Kapitulo 10

Usa ka Gingharian nga “Dili Malumpag”

1, 2. (a) Unsang kamatuoran ang ginapasiugda sa kada adlaw sa mga hitabo sa kalibotan, ug sa unsang paagi? (b) Unsa ang bugtong sulbad?

 ANG mga hitabo sa kalibotan sa matag adlaw nagapasiugda sa kamatuoran nga ang mga tawo wala makakaplag ug kalipay pinaagig pagsalikway sa pagkasoberano ni Jehova ug, hinuon, nagapaningkamot sa pagmando sa ilang kaugalingon. Walay unsa mang sistema sa tawhanong gobyerno ang nagpatunghag mga kaayohan nga sa bug-os alang sa katawhan. Bisan tuod ang mga tawo nakaugmad sa ilang siyentipikanhong kasinatian sa gidak-ong wala sukad buhata, sila dili makahimo sa pagwagtang sa sala, makabuntog sa sakit ug makapahunong sa kamatayon, dili gani bisan alang sa usa sa ilang mga ginsakpan. Sa kasukwahi, ang mga nasod nagapadayon sa paggama ug bag-o ug mas makalilisang nga mga hinagiban. Ang kabangis sa krimen nagadagsang. Ang teknolohiya, kahakog ug pagka walay alamag nagalangkob sa paghugaw sa yuta, tubig ug hangin. Ang nagataas nga implasyon ug pagka walay trabaho sa hilabihan nagpalisod sa kadaghanan sa pagbaton sa mga kinahanglanon sa kinabuhi. Ang katawhan nawad-an ug paglaom alang sa kasulbaran.​—Eccl. 8:9.

² Unsa man ang sulbad? Ang Gingharian sa Diyos, nga niana gitudloan ni Jesus ang iyang mga tinun-an sa pag-ampo. (Mat. 6:9, 10) Pagkamapasalamaton ta gayod nga ang kahupayan nga ipatungha niana haduol na kaayo karon!

3. (a) Mahitungod sa niini nga Gingharian, unsa may nahitabo didto sa langit sa 1914 K.P.? (b) Ngano nga kana importante alang kanato?

³ Ang Gingharian sa Diyos diha sa mga kamot ni Jesu-Kristo  milihok na sukad sa 1914 K.P. a Sa maong tuig ang mga hitabo nga nakita ni Daniel sa matagnaong panan-awon nahitabo gayod didto sa langit. Ang “Tigulang sa mga Adlaw,” si Jehova nga Diyos, mihatag sa Anak sa tawo, si Jesu-Kristo, ug “pagbulot-an ug himaya ug gingharian, aron ang mga katawhan, nasodnong mga grupo ug mga pinulongan ang tanan kinahanglang mag-alagad kaniya.” Nga mitaho bahin sa panan-awon, si Daniel misulat: “Ang iyang pagmando maoy walay kataposang pagmando nga dili umalagi, ug ang iyang gingharian mao kanang dili mabungkag.” (Dan. 7:13, 14) Maoy pinaagi niining Ginghariana nga ang Diyos magpaarang sa mga mahigugmaon sa pagkamatarong sa pagtagamtam sa daghang maayong mga butang nga iyang gituyo sa dihang gibutang niya ang atong unang tawhanong mga ginikanan sa Paraiso.

4. Unsang mga detalye bahin sa Gingharian nga dulot magpainteres kanato, ug ngano?

⁴ Ang maunongong mga ginsakpan sa Gingharian dulot nga interesado diha sa gambalay ug kalihokan ning maong kagamhanan. Gusto silang masayod kon unsa ang ginabuhat niana karon, kon unsa ang palamposon niana sa ugma-damlag ug kon unsa ang gikinahanglan niana alang kanila. Ilang susihon kana pag-ayo, ug samtang ilang himoon kana, ang ilang pagpabili niana magatubo ug sila nagasangkap sa ilang kaugalingon aron ibalita kana ngadto sa uban.​—Sal. 48:12, 13.

Makadasig-Kasingkasing nga Pagsusi

5. (a) Giunsa sa pagpakita sa Kasulatan kon kang kinsang pagkamagmamando ang gipadayag pinaagi sa Mesiyanikong Gingharian? (b) Busa sa unsang paagi kita maapektahan sa atong makat-onan maylabot sa maong Gingharian?

⁵ Ang usa sa unang mga butang nga madayag sa maong pagsusi mao nga kining Mesiyanikong Gingharian maoy kapadayganan sa kaugalingong pagkamagmamando ni Jehova. Siya mismo ang mihatag sa “pagbulot-an ug himaya ug gingharian” ngadto sa iyang Anak. Busa, human kining Ginghariana misugod sa pagmando, ang mga tingog didto sa  langit tukmang mipatugbaw: “Ang gingharian sa kalibotan nahimong gingharian sa atong Ginoo [Jehova nga Diyos] ug sa iyang Kristo, ug siya [Jehova] magamando ingong hari hangtod sa kahangtoran.” (Pin. 11:15) Busa ang tanang butang nga atong mapanid-an bahin niining Ginghariana ug kon unsa ang malampos niana mas pa nga magapasuod kanato kang Jehova mismo. Magpasilsil kana nganhi kanato ug tinguha sa pagpasakop sa iyang pagkamagmamando sa walay kataposan.

6. Nganong sa linain magpainteres kanato nga si Jesu-Kristo mao ang hawas nga magmamando ni Jehova?

⁶ Pagkaanindot gayod nga si Jehova nagbutang kang Jesu-Kristo diha sa trono ingong Iyang hawas nga magmamando! Ingong Batid nga Magbubuhat nga gigamit sa Diyos sa pagbuhat sa yuta ug sa tawo, si Jesus nahibalo sa atong mga panginahanglan nga mas maayo kay sa kang bisan kinsa kanato. Dugang pa, iyang gipasundayag gikan sa sinugdanan sa tawhanong kasaysayan ang iyang ‘kahimuot alang sa mga anak sa mga tawo.’ (Prov. 8:30, 31; Col. 1:15-17) Pagkadako sa maong gugma nga siya sa personal mianhi sa yuta ug mihatag sa iyang kinabuhi ingong lukat alang kanila. Busa iyang gitagana alang kanato ang paagi sa kaluwasan gikan sa sala ug kamatayon, ug ang kahigayonan alang sa kinabuhing dayon.​—Mat. 20:28.

7. (a) Nga lahi sa pagmando sa kang bisan kinsang tawo, ngano nga kining kagamhanana magmalungtaron? (b) Adunay unsang relasyon ang “matinumanon ug maalamong ulipon” ngadto sa langitnong kagamhanan?

⁷ Kini maoy malig-on, malungtarong kagamhanan. Ang matunhayong hiyas niini gipasalig sa kamatuoran nga si Jehova mismo dili man ubos sa kamatayon. (Hab. 1:12; Sal. 146:3-5, 10) Nga lahi sa tawhanong mga hari, si Jesu-Kristo, nga kaniya ang Diyos mitugyan ug pagkahari, dili usab mamatay. (Roma 6:9; 1 Tim. 6:15, 16) Kauban ni Jesus sa langitnong mga trono mao ang 144,000 nga uban pa, maunongong mga alagad sa Diyos nga gikuha gikan sa “tanang kabanayan ug pinulongan ug katawhan ug kanasoran.” Kini sila, usab, hatagan ug imortal nga kinabuhi. (Pin. 5:9, 10; 1 Cor. 15:42-44, 53) Ang kadaghanan kanila atua na sa mga langit, ug ang nanghibilin niini kanila nga ania pa sa yuta  naglangkob sa “matinumanon ug maalamong ulipon” nga matang, nga maunongong nagapauswag sa intereses sa maong Gingharian dinhi.​—Mat. 24:45-47.

8, 9. (a) Unsang mabahinbahinon, makadaot nga mga impluwensiya nga wagtangon sa Gingharian? (b) Busa, kon kita molikay sa pagkahimong mga kaaway sa Gingharian sa Diyos, sa unsang mga organisasyon ug mga buhat nga kita dili magpalambigit?

⁸ Sa dili na madugay karon, sa tinudlong panahon ni Jehova, ang iyang tigpatay nga mga puwersa modasdas aron sa paghinlo sa yuta. Ilang laglagon sa walay kataposan kadtong mga tawo nga sa ilang kaugalingong pagpili wala moila sa Diyos, nga nagadumili sa pag-ila sa iyang pagkamagmamando, ug kinsa nagatamay sa mahigugmaong mga tagana nga iyang gihimo pinaagi ni Jesu-Kristo. (2 Tes. 1:6-9) Kini mao ang adlaw ni Jehova, ang dugay nang gihulat nga panahon alang sa iyang kabayawan ingong Unibersohanong Magmamando.

⁹ Ang tanang bakak nga relihiyon, ug ingon man sa tanang tawhanong mga gobyerno ug ilang kasundalohan, nga gimaneobra sa dili makitang magmamando niining kalibotana, sa dumalayon pagalaglagon. Ang tanan nga sa ilang kaugalingon bahin niining kalibotana pinaagig pagpangagpas tumong-kaugalingon, malimbongon, daotang paagi sa kinabuhi putlon sa kamatayon. Si Satanas ug iyang mga demonyo paphaon aron dili makakontak sa mga molupyo sa yuta nga lig-ong pagkatanggong sa usa ka libo ka tuig. Pagkadakong kahupayan unya kini alang sa tanan nga nahigugma sa pagkamatarong!​—Pin. 18:21, 24; 19:11-16, 19-21; 20:1, 2.

Ang mga Tumong Niini​—Kon Unsaon sa Pagkab-ot

10. (a) Unsaon man sa Mesiyanikong Gingharian sa pagpalampos sa katuyoan ni Jehova alang sa yuta mismo? (b) Unsay kahulogan unya niini alang sa katawhan nga magpuyo ibabaw sa yuta?

¹⁰ Kining Mesiyanikong Gingharian sa bug-os magpalampos sa orihinal nga katuyoan sa Diyos alang sa yuta. (Gen. 2:8, 9, 15; 1:28) Hangtod niining adlawa, ang tawo napakyas sa pagtuman nianang katuyoana. Apan, “ang pinuy-anang yuta nga umaabot” gipasakop man ngadto sa Anak sa tawo, si Jesu-Kristo. Ang tanan nga makalabang buhi sa  pagpahamtang sa hukom ni Jehova ibabaw ning daang sistema magabuhat nga mausahon ilalom ni Kristo ingong Hari, nga malipayong magabuhat sa bisan unsa nga iyang imando aron ang yuta mahimong globonhong Paraiso. (Heb. 2:5-9) Ang tanang katawhan magpahimulos sa buhat sa ilang mga kamot ug sa bug-os makabenepisyo gikan sa kadagaya sa abot sa yuta.​—Sal. 72:1, 7, 8, 16-19; itanding Isaias 65:21, 22.

11. (a) Sa unsang paagi ang pagkahingpit sa hunahuna ug lawas ipatungha alang sa mga ginsakpan sa Gingharian? (b) Maglakip kini sa unsa?

¹¹ Sa gilalang si Adan ug Eva sila mga hingpit, ug maoy katuyoan sa Diyos alang sa yuta nga mapuno sa ilang mga anak, nga ang tanan kanila magpahimulos sa kahingpitan sa hunahuna ug lawas. Ubos sa pagmando sa Gingharian, ang maong katuyoan mahidangat ra sa mahimayaong katumanan. Kini nagakinahanglan nga wagtangon ang tanang epekto sa sala, ug sa maong tumong si Kristo mag-alagad dili lang ingong Hari kondili usab ingong Hataas nga Saserdote. Uban sa pailob siya motabang sa iyang masinundanong mga ginsakpan aron makabenepisyo gikan sa halad-sala nga bili sa iyang sakripisyo sa iyang kaugalingong tawhanong kinabuhi. Ang mga buta nga mata managpakakita. Mga bungol nga igdulungog managpakadungog. Ang nadaot nga unod tungod sa edad o sakit mahimong mas lunhaw kay nianang iya sa usa ka bata. Ang dugay nang mga kakulian pulihan sa mahimsog nga panglawas. Ang adlaw moabot sa dihang wala na ing tawo nga may hinungdan sa pag-ingon, “Ako masakiton,” kay ang mahadlokon-Diyos nga mga tawo tangtangan na man sa kabug-at sa sala ug sa grabeng mga epekto niana.​—Itanding Isaias 33:22, 24; 35:5, 6; Job 33:25; Lucas 13:11-13.

12. (a) Unsa pa ang gikinahanglan sa tawhanong kahingpitan? (b) Unsaon kana sa pagkab-ot, ug unsa ang moresulta gikan niana?

¹² Ang pagkab-ot sa pagkahingpit, bisan pa niana, nagalangkit ug mas dako pa kay sa pagbaton ug mahimsog nga lawas ug maayong pangisip. Nagalakip kana ug hustong pagbanaag sa mga hiyas sa personalidad ni Jehova, tungod kay ang tawo gibuhat man ‘diha sa dagway sa Diyos, sumala sa iyang pagkamao.’ (Gen. 1:26) Sa pagkab-ot niana, ang  dakong pagpanudlo gikinahanglan. Mao kiniy usa ka Bag-ong Kahikayan nga “ang pagkamatarong magapabilin,” mao nga, sumala sa gitagna ni propetang Isaias, ang “pagkamatarong mao ang makat-onan gayod sa mga pumoluyo sa mabungahong yuta.” (2 Ped. 3:13; Isa. 26:9) Kining maong hiyas motultol sa pakigdait​—tali sa mga tawo sa tanang kanasoran, taliwala sa suod nga mga kaubanan, diha sa pamilya sa usa ug, labaw sa tanan, uban sa Diyos mismo. (Isa. 32:17; Sal. 85:10-13) Kadtong makakat-on sa pagkamatarong sa mauswagon edukahon sa kabubut-on sa Diyos alang kanila. Samtang ang gugma sa mga dalan ni Jehova mogamot ug maayo sa ilang mga kasingkasing, kini ilang pagasundon sa tanang bahin sa ilang mga kinabuhi. Ang hingpit nga tawong si Jesus nagkanayon, ‘Akong gibuhat kanunay ang mga butang nahimut-an sa akong Amahan.’ (Juan 8:29) Pagkamalipayon sa kinabuhi sa dihang kana matuman na alang sa tanang katawhan!

Mga Kalamposan nga Nadayag Na

13. Gamita ang mga pangutana sa itaas aron ipasiugda ang mga kalamposan sa Gingharian ug kon unsa ang kinahanglan tang pagabuhaton.

¹³ Nadayag na kaayo ang mabihagong mga kalamposan sa Gingharian ngadto sa mga tawo nga adunay mga mata sa pagtuo. Ang mosunod nga mga pangutana ug gisitar nga mga teksto magpahinumdom kanimo sa pipila niini, ingon man sa mga butang nga ang tanang ginsakpan sa Gingharian makahimo ug kinahanglang magbuhat niana karon:

 Batok kang kinsa nga ang Hari unang nakigsangka, ug uban sa unsang resulta? (Pin. 12:7-10, 12)

 Ang pagpanigom sa kataposang mga membro sa unsang grupo ang gihatagag dinaliang pagtagad human si Kristo naentrono? (Mat. 24:31; Pin. 7:1-4)

 Sa Mateo 25:31-33, unsang laing buluhaton ang gitagna ni Jesus nga iyang buhaton human siya makalingkod sa trono ug sa dili pa laglagon ang mga daotan?

 Giunsa sa pagpalampos kining buluhatona? Kinsa ang nagapakig-ambit niini? (Mat. 24:14; Sal. 110:3; Pin. 14:​6, 7)

 Nganong wala mapahunong kini sa politikal ug relihiyosong mga magsusupak? (Buh. 5:38, 39; Zac. 4:6)

  Ingong resulta sa edukasyonal nga buluhaton nga ginatuman, unsang mga kausaban ang nahitabo na diha sa mga kinabuhi sa mga tawo nga nagapasakop sa pagmando sa Gingharian? (Isa. 2:4; 1 Cor. 6:9-11)

Malungtarong Hiyas sa Gingharian

14. (a) Unsang gidugayon nga si Kristo magmando? (b) Unsa ang malampos unya sulod sa maong panahon?

¹⁴ Human si Satanas ug iyang mga demonyo ikabalhog sa bung-aw, si Jesu-Kristo uban sa iyang 144,000 ka kaubanang mga manununod magmando sa usa ka libo ka tuig. (Pin. 20:6) Sulod sa maong panahon ang katawhan pagadad-on ngadto sa kahingpitan. Wad-on na ang tanang gobyerno ug awtoridad ug gahom nga kasupak kang Jehova. Tungod kay kana malampos na, iuli ni Jesus ang Gingharian ngadto sa iyang Amahan, “aron ang Diyos mahimong tanang butang ngadto sa tanan.”​—1 Cor. 15:24, 28.

15. Sa unsang paagi matinuod nga kining Ginghariana ‘dili gayod malumpag’?

¹⁵ Ang kaugalingong posisyon ni Jesus maylabot sa yuta mausab na diay. Bisan pa niana, ang iyang pagmando maoy “walay kataposan” ug ang iyang Gingharian “dili mabungkag.” (Dan. 7:14) Diha sa unsang kahulogan? Diha sa kahulogan nga ang gahom sa pagmando dili ipasa ngadto sa mga kamot sa uban kinsa adunay laing mga tumong. Ang mga kalamposan sa Gingharian ‘dili gayod malumpag.’ Ang malampos sa Gingharian sa pagbayaw sa ngalan ni Jehova ug sa iyang katuyoan maylabot niining yutaa magapadayon sa walay kataposan.

[Mga footnote]

Repasong Panaghisgot

● Ngano ang Gingharian sa Diyos mao lamang ang sulbad sa mga problema sa katawhan? Kanus-a man kana misugod sa pagmando?

● Unsa man ang ilabinang nakapadani kanimo bahin sa Gingharian sa Diyos ug kon unsa ang malampos niana? Ngano?

● Unsang mga kalamposan sa Gingharian nga mahimo na natong makita? Aduna kita ing unsang bahin niini?

[Mga Pangutana sa Pagtuon]

 [Hulagway sa panid 84, 85]

 Pagkamatarong ang makat-onan sa katawhan