Espiritismo

Kahubitan: Pagtuo nga ang espiritung bahin sa mga tawo dili mamatay sa pagkamatay sa kinaiyang lawas ug makaarang magpakigsulti sa mga buhi, sagad pinaagig tawo nga nagasilbing usa ka medyum. Ang ubang tawo nagatuo nga ang matag materyal nga butang ug tanang kinaiyanhong katingalahang butang adunay mga espiritu nga nagapuyo. Ang pamarang maoy paggamit sa gahom nga ginaila nga nagagikan sa daotang mga espiritu. Tanang porma sa espiritismo kusganong ginatunglo diha sa Bibliya.

Posible ba gayod alang sa tawo nga makigsultihanay sa “espiritu” sa usa ka hinigugma nga namatay?

Eccl. 9:5, 6, 10: “Ang mga buhi nasayod nga sila mangamatay, pero bahin sa mga patay, sila dili mahibalo sa bisan unsa . . . Usab, ang ilang gugma ug ilang pagdumot ug ilang kasina nawagtang na, ug sila wala nay bahin sa panahong walay katinoan sa bisan unsa nga butang nga ginabuhat ilalom sa adlaw. Bisan unsa nga hipalgan nga buhat sa imong kamot, buhata kana uban gayod sa imong kusog, kay walay buluhaton ni lalang ni kahibalo ni kaalam sa Sheol [ang lubnganan], ang dapit nga ikaw moadto.”

Ezek. 18:4, 20: “Ang kalag nga nagapakasala—kini mismo mamatay.” (Busa ang kalag dili kay dili mamatay sa pagkamatay  sa lawas ug pinaagig niana ang buhing mga tawo sa kaulahian makaarang sa pagpakigsulti.)

Sal. 146:4: “Ang iyang espiritu mogula, siya mobalik sa iyang yuta; nianang maong adlaw ang iyang mga hunahuna mahanaw gayod.” (Sa pag-ingon nga ang espiritu ‘mogula’ sa lawas, kini maoy laing paagi lamang sa pagsulti nga ang kinabuhi-puwersa mihunong na. Busa, human ang tawo mamatay, ang iyang espiritu dili na maglungtad ingong dili materyal nga makahunahuna ug makatuman sa mga plano nga bulag sa lawas. Dili kana magpaarang sa mga buhi nga makigsultihanay human sa kamatayon sa usa ka tawo.)

Tan-awa usab ang mga panid 103-105, ubos sa ulohang “Kamatayon.”

Wala ba ang Bibliya magbutyag nga si Haring Saul nagpakigsulti sa propetang si Samuel human sa kamatayon ni Samuel?

Ang kasaysayan makaplagan sa 1 Samuel 28:3-20. Ang mga 1Sa 28 bersikulo 13, 14 nagpakita nga si Saul mismo wala makakita kang Samuel apan gihunahuna lang pinasukad sa pagbatbat nga gibutyag sa espiritung medyum nga iyang nakita si Samuel. Desperado si Saul nga buot motuo nga kadto si Samuel ug busa gitugotan ang iyang kaugalingon nga malimbongan. Nag-ingon ang 1Sa 28 bersikulo 3 nga si Samuel namatay ug gilubong. Ang mga kasulatan nga gikutlo ubos sa nag-unang sub-ulohan nagapatin-aw nga walay unsa mang bahin kang Samuel nga buhi didto sa laing dapit ug makaarang sa pagpakigsulti kang Saul. Ang tingog nga nagpakaaron-ingnon nga iya ni Samuel iya sa usa ka impostor o suwitik.

Kang kinsa sa aktuwal nagapakigsulti kadtong nagapaninguha sa pagpakigsulti sa mga patay?

Ang kamatuoran bahin sa kahimtang sa mga patay matin-awng gihisgotan diha sa Bibliya. Apan kinsa ang misulay sa paglimbong sa unang tawhanong paris maylabot sa kamatayon? Gisupak ni Satanas ang pasidaan sa Diyos nga ang pagkamasupilon mohatod sa kamatayon. (Gen. 3:4; Pin. 12:9) Miabot ang panahon, siyempre, nga nahimong dayag nga ang mga tawo nangamatay ingon sa gisulti sa Diyos nga sila mamatay. Nan, sa makataronganon, kinsa ang responsable sa pag-imbento sa ideya nga ang mga tawo dili gayod mamatay apan ang pipila ka espiritung bahin sa tawo dili mamatay sa pagkamatay sa lawas? Ang maong paglimbong tukma kang Satanas nga Yawa, kinsa gihubit ni Jesus “ang amahan sa bakak.” (Juan 8:44; tan-awa usab ang 2 Tesalonica 2:9, 10.) Ang pagtuo nga ang mga patay buhi gayod sa  laing dapit ug nga kita makapakigsulti kanila wala maghatag ug kaayohan sa katawhan. Sa kasukwahi, ang Pinadayag 18:23 nag-ingon nga, pinaagi sa ilang espiritistikong mga buhat nga iya sa Babilonya nga Bantogan, ang “tanang kanasoran napahisalaag.” Ang espiritistikong buhat sa ‘pagpakigsulti sa mga patay’ maoy malinlangong limbong nga magpakontak sa mga tawo sa mga demonyo (mga anghel nga nahimong mahakogong mga rebelde batok sa Diyos) ug sagad motultol sa usa ka tawo sa pagkadungog sa wala paabotang mga tingog ug sa pagsamoksamok pinaagig daotang mga espiritu.

Aduna bay kadaot sa pagpatambal o pagpangayog panalipod pinaagig espiritistikanhong mga paagi?

Gal. 5:19-21: “Ang mga buhat sa unod maoy dayag, ug kini mao ang pakighilawas, kahugaw, malaw-ayng gawi, pagsimbag mga diyosdiyos, espiritismo . . . Mahitungod niining mga butanga ako nagapasidaan kaninyo, sa samang paagi nga ako nagpasidaan na kaninyo, nga silang nagabuhat sa maong mga butang dili makapanunod sa gingharian sa Diyos.” (Ang pagdangop sa espiritismo alang sa panabang nagakahulogan nga ang usa ka tawo nagatuo sa mga bakak ni Satanas maylabot sa kamatayon; siya buot ug tambag gikan sa mga tawo nga nagapanlimbasog sa pagkuhag gahom gikan kang Satanas ug sa iyang mga demonyo. Busa ang maong tawo nagaduyog sa iyang kaugalingon uban kanilang mga kaaway gayod ni Jehova nga Diyos. Inay kay sa tiunay matabangan, ang bisan kinsa nga nagapadayon sa maong buhat mag-antos sa dumalayong kadaot.)

Luc. 9:24: “Bisan kinsa nga buot magaluwas sa iyang kalag [o, kinabuhi] mawad-an niana; pero bisan kinsa nga mawad-an sa iyang kalag tungod kanako [tungod kay siya sumusunod ni Jesu-Kristo] makaluwas niana.” (Kon ang usa ka tawo sa tinuyo nagasupak sa matin-aw nga pagkabutyag nga mga sugo sa Pulong sa Diyos sa tinguha sa pagpanalipod o pagluwas sa iyang presenteng kinabuhi, siya mawad-an sa dayon nga kinabuhi. Pagkabinuang!)

2 Cor. 11:14, 15: “Si Satanas nagatakoban man sa iyang kaugalingon ingong manulonda sa kahayag. Busa dili gayod ikahibulong nga ang iyang mga ministro padayon usab nga nagatakoban sa ilang kaugalingon ingong mga ministro sa pagkamatarong.” (Busa dili gayod kita magpalimbong sa dihang ang pipila sa mga butang nga gihimo sa espiritistikanhong mga paagi daw sa temporaryo makaayo.)

Tan-awa usab ang mga panid 284-288, ubos sa “Pag-ayog mga Sakit.”

 Maalamon ba nga modangop sa espiritistikanhong paagi aron sayron kon unsa ang ugma-damlag o sa pagtino sa kaugalingon sa kalamposan sa pipila ka pangagpas?

Isa. 8:19: “Sa diha nga sila manag-ingon kaninyo: ‘Mangadto kamo niadtong mga espiritista ug mga salamangkero nga managpiyak ug managyagubyob,’ dili ba unta mangadto ang katawhan sa pagpangita sa ilang Diyos?”

Lev. 19:31: “Dili kamo magliso ngadto kanila nga mga espiritista, ug ayaw pagkonsulta sa propesyonal nga mga salamangkero, aron kamo mahugawan pinaagi kanila. Ako mao si Jehova nga inyong Diyos.”

2 Hari 21:6: “[Si Haring Manases] naggamit sa mga salamangka ug nangitag mga tilimad-on ug nagpakitambag sa espiritung mga medyum ug sa propesyonal nga mga magtatagna sa mga panahon. Siya naghimog daghang kadaotan sa panan-aw ni Jehova, sa pagpasuko kaniya.” (Ang maong espiritistikanhong mga buhat sa aktuwal naglangkit sa pagduol kang Satanas ug sa iyang mga demonyo alang sa panabang. Dili ikatingala nga kadto “daotan sa panan-aw ni Jehova,” ug iyang gipahamtang ang mabug-at nga silot kang Manases tungod niana. Apan sa dihang siya naghinulsol ug gibiyaan ang maong daotang mga buhat, siya gipanalangin ni Jehova.)

Adunay unsang kadaot diha sa pagdulag mga dula nga nagalangkit ug usa ka porma sa pagtagna o sa pagpangitag kahulogan nianang maorag usa ka tilimad-on sa kaayohan?

Deut. 18:10-12: “Dili gayod hikaplagan diha kaninyo ang bisan kinsa nga . . . nagagamit sa panagna, usa ka salamangkero o bisan kinsang mangitag mga tilimad-on o diwatahan, o anting-antingan o nagapakitambag sa espiritung medyum o sa propesyonal nga magtatagna sa mga panahon o magpapangutana sa mga minatay. Kay ang tanang nagabuhat niining mga butanga dulumtanan kang Jehova.” (Ang panagna maoy pagtinguha nga mabutyag ang natagong kahibalo o sa pagtagna sa mga hitabo, dili ingong resulta sa panukiduki, kondili pinaagig paghubad sa mga tilimad-on o pinaagig tabang sa labaw-kinaiya nga mga gahom. Gidili ni Jehova ang maong mga buhat taliwala sa iyang mga alagad. Ngano? Kining tanang mga buhata maoy pagdapit sa panagsultihanay o pagkanamandoan pinaagig mahugawng mga espiritu, o mga demonyo. Ang pagsalga sa maong mga butang maoy hilabihang pagkadimatinumanon kang Jehova.)

 Buh. 16:16-18: “Usa ka dalagitang ulipon nga nakabaton sa espiritu, usa ka demonyo sa panagna, misugat kanamo. Siya hingsapian pag-ayo sa iyang mga agalon pinaagi sa iyang pagpanagna.” (Dayag nga, walay si bisan kinsa nga nahigugma sa pagkamatarong ang mokonsulta sa maong tinubdan sa impormasyon, kana man uban sa tininuod nga tinguha o duladula lang. Si Pablo gisamokan na sa iyang pagsininggit, ug siya mimando sa espiritu sa paggula gikan kaniya.)

Ang daotang mga espiritu makahimo ba sa pagsul-ob sa tawhanong porma?

Sa mga adlaw ni Noe, ang masupilong mga anghel nagsul-ob sa tawhanong porma. Sila gayod nagminyo, ug nanganak ug mga anak. (Gen. 6:1-4) Apan, sa miabot ang Lunop, ang maong mga anghel napugos sa pagbalik ngadto sa espiritung dapit. Mahitungod kanila, ang Judas 6 nag-ingon: “Ang mga manulonda nga wala managpabilin sa ilang orihinal nga nahimutangan apan nanagpamiya sa ilang kaugalingong hustong puloy-anan iyang gipahimutang diha sa mga talikala nga dayon ilalom sa tumang kangitngit alang sa panudya sa dakong adlaw.” Dili lamang ang Diyos nagpaubos kanila gikan sa ilang unang langitnong mga pribilehiyo ug nagbalhog kanila ngadto sa tumang kangitngit maylabot sa mga katuyoan ni Jehova, apan ang pagpunting sa mga talikala nagabutyag nga siya nagpugong kanila. Gikan sa unsa? Dayag nga, gikan sa pagsul-ob sa unodnong mga lawas aron sa pagsiping sa mga babaye, sama sa ilang gibuhat sa wala pa ang Lunop. Ang Bibliya nagataho nga ang matinumanong mga anghel, ingong mga mensahero sa Diyos, nagsul-ob sa unodnong lawas (materialize) sa pagtuman sa ilang mga katungdanan hangtod sa unang siglo K.P. Apan pagkahuman sa Lunop, kadtong mga anghel nga nag-abusar sa ilang mga gasa gidumid-an sa katakos sa pagsul-ob sa tawhanong porma.

Apan, makapainteres nga ang mga demonyo makamaniobra gayod sa mga tawo sa pagkakita ug mga panan-awon, ug kon unsa ang ilang makita daw tinuod tan-awon. Sa gitental si Jesus sa Yawa, dayag nga iyang gigamit ang maong mga paagi aron sa pagpakita kang Jesus sa “tanang gingharian sa kalibotan ug sa ilang himaya.”—Mat. 4:8.

Sa unsang paagi ang usa ka tawo makalingkawas gikan sa espiritistikanhong impluwensiya?

Prov. 18:10: “Ang ngalan ni Jehova maoy usa ka malig-ong torre. Nganha niana modangop ang matarong ug pagapanalipdan.”  (Wala kini magkahulogan nga ang paggamit sa personal nga ngalan sa Diyos magasilbeng anting-anting aron sa paghingilin sa panulay. Ang “ngalan” ni Jehova nagahawas sa maong Persona mismo. Kita mapanalipdan sa dihang kita makadangat sa pag-ila kaniya ug mosalig kaniya sa bug-os, nga nagapasakop sa iyang awtoridad ug nagasugot sa iyang mga sugo. Kon buhaton ta kini, nan kita makatawag kaniya sa panabang, nagagamit sa iyang personal nga ngalan, siya motagana sa panalipod nga iyang gisaad diha sa iyang Pulong.)

Mat. 6:9-13: “Nan, mag-ampo gayod kamo nga sama niini: ‘ . . . Ayaw kamig dad-a sa tentasyon, kondili luwasa kami gikan sa daotang usa.’” Kinahanglan usab nga ikaw “magmalahutayon sa pag-ampo.” (Roma 12:12) (Ang Diyos magapatalinghog sa maong mga pag-ampo gikan kanilang sa tininuod nagatinguha sa pagkahibalo sa kamatuoran ug sa pagsimba kaniya diha sa paagi nga makapahimuot kaniya.)

1 Cor. 10:21: “Dili kamo arang makaambit sa ‘lamesa ni Jehova’ ug sa lamesa sa mga demonyo.” (Sila nga gusto sa pakighigala ug panalipod ni Jehova kinahanglang mobulag sa tanang pakig-ambit sa espiritistikanhong mga tigom. Uyon sa panig-ingnan nga gitala sa Buhat 19:19, hinungdanon usab sa paglaglag o sa hustong pagwagtang sa tanang mga butang nga gipanag-iya sa usa nga maylabot sa espiritismo.)

Sant. 4:7: “Busa, magpasakop kamo sa Diyos; apan sukli ang Yawa, ug siya mokaratil gikan kaninyo.” (Sa pagbuhat niini, magmakugihon sa pagkat-on sa kabubut-on sa Diyos ug sa pagpadapat niana sa imong kinabuhi. Uban sa gugma sa Diyos nga nagalig-on kanimo batok sa kahadlok sa tawo, ayaw gayod pakig-ambit sa bisan unsang mga kustombre nga nalambigit sa espiritismo o sa pagsunod sa bisan unsang mga lagda nga ginapatuman sa usa ka espiritista.)

Isul-ob “ang bug-os nga hinagiban gikan sa Diyos” nga gihubit diha sa Efeso 6:10-18 ug magmasiboton nga huptan ang matag bahin niana diha sa maayong kahimtang.