Bakakong mga Manalagna

Kahubitan: Mga indibiduwal ug mga organisasyon nga nagamantala ug mga mensahe nga ilang gipahinungod ngadto sa labaw-tawong tinubdan apan dili gikan sa matuod nga Diyos ug dili subay sa iyang gibutyag nga kabubut-on.

Sa unsang paagi mailhan ang matuod nga mga manalagna ug ang mga bakakon?

Ang matuod nga mga manalagna nagapaila sa ilang pagtuo diha kang Jesus, apan dugang pa ang gikinahanglan kay sa pag-angkon lamang nga nagasangyaw diha sa iyang ngalan

1 Juan 4:1-3: “Sulayi ninyo ang dinasig nga mga pulong kon kini iya ba sa Diyos, kay daghan ang mini nga mga propeta nga nanagpanungha sa kalibotan. Inyong mahibaloan ang dinasig nga pulong gikan sa Diyos pinaagi niini: Ang matag dinasig nga pulong nga magaila nga si Jesu-Kristo mianhi sa unod kini gikan sa Diyos, apan ang matag dinasig nga pulong nga wala magaila kang Jesus dili gikan sa Diyos.”

Mat. 7:21-23: “Dili ang tanang magaingon kanako, ‘Ginoo, Ginoo,’ makasulod sa gingharian sa mga langit, kondili siya nga nagatuman sa kabubut-on sa akong Amahan nga atua sa mga langit. Daghan ang magaingon kanako niadtong adlawa, ‘Ginoo, Ginoo, dili ba naghimo man kamig tagna diha sa imong ngalan . . . ?’ Ug unya ako magaingon ngadto kanila: Wala ko gayod kamo igkaila! Pahawa kanako, kamong mga mamumuhat ug daotan.”

Ang matuod nga mga manalagna nagasulti diha sa ngalan sa Diyos, apan ang pag-angkon lamang nga nagarepresentar kaniya dili pa igo

Deut. 18:18-20: “Magpatindog ako kanila sa taliwala sa ilang mga igsoon ug usa ka manalagna, nga sama kanimo [sama kang Moises]; ug igabutang ko gayod ang akong mga pulong sa iyang baba, ug siya magasulti gayod sa tanan nianang akong igasugo kaniya. Ug mahitabo nga ang tawo nga dili magapatalinghog sa akong mga pulong nga iyang igasulti sa akong ngalan, akong pagapanilngon kini kaniya. Apan ang manalagna nga magapangahas pagsulti ug pulong sa akong ngalan nga wala ko sugoa sa pagsulti o magasulti sa ngalan sa ubang mga diyos, ang maong manalagna kinahanglang mamatay.” (Itanding Jeremias 14:14; 28:11, 15.)

Si Jesus miingon: “Wala akoy ginabuhat sa kinaugalingon ko  nga pagbulot-an; apan ako nagasulti niining mga butanga sumala gayod sa gitudlo kanako sa Amahan.” (Juan 8:28) Siya miingon: “Ako mianhi sa ngalan sa akong Amahan.” (Juan 5:43) Si Jesus miingon usab: “Siya nga magasulti sa kinaugalingon niyang pagbulot-an nagapangita sa iyang kaugalingong kadungganan.”—Juan 7:18.

Kon adunay mga tawo o mga kapunongan nga nagapangangkon sa pagrepresentar sa Diyos apan nagadumili sa paggamit sa personal nga ngalan sa Diyos, ug nagabatasan sa pagpagtugbaw sa ilang kaugalingong mga opinyon maylabot niining mga butanga, sila ba nakakab-ot niining importanteng kalipikasyon sa usa ka matuod nga manalagna sa Diyos?

 Ang katakos sa paghimog “dagkong mga ilhanan,” o “mga milagro,” dili man pamatuod na gayod sa usa ka matuod nga manalagna

Mat. 24:24: “Motungha ang mini nga mga Kristo ug mini nga mga propeta ug magpakitag dagkong mga ilhanan [“mga milagro,” TEV] ug sa mga katingalahan aron sa pagpasalaag, kon mahimo, bisan pa sa mga pinili.”

2 Tes. 2:9, 10: “Ang pag-abot sa usa nga masupilon maoy sumala sa paglihok ni Satanas nga inubanan sa tanang gamhanan mga buhat ug bakak nga mga ilhanan ug mga katingalahan ug inubanan sa tanang daotan nga paglimbong alang kanila nga pagalaglagon, ingon nga silot tungod kay ilang gidumilian ang paghigugma sa kamatuoran aron sila unta mangaluwas.”

Sa laing bahin, si Moises nagpatunghag mga milagro nga tinultolan ni Jehova. (Ex. 4:1-9) Si Jehova usab mihatag ug gahom kang Jesus sa paghimog mga milagro. (Buh. 2:22) Pero labaw pa sa mga milagro ang nagpamatuod nga ang Diyos nagpadala gayod kanila.

Ang ginatagna sa tinuod nga mga propeta mamatuman man, apan mahimong dili nila masabtan kon kanus-a gayod o kon sa unsang paagi mahitabo kana

Dan. 12:9: “Padayon sa imong panaw, Daniel, kay ang mga pulong himoong tinago ug tinakpan hangtod sa panahon sa kataposan.”

1 Ped. 1:10, 11: “Ang mga propeta . . . padayong nagpakisusi kon unsa gayong panahona o matang sa panahon nga ang espiritu diha kanila nagbutyag mahitungod kang Kristo sa dihang kana unang nagpamatuod sa mga pag-antos ni Kristo ug sa mga himaya nga modason niini.”

1 Cor. 13:9, 10: “Atong nabatonan ang kahibalo nga dili hingpit  ug kita nagatagna nga dili hingpit, apan kon ang hingpit moabot na, ang dili hingpit igahiklin na unya.”

Prov. 4:18: “Ang alagianan sa mga matarong ingon sa banagbanag sa kahayag nga padayong nagakasanag hangtod sa pagkahingpit sa adlaw.”

Ang mga apostol ug ubang unang Kristohanong mga tinun-an nasayop man sa ilang mga pagdahom, pero ang Bibliya wala magklasepikar o mag-isip kanila uban sa “bakakong mga manalagna.”—Tan-awang Lucas 19:11; Juan 21:22, 23; Buhat 1:6, 7.

Si Natan nga propeta midasig kang Haring David sa pagtuman kon unsay anaa sa iyang kasingkasing maylabot sa pagtukod ug usa ka balay alang sa pagsimba kang Jehova. Apan sa ulahi si Jehova misulti kang Natan nga pahibaloon si David nga dili siya ang magtukod niana. Wala isalikway ni Jehova si Natan tungod sa iyang unang gisulti apan padayon siyang gigamit sanglit siya mapainubsanong midawat sa pagtul-id sa dihang gipatin-aw ni Jehova ang maong butang ngadto kaniya.—1 Cron. 17:1-4, 15.

Ang mga kapahayagan sa matuod nga propeta nagapalambo sa matuod nga pagsimba ug nahauyon sa gibutyag nga kabubut-on sa Diyos

Deut. 13:1-4: “Kon may motindog sa taliwala mo nga usa ka manalagna o usa ka magdadamgo sa usa ka damgo ug magahatag kanimo ug usa ka ilhanan o katingalahan, ug magmatuod ang ilhanan o katingalahan nga iyang gisulti kanimo, nga nagaingon, ‘Mosunod kita sa lain nga mga diyos, nga wala nimo hiilhi, ug kita mag-alagad kanila,’ dili ka gayod magpatalinghog sa mga pulong nianang manalagnaa o sa magdadamgo nianang damgoha, kay si Jehova nga inyong Diyos magasulay kaninyo aron sa pagtino kon nahigugma ba kamo kang Jehova nga inyong Diyos sa bug-os ninyong kasingkasing ug sa bug-os ninyong kalag. Magalakaw gayod kamo sunod kang Jehova nga inyong Diyos, ug kaniya kamo mangahadlok, ug sa iyang mga sugo kamo magabantay, ug magasugot sa iyang tingog, ug kaniya kamo magaalagad, ug managhiusa kamo ngadto kaniya.”

Sanglit kay ang Bibliya nag-ingon nga ang “usa ka higala sa kalibotan” kaaway man sa Diyos, ang mga klerigo ba nga nagaawhag sa ilang ginsakpan sa pagkalangkit diha sa kalihokan sa kalibotan nagapalambo sa matuod nga pagsimba? (Sant. 4:4; 1 Juan 2:15-17) Ang matuod nga Diyos nag-ingon nga ang mga nasod “kinahanglang makaila nga ako mao si Jehova,” ug nagbutyag ang Bibliya nga ang Diyos mokuha gikan sa kanasoran ug “usa ka katawhan alang sa iyang ngalan,” apan ang relihiyosong mga organisasyon nga nagapamenos sa kahinungdanon sa paggamit sa  personal nga ngalan sa Diyos nagalihok ba nga uyon niining gipadayag nga kabubut-on sa Diyos? (Ezek. 38:23; Buh. 15:14) Gitudloan ni Jesus ang iyang mga sumusunod sa pag-ampo alang sa Gingharian sa Diyos, ug ang Bibliya nagapabantay batok sa pagsalig diha sa yutan-ong mga tawo, busa ang mga klerigo ug politikanhong mga organisasyon nga nagaawhag sa katawhan sa pagbutang sa ilang pagsalig sa tawhanong pagmando matuod ba nga mga manalagna?—Mat. 6:9, 10; Sal. 146:3-6; itanding Pinadayag 16:13, 14.

Ang matuod nga mga manalagna ug ang bakakon mailhan pinaagi sa bunga nga dayag diha sa ilang mga kinabuhi ug sa mga kinabuhi niadtong nagasunod kanila

Mat. 7:15-20: “Magbantay kamo sa mini nga mga propeta nga moanha kaninyo nga managsapot sa pagkakarnero, apan sa sulod sila mga lubo nga manunukob. Maila ninyo sila pinaagi sa ilang mga bunga. . . . Ang matag maayong kahoy magabunga ug maayong bunga, apan ang matag walay pulos nga kahoy magabungag walay pulos nga bunga . . . Nan, diay, pinaagi sa ilang mga bunga inyong maila kining mga tawhana.”

Unsa may nagatimaan sa ilang paagi sa kinabuhi? “Ang mga buhat sa unod maoy . . . pakighilawas, kahugaw, malaw-ayng gawi, pagsimbag mga diyosdiyos, espiritismo, mga dinumtanay, panagkabingkil, pangabugho, kapungot, panagsumpakiay, mga pagkabahinbahin, mga pundokpundok, mga kasina, paghuboghubog, hudyaka-bahakhak, ug mga butang nga maingon-ingon niini. . . . Silang nagabuhat sa maong mga butang dili makapanunod sa gingharian sa Diyos. Sa laing bahin, ang bunga sa espiritu sa [Diyos] mao ang gugma, kalipay, kalinaw, taas-pailob, kalulot, pagkamaayo, pagtuo, kaaghop, pugong-kaugalingon.”—Gal. 5:19-23; tan-awa usab ang 2 Pedro 2:1-3.

 Ang mga Saksi ni Jehova ba walay nahimong mga pagkasayop sa ilang mga pagtulon-an?

Ang mga Saksi ni Jehova wala mag-angkon nga inspirado nga mga propeta. Sila nangasayop man. Sama sa mga apostol ni Jesu-Kristo, may mga panahon nga sila naghupot ug sayop nga mga pagdahom.—Luc. 19:11; Buh. 1:6.

Ang Kasulatan nagtagana ug mga bahin sa panahon maylabot sa presensiya ni Kristo, ug ang mga Saksi ni Jehova nagtuon niini uban sa maidlot nga interes. (Luc. 21:24; Dan. 4:10-17) Gihubit usab ni Jesus ang usa ka daghag-bahin nga ilhanan nga maglambigit sa katumanan sa mga tagna sa panahon aron ipaila ang  kaliwatan nga mabuhi nga makakita sa kataposan sa daotang sistema sa mga butang ni Satanas. (Luc. 21:7-36) Gipunting sa mga Saksi ni Jehova ang ebidensiya sa katumanan niini nga ilhanan. Tinuod nga ang mga Saksi nasayop diha sa ilang pagsabot kon unsay mahitabo sa kataposan sa pipila ka yugto sa panahon, pero sila wala masayop tungod sa pagkawala sa pagtuo o sa paghunong nga magmabinantayon mahitungod sa katumanan sa mga katuyoan ni Jehova. Sila nagpadayon sa paghupot gayod diha sa ilang hunahuna sa tambag nga gihatag ni Jesus: “Busa, padayong magtukaw kamo, kay wala kamo mahibalo kon unsang adlawa moabot ang inyong Ginoo.”—Mat. 24:42.

Ang mga butang nga gikinahanglan ang mga pagtul-id sa punto de bista nahimong gamay lamang kon itandi sa hinungdanong mga kamatuoran sa Bibliya nga ilang nasabtan ug namantala. Lakip niini mao ang mosunod: Si Jehova mao ang bugtong matuod nga Diyos. Si Jesu-Kristo dili bahin sa usa ka Trinitaryong diyos-ulo kondili mao ang bugtong Anak sa Diyos. Ang kaluwasan gikan sa sala posible lamang pinaagig pagtuo diha sa halad-lukat ni Kristo. Ang balaang espiritu dili usa ka persona kondili maoy aktibong puwersa nga iya ni Jehova, ug ang bunga niini kinahanglang madayag diha sa kinabuhi sa matuod nga mga magsisimba. Ang tawhanong kalag dili kay dili mamatay, ingon sa gipangangkon sa karaang mga pagano; kana mamatay, ug ang paglaom sa ugma-damlag nga kinabuhi maoy diha sa pagkabanhaw. Nahitabo ang pagtugot sa Diyos sa pagkadaotan tungod sa isyu sa unibersohanong pagkamagmamando. Ang Gingharian sa Diyos mao ang bugtong paglaom sa katawhan. Sukad sa 1914 kita nagkinabuhi sa kataposang mga adlaw sa tibuok-kalibotang daotang sistema sa mga butang. Ang mahimong mga hari ug mga saserdote uban ni Kristo didto sa langit mao lamang ang 144,000 matinumanong mga Kristohanon, apan ang kadaghanan sa masinundanong katawhan magadawat ug kinabuhing dayon ibabaw sa paraisong yuta.

Ang laing bahin nga pagatagdon maylabot sa mga pagtulon-an sa mga Saksi ni Jehova mao kini: Kini bang ilang pagtulon-an nakapabayaw gayod sa katawhan sa moral nga paagi? Kadto bang nagasunod niining mga pagtulon-ana nahimong talagsaon diha sa ilang mga komunidad tungod sa ilang pagkamatinud-anon? Ang ila bang banaynong kinabuhi naimpluwensiyahan ug maayo tungod sa pagpadapat niining mga pagtulon-ana? Si Jesus miingon nga ang iyang mga tinun-an daling mailhan tungod sa pagbaton ug gugma sa ilang taliwala. (Juan 13:35) Kini bang hiyasa talagsaon taliwala sa mga Saksi ni Jehova? Tugotan natong ang mga kamatuoran mismo maoy mosulti.

 Kon Adunay Moingon—

‘Nagsulti ang akong ministro nga ang mga Saksi ni Jehova bakakong mga manalagna’

Mahimong tubagon mo: ‘Makasukna ako, Diha bay iyang gipakita sa Bibliya nga nagahubit kon unsay among gituohan o ginabuhat ug kana nag-ingon nga ang mga tawo nianang matanga maoy bakakong mga manalagna? . . . Ikapakita ko ba kanimo kon giunsa sa paghubit sa Bibliya ang bakakong mga propeta? (Dayon gamita ang usa o mas pa sa mga puntos nga gilaraw sa mga  panid 65-68.)’

O ikaw makaingon: ‘Mapaneguro ko nga ikaw mouyon nga kinahanglang adunay espisipikong ebidensiya sa pagsuportar sa maong seryosong sumbong. Naghisgot ba ang imong ministro ug unsa mang tinong mga ehemplo? (Kon mohisgot ang tagbalay ug pipila ka gipangangkong “mga pagtagna” nga wala mahitabo, gamitang materyal sa  panid 66, ug gikan sa  panid 68 ngadto sa panid 69.)’

Laing posibilidad: ‘Mapaneguro ko nga kon adunay magpasangil kanimo nga susama niana ikaw sa labing menos mopabili sa higayon nga ikapatin-aw ang imong baroganan o punto de bista, di ba mao? . . . Busa mahimong ikapakita ko ba kini kanimo gikan sa Bibliya . . . ?’