Kapitulo 16

Patalinghogi ang Tambag, Dawata ang Disiplina

1. (a) Aduna bay bisan kinsa kanato nga dili na kinahanglang tambagan ug disiplinahon? (b) Pero unsang mga pangutana nga makaayo kanatong pagatagdon?

 KADAGHANAN kanato mouyon dayon sa kasulatan nga nag-ingon: “Kitang tanan ugod mangasayop man sa makadaghan.” (Sant. 3:2) Dili malisod sa pagpalandong sa mga hitabo nga kita napakyas sa pagkahimong matang sa tawo nga giawhag sa Pulong sa Diyos nga kab-oton ta ug maoy atong gusto nga maingon niana. Mao nga atong giila nga husto ang Bibliya sa dihang miingon kini kanato: “Patalinghog sa tambag ug dawata ang pahamatngon, aron ikaw mahimong maalamon sa imong ugma-damlag.” (Prov. 19:20) Sayod kita nga gikinahanglan nato ang maong tabang. Sa walay duhaduha gihimo ta ang mga kausaban sa atong mga kinabuhi aron ipahiuyon kini sa atong nakat-onan gikan sa Bibliya. Pero unsa man ang atong pagsanong kon ang kaubang Kristohanon nagatambag kanato sa personal bahin sa espisipikong butang nga naggawi kitang dili maalamon? O unsa man kon siya igo lang nagasugyot kon unsaon tingali nga mapauswag ang pipila ka buluhaton?

2. (a) Nganong atong ipakita ang pagpabili sa personal nga tambag? (b) Sa unsang paagi kita dili gayod mosinta?

² Bisan pa sa atong dihadiha pansulod nga pagsinta tungod sa dihingpit tawhanong kinaiya, kita gayod tim-os nga mopatugbaw ug pagpabili sa tambag ug manlimbasog sa pagpadapat niana. Ang sangpotanan sa atong pagbuhat niana makaayo. (Heb. 12:11) Apan, hayan, sa dihang gitambagan, kita nanlimbasog sa pagpakamatarong sa kaugalingon, giyanoyano ra ang kaseryoso sa kahimtang o lain ang pasanginlan. Ikaw ba sukad misinta na nianang paagiha? Sa mahinumdoman ta ang nahitabo, kita ba bation ug kalagot ngadto sa usa nga mihatag sa maong tambag? Kita ba  mahiligon nga mangitag kasaypanan sa usa nga mitambag kanato o ang paagi sa iyang pagtambag, nga maorag kini magpalingkawas sa atong kaugalingong mga kahuyangan? Ang Bibliya makaabag ba sa usa ka tawo sa pagbuntog sa maong mga hilig?

Mga Panig-ingnang Gitala Para sa Atong Pahimangno

3. (a) Unsay anaa sa Bibliya nga makatabang kanato sa pag-ugmad sa hustong tinamdan maylabot sa tambag ug disiplina? (b) Gamita ang mga pangutana nga gitagana sa itaas aron analisahon ang mga pagsinta ni Saul ug Uzzias sa tambag.

³ Dugang pa sa pagtagana ug dagayang laktod nga pahimangno niining maong ulohan, ang Pulong sa Diyos nasudlan sa tinuod-kinabuhing mga kasinatian bahin sa mga tawo nga gitambagan. Sagad ang tambag maoy disiplina usab, kay ang usa nga nagadawat niana kinahanglan man nga magbag-o sa iyang tinamdan o iyang pamatasan. Samtang gamiton mo ang mga pangutana sa ubos sa pagsusi sa pipila niining mga panig-ingnana, imong makaplagan nga dakong kaayohan ang makuha natong tanan gikan niana:

 SAUL, ANAK NI CIS: Napakyas siya sa bug-os nga pagsunod kang Jehova kay, dihang nakiggubat batok kang Amalek, wala niya patya ang hari ug ang labing maayo sa ilang mga mananap. (1 Sam. 15:1-11)

 Sa tubag ni Saul sa mabadlongong tambag nga gihatag ni Samuel, unsay nagpakita nga siya misulay sa pagpayano sa sala? (Ber. 20) Kinsa ang iyang gipaninguhang dakdakan sa pagbasol? (Ber. 21) Sa dihang gidawat ra niya ang sala, unsay pasangil ang iyang gihimo? (Ber. 24) Daw siya labaw kaayong nabalaka bahin sa unsa bisan midangat na niining puntoha? (Ber. 25, 30)

 UZZIAS: Siya misulod sa templo ni Jehova aron sa pagsunog ug insenso, bisan tuod ang mga saserdote lamang ang may katungod sa pagbuhat niini. (2 Cron. 26:16-20)

 Sa gisulayan sa pangulong saserdote pagpahunong kang Haring Uzzias, nganong misinta ang hari sa kasuko? (Itanding bersikulo 16.) Unsa ang gisangpotan? (Ber. 19-21)

4. (a) Nganong nalisdan si Saul ug Uzzias sa pagdawat ug tambag? (b) Ngano nga kana mabug-at usab nga suliran karon?

⁴ Sa kada usa niining mga kasoha, ngano ang maong  indibiduwal nalisdan sa pagsagubang sa panginahanglan ug tambag? Ang pasukaranang hinungdan mao ang garbo, nga sobra kaayo ang pagtagad sa kaugalingon. Daghang tawo karon naghatag ug tumang kagul-anan sa ilang kaugalingon tungod niining kinaiyaha. Tungod kay nakakab-ot na sa ilang giisip nga momaayong kabutang, kon kana ba tungod sa edad o katungdanan, sila dili madinawaton sa personal nga tambag. Daw ilang bation nga kana maorag may pipila ka kakulangan diha kanila o magpadaot sa ilang kadungganan. Pero ang tinuod nga nagbutyag sa kahuyangan mao ang garbo. Dili kini ikapangulipas diha sa iyang kaugalingon tungod lang kay ang maong kasaypanan dagsang. Lit-ag kini nga gigamit ni Satanas aron lipongon o taptapan ang panghunahuna sa usa ka tawo aron siya mosukol sa mahigugmaong tabang nga gitagana ni Jehova pinaagi sa iyang Pulong ug sa iyang makitang kapunongan. Si Jehova nagpasidaan: “Ang pagkagarboso magauna sa pagkalaglag, ug ang mapahitas-ong espiritu magauna sa pagkapandol.”​—Prov. 16:18; tan-awa usab ang Roma 12:3; Proverbio 16:5.

5. Gamita ang mga pangutana nga apil niining parapoha aron sa pagtino kon unsang mga leksiyon ang makat-onan gikan sa kasaysayan nila ni Moises ug David.

⁵ Sa laing bahin, ang Kasulatan nasudlan sa maayo kaayong mga sumbanan niadtong mingdawat ug talambagan. Ang bililhong mga leksiyon makat-onan usab gikan kanila. Tagda:

 MOISES: Iyang ugangang lalaki mihatag kaniyag mapuslanong tambag kon unsaon sa pagdumala sa mabug-at nga kaakohan nga dili magpadaot sa iyang panglawas. Si Moises nagpatalinghog ug dihadiha mipadapat niana. (Ex. 18:13-24)

 Bisan tuod si Moises naghupot ug dakong awtoridad, ngano man siyang madawaton kaayo sa maligdong nga tambag? (Itanding Numeros 12:3.) Unsa ka importante kanang hiyasa alang kanato? (Sof. 2:3)

 DAVID: Siya nakasala sa panapaw, unya sa malansison iyang gipapatay ang bana sa maong babaye aron si David maminyo kaniya ug sa ingon nagtabon sa panapaw. Milabay ang mga bulan antes gipadala ni Jehova si Natan aron badlongon si David. (2 Sam. 11:2–12:12)

  Si David ba nasuko sa maong pagbadlong, nga giyanoyano lang ang sala o misulay nga iwaling ang pagbasol? (2 Sam. 12:13; Sal. 51:superscription ug ber. 1-3) Ang kamatuoran ba nga gidawat sa Diyos ang paghinulsol ni David nagkahulogan nga si David ug ang iyang panimalay libre na sa daotang mga epekto gikan sa iyang kasal-anan? (2 Sam. 12:10, 11, 14; Ex. 34:6, 7)

6. (a) Unsa ang pagbati ni David bahin kanilang mihatag kaniya ug maligdong nga tambag? (b) Sa unsang paagi kita mabenepisyohan kon andam kitang modawat sa maong tambag? (c) Unsa ang kinahanglang dili ta kalimtan kon kita grabeng ginadisiplina?

⁶ Hibalo kaayo si David sa kaayohan sa pagpatalinghog sa maligdong tambag, ug sa angayng panahon nagpasalamat sa Diyos tungod sa tawo nga gigikanan niana. (1 Sam. 25:32-35; tan-awa usab ang Proverbio 9:8.) Kita ba pareho niana? Kon mao, kita mapanalipdan batok sa pagsulti ug pagbuhat sa daghang butang nga magpahinabog pagbasol. Pero kon makasugamak kitag mga kahimtang nga mohatod sa atong grabeng pagkadisiplina, sama kang David maylabot sa iyang sala kang Batseba, hinaot dili ta kalimtan ang kamatuoran nga ang disiplina maoy ebidensiya sa gugma ni Jehova, uban sa panglantaw sa atong dumalayong kaayohan.​—Prov. 3:11, 12; 4:13.

Hamili nga mga Hiyas nga Pagaugmaron

7. Unsang hiyas ang gipakita ni Jesus nga kinahanglang batonan sa mga tawo aron makasulod sa Gingharian?

⁷ Aron mabatonan ang maayong relasyon uban ni Jehova ug sa atong Kristohanong kaigsoonan, gikinahanglan tang ugmaron ang tinong personal nga mga hiyas. Gipasiugda ni Jesus ang usa niini sa iyang gipahimutang ang usa ka gamayng bata taliwala sa iyang mga tinun-an ug miingon: “Gawas kon mangausab kamo ug mangahimong sama sa gagmayng mga bata, dili gayod kamo makasulod sa gingharian sa mga langit. Busa, bisan kinsa nga magpakaubos sa iyang kaugalingon sama niining gamayng bata mao siya ang labing dako sa gingharian sa mga langit.” (Mat. 18:3, 4) Kadtong maong mga tinun-an gikinahanglang magbag-o. Kinahanglan nilang isalindot ang ilang garbo ug ugmaron ang pagkamapainubsanon.

8. (a) Atubangan kang kinsa nga kita kinahanglang magmapainubsanon, ug ngano? (b) Kon kita mapainubsanon, unsa ang atong pagsanong sa tambag?

 ⁸ Sa ulahi ang apostol nga si Pedro misulat ngadto sa kaubanang mga Kristohanon: “Kamong tanan sul-obi ang inyong kaugalingon sa pagkamapainubsanon sa hunahuna ngadto sa usag usa, kay ang Diyos magabatok sa mga mapahitas-on, apan siya magahatag ug di-takos nga kalulot ngadto sa mga mapaubsanon.” (1 Ped. 5:5) Sayod kita nga gikinahanglan tang magmapainubsanon atubangan sa Diyos, pero kining kasulatana nag-ingon nga kinahanglan kitang mahimong mapaubsanon, o maaghop sa hunahuna, usab diha sa atong mga pakiglabot sa kaubanang mga magtutuo. Kon kita mapaubsanon, dili kita sa hinangal mosinta sa mga sugyot nga ila tingaling igahatag. Kita mahinangop sa pagkat-on gikan sa usag usa. (Prov. 12:15) Ug kon makita sa atong mga igsoon nga kinahanglanong hatagan kitag matul-irong tambag, nan, kay ginaila nga si Jehova mahigugmaong nagagamit niining paagiha sa paghulma (molde) kanato, dili ta kana isalikway.​—Sal. 141:5.

9. (a) Unsang importanteng hiyas nga suod nga nalambigit sa pagkamapainubsanon? (b) Nganong kita gayod mabalaka bahin sa epekto sa atong kagawian diha sa uban?

⁹ Ang laing hiyas, nga suod nga nalambigit sa pagkamapainubsanon, mao ang dalisay nga kabalaka alang sa kaayohan sa uban. Dili kita makaipsot sa kamatuoran nga ang atong ginabuhat mag-apektar sa ubang mga tawo. Mitambag ang apostol nga si Pablo sa unang mga Kristohanon sa Corinto ug Roma nga ipakita ang kabalaka alang sa tanlag sa uban. Wala siya mag-ingon nga ila nang isalindot ang tanang personal nga mga kapilian, pero iyang giagda sila nga dili magbuhat ug bisan unsa nga mahimong magpaisog sa laing tawo sa pagbuhat nianang gitug-an sa iyang konsensiya nga daotan, nga niana magpatumpawak ngadto sa iyang espirituwal nga kadaot. Nga matin-awng gipatugbaw ang linangkob nga prinsipyo, si Pablo misulat: “Pasagding ang matag usa padayong maningkamot, dili sa iyang kaugalingong kaayohan, kondili nianang sa laing tawo. . . . Busa, kamo man magakaon o magainom o magabuhat sa bisan unsa, buhata ninyo ang tanang butang alang sa himaya sa Diyos. Ayaw ninyog hatagig hinungdan sa pagkapandol sa  mga Hudiyo ingon man sa mga Grego ug sa kongregasyon sa Diyos.”​—1 Cor. 10:24-33; 8:4-13; Roma 14:13-23.

10. Hayan maglakip ug unsa sa pagpakita kon kita ba nagabatasan sa pagpadapat sa maong Kasulatanhong tambag?

¹⁰ Ikaw ba usa ka tawong nagabatasan nga unahon ang kaayohan sa laing mga tawo kay sa personal nga kapilian? Adunay daghang paagi nga kini mahimong buhaton, pero tagda ang usa ka ehemplo: Sa linangkob nga pagkasulti, ang senina ug pamostura, maoy mga butang nga sumala lamang sa personal nga kaangayan, basta kita anaa sa kasarangan, mahapsay ug mahinlo. Pero kon imong masayran nga, tungod sa kaagi sa katawhan sa inyong komunidad, ang imong paagi sa pamisti o pamostura nagabalda sa uban sa pagpaminaw sa mensahe sa Gingharian, ikaw ba maghimog mga kausaban? Ang kinabuhi ba sa laing tawo mas importante alang kanimo kay sa pagpahimuot sa kaugalingon?

11. Unsay nagapakita nga hinungdanon sa pag-ugmad niining mga hiyasa kon kita gayod gustong mahimong mga Kristohanon?

¹¹ Sa dihang ang mga hiyas nga gihisgotan sa itaas mahimong bahin sa atong personalidad, kini mohatag pamatuod nga kita nagasugod sa pagbaton sa hunahuna ni Kristo. Diha sa pagpaubos, si Jesus mihatag ug hingpit nga sumbanan. (Juan 13:12-15; Filip. 2:5-8) Diha sa pagpakitag kabalaka alang sa uban, inay kay pahimut-an ra ang iyang kaugalingon, siya nagpahimutag panig-ingnan alang kanato nga pagasundogon.​—Roma 15:2, 3.

Ayawg Isalindot ang Disiplina nga Iya ni Jehova

12. (a) Unsang mga kausaban nga gikinahanglang himoon natong tanan aron makahupot ug personalidad nga makapahimuot sa Diyos? (b) Unsa ang makatabang kanato?

¹² Tungod kay kitang tanan mga makasasala, ang mga kausaban sa atong tinamdan, atong sinultihan ug atong pamatasan gikinahanglan alang kanato aron isumbaliksilaw ang personalidad sa atong Diyos. Gikinahanglan tang isul-ob ang “bag-ong pagkatawo.” (Col. 3:5-14; Tito 2:11-14) Ang tambag ug disiplina motabang kanato sa pag-ila sa mga luna diin ang mga kausaban gikinahanglan ug dayon sa pagtino kon unsaon sa paghimo niini.

13. (a) Pinaagig unsang paagi nga si Jehova nagtaganag tambag ug disiplina alang kanatong tanan? (b) Unsa man gayod ang buhaton ta niana?

 ¹³ Ang pasukaranang gigikanan nianang maong pagtudlo mao ang Bibliya mismo. (2 Tim. 3:16, 17) Unya pinaagig mga basahon sa Bibliya ug mga miting nga gitagana sa makitang kapunongan ni Jehova siya nagaabag kanato sa pagtino sa paagi nga kana ikapadapat. Sa pagkamapaubsanon ato bang ilhon ang personal ta nga panginahanglan niana​—bisan pa kon nadungog na nato kana sa miagi​—ug sa pagtinguha kanunay sa paghimog kauswagan?

14. Ingong mga indibiduwal unsang dugang tabang ang gitagana ni Jehova alang kanato?

¹⁴ Si Jehova dili magpasagad kanato lamang sa pagpakigbugno sa mga butang nga sa linain suliran alang kanato. Uban sa mahigugmaong kabalaka, siya nagatagana alang sa personal nga tabang. Mga menilyon sa katawhan ang nakabenepisyo gikan sa maong tabang pinaagig mga pagtuon sa Bibliya sa balay. Ang mga ginikanan adunay espesyal nga kaakohang disiplinahon ang ilang mga anak aron sa pagpanalipod kanila batok sa kagawian nga magpahinabog dakong kasakit sa kasingkasing sa ulahing kinabuhi. (Prov. 6:20-35; 15:5) Sulod sa kongregasyon, usab, silang adunay espirituwal nga mga katakos nagapas-an ug kaakohan sa paggamit sa Kasulatan aron ipatakdo pag-usab o ipahiuli ang uban sa dihang ang panginahanglan ilang makita, pero nagabuhat niana diha sa espiritu sa kalumo. (Gal. 6:1, 2) Niining mga paagiha si Jehova nagatambag ug nagadisiplina kanato aron kita makasimba kaniya ingong nahiusang katawhan.

Repasong Panaghisgot

● Sa unsang paagi si Jehova mahigugmaong nagatabang kanato sa pagtino kon diin sa personal gikinahanglan ta ang paghimog mga kausaban?

● Nganong daghang tawo nalisdan sa pagdawat ug tambag? Unsa ka bug-at kini?

● Unsang bililhong mga hiyas ang motabang kanato nga magmadawaton ug tambag? Giunsa ni Jesus sa paghatag ug panig-ingnan niini?

[Mga Pangutana sa Pagtuon]