Antikristo

Kahubitan: Antikristo nagakahulogan nga batok o puli ni Kristo. Ang maong termino mapadapat ngadto sa tanan nga nagalimod sa ginasulti sa Bibliya bahin kang Jesu-Kristo, sa tanan nga nagasupak sa iyang Gingharian, ug sa tanan nga nagadagmal sa iyang mga sumusunod. Kana nagalakip usab sa mga tawo, mga organisasyon, ug mga nasod nga bakakong nagaangkon sa pagrepresentar kang Kristo o sa dili husto nagapadapat sa ilang kaugalingon sa papel nga iya sa Mesiyas.

Ang Bibliya ba nagatumong ug usa lamang ka antikristo?

1 Juan 2:18: “Mga anak, kini mao na ang kataposang takna, ug, ug sumala gayod sa inyo nang nadungog nga moabot ang antikristo, bisan karon nanagpanungha ang daghang antikristo; nga nianang kamatuorana kita nasayod nga mao na kini ang kataposang takna.”

2 Juan 7: “Daghang malimbongon nanungha sa kalibotan, mga tawo nga wala magaila nga si Jesu-Kristo mianhi diha sa unod. Mao kini ang malimbongon ug ang antikristo.” (Matikdi nga ang “daghang antikristo” sa 1 Juan 2:18 gipunting dinhi sa linangkob ingong “ang antikristo.”)

Ang pag-abot ba sa antikristo gireserba alang sa umaabot pa nga panahon?

1 Juan 4:3: “Ang matag dinasig nga pulong nga wala magaila kang Jesus dili gikan sa Diyos. Dugang pa, kini mao ang dinasig nga pulong nga iya sa antikristo nga inyong nadungog nga moanhi, ug karon kini ania na sa kalibotan.” (Kana gisulat sa hapit na ang kataposan sa unang siglo K.P.)

1 Juan 2:18: “Bisan karon nanagpanungha ang daghang antikristo; nga nianang kamatuorana kita nasayod nga mao na kini ang kataposang takna.” (Pinaagig “kataposang takna” dayag nga gipasabot ni Juan ang pagkatapos sa apostolikanhong yugto. Ang ubang mga apostol namatay na, ug si Juan sa iyang kaugalingon tigulang na kaayo.)

Ang pipila niadtong nailhan ingong mga antikristo—

Mga tawo nga nagalimod nga si Jesus mao ang matuod nga Mesiyas

1 Juan 2:22: “Kinsa ba ang bakakon kondili siya nga nanghimakak  nga si Jesus mao ang Kristo [o, Mesiyas, usa nga dinihogan]? Mao kini ang antikristo.”

Ang tanan nga nagalimod nga si Jesus mao ang talagsaong Anak sa Diyos

1 Juan 2:22: “Kini mao ang antikristo, siya nga nagalimod sa Amahan ug sa Anak.”

Itanding Juan 10:36; Lucas 9:35.

Mga Apostata

1 Juan 2:18, 19: “Nanagpanungha ang daghang antikristo . . . Sila namahawa gikan kanato, apan sila dili sa atong matang.”

Sila nga nagabatok sa matuod nga mga sumusunod ni Kristo

Juan 15:20, 21: “Kon ako ilang gilutos, kamo usab ilang pagalutoson . . . Apan kining tanang mga butanga ilang buhaton batok kaninyo tungod sa akong ngalan.”

Mga tawo ug mga nasod nga nagasupak kang Kristo ingong Hari o sa ilang kaugalingon bakakong nagapangangkon sa Mesiyanikong papel

Sal. 2:2: “Ang mga hari sa yuta nanagpahamutang ug ang mga punoan nanagsabotsabot sa tingob batok kang Jehova ug batok sa iyang dinihog [Kristo, o Mesiyas].”

Tan-awa usab ang Pinadayag 17:3, 12-14; 19:11-21.

Mat. 24:24: “Motungha ang mini nga mga Kristo ug mini nga mga propeta ug magpakitag dagkong mga ilhanan ug mga katingalahan aron sa pagpasalaag, kon mahimo, bisan pa sa mga pinili.”