Espiritu

Kahubitan: Ang Hebreong pulong nga ruʹach ug ang Gregong pneuʹma, nga sagad gihubad nga “espiritu,” adunay pipila ka kahulogan. Ang tanan niini nagapunting nianang dili makita sa tawhanong panan-aw ug nagahatag pamatuod sa puwersa sa paglihok. Ang Hebreo ug Gregong mga pulong gigamit may kalabotan sa (1) hangin,  (2) ang aktibong kinabuhing-puwersa diha sa yutan-ong mga linalang, (3) ang matulorong puwersa nga nagasumikad sa mahulagwayong kasingkasing sa usa ka tawo ug magpasulti ug magpabuhat kaniya sa mga butang diha sa tinong paagi, (4) dinasig nga mga kapahayagan nga nagagikan sa tinubdan nga dili makita, (5) espiritung mga persona, ug (6) aktibong gahom sa Diyos, o balaang espiritu. Ang pipila niining maong mga paggamit ginahisgotan dinhi nga maylabot sa mga ulohan nga hayan motungha sa ministeryo sa kanataran.

 Unsa ang balaang espiritu?

Ang usa ka pagtandi sa mga teksto sa Bibliya nga nagatumong sa balaang espiritu nagapakita nga kini gihisgotan ingong ‘nagpuno’ sa katawhan; sila mahimong ‘bawtismohan’ pinaagi niini; ug sila mahimong “dihogan” pinaagi niini. (Luc. 1:41; Mat. 3:11; Buh. 10:38) Walay motukma niining mga pulonga kon ang balaang espiritu usa ka persona ugaling.

Gipunting usab ni Jesus ang balaang espiritu ingong “magtatabang” (Grego, pa·raʹkle·tos), ug siya nag-ingon nga kining maong magtatabang “motudlo,” “mopamatuod,” “mosulti,” ug ‘mopatalinghog.’ (Juan 14:16, 17, 26; 15:26; 16:13) Dili man talagsaon diha sa Kasulatan nga pakaingnong tawo (personified) ang usa ka butang. Pananglitan, ang kaalam gikaingon nga adunay “mga anak.” (Luc. 7:35) Ang sala ug kamatayon gikaingong mga hari. (Roma 5:14, 21) Samtang ang pipila ka teksto nag-ingon nga ang espiritu “nagsulti,” ang ubang mga luna nagpatin-aw nga kini gihimo pinaagig mga manulonda o mga tawo. (Buh. 4:24, 25; 28:25; Mat. 10:19, 20; itanding Buhat 20:23 uban sa Buh 21:10, 11.) Sa 1 Juan 5:6-8, dili lamang ang espiritu kondili usab “ang tubig ug ang dugo” gikaingon nga ‘nagapamatuod.’ Busa, wala niining mga pulonga nga makaplagan niining mga tekstoha mismo ang nagpamatuod nga ang balaang espiritu maoy usa ka persona.

Ang hustong pagkaila sa balaang espiritu kinahanglang mohaom sa tanang kasulatan nga nagapunting sa maong espiritu. Uban niining panghunahunaa, maoy makataronganon sa pagkanayon nga ang balaang espiritu maoy aktibong gahom sa Diyos. Kini dili persona kondili gamhanang puwersa nga nagagikan sa Diyos mismo aron sa pagpalampos sa iyang balaang kabubut-on.—Sal. 104:30; 2 Ped. 1:21; Buh. 4:31.

Tan-awa usab ang mga panid 413, 414, ubos sa ulohang “Trinidad.”

Unsay magapamatuod nga ang usa ka tawo aduna gayoy balaang espiritu, o “ang Espiritu Santo” (KJ)?

Luc. 4:18, 31-35: “[Si Jesus nagbasa gikan sa linukot nga basahon  ni manalagnang Isaias:] ‘Ang espiritu ni Jehova ania kanako, kay iya akong gidihogan sa pagmantala sa maayong balita’ . . . Ug siya milugsong ngadto sa Capernaum, usa ka siyudad sa Galilea. Ug siya nagpanudlo kanila sa adlawng igpapahulay; ug sila nahibulong sa iyang pagpanudlo, kay ang iyang pagpamulong inubanan man sa kagahom. Karon sa sulod sa sinagoga didtoy tawo nga may espiritu, usa ka mahugawng demonyo, ug siya misinggit sa makusog nga tingog . . . Apan gibadlong kini ni Jesus, nga nag-ingon: ‘Hilom diha, ug mogula ka kaniya.’ Busa, sa gikalamba ang tawo diha sa ilang taliwala, ang demonyo migula kaniya nga wala makahimog kadaot kaniya.” (Unsay nagpamatuod nga nahuptan ni Jesus ang espiritu sa Diyos? Ang kasaysayan wala mag-ingon nga siya nangurog o misinggit o milihok sa kasibot. Hinunoa, kana nag-ingon nga siya misulti inubanan sa kagahom. Pagamatikdan, hinuon, nga sa maong okasyon ang demonyohanong espiritu nagpalihok sa usa ka tawo sa pagsinggit ug pagkalamba diha sa salog.)

Ang Buhat 1:8 nag-ingon nga sa madawat sa mga sumusunod ni Jesus ang balaang espiritu sila mahimong mga saksi bahin kaniya. Sumala pa sa Buhat 2:1-11, sa nadawat na nila ang maong espiritu, ang mga nakapaniid nasumeter tungod sa punto nga, bisan tuod ang mga nanagsulti maoy tanan mga Galileano, sila nanagsulti maylabot sa kahibulongang mga butang sa Diyos diha sa mga pinulongan nga sinati ngadto sa daghang mga langyaw kinsa presente. Pero ang rekord wala mag-ingon nga dihay bisan unsang emosyonal nga pagsulbong sa bahin kanilang nakadawat sa espiritu.

Pagamatikdan gayod nga sa nakadawat si Elisabet sa balaang espiritu ug unya namulong sa “makusog nga tingog” siya wala magtambong ug tigom sa pagsimba apan nangumosta sa miduaw nga paryente. (Luc. 1:41, 42) Sa dihang, ingon sa gitaho sa Buhat 4:31, ang balaang espiritu midangat ibabaw sa usa ka panagkatigom sa mga tinun-an, ang dapit nauyog, apan ang epekto sa maong espiritu diha sa mga disipulo mao, sila wala mangurog o magligidligid, kondili sila ‘nagsulti sa pulong sa Diyos nga walay kahadlok.’ Mao man usab karon, ang pagsulti sa pulong sa Diyos nga walay kahadlok, madasigong nagapakig-ambit sa buluhatong pagpamatuod—mao kini ang nagapamatuod nga ang usa ka tawo nakabaton sa balaang espiritu.

Gal. 5:22, 23: “Ang bunga sa espiritu mao ang gugma, kalipay, kalinaw, taas-pailob, kalulot, pagkamaayo, pagtuo, kaaghop, pugong-kaugalingon.” (Mao kining bungaha, inay kay pag-utbo sa relihiyosong kasibot, ang kinahanglang tinoon sa usa sa dihang nagapangita sa mga tawo kinsa nakahupot gayod sa espiritu sa Diyos.)

 Ang abilidad ba sa pagsulti uban ang dakong emosyon sa usa ka pinulongan nga ang usa ka tawo wala gayod magtuon nagapamatuod nga siya adunay espiritu sa Diyos?

Tan-awang lintunganayng ulohang “Pinulongan, Pagsulti sa.”

Ang milagrosong pagpanambal nga ginabuhat sa atong adlaw pinaagi ba ug espiritu sa Diyos?

Tan-awang lintunganayng ulohang “Pag-ayog mga Sakit.”

Kinsa ang nabawtismohan sa balaang espiritu?

Tan-awang panid 72, ubos sa “Bawtismo,” usab ang lintunganayng ulohang “Pagkainanak Pag-usab.”

Aduna bay espiritung bahin sa tawo nga dili mamatay sa pagkamatay sa lawas?

Ezek. 18:4: “Ang kalag nga nagapakasala—kini mismo mamatay.” (RS, NE, KJ, ug Dy tanan naghubad sa Hebreong pulong neʹphesh niining bersikuloha ingong “kalag,” busa nag-ingon nga ang kalag mao ang mamatay. Ang ubang mga hubad nga naghubad sa neʹphesh ingong “kalag” sa ubang mga luna naggamit sa pulong “ang tawo” o “ang usa” niining bersikuloha. Busa, ang neʹphesh, ang kalag, mao ang tawo, dili ang dili materyal nga bahin kaniya nga dili mamatay sa dihang ang lawas mamatay na.) (Tan-awang lintunganayng ulohang “Kalag” alang sa dugang mga detalye.)

Sal. 146:4: “Ang iyang espiritu mogula, siya mobalik sa iyang yuta; nianang maong adlaw ang iyang mga hunahuna mahanaw gayod.” (Ang Hebreong pulong dinhi nga gihubad “espiritu” nagsumikad sa ruʹach. Ang ubang mga taghubad naghubad nianang “gininhawa.” Sa dihang ang maong ruʹach, o aktibong kinabuhi-puwersa, mobiya sa lawas, ang mga hunahuna sa maong tawo mahanaw; dili kana magpadayon didto sa laing dapit.)

Eccl. 3:19-21: “Adunay nagakahatabo sa mga anak nga lalaki sa mga tawo ug adunay nagakahatabo sa mananap, ug sila adunay parehong mahitabo. Ingon nga mamatay ang usa, maingon man usab ang lain; ug silang tanan adunay usa lamang ka espiritu, mao nga ang tawo dili labaw sa mananap, kay ang tanan kakawangan. Ang tanan mangadto sa usa ka dapit. Silang tanan gikan sa abog, ug silang tanan mobalik sa pagkaabog. Kinsay nasayod sa espiritu sa mga anak sa katawhan, kon kana ba mosaka sa itaas; ug ang espiritu sa mananap, kon kana ba manaog padulong sa yuta?” (Tungod sa panulondon sa sala ug kamatayon gikan kang Adan, ang mga tawo tanang mangamatay ug mobalik sa abog, sama gayod  sa mga mananap. Apan ang kada tawo ba adunay espiritu nga nagapadayong buhi ingong intelihenteng personalidad human kana mohunong sa paglihok diha sa lawas? Wala; ang Eccl 3 bersikulo 19 nagatubag nga ang mga tawo ug mga mananap “silang tanan adunay usa lamang ka espiritu.” Pinasukad lamang sa tawhanong pagpaniid, walay makatubag nga awtoridadnon sa pangutana nga gisukna sa Eccl 3 bersikulo 21 maylabot sa espiritu. Apan ang Pulong sa Diyos nagatubag nga walay unsa man nga nabatonan sa mga tawo ingong resulta sa pagkahimugso nga maghatag kanilag pagkalabaw ibabaw sa mga mananap sa panahong sila mamatay. Apan, tungod sa maluloy-ong tagana sa Diyos pinaagi ni Kristo, ang kalaomang mabuhing walay kataposan nabuksan ngadto sa mga tawo nga nagabaton ug pagtuo, apan dili ngadto sa mga mananap. Alang sa daghan sa katawhan, kana mahimong posible pinaagig pagkabanhaw, sa dihang ang aktibong kinabuhi-puwersa gikan sa Diyos magpabuhi kanila pag-usab.)

Luc. 23:46: “Si Jesus mituwaw sa makusog nga tingog ug miingon: ‘Amahan, nganha sa imong mga kamot itugyan ko ang akong espiritu [Grego, pneuʹmaʹ].’ Sa nakapamulong siya niini, nabugto ang iyang gininhawa.” (Matikdi nga si Jesus namatay. Sa dihang mibiya ang iyang espiritu siya wala mopaingon sa langit. Sa ikatulo ka adlaw na lamang sukad niini nga si Jesus gibanhaw gikan sa mga patay. Dayon, ingon sa gipakita sa Buhat 1:3, 9, maoy kapin sa 40 ka adlaw antes siya misaka sa langit. Busa, unsa ang kahulogan sa gipamulong ni Jesus sa panahon sa iyang kamatayon? Siya nag-ingon nga siya nahibalo nga, sa dihang siya mamatay, ang iyang mga kalaoman sa umaabot nga kinabuhi sa bug-os nahasalig sa Diyos. Alang sa dugang mga komento mahitungod sa ‘espiritu nga mobalik sa Diyos,’ tan-awang panid 92, ubos sa ulohang “Kalag.”)

Kon Adunay Moingon—

‘Ikaw ba nakabaton sa balaang espiritu (o sa Espiritu Santo)?’

Mahimong tubagon mo: ‘Oo, ug mao kanay hinungdan nga ania ako sa imong ganghaan karon. (Buh. 2:17, 18)’

O ikaw makaingon: ‘Kana ang nagpaarang kanako sa pagpakig-ambit sa Kristohanong ministeryo. Pero akong nakaplagan nga dili ang tanan adunay samang ideya kon unsay magpamatuod nga ang usa ka tawo nakabaton gayod sa espiritu sa Diyos. Unsa may imong pangitaon?’ Dayon tingali modugang: (Panaghisgot sa pipila sa materyal sa mga panid  173, 174.)