonan sa pag-uswag ug ranggo o katungdanan sa usa ka trabaho nga mas dako ang suweldo nga nanginahanglag panahon nga kanhi gigahin alang sa espirituwal nga mga butang. Gawas kon kita magmabinantayon, ang “gugma sa salapi” mahimong makalumos sa importante-kaayong intereses sa Gingharian. Ingon sa gipasiugda ni Pablo, “Tungod sa pagpangagpas niining maong gugma [sa salapi] ang uban nanghisalaag gikan sa pagtuo ug gipalagbaslagbasan ang ilang kaugalingon sa daghang mga kasakitan.”​—1 Tim. 6:7-10.

6. (a) Aron dili mabitik, unsa ang kinahanglang atong buhaton? (b) Kana ba katuohan nga matuod tungod sa ekonomikanhong kahimtang karon sa kalibotan?

⁶ Uban sa dalisay nga gugma alang sa iyang Kristohanong igsoon, si Pablo miagda kang Timoteo: “Pahilayo gikan niining mga butanga,” ug, “Pakigbugno alang sa maayong bugno nga iya sa pagtuo.” (1 Tim. 6:11, 12) Ang maikagong panikaysikay gikinahanglan kon likayan ta ugaling sa pagkaanod  uban sa materyalistikanhong paagi sa kinabuhi sa kalibotan nga nagalibot kanato. Pero kon kita manlimbasog gayod nga subay sa atong pagtuo, si Jehova dili mobiya kanato. Bisan pa sa pagtaas sa mga prisyo ug dagsang nga pagkawalay trabaho, iyang panegurohon nga atong mabatonan ang atong gikinahanglan.​—Heb. 13:5, 6.

Unang mga Tinun-an Mitaganag Panig-ingnan

7. Sa gipadala ni Jesus ang mga apostol sa pagsangyaw sa Israel, unsang mga instruksiyon nga iyang gihatag kanila, ug ngano nga kadto tukma?

⁷ Human si Jesus mihatag sa iyang mga apostol ug angay nga pagbansay iyang gipadala sila ngadto sa Israel aron sa pagmantala sa maayong balita. “Ang gingharian sa mga langit haduol na.” Pagkamakahinam nga mensahe kadto! Si Jesu-Kristo, ang Mesiyanikong Hari, diha sa ilang taliwala. Sanglit ang mga apostol nagtugyan sa ilang kaugalingon alang sa buluhaton sa Diyos, si Jesus miagda kanila nga magmasaligon nga ang Diyos mag-atiman kanila. Mao nga siya miingon: “Ayaw kamo pagbalon ug bisan unsa alang sa panaw, sungkod man ni puyo alang sa pagkaon, ni tinapay ni salapi; ni magdalag duha ka kamisola. Apan sa dihang mosulod kamo sa usa ka balay, pabilin kamo didto ug panglakaw gikan didto.” (Mat. 10:5-10; Luc. 9:1-6; 10:4-7) Tinoon ni Jehova nga ang ilang mga panginahanglan pagatagbawon pinaagig mga kamot sa kaubanang mga Israelita, nga sa ilang taliwala maoy kinaiya ang pag-abiabi sa mga langyaw.

8. (a) Nganong mihatag si Jesus ug laing mga instruksiyon sa hapit na ang iyang kamatayon? (b) Apan, unsa sa gihapon ang gihimong una diha sa ilang mga kinabuhi?

⁸ Sa ulahi, sa hapit na ang iyang kamatayon, si Jesus mipabantay sa iyang mga apostol sa punto nga sila magsangyaw ubos sa nausab nga mga kahimtang. Ingong sangpotanan sa opisyal nga pagsupak, tingali ang pagkamaabiabihon dili kanunay ikadulot diha sa Israel. Labot pa, sa dili madugay ang mensahe sa Gingharian ilang dad-on ngadto sa Hentil nga kayutaan. Sa maong panahon gikinahanglan nilang magdala ug “puyo” ug “puntil sa pagkaon.” Bisan pa niana, gikinahanglan nilang padayon nga pagpangita una sa Gingharian ni Jehova ug sa iyang pagkamatarong, nga masaligong ang Diyos magpanalangin sa ilang mga paningkamot  sa pagbaton sa gikinahanglang kalan-on ug bisti.​—Luc. 22:35-37.

9. (a) Giunsa ni Pablo pag-una ang Gingharian? (b) Sa unsang paagi naatiman ang iyang lawasnong mga panginahanglan? (c) Unsang tambag ang gihatag niya ngadto sa uban bahin niining mga butanga?

⁹ Ang apostol nga si Pablo mihatag ug maayong panig-ingnan kon unsaon sa pagpadapat sa tambag ni Jesus. Ang kinabuhi ni Pablo iyang gisentro sa ministeryo. (Buh. 20:24, 25) Sa miadto siya sa usa ka dapit sa pagsangyaw iyang giatiman ang iyang kaugalingong materyal nga mga panginahanglan pinaagig pagtukod ug tolda. Wala siya magdahom sa uban nga maoy moatiman kaniya. (Buh. 18:1-4; 1 Tes. 2:9; 1 Cor. 9:18) Apan siya mapasalamatong midawat sa pagkamahinatagon ug mga gasa sa dihang ang uban mipakita sa ilang gugma ug pagpabili niining paagiha. (Buh. 16:15, 34; Filip. 4:15-17) Wala niya dasiga ang Kristohanong mga lalaki ug mga babaye sa pagsalindot sa ilang mga kaakohan sa pamilya aron makagula sa pagsangyaw, kondili hinunoa sa pagdumala sa ilang lainlaing mga responsabilidad diha sa timbang nga paagi. Iyang gitambagan silang maghago uban sa ilang mga kamot, sa paghigugma sa ilang mga banay ug magmahinatagon diha sa pagpaambit ngadto sa uban. (Efe. 4:28; 2 Tes. 3:7-12; Tito 2:3-5) Iya usab nga giawhag sila nga itugyan ang ilang pagsalig, dili diha sa materyal nga mga kabtangan, kondili sa Diyos ug sa paggamit sa ilang mga kinabuhi sa paagi nga nagpakita nga ila gayong nasabtan kon unsa ang labawng importanteng mga butang sa kinabuhi. Uyon sa mga pagtulon-an ni Jesus, kana nagkahulogan sa pagpangita una sa Gingharian sa Diyos ug sa iyang pagkamatarong.​—Filip. 1:9-11.

Padayong Unaha ang Gingharian sa Imong Kinabuhi

10. (a) Unsa may kahulogan sa ‘pagpangita una sa Gingharian’? (b) Pero unsa ang dili gayod igasalikway?

¹⁰ Ngadto sa unsang gidak-on nga kita personal nga nagapakig-ambit sa maayong balita sa Gingharian ngadto sa uban? Kana nagadepende, sa bahin, sa atong mga kahimtang ug, sa mas nga gidak-on, sa giladmon sa atong pagpabili. Hinumdomi nga si Jesus wala mag-ingon, ‘Pangitaa ang Gingharian sa dihang wala ka ing laing ginabuhat.’ Ni siya  miingon nga, ‘Basta usahay ikaw nagapakighisgot bahin sa Gingharian, ang tanang gikinahanglan imo nang ginabuhat.’ Ni siya miingon, ‘Sa pagsugod magmasiboton ka na alang sa intereses sa Gingharian; pero kon daw dugay pang moabot ang Bag-ong Kahikayan, padayong may buhaton ka diha sa buluhaton sa Diyos pero pagkinabuhi nga pareho ra gayod sa ubang mga tawo.’ Tungod sa pagkasayod sa kahinungdanon sa Gingharian, iyang gibutyag ang kabubut-on sa iyang Amahan niining bahina, sa pag-ingon: “Pangitaa nga mapadayonon ang iyang gingharian.” O, ingon sa pagtala niana sa apostol nga si Mateo: “Nan, padayon nga pangitaa pag-una ang gingharian ug ang iyang pagkamatarong.” (Luc. 12:31; Mat. 6:33) Bisan tuod ang kadaghanan kanato kinahanglag mangitag trabaho aron sa pag-atiman sa lawasnong mga panginahanglan sa atong kaugalingon ug sa atong mga pamilya, kon kita aduna gayoy pagtuo, ang atong mga kinabuhi pulikion sa buluhaton nga gihatag sa Diyos kanato maylabot sa iyang Gingharian. Sa samang panahon dili ta isalikway ang atong banaynong mga kaakohan.​—1 Tim. 5:8; Prov. 29:15.

11. (a) Giunsa ni Jesus sa pag-ilustrar sa punto nga dili ang tanan makahimo sa pagbuhat sa parehong gidak-on diha sa pagmantala sa mensahe sa Gingharian? (b) Unsang mga butang nga mahimong hinungdan niini?

¹¹ Ang pipila kanato makaarang sa paggugol ug dugang panahon kay sa uban alang sa ministeryo sa kanataran. Pero sa iyang sambingay bahin sa lainlaing mga matang sa yuta si Jesus nagpakita nga ang tanan kansang mga kasingkasing sama ug maayong yuta mahimong magmabungahon. Ngadto sa unsang gidak-on? Ang mga kahimtang sa mga indibiduwal magkalainlain. Panuigon, panglawas ug mga responsabilidad sa pamilya maoy mga hinungdan. Pero sa dihang adunay dalisay nga pagpabili, dako ang mahimong malampos.​—Mat. 13:19, 23.

12. Unsang mapuslanong espirituwal nga mga tumong nga ang mga batan-on ginadasig sa pagtagad?

¹² Maayo nga batonan ang mga tumong nga motabang kanato sa pagpalapad sa atong pakig-ambit diha sa ministeryo sa Gingharian. Ang mga batan-on sa kaligdong maghunahuna sa ekselenteng ehemplo nga iya sa masiboton, batan-ong Kristohanong Timoteo. (Filip. 2:19-22) Unsa pa may mas  maayo alang kanila kondili ang pagsulod sa tibuok-panahong ministeryo sa dihang matapos na nila ang sekular nga pag-eskuwela? Ang mga tutigulang, usab, makabenepisyo pinaagig paghimo ug maayo espirituwal nga mga tumong.

13. (a) Kinsay maghukom kon unsa ang maarangan mo sa personal diha sa pagbuhat sa buluhaton sa Gingharian? (b) Kon atong ginauna gayod sa pagpangita ang Gingharian, kini maoy ebidensiya sa unsa?

¹³ Inay kay tamayon silang kinsa atong ginabati nga hayan makahimo pa ug dugang, kinahanglan kitang palihokon ug pagtuo sa pagpaninguha alang sa personal nga pag-uswag aron kita makaalagad sa Diyos sa bug-os nga maarangan nga ginatugot sa atong kaugalingong mga kahimtang. (Roma 14:10-12; Gal. 6:4) Ingon sa gipakita sa kaso ni Job, si Satanas nangatarongan nga kita interesado lamang gayod sa atong materyal nga mga kabtangan, sa atong kaugalingong kalipayan ug personal nga kaayohan, ug nga ang atong motibo sa pag-alagad sa Diyos maoy hinakog. Pero kon tininuod nga ginapangita ta pag-una ang Gingharian, kita adunay bahin diha sa pagpamatuod nga ang Yawa maoy dako gayong bakakon. Kita nagahatag ug ebidensiya nga ang una sa atong mga kinabuhi dili ang materyal nga mga butang ni ang personal nga kalipayan kondili ang pag-alagad sa Diyos. Diha sa pulong ug sa buhat kita diay nagapamatuod sa atong dulot nga gugma kang Jehova, sa atong maunongong pagpaluyo sa iyang pagkasoberano ug sa gugma sa atong mga isigkatawo.​—Prov. 27:11; Job 1:9-11; 2:4, 5.

14. (a) Nganong makaayo ang usa ka eskedyol sa pag-alagad sa kanataran? (b) Ngadto sa unsang gidak-on nga daghang mga Saksi ang nagapakig-ambit sa ministeryo sa kanataran, ug ngano?

¹⁴ Ang usa ka eskedyol makatabang kanato sa paglampos ug mas pa kay sa ato tingaling nabuhat sa laing paagi. Si Jehova mismo adunay ‘tinudlong mga panahon’ sa pagtuman sa iyang katuyoan, ug makaayo kanato sa pagsundog niana. (Ex. 9:5; Mar. 1:15; Gal. 4:4) Kon posible, maayo nga makig-ambit sa ministeryo sa kanataran sa usa o duha ka tinudlong mga panahon sa matag semana. Mga tagnapulo ka libo sa mga Saksi ni Jehova sa tibuok kalibotan nagpatala ingong mga katabang nga payunir ug nagpahimulos sa paggugol ug duha o mas pang mga oras sa kada adlaw, diha sa aberids, sa pagsangyaw sa maayong balita. Ang pipila regular nga nagabuhat niini; ang uban, sa pipila ka panahon sa matag tuig.  Daghang uban pang mga linibo ang nagaalagad ingong mga regular payunir, nga nagagamit sa labing menos tulo ka oras sa kada adlaw, sa aberids, sa pagmantala sa mensahe sa Gingharian. Ang uban, ingong mga espesyal payunir ug mga misyonaryo, nagagugol ug dugang pa ganing panahon sa buluhaton sa Gingharian. Ug anaa man sa aktuwal diha sa ministeryo sa kanataran o wala, kita makapangitag mga higayon aron ipaambit ang paglaom sa Gingharian ngadto kang bisan kinsa nga magapatalinghog sa matag angay nga okasyon. (Itanding Juan 4:7-15.) Sa kaligdong kitang tanan kinahanglang maghunahuna maylabot sa mga pagkalambigit sa tagna ni Jesus nga “kining maayong balita sa gingharian igawali sa tibuok pinuy-anang yuta alang sa usa ka pamatuod ngadto sa tanang kanasoran; ug unya moabot ang kataposan.” Ang atong tinguha mao gayod unta nga makabaton ug bug-os nga pakig-ambit sa maong buluhaton kutob sa itugot sa atong mga kahimtang.​—Mat. 24:14; Efe. 5:15-17.

15. Mahitungod sa atong ministeryo, nganong bation mo nga ang tambag diha sa 1 Corinto 15:58 maoy tunong sa panahon?

¹⁵ Sa kahiusa, sa tanang bahin sa yuta, nga walay pag-isip kon unsang nasora sila nagapuyo, ang mga Saksi ni Jehova maoy aktibo sa pagpakig-ambit niining dakong pribilehiyo sa pag-alagad. Ilang gipadapat sa ilang kaugalingon ang dinasig nga tambag sa Bibliya: “Magmalig-on, dili matarog, kanunayng madagayaon diha sa buluhaton sa Ginoo, sa pagkasayod nga ang inyong paghago dili makawang may kalabotan sa Ginoo.”​—1 Cor. 15:58.

Repasong Panaghisgot

● Sa miingon si Jesus nga pangitaa pag-una ang Gingharian, unsa ang iyang gibutyag nga kinahanglang ibutang sa ikaduhang luna?

● Unsang panghunahuna nga kinahanglang atong batonan bahin sa pag-atiman sa lawasnong mga panginahanglan sa atong kaugalingon ug sa atong mga pamilya? Unsang tabang nga ihatag sa Diyos kanato?

● Aduna bay unsa mang kalainan sa gidak-on nga atong mahimo diha sa buluhaton sa Gingharian basta kita adunay pipila ka pakig-ambit? Ngano?

[Mga Pangutana sa Pagtuon]