Kapitulo 8

‘Pakigbugno Batok sa Daotang mga Espiritu’

1. Ngano ang kalihokan sa daotang mga espiritu ilabinang magpainteres kanato?

 ANG katawhan nga mahunahunaon lamang sa materyal mahimong moyam-id sa ideya maylabot sa daotang mga espiritu. Pero dili kana butang kataw-anan. Motuo man sila o dili, ang demonyohanong kalihokan nagapapit-os sa tanan. Ang mga magsisimba ni Jehova dili kay walay labot niini. Sa pagkamatuod, sila ang unang target. Gipaigmat kita ni apostol Pablo niining maong panagsungi, nga nag-ingon: “Aduna kitay pakigdumog, dili batok sa dugo ug unod, kondili batok sa mga kagamhanan [nga dili sa kahimtang sa unod ug dugo], batok sa mga pagbulot-an, batok sa mga magmamando sa kalibotan niini nga kangitngit, batok sa daotang mga espiritu diha sa langitnong mga dapit.” (Efe. 6:12) Sa atong adlaw ang pamit-os hilabihan na kaayo tungod kay si Satanas gitambog na gikan sa langit ug busa mabangison, sa pagkasayod nga hamubo na ang iyang panahon.​—Pin. 12:12.

2. Unsaon nga posible alang kanato sa malamposong pagpakigbugno batok sa labaw-tawhanong mga espiritu?

² Sa unsang paagi ang bisan kinsa kanato mahimong molampos diha sa pakigbugno batok sa labaw-tawhanong mga espiritu? Pinaagi lamang sa bug-os nga pagsalig kang Jehova. Kinahanglan kitang magpatalinghog kaniya ug sundon ang iyang Pulong. Sa pagbuhat niana, kita makalikay sa lawasnon, moral, emosyonal ug pangisip nga kadaot nga naagoman niadtong ubos sa Satanasnong gahom.​—Efe. 6:11; Sant. 4:7.

Kalibotanong mga Magmamando sa Langitnong mga Dapit

3. Ngadto sa unsa ug kang kinsa nga si Satanas sa mabangison nagsupak?

³ Tin-aw nga gihubit ni Jehova alang kanato ang kahimtang  sa kalibotan samtang iyang nakita kana sa bantaaw nga dapit didto sa mga langit. Iyang gihatag kang apostol Juan ang usa ka panan-awon nga niana si Satanas gihulagway ingong “usa ka dakong dragon nga mapula” nga nangusmo sa pagtukob, kon maarangan, sa Mesiyanikong Gingharian sa Diyos sa dihang nahimugso kana didto sa langit sa 1914 K.P. Napakyas niana, si Satanas midasdas batok sa makitang mga hawas nianang maong Gingharian, ang ikaduhang bahin sa binhi sa “babaye” sa Diyos, sa tumang mabangis nga pagsupak.​—Pin. 12:3, 4, 13, 17.

4. (a) Ngadto sa unsang kamatuoran bahin sa tinubdan sa gahom sa tawhanong mga gobyerno nga ang Bibliya nagapabantay kanato? (b) Ngadto sa unsa nga ang tanang politikal nga mga magmamando karon ginatigom, ug pinaagi ni kinsa?

⁴ Ang tinubdan sa gahom ug awtoridad sa tawhanong mga gobyerno giyagyag usab sa maong panan-awon ngadto kang Juan. Gipakitaan siya ug linangkob ihalas nga mananap, nga may 7 ka ulo ug 10 ka sungay, usa ka mananap nga naghupot ug awtoridad “ibabaw sa tanang kabanayan ug katawhan ug pinulongan ug kanasoran.” Kini nagarepresentar, dili lang sa usa ka gobyerno, kondili sa globonhong politikal nga sistema. Giingnan si Juan nga “ang dragon [Satanas nga Yawa] mihatag sa iyang gahom ug iyang trono ug dakong pagbulot-an ngadto sa mananap.” (Pin. 13:1, 2, 7; itanding Lucas 4:5, 6.) Bisan pa sa unsa mang relihiyosong mga pangangkon sa bahin sa politikal nga mga magmamando, walay membrong mga nasod sa “mananap” ang nagapasakop sa pagkamagmamando ni Jehova ug sa iyang tinudlong Hari, si Jesu-Kristo. Silang tanan nakigbisog sa padayong paghupot sa ilang kaugalingong pagkamagmamando. Karon, ingon sa gipakita sa Pinadayag, ang “mga pahayag nga dinasig sa mga demonyo” nagapatigom kanilang tanan ngadto sa “gubat sa dakong adlaw sa Diyos nga Labing Gamhanan” sa Har–Magedon. (Pin. 16:13, 14, 16) Sa pagkamatuod, ingon sa gisulat ni apostol Pablo, “ang mga magmamando sa kalibotan” dili mga tawo ra kondili ang “daotang mga espiritu sa langitnong mga dapit.” (Efe. 6:12) Ang tanan kinsa magapamatuod sa ilang kaugalingon nga matuod nga mga magsisimba ni Jehova kinahanglang makasabot sa bug-os nga kahulogan niana.

5. Nganong ang pagbantay gikinahanglan aron dili malimbongan sa pagsuportar sa satanasnong sistema?

 ⁵ Sa kada adlaw ang atong mga kinabuhi ginatandog sa mga kabangian nga nagapabungkag sa tawhanong pamilya. Maoy sagad alang sa katawhan sa pagdapig, sa binaba man o laing paagi, uban sa nasod, banay, grupong pinulongan o sosyal nga matang nga sila parte niana. Bisan pa kon ang ila mismong luna sa katilingban dili diretsong nalangkit sa pila ka kasamok karon, mahimong ilang makaplagan ang ilang kaugalingon nga nagalaban sa usa ka kiliran batok sa lain. Pero bisan unsa man ang reklamo, nga walay sapayan sa tawo o katuyoan nga ilang ginaduso, unsa man gayod ang ilang ginapaluyohan? Ang Bibliya dayag nga nag-ingon nga “ang tibuok kalibotan nahaluna diha sa gahom sa usa nga daotan.” (1 Juan 5:19) Nan, unsaon sa usa ka tawo sa paglikay aron dili masalaag uban sa kadaghanan sa katawhan? Pinaagi lamang sa paghatag sa iyang bug-os nga pagpaluyo sa Gingharian sa Diyos ug sa paghupot kanunay sa bug-os nga neyutralidad mahitungod sa mga panagsumpaki tali sa mga grupo sa kalibotan.​—Juan 17:15, 16.

Malipotong mga Galamiton sa Usa nga Daotan

6. Unsa ang nalakip sa mga paagi nga gigamit ni Satanas sa pagpatalikod sa katawhan gikan sa matuod nga pagsimba?

⁶ Sa tanang mga yugto sa kasaysayan si Satanas migamit sa binaba ug lawasnong paglutos aron ang mga tawo patalikoron gikan sa matuod nga pagsimba. Apan siya usab migamit sa mas malinlangong mga paagi​—ang marama nga mga buhat ug malipotong mga galamiton.

7. Giunsa sa pagpakita ang panglingla ni Satanas diha sa iyang paggamit sa bakak nga relihiyon?

⁷ Siya sa kaigmat naglimin sa kadaghanan sa katawhan diha sa kangitngit pinaagig bakak nga relihiyon, nga nagatugot kanila sa paghunahuna, kon gusto nila, nga sila nagaalagad man sa Diyos. Sanglit walay tiunay nga gugma sa kamatuoran, sila mahimong madani sa malamaton ug emosyonal relihiyosong mga serbisyo o mabihag sa gamhanang mga buhat. (2 Tes. 2:9, 10) Pero kita gipasidan-an nga, bisan taliwala kanila nga nagpakig-ambit diha sa matuod nga pagsimba, adunay “pipila nga mangahulog . . . sa pagtagad sa malimbongon dinasig nga mga pulong ug mga pagtulon-an  sa mga demonyo.” (1 Tim. 4:1) Sa unsang paagi mahitabo kana?

8. Giunsa ni Satanas pagdaldal ngadto sa bakak nga relihiyon bisan ang pipila nga nanagsimba na kang Jehova?

⁸ Sa malinlangon ang Yawa mobihag sa mga kahuyangan sa usa ka tawo. Ang kahadlok ba sa tawo sa gihapon nagagalong kaniya? Kon mao, siya mahimong mokang-a sa pagpit-os gikan sa mga paryente o sa mga silingan aron moambit sa mga buhat nga ila sa bakak relihiyosong sinugdanan. Ang maong tawo ba hambogero? Nan siya mahimong maglagot sa dihang tambagan o kon ang uban dili modawat sa mga ideya nga iyang gipaluyohan. (Prov. 29:25; 15:10; 1 Tim. 6:3, 4) Unsa na man kon ang iyang pagduyog sa ministeryo sa kanataran wala palihoka sa gugma? Inay kay bag-ohon ang iyang panghunahuna aron ipahiuyon sa panig-ingnan ni Kristo, hayan siya mahilig ngadto kanilang ‘nagagitik sa iyang mga dalunggan’ pinaagig pag-ingon nga ang pagbasa lang sa Bibliya ug pagkinabuhi sa “maayong kinabuhi” igo na. (2 Tim. 4:3) Siya man sa aktuwal moduyog sa lain relihiyosong grupo o magpabilin lang sa iyang kaugalingong matang sa relihiyon kana dili importante kang Satanas, basta lamang dili siya magasimba kang Jehova diha sa paagi nga gimbut-an sa Diyos pinaagi sa iyang Pulong ug sa iyang organisasyon.

9. Giunsa ni Satanas sa paggamit ang sekso sa malipotong paagi aron palamposon ang iyang mga tumong?

⁹ Si Satanas sa kamalimbongon nagadaldal usab sa mga tawo aron tagbawon ang kinaiyang mga kailibgon diha sa sayop nga paagi. Iyang gihimo kini uban sa tinguha alang sa seksuwal nga mga panagluon. Nga nagasalikway sa moralidad sa Bibliya, daghan diha sa kalibotan nagaisip sa mga relasyon sa sekso tali sa dili minyong mga tawo ingong hustong kagana o ingong paagi sa pagpamatuod nga sila mga hingkod na. Ug komosta na man silang mga minyong tawo? Dili talagsaon alang sa kalibotanong mga tawo kinsa nakasugamak ug mga suliran sa kaminyoon sa pagkuhag diborsiyo ug magminyo pag-usab o kaha magbulag ug makigpuyo sa laing kapikas. Sa dihang atong mapanid-an kining paagiha sa kinabuhi, ato bang bation nga adunay atong nasayang o nalaktawan, nga ang Kristohanong paagi estrikto  ra kaayo? Ang malinlangong paagi ni Satanas mao ang pagpahunahuna sa usa ka tawo nga si Jehova nagahikaw kaniya ug butang maayo. Iya kitang awhagon sa paghunahuna sa kalalim nga atong mabatonan karon​—dili ang layog-abot nga epekto sa atong kaugalingon ug sa uban, ug tino nga dili ang atong relasyon uban kang Jehova ug sa iyang Anak.​—Gal. 6:7, 8; 1 Cor. 6:9, 10.

10. Pinaagig unsang paagi nga ginasulayan ni Satanas ang pagbuntog sa atong tinamdan maylabot sa kabangis?

¹⁰ Ang laing kinaiyang tinguha mao ang lulinghayaw. Sa dihang kini mapuslanon, sa lawasnon, sa pangisip ug sa emosyon kini man makapahayahay. Pero unsa man ang atong pagsanong sa dihang sa inalisto gamiton ni Satanas ang mga okasyon sa lulinghayaw sa pagsulay nga ipahilayo ang atong panghunahuna gikan nianang iya sa Diyos? Hibalo kita, pananglitan, nga gidumtan ni Jehova kadtong nahigugma sa kabangis. (Sal. 11:5) Pero sa dihang ang mga salida sa telebisyon o sa sinehan mismo nagapasiugda niana, kita ba walay bale lang nagalingkod ug nagatan-aw nianang tanan? O sa dihang ipasundayag kana pinaagig dula, ato ba kanang dawaton ug tingali mosinggit pa ganig pagdasig ngadto sa mga magdudula?​—Itanding Genesis 6:13.

11. Diha sa unsang mga paagi nga bisan gani ang usa ka tawong nakaila sa kamatuoran bahin sa espiritismo mahimo pang malit-agan kon siya dili magbantay?

¹¹ Ato usab nga nahibaloan nga kadtong nakigsangga diha sa bisan unsang porma sa espiritismo​—pagtagnatagna, pagdiwata o sa pagsulay nga makigsulti sa mga patay​—maoy “dulumtanan ngadto kang Jehova.” Dili kita magahunahuna sa pagkonsulta sa mga medyum (tigkontak) sa espiritu ug tino nga dili ta dawaton kana sa atong panimalay aron bansayon ang ilang demonyohanong mga kalaki. Pero kita ba maminaw kanila ug tan-awon ang ilang kalaki kon sila isalida diha sa telebisyon? Bisan tuod dili gayod kita magpatambal gikan sa abat-mananambal, kita ba kaha mobugkot ug lubid libot sa bukton sa usa ka bag-ong nahimugso nga bata uban sa panghunahuna nga basin magpanalipod kana sa bata gikan sa kadaot? O, sa pagkasayod nga ang Bibliya nagatunglo sa ‘paglumay sa uban,’ ato bang tugotan ang usa ka hipnotiko sa pagbuot sa atong pangisip, bisan kon sa temporaryo lang?​—Deut. 18:10-12; Gal. 5:19-21.

12. (a) Sa unsang paagi gigamit ang musika aron ganahan kita sa mga ideya nga atong nasayran nga daotan? (b) Sa unsang paagi ang panapot sa usa ka tawo, buhok-tipo o sinultihan nagapakitag pagkabihag dapig kanilang kansang pagkinabuhi wala uyoni ni Jehova? (c) Unsa man ang gikinahanglan sa atong bahin kon kita dili mahimong biktima sa malipoton satanasnong mga galamiton?

 ¹² Atong nabasa diha sa Kasulatan nga ang ‘pakighilawas ug tanang kahugawan dili gayod, uban sa dili hustong motibo, pagahisgotan gani sa atong taliwala.’ (Efe. 5:3-5) Pero unsa na man kon ang maong mga tema sa malimbongon gipaduyog diha sa musika nga adunay mananoy nga tono, mataralong ganay o ritmo o matulorong kompas? Mahimo ganing wala ra sa buot kita mosugod sa pagkanta nianang nagahimaya sa sekso nga walay kasal, paggamit ug mga droga alang sa kalalim ug mas pa niana? O, samtang atong nahibaloan nga kinahanglan kitang dili mosundog sa pagkinabuhi sa katawhan kinsa nakiglabot sa maong mga butang, kita ba mahiligon nga maila ang atong kaugalingon uban kanila pinaagig pagsundog sa ilang pamiste, sa ilang estilo sa buhok o sa ilang sinultihan? Pagkamarama gayod ni Satanas! Pagkamalipoton sa mga paagi nga iyang gigamit aron daldalon ang mga tawo sa pagpahiuyon sa iyang kaugalingong mahugaw nga hunahuna! (2 Cor. 4:3, 4) Aron dili kita mabiktima sa iyang malinlangon nga mga galamiton, kinahanglang likayan ta ang pagkaanod uban sa kalibotan. Gikinahanglan tang itisok sa hunahuna kon kinsa ang “mga magmamando sa kalibotan niini nga kangitngit” ug makigbugno nga malugoton batok sa ilang impluwensiya.​—Efe. 6:12; 1 Ped. 5:8.

Nasangkapan Aron Mahimong mga Mananaog

13. Sa unsang paagi posible alang kang bisan kinsa kanato, nga dala ang atong mga pagkadihingpit, sa pagdaog sa kalibotan nga gimandoan ni Satanas?

¹³ Sa wala pa ang kamatayon ni Jesus siya miingon ngadto sa iyang mga apostol: “Magmadasigon kamo! Akong gidaog ang kalibotan.” Mao man, usab, sila mahimong mga mananaog; ug labaw sa 60 ka katuigan sa ulahi ang apostol nga si Juan misulat: “Kinsa ba ang mananaog sa kalibotan kondili siya nga adunay pagtuo nga si Jesus mao ang Anak sa Diyos?” (Juan 16:33; 1 Juan 5:5) Ang maong pagtuo ginapakita pinaagig atong pagtuman sa sugo ni Jesus ug pagsalig  diha sa Pulong sa Diyos, ingon sa iyang gibuhat. Unsa pa ang gikinahanglan? Nga kita magpabiling suod sa kongregasyon nga siya mao ang ulo. Sa dihang kita makasala, kinahanglan kitang malugotong maghinulsol ug tinguhaon ang kapasayloan sa Diyos pinasukad sa halad ni Jesus. Niining paagiha, bisan pa sa atong mga pagkadihingpit, kita usab mahimong mga mananaog.

14. (a) Basahang Efeso 6:13-18. (b) Gamita ang mga pangutana ug mga teksto nga gitagana ingong basihanan sa paghisgot sa mga kaayohan gikan sa kada bahin sa espirituwal nga hinagiban.

¹⁴ Aron molampos, gikinahanglan tang isul-ob “ang tibuok hinagiban gikan sa Diyos,” nga walay unsa mang bahin niana nga isalindot. Palihog buksi ang imong Bibliya sa Efeso 6:13-18 ug basaha ang kahubitan sa maong hinagiban. Unya, pinaagig pagtubag sa mga pangutana sa ubos, tagda kon sa unsang paagi ikaw makabenepisyo gikan sa panalipod nga ginahatag sa matag hinagiban.

 “Mga hawak nga binaksan sa kamatuoran”

 Bisan tuod naila ta ang kamatuoran, sa unsang paagi ang regular nga pagtuon, pagpamalandong sa kamatuoran sa Bibliya ug pagtambong sa mga tigom makapanalipod kanato? (Filip. 3:1; 4:8, 9; 1 Cor. 10:12, 13; 2 Cor. 13:5; 1 Ped. 1:13, Kingdom Interlinear)

 “Kotamaya sa pagkamatarong”

 Kang kinsang sukdanan kini sa pagkamatarong? (Pin. 15:3)

 Iilustrar kon sa unsang paagi ang pagsupak sa mga sugo ni Jehova, tungod sa dili pag-ugmad ug gugma dapig sa iyang mga paagi, mahimong magladlad sa usa ngadto sa espirituwal nga kadaot. (Tan-awang 1 Samuel 15:22, 23; Deuteronomio 7:3, 4.)

 “Mga tiil nga nasapinan sa himan sa maayong balita sa pakigdait”

 Sa unsang paagi kana usa ka panalipod alang kanato sa paghimong puliki sa atong mga tiil nga nagapalakat kanato ngadto sa katawhan aron isulti ang mga tagana sa Diyos sa pakigdait? (Roma 10:15; Sal. 73:2, 3; 1 Tim. 5:13)

 “Dakong kalasag sa pagtuo”

 Kon kita adunay pagtuo nga malig-ong napasukad, sa unsang paagi mosanong kita sa dihang makasagubang ug  mga pagsulay nga gituyo aron kita magduhaduha o mahadlok? (Itanding 2 Timoteo 1:12; 2 Hari 6:15-17.)

 “Salukot sa kaluwasan”

 Sa unsang paagi ang paglaom sa kaluwasan moabag sa usa nga dili magpalit-ag sa hinobrang kabalaka sa materyal nga mga kabtangan? (1 Tim. 6:7-10, 19)

 “Espada sa espiritu”

 Diha sa unsa nga kita kinahanglang mosalig kanunay sa dihang nagaiway sa mga hasmag batok sa atong espirituwalidad o nianang sa uban? (Sal. 119:98; Prov. 3:5, 6; itanding Mateo 4:3, 4.)

 Uyon niana, sa Efeso 6:18, 19, unsa pa ang gipakita nga hinungdanon aron molampos diha sa espirituwal nga pakiggubat? Unsa ka subsob nga kana gamiton? Alang kang kinsa?

15. (a) Usa ka personal ba lamang nga pakiggubat sa espirituwal nga kitang tanan nagapakigsangka? (b) Unsaon ta man sa pagdasdas diha sa maong pakigbugno?

¹⁵ Ingong Kristohanong mga sundalo kita bahin sa dakong kasundalohan nga nakigsangka diha sa espirituwal nga pakiggubat. Kon kita padayong maigmat ug gamitog maayo ang bug-os nga hinagiban gikan sa Diyos, kita dili mahimong mga pinatay niining gubata. Hinunoa, kita mahimong makapalig-ong tabang ngadto sa mga isigkaalagad sa Diyos. Kita mahimong andam ug maikagon sa pagdasdas, nga nagamantala sa maayong balita sa Mesiyanikong Gingharian sa Diyos, kanang kagamhanan nga sa hilabihang kapintas ginasupak ni Satanas.

Repasong Panaghisgot

● Ngano ang mga magsisimba ni Jehova nagapanlimbasog nga huptan kanunay ang bug-os nga neyutralidad maylabot sa kasungian tali sa mga grupo sa kalibotan?

● Unsa ang pipila sa malipotong mga galamiton nga gigamit ni Satanas aron ipadangat sa mga Kristohanon ang espirituwal nga kadaot?

● Sa unsang paagi ang hinagiban nga gitagana sa Diyos magpanalipod kanato diha sa mga paagi nga labing hinungdanon ning maong espirituwal nga pakigbugno?

[Mga Pangutana sa Pagtuon]