Espiritu sa Kalibotan

Kahubitan: Ang matukmorong puwersa nga nagaimpluwensiya sa tawhanong katilingban nga gilangkoban niadtong dili mga alagad ni Jehova nga Diyos, nga nagapahinabo sa maong mga tawo sa pagsulti ug pagbuhat sa mga butang sumala sa kinaugalingong panig-ingnan. Bisan tuod ang mga tawo magabuhat subay sa indibiduwal nga mga kapilian, sila nga nagapadayag ug espiritu sa kalibotan nagahatag ug pamatuod sa pipila pasukaranang mga tinamdan, mga paagi sa pagbuhat sa mga butang, ug mga tumong sa kinabuhi nga kumon sa presenteng sistema sa mga butang nga si Satanas mao ang magmamando ug diyos.

Ngano ang pagkanabulingan sa espiritu sa kalibotan usa ka butang nga kabalak-an gayod?

1 Juan 5:19: “Ang tibuok kalibotan anaa sa gahom sa daotan.” (Si Satanas nagpalambo sa espiritu nga nangibabaw sa panghunahuna ug mga kalihokan niadtong katawhan nga dili aprobadong mga alagad ni Jehova. Kana espiritu sa pagkahakog ug garbo nga makaylapon kaayo nga sama sa hangin nga ginaginhawa sa mga tawo. Gikinahanglan natong magmabinantayon pag-ayo nga dili mailalom sa gahom ni Satanas pinaagig pagtugot nga ang maong espiritu mohulma sa atong mga kinabuhi.)

Pin. 12:9: “Gitambog ang dakong dragon, ang orihinal nga serpente, siya nga gitawag nga Yawa ug Satanas, mao ang nagpasalaag sa tibuok pinuy-anang yuta; siya gitambog ngadto sa yuta, ug ang iyang mga manulonda gitambog uban kaniya.” (Sukad gayod kini nahitabo, human mahimugso ang Gingharian sa 1914, ang impluwensiya ni Satanas ug sa iyang mga demonyo nagmalukopon gayod taliwala sa katawhan. Ang iyang espiritu naghulhog sa katawhan sa mga buhat sa nagtubong kahakog ug kabangis. Ilabina silang nagapanlimbasog sa pag-alagad kang Jehova ginapit-os gayod aron mahimong bahin sa kalibotan, sa pagbuhat sa ginabuhat sa uban, ug sa pagbiya sa matuod nga pagsimba.)

Unsa ang pipila sa mga kinaiya sa espiritu sa kalibotan nga batok niana kita kinahanglang magmabinantayon?

1 Cor. 2:12: “Karon kita nakadawat, dili sa espiritu sa kalibotan, kondili sa espiritu nga gikan sa Diyos, aron kita managpakasabot sa mga butang nga malulotong gihatag kanato sa Diyos.” (Kon ang espiritu sa kalibotan mogamot diha sa panghunahuna ug mga tinguha sa usa ka tawo, ang bunga niana sa dili madugay makita diha sa mga buhat nga nagabutyag nianang espirituha. Busa, ang  pagbiya sa espiritu sa kalibotan nagakinahanglan dili lang sa paglikay sa di-kristohanong mga buhat ug mga paghingapin kondili usab sa pagpunting sa gamot sa maong suliran pinaagig pag-ugmad sa mga tinamdan nga nagasumbaliksilaw sa espiritu sa Diyos ug dalisayng gugma sa iyang mga paagi. Kini kinahanglang imong pagahinumdoman samtang imong pagatagdon ang mosunod nga mga timailhan sa espiritu sa kalibotan.)

Pagbuhat sa gustong buhaton sa usa ka tawo, nga walay pagtagad sa kabubut-on sa Diyos

Si Eva gidaldal ni Satanas sa paghukom sa iyang kaugalingon kon unsa ang maayo ug daotan. (Gen. 3:3-5; sa kasukwahi tan-awang Proverbio 3:5, 6.) Ang daghan nga nagasunod sa dalan ni Eva wala makaila sa kabubut-on sa Diyos alang sa katawhan, ni sila interesado sa pagtino niana. Basta “buhaton nila ang ilang gusto,” matod nila. Sila nga nahibalo sa mga tulomanon sa Diyos ug nagapaninguha sa pagtuman niana nagakinahanglan nga magmabinantayon nga ang espiritu sa kalibotan dili magpahinabo kanila sa tinuyong pagsalikway sa tambag sa Pulong sa Diyos nga hayan ginaisip nila ingong “diyutayng mga butang.”—Luc. 16:10; tan-awa usab ang “Independensiya.”

Pagsanong sa mga situwasyon binase sa garbo

Mao si Satanas ang unang nagtugot sa hinobrang pag-isip sa iyang kaugalingon sa pagdaot sa iyang kasingkasing. (Itanding Ezekiel 28:17; Proverbio 16:5.) Ang garbo maoy puwersa nga mabahinon diha sa kalibotan nga siya ang magmamando, nga nagapahinabo sa mga tawo sa pag-isip sa ilang kaugalingon nga mas maayo kay kanila nga ila sa laing mga rasa, mga nasod, mga pinulongan, ug ekonomikanhong kahimtang. Bisan sila nga nagaalagad sa Diyos kinahanglan tingaling wagtangon ang mga nahibilin sa maong mga pagbati. Gikinahanglan usab nila nga magbantay aron ang garbo dili magpahinabo kanilang himoong mga isyu ang gagmayng mga butang, o mahimong ali sa ilang pag-ila sa ilang kaugalingong kasaypanan ug pagdawat sa tambag ug sa ingon makabenepisyog dako sa mahigugmaong tabang nga ginatagana ni Jehova pinaagi sa iyang organisasyon.—Roma 12:3; 1 Ped. 5:5.

Pagpadayag ug rebelyosong tinamdan sa awtoridad

Ang rebelyon nagsugod kang Satanas, kansang ngalan nagakahulogang “Magsusupak.” Pinaagi sa iyang pagsukol kang Jehova, si Nimrod, kansang ngalan mahimong magkahulogang “Magrebelde Kita,” nagbutyag nga siya anak ni Satanas. Ang paglikay nianang espirituha magpapugong sa mahadlokon-Diyos nga mga tawo sa pagsukol sa kalibotanong mga magmamando (Roma 13:1); motabang kini sa mga bata sa pagpasakop sa hinatag-Diyos nga awtoridad  sa ilang mga ginikanan (Col. 3:20); kini mahimong panalipod batok sa pagdapig sa mga apostata, kinsa nagasalikway kanilang gitugyanan ni Jehova sa kaakohan diha sa iyang makitang kapunongan.—Jud. 11; Heb. 13:17.

Pagpatuyang sa mga kailibgon sa makasasalang unod

Ang impluwensiya niini makita ug madungog bisan asa. Adunay panginahanglan kanunay nga magmabinantayon batok niana. (1 Juan 2:16; Efe. 4:17, 19; Gal. 5:19-21) Ang panghunahuna ug mga kailibgon nga hayan mohatod ngadto sa mas seryosong mga ebidensiya niana mahimong madayag diha sa sinultihan sa usa ka tawo, sa iyang mga komedya, sa mga awit nga iyang gipatalinghogan, ang matang sa sayaw nga siya mipakiay, o sa iyang pagtan-aw sa mga talan-awon nga nagapasiugda sa imoral nga sekso. Kining bahina sa espiritu sa kalibotan madayag mismo diha sa abuso sa droga, paghuboghubog, panapaw, pakighilawas, ug homoseksuwalidad. Kini usab madayag sa dihang ang usa ka tawo nga sa di-kasulatanhon, apan tingali sa legal, nagadiborsiyo sa iyang kapikas ug mangasawa ug lain.—Mal. 2:16.

Pagtugot sa kinabuhi sa usa nga pagagamhan sa tinguha sa pagbaton sa iyang makita

Ang maong tinguha mao ang giugmad ni Satanas diha kang Eva, naghaylo kaniya sa pagbuhat niadtong nakadaot sa iyang relasyon uban sa Diyos. (Gen. 3:6; 1 Juan 2:16) Malig-ong gisalikway ni Jesus ang maong tentasyon. (Mat. 4:8-10) Sila nga buot magpahimuot kang Jehova nagakinahanglan nga magmabinantayon aron dili nila matugotan ang komersiyal nga kalibotan sa pagpalambo sa maong espiritu diha kanila. Mosangpot ang dakong kagul-anan ug espirituwal nga kadaot alang niadtong malit-agan niana.—Mat. 13:22; 1 Tim. 6:7-10.

Pagpasigarbo sa mga kabtangan sa usa ug sa gikaingong mga kalamposan

Kining buhata, usab, “nagagikan sa kalibotan” ug kinahanglang isalindot niadtong mahimong mga alagad sa Diyos. (1 Juan 2:16) Kini napasukad diha sa garbo, ug inay kay palig-onon ang uban sa espirituwal, kini nagapatabyogtabyog sa materyal nga mga panghaylo ug mga panan-awon sa kalibotanong tingusbawan sa ilang atubangan.—Roma 15:2.

Pagpasagad sa mga pagbati sa usa sa abusadong sinultihan ug mabangis nga mga buhat

Kini maoy “mga buhat sa unod” nga niana ang daghang tawo kinahanglang makigbugno gayod. Uban sa dalisay nga pagtuo ug sa tabang sa espiritu sa Diyos sila makabuntog man sa kalibotan  inay kay tugotan ang espiritu niana sa pagmando kanila.—Gal. 5:19, 20, 22, 23; Efe. 4:31; 1 Cor. 13:4-8; 1 Juan 5:4.

Pagpasukad sa mga paglaom ug mga kahadlok sa usa kon unsa ang arang mabuhat sa mga tawo

Ang unodnong tawo nagatagad sa iyang makita ug mahikap ingon nga hinungdanon gayod. Ang iyang mga paglaom ug mga kahadlok ginapasukad sa mga saad ug mga paghulga sa ubang tawo. Siya nagatutok sa tawhanong mga magmamando alang sa panabang ug siya manghupaw kon sila mapakyas. (Sal. 146:3, 4; Isa. 8:12, 13) Alang kaniya, kini mao lamang ang kinabuhi. Ang mga hulga sa kamatayon daling magpaulipon kaniya. (Sa kasukwahi, tan-awang Mateo 10:28; Hebreohanon 2:14, 15.) Apan ang bag-ong puwersa magpalihok sa mga hunahuna sa mga tawo kinsa makaila kang Jehova, sila nga magapuno sa ilang mga hunahuna ug mga kasingkasing uban sa iyang mga saad ug kinsa makakat-on sa pagliso ngadto kaniya sa panabang sa matag panahon sa panginahanglan.—Efe. 4:23, 24; Sal. 46:1; 68:19.

Paghatag ngadto sa mga tawo ug sa mga butang sa masimbahong pasidungog nga iya sa Diyos

“Ang diyos niining sistema sa mga butang,” si Satanas nga Yawa, nagaaghat sa tanang matang sa mga buhat nga nagapasimang sa hinatag-Diyos sa tawo nga hilig sa pagsimba. (2 Cor. 4:4) Ang ubang mga magmamando gitagad ingong mga diyos. (Buh. 12:21-23) Mga minilyon ang nagayukbo atubangan sa mga idolo. Mas pang mga minilyon ang nagasimba sa mga aktor ug talagsaong mga magdudula. Ang mga selebrasyon sagad nagahatag ug dili angay nga pasidungog ngadto sa indibiduwal nga mga tawo. Pagkakumon kaayo kining espirituha nga sila kinsa tinuod nga nahigugma kang Jehova ug gusto sa paghatag kaniya ug bug-os nga pagkamahinalaron kinahanglang magmaalisto sa impluwensiya niana sa matag adlaw.