Armageddon

Kahubitan: Ang Gregong Har Ma·ge·donʹ, nga gikuha gikan sa Hebreo ug gihubad nga “Armageddon” sa daghang taghubad, nagakahulogang “Bukid sa Megiddo,” o “Bukid sa Katigoman sa mga Tropa.” Ang Bibliya nagalambigit sa maong ngalan, dili uban sa nukleyar nga kalaglagan, kondili uban sa umaabot nga unibersal nga “gubat sa dakong adlaw sa Diyos nga Labing Gamhanan.” (Pin. 16:14, 16) Kining ngalana sa tino gipadapat ngadto sa “dapit [Grego, toʹpon; nga mao, kahimtang o situwasyon]” nga ang politikanhong mga magmamando sa yuta ginatigom diha sa pagsupak kang Jehova ug sa iyang Gingharian pinaagi ni Jesu-Kristo. Ang maong pagsupak igapakita pinaagig globonhong aksiyon batok sa mga alagad ni Jehova ibabaw sa yuta, ang makitang mga hawas sa Gingharian sa Diyos.

Ang mga tawo ba tugotan sa Diyos sa paglaglag sa yuta pinaagig gikaingon sa pipila nga “thermonuclear Armageddon”?

Sal. 96:10: “Si Jehova mismo nahimong hari. Ang mabungahong yuta [Hebreo, te·velʹ; ang yuta, ingong tabunok ug ginapuy-an, ang poluy-anang globo] natukod usab nga malig-on aron kini dili matarog.”

Sal. 37:29: “Ang mga matarong mismo magapanunod sa yuta, ug sila magapuyo sa ibabaw niini sa walay kataposan.”

Pin. 11:18: “Ang kanasoran nangapungot, ug ang imong kaugalingong [Jehova] kapungot miabot, ug ang tinudlong panahon . . . sa paglaglag sa mga manglalaglag sa yuta.”

Unsa ang Armageddon, ingon sa gipasabot diha sa Bibliya?

Pin. 16:14, 16: “Kini sila, sa pagkamatuod, maoy mga pahayag nga dinasig sa mga demonyo ug nagahimog mga milagro, ug sila nagapangadto sa mga hari sa tibuok pinuy-anang yuta, aron sa pagtigom kanila ngadto sa gubat sa dakong adlaw sa Diyos nga  Labing Gamhanan. Ug ilang gitigom sila ngadto sa dapit nga sa Hebreohanon gitawag nga Har–Magedon [Armageddon].”

Didto ba lang sa Tungang Sidlakan pahinaboon ang Armageddon?

Ang mga magmamando ug mga kasundalohan sa tanang kanasoran pagatigomon diha sa pagsupak sa Diyos

Pin. 16:14: “Sila nagapangadto sa mga hari sa tibuok pinuy-anang yuta, aron sa pagtigom kanila ngadto sa gubat sa dakong adlaw sa Diyos nga Labing Gamhanan.”

Pin. 19:19: “Nakita ko ang mapintas nga mananap [tawhanong politikanhong pagmando ingong katibuk-an] ug ang ilang mga hari sa yuta ug ilang mga kasundalohan nga nanagtigom aron sa pagpakiggubat batok kaniya nga nakasakay sa kabayo ug uban sa iyang kasundalohan.”

Jer. 25:33: “Kadtong mga pinatay ni Jehova niadto gayong adlawa molukop gikan sa usa ka tumoy sa yuta ngadto sa laing tumoy sa yuta.”

Ang paggamit sa ngalang Armageddon (Har–Magedon) dili magkahulogan nga ang maong gubat awayon didto sa usa ka literal nga Bukid sa Megiddo

Wala ing literal nga Bukid sa Megiddo; usa ka puntod lamang nga mga 70 ka tiil (21 m) ang gihabogon diin ang karaang Megiddo nahimutang.

Ang mga hari ug militaryong mga puwersa sa “tibuok pinuy-anang yuta” dili makaigo nganha sa literal nga Patag sa Esdraelon, ubos sa Megiddo. Ang maong patag maoy sinug-ang, nga 20 milyas (32 km) lamang ang gitas-on ug 18 milyas (29 km) ang gilapdon sa sidlakang kilid.—The Geography of the Bible (New York, 1957), ni Denis Baly, p. 148.

Ang maong ngalan haom tungod sa papel sa Megiddo diha sa kasaysayan; ang maong patag ubos sa Megiddo mao ang lugar sa mahukmanon (mapihoon) nga mga gubat

Didto gipahinabo ni Jehova ang kapildihan ni Sisera, ang pangulo sa Canaananhong kasundalohan, sa atubangan ni Maghuhukom Barak.—Maghu. 5:19, 20; 4:12-24.

Si Thutmose III, nga paraon sa Ehipto, miingon: “Ang pagkailog sa Megiddo maoy pagkapukan sa usa ka libong lungsod!”—Ancient  Near Eastern Texts Relating to the Old Testament (Princeton, N.J.; 1969), giedit ni James Pritchard, p. 237.

Ang pagpunting sa Megiddo (nagkahulogang “Katigoman sa mga Tropa”) maoy tukma sanglit kay ang Armageddon maoy usa ka situwasyon sa kalibotan nga ang mga kasundalohan ug ubang mga tigpaluyo sa mga magmamando sa tanang kanasoran malambigit.

Kinsa o unsa ang pagalaglagon sa Armageddon?

Dan. 2:44: “Ang Diyos sa langit magatukod ug usa ka gingharian . . . Kini magadugmok ug magaut-ot sa tanan niining mga ginghariana, ug kana mismo ang magpabilin sa mga panahong walay katinoan.”

Pin. 19:17, 18: “Nakita ko usab ang usa ka manulonda nga nagtindog diha sa adlaw, ug misinggit sa makusog nga tingog ug miingon ngadto sa tanang langgam nga nagalupad sa kinatung-an sa kalangitan: ‘Umari kamo, tambong kamo sa dakong panihapon sa Diyos, sa pagkaon sa unod sa mga hari ug sa unod sa mga kapitan sa kasundalohan ug sa unod sa mga tawong kusgan ug sa unod sa mga kabayo ug kanilang nagakabayo niana, ug sa unod sa tanan, sa nahigawas nga mga tawo maingon man sa mga ulipon ug sa mga gagmay ug sa mga dagko.’”

1 Juan 2:16, 17: “Kay ang tanan diha sa kalibotan—ang kailibgon sa unod ug ang kailibgon sa mga mata ug ang pagpasigarbo sa paagi sa kinabuhi—wala magagikan sa Amahan, kondili nagagikan sa kalibotan. Dugang pa, ang kalibotan mahanaw ug ang mga kailibgon niini, apan siya nga nagabuhat sa kabubut-on sa Diyos magapabilin sa walay kataposan.”

Pin. 21:8: “Mahitungod sa mga talawan ug kanilang walay pagtuo ug kanilang mga malaw-ayon ug mga mamumuno ug mga makighilawason ug kanilang nagabuhat ug espiritismo ug mga magsisimbag diyosdiyos ug tanang bakakon, ang ilang bahin mao ang linaw nga nagadilaab sa kalayo ug sa asupre. Kini nagakahulogan sa ikaduhang kamatayon.”

Ang maong kalaglagan ba sa walay kataposan?

Mat. 25:46: “Kini sila [kinsa midumili sa pagbuhat ug maayo ngadto sa “mga igsoon” ni Kristo] mamahawa ngadto sa walay kataposang pagkawagtang.”

2 Tes. 1:8, 9: “Kadto silang wala makaila sa Diyos ug wala magasugot sa maayong balita bahin sa atong Ginoong Jesus . . . makaagom sa mahukmanong silot sa walay kataposang kalaglagan.”

 Aduna bay mga mamaluwas?

Sof. 2:3: “Pangitaa si Jehova, kamong tanang maaghop sa yuta, kinsa nanagtuman sa Iya mismong tulomanon. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”

Roma 10:13: “Ang matag usa nga nagatawag sa ngalan ni Jehova mamaluwas.”

Sal. 37:34: “Paglaom kang Jehova ug bantaye ang iyang dalan, ug siya magabayaw kanimo sa pagpanunod sa yuta. Sa dihang pagalaglagon ang mga daotan, ikaw makakita niana.”

Juan 3:16: “Ang Diyos . . . mihatag sa iyang bugtong Anak, aron ang tanan nga maghupot ug pagtuo diha kaniya dili malaglag, kondili makabaton ug kinabuhing walay kataposan.”

Pin. 7:9, 10, 14: “Mitan-aw ako, ug, ania karon! ang usa ka dakong panon, nga walay tawo nga arang makaihap, gikan sa tanang kanasoran ug kabanayan ug mga katawhan ug mga pinulongan, nga nanagtindog atubangan sa trono ug atubangan sa Kordero, nanagsul-ob sa tag-as maputi nga mga besti; ug dihay mga palwa sa palmera sa ilang mga kamot. Ug padayon silang nanagsinggit sa makusog nga tingog, nga nag-ingon: ‘Ang kaluwasan gikan sa atong Diyos, kinsa naglingkod sa trono, ug sa Kordero.’ . . . ‘Mao kini sila ang nanagpakalabang sa dakong kasakitan.’”

Unsay mahitabo ngadto sa kabataan sa Armageddon?

Kanang pangutanaha wala sa laktod tubaga sa Bibliya, ug kita dili mao ang mga maghuhukom. Apan, ginapakita sa Bibliya nga ginaisip sa Diyos ang kabataan sa matuod nga mga Kristohanon ingong “balaan.” (1 Cor. 7:14) Nagabutyag usab kana nga sa nangaging kapanahonan sa gilaglag sa Diyos ang mga daotan siya usab milaglag sa ilang mga kabataan. (Num. 16:27, 32; Ezek. 9:6) Dili buot sa Diyos nga adunay si bisan kinsa nga malaglag, mao nga iyang gipamantala karon ang pasidaan aron makabenepisyo ang mga ginikanan ug mga kabataan. Dili ba maalamon alang sa mga ginikanan sa pagsunod sa dalan nga moresulta sa ilang kabataan nga mauyonan sa Diyos karon ug sa Armageddon?

Ang gugma ba sa Diyos nalapas pinaagig paglaglag sa daotan?

2 Ped. 3:9: “Si Jehova . . . mapailobon kaninyo tungod kay dili niya tinguha nga adunay malaglag kondili nagatinguha nga ang tanan makadangat sa paghinulsol.”

Luc. 18:7, 8: “Ug dili ba hatagan sa Diyos ug hustisya ang iyang mga pinili nga nagatuwaw ngadto kaniya sa maadlaw ug sa  magabii, bisan tuod siya mapailobon kaayo ngadto kanila? Sultihan ko kamo, sa madali Iyang hatagan silag hustisya.”

2 Tes. 1:6: “Maoy matarong sa bahin sa Diyos nga ang mga nagasakit kaninyo [iyang mga alagad] iya ra unyang pagabalosan ug kasakit.”

Posible ba nga pagahuptan ang neyutral nga baroganan?

2 Tes. 1:8: “Siya magpahamtang ug panimalos diha kanilang [pinaagig pagpili] wala makaila sa Diyos ug kanilang wala magasugot sa maayong balita bahin sa atong Ginoong Jesus.”

Mat. 24:37-39: “Maingon kaniadto sa mga adlaw ni Noe . . . sila wala magpakabana hangtod sa pag-abot sa lunop ug mibanlas kanilang tanan, mao man usab ang mahitabo sa presensiya sa Anak sa tawo.”

Mat. 12:30: “Siya nga dili dapig kanako maoy batok kanako, ug siya nga dili moduyog kanato mapatibulaag.”

Itanding Deuteronomio 30:19, 20.

Kang kansang impluwensiya ang nagatulod sa mga nasod ngadto sa kahimtang sa kalibotan nga mosangpot diha sa gubat batok sa Diyos?

Pin. 16:13, 14: “Nakita ko ang tulo ka dinasig nga mga pahayag nga maorag mga baki nga nanggula gikan sa baba sa dragon [Satanas nga Yawa; Pin. 12:9] ug gikan sa baba sa mapintas nga mananap ug gikan sa baba sa bakakong propeta. Kini sila, sa pagkamatuod, maoy mga pahayag nga dinasig sa mga demonyo ug nagahimog mga milagro, ug sila nagapangadto sa mga hari sa tibuok pinuy-anang yuta, aron sa pagtigom kanila ngadto sa gubat sa dakong adlaw sa Diyos nga Labing Gamhanan.”

Itandi ang Lucas 4:5, 6; 1 Juan 5:19; usab ang Buhat 5:38, 39; 2 Cronicas 32:1, 16, 17.