Kapitulo 13

Usa ka Dakong Panon Atubangan sa Trono ni Jehova

1. (a) Sa dili pa ang antes-Kristohanong mga alagad sa Diyos o ang 144,000 man makadawat sa ilang ganti, unsa ang kinahanglan nilang masinatian? (b) Pero unsa ang mahimong posible alang sa dakong panon kinsa buhi sa dihang mohampak ang “dakong kasakitan”?

 BISAN tuod ang pagbuhat sa kabubut-on sa Diyos giuna sa ilang mga kinabuhi sa matinumanong mga alagad sa Diyos gikan kang Abel ngadto kang Juan nga Bautista, silang tanan namatay gayod ug nagahulat sa pagkabanhaw. Ang 144,000 kinsa mahiuban ni Kristo sa iyang langitnong Gingharian kinahanglan usab nga mamatay sa dili pa nila dawaton ang ilang ganti. Sa kasukwahi, ang apostol nga si Juan gipakitaan diha sa panan-awon nga adunay usa ka dakong panon nga makalabang gayong buhi sa “dakong kasakitan” ug, nga dili na mamatay, nagahupot ug paglaom sa pagkabuhi sa walay kataposan.​—Pin. 7:9-17.

Pagkanailhan sa “Dakong Panon”

2. Unsay nagpatultol ngadto sa matin-aw nga pagsabot sa pagkanailhan sa “dakong panon” sa Pinadayag 7:9?

² Sa kasiglohan ang pagkanailhan ning maong “dakong panon” wala masabti. Pero ang mauswagong pagsabot sa nalambigit nga mga tagna nagbukas sa dalan. Sa 1923 nasabtan nga ang “mga karnero” sa sambingay ni Jesus sa Mateo 25:31-46 ug ang “ubang mga karnero” nga iyang gipunting sa Juan 10:16 maoy mga tawo nga buhi karon kinsa adunay kahigayonan sa pagpuyo ibabaw sa yuta sa walay kataposan. Sa 1931 sila nga gihubit diha sa Ezekiel 9:1-11 ingong gipatikan sa ilang mga agtang sa tawo nga  may dalang tintero sa sekretaryo nailhan nga mao ang “mga karnero” sa Mateo kapitulo 25. Unya, sa 1935, ang “dakong panon sa katawhan,” o “dakong panon,” sa Pinadayag 7:9-17 nasabtan nga mao ang “mga karnero” sa sambingay ni Jesus sa mga karnero ug mga kanding. Bisan tuod sa 1923 naamgohan nga ang pipila sa maong karnerohong mga tawo sa ilang kaugalingon nagsugod na sa pagpadayag, hangtod na lamang sa 1935 nga ang ilang gidaghanon misugod sa kusog nga pag-uswag. Karon aduna ing mga menilyon gayod kinsa nagatinguha nga mailhan ingong bahin nianang balaan nauyonang “dakong panon” sa “ubang mga karnero.”

3. Ngano ang ilang “pagbarog atubangan sa trono” wala magkahulogan nga sila iya sa langitnong matang?

³ Kadtong iya sa “dakong panon” gibutyag nga lain sa 144,000 nga mga membro sa espirituwal nga Israel, nga sa miagi gitumong diha sa samang kapitulo sa Pinadayag. Sa iyang panan-awon si Juan wala makakita niining “dakong panon” ingong atua sa langit. Ang ilang “pagbarog atubangan sa trono” (Grego: e·noʹpi·on tou throʹnou, “nga makit-an sa trono”) sa Diyos wala magkinahanglan nga sila atua sa langit. Ang ilang kahimtang mao “nga makit-an” lamang sa Diyos, kinsa nagtug-an kanato nga gikan sa langit iyang ginalantaw ang mga anak sa mga tawo. (Pin. 7:9; Sal. 11:4; itanding Salmo 100:1, 2, usab ang Lucas 1:74, 75 ug Buhat 10:33, Kingdom Interlinear.) Mao man usab, dili kinahanglan alang sa “tanang kanasoran” nga mahaadto sa langit aron sila mahamutang sa atubangan sa trono ni Kristo (sa literal o maohon, “sa iyang atubangan”), ingon sa gihubit sa Mateo 25:31, 32. Ang kamatuoran nga ang “dakong panon, nga walay tawo nga arang makaihap,” dili langitnong matang gipakita pinaagig pagtandi sa Pinadayag 7:4-8 ug 14:1-4, diin ang tino nga gidaghanon kanilang gikuha gikan sa yuta aron mahalangit gibutyag.

4. (a) Unsa ang “dakong kasakitan” nga sila makalabang-buhi? (b) Ingon sa gihisgotan sa Pinadayag 7:11, 12, kinsa ang nagapaniid sa “dakong panon” ug nagaduyog kanila diha sa pagsimba?

⁴ Sa pagpaila sa “dakong panon,” si Juan misulat: “Mao  kini sila ang nanagpakalabang sa dakong kasakitan.” Ang ilang labangong-buhi maoy, sa pagkamatuod, ang labing dakong kasakitan nga sukad naagoman sa yuta. (Pin. 7:13, 14; Mat. 24:21) Ang mga maluwas nianang makalilisang nga adlaw ni Jehova dili magduhaduha kon kinsay kapahinungdan tungod sa ilang kaluwasan. Sa dihang sila mapasalamatong ipahinungod ang ilang kaluwasan ngadto sa Diyos ug sa Kordero, unya, ingon sa nakita ni Juan sa panan-awon, ang tanang matinumanong mga linalang sa langit magahiusa sa ilang mga tingog duyog kanila diha sa pagsimba sa bugtong matuod nga Diyos, nga nagaingon: “Amen! Ang pagdayeg ug ang himaya ug ang kaalam ug ang pagpasalamat ug ang kadungganan ug ang pagbulot-an ug kagahom ipahinungod ngadto sa atong Diyos hangtod sa kahangtoran. Amen.”​—Pin. 7:11, 12.

Gisulayan sa Pagkatakos sa Kaluwasan

5. (a) Unsaon ta sa pagtino kon unsa ang gikinahanglan aron mahimong bahin sa “dakong panon” nga pagaluwason? (b) Pinaagig pagtubag sa mga pangutana sa kataposan niining parapoha, ipatin-aw kon unsa ang gikinahanglan aron maluwas sa “dakong kasakitan.”

⁵ Ang kaluwasan sa “dakong panon” mahitabo nga uyon sa kaugalingong matarong nga mga sukdanan ni Jehova. Ang matin-aw nga mga timailhan sa maduyogong mga kinaiya niadtong pagaluwason nalangkob man diha sa matagnaong mga reperensiya alang kanila. Busa posible alang sa mga mahigugmaon sa pagkamatarong sa paglihok na karon uban sa panglantaw sa kaluwasan. Among gipunting na kana sa mga kasulatan nga mosunod. Pero karon analisaha kini ug maayo, uban sa tabang sa dugang mga teksto nga gisitar, ug tagda kon unsa gayod ang imong buhaton aron makapahiuyon ning maong matagnaong kabatbatan.

 “Ubang mga karnero” nga gipunting sa Juan 10:16

 Unsa may kahulogan niana alang sa usa ka tawo nga tinuod nga nagapatalinghog sa tingog ni Jesus? (Juan 10:27; Mat. 9:9; Efe. 4:17-24)

 Unsaon ta man sa pagpakita nga atong ginaila si Kristo ingong atong “usa ka magbalantay”? (Mat. 23:10, 11)

  “Karnero” diha sa ilustrasyon ni Jesus sa mga karnero ug mga kanding (Mat. 25:31-46)

 Kinsa man ang “mga igsoon” ni Kristo nga kanila kini sila nagabuhat ug maayo? (Heb. 2:10, 11; 3:1)

 Ubos sa unsang malisod nga mga kahimtang nga gikinahanglan nilang iduyog ang ilang kaugalingon sa mga igsoon ni Kristo dinhi sa yuta? Ug diha sa unsang buluhaton nga sila maunongong nagatabang? (Pin. 12:12, 17; Mat. 24:14; 28:19, 20)

 Mga tawong gipatikan alang sa kaluwasan pinaagig tawo nga may dalang tintero sa sekretaryo (Ezek. 9:1-11)

 Giunsa man nila sa pagpakita nga dili sila uyon sa dulumtanang mga butang nga gibuhat diha sa katumanang Jerusalem, o Kakristiyanohan? (Pin. 18:4, 5)

 Unsay apil diha sa “patik” nga nagapalahi kanila gikan sa nag-angkon lang nga mga Kristohanon ug magpalaray kanila alang sa kaluwasan? (1 Ped. 3:21; Mat. 7:21-27; Juan 13:35)

6. Sa unsang paagi ang kahubitan ni Juan sa “dakong panon” makatabang kanato sa pagsabot kon nganong sila giluwas?

⁶ Ang kahubitan sa “dakong panon” ingon sa makaplagan sa Pinadayag 7:9-15 naghatag ug dugang importanteng mga detalye. Sa pagtug-an kanato kon sa unsang paagi silang iya sa “dakong panon” mopatim-aw human sa “dakong kasakitan,” ang Kasulatan usab nagpaalinggat sa mga butang nga mitultol ngadto sa ilang pagkaluwas.

7. Unsa ang ilang gibuhat sa wala pa ang “dakong kasakitan,” ug giunsa kini pagpaila?

⁷ Bisan tuod sila gikan sa tanang kanasoran, kabanayan, katawhan ug pinulongan, sila gipakita nga mausahong “nagbarog atubangan sa trono,” nga nagahatag ug pag-ila kang Jehova, ang Usa nga naglingkod sa trono, ingong mao ang Unibersohanong Magmamando. Ilang gipamatud-an pinaagig pagkinabuhi nga sila mga maunongong tigbayaw sa iyang pagmando. Ang punto nga ilang “gilabhan ang ilang tag-as nga mga bisti ug gipaputi diha sa dugo sa Kordero” nagbutyag nga ilang giila ang ilang panginahanglan sa halad-sala nga bili sa halad ni Jesus ingong ang Kordero sa Diyos. (Juan 1:29; 1 Juan 2:2) Diha sa pagtuo ilang gipahinungod ang ilang kaugalingon sa Diyos pinasukad  nianang maong halad, nagpasimbolo niini pinaagig paglusbog sa tubig ug karon nagatagamtam ug mahinlong pagbarog atubangan sa Diyos, ingon sa gihulagwayan sa ilang maputing tag-as nga mga bisti. Wala sila maminghoy sa publikong pagpadayag sa ilang pagtuo diha sa Anak sa Diyos. (Mat. 10:32, 33) Nga masubayon niining tanan, sila gipakita ingong atua sa templo sa Diyos, o sa unibersohanong balay sa pagsimba, ingong mga magsisimba kinsa nagahimog “balaang pag-alagad sa adlaw ug sa gabii.” Mao nga sila nakahimog rekord ingong maunongong mga tigpaluyo sa matuod nga pagsimba ug mga magmamantala sa iyang Gingharian.​—Isa. 2:2, 3.

8. Para kining maong impormasyon magpabenepisyo kanato, unsa ang kinahanglan natong buhaton?

⁸ Ang mga detalye ba ning maong matagnaong mga hulagway haom kanimo? Aduna pa bay mga paagi nga gikinahanglan mong dugang ipahiuyon ang imong kinabuhi kon unsa ang gihubit dinhi? Kon mao, karon na ang panahon sa pagbuhat niana!

Pagkinabuhi Diha sa Espirituwal nga Paraiso

9. Giunsa ni Juan sa paghubit ang espirituwal nga mga panalangin nga ginatagamtam sa “dakong panon” bisan karon?

⁹ Ikaw ba usa nga nagalaom nga maluwas ingong bahin sa “dakong panon”? Kon ikaw nagsunod sa matarong nga mga dalan ni Jehova, nan sa walay duhaduha ikaw misugod na sa pagtagamtam sa gisaad nga mga kahimtang nga sa tukma ginganlag espirituwal nga paraiso. Giingnan si apostol Juan: “Sila dili na gutomon ni pagauhawon pa man, ni sila pagahasolon sa adlaw ni sa bisan unsang makasunog nga kainit, kay ang Kordero, kinsa anaa sa taliwala sa trono, magabantay kanila, ug magatultol kanila ngadto sa mga tuboran sa mga tubig sa kinabuhi. Ug pagapahiran sa Diyos ang tanang luha sa ilang mga mata.” (Pin. 7:16, 17) Giunsa kini sa pagkahimong matuod sa imong kahimtang?

10. (a) Diha sa espirituwal nga kahulogan sa unsang paagi tinuod nga ang “dakong panon” “dili na gutomon ni pagauhawon”? (b) Kini ba imo nang natagamtam?

¹⁰ Sa wala pa makadangat ubos sa mahigugmaong pag-amoma  sa Maayong Magbalantay, si Jesu-Kristo, ikaw ba gigutom ug giuhaw sa pagkamatarong? (Itanding Mateo 5:6.) Kon mao, ang imong gipangandoy butang kana nga ikatagana lamang ni Jehova pinaagi sa iyang Anak. Sa nakat-onan mo ang matarong nga mga paagi ni Jehova​—iyang katuyoan sa paglaglag sa mga daotan, apan ang di-takos nga kalulot niya sa paghimong posible sa kaluwasan alang sa kaanakan ni Adan​—nan, sa walay duhaduha, sa unang higayon sa imong kinabuhi imong gibati gayod ang pagkatagbaw. Ang espirituwal nga pagkaon ug ilimnon gikan sa Pulong sa Diyos, ingong gibayang pinaagi sa iyang kapunongan, padayon nga mihatag kanimog katagbawan. (Isa. 65:13, 14) Ug kon imong gipahinungod ang imong kaugalingon sa Diyos pinaagi ni Kristo ikaw karon aduna na ing tinuod nga katuyoan sa kinabuhi. (Itanding Juan 4:32-34.) Sa imong atubangan mao ang malipayong kalaoman sa kinabuhing dayon diha sa Paraisong yuta, kay ang Kordero “magatultol [sa “dakong panon”] ngadto sa mga tuboran sa mga tubig sa kinabuhi.”

11. (a) Diha sa unsang paagi tinuod nga ‘ni sila pagahasolon sa adlaw ni sa bisan unsang makasunog nga kainit’? (b) Unsa ka importante kana alang kanimo?

¹¹ Ingong masaligong “mga karnero,” silang iya sa “dakong panon” ginapanalipdan usab ug luwas nga gigiyahan sa Maayong Magbalantay. Maoy hinungdan, sa makahulaganong pagkasulti ‘ni sila pagahasolon sa adlaw ni sa bisan unsang makasunog nga kainit.’ Wala kini magpasabot nga, ingong usa sa “dakong panon,” nga ikaw dili mag-antos ug paglutos gikan sa kalibotan. Hinunoa, nagakahulogan kana nga ikaw gipanalipdan gikan sa makapagba nga kainit sa kaugalingong kapungot sa Diyos. Ug sa dihang iyang paulanan na ang mga daotan sa balaang kalaglagan, dili kana magparot kanimo. Kining bulahang relasyon magapadayon sa walay kataposan.​—Ezek. 38:22, 23; itanding Salmo 11:6; 85:3, 4.

12. Giunsa nga ang mga luha napahiran gikan sa imong mga mata bisan karon?

¹² Pagkakahibulongang mga katarongan alang sa kangaya ang maimo kon ikaw gayod usa nianang “dakong panon”!  Ang kahibudngang paglaom nabatonan mo sa pagkakita sa bug-os nga pagkahanaw sa mga daotan ug sa paghupot sa imong kaugalingong hunahuna ug lawas nga wala na gayoy tanang lama sa sala. Apan bisan karon ang kaguol nga nasugamak sa mga tawo tungod kay sila walay alamag sa Diyos dili magpaguol kanimo. Imong sugod nga maila ang kalipay nga iya lamang sa katawhan kansang Diyos mao si Jehova. (Sal. 144:15b) Niining paagiha sugod na ikaw nga nagatagamtam sa katumanan sa saad: “Pagapahiran sa Diyos ang tanang luha sa ilang mga mata.”

13. Unsa ang magadugang sa mga kangaya sa espirituwal nga paraiso samtang magapadayon ang milenyong pagmando ni Kristo?

¹³ Maingon nga ang “dakong panon” makalabang-buhi sa kataposan niining sistema sa mga butang, mao man usab ang espirituwal nga paraiso. Kon ikaw usa kanila, padayon diay nga tagamtamon mo ang espirituwal nga pangilin sa matambok nga mga butang samtang magapadayon ang milenyong pagmando ni Kristo. Ang imong kahibalo sa Diyos mismo magakalalom samtang imong makita ang dili mapakyas nga katuyoan nga makadangat sa mahimayaong katumanan. Ang imong kangaya mapadako samtang moapil ka sa pag-abiabi sa nagakadakong grupo sa katawhan gikan sa mga patay nga mahiusa uban kanimo diha sa matuod nga pagsimba. Ug ang lawasnong mga panalangin nga itagana unya ilabinang mahimong bililhon ngadto sa tanang maunongong mga alagad sa Diyos samtang kana masabtan nga kapadayganan diay sa gugma ni Jehova mismo.​—Isa. 25:6-9; Sant. 1:17.

Repasong Panaghisgot

● Uban sa unsang talagsaong hitabo nga ang Bibliya nagalangkit sa “dakong panon,” ug sa unsang paagi?

● Kon kita gusto gayod nga malakip nianang balaan giuyonang “dakong panon,” unsa ang kinahanglang buhaton ta karon?

● Unsa ka importante alang kanimo ang mga panalangin sa espirituwal nga paraiso?

[Mga Pangutana sa Pagtuon]