Pangupot Pag-ayo sa Pulong sa Diyos
Kapitulo 3
Pangupot Pag-ayo sa Pulong sa Diyos
1. (a) Sa unsang paagi natagamtam sa karaang Israel ang pagkatinuod sa Pulong sa Diyos? (b) Ngano nga kana magpainteres kanato?
“KAMO gayod mahibalo sa bug-os ninyong mga kasingkasing ug sa bug-os ninyong mga kalag nga walay usa ka pulong nga nakawang sa tanang maayong mga pulong nga gisulti ni Jehova nga inyong Diyos kaninyo. Ang tanan nahitabo kaninyo.” Mao kini ang pahinumdom nga gihatag ni Josue sa mga ansiano sa Israel human sila mahaluna didto sa Yutang Saad. Pero sa mga tuig sa ulahi sila wala magbutang nga masubayon sa Pulong sa Diyos sa ilang kasingkasing ug pagpadapat niana. Unsa man ang sangpotanan? Ang Bibliya nagpatin-aw nga maingon nga ang mga saad ni Jehova napamatud-an gayod nga kasaligan, mao man, usab, iyang gituman ang iyang gisulti ingong mga sangpotanan sa pagkamasupilon. (Jos. 23:14-16) Kanang maong rekord, ingon man ang ubang bahin sa Bibliya, giampingan para sa atong pagtudlo—aron kita “makabaton ug paglaom” ug aron kita dili mobuhat ug unsa mang butang nga mohatod sa atong pagpildi sa maong paglaom.—Roma 15:4.
2. (a) Diha sa unsang kahulogan nga ang Bibliya “dinasig sa Diyos”? (b) Tungod kay nakaila niini, unsang kaakohan nga atong nahuptan?
2 Bisan tuod mga 40 ka tawhanong “mga sekretaryo” ang gigamit sa pagtala sa Bibliya, si Jehova mismo mao ang Tagmugna niana. Nagkahulogan ba kana nga siya aktibong mitultol sa pagsulat sa tanan nga anaa niana? Oo. Ingon sa matinud-anong pagsulti ni Pablo, “Ang tibuok Kasulatan dinasig sa Diyos.” Tungod kay nakombensir niana, among giawhag ang katawhan bisan diin sa pagsunod niana ug tukoron ang ilang mga kinabuhi sumala sa mga sulod niana, sama gayod sa among gipaninguha sa pagbuhat.—2 Tim. 3:16; 1 Tes. 2:13.
Unsay Makatabang sa Uban sa Pagpabili Niana?
3. Unsa ang labing maayong paagi sa pag-abag sa daghan kanilang dili makombensir nga ang Bibliya mao ang Pulong sa Diyos?
3 Siyempre, daghan ang atong igakasulti nga dili monunot sa atong hugot nga pagtuo nga ang Bibliya tinuod nga Pulong sa Diyos. Unsaon ta man sila sa pagtabang? Sagad, ang labing maayong paagi mao ang pagbukas sa Bibliya ug ipakita kanila ang anaa niana. “Ang pulong sa Diyos buhi ug nagalihok nga gamhanan ug labi pang mahait kay sa espada nga duhay sulab . . . ug motugkad sa mga hunahuna ug katuyoan sa kasingkasing.” (Heb. 4:12) “Ang pulong sa Diyos” mao ang iyang pulong sa saad, nga natala diha sa Bibliya. Dili kini patay nga kasaysayan kondili maoy buhi ug dili mapugngan nga nagapadulong sa katumanan. Ug samtang kana nagakatuman, ang tinuod nga mga panukbil sa kasingkasing sa mga tawo nga makakontak niana mahimong mapadayag maylabot sa pagkab-ot sa mga tulomanon. Ang impluwensiya niana mas gamhanan kaayo kay sa bisan unsa nga sa personal hayan atong ikabungat.
4. Unsang yanong mga pagpatin-aw sa mga kamatuoran sa Bibliya ang nagpabag-o sa tinamdan sa pipila ka tawo bahin sa Bibliya? Ngano?
4 Ang paggamit lang sa ngalan sa Diyos diha sa Bibliya nahimong lisoanang punto alang sa daghang tawo. Ang uban nakahukom sa pagtuon sa Bibliya sa dihang gipakitaan kon unsa ang ginaingon niana bahin sa katuyoan sa kinabuhi, kon nganong gitugotan sa Diyos ang pagkadaotan, ang kahulogan sa mga hitabo karon o ang tinuod nga paglaom nga napunting sa Gingharian sa Diyos. Sa kayutaan nga ang relihiyosong mga buhat nagladlad sa katawhan sa tumang pagsamok sa daotang mga espiritu, ang pagpatin-aw sa Bibliya sa hinungdan niini ug kon unsaon nga makalingkawas nakapukaw ug interes. Ngano nga kining mga puntoha nakadani nila kaayo? Tungod kay ang Bibliya mao ang bugtong tinubdan sa kasaligang impormasyon ning maong hinungdanong mga butang.—Sal. 119:130.
5. Sa moingon ang usa ka tawo nga dili siya motuo sa Bibliya, hayan unsa ang hinungdan? Sa unsang paagi nga matabangan ta siya?
5 Apan, unsa na man kon ang usa ka tawo diretsong mosulti kanato nga siya dili motuo sa Bibliya? Kana ba motapos na gayod sa panaghisgot? Dili kon siya mahinangop nga mangatarongan. Bation ta gayod ang kaakohan sa pagsulti uban ang hugot nga pagtuo dapig sa Pulong sa Diyos. Basin isipon niya nga ang Bibliya ingong basahon nga iya sa Kakristiyanohan. Ang rekord sa Kakristiyanohan sa pagkasalingkapaw ug pagpanghilabot sa politika, maingon man ang iyang kanunayng pagpangayo ug kuwarta, hayan maoy hinungdan sa iyang negatibong tinamdan sa Bibliya. Nganong dili mangutana kon kana ba ang nakaingon? Ang pagtunglo sa Bibliya sa kalibotanong mga paagi sa Kakristiyanohan, uban sa mga puntong dili pareho tali sa Kakristiyanohan ug tinuod nga Kristiyanidad, basin magpapukaw sa iyang interes.—Itanding Mateo 15:7-9; Santiago 4:4; Miqueas 3:11, 12.
6. (a) Unsa ang nagpakombensir kanimo mismo nga ang Bibliya maoy Pulong sa Diyos? (b) Unsang laing mga paagi sa pangatarongan nga mahimong gamiton aron abagan ang mga tawo sa pag-ila nga ang Bibliya tinuod nga gikan sa Diyos?
6 Alang sa uban, ang diretso nga paghisgot sa mga ebidensiya sa inspirasyon sa Bibliya makatabang. Alang kanimo unsa may tin-aw nga nagapamatuod nga ang Bibliya gikan sa Diyos? Mao ba kana mismo ang giingon sa Bibliya maylabot sa tinubdan niana? (2 Tim. 3:16, 17; Pin. 1:1) O mao ba ang kamatuoran nga ang Bibliya nasudlan sa daghang tagna nga nagabanaag sa detalyadong kahibalo sa umaabot, ug busa ang maong mga tagna diay nagagikan sa labaw-tawhanong tinubdan? (2 Ped. 1:20, 21; Isa. 42:9) Mao kaha ang pansulod nga panag-uyonay sa Bibliya, bisan tuod gisulat sa daghang tawo kapin sa yugtong 1,610 ka katuigan? O mao ba ang siyentipikanhong pagkahusto niana nga lahi sa ubang mga sinulat gikan pa sa maong kapanahonan? O ang pagkamadayganon sa mga tagsulat niana? O ang iya bang katunhayan bisan pa sa mabangis nga mga panlimbasog sa paglaglag niana? Unsa man ang imong nakaplagan nga nakapasumeter mahimong magamit usab sa pag-abag sa ubang mga tawo.
Atong Personal nga Pagbasa sa Bibliya
7, 8. (a) Unsa man gayod ang buhaton ta sa tinagsatagsa maylabot sa Bibliya? (b) Unsa ang atong gikinahanglan nga dugang pa sa personal nga pagbasa sa Bibliya, ug giunsa kini pagpakita sa Bibliya mismo? (c) Sa unsang paagi ikaw sa personal nakabaton ug pagsabot sa mga katuyoan ni Jehova?
7 Dugang pa sa pagtabang sa uban sa pagtuo sa Bibliya, gikinahanglan sa atong kaugalingon nga maggahin ug panahon sa pagbasa niana nga makanunayon. Ikaw ba nagabuhat niana? Sa tanang mga libro nga nahimo sukadmasukad, kining usa mao ang labing importante. Natural, wala man magkahulogan nga basahon ta kini nga dili na kita kinahanglang mobasa ug lain. Ang Kasulatan nagapasidaan batok sa pagpalayo sa atong kaugalingon, nga nagahunahuna nga ato mang matino ang tanang butang pinaagig independeyenteng panukiduki. Ang personal nga pagtuon ug regular nga pagtambong sa tigom gikinahanglan kon kita mahimong timbang nga mga Kristohanon.—Prov. 18:1; Heb. 10:24, 25.
8 Para sa atong kaayohan ang Bibliya nagtug-an bahin sa usa ka Etiopianong opisyal nga natunton sa Kristohanong magwawaling si Felipe pinaagig usa ka anghel sa dihang ang maong opisyal nagbasa gikan sa tagna ni Isaias. Gisukna ni Felipe ang tawo: “Nakasabot ka ba gayod sa imong gibasa?” Sa kamapainubsanon mitubag ang Etiopiano: “Sa pagkamatuod, unsaon ko man sa pagkasabot, gawas kon adunay magatudlo kanako?” Iyang gihangyo si Felipe nga ipatin-aw ang maong bahin sa Kasulatan. Niadtong panahona, si Felipe dili kay basta independeyenteng tigbasa sa Bibliya nga didto mihatag sa iyang opinyon maylabot sa Kasulatan. Dili; ang talaan nagbutyag nga siya nagbaton ug suod nga pakiglabot sa mga apostol diha sa kongregasyon nga didto sa Jerusalem ug usa ka membro sa makitang organisasyon ni Jehova. Mao nga iyang natabangan ang Etiopiano sa pagbenepisyo gikan sa instruksiyon nga gitagana ni Jehova pinaagi nianang organisasyona. (Buh. 6:5, 6; 8:5, 14, 15, 26-35) Mao man usab karon, kinsa ba kanato ang nakadangat sa matin-aw ug hustong pagsabot sa mga katuyoan ni Jehova nga pinaagig iyang kaugalingon? Sa kasukwahi, atong gikinahanglan, ug padayon tang gikinahanglan, ang tabang nga mahigugmaong ginatagana ni Jehova pinaagi sa iyang makitang kapunongan.
9. Unsang mga programa sa pagbasa sa Bibliya ang makahatag ug kaayohan kanatong tanan?
9 Aron matabangan kita sa paggamit ug pagsabot sa Bibliya, ang organisasyon ni Jehova nagasuplay ug ekselenteng Kasulatanhong materyal diha sa Ang Bantayanang Torre ug susamang mga basahon. Dugang pa, ang regular nga eskedyol sa pagbasa sa Bibliya gipaigo alang kanato maylabot sa Teokratikanhong Ministeryong Tunghaan diha sa mga kongregasyon sa mga Saksi ni Jehova. Ang uban sa mga Saksi ni Jehova nagahimog mapadayonong pagbasa sa Bibliya nga dugang pa niini. Dakong kaayohan ang maangkon gikan sa panahong gigugol sa pagsusi sa Balaang Kasulatan. (Sal. 1:1-3; 19:7, 8) Sa personal nabasa mo ba ang interong Bibliya? Kon wala pa, panikaysikay gayod nga basahon kana. Bisan tuod dili mo sa bug-os masabtan ang tanan, ang imong pagbaton ug kinatibuk-ang panglantaw niana dako ug bili. Kon basahon mo lang ang upat o lima ka panid sa kada adlaw, imong mahuman ang Bibliya sa mga usa ka tuig.
10. (a) Kanus-a man nimo himoa ang pagbasa sa Bibliya? (b) Ngano ang pagkamakanunayon importante?
10 Kanus-a mo mang sa personal mahikay nga paghimo ning maong pagbasa sa Bibliya? Kon makaarang ka sa paggahin ug bisan 10 o 15 minutos sa matag adlaw, pagkamakaayo gayod kana! Kon dili, ieskedyol labing menos ang regular nga mga panahon alang niana sa matag semana, ug unya padayona ang maong eskedyol. Ang pagbasa sa Bibliya kinahanglang tibuok-kinabuhi nga batasan, samag pagkaon ug kalan-on. Ingon sa nahibaloan mo, kon ang batasan sa pagkaon sa usa ka tawo dili na maayo, ang iyang panglawas madaot. Mao man, usab, sa atong espirituwalidad. Ang atong kinabuhi nagadepende sa atong padayong pagkahimsog pinaagig “matag pulong nga magagula sa baba ni Jehova.”—Mat. 4:4.
11. Unsa man gayod ang atong tumong sa pagbasa sa Bibliya?
11 Unsa man gayod ang atong tumong sa pagbasa sa Bibliya? Maoy sayop kon ang atong tumong mao lamang ang pagkobre ug kab-otonon o kota nga mga panid o gani aron lang gayod makabaton ug kinabuhing dayon. Aron dumalayong makakuhag kaayohan, kinahanglan kitang adunay mas taas nga mga motibo—ang gugma sa Diyos, usa ka tinguha sa pagkaila kaniya nga mas maayo pa, aron sabton ang iyang kabubut-on ug sa pagsimba kaniya nga madawaton. (Juan 5:39-42) Ang atong tinamdan kinahanglang pareho nianang magsusulat sa Bibliya kinsa miingon: “Ipaila mo kanako ang imo mismong mga dalan, O Jehova; itudlo kanako ang imo mismong mga alagianan.”—Sal. 25:4.
12. (a) Ngano ang paghupot ug “tukmang kahibalo” hinungdanon, ug unsang panlimbasog sa dihang nagabasa ang hayan gikinahanglan aron mabatonan kana? (b) Ingon sa gipakita sa panid 27, gikan sa unsang panghunahuna nga sa ikaayo analisahon ta kon unsa ang atong gibasa diha sa Bibliya? (c) Iilustrar kining lima ka punto, nga tinagsatagsa, pinaagig pagtubag sa mga pangutana nga anaa sa kataposan niining parapoha. Paneguroang gamiton ang imong Bibliya.
12 Samtang atong dawaton ang maong pagtudlo, kinahanglang maoy atong tinguha sa pagbaton ug “tukmang kahibalo.” Kon wala kana, unsaon ta man sa pagpadapat sa Pulong sa Diyos sa hustong paagi sa atong kaugalingong mga kinabuhi o sa hustong pagpatin-aw niana ngadto sa uban? (Col. 3:10; 2 Tim. 2:15) Ang pagbaton ug tukmang kahibalo nagakinahanglan nga magabasa nga mabinantayon, kon ang usa ka bahin lalom mahimong kinahanglanong basahon kanag labaw kay sa kausa aron masabtan ang kahulogan niana. Kita usab mabenepisyohan kon maggahin kitag panahon sa pagpamalandong sa materyal, nga nagapalandong niana sa lainlaing punto de bista. Ang lima ka bililhong mga paagi sa panghunahuna nga pagautingkayon gipasiugda sa panid 27 niining libroha. Daghang bahin sa Kasulatan sa ikaayo maanalisar pinaagig paggamit sa usa o mas pa niini. Samtang tubagon mo ang mga pangutana sa sunod nga mga panid imong makita kon sa unsang paagi mamao kana.
(1) Sagad ang bahin sa Kasulatan nga imong ginabasa mohatag ug pipila ka timailhan kon unsang matanga sa pagkapersona si Jehova.
Sa dihang sa mapabilhon palandongon ta ang gibutyag sa Bibliya kanato bahin sa mga buhat ni Jehova sa paglalang, sa unsang paagi mag-apektar kana sa atong tinamdan ngadto kaniya? (Sal. 139:13, 14; gikan sa Job mga kapitulo 38-42 matikdi ilabina ang 38:1, 2 ug 40:2, 8, dayon ang 42:1-6.)
Tungod sa gisulti ni Jesus sa Juan 14:9, 10, unsay atong ikahinapos bahin kang Jehova gikan sa mga hitabo sama nianang usa nga narekord sa Lucas 5:12, 13?
(2) Tagda kon sa unsang paagi ang kasaysayan nagadugang sa kaugmaran sa tema sa Bibliya, nga mao, ang kabayawan sa ngalan ni Jehova ilalom ni Jesu-Kristo ang Sinaad nga Binhi.
Sa unsang paagi ang mga hampak sa Ehipto nalambigit niining temaha? (Tan-awang Exodo 5:2; 9:16; 12:12.)
Unsa na man ang makadasig sa kasingkasing nga kasaysayan maylabot kang Ruth nga Moabita? (Ruth 4:13-17; Mat. 1:1, 5)
Sa unsang paagi natukma ang pahibalo ni Gabriel ngadto kang Maria sa umaabot nga pagkahimugso ni Jesus? (Luc. 1:26-33)
Nganong hinungdanon ang pagdihog sa mga tinun-an ni Jesus pinaagig balaang espiritu sa Pentekostes? (Buh. 2:1-4; 1 Ped. 2:4, 5, 9; 2 Ped. 1:10, 11)
(3) Ang konteksto adunay kalabotan sa kahulogan sa tinong mga bersikulo.
Ngadto kang kinsa gitumong ang mga pahayag sa Roma 5:1 ug 8:16? (Tan-awang Roma 1:7.)
Ang konteksto ba nagapakita nga ang 1 Corinto 2:9 nagkomento bahin sa kinabuhi ibabaw sa yuta sa Bag-ong Kahikayan sa Diyos? Ingon sa gibutyag sa mga bersikulo 6-8, kinsang mga mata ug mga igdulungog ang wala makasabot sa mga butang nga bahin niana si Pablo misulat?
(4) Suknaang imong kaugalingon kon unsaon mo sa paghimog personal nga pagpadapat sa imong ginabasa.
Ang talaan ba bahin sa pagpatay ni Cain kang Abel maoy alang lang sa kasaysayanhong interes o aduna bay tambag niana alang kanato? (Gen. 4:3-12; 1 Juan 3:10-15; Heb. 11:4)
Kon basahon ta (diha sa Exodo hangtod sa Deuteronomio) ang mga kasinatian sa Israel didto sa kamingawan, unsang personal nga pagpadapat ang kinahanglang atong himoon? (1 Cor. 10:6-11)
Ang talambagan mahitungod sa kagawian nga gisulat ngadto sa dinihogang mga Kristohanon mapadapat ba ngadto sa mga tawo nga adunay paglaom sa kinabuhing dayon ibabaw sa yuta? (Itanding Numeros 15:16; Juan 10:16.)
Bisan tuod maayo ang atong binuhatan uban sa Kristohanong kongregasyon, aduna bay panginahanglan sa pagtagad sa mga paagi nga mas bug-os ikapadapat ang tambag sa Bibliya nga ato nang nakat-onan? (2 Cor. 13:5; 1 Tes. 4:1)
(5) Palandonga kon unsaon mo kaha sa paggamit ang imong nabasa aron tabangan ang uban.
Kinsa ang hayan maabagan ginamit ang kasaysayan sa pagkabanhaw sa babayeng anak ni Jairo? (Luc. 8:41, 42, 49-56)
13. Unsang mga resulta nga atong madahom tungod sa padayong programa sa pagbasa sa Bibliya ug pagtuon uban sa kapunongan ni Jehova?
13 Pagkamagantihon uyamot ang pagbasa sa Bibliya sa dihang himoon niining paagiha! Sa pagpaneguro, ang pagbasa sa Bibliya usa ka hagit—proyekto nga sa ikaayo mabuhat ta sa tibuok-panahong kinabuhi. Pero samtang atong buhaton kana kita dugang man nga mapalig-on sa espirituwal. Kana magpasuod kanato sa atong mahigugmaong Amahan, si Jehova, ug sa atong Kristohanong mga igsoon. Motabang kana nato sa pagtuman sa tambag nga padayong “mangupot pag-ayo sa pulong sa kinabuhi.”—Filip. 2:16.
Repasong Panaghisgot
● Ngano nga ang Bibliya gisulat ug giampingan hangtod sa atong adlaw?
● Unsaon ta man sa pagtabang sa uban nga magpabili niana?
● Nganong makaayo man ang regular personal nga pagbasa sa Bibliya? Gikan sa unsang lima ka panghunahuna nga sa ikaayo analisahon kon unsa ang atong nabasa?
[Mga Pangutana sa Pagtuon]
[Kahon/Hulagway sa panid 27]
Sa Basahon Mo ang Bibliya Tagda—
Kon unsa ang gitug-an kanimo sa matag bahin mahitungod kang Jehova ingon nga persona
Kon giunsa kana sa paglambigit sa kinatibuk-ang tema sa Bibliya
Kon sa unsang paagi ang konteksto mag-apektar sa kahulogan
Kon sa unsang paagi mag-apektar kana gayod sa imo mismong kinabuhi
Kon unsaon mo kana sa paggamit sa pagtabang sa uban
